97 යෙහෝවා දෙවියන් රජ වෙලා!+
ඒ නිසා පොළොව සතුටින් පිරී ඉතිරේවා!+
හැම දූපතක්ම සතුටු වේවා!+
2 දෙවියන් වටේටම වලාකුළුත් ඝන අන්ධකාරයත් තියෙනවා.+
ඔහුගේ සිංහාසනය පිහිටුවලා තියෙන්නේ ධර්මිෂ්ඨකමත් යුක්තියත් මත.+
3 ඔහු ඉස්සරහින් ගින්නක් නික්මෙනවා.+
ඔහුගේ සතුරෝ හැමෝම ඒ ගින්නෙන් දැවිලා යනවා.+
4 ඔහුගෙන් නික්මෙන අකුණු සැරවල ආලෝකය දේශය පුරාම විහිදිලා යනවා.
පොළොව ඒක දැකලා බයෙන් ගැහෙනවා.+
5 මුළු පොළොවටම අධිපති දෙවියන් වන යෙහෝවා ඉස්සරහා
කඳු, ඉටි වගේ දිය වෙලා යනවා.+
6 අහස ඔහුගේ ධර්මිෂ්ඨකම ගැන දැනුම් දෙනවා.
මිනිසුන් හැමෝම ඔහුගේ තේජස දකිනවා.+
7 රූපවලට නමස්කාර කරන හැම කෙනෙක්ම ලැජ්ජාවට පත් වේවා!+
වැඩකට නැති දෙවිවරු ගැන පුරසාරම් දොඩන හැමෝම නින්දාවට පත් වේවා!+
සියලු දෙවිවරුනි, ඔහු ඉස්සරහා වැඳ වැටෙන්න.+
8 යෙහෝවා දෙවියනි, ඔබ දුන්න තීන්දු ගැන අහලා+
සියොන් ප්‍රීති වෙනවා.+
යූදා අවට තියෙන නගර සතුටු වෙනවා.
9 යෙහෝවා, මුළු පොළොවටම ඉන්න උසස්ම දෙවියන් ඔබයි.
අනිත් හැම දෙවි කෙනෙක්ටම වඩා ඔබ හුඟක් ඉහළින් ඉන්නවා.+
10 යෙහෝවාට ආදරේ කරන සියල්ලෙනි, නපුරු දේට පිළිකුල් කරන්න.+
ඔහුට විශ්වාසවන්තව ඉන්න අයව දෙවියන් ආරක්ෂා කරනවා.+
දුෂ්ටයන්ගේ අතින් ඔහු ඔවුන්ව බේරගන්නවා.+
11 ධර්මිෂ්ඨයා වෙනුවෙන් ආලෝකය බැබළෙනවා.+
ප්‍රතිපත්තිගරුක අය දැන් සතුටින් ඉපිල යනවා.
12 ධර්මිෂ්ඨ තැනැත්තෙනි, යෙහෝවා නිසා ප්‍රීති වෙන්න.
ඔහුගේ ශුද්ධ නමට ස්තුති ප්‍රශංසා දෙන්න.