යෙරෙමියා
11 යෙහෝවා දෙවියන්ගෙන් යෙරෙමියාට මේ පණිවිඩය ලැබුණා. 2 “ජනයෙනි, මේ ගිවිසුමේ වචනවලට සවන් දෙන්න.
“ඒ ගැන යූදාවල සහ යෙරුසලමේ සෙනඟට කියන්න.* 3 ඔවුන්ට මෙහෙම කියන්න. ‘ඊශ්‍රායෙල්වරුන්ගේ දෙවි වන යෙහෝවා කියන්නේ මේකයි. “මේ ගිවිසුමේ තියෙන වචනවලට කීකරු වෙන්නේ නැති මිනිසාට ශාප වේවා!+ 4 යකඩ උණු කරන උදුනකට සමාන+ ඊජිප්තුවෙන් ඔබේ මුතුන්මිත්තන්ව එළියට ගෙනාපු කාලේදී මම ඔවුන් එක්ක ඒ ගිවිසුම ඇති කරගත්තා.+ මම ඔවුන්ට මෙහෙම අණ කළා. ‘මගේ හඬට කීකරු වෙන්න. මම ඔබට අණ කරන හැම දෙයක්ම පිළිපදින්න. එහෙම කළොත් ඔබ මගේ සෙනඟ වෙනවා. මම ඔබේ දෙවියන් වෙනවා.+ 5 මං ඒ අණ දුන්නේ කිරියෙන් සහ පැණියෙන් ඉතිරෙන දේශයක් දෙනවා කියලා ඔබේ මුතුන්මිත්තන්ට දිවුරලා පොරොන්දු වුණ දේ ඉටු කරන්නයි.+ ඒ පොරොන්දුව මම ඉටු කළා කියලා අදටත් පැහැදිලියි.’”’”
එතකොට මම “ආමෙන්,* යෙහෝවා දෙවියනි” කියලා උත්තර දුන්නා.
6 යෙහෝවා මට මෙහෙම කිව්වා. “මේ හැම වචනයක්ම යූදා දේශයේ නගරවලයි, යෙරුසලමේ පාරවල්වලයි කියන්න. ‘මේ ගිවිසුමේ වචනවලට සවන් දීලා ඒවා පිළිපදින්න. 7 ඔබේ මුතුන්මිත්තන්ව ඊජිප්තු දේශයෙන් පිටතට ගෙනාපු දවසේ ඉඳන් අද වෙන කල් “මගේ හඬට කීකරු වෙන්න” කියලා මම අවවාද කළා. මම ආයේ ආයේ* ඔවුන්ට ඒ අවවාදය දුන්නා.+ 8 ඒත් ඔවුන් සවන් දුන්නේ නැහැ. කියපු දේවල් කනකටවත් ගත්තේ නැහැ. ඔවුන් හිතුවක්කාර විදිහට ඔවුන්ගේ නපුරු හිතට සවන් දුන්නා.+ මං ඔවුන්ට අණ කරපු දේවල් ඔවුන් පිළිපැද්දේ නැහැ. ඉතින් මං මේ ගිවිසුමේ සඳහන් වෙලා තියෙන හැම විපතක්ම ඔවුන් පිටට ගෙනාවා.’”
9 යෙහෝවා මට මෙහෙම කිව්වා. “යූදාවල සහ යෙරුසලමේ වැසියන් එකතු වෙලා කුමන්ත්‍රණය කරනවා. 10 මගේ වචනවලට කීකරු වෙන්න අකමැති වුණ ඔවුන්ගේ මුතුන්මිත්තන් ගිය වැරදි පාරේම ඔවුනුත් ගියා.+ ඔවුනුත් වෙනත් දෙවිවරු පස්සේ ගිහින් ඒ දෙවිවරුන්ට නමස්කාර කළා.+ මම ඔවුන්ගේ මුතුන්මිත්තන් එක්ක ඇති කරගත්ත ගිවිසුම ඊශ්‍රායෙල් සහ යූදා සෙනඟ කඩ කළා.+ 11 ඒ නිසා යෙහෝවා මෙහෙම කියනවා. ‘මම ඔවුන් පිටට විපත්තියක් ගේනවා.+ ඒකෙන් බේරෙන්න නම් බැහැ. ඔවුන් උදව් ඉල්ලලා මට කන්නලව් කරද්දී මම ඔවුන්ට ඇහුම්කන් දෙන්නේ නැහැ.+ 12 එතකොට යූදා දේශයේ නගරවලයි, යෙරුසලමෙයි ඉන්න අය ඔවුන් පූජා* ඔප්පු කරන දෙවිවරුන් ළඟට ගිහින් උදව් ඉල්ලයි.+ ඒත් ඒ දෙවිවරු ඔවුන් අද්දකින විපත්තියෙන් ඔවුන්ව කොහොමටවත් බේරගන්නේ නැහැ. 13 යූදාවල සෙනඟෙනි, ඔබේ නගරවල ගාණට හරියන්න ඔබට දෙවිවරු ඉන්නවා. යෙරුසලමේ පාරවල් ගාණට ඔබ අර පිළිකුල් දේ* වෙනුවෙන් පූජාසන හදලා තියෙනවා. ඒවා හදලා තියෙන්නේ බාල්ට පූජා ඔප්පු කරන්න.’+
14 “ඔයා* මේ සෙනඟ වෙනුවෙන් යාච්ඤා කරන්න එපා. එයාලා වෙනුවෙන් කන්නලව් කරන්නවත් යාච්ඤාවක් ඉදිරිපත් කරන්නවත් එපා.+ මොකද විපත් අද්දකිනකොට ඔවුන් මට කන්නලව් කරද්දී මම ඔවුන්ට ඇහුම්කන් දෙන්නේ නැහැ.
