පාසැලේදී ගැටලු සමඟ සාර්ථකව කටයුතු කිරීමට ඔබේ දරුවාට උපකාර කරන්න
පිරිහීගෙන යන ලෝක තත්වයන් අපගේ දරුවන් ඇතුළත්ව අප සියලුදෙනාටම බලපායි. අපේ කාලයේදී “කටයුතු කිරීමට දුෂ්කර අර්බුධකාරි කාලවල් [පැමිණෙනු ඇති] [NW]” බවත් “නපුරු මනුෂ්‍යයොත් රැවටිලිකාරයොත් රවටමින්ද රැවටෙමින්ද වඩ වඩා නරක්වන්නෝය,” යනුවෙනුත් දෙවියන්වහන්සේගේ වචනය වන බයිබලය, නිවැරදිව පුරෝකථනය කළේය. (2 තිමෝති 3:1-5, 13) එබැවින්, තම දෙමව්පියන් කලාතුරකින් අද්දුටු තත්වයන් සමඟ ශිෂ්‍යයන් පොරබදමින් සිටින අතර, පාසැල දුෂ්කරතාවලින් පිරී පවතී. මේ සමඟ සාර්ථකව කටයුතු කිරීමට තම දරුවන්ට උපකාර කිරීම සඳහා දෙමව්පියන්ට කළ හැක්කේ කුමක්ද?
තුල්‍ය පීඩනය
දරුවන්ගෙන් වැඩි පිරිසක් යම් අවස්ථාවකදී තුල්‍ය පීඩනය අද්දකිති. එක් ප්‍රංශ ජාතික තරුණ ශිෂ්‍යයෙක් මෙලෙස ශෝකය ප්‍රකාශ කරයි: “දෙමව්පියන් හා සමාජය මගින් කළ හැකි දේ කරනු ලැබේ, නමුත් එය ප්‍රමාණවත් නොවෙයි. අපචාරි හැසිරීමෙහි යෙදෙන යෞවනයෝ වෙනත් යෞවනයන්වත් වරදට පොලඹවති. . . . තම දරුවන්ව පාලනය නොකරන දෙමව්පියන්, නියම දෙමව්පියෝ නොවෙත්.”
වගකීමේ හැඟීමක් ඇතුව ක්‍රියා කරන දෙමව්පියෝ, තම දරුවන්ට හානිදායක තුල්‍ය පීඩනයට එරෙහිව සටන් කිරීමට අවශ්‍ය අභ්‍යන්තර ශක්තිය ලබා දෙන ආත්මික ගුණාංග වර්ධනය කරගැනීම සඳහා, උපකාර කිරීමට වෑයම් කරති. “අපේ දරුවන්ට ආත්මාභිමානය වර්ධනය කරගැනීමට උපකාර කිරීම සඳහා අපි අව්‍යාජ වෑයමක් දරනවා,” යනුවෙන් එක් පියෙක් පැහැදිලි කරයි, “එවිට ඔවුන්ගේ තුල්‍යයන්ගේ අනුමැතිය ලබාගැනීමට අවශ්‍ය බව ඔවුන්ට හැඟෙන්න යන්නේ නැහැ. වෙනත් දරුවන්ට සමාන වීම ඔවුන්ට වැදගත් දෙයක් වන්නේ නැත්නම්, නැහැ යයි කිව යුතුව තිබෙන අවස්ථාවලදී, නැත යයි කීම ඔවුන්ට වඩාත් පහසු දෙයක් වේවි.” දුෂ්කර තත්වයන් හසුරුවන ආකාරය තම දරුවන්ට ඉගැන්වීම සඳහා මෙම මව හෝ පියා, මුළු පවුලම කොටස් රඟදැක්වීමෙහි සහභාගි කරවාගැනීම සඳහා කාලය වෙන් කර තබයි, එනම් පැනනැඟිය හැකි දුෂ්කර තත්වයන් රඟදැක්වීම හා ඒවා සමඟ කටයුතු කිරීම සඳහා ක්‍රම නිරූපනය කිරීමය. සහායවන දෙමව්පියෙකු වී, ඔබේ දරුවාට ආත්ම-විශ්වාසය වර්ධනය කරගැනීමට උපකාර කරන්න.
