යෙහෝවඃ වහන්සේ ස්වකීය ජනයා එක්රැස්කර සේවය සඳහා සන්නද්ධ කරන සේක
ශතවර්ෂ ගණනාවක් පුරා ධර්ම භේදය පොළොව පුරා පැතිර ගොස් ඇත. බොහෝ පල්ලි නිකායන් හට බයිබල් ඉගැන්වීම් කිහිපයක් තිබුණමුත් ප්‍රධාන වශයෙන් අනුගමනය කළේ මනුෂ්‍ය සම්ප්‍රදායන් සහ මිථ්‍යා දෘෂ්ටික මූලාරම්භයක් තිබූ බොහෝ සිරිත් විරිත් ය. ක්‍රිස්තුස් වහන්සේගේ නැවත පැමිණීම ගැන බලාපොරොත්තු සාමාන්‍ය වශයෙන් පසෙකට තල්ලු කරනු ලැබී ය.—මතෙව් 13:24-30, 37-43, සසඳන්න.
කෙසේ වුවද, තම නැවත ඊම දිගට ම බලා සිටින ලෙස යේසුස් වහන්සේ කියා තිබුණි! මෙය කරමින් සිටි එක් කණ්ඩායමක් ඇමෙරිකා එක්සත් ජනපදයේ පෙන්සිල්වේනියා හි ජනපද, ඇලෙඝනි නම් පෙදෙසේ ස්ථානගත වී තිබුණි. වර්ෂ 1870 ගණන්වල මුල් භාගයේ දී, චාල්ස් ටේස් රසල් සහ මිත්‍රයින් කිහිප දෙනෙක්, ක්‍රිස්තුස් වහන්සේගේ නැවත ඊම පිළිබඳ ව, නිකායකට බර නොවූ, පූර්ණ බයිබලය අධ්‍යයනය කිරීමක් ආරම්භ කරනු ලැබුවෝ ය. සෙසු බොහෝ මූලික ඉගැන්වීම් ගැන බයිබල් සත්‍යයන් සෙවීමක් ඔවුහු පටන් ගත්හ. නවීන දින යෙහෝවඃ වහන්සේගේ සාක්ෂිකරුවන්ගේ ක්‍රියාකාරකම්වල ආරම්භය එය විය.—මතෙව් 24:42.
මෙම කණ්ඩායම ත්‍රිත්වවාදී ධර්මය බයිබලයෙන් නොවන බවත්, යෙහෝවඃ වහන්සේ පමණක් සර්ව පරාක්‍රම දෙවියන් වහන්සේ සහ මැවුම්කරුවාණන් බවත් අවබෝධ කර ගත්හ; යේසුස් වහන්සේ උන් වහන්සේගේ පළමු මැවිල්ල වූ බවත්, ඒක ජාතක පුත්‍රයාණෝ බවත්; ශුද්ධාත්මය පුද්ගලයෙකු නොවන බවත්, නමුත් දෙවියන් වහන්සේගේ අදෘශ්‍යමාන ක්‍රියාකාරක බලය බවත් ඔවුහු අවබෝධ කර ගත්හ. ආත්මය අමරණීය නොව නමුත් මැරෙන සුලු බව ද, මළ අයට ඇති බලාපොරොත්තුව නැවත නැගිටීම බව ද, පසුතැවිලි නොවූ දුෂ්ටකම සඳහා දඬුවම සදාකාල වධ වේදනා නොව නමුත් විනාශය බව ද මෙම කණ්ඩායම දුටූහ.
මනුෂ්‍ය වර්ගයා වෙනුවෙන් මිදීමේ මිලයක් වශයෙන් යේසුස් වහන්සේගේ ජීවිතය පුද කිරීම මූලික බයිබල් ඉගැන්වීමක් ලෙස දකින ලදි. ස්වර්ගික රාජ්‍යයෙහි යේසුස් වහන්සේ සමඟ හවුල් උරුමක්කාරයින් වීම සඳහා, පළමු සියවසේ සිට, අපේ කාලය දක්වා, තෝරා ගනු ලැබූ ස්ත්‍රීන් සහ පුරුෂයින් 1,44,000 දෙනා පොළොවෙන් මිලයට ගනු ලබනු ඇත. එවිට යේසුස් වහන්සේගේ මිදීමේ මිලය තුළින්, ප්‍රකෝටි ගණන් මනුෂ්‍ය වර්ගයාගේ බහුතරය මරණයෙන් නැවත නැගිටුවනු ලබනවා ඇත. ඔවුන් එම රාජ්‍යය යටතේ පොළොව මත සදාකාල ජීවිතය ගැන මතු බලාපොරොත්තු ඇති ව මනුෂ්‍ය සම්පූර්ණත්වයට පැමිණෙනු ඇත.
