යෙරෙමියා

36 යොෂියාගේ පුතා වුණ යෙහෝයාකිම් යූදාවල රජකම් කරපු හතරවෙනි අවුරුද්දේදී+ යෙහෝවා දෙවියන්ගෙන් යෙරෙමියාට මේ පණිවිඩය ලැබුණා. 2 “ලියවිල්ලක් අරගෙන ඊශ්‍රායෙල් සහ යූදා සෙනඟට විරුද්ධවත්+ හැම ජාතියකටම විරුද්ධවත්+ මං ඔයාට කියපු හැම දෙයක්ම ඒකේ ලියන්න. යොෂියාගේ කාලේදී මං ඔයාට මුලින්ම කතා කරපු දවසේ ඉඳලා මේ වෙන කල් කිව්ව හැම දෙයක්ම ඒකේ ලියන්න.+ 3 සමහරවිට යූදාවල සෙනඟ මම ඔවුන් පිටට ගේන්න අදහස් කරන විපත්ති ගැන අහලා ඔවුන් යන වැරදි මාර්ගවලින් හැරිලා එන්න පුළුවන්. ඔවුන් එහෙම කළොත් මම ඔවුන් කරපු වැරදිවලටත් ඔවුන්ගේ පව්වලටත් සමාව දෙනවා.”+

4 ඊටපස්සේ යෙරෙමියා නෙරියාගේ පුතා වුණ බාරුක්ට+ එන්න කියලා යෙහෝවා තමන්ට කියපු හැම දෙයක්ම එයාට කිව්වා. යෙරෙමියා කියද්දී බාරුක් ඒ හැම දෙයක්ම ලියවිල්ලේ ලිව්වා.+ 5 ඊටපස්සේ යෙරෙමියා බාරුක්ට මෙහෙම කිව්වා. “මට දැන් යෙහෝවා දෙවියන්ගේ ගෘහයට යන්න අවසර නැහැ. 6 ඒ නිසා ඔයාට තමයි යෙහෝවා දෙවියන්ගේ ගෘහයට යන්න වෙන්නේ. මං කියද්දී ඔයා ලියවිල්ලේ ලියාගත්ත යෙහෝවාගේ වචන එහෙට ගිහින් සෙනඟ නිරාහාරව ඉන්න දවසේදී එයාලට ඇහෙන්න කියවන්න. යූදාවල නගරවලින් එතනට එන හැමෝටම ඇහෙන්න ඒක කියවන්න. 7 ඒක අහලා දයාව පෙන්නන්න කියලා එයාලා යෙහෝවාට යාච්ඤා කළොත් ඔහු ඒ යාච්ඤාවලට ඇහුම්කන් දෙයි. සමහරවිට එයාලා යන වැරදි පාරෙන් එයාලා හැරිලා එයි. මොකද යෙහෝවා මේ සෙනඟ එක්ක ඉන්නේ ලොකු කේන්තියකින් කියලා ඔහු කියලා තියෙනවා.”

8 ඉතින් නෙරියාගේ පුතා වුණ බාරුක් අනාගතවක්තෘ යෙරෙමියා එයාට අණ කරපු හැම දෙයක්ම කළා. ලියවිල්ලේ ලියපු යෙහෝවාගේ වචන එයා හැමෝටම ඇහෙන්න යෙහෝවා දෙවියන්ගේ ගෘහයේදී කියෙව්වා.+

9 යොෂියාගේ පුතා සහ යූදාවල රජ වුණ යෙහෝයාකිම්+ පාලනය කරපු පස්වෙනි අවුරුද්දේ නමවෙනි මාසේදී යෙරුසලමේ සෙනඟටත් යූදා දේශයේ නගරවල ඉඳන් යෙරුසලමට ආව හැමෝටමත් යෙහෝවා ඉස්සරහා නිරාහාරව ඉන්න කියලා දැනුම් දුන්නා.+ 10 බාරුක් යෙහෝවා දෙවියන්ගේ ගෘහයට ඇවිල්ලා යෙරෙමියාගේ වචන ලියවිල්ලෙන් හැමෝටම ඇහෙන්න කියෙව්වා. එයා ඒක කියෙව්වේ පිටපත්කරුවෙක් වුණ ෂාපාන්ගේ+ පුතා වුණ ගෙමරියාගේ+ කෑම කාමරයේදී.* ඒක තිබුණේ යෙහෝවා දෙවියන්ගේ ගෘහයේ ඉහළ මළුවේ අලුත් දොරටුවට ඇතුල් වෙන තැනට+ කිට්ටුවෙන්.

