යෙරෙමියා
52 ශෙදකියා+ රජකමට පත් වෙද්දී එයාට වයස අවුරුදු 21යි. එයා යෙරුසලමේ ඉඳලා අවුරුදු 11ක් පාලනය කළා. එයාගේ අම්මාගේ නම හමුතල්.+ එයා ලිබ්නාවල කෙනෙක් වුණ යෙරෙමියාගේ දුව. 2 ශෙදකියා යෙහෝයාකිම් වගේම යෙහෝවා දෙවියන් වැරදියි කියලා සලකන දේවල් දිගටම කළා.+ 3 මේ හැම දෙයක්ම යෙරුසලමේ සහ යූදා දේශයේ සිද්ධ වුණේ යෙහෝවා එයාලා එක්ක කේන්තියෙන් හිටපු නිසයි. අන්තිමේදී ඔහු එයාලව අයින්ම කරලා දැම්මා.+ ඒ කාලේදී ශෙදකියා බැබිලෝනියේ රජට විරුද්ධව කැරලිගැහුවා.+ 4 ශෙදකියා පාලනය කරපු නමවෙනි අවුරුද්දේ දහවෙනි මාසේ දහවෙනිදා බැබිලෝනියේ රජ වුණ නෙබුකද්නෙෂර්* එයාගේ මුළු හමුදාවත් එක්ක යෙරුසලමට විරුද්ධව සටන් කරන්න ආවා. එයාලා යෙරුසලමට විරුද්ධව සටන් කරන්න කඳවුරු බැඳගෙන නගරය වටලන්න ඒක වටේට පවුරක් ගොඩනැඟුවා.+ 5 ශෙදකියා පාලනය කරපු 11වෙනි අවුරුද්ද වෙන කල්ම බැබිලෝනියේ හමුදාව යෙරුසලම වටලගෙන හිටියා.
6 හතරවෙනි මාසේ නමවෙනිදා+ වෙද්දී සාගතය කොච්චර දරුණු වුණාද කියනවා නම් දේශයේ හිටපු මිනිස්සුන්ට කන්න කිසිම දෙයක් හොයාගන්න බැරි වුණා.+ 7 කල්දිවරු නගරයේ පවුර කඩාගෙන ඇතුළට ආවා. ඒකට කලින් එදා රෑම නගරයේ හිටපු සෙබළු හැමෝම රජගේ උයන ළඟ, තාප්ප දෙක අතරේ තිබුණ දොරටුවෙන් පැනලා ගියා. ඒ වෙද්දී කල්දිවරු නගරය වටලගෙනයි හිටියේ. එයාලා අරබා නිම්නයට යන පාරෙන් පැනලා ගියා.+ 8 ඒත් කල්දිවරුන්ගේ හමුදාව ශෙදකියා පස්සේ එළවගෙන ගිහිල්ලා යෙරිකෝවට කිට්ටුවෙන් තියෙන පාළුකරයේදී එයාව අල්ලගත්තා.+ ශෙදකියාගේ හමුදාව එයාව අතහැරලා දාලා ඒ මේ අත දිව්වා. 9 කල්දිවරුන්ගේ හමුදාව ශෙදකියාව අල්ලගෙන හමාත් දේශයේ රිබ්ලාවල හිටපු බැබිලෝනියේ රජ ළඟට එයාව අරගෙන ගියා. එහෙදී රජ එයාට දෙන්න ඕනෙ දඬුවම තීරණය කළා. 10 බැබිලෝනියේ රජ ශෙදකියා ඉස්සරහම එයාගේ පුතාලව මරලා දැම්මා. යූදාවල අධිපතීන් හැමෝවමත් රිබ්ලාවලදී මරලා දැම්මා. 11 ඊටපස්සේ බැබිලෝනියේ රජ ශෙදකියාගේ ඇස් අන්ධ කරලා+ එයාට තඹ විලංගු දාලා එයාව බැබිලෝනියට අරන් ගියා. ශෙදකියා මැරෙන කල්ම එයාව හිර කරලා තිබ්බා.
