අභියෝගය ජය ගන්න විදිහ
දෙවියන්ගේ රාජ්‍යය යටතේ “බොහෝ සමාදානය තිබෙන්නේය”
ළඟදීම දෙවියන්ගේ රාජ්‍යය යටතේ පොළොවේ ඉන්න හැමෝම සාමයෙන් පිරුණු ප්‍රීතිමත් කාලයක් අද්දකින්න යනවා. බයිබලයේ කියන්නේ ඒ කාලේදී “බොහෝ සමාදානය තිබෙන්නේය” කියලයි. (ගීතාවලිය 72:7) දෙවියන්ගේ රාජ්‍යයෙන් මේ පොළොව පාලනය කරන්න පටන්ගන්නේ කවදාද? ඒක කරන්නේ කොහොමද? ඒ පාලනය යටතේ ආශීර්වාද ලබන්න නම් ඔයා කරන්න ඕනෙ මොනවාද?
දෙවියන්ගේ රාජ්‍යය පැමිණෙන්නේ කවදාද?
දෙවියන්ගේ රාජ්‍යයෙන් මේ පොළොව පාලනය කරන්න පටන්ගන්න කාලය ළං වෙලා කියලා හඳුනගන්න උදව් වෙන සිද්ධීන් මාලාවක් ඇතුළත් “ලකුණක්” ගැන බයිබලයේ තියෙනවා. ඒ ‘ලකුණට’ ලෝකේ පුරාම සිද්ධ වෙන යුද්ධ, සාගත, වසංගත, භූමිකම්පා සහ අධර්මිෂ්ඨ ක්‍රියා වැඩි වෙන එක ඇතුළත් වෙනවා.—මතෙව් 24:3, 7, 12; ලූක් 21:11; එළිදරව් 6:2-8.
ඒ කාලය ගැන බයිබලයේ මෙහෙමත් කියලා තියෙනවා. ‘අවසාන කාලයේදී ඉතා අසීරු, අනතුරු සහිත කාලයක් පැමිණෙන බව ඔබ දැනගත යුතුයි. මන්ද මිනිස්සු තමන් ගැනම සිතන, මුදලට ලොල් වී සිටින, දෙමාපියන්ට අකීකරු වන, ස්තුතිවන්ත නොවන, ද්‍රෝහිකම් කරන අය වනු ඇත. ඔවුහු තමන්ගේම අය කෙරෙහිවත් කිසි සෙනෙහසක් නැති, කිසිම දෙයක් ගැන එකඟ නොවන, නින්දා කරන, තමන්වම පාලනය කරගත නොහැකි, දරුණු, යහපත්කමට කිසි ඇල්මක් නොදක්වන, අහංකාර, දෙවිට වඩා විනෝදයට ඇල්මක් දක්වන අය වනු ඇත.’ (2 තිමෝති 3:1-4) අතීතයේ ඉඳලාම ඒ වගේ ගතිලක්ෂණ සමහර මිනිසුන්ට තිබිලා තියෙනවා. ඒත් මේ වෙද්දී මිනිසුන් හැමෝම වගේ හැසිරෙන්නේ ඒ විදිහට නේද?
බයිබලයේ සඳහන් වෙන “ලකුණ” ඉටු වෙන්න පටන්ගත්තේ 1914 ඉඳන්. ඒ අවුරුද්දේ ඉඳන් ලෝකේ තත්වය වෙනස් වුණු විදිහ ගැන ඉතිහාසඥයන්, පාලකයන් සහ ලේඛකයන් අදහස් දක්වලා තියෙනවා. උදාහරණෙකට ඉතිහාසඥයෙක් වුණු පීටර් මන්ක් කියපු දේ බලන්න. “1914දී ඇති වුණු යුද්ධයත් එක්කම ලෝකේ උඩු යටිකුරු වෙලා තියෙනවා. ලෝකේ තත්වය හැම අතින්ම හොඳ අතට හැරෙමින් තිබුණා කියලා මිනිසුන් හිතුවත් . . . ඒ යුද්ධය පටන්ගන්නවත් එක්කම විපත්ති, භීෂණය සහ වෛරය රජයන කාලයක් උදා වුණා.”
හැම අඳුරු වළාවකම රිදී රේඛාවක් තියෙනවා වගේ ඉස්සරහාට අපිට හොඳ කාලයක් ලැබෙනවා කියලා නිසැක වෙන්න පුළුවන්. මොකද සිද්ධ වෙන ඒ හැම දේකින්ම කියාපාන්නේ දෙවියන්ගේ රාජ්‍යයෙන් පොළොව පාලනය කරන කාලය අත ළඟටම ඇවිත් කියලයි. ලකුණට අයිති හොඳ දෙයක් ගැනත් යේසුස් කිව්වා. “රාජ්‍යය පිළිබඳ මේ ශුභාරංචිය සියලු ජාතීන්ට සාක්ෂියක් වන පිණිස ජනාවාස වූ මුළු පොළොව පුරාම දේශනා කරනු ලබයි. එවිට අවසානය පැමිණෙයි.”—මතෙව් 24:14.
යෙහෝවා දෙවියන්ගේ සාක්ෂිකරුවන් මිනිසුන්ට දැනුම් දෙන්නෙත් ඒ රාජ්‍යයෙන් ලැබෙන්න යන ප්‍රීතිමත් කාලය ගැනයි. එයාලා වැඩියෙන්ම බෙදාහරින සඟරාව වන ‘මුරටැඹ’ සඟරාවේ තේමාවත් ‘යෙහෝවා දෙවියන්ගේ රාජ්‍යය ප්‍රකාශ කරයි’ යන්නයි. ඒකෙන් මූලිකවම කතා කරන්නේ දෙවියන්ගේ රාජ්‍යය මාර්ගයෙන් මිනිසුන්ට අද්දකින්න ලැබෙන ආශීර්වාද ගැනයි.