11 ලියවිල්ලේ තිබුණ යෙහෝවාගේ වචන ෂාපාන්ගේ පුතා වුණ ගෙමරියාගේ පුත් මිකායාට ඇහුණාම 12 එයා රජමාලිගාවේ තිබුණ ලේකම්ගේ කාමරයට ගියා. අධිපතීන්* හැමෝම එතන ඉඳගෙන හිටියා. ඒ කියන්නේ ලේකම් වුණ එලිෂාමා,+ ෂෙමායාගේ පුතා වුණ දෙලායා, අක්බොර්ගේ+ පුතා වුණ එල්නාතාන්,+ ෂාපාන්ගේ පුතා වුණ ගෙමරියා, හනනියාගේ පුතා වුණ ශෙදකියා සහ අනිත් අධිපතීන් හැමෝම එතන හිටියා. 13 බාරුක් සෙනඟට ඇහෙන්න ලියවිල්ලේ තිබුණ දේවල් කියවද්දී තමන්ට ඇහුණ හැම දෙයක්ම මිකායා ඒ අධිපතීන්ට කිව්වා.

14 එතකොට අධිපතීන් හැමෝම බාරුක්ව එක්කගෙන එන්න කියලා යෙහුදීව යැව්වා. යෙහුදී කියන්නේ කූෂිගේ පුතා වුණ ෂෙලෙමියාගේ පුතා වුණ නෙතනියාගේ පුතාට. බාරුක්ට මෙහෙම කියන්න කියලා අධිපතීන් යෙහුදීට කිව්වා. “සෙනඟට ඇහෙන්න ඔයා කියවපු ලියවිල්ලත් අරගෙන මෙහෙට එන්න.” ඉතින් නෙරියාගේ පුතා වුණ බාරුක් ඒ ලියවිල්ලත් අරගෙන අධිපතීන් හිටපු තැනට ගියා. 15 අධිපතීන් එයාට මෙහෙම කිව්වා. “මෙතන ඉඳගෙන අපිට ඇහෙන්න ඕක කියවන්න.” ඉතින් බාරුක් එයාලට ඇහෙන්න ඒක කියෙව්වා.

16 ඒ ලියවිල්ලේ තිබුණ දේවල් ඇහුව ගමන්ම එයාලා හොඳටම බය වෙලා මූණට මූණ බලාගත්තා. “අකුරක් නෑර මේ හැම දෙයක්ම අපි රජට කියන්න ඕනෙ” කියලා එයාලා බාරුක්ට කිව්වා. 17 ඊටපස්සේ එයාලා බාරුක්ගෙන් මෙහෙම ඇහුවා. “ඔයාට මේ දේවල් ලියන්න කිව්වේ කවුද? යෙරෙමියාද?” 18 එතකොට බාරුක් මෙහෙම උත්තර දුන්නා. “ඔව්, යෙරෙමියා කියද්දී මම මේ හැම දෙයක්ම තීන්තවලින් මේ ලියවිල්ලේ ලියාගත්තා.” 19 ඊටපස්සේ අධිපතීන් බාරුක්ට මෙහෙම කිව්වා. “දැන් ඉක්මනට ගිහින් හැංගෙන්න. ඔයායි, යෙරෙමියායි ඉන්නේ කොහෙද කියලා කාටවත් දැනගන්න තියන්න එපා.”+

20 ඊටපස්සේ එයාලා ඒ ලියවිල්ල ලේකම් වුණ එලිෂාමාගේ කාමරයේ තියලා රජව හම්බ වෙන්න ගියා. රජමාලිගාවේ මළුවේ හිටපු රජ ළඟට ගිහින් එයාලට අහන්න ලැබුණ හැම දෙයක්ම රජට කිව්වා.