12 පස්වෙනි මාසේ දහවෙනිදා ඒ කියන්නේ බැබිලෝනියේ රජ වුණ නෙබුකද්නෙෂර්* පාලනය කරපු 19වෙනි අවුරුද්දේ බැබිලෝනියේ රජගේ සේවකයෙක් සහ ආරක්ෂක නිලධාරීන්ගේ ප්‍රධානියා වුණ නෙබුෂරදාන් යෙරුසලමට ආවා.+ 13 එයා යෙහෝවා දෙවියන්ගේ ගෘහයටයි, රජමාලිගාවටයි, යෙරුසලමේ තිබුණ හැම ගේකටමයි ගිනි තියලා විනාශ කළා.+ ලොකු ගෙවල් ඔක්කොටමත් ගිනි තිබ්බා. 14 ආරක්ෂක නිලධාරීන්ගේ ප්‍රධානියා එක්ක හිටපු කල්දිවරුන්ගේ මුළු හමුදාවම එකතු වෙලා යෙරුසලම වටේ තිබුණ පවුර සම්පූර්ණයෙන්ම විනාශ කරලා දැම්මා.+
15 ආරක්ෂක නිලධාරීන්ගේ ප්‍රධානියා වුණ නෙබුෂරදාන් සෙනඟ අතරේ හිටපු දුප්පත් අයගෙන් සමහරදෙනෙක්වයි, නගරයේ ඉතුරු වෙලා හිටපු සෙනඟවයි වහලුන් විදිහට අරගෙන ගියා. බැබිලෝනියේ රජට යටත් වුණ අය වගේම ඉතුරු වෙලා හිටපු දක්ෂ කර්මාන්තකරුවන්වත් එයා අරගෙන ගියා.+ 16 ඒත් ආරක්ෂක නිලධාරීන්ගේ ප්‍රධානියා වුණ නෙබුෂරදාන් දේශයේ හිටපු දුප්පත්ම මිනිස්සුන්ගෙන් සමහරදෙනෙක්ව දේශයේ නවත්තලා ගියා. එයා එයාලට අණ කළා මිදිවතුවලයි, කෙත්වතුවලයි වැඩ කරන්න කියලා.+
17 කල්දිවරු යෙහෝවා දෙවියන්ගේ ගෘහයේ තිබුණ තඹ කුලුනුයි,+ යෙහෝවා දෙවියන්ගේ ගෘහයේ තිබුණ කරත්තයි,+ මුහුද කියලා හඳුන්වපු ලොකු තඹ භාජනෙයි+ කෑලිවලට කපලා ඒවාවල තිබුණ ඔක්කොම තඹ බැබිලෝනියට අරන් ගියා.+ 18 අළු දාන්න තිබුණ භාජන, පහන් තිර නිවලා දාන්න පාවිච්චි කරපු උපකරණ, සවල්, බඳුන්,+ කුසලාන+ සහ ගෘහයේ පාවිච්චි කරන්න තිබුණ අනිත් හැම තඹ භාජනයක්මත් එයාලා අරන් ගියා. 19 පිරිසිදු රත්තරන්වලිනුයි, රිදීවලිනුයි හදලා තිබුණ බේසම්,+ ගිනි අඟුරු දාන භාජන, බඳුන්, අළු දාන භාජන, පහන් රුක්,+ කුසලාන සහ භාජන ආරක්ෂක නිලධාරීන්ගේ ප්‍රධානියා අරගෙන ගියා.+ 20 යෙහෝවා දෙවියන්ගේ ගෘහය වෙනුවෙන් සලමොන් රජ හදපු කුලුනු දෙකෙයි, මුහුද කියලා හඳුන්වපු ලොකු භාජනෙයි, ඒක පිට උඩ තියාගෙන හිටපු තඹ ගොනුන් 12දෙනාගෙයි,+ කරත්තවලයි මනින්න බැරි තරම් තඹ ප්‍රමාණයක් තිබුණා.
