Ogendekere Wayushûka omu Buzigire Bwawe

1. Nyigirizo zihi wayizire erhi orhondera wayiga Ebibliya?

K’OKENGIRE ebi wayizire erhi orhondera wayiga Ebibliya? Nkaba wasomirwe erhi omanya oku Nnâmahanga ajira izino. Nkaba warhulirizibwe omu kumanya oku Nnâmahanga arhalibuza abantu omu muliro gw’ecihenama. Kandi nkaba washagalusire bwenene erhi oyiga lugenda obulangalire bw’okucib’ibona abazigirwa bawe bafîre n’okulama haguma nabo omu paradizo hanw’igulu.

2. Ahanyuma n’okumanya enyigirizo z’Ebibliya, gandi majambere gahi wajijire? (Abefezi 5:1, 2)

² Oku wagendekire wayiga Akanwa ka Nnâmahanga, ko n’obuzigire bwawe kuli Yehova bwagendekire bwayushûka. Obo buzigire bwakushumize okakolesa ebi wakag’iyiga. Warhôzire emihigo minja eyimangire oku makanuni g’Ebibliya. Wakubûla entanya zawe n’olugenzi lwawe bulya wal’ilonzize okushagalusa Nnâmahanga. Nka kula omwana ayiga olwiganyo lw’omubusi wage w’obuzigire, nawe wakag’iyiga olwiganyo lwa Sho w’omu mpingu.​—Osome Abefezi 5:1, 2.

3. Madoso gahi rhwakacidosa?

³ Rhwanacidosa ntya: ‘K’obuzigire bwani kuli Yehova bukola busêzire ene kulusha oku bwali erhi mbatizibwa? Kurhenga amango nabatizibagwa, ka ndi nacihangana ly’entanya zani n’ebijiro byani bishushana n’ebya Yehova, bwenene omu kuyeresa bene wirhu na bali birhu obuzigire?’ Erhi akaba “obuzigire wali ogwerhe burhanzi” bwanyihire omu njira ndebe, orhavunikaga omurhima. Akantu kashushine n’ako kahikire Abakristu b’omu myaka igana mirhanzi. Yezu arhalekaga abo Bakristu, na nirhu arhakarhuleka. (Maf. 2:4, 7) Amanyire oku rhwanacib’iyasa obuzigire rhwayumvagya erhi rhurhondera rhwayiga okuli.

4. Bici rhwaganirira mw’eci cigabi?

⁴ Eci cigabi caganirira gurhi rhwakagendekera rhwayushûlamwo obuzigire bwirhu kuli Yehova n’oku bandi bantu. Buzinda rhwabona migisho miguma na miguma rhwakaba nayo n’eyi abandi bakaba nayo erhi rhwakasêza obuzigire bwirhu.

OYUSHÛKE OMU BUZIGIRE BWAWE KULI YEHOVA

5-6. Mazibu gahi Paolo alwisize omu mukolo gwage gw’amahubiri, na bici byamushumize ly’agendekera akolera Yehova?

⁵ Paolo al’igwerhe akalamo k’omwishingo omu mukolo gwa Yehova, cikone hali mazibu manji al’ishinganine alwise. Kanji-kanji akag’ijira emibalamo milîri, n’okubalama kurhali kulembu mw’ago mango. Omu mibalamo yage, hali amango ‘enyishi zamuhushire’ hali n’amango ‘alinzir’igwa omu bishumusi.’ Hali n’amango akagishurhwa n’abakag’imuhagalika. (2 Kr. 11:23-27) Na kandi arhali ensiku zoshi bene wabo Paolo Bakristu bashagalukire obushiru bwage bw’okubarhabala.​—2 Kr. 10:10; Fl. 4:15.

⁶ Bici byarhabire Paolo ly’agendekera akolera Yehova? Paolo aciyigirizize binji lugenda amorhere ga Yehova kugerera Amandiko na kugerera ebi acibwinire yene. Paolo ahikira aha ayemera n’obwalagale oku Yehova Nnâmahanga al’imuzigire. (Rm. 8:38, 39; Ef. 2:4, 5) Na kandi ahikira aha azigira Yehova bwenene. Paolo ayerekine obuzigire bwage kuli Yehova omu ‘kukolera abatagatifu’ n’omu kugendekera ajira ntyo.​—Hb. 6:10.

