යෙහෝවා දෙවිගේ සාක්ෂිකරුවන් පරණ ගිවිසුම පිළිගන්නවාද?
ඔව්. යෙහෝවා දෙවිගේ සාක්ෂිකරුවන් වන අපි විශ්වාස කරනවා පරණ ගිවිසුම ඇතුළු මුළු බයිබලයම ලියලා තියෙන්නේ ‘දෙවිගේ මඟ පෙන්වීමෙන්’ කියලා. (2 තිමෝති 3:16) ඒ නිසා අලුත් ගිවිසුම වගේම පරණ ගිවිසුමත් අපි පිළිගන්නවා. හැබැයි පරණ හා අලුත් කියන වචනවලින් ඒ කොටස් දෙක හඳුන්වනවා වෙනුවට අපි ඒවා හඳුන්වන්නේ හෙබ්‍රෙව් ශුද්ධ ලියවිල්ල හා ග්‍රීක ශුද්ධ ලියවිල්ල කියලයි. ඒකට හේතුව පරණ ගිවිසුම කියලා හැඳින්නුවොත් ඒක පරණ නිසා අදට අදාළ නැහැ කියලා සමහරු හිතන්න පුළුවන්. එහෙම හිතනවාට අපි කැමති නැහැ.
අලුත් ගිවිසුම වගේම පරණ ගිවිසුමත් වැදගත් වෙන්නේ ඇයි?
දෙවියන්ගේ මඟ පෙන්වීමෙන් යේසුස්ගේ නියෝජිතයෙක් වුණු පාවුල් මෙහෙම ලිව්වා. “අතීතයේ ශුද්ධ ලියවිලිවල එසේ ලියා තිබෙන සෑම දෙයකින්ම අපට යමක් ඉගෙනගත හැක.” (රෝම 15:4) ඒකෙන් පැහැදිලි වෙන්නේ පරණ ගිවිසුමේ ඒ කියන්නේ හෙබ්‍රෙව් ශුද්ධ ලියවිල්ලේ වටිනා තොරතුරු හුඟක් තියෙනවා කියලයි. ඒවා මොනවාද?
ඉතිහාසය ගැන තොරතුරු. දෙවියන් හැම දෙයක්ම නිර්මාණය කරපු විදිහ ගැනත් මුල් මිනිස් යුවළ දෙවියන්ට අකීකරු වුණ විදිහ ගැනත් තොරතුරු හෙබ්‍රෙව් ශුද්ධ ලියවිල්ලේ තියෙනවා. ඒ තොරතුරු නැතුව සමහර වැදගත් ප්‍රශ්නවලට අපිට කවදාවත් උත්තර හොයාගන්න බැහැ. උදාහරණයකට, මිනිස් වර්ගයාගේ ආරම්භය මොකක්ද, ඇයි අපි මැරෙන්නේ කියන ප්‍රශ්නවලට උත්තර හොයාගන්න බැරි වෙනවා. (උත්පත්ති 2:7, 17) ඊට අමතරව අපි හා සමාන හැඟීම් තිබුණු අපි මුහුණ දෙන ප්‍රශ්නවලටම මුහුණ දීපු මිනිසුන් එක්ක දෙවියන් කටයුතු කළේ කොහොමද කියලත් ඒකේ වාර්තා වෙලා තියෙනවා.—යාකොබ් 5:17.
වටිනා මඟ පෙන්වීම්. හෙබ්‍රෙව් ශුද්ධ ලියවිල්ලට ඇතුළත් වෙන හිතෝපදේශ හා දේශනාකාරයා කියන පොත් දෙකේ ජීවිතයට හුඟක් වටින මඟ පෙන්වීම් තියෙනවා. පවුල් ජීවිතය සතුටින් ගත කරන්න පුළුවන් විදිහ (හිතෝපදේශ 15:17), වෙහෙස මහන්සි වෙලා වැඩ කරන එක ගැන අපිට තියෙන්න ඕන හරි ආකල්පය (හිතෝපදේශ 10:4; දේශනාකාරයා 4:6) හා යොවුන් වියේදී ජීවිතය සතුටින් ගත කරන්න පුළුවන් හොඳම විදිහ (දේශනාකාරයා 11:9–12:1) වගේ දේවල් ඒ පොත් දෙකේ සඳහන් වෙනවා.
හෙබ්‍රෙව් ශුද්ධ ලියවිල්ලට ඇතුළත් මුල් පොත්වල මෝසෙස්ට දෙවියන් දීපු නීතිය ගැනත් සඳහන් වෙලා තියෙනවා. අද ඉන්න ක්‍රිස්තියානීන් ඒ නීතියට යටත් නැතත් ඒකෙන් අපේ ජීවිතවලට වටිනා මඟ පෙන්වීම් ලබාගන්න පුළුවන්.—ලෙවී කතාව 19:18; ද්විතීය කතාව 6:5-7.