21 ඒ එක කුලුනක උස රියන්* 18යි. ඒවාවල වටප්‍රමාණය මැන්නාම ඒක රියන් 12යි.+ ඒකේ ගනකම ඇඟිලි* හතරයි. කුලුන මැද තිබුණේ හිස් කුහරයක්. 22 කුලුන මුදුනේ තිබුණ වැඩ දාපු කොටස තඹවලින් හදලා තිබුණා. ඒ එක කොටසක උස රියන් පහයි.+ ඒ කොටස සරසපු දැල සහ ඒකේ තිබුණ දෙළුම් ගෙඩිත් තඹවලින් හදලා තිබුණා. අනිත් කුලුනත් ඒකේ තිබුණ දෙළුම් ගෙඩිත් හදලා තිබුණේ ඒ විදිහටමයි. 23 ඒ දැල වටේ දෙළුම් ගෙඩි 100ක් එල්ලලා තිබුණා. ඒවායින් පෙනුණේ දෙළුම් ගෙඩි 96යි.+
24 ආරක්ෂක නිලධාරීන්ගේ ප්‍රධානියා නායක පූජක සෙරායාවත්+ එයාගේ උදව්වට හිටපු පූජක ශෙපනියාවත්+ දොරටු පාලකයන් තුන්දෙනාවත් අරන් ගියා.+ 25 සෙබළුන්ට අණ දුන්න රජගේ නිලධාරියෙක්වත්, රජට කිට්ටුවෙන් හිටපු හත්දෙනෙක්වත් නගරයේදී එයා අල්ලගත්තා. හමුදාවට සෙනඟව බඳවගත්ත හමුදාපතිගේ ලේකම්වත් නගරයේ ඉතුරු වෙලා හිටපු සාමාන්‍ය මිනිස්සු 60දෙනෙක්වත් එයා අල්ලගත්තා. 26 ආරක්ෂක නිලධාරීන්ගේ ප්‍රධානියා වුණ නෙබුෂරදාන් එයාලව රිබ්ලාවල හිටපු බැබිලෝනියේ රජ ළඟට අරගෙන ගියා. 27 බැබිලෝනියේ රජ එයාලව හමාත් දේශයේ රිබ්ලාවලදී මරලා දැම්මා.+ ඒ විදිහට යූදාවල මිනිස්සුන්ව එයාලාගේ දේශයෙන් අයින්ම කරලා දැම්මා.+
28 පහළින් තියෙන්නේ නෙබුකද්නෙෂර්* වහලුන් විදිහට අරන් ගිය අය ගැනයි. ඔහු පාලනය කරපු හත්වෙනි අවුරුද්දේ යුදෙව්වන් 3,023දෙනෙක්ව අරගෙන ගියා.+
29 නෙබුකද්නෙෂර්ගේ* 18වෙනි අවුරුද්දේ+ මිනිස්සු 832දෙනෙක්ව යෙරුසලමෙන් අරගෙන ගියා.
30 නෙබුකද්නෙෂර්ගේ* 23වෙනි අවුරුද්දේ ආරක්ෂක නිලධාරීන්ගේ ප්‍රධානියා වුණ නෙබුෂරදාන් යුදෙව්වන් 745දෙනෙක්ව වහලුන් විදිහට අරන් ගියා.+
වහලුන් විදිහට අරන් ගිය අයගේ මුළු ගාණ 4,600යි.
31 යූදාවල රජකම් කරපු යෙහෝයාකින්+ බැබිලෝනියේ වහලෙක් විදිහට හිටපු 37වෙනි අවුරුද්දේ 12වෙනි මාසේ 25වෙනිදා බැබිලෝනියේ රජ වුණ එවිල්මෙරොදක් යෙහෝයාකින්ව හිරෙන් නිදහස් කළා. ඒ අවුරුද්දේ තමයි එවිල්මෙරොදක් රජකමට පත් වුණේ.+ 32 එවිල්මෙරොදක් යෙහෝයාකින්ට කරුණාව පෙන්නලා බැබිලෝනියේ හිරකරුවන් විදිහට හිටපු අනිත් රජවරුන්ට වඩා එයාට ගෞරවයෙන් සැලකුවා. 33 ඉතින් යෙහෝයාකින් හිරකරුවෙක් විදිහට ඇඳන් හිටපු ඇඳුම් අයින් කරලා අලුත් ඇඳුම් ඇන්දා. එදා ඉඳන් එයා කෑම කෑවේ රජගේ මේසයෙන්. එයා මැරෙන කල්ම ඒ අවස්ථාව එයාට ලැබුණා. 34 එයා ජීවත් වුණ හැම දවසකම ඒ කියන්නේ එයා මැරෙන කල්ම බැබිලෝනියේ රජගේ කෑමවලින් පංගුවක් එයාට ලැබුණා.