7. Njira nguma ehi rhwakayushûlamwo obuzigire bwirhu kuli Yehova?

⁷ Rhwanayushûla obuzigire bwirhu kuli Nnâmahanga omu kuyiga Akanwa kage n’obushiru. Amango oli wasoma Ebibliya, okacihangana okumanya bici ngasi mulongo guyerekine lugenda Yehova. Okacidosa ntya: ‘Gurhi ogu mwanzi guyerekinemwo oku Yehova aba anzigire? Bici ogu mwanzi gunyeresire byakarhuma nazigira Yehova?’

8. Gurhi isala lyakarhurhabalamwo rhuyushûle obuzigire bwirhu kuli Nnâmahanga?

⁸ Eyindi njira rhwakayushûlamwo obuzigire bwirhu kuli Yehova kuli kumubwira ngasi mango kugerera isala ebirhuli e murhima byoshi. (Enna. 25:4, 5) Yehova naye, ashuza amasala girhu. (1 Yn. 3:21, 22) Mwali wirhu muguma w’omu Asie ohamagalwa Khanh, adesire ntya: “Oku murhondero obuzigire bwani kuli Yehova bwal’iyimangire oku bumanye, cikone obo buzigire bwayushusire erhi mbona gurhi akag’ishuza amasala gani. Obo buzigire bwarhuma najira ebintu bimushagalusa.”b

OYUSHÛKE OMU BUZIGIRE BWAWE OKU BANDI

9. Gurhi Timoteyo ayerekinemwo oku akag’ijira amajambere omu kuyerekana obuzigire?

⁹ Myaka milebe enyuma z’okuba Mukristu, Paolo arhimanana na musole muguma mwinja wakag’ihamagalwa Timoteyo. Timoteyo al’izigire Yehova, anal’izigire abantu. Paolo abwizire Abafilipi ntya: “Nta wundi ngwerhe ncikubagira aka [Timoteyo], owankashibirira obunguke bwinyu n’omurhima gwoshi.” (Fl. 2:20) Mw’olu lwandiko, Paolo arhakag’iganirira obuhashe bwa Timoteyo bw’okupanga ebintu erhi okugeza ehotuba z’abantu boshi, cikone bibonekine n’obwalagale oku al’ishagalukire obuzigire Timoteyo agwerhe kuli bene wabo na bali babo. Buzira karhinda, ebigamba Timoteyo akag’ilambagirira byakag’ilingusa bwenene oku abilambagirira.​—1 Kr. 4:17.

10. Gurhi Anna n’iba bayerekinemwo obuzigire bal’igwerhe kuli bene wabo na bali babo?

¹⁰ Nirhu rhunalonze enjira rhwakarhabalamwo bene wirhu na bali birhu Bakristu. (Hb. 13:16) Rhuganirire olwiganyo lwa Anna, rhwaganiriraga omu cigabi c’embere. Enyuma z’empusi ndarhi, ye n’iba balambagirira mulala muguma gw’Omuhamirizi wa Yehova banabona oku oburhungiri bw’enyumpa y’ogo mulala bwahesirwe n’empusi, n’enyanya z’oko abantu b’ogo mulala barhacigwerhe mishangi ecîre. Anna adesire ntya: “Rhwarhôla emishangi yabo rhwayifula, rhwanayigalula enakola migome na mikunje. Rhwehe rhwabwine nk’eco cali cijiro cisungunu bwenene, cikone carhuma rhwakoma obwira bucisêzire kuhika ene.” Obuzigire Anna n’iba bagwerhe kuli bene wabo na bali babo bwabashumya babaha oburhabale bal’ilagirireko.​—1 Yn. 3:17, 18.

11. (a) Kanji-kanji gurhi abandi baciyumva erhi rhuyerekana oku rhubazigire? (b) Kushimbana n’Emigani 19:17, gurhi Yehova aciyumva erhi rhuyerekana obuzigire?

