අනාගතය ගැන සත්‍යය

“දෙවිගේ රාජ්‍යය ළඟ බව දැනගන්න” පුළුවන් කොහොමද කියලා යේසුස් පැහැදිලි කළා. (ලූක් 21:31) ඔහු කලින්ම කිව්වා අද අපි අද්දකින දරුණු යුද්ධ, විශාල භූමිකම්පා, ආහාර හිඟකම් සහ වසංගත ඇතුළු තවත් දේවල් ඒ කාලයේදී සිද්ධ වෙනවා කියලා.—ලූක් 21:10-17.

ඒ වගේම “අවසාන කාලයේදී” ඒ කියන්නේ මිනිස් පාලනයේ අවසානය ළං වෙද්දී මිනිසුන් හුඟක් නරක විදිහට හැසිරෙනවා කියලත් බයිබලයේ කලින්ම කියලා තිබුණා. ඒ ගැන 2 තිමෝති 3:1-5 පදවලින් දැනගන්න පුළුවන්. අද ඉන්න මිනිසුන් හිතන්නේ, වැඩ කරන්නේ ඒ අනාවැකියේ කියලා තියෙන විදිහටමයි නේද?

ඒ දේවල්වලින් පැහැදිලි වෙන්නේ මොකක්ද? දෙවියන්ගේ රාජ්‍යයෙන් මිනිසුන්ගේ හැම ප්‍රශ්නයකටම විසඳුමක් ගේන කාලය අත ළඟටම ඇවිත් කියන එකයි. (ලූක් 21:36) ඒ කාලේදී මේ පොළොවටත් මිනිසුන්ටත් හොඳ කාලයක් උදා කරලා දෙනවා කියලා දෙවියන් පොරොන්දු වෙලා තියෙනවා. ඒ අතරින් කිහිපයක් බලමු.

යහපත් පාලනයක්

“සියලු ජාතීන්, ගෝත්‍ර හා විවිධ භාෂා කතා කරන මිනිසුන් ඔහුට සේවය කරන පිණිස රාජ්‍යයද බලයද ගෞරවයද ඔහුට දෙන ලදි. ඔහුගේ පාලනය කිසිදා නැති නොවන සදහටම පවතින පාලනයකි. ඔහුගේ රාජ්‍යය කිසිදාක විනාශ නොවන්නේය.”—දානියෙල් 7:14.

අදහස් කරන දේ: දෙවියන් තම පුතා වන යේසුස්ට භාර දීලා තියෙන, ලෝකයම පාලනය කරන්න යන ආණ්ඩුවක් යටතේ සතුටින් ජීවත් වෙන්න ඔයාට පුළුවන්.

හොඳ සෞඛ්‍යයක්

“කිසිවෙකුවත්, ‘මා ලෙඩින්’ යයි පවසන්නේ නැත.”—යෙසායා 33:24.

අදහස් කරන දේ: අසනීපයක් නිසාවත් ආබාධයක් නිසාවත් ඔයාට කවදාවත් දුක් විඳින්න වෙන්නේ නැහැ. මැරෙන්නේ නැතුව හැමදාටම ජීවත් වෙන්න අවස්ථාව ලැබෙනවා.

සාමය රජයන කාලයක්

“පොළොවේ සිදු වන සියලු යුද්ධ ඔහු නවත්වා දමන්නේය.”—ගීතාවලිය 46:9.

අදහස් කරන දේ: ආයේ කවදාවත්, යුද්ධයක් ඇති වෙයි කියන බයෙන් ජීවත් වෙන්නවත් යුද්ධයේ වේදනාකාරී අද්දැකීම්වලට මුහුණ දෙන්නවත් සිද්ධ වෙන්නේ නැහැ.

මුළු පොළොවෙම ඉන්න යන්නේ යහපත් මිනිසුන් විතරයි

‘තව කෙටි කලකින් දුෂ්ටයා නැති වී යන්නේය. නමුත් නිහතමානී අය පොළොව උරුම කරගන්නෝය.’—ගීතාවලිය 37:10, 11.

අදහස් කරන දේ: ඒ කාලේදී ජීවත් වෙන්නේ කැමැත්තෙන්ම දෙවියන්ට කීකරු වෙන අය විතරයි. දුෂ්ට මිනිසුන් ඉන්න යන්නේ නැහැ.

මුළු පොළොවම පාරාදීසයක් වෙනවා

“ඔවුහු ගෙවල් ගොඩනඟා එහි ජීවත් වන්නෝය. මිදිවතු වවා එහි පලදාව භුක්ති විඳින්නෝය.”—යෙසායා 65:21, 22.

අදහස් කරන දේ: මුළු පොළොවම ලස්සන උයනක් වෙනවා. දෙවියන්ගේ කැමැත්ත ‘පොළොවෙත්’ සිද්ධ වෙන්න කියලා අපි දෙවියන්ගෙන් කරන ඉල්ලීම දෙවියන් ඉටු කරනවා.—මතෙව් 6:10.