රසල් සහ ඔහුගේ ආශ්‍රිතයෝ, යේසුස් වහන්සේගේ පැමිණ සිටීම අදෘශ්‍යමාන ව සහ ආත්මික වශයෙන් වීමට තිබෙන බවත් දුටූහ. දෙවියන් වහන්සේගේ ස්වාධිපත්‍යය පොළොව මත තිබෙන කිසි ආණ්ඩුවකින් ප්‍රකාශ නොවන කාලය වන අන්‍ය ජාතීන්ගේ කාලවල් 1914 දී අවසන් වීමට තිබුණි. එවිට දෙවියන් වහන්සේගේ රාජ්‍යය ස්වර්ගයෙහි පිහිටුවනු ලබනවා ඇත. මෙම ඉගැන්වීම් අද දින යෙහෝවඃ වහන්සේගේ සාක්ෂිකරුවන් සමඟ හඳුනා ගනු ලබයි.
රසල් සහ ඔහුගේ හවුල්කරුවෝ මෙම සත්‍යයන්, කථාවන්ගෙන් සහ මුද්‍රිත පිටු මගින් දුර නුදුරෙහි නිවේදනය කළහ. වර්ෂ 1879 ජූලි මාසයේ දී Zion’s Watch Tower (වර්තමාන මුරටැඹ) ප්‍රකාශයට පත් කිරීමට රසල් පටන් ගති. බයිබල් ශිෂ්‍යයින්ගේ දේශනා වැඩ කටයුතු මුළුමනින් ම ස්වේච්ඡා සම්මාදම් මත රඳා සිටිය යුතු බවත්, එකතු කිරීම් නොකළ යුතු බවත් ඔහු අධිෂ්ඨාන කළේ ය. පණිවුඩය පතුරුවාලිය යුත්තේත් ගාස්තුවක් ලබා නොගන්නා අදහාගත් අයගේ ආයාසයන් තුළින් ය. රසල් ඔහු ම ව්‍යාපාරයන් තුළින් එම කාලය දක්වා එක් රැස් කර ගෙන තිබූ ධනයෙන් සම්මාදම් විය.
බයිබල් ශිෂ්‍යයෝ එකල ඔවුන්ගේ සභාවන් හඳුන්වනු ලැබූ ලෙස, පන්ති තුළ එක් රැස් වූහ. ඔවුහු, සාක්ෂිදැරීම, ශුද්ධ ලියවිලි අධ්‍යයනය, සහ කථා සඳහා සතියකට 3න් වරක් දක්වා එක් රැස් වූහ. සෑම පංතියක ම ආත්මික වැඩ කටයුතු අවේක්ෂණය කිරීම සඳහා වගකිව යුතු පුරුෂයෝ වැඩිමහල්ලන් ලෙස විධිමත් ව තෝරා පත් කර ගත්හ.
වර්ෂ 1884 දී සයන්ස් වොච්ටවර් ට්‍රැක්ට් සොසයටි ලාභ නොලබන සංස්ථාවක් ලෙස පෙන්සිල්වේනියාවෙහි නීතිගත කරන ලදි. සංස්ථාවේ සභාපති වාර්ෂික ව තෝරා පත් කර ගත යුතු ව තිබුණි. බයිබල් අධ්‍යාපන කටයුතු කිසි පුද්ගලයෙකුගේ ජීවිතය මත රඳවා නොගෙන, ඉදිරියට ගෙන යාමට නීතිමය උපකරණයක් මෙය සැපයී ය. චාල්ස් ටී. රසල් සභාපති ලෙස තෝරා පත් කරගනු ලැබූ අතර, ඔහුගේ කාර්යාලය මූලස්ථානය ලෙස සැලකිණ.