අසභ්‍ය භාෂාව
ලොව පුරා සදාචාර ප්‍රමිතිවල පහත බැසීමත් සමඟම, අසභ්‍ය භාෂාව වඩා සාමාන්‍ය දෙයක් බවට පත්වෙයි. රූපවාහිනියේ ප්‍රධාන විකාශන කාලය යනුවෙන් බොහෝ රටවල හඳුන්වනු ලබන කාලය තුළ එය නිතරම පාහේ අසන්ට ලැබේ. එම නිසා පාසැල් ක්‍රීඩා පිට්ටනි, කොරිඩෝර සහ පන්ති කාමර අසභ්‍ය යෙදුම්වලින් රැව්පිළිරැව් දෙයි.
සමහර ගුරුවරුන් කෝපවන විට තමන්ගේම අසභ්‍ය, කියමන් යුක්තිසහගත කරන්නේ, එවිට එබඳු කතා බහට තම ශිෂ්‍යයන්ට තමුන්ගේම ආකල්ප සකස් කරගැනීමට හැකි වේ කියා තර්ක කිරීමෙනි. එහෙත් එබඳු ක්‍රියාමාර්ගයක් මගින් මෙම කෙලෙසුණු ප්‍රකාශයන් එදිනෙදා ජීවිතයේ පිළිගත හැකි කතා බහේ කොටසක් ලෙස සැලකීමට ශිෂ්‍යයන්ට මඟ සලසයි.
එබඳු වචන පවුල තුළ භාවිත කිරීමට ඉඩ නොහැරීමට හේතුව ප්‍රඥාවන්ත දෙමව්පියෙක් කරුණාවන්ත ආකාරයකින් පැහැදිලි කරයි. තවද තම දරුවා ඉගෙනගන්ට යන්නේ කිනම් පොත්ද යන්න දැනගැනීම සඳහා පාසැල් නිර්දේශ පත්‍රය පරීක්ෂා කිරීමෙන්ද කල් ඇතිව අසභ්‍ය භාෂාවේ ගැටලුව වළක්වාගැනීමට ඔහුට හැකි වේ. තෝරාගෙන තිබෙන කිසියම් කෘත්‍යයක අසභ්‍ය භාෂාවට හෝ දුරාචාරයට අවධානය යොමු කෙරේ නම්, ඇතැම්විට ඒ වෙනුවට පිළිගත හැකි දේ අඩංගු පොතක් තෝරාගැනීමට ඔහුට දරුවාගේ ගුරුවරයාගෙන් ඉල්ලා සිටිය හැකිය. සමබර එළඹීමක් සාධාරණත්වය නිරූපනය කරයි.—පිලිප්පි 4:5.
දුරාචාරය හා මත්ද්‍රව්‍ය
“නිවසේදී [ලිංගික අධ්‍යාපනය] පිළිබඳ විෂය ගැන සාකච්ඡා කිරීමට බොහෝ දෙමව්පියන් ඉතා ලැජ්ජාශීලී හෝ ව්‍යාකූලව සිටින” බව සමීක්ෂණවලින් හෙළි වේ. ඒ වෙනුවට තමන්ගේ දරුවන්ට නිවැරදි තොරතුරු ලබා දීම සඳහා ඔවුහු පාසැල් මත රඳා සිටිත්. එහෙත් එක් ජ්‍යෙෂ්ඨ ගුරුවරයෙකුට අනුව, අදදින නහඹර අවදියේ ගැබ්ගැනීම්වල අතිවිශාල සංඛ්‍යාවට හේතුව “විශාල වශයෙන් රඳා පවතින්නේ උපත් පාලන ක්‍රම පිළිබඳ නොදැනුවත්කමට වඩා සදාචාරය මතය,” යනුවෙන් ද සන්ඩේ ටයිම්ස් ඔෆ් ලන්ඩන් වාර්තා කරයි. තම දරුවන් පැවැත්විය යුතු යයි දෙමව්පියන් බලාපොරොත්තු වන හැසිරීමේ ප්‍රමිති පිහිටුවාගැනීමට වඩාත්ම සුදුසු තත්වයක සිටින්නේ දෙමව්පියන්මය.
