Amadoso G’abantu Basoma Ebitabu Birhu

K’enderho za Paolo ziri omu lwandiko lwa 1 Abakorinti 15:29 ziyerekine oku hali Bakristu baguma na baguma b’embere babatizibwe enyanya z’abafû?

Nanga, oli Ebibliya oli endibi za bene bantu ntaco ciyerekine oku ebya ntyo byabire.

Oku olo lwandiko lusomwa omu Bibliya nyinji kunarhume bantu baguma baguma barhanya mpu obubatizo bw’omu mishi okw’izino ly’olufû bwajijirwe omu mango g’entumwa Paolo. Kwa lwiganyo, hali Bibliya nguma bayandisiremwo ntya: “Erhi akaba nta bufûke bwanahabe, gurhi balya babatizibirwe erhi bafû barhuma banajire?”​—New International Version.

Cikoki, lolaga ebi aba bantu babirhi basomire binji okubiyerekire Ebibliya badesire. Dr. Gregory Lockwood ayerekine oku entanya z’okuderha oku “obubatizo bwajijirwe erhi bantu bafîre barhuma” bwanaba “bubatizo buli buzibu okukuhamiriza n’endibi z’abantu erhi n’Ebibliya.” Ntyo ko n’oko Profesere ohamagalwa, Gordon D. Free naye ayandisire: “Ntaho hoshi-hoshi rhwakasoma oli omu ndibi erhi omu Bibliya hayerekine oku ububatizo bwa ntyo bwajijirwe. Endagano Mpyahya erhadesiri cici lugenda ogo mwanzi, ntako kanisa kamanyikine oku eyo nkomêdu ya ntyo yajijirwemwo, ciru n’omu ndeko z’amadîni g’eciporo, barhajirâga mw’eyo nkomêdu omu myaka yakulikiraga.”

Ebibliya eyerekine oku abanafunzi ba Yezu bal’ikwanine bagende “bajire abanafunzi omu mashanja goshi, banababatize . . . , n’okubayigiriza okushimba byoshi” anabarhegesire. (Mt. 28:19, 20, NWT) Embere omuntu abe mwanafunzi wa Yezu mubatize, alishinganine arhangiba na bumanye bulebe n’okuba n’obuyemere muli Yehova n’Omugala n’okukenga amarhegeko gabo. Omuntu wal’ikola ali omu nshînda arhakacihashire ajira ntyo; ciru n’Omukristu ocizîne arhakacijirire owafîre ntyo.​—Muh. 9:5, 10; Yn. 4:1; 1 Kr. 1:14-16.

Erhi akaba ntyo kobiyosire, bici Paolo alonzagya okuganirira?

Bakorinti baguma baguma bakag’ilahira oku abafîre barhakacifûka. (1 Kr. 15:12) Paolo yehe al’iyemire oku abafîre banafûke. Ayerekana oku ‘ngasi lusiku erhi ali omu lufû.’ Adesîre ntyo erhi anacizîne. Cikoki ciru akaba abuganyire mazibu manji gakarhumire afâ, al’ilangalire oku anafûke nka ciremwa c’obunya-mûka c’obuhashe nk’oku Yezu anafûkaga.​—1 Kr. 15:30-32, 42-44.

Abakorinti bal’ishinganine okuhugûkwa oku okuba Mukristu mushîge amavurha kwal’ikuhûnyire bagere omu mazibu g’akalamo n’okufâ embere bafûlwe. Okubatizibwa “muli Kristu” kuhizirwemwo okubatizibwa “omu lufû lwage.” (Rm. 6:3) Obo bubatizo bwabo bw’olwiganyo bunahikire aha bwabaheka ebwa lufû lw’okunali na buzinda bafûke baje empingu.

Myaka ibirhi erhi kulusha enyuma z’okubatizibwa kwa Yezu omu mishi, abwîra baganda bage babirhi ntya: “Obubatizo nayish’ishibatizibwa, mwabubatizibwa.” (Mk. 10:38, 39) Yezu arhali obubatizo abatizibagwa omu mishi bwalonzagya okuganirira. Cikone, alonzagya okuganirira akalamo kage kw’obwishwekerezi karhumire afâ. Paolo ayandikira abashîge amavurha oku bali omu ‘malibuko boshi naye lyo bayish’ikuzibwa haguma naye.’ (Rm. 8:16, 17; 2 Kr. 4:17) Ntyo, abashîge amavurha nabo bashinganine bafê lyo bafûka baje empingu.

Enderho za Paolo zanahindulwa bwinja ntya: “Akaba arhali ntyo kobiyosire, bici balya bayish’ibatizibwa lyo bafâ bashinganine okujira? Erhi akaba abafîre barhakafûka, bulya gurhi bakabatizibwa lyo bayish’ifâ?”