අන් රටවල් දක්වා සේවය ව්‍යාප්ත කිරීම සඳහා මහත් පරිශ්‍රමයන් දරන ලදි. එය කැනඩාවට සහ එංගලන්තයට 1880 මුල් භාගවල දී ළඟා විය. සත්‍යය පැතිර වීම වැඩි දුරටත් ගෙන යාම සඳහා තවත් කුමක් කළ හැකිදැයි සලකා බැලීමට, රසල් 1891 දී යුරෝපයේ සහ මැදපෙරදිග සංචාරයක් කළේ ය. වර්ෂ 1900 මුල් භාගයේ දී සමිතියේ ශාඛා කාර්යාලයන් බ්‍රිතාන්‍යයේ, ජර්මනියේ සහ ඕස්ට්‍රේලියාවේ පිහිටුවන ලදි.
දේශනා සේවය ජාත්‍යන්තර පරිමාණයකින් තව දුරටත් ව්‍යාප්ත කරලීම සඳහා 1909 හි වොච්ටවර් සමිතියේ මූලස්ථානය න්‍යූ යෝʼක් හි බෘක්ලින් වෙත ගෙනයන ලදි. න්‍යූ යෝʼක් ජනපද රජයේ ව්‍යවස්ථා යටතේ, අනුබද්ධ සමිතියක් පිහිටු වීමට අවශ්‍ය ව තිබූ බැවින්, දැන් න්‍යූ යෝʼක් වොච්ටවර් බයිබල් ඇන්ඩ් ට්‍රැක්ට් සොසයටි ලෙස දන්නා අනුබද්ධිත, ආයතනය බිහි විය. වර්ෂ 1914 දී එංගලන්තයේ ලන්ඩන් නුවර දී ජාත්‍යන්තර බයිබල් ශිෂ්‍යයින්ගේ සංගමය පිහිටුවා ගනු ලැබුයේ, බ්‍රිතාන්‍ය පොදු රාජ්‍ය මණ්ඩලීය රටවල් තුළ බයිබල් ශිෂ්‍යයින්ගේ කටයුතු උසස් කරලීම සඳහා ය. වර්තමානයෙහි 70ක් පමණ නීතිමය ලෙස පිහිටුවන ලද සංස්ථා සහ සමිති, ලොව වටා බොහෝ රටවල් වොච්ටවර් සමිතියේ අරමුණු ඉටුකරයි. සියලු ම ඒවා ස්වේච්ඡා සම්මාදම්වලින් සහ ස්වේච්ඡා සේවකයින්ගෙන් ආධාර ලබන පරාර්ථකාමී ආයතනයන් ය.
වර්ෂ 1916 දී චාල්ස් ටේස් රසල් මියගිය හෙයින්, ජෝසෙෆ් ෆ්‍රැන්ක්ලින් රතෆඩ් වොච්ටවර් සමිතියේ සභාපති බවට පත් විය. පළමු වන ලෝක යුද්ධයේ අවසාන අවුරුදුවල දී බයිබල් ශිෂ්‍යයින් පීඩා මගින් දරුණු ලෙස පරීක්ෂණයට භාජනය කරන ලදුව, එහි උච්ච අවස්ථාවේ දී ඇමරිකාවේ සමිති මූලස්ථානයෙහි වගකිව යුතු තනතුරු දරමින් සිටි සහෝදරයින් 8 දෙනෙකු සාපරාධී ලෙස සිරගත කරන ලදි. බයිබල් ශිෂ්‍යයින්ගේ සේවය අන්තරායෙහි මෙන් පෙනිණ. කෙසේ නමුත්, 1919 දී මෙම සහෝදරයින් නිදහස් කර චෝදනාවලින් නිදොස් කරනු ලැබ, එතැන් සිට දැන් ඇරඹුණේ දේශනා සේවයේ මහත් ව්‍යාප්තියකි.
