Ocibizibuhya Obwîra Bwawe Haguma na Yehova

NGASI mwaka, bibuzi binji bizigirwa bya Nnâmahanga binagaluke omu cigamba c’Ecikristu. Orhanye oku “bushagaluke [buba] omu mpingu” erhi ngasi muguma wa mulibo agalukira Nnâmahanga! (Lk. 15:7, 10) Erhi akaba wacizind’igaluka omu okuli, wanayemera n’obwalagale oku Yezu, bamalahika na Yehova bashagalusire bwenene okubona ocibir’iyimanga bwinja omu okuli. Cikone, erhi wakacibizibuhya obwîra bwawe haguma na Yehova hali amazibu wakalwisa. Mazibu gahi maguma na maguma ago wakabuganana nago na bici byakakurhabala ly’ogahima?

MAZIBU GAHI WAKABUGANANA NAGO?

Bantu banji banagendekere bayumva bavunisire omurhima erhi bacibigaluka omu cigamba. Nkaba ohugûsirwe oku Mwami Daudi akagiciyumva. Ciru n’enyuma z’okubabalirwa ebyaha byage, aderha ntya: “Ebyaha byani byantalusire olugero.” (Enna. 40:12; 65:3, NWT) Erhi muntu mulebe acibigalukira Yehova, hali amango ayusa myaka minji ali acitumuza erhi kuyumva enshonyi. Mwali wirhu Isabelle ajijire myaka 20 na kulusha ali mutengwa.a Adesire ntya: “Byali bizibu kuli niè okuyemera oku kobinali Yehova ambabalire.” Erhi wakakacivuna omurhima, wanacib’ihikira aha wazambanya omu hali y’ekiroho. (Mig. 24:10) Ojire okwawe koshi ly’oko kurhakuhikiraga.

Abandi banayobohe oku nkaba barhacihash’igalule obwîra bwabo bwinja bagwerhe haguma na Yehova. Enyuma z’okugalukira Yehova, Antoine aderha ntya: “Nakagiciyumva nka nayibagire ebintu byoshi biyerekire akalamo kani k’Ecikristu.” Okuciyumva ntyo kunarhume bantu banji bagalukira Yehova barhacihâna loshi omu mikolo y’ekiroho.

Kwa lwiganyo, muntu mulebe enyumpa yage nyinja esherere enyanya z’ecihonzi cidârhi anaciyumva kubi bwenene hano arhanya oku kasanzi n’ebi acibijira ly’acibiyiyubaka. Ko n’oko, erhi akaba obwîra bwawe haguma na Yehova bwasherire enyanya z’ecaha cizibu wajiraga, wanaciyumva oku okucibijira ehali yawe y’ekiroho ebe nyinja kwahûna bushiru bunji bwenene. Cikone hali ebyakakurhabala.

Yehova arhulalisire erhi: “Muyishage rhuyumvanye.” (Iz. 1:18, Mashi Bible) Wajijire okwawe koshi ly’ ‘oyumvanya’ na Yehova. Yehova akuzigire okubona wajijire ntyo. Okakengera oku: Wahîre Yehova eci akagwarhirako ly’ashuza kuli ebi Shetani akamushobeka!—Mig. 27:11.

Erhi ojira ntyo, wayegerera Yehova, naye akulaganyize oku okuyegerera. (Yk. 4:8) Cikone, oshinganine ojire binji ahanyuma n’okumanyikana n’abandi oku wacibiriba muguma w’omu cigamba. Oshinganine ogendekere wazibuhya obwîra bwawe haguna na Sho na Mwîra wawe Yehova. Gurhi wakajiramwo ntyo?

OCIHIRIREHO EMIHIGO Y’OLUGERO

Wanarhang’icihiriraho emihigo y’olugero. Nkaba ociri wakengera omusingi gw’ehali yawe y’ekiroho, k’okuderha obumanye ogwerhe lugenda Yehova n’ebiragane byage. Cikone olagirire okucibizibuhya akalamo kawe k’Omukristu, ako kalamo kahiziremo okuhubiri n’okukaja oku ntimanano ngasi mango. Olole emihigo wakacihiriraho.