දෙවියන්ගේ රාජ්‍යයෙන් මේ පොළොවේ පාලනය භාරගද්දී සිද්ධ වෙන්නේ මොනවාද?
කරුණු හතරක් බලමු.
ඒ රාජ්‍යයේ පාලන කටයුතුවලට මේ ලෝකයේ දේශපාලන නායකයන්ව හවුල් කරගන්නේ නැහැ.
දේශපාලන නායකයන් පාලන බලය අත්හරිනවා වෙනුවට අනුවණ විදිහට දෙවියන්ගේ රාජ්‍යයට විරුද්ධව සටන් කරනවා.—ගීතාවලිය 2:2-9.
ඒ රාජ්‍යයෙන් මිනිසුන්ව පාලනය කරන්න උත්සාහ කරන දේශපාලන ආණ්ඩු නැති කරලාම දානවා. (දානියෙල් 2:44; එළිදරව් 19:17-21) මුළු ලෝකෙටම බලපාන ඒ අවසන් සටන හඳුන්වන්නේ “හර්–මගෙදොන්” කියලයි.—එළිදරව් 16:14, 16.
කැමැත්තෙන්ම ඒ රාජ්‍යයේ පාලනයට යටත් වෙන අයට හර්–මගෙදොන් යුද්ධයෙන් බේරිලා සාමකාමී පොළොවක ජීවත් වෙන්න අවස්ථාව ලැබෙනවා. ඒ අයව බයිබලයේ හඳුන්වලා තියෙන්නේ “මහත් සමූහය” විදිහට. (එළිදරව් 7:9, 10, 13, 14) ඒ අය අතරට මිනිසුන් මිලියන ගාණක් ඇතුළත් වෙනවා.
දෙවියන්ගේ රාජ්‍යය යටතේ ආශීර්වාද ලබන්න නම් ඔයා කරන්න ඕනෙ මොනවාද?
මුලින්ම ඔයා දෙවියන් ගැන ඉගෙනගන්න ඕනේ. යේසුස්, දෙවියන්ට කියපු මේ දෙයින් ඒක පැහැදිලියි. ‘සදාකාල ජීවනය ලබාගැනීමට ඔවුන් කළ යුතු දේ නම් එකම සැබෑ දෙවි වන ඔබවත් ඔබ එවූ තැනැත්තා වන යේසුස්වත් දැන හඳුනා ගැනීමයි.’—යොහන් 17:3.
මිනිසුන් යෙහෝවා දෙවියන්ව දැන හඳුනා ගද්දී ඒකෙන් හුඟක් ප්‍රයෝජන ලැබෙනවා. එක ප්‍රයෝජනයක් තමයි දෙවියන් ගැන ශක්තිමත් විශ්වාසයක් ඇති වෙන එක. සැබෑ සාක්ෂි මත පදනම් වුණු ඒ විශ්වාසය නිසා දෙවියන්ගේ රාජ්‍යය සැබෑ ආණ්ඩුවක් කියලත් ඒකෙන් මේ පොළොවේ පාලනය භාරගන්න කාලය අත ළඟයි කියලත් නිසැක වෙන්න පුළුවන්. (හෙබ්‍රෙව් 11:1) තවත් ප්‍රයෝජනයක් තමයි දෙවියන් ගැනත් අසල්වැසියන් ගැනත් තියෙන ආදරේ තවත් වැඩි වෙන එක. දෙවියන් ගැන තියෙන ආදරේ නිසා කැමැත්තෙන්ම ඔහුට කීකරු වෙන්න මිනිසුන් පෙලඹෙනවා. අසල්වැසියන්ට තියෙන ආදරේ නිසා “අනුන් ඔබට කරනවාට ඔබ කැමති දේ එලෙසින්ම ඔවුන්ටත් කරන්න” කියලා යේසුස් දුන්න වටිනා උපදෙස අදාළ කරගන්න පෙලඹෙනවා.—ලූක් 6:31.
ආදරණීය තාත්තා කෙනෙක් වගේ යෙහෝවා දෙවියන්ටත් ඕනෙ අපිට හොඳම දේ දෙන්න. දෙවියන් කැමති අපි “සැබෑ ජීවිතය” අද්දකිනවාටයි. ඒ කියන්නේ ඔහු මුලින් අරමුණු කරපු විදිහට අපි සතුටින් හැමදාම ජීවත් වෙනවා දකින්නයි. (1 තිමෝති 6:19) ඒත් මේ කාලේදී නම් මිලියන ගණනක් මිනිසුන් ගෙවන්නේ හරිම කටුක ජීවිතයක්. එදා වේල හොයාගන්න එයාලා අනන්ත දුක් විඳිනවා. “සැබෑ ජීවිතය” මොන තරම් නම් සුන්දරයිද කියලා දැනගන්න දෙවියන්ගේ රාජ්‍යයේ යටත්වැසියන්ට අද්දකින්න ලැබෙන ආශීර්වාද කීපයක් ගැන බලමු.
දෙවියන්ගේ රාජ්‍යයේ යටත්වැසියන්ට සුරක්ෂිත ජීවිතයක් ගත කරන්න අවස්ථාව ලැබෙනවා. ඇති තරම් ආහාරත් ලැබෙනවා