මත්ද්‍රව්‍ය අනිසි භාවිතය සම්බන්ධයෙන්ද එම දේම සැබෑ වේ. දෙමාපිය මඟ පෙන්වීමේ ඌනතාවක් ගැටලුව වඩාත් දරුණු කරවයි. “පවුල් ජීවිතය දරුවෙකුට එන්ට එන්ටම වඩ වඩා අප්‍රසන්න වන බවක් දැනේ නම්, තමාට විකල්පයක් සොයාගැනීමට තිබෙන නැඹුරුවාවද වඩා වැඩි වේ,” යනුවෙන් ෆ්‍රාංකෝස්කෝපි 1993 නිරීක්ෂණය කරයි. “බොහෝවිට මත්ද්‍රව්‍ය [ගැනීම] ඉන් එක් විකල්පයක් වේ.” “දෙමව්පියෙකු වීම දුෂ්කර දෙයකි,” යනුවෙන් ටෝක්සිකෝමැනී ඒ ප්‍රේවාන්ස්යොන් ෂනස් (මත්ද්‍රව්‍ය භාවිතය හා යෞවනයන් ආරක්ෂා කිරීම) ආයතනයේ සභාපති වන මිෂ්ලීන් ෂැබාන්-ඩෙල්මා පිළිගන්නීය. “ඔබට හැමවිටම පරීක්ෂාකාරිව සිටීමට අවශ්‍ය වේ; බොහෝවිට යමක් වැරදී ගොස් තිබෙන බවට දෙමව්පියන්ව අවදි කිරීමේ ක්‍රමයක් මත්ද්‍රව්‍ය වේ. තම මව හෝ පියා තමාට අවධානය යොමු නොකරන බව නහඹරයාට හැඟෙන්නේ නම්, ඔහුට මත්ද්‍රව්‍ය පිරිනමනු ලබන විට, ඒවා ඔහුගේ ගැටලුවලට හරියට අරුම පුදුම විසඳුමක් මෙන් දිස්විය හැකිය.”
එක් කැනේඩියානු දෙමව්පියෙක් තමාද තම භාර්යාවද නහඹර වියේ සිටින ඔවුන්ගේ දියණියගේ අධ්‍යාපනය කෙරෙහි ඔවුන් සැබෑ උනන්දුවක් දක්වන ආකාරය මෙසේ පැහැදිලි කරයි: “අපි නේඩීන්ව පාසැලට ගෙනයන්නෙත් ඉන්පසු ගෙදර ගේන්නෙත් මෝටර් රථයෙන්, බොහෝවිට ඇයව නිවසට ගෙනෙද්දී, ඇගේ දවස කෙබඳු එකක් වුණාද කියා හෙළි කරන සාකච්ඡාවක් ඇරඹෙයි. තරමක් බැරෑරුම් ස්වභාවයක යමක් අපට සොයාගැනීමට හැකි වුවහොත්, අපි ඒ අවස්ථාවේදී ඇය සමඟ ඒ ගැන කතා කරනවා, එසේත් නැතහොත් ආහාර ගන්නා විට හෝ පවුල් සාකච්ඡාවකදී නැවතත් එම විෂය මතු කරනවා.” ඔබත් එයාකාරයට අදහස් හුවමාරු කිරීමේ මාර්ගයන් විවෘතව තබාගැනීමෙන්, ඔබේ දරුවා සඳහා ඔබට තිබෙන අව්‍යාජ සැලකිල්ල හා ප්‍රේමය දැක්වීමට හැකි වේ.