Okaganiza Yehova ngasi mango. Sho wawe w’omu mpingu amanyire oku entanya z’okucitumuza zirhahwiri zanarhuma waba n’amazibu gw’okumushenga. (Rm. 8:26) Ciru akaba ntyo, ‘okashenga burhahusa,’ obwire Yehova kunganaci alonzize okuba mwîra wage. (Rm. 12:12) Andrej akengire ntya: “Nakagicitumuza n’okuyumva enshonyi bwenene. Cikone, enyuma za ngasi isala nakacibic’iyumva omurhula omu bwenge.” Erhi akaba orhaba omanyire ebi wakakahira omu masala gawe, wanalola amasala ga Mwami Daudi waciyunjuzagya gali omu Ennanga 51 na 65.

Okayiga Ebibliya ngasi mango. Okujira ntyo wanaba erhi oli wacilisa omu hali y’ekiroho na kandi kwanakurhabala ozibuhye obwîra bwawe haguma na Yehova. (Enna. 19:7-11) Filipe adesire ntya: “Okurhaba n’eprograme nyinja y’ekiroho co cali cirhumire cirhanzi canjiraga mbe muzamba omu hali y’ekiroho na buzinda naleka Yehova. Ntalonzagya ncibigayisa Yehova bwakabirhi, kuhika buno nahizire okukajira ifunzo lyani ly’Ebibliya ngasi mango lyo liba bulanzi bwani.” Nawe wanajira ntyo. Ka kurhakaba kwinja odose omwîra wawe okuzire kiroho amahano ly’amanya emyanzi eshinganine wakakayiga omw’ifunzo lyawe wenene?

Ocibizibuhya obwîra bwawe haguma na bene winyu na bali binyu. Bantu baguma na baguma bagaluka omu cigamba banayobohe erhi kurhanya oku abandi babà n’entanya mbi kubayerekera. Larissa adesire ntya: “Nakagiyumva enshonyi bwenene. Nakaciyumva nka nalenganyize bene wirhu na bali birhu. Najijire nsiku nyinji ndi naciyumva ntyo.” Oyemere n’obwalagale oku abagula n’abandi bene wirhu na bali birhu bakuzire kiroho bagwerhe irala ly’okukurhabala ly’ocibiba n’ehali nyinja y’ekiroho. (Olole ecisanduku cidesire “Bici Abagula Bakajira?”) Bashagalusire bwenene okubona wagalukire Yehova banalonzize obe n’omwishingo!—Mig. 17:17.

Bici wakajira ly’ocibiba hofi-hofi n’ecigamba? Ocihâne loshi-loshi omu mikolo bene wirhu na bali birhu bal’ibajira, k’okuderha oku okaja oku ntimanano n’okuja omu mahubiri ngasi mango. Gurhi okujira ntyo kwakakurhabalamwo? Felix adesire ntya: “Ecigamba cashagaluka bwenene erhi ncibigalukira Yehova. N’oko kwarhuma naciyumva oku ndi wa bulagirire. Boshi bantabala okucibiba muguma w’omu cigamba, okuciyumva oku Yehova ambabalire, banantabala okujira amajambere.”—Olole ecisanduku cidesire “Bici Wakajira?”

ORHARHAMAGA CIRU HITYA!

Shetani akulerhako ngasi mashumi ly’alonza acib’ikuzambanya n’obu oli wacibizibuhya obwîra bwawe haguma na Yehova. (Lk. 4:13) Obe mubidu okucibizibuhya obwîra bwawe haguma na Yehova.

Yehova alaganyize ebibuzi byage ntya: “Naja nalongereza ecihezire, nakaziyisha ngalwire ecali cihabusire; nakaz’irhuba eciri n’ecibandé, nkaz’igalulira emisi cirya cali cikola cizamba.” (Ezek. 34:16) Yehova arhabire bantu banji bacibiba n’ehali nyinja y’ekiroho. Oyemere n’obwalagale oku alonzize okukurhabala ly’ocibizibuhya obwîra bwawe haguma naye.