21 ඉතින් රජ ඒ ලියවිල්ල අරගෙන එන්න කියලා යෙහුදීව යැව්වා.+ යෙහුදී ගිහින් ලේකම් වුණ එලිෂාමාගේ කාමරයේ තිබ්බ ලියවිල්ල අරගෙන ආවා. ඊටපස්සේ එයා රජටයි, රජ ඉස්සරහා හිටගෙන හිටපු අධිපතීන් හැමෝටමයි ඇහෙන්න ඒක කියෙව්වා. 22 මේ සිද්ධිය වුණේ නමවෙනි මාසේදී.* එතකොට රජ හිටියේ මාලිගාවේ ශීත කාලය ගත කරන්න හදලා තිබුණ කොටසේ. උණුසුම ලබාගන්න රජ ඉස්සරහා ගිනි දල්වපු භාජනයක් තිබුණා. 23 යෙහුදී ලියවිල්ලෙන් කොටස් තුන හතරක් කියෙව්වාට පස්සේ ලේකම්ගේ පිහියෙන් රජ ඒ කොටස ඉරලා භාජනයේ ඇවිළෙමින් තිබුණ ගින්නට වීසි කළා. ලියවිල්ලේ ඉතුරු කොටස්වලටත් එයා ඒ දේම කළා. ඒ විදිහට මුළු ලියවිල්ලම එයා පුච්චලා දැම්මා. 24 ලියවිල්ලේ තිබුණ දේවල් කියවද්දී අහගෙන හිටපු රජටවත් සේවකයන්ටවත් කිසිම බයක් දැනුණේ නැහැ. එයාලා ඇඳුම් ඉරාගත්තෙත් නැහැ. 25 එල්නාතානුයි,+ දෙලායායි,+ ගෙමරියායි+ ලියවිල්ල පුච්චන්න එපා කියලා බැගෑපත් වෙලා රජගෙන් ඉල්ලුවත් රජ ඒක ගාණකටවත් ගත්තේ නැහැ. 26 රජ, අනාගතවක්තෘ යෙරෙමියාවයි, ලේකම් වුණ බාරුක්වයි අල්ලගෙන එන්න කියලා රජගේ පුතා* වුණ යෙරාමෙයෙල්ටත් අෂ්‍රියෙල්ගේ පුතා වුණ සෙරායාටත් අබ්දෙයෙල්ගේ පුතා වුණ ෂෙලෙමියාටත් අණ කළා. ඒත් යෙහෝවා ඒ දෙන්නාව හංගලා තිබ්බා.+

27 යෙරෙමියා කියද්දී බාරුක් ලියාගත්ත ලියවිල්ල රජ පුච්චලා දැම්මාට පස්සේ යෙහෝවාගෙන් යෙරෙමියාට තවත් පණිවිඩයක් ලැබුණා.+ ඔහු මෙහෙම කිව්වා. 28 “තවත් ලියවිල්ලක් අරගෙන යූදාවල රජ වන යෙහෝයාකිම් පුච්චලා දැම්ම ලියවිල්ලේ+ තිබුණ හැම දෙයක්ම ඒ විදිහටම ඒකේ ලියන්න. 29 යූදාවල රජ වන යෙහෝයාකිම්ට විරුද්ධව මේ දේ කියන්න. ‘යෙහෝවා මෙහෙම කියනවා. “‘මොකටද මේ ලියවිල්ලේ “බැබිලෝනියේ රජ ඇවිත් මේ දේශය අනිවාර්යයෙන්ම විනාශ කරනවා. මෙහේ ඉන්න මිනිසුන්වයි, සතුන්වයි නැත්තටම නැති කරලා දානවා” කියලා ලිව්වේ?’ එහෙම කියලා ඔබ ඒක පුච්චලා දැම්මා.+ 30 ඒ නිසා යූදාවල රජ වන යෙහෝයාකිම්ට විරුද්ධව යෙහෝවා මෙහෙම කියනවා. ‘ඔහුගෙන් පැවතෙන කිසිම කෙනෙක් දාවිත්ගේ සිංහාසනයේ ඉඳගන්න ඉතුරු වෙන්නේ නැහැ.+ ඔහුගේ මළ කඳ දවාලේ අව්වට පිච්චි පිච්චි තියෙයි. රාත්‍රියේ සීතලට අහු වෙයි.+ 31 ඔහුටත් ඔහුගෙන් පැවතෙන අයටත් ඔහුගේ සේවකයන්ටත් ඔවුන්ගේ වරදට මට වග කියන්න වෙනවා. මම ඔවුන් පිටටත් යෙරුසලමේ සහ යූදාවල ඉන්න සෙනඟ පිටටත් ගේනවා කියලා කියපු හැම විපතක්ම අනිවාර්යයෙන්ම ගේනවා.+ මොකද ඔවුන් මට ඇහුම්කන් දුන්නේ නැහැ.’”’”+

32 ඉතින් යෙරෙමියා තවත් ලියවිල්ලක් අරගෙන ඒක නෙරියාගේ පුතා සහ ලේකම් වුණ බාරුක්ට දුන්නා.+ යූදාවල රජ වන යෙහෝයාකිම් පුච්චලා දාපු ලියවිල්ලේ ලියලා තිබුණ හැම දෙයක්ම යෙරෙමියා කියද්දී බාරුක් ඒකේ ලිව්වා.+ මුල් ලියවිල්ලේ තිබුණ දේවල්වලට අමතරව තවත් ගොඩක් දේවල් ඒකේ ලිව්වා.