¹¹ Amango rhuli rhwajirira abandi omu njira y’obuzigire n’olukogo, kanji-kanji banabone oku rhuli rhwacihangana lyo rhurhanya n’okujira ebintu aka Yehova. Kandi banashagalukira bwenene olukogo lwirhu kulusha oku rhwal’irhanyize. Khanh rhwaganiriraga embere, anakengere bwenene abamurhabalaga. Adesire ntya: “Mvuzire omunkwa bwenene bali birhu bazigirwa boshi bakag’impeka omu mukolo gw’amahubiri. Bakagiyish’intôla aha kâ, bakag’indalika rhulye haguma ebiryo by’okumacuza erhi ebiryo by’omulegerege, banakag’ijira okwabo koshi lyo ngaluka bwinja aha kâ. Nkola mba mpugûsirwe oku okujira ntyo gwali mukolo munji kuli bo. Cikone bakag’ijira ntyo n’obuzigire.” Kobinali, arhali abantu boshi bakarhuvuga omunkwa kw’ebi rhubajirire. Khanh adesire ntya lugenda abakag’imurhabala: “Nakalonzize mbalipe enyanya z’olukogo lwabo lunji banyeresire, cikone ntamanyiri ngahi boshi balama. Ciru akaba ntyo, Yehova yehe ahamanyire, kandi namushenge ayish’ibandipira.” Khanh adesire okuli. Yehova anabone ciru n’ecijiro cisungunu bwenene c’olukogo rhujirire abandi. Anabone ecijiro ca ntyo nka nterekêro y’obulagirire bwenene na nk’ideni ayish’ilyula.​—Osome Emigani 19:17.

12. Gurhi bene wirhu bakayerekanamwo obuzigire bwabo omu cigamba (Olole n’enfoto.)

¹² Erhi akaba oli mwene wirhu, gurhi wakayerekamwo abandi obuzigire n’okujira bintu bilebe ly’obarhabala? Mwene wirhu muguma ociri musole ohamagalwa Jordan adosa mugula muguma gurhi akajiramwo binji ly’arhabala omu cigamba. Oyo mugula amuvuga omunkwa oku majambere ali amakajira anamuha mahano malebe g’okumurhabala ajire binji. Kwa lwiganyo, ahanula Jordan oku akahika embere aha Nyumpa y’Entimanano n’okulamusa abandi, akahâna amashuzo oku ntimanano, akahubiri ngasi mango haguma n’ecikundi cage c’amahubiri, n’okurhanya lugenda ezindi njira akarhabalamwo abandi. Erhi Jordan akolesa ago mahano, arhakag’iba ali ayiga obulenga buhyahya kone cikone kandi akag’iba ali ayushûka omu buzigire bwage kuli bene wabo na bali babo. Jordan aciyigiriza oku erhi mwene wirhu akahikira aha aba murhabazi w’abagula, arhali kurhondera arhondera okurhabala abandi; cikone, anagendekere abarhabala.​—1 Tm. 3:8-10, 13.

13. Gurhi obuzigire bwashumizemwo mwene wirhu Christian acib’ihikiriza ebihûnyirwe ly’acib’iba mugula?

¹³ Gurhigi erhi akaba embere wali murhabazi w’abagula erhi mugula? Yehova anakengere omukolo wajijire omu mango gageraga n’obuzigire bwakushumyagya ojire ogo mukolo. (1 Kr. 15:58) Kandi ali abona obuzigire ogendekire wayerekana. Mwene wirhu muguma ohamagalwa Christian avunika omurhima erhi arhenzibwa oku mukolo gw’obugula. Ciru akaba ntyo, adesire ntya: “Nahiga okujira okwani koshi lyo nkolera Yehova enyanya z’obuzigire, mbe ngwerhe lukengwa lulebe erhi nanga.” Enyuma za kasanzi kalebe, acib’ihâbwa olukengwa lw’okuba mugula. Christian adesire ntya: “Nakag’iyumva ehy’oboba okucib’ikola nka mugula. Cikone nahiga oku erhi Yehova akacib’inyemerera nkole nka mugula enyanya z’olukogo lwage, najira ntyo enyanya z’obuzigire bwani kuli ye na kuli bene wirhu na bali birhu.”

14. Bici ociyigirizize kugerera enderho za mwali wirhu muguma w’omu cihugo c’e Georgie?

¹⁴ Kandi abakozi ba Yehova banayerese abalungu babo obuzigire. (Mt. 22:37-39) Kwa lwiganyo, mwali wirhu muguma w’omu cihugo c’e Georgie, ohamagalwa Elena, adesire ntya: “Oku murhondero, obuzigire bwani kuli Yehova kone kantu kakag’inshumya okuhubiri. Cikone erhi obuzigire bwani kuli Larha w’omu mpingu buyushûka, obuzigire bwani oku bantu nabo bwayushûka. Nakacihangana okubona omu bwenge amazibu bali balwisa na mwanzi guhi gwakabahuma oku murhima. Oku nagendekire narhanya kuli bo muli eyo njira, ko nanagendekire nalonza okubarhabala.”​—Rm. 10:13-15.

