නෝවා විශාල නැවක් හදයි

නෝවාට භාර්යාවකුයි පුතුන් තුන්දෙනෙකුයි හිටියා. ඒ තමා, ෂෙම්, හාම් හා යඵෙත්. හැම පුතෙකුටම භාර්යාවක් හිටියා. ඒ නිසා නෝවාගේ පවුලේ අටදෙනයි.

දෙවි දැන් නෝවාට කියනවා අමුතු දෙයක් කරන්න කියලා. දෙවි එයාට කිව්වේ විශාල නැවක් හදන්න කියලයි. මේ නැව විශාල පෙට්ටියක් වගෙයි. ‘ඒක තට්ටු තුනක් උසට හදන්න’ කියලත්, ‘ඒකේ කාමර හදන්න’ කියලත් දෙවි කිව්වා. නෝවාට, ඔහුගේ පවුලට, ඒ වගේම සතුන්ට ජීවත් වෙන්නත්, ඒ හැමදෙනාටම ඕන කරන කෑම තියාගන්නත් මේ කාමර ඕන වුණා.

වතුර ටිකක්වත් ඇතුලට යන්නේ නැති වෙන්න නැව හදන්න කියලා දෙවි නෝවාට කිව්වා. ‘මම මහා ජලගැල්මක් එවලා මුළු ලෝකයම විනාශ කරන්න යනවා. නැවෙන් එළියෙ ඉන්න හැමදෙනාම මැරෙන්න යනවා’ කියලා දෙවි කිව්වා.

නෝවායි එයාගේ පුතුන් තුන්දෙනයි යෙහෝවාට කීකරු වෙලා නැව හදන්න පටන්ගත්තා. නමුත් අනිත් මිනිස්සු කළේ හිනා වෙන එක විතරයි. ඒගොල්ලන් දිගටම කළේ නරක වැඩ. දෙවි කරන්න යන දේ ගැන නෝවා ඒගොල්ලන්ට කිව්වාම කවුරුවත්ම එයාව විශ්වාස කළේ නැහැ.

ඒ නැව හුඟාක් විශාල නිසා, ඒක හදන්න ගොඩක් කල් ගියා. අවුරුදු ගණනාවක් ගත වුණාට පස්සේ, ඒක හදලා ඉවර වුණා. ඊට පස්සේ, නැවට සත්තු ඇතුල් කරන්න කියලා දෙවි නෝවාට කිව්වා. සමහර සත්තුන්ගෙන් ගෑනු සතායි පිරිමි සතායි නැවට ගන්න කියලා දෙවි කිව්වා. ඒ වුණාට වෙනත් සත්තුන්ගෙන්, හත්දෙනෙක් ගානේ ගේන්න කියලයි දෙවි නෝවාට කිව්වේ. හැම ජාතියකම කුරුල්ලන් ගේන්න කියලත් දෙවි නෝවාට කිව්වා. දෙවි කියපු විදිහටම නෝවා කළා.

ඊට පස්සේ නෝවාත් එයාගේ පවුලත් නැවට ඇතුල් වුණා. ඒගොල්ලෝ ඇතුල් වුණාට පස්සේ දෙවි දොර වැහුවා. නෝවාත් එයාගේ පවුලත් ඇතුලට වෙලා බලාගෙන හිටියා. ඔයාත් ඒ අය එක්ක නැව ඇතුලට ගිහිල්ලා, බලාගෙන ඉන්නවා කියලා හිතන්න. දෙවි කියපු විදිහටම ඇත්තටම ජලගැල්මක් එයිද?