හිරිහැර කිරීම හා සැහැසියාව
හිරිහැර කිරීම යනු “පාසැල් ගැටලුවලින් වඩාත්ම සැඟවුණු ගැටලුවකි” යනුවෙන් හෞ ටු හෙල්ප් යෝර් චයිල්ඩ් තෲ ස්කූල් යන පොතේ මොරීන් ඔ’කොනර් පවසන්නීය. “ඊට ගොදුරුවූවන්ට කොතරම් දුක්ඛිතභාවයක් ඉන් ඇති කළත්, ඔවුන් බොහෝවිට වැඩිහිටියෙකුට ඒ ගැන පැවසීමට අකමැත්තක් දක්වන්නේ ‘කේලම් කියන්නෙක්’ යන ලේබලය තමන්ට ලැබේවි යන බිය නිසාය,” යනුවෙන්ද ඈ සඳහන් කරයි.
ඇතැම් ගුරුවරුන් හිරිහැර කිරීම සාමාන්‍ය හැසිරීම ලෙස සැලකීම කනගාටුවට කරුණකි. එහෙත් වෙනත් බොහෝ අය ශික්ෂක පීට් ස්ටීවන්සන් සමඟ එකඟ වෙත්, හිරිහැර කිරීම “අනිසි සැලකිල්ලේ එක් ආකාරයක්” වන බව ඔහු විශ්වාස කරන අතර, “එය දිගටම පැවතීමට ඉඩහැරීම හිරිහැර කරන්නන්ට ප්‍රයෝජනවත් නොවන බවද” ඔහු තරයේ කියා සිටියි.
එසේනම්, ඔබේ දරුවා හිරිහැර කරන්නෙකුගේ ගොදුර බවට පත්වුවහොත් ඔබට කළ හැක්කේ කුමක්ද? “ආත්මාරක්ෂාව සඳහා වඩාත්ම වැදගත් ඒකකය විය යුත්තේ [ගොදුරු වන අය] ජීවත්වන ප්‍රදේශයේ සිටින වැඩිහිටි සමාජයයි,” යනුවෙන් ඔ’කොනර් ලියයි. අනුකම්පාසහගත ගුරුවරයෙකු සමඟ දේවල් සාකච්ඡා කරන්න. එබඳු කලහකාරි හැසිරීම පිළිගත නොහැකි දෙයක් යයි ඔබ දෙදෙනා සලකන බව මෙය ඔබේ දරුවාට සහතික කරයි. බොහෝ පාසැල් මගින් හිරිහැර කිරීමට එරෙහිව පැහැදිලි ප්‍රතිපත්තියක් යොදවා තිබේ, මෙය ගුරුවරුන් විසින් පන්තියේදී විවෘතව සාකච්ඡා කෙරේ.
නැටලි ඇගේ ආගම නිසා හිරිහැර කරන්නන්ගේ ගොදුර බවට පත්වූවාය. “මම යෙහෝවඃවහන්සේගේ සාක්ෂිකරුවෙකු වූ නිසා, මට අපහාස කරනු ලැබූ අතර, ඇතැම්විට මගේ පොත් පත් ඉරා දමනු ලැබුවා,” යනුවෙන් ඈ සඳහන් කරයි. ගැටලුව විසඳාගැනීම සඳහා, ඇගේ දෙමව්පියන් සමඟ ඈ දේවල් සාකච්ඡා කළා, ඇගේ ගුරුවරුන් සමඟ කතා කිරීමට ඔවුන් ඇයට යෝජනා කළා. ඈ එසේ කළාය. “මට හිරිහැර කළ මගේ පන්තියේ ළමුන් දෙදෙනෙකුගේ දෙමව්පියන් දුරකථනයෙන් ඇමතීමටද මා පියවර ගත්තා,” යනුවෙන් තවදුරටත් ඈ සඳහන් කරයි. “ඔවුන්ට ගැටලුව විස්තර කිරීමට මට හැකි වූ නිසා, දැන් දේවල් වඩාත් යහපත් අතකට හැරී ඇත. එමගින් මගේ ගුරුවරුන්ගේද පන්තියේ ළමුන් වැඩිදෙනෙකුගේද විශ්වාසය මට දිනාගැනීමට හැකි වුණා.”