EMIGISHO ERHENGA OMU KUYERESA ABANDI OBUZIGIRE

15-16. Nk’oku biyerekinwe oku nfoto, migisho ehi erhenga omu kuyeresa abandi obuzigire?

¹⁵ Erhi rhuyeresa bene wirhu na bali birhu obuzigire, arhali bone bayunguka. Enyuma z’okurhondera kw’obulwala bw’okuyahukira bw’e COVID-19, mwene wirhu muguma ohamagalwa Paolo na mukage barhabala bali birhu banji bagikulu baciyigirize gurhi bakakolesamwo ebyombo by’ecielektroniki lyo bahâna obuhamirizi. Mwali wirhu muguma walirhanzir’iyabirwa okukolesa ecombo cage ayishihasha buzinda. Ahasha okukolesa eco combo cage c’ecielektroniki ly’alalika abantu b’omu mulala gwage aha Kukengera olufû lwa Yezu. Bantu makumi gali ndarhu muli bo bashimba eyo ntimanano kugerera e vidéoconférence! Oyo mwali wirhu n’abantu b’omu mulala gwage boshi bayunguka kugerera obushiru bwa Paolo na mukage. Buzinda, oyo mwali wirhu ayandikira Paolo ntya: “Koko oku kurhuyigiriza rhwe bagikulu. Ntakayibagira ciru n’ehitya kunganaci Yehova arhushibirira n’obushiru wajiraga ly’orhurhabala.”

¹⁶ Enyiganyo ziri nk’olo zayigirizize Paolo isomo ly’obulagirire. Olo lwiganyo lwamukengezize oku obuzigire buba bwa bulagirire bwenene kulusha obumanye erhi obuhashe bw’akaburhano. Akengire ntya: “Nali mwangalizi w’omuzunguko. Ene, mpugûsiwe oku, ciru akaba abahubiri banaba bayibagire ehotuba zani, bacigendekire bakengera ebi najijire lyo mbarhabala.”

17. Bandi bahi bayunguka erhi rhuyerekana obuzigire?

¹⁷ Erhi rhuyeresa abandi obuzigire, nirhu rhwene rhunayunguke omu njira rhurhal’irhanyizeko. Jonathan, olama omu cihugo c’e Nouvelle-Zélande adesire oku ntyo kobinali. Lwa Kalindarhu luguma enyuma z’emidi amango izuba lyali linji bwenene, abona painiya muguma wakag’ihubiri okw’ibarabara. Jonathan ahiga okukahubiri haguma n’oyo painiya ngasi Lwa Kalindarhu enyuma z’emidi. Ago mango, arhahugûkagwa kunganaci yenene akayungusire n’eco cijiro c’olukogo. Jonathan adesire ntya: “Ago mango omu kalamo kani, ntakag’ishagalukira omukolo gw’amahubiri. Cikone, erhi nkayumvirhiza enjira y’okuyigiriza y’oyo painiya n’okubona kunganaci omukolo gwage gw’amahubiri gwakag’iyana amalehe, oko kwanshumya nazigira bwenene ogo mukolo. Kandi, naba n’omwîra mwinja wantabire nakula omu hali y’ekiroho, nshagalukire omukolo gw’amahubiri n’okuyegera Yehova bwenene.”

18. Bici Yehova alonzize rhujire?

¹⁸ Yehova alonzize rhweshi rhuyushûke omu buzigire kuli ye n’oku bandi bantu. Nk’oku rhwayizire, rhwanaseza obuzigire bwirhu kuli Yehova omu kusoma Akanwa kage n’okukarhanyako bwenene n’omu kumuganiza ngasi mango kugerera isala. Rhwanayushûka omu buzigire bwirhu kuli bene wirhu na bali birhu omu kukabaha oburhabale balagirireko. Amango obuzigire bwirhu buli bwayushûka, rhwanagendekera rhwayegera Yehova bwenene na bene wirhu na bali birhu. Na kandi, rhwayish’ishagalukira obo bwîra haguma nabo ensiku n’amango!