15 මගේ ආදරණීය සෙනඟෙනි, ඔබ මගේ ගෘහයට එන්නේ කොහොමද?
ඔබෙන් වැඩිදෙනෙක් කොච්චර නම් දුෂ්ට දේවල් කරනවාද!
ඔබ* පිටට එන විපතෙන් ඔබව බේරගන්න ඔවුන් ඔප්පු කරන සත්ව පූජාවලට* පුළුවන් වෙයි කියලා ඔබ හිතනවාද?
එදාට සතුටු වෙන්න ඔබට පුළුවන් වෙයිද?
16 යෙහෝවා කලින් ඔබව හැඳින්නුවේ සාරවත් ඔලීව ගහක් විදිහටයි.
හොඳම ගෙඩිවලින් බර වුණ, අලංකාර ඔලීව ගහක් විදිහටයි.
මහා ඝෝෂාවක් එක්ක ඔහු ඇයට ගිනි ඇවිළුවා.
ඔවුන් ඒ ගහේ අතු කඩලා දැම්මා.
17 “යූදාවල සෙනඟෙනි, ඔබව පැළ කළ තැනැත්තා+ වන ස්වර්ගයේ සේනාවල අධිපති වන යෙහෝවා ඔබ පිටට විපත්තියක් ගේනවා කියලා කියනවා. මොකද ඔබ ඊශ්‍රායෙල් සෙනඟ එක්ක එකතු වෙලා දුෂ්ට විදිහට බාල්ට පූජා ඔප්පු කරලා මාව කේන්ති ගැස්සුවා.”+
18 යෙහෝවා දෙවියනි, සිද්ධ වෙන දේවල් ගැන ඔබ මට දැනුම් දුන්නා.
ඔවුන් කරන දේවල් දකින්න ඒ කාලේදී ඔබ මට සැලැස්සුවා.
19 මම හරියට මරන්න ගෙනාපු, නිහඬව ඉන්න බැටළු පැටියෙක් වගෙයි.
ඔවුන් මට විරුද්ධව කුමන්ත්‍රණය කරනවා කියලා මං දැනගෙන හිටියේ නැහැ.+
“අපි ගෙඩිත් එක්කම ගහ කපලා දාමු.
ජීවතුන්ගේ දේශයෙන් අපි ඔහුව අයින් කරලා දාමු.
එතකොට ඔහුගේ නමත් අමතක වෙලාම යයි.”
20 ඒත් ස්වර්ගයේ සේනාවල අධිපති වන යෙහෝවා ධර්මිෂ්ඨකමින් විනිශ්චය කරනවා.
ඔබ සතුරන්ට දඬුවම් කරන විදිහ දකින්න මට ඉඩ දෙන්න.
මොකද මම මගේ නඩුව භාර දුන්නේ ඔබටයි.
21 ඔයාව මරලා දාන්න හොයන, “යෙහෝවාගේ නමින් අනාවැකි කියන්න එපා.+ එහෙම කළොත් අපි උඹව මරනවා” කියලා කියන අනාතොත්වල+ මිනිස්සුන්ට විරුද්ධව යෙහෝවා මෙහෙම කියනවා. 22 ස්වර්ගයේ සේනාවල අධිපති වන යෙහෝවා කියන්නේ මේකයි. “මට වග කියන්න ඔවුන්ට සිද්ධ වෙනවා. තරුණයෝ කඩුවෙන් මැරුම් කනවා.+ ඔවුන්ගේ දූපුතුන් සාගතෙන් මැරෙනවා.+ 23 ඔවුන්ගෙන් සුළු පිරිසක්වත් ඉතුරු වෙන්නේ නැහැ. මොකද අනාතොත්වල+ මිනිස්සු ඔවුන් කරපු දේවල් ගැන මට වග කියන්න වෙන අවුරුද්දේදී මම ඔවුන්ට විරුද්ධව විපත්ති ගේනවා.”