ඇතැම් අවස්ථාවලදී, තම දරුවා හිරිහැර කරනු ලබන්නා නොව, හිරිහැර කරන්නා බව දෙමව්පියන්ට දැනගන්ට ලැබේ. එසේ වන විට නිවසේදී සිදුවන දේ සමීපව පරීක්ෂා කිරීම ඔවුන් කළ යුතු දෙයකි. “වඩා පැහැදිලි ලෙස කලහකාරි ස්වභාවයක් දක්වන දරුවන් පැමිණෙන්නේ, දෙමව්පියන් ප්‍රමාණවත් ආකාරයකින් ඝට්ටන විසඳා නොගන්නා පවුල්වලිනි,” යනුවෙන් ලන්ඩනයේ ද ටයිම්ස් වාර්තා කරන අතර, එහි තවදුරටත් මෙසේ සඳහන් වෙයි: “දරුණු හැසිරීම ඉගෙනගත් ක්‍රියාමාර්ගයකි.”
ඇතැම් ස්ථානවල සැහැසියාව වසංගත මෙන් පැතිර පවතියි. දේශපාලනමය නොසන්සුන්කම නිසා පාසැල් යෑමට බොහෝදුරට නොහැකි වන විට, ඇතැම් අවස්ථාවලදී නිවසේ නතරවීම ප්‍රඥාවන්ත දෙය බව මධ්‍යස්ථභාවය අගය කරන දරුවන් විසින් සොයාගෙන තිබේ. එහෙත් ඔවුන් පාසැලේ සිටිද්දී කලබලය ආරම්භ වේ නම්, ඔවුහු නුවණක්කාර අන්දමකින් පාසැලෙන් පිටවී නැවත සන්සුන්කම පිහිටුවනු ලබන තෙක් නිවසේ රැඳී සිටිති.
දුර්වල ඉගැන්වීම
දුර්වල ඉගැන්වීම හේතුවෙන් ගැටලු මතුවන විට ඔබේ දරුවා සහ ඔබේ දරුවාගේ ගුරුවරුන් අතර හොඳ අදහස් හුවමාරුව පවත්වාගැනීම උපකාරවත් විය හැකිය. “අප නිතරම අපේ දියණියට දිරිගන්වන්නේ ඇගේ පාඩම් කෙරෙහි ඒකාන්ත ආකල්පයක් ඇතුව සිටීමටයි,” යනුවෙන් එක් යුවළක් අදහස් ප්‍රකාශ කරති. එහෙත් යම් විෂයක් සිත් ඇදගන්නා එකක් බවට පත් කිරීමට ගුරුවරුන් අසමත් වන විට, දරුවන්ගේ උනන්දුව ඉක්මනින් හීනවී යයි. ඔබේ දරුවා සම්බන්ධයෙන් මෙය සැබෑ වේ නම්, ගුරුවරයා සමඟ පෞද්ගලිකව කතා කිරීමට ඔහුට දිරිගන්වන්න.