Bici Abagula Bakajira?

Abagula bajira omukolo munji omu kurhabala abahubiri bagalukire Yehova bacibizibuhya obwîra bwabo haguma naye. Olole ebi bashinganine bajirire balya bagalukire Yehova.

Mubayemeze n’obwalagale. Paolo alimanyire oku omunyabyaha ociyunjuzize anahikira aha ‘arhogera omu burhe bulushire olugero.’ (2 Kr. 2:7) Hali amango akaba erhi ali ayumva enshonyi n’okuheza obulangalire. Paolo ahanwire ecigamba ntya: “Mumubabalirage erhikwo munamuhire omurhima omu nda.” Abagalukire Nnâmahanga, balagirire oku muntu wakabayemeza n’obwalagale oku Yehova n’ababo bemezi babazigire bwenene. Okubavuga omunkwa ngasi mango n’okubaha oburhabale balagirireko kwanabarhabala lyo barhagivunika omurhima.

Mukasalira haguma nabo. “Omusengero gw’omushinganyanya washenga n’omurhima gwage gwoshi gujira buhashe bunji.” (Yk. 5:16) Larissa, rhwaganiriraga embere, adesire ntya: “Nakagibwira abagula okubiyerekire akarhinda n’oboba nagwerhe. Bakanshengera ngasi mango. Buzinda nahugûkwa oku abagula barhal’ingayire. Balilonzize bantabale ncibiba n’obwîra bwa hofi-hofi haguma na Yehova.” Theo naye adesire ntya: “Amasala g’abagula ganyemeza n’obwalagale oku kobinali Yehova aba anzigire n’oku anakabona ebinja biba omu murhima gwani ci arhali bibi byone.”

Mujire obwîra haguma nabo. Abagalukire Yehova babà omu bulagirire b’okuba n’abîra omu cigamba. Mugula muguma ohamagalwa Justin, adesire ntya: “Mukaciha akasanzi k’okubalalika bagende haguma na ninyu omu mahubiri, ci bwenene, mukabalambagirira ahamwababwe. Kuli kwa bulagirire okujira obwîra nabo!” Owundi mugula ohamagalwa Henry, adesire ntya: “Erhi abandi bali omu cigamba bakabona abagula bali bajira obwîra haguma na balya bagalukire Yehova, nabo banacihangana okujira obwîra haguma nabo.”

Mubarhabale bakajira ifunzo lyabo ly’Ebibliya. Omwîra okuzire kiroho anarhabala omuntu wagalukiraga Yehova acibiba n’eprograme nyinja y’okujira eby’ekiroho. Mugula muguma ohamagalwa Darko, adesire ntya: “Nsima okubaganirira obuhirhi bw’ekiroho nakuzire omw’ifunzo lyani ly’Ebibliya n’okubashumya nabo bakayiga Ebibliya. Na kandi nampige okuciyigiriza haguma nabo bintu biguma biguma.” Owundi mugula ohamagalwa Clayton, adesire ntya: “Nambahe omurhima balonze omu Bibliya emyanzi eganirire akanga kabo, balole na bici eyo myanzi yakabayigiriza.”

Mubayabule. Bala bagalukira Yehova hali amango babwine abagula bali bakola nka batwi ba manja. Cikone muli gano mango bashinganinage barhondere okubabona nka balungere. (Yer. 23:4) Obe mubidu okuyumvirhiza n’okuvuga omunkwa. Okabalambagirira ngasi mango. Olole ebi mugula muguma ohamagalwa Marcus ajira amango alambagirire ebibuzi: “Nanganire haguma nabo lugenda entanya ziri omu Lwandiko lulebe, nambavuge omunkwa n’okubayemeza n’obwalagale oku rhushagalusire okubona bacibir’igaluka omu okuli n’oku na Yehova naye ashagalusire. Enyuma za ngasi kubalambagirira, rhunacibihiga mangaci rhwacib’ibalambagirira.”

a Mazino maguma maguma gashanjirwe.