පිළිතුරු සපයනු ලැබූ විට, පාඩමේ ප්‍රධාන කරුණ තේරුම්ගැනීමටත්, උගන්වනු ලැබූ දෙය භාවිත කරන ආකාරය ඉගෙනගැනීමටත්, ඔබේ බාලයාට උපකාර කරන්නාවූ ප්‍රශ්න සූදානම් කිරීමට ඔහුට උපකාර කරන්න. කෙසේවෙතත්, මෙයින් පමණක්ම විෂය කෙරෙහි අව්‍යාජ මෙන්ම කල්පවතින උනන්දුවක් සහතික වන්නේ නැත. දෙමව්පියෙකු වශයෙන් ඔබගේම ආදර්ශය මත බොහෝ දේ රඳා පවතියි. ඔබේ දරුවා සමඟ පාඩම් සාකච්ඡා කිරීම තුළින් ඔබ සැලකිල්ල දක්වන බව නිරූපනය කරන්න, එමෙන්ම ගුරුවරයා පවරන තොරතුරු විමසීමේ කටයුතුවල උපකාර කිරීමට ඉදිරිපත්වන්න.
පාසැලේදී, බෙදුණු පවුල්වලින් පැමිණෙන හෝ අනිසි පීඩා ලබන නැතහොත් සැලකිල්ල නොලබන තත්වයන් යටතේ ජීවත්වන දරුවෝ සිටිත්, එබැවින් මෙම දරුවන්ට බොහෝවිට ආත්ම-විශ්වාසයේ හා ආත්ම-ගෞරවයේ ඌනතාවක් තිබේ. වඩා හොඳ තත්වයන් යටතේ ජීවත්විය හැකි දරුවන් සමඟ මෙම දරුවෝද එකට හැසිරෙති. පාසැලේදී පැනනඟින ගැටලුවලට සාර්ථකව මුහුණ දීමට තම දරුවන්ට නොකඩවා උපකාර කළ යුතු බව බොහෝ දෙමව්පියන්ට වැටහෙයි. එහෙත් ගුරුවරුන් සමඟ දෙමව්පියන් කටයුතු කිරීම සම්බන්ධයෙන් කුමක් කිව හැකිද? ඔවුන් ගොඩනැගිය යුත්තේ කිනම් ආකාරයේ සම්බන්ධකමක්ද, එමෙන්ම ඒ කෙසේද? g94 8/8
[7වන පිටුවේ කොටුව]
ඔබේ දරුවා හිරිහැර කරන්නෙකුට අසුව සිටීද?
ප්‍රවීණයෝ දෙමව්පියන්ට උපදෙස් දෙන්නේ සැඟවුණු දේ එළිදරව් කරන ලකුණු සඳහා තම දරුවන් නිරීක්ෂණය කිරීමටයි. ඔහු හෝ ඇය පාසැල් යෑමට අකමැත්තක් දක්වනවාද, පාසැලේ මිතුරු මිතුරියන් මඟහරිනවාද, නැතහොත් තුවාල වී හෝ ඉරී ගිය ඇඳුම් සමඟින් ඔහු නිවසට පැමිණෙනවාද?
සිදුවූ දේ කුමක්ද කියා හරියටම ඔබට පැවසීමට ඔබේ දරුවාට දිරිගන්වන්න. සැබෑ ගැටලුව හිරිහැර කිරීමද කියා දැනගැනීමට මෙය ඔබට උපකාර කරනු ඇත. එය එසේ වේ නම් අනුකම්පාසහගත ගුරුවරයෙකු සමඟ කතා කරන්න.
විශ්වාස කළ හැකි මිතුරු මිතුරියන් අතර සිටීමටත්, හිරිහැර කිරීම නැවත සිදුවිය හැකි ස්ථාන සහ අවස්ථා මඟහැරීමටත් යෝජනා කිරීමෙන්, ඔබේ දරුවාට සාර්ථකව කටයුතු කිරීමට උපකාර කරන්න. හොඳ හාස්‍යජනක ස්වභාවයක් සහිත මෙන්ම දුෂ්කර තත්වයකින් ඉවත්වීමට කතා කළ යුතු ආකාරය දැන සිටින ළමයෙකු බොහෝවිට හොඳින් ක්‍රියා කරනු ඇත.
පමණට වඩා වැඩියෙන් කලබල වීමෙන් වළකින්න, එමෙන්ම පළිගැනීමට දිරි නොදෙන්න.