ආලේපලත්, එක්සත් ක්‍රිස්තියානි බයිබල් ශිෂ්‍ය මුළුව, සංවිධානය සමඟ සම්බන්ධ වූ සියලු ම පුද්ගලයින් හට නොකඩවා සමිතියේ මූලස්ථානය මගින්, නියම වේලාවට ආත්මික ආහාර සැපයූහ. පළමු සියවසේ ආලේපලත් ක්‍රිස්තියානින්ගේ සභාව, යේසුස් වහන්සේ සඳහන් කළ “විශ්වාසවූ නුවණ ඇති දාසයා” ගෙන් සමන්විත වූවා සේ ම, අපගේ කාලයේ එලෙසින් ම “විශ්වාසවූ නුවණ ඇති දාසයා” පන්තිය සෑදෙන්නේ රාජ්‍යයේ කටයුතුවල යෙදී සිටින ආලේපලත් කැප වූ බයිබල් කණ්ඩායම විසිනි. සභාව සෝදිසි කිරීම සඳහා යේසුස් වහන්සේගේ පැමිණීමේ දී මෙම දාසයා පන්තිය, ගෙවැසියන් හට ආහාර සපයමින් සිටින බව සොයාගත් සේක; එවිට උන් වහන්සේ එම පන්තිය තමන් සන්තක සියල්ල කෙරෙහි පත් කළ සේක.—මතෙව් 24:45-47; ලූක් 12:42.
පළමු වන ලෝක සංග්‍රාමය අවසාන වූ විගස, එනම් 1914 දී යේසුස් වහන්සේ විසින් දෙවියන් වහන්සේගේ රාජ්‍යය ස්වර්ගයෙහි පිහිටුවා තිබෙන බව පැහැදිලි ව පෙනුණි. එසේ යේසුස් වහන්සේගේ වචනයන්ට තම සම්පූර්ණ ඉටුවීම දැන් ලබා ගත හැකි විය: “රාජ්‍යයේ මේ ශුභාරංචිය සියලු ජාතීන්ට සාක්ෂියක් පිණිස ජනාවාස පොළොවේ ප්‍රකාශ කරනු ලබන්නේ ය; එවිට අන්තිමය පැමිණෙන්නේ ය.” ජෝසෙෆ් එෆ්. රතෆඩ් මෙම රාජ්‍ය පණිවුඩය ඊටත් වඩා ජන සංඛ්‍යාවකට ලැබීමට සැලැස්වීම පිණිස මුල පිරී ය.—මතෙව් 24:14, NW.
එම නිසා, හැකි අඩු ම මිලට බයිබල් පොත් පත් නිරතුරු ව නිපදවීම සහතික කිරීම සඳහා කැප වූ මනුෂ්‍යයන් වූ සේවකයින් යොදා, මුද්‍රණ වැඩ තමන් විසින් ම කරගැනීමට සමිතිය තීරණය කළා ය. රාජ්‍යය පිළිබඳ ශුභාරංචිය දේශනා කිරීමෙහි විධිමත් සහභාගිත්වයක් දරන ලෙස සියලු බයිබල් ශිෂ්‍යයින් දිරිගන්වනු ලැබිණ. රටවල් ගණනාවක් තුළ බයිබල් කථාවන් ගුවන්විදුලියෙන් ප්‍රචාරය කිරීමට යෙදුණි.
දෙවියන් වහන්සේගේ පැමිණෙන විනිශ්චය ගැන ලෝකයට අනතුරු ඇඟවීම සහ ක්‍රිස්තුස් යේසුස් වහන්සේ සමඟ ස්වර්ගයෙහි සිටීමට තෝරාගත්තවුන්ගේ ඉතිරි අය එක් රැස් කිරීම තම දේශනා කිරීමේ අරමුණ බව 1918ට පෙර බයිබල් ශිෂ්‍යයෝ අවබෝධ කර ගත්හ. වර්තමාන දුෂ්ට පිළිවෙළේ අවසානයෙන් බේරී පොළොව මත ජීවත්වීමට සිටින්නන් එක් රැස් කිරීම සඳහා කල්පනා කරන ලද්දේ මඳ වශයෙනි. එවිට, 1918 සිට “දැන් ජීවත් වන මිලියන ගණනක් කිසිදා මිය නොයනු ඇත” යන කථාව ව්‍යාප්ත ලෙස ඉදිරිපත් කරන ලදි.
අර්මගෙදොනයට පෙර ධර්මිෂ්ඨ ව සිටි ස්වර්ගික රාජ්‍යය සඳහා සුදුසුකම් නොලැබූ ජනයාත් දෙවියන් වහන්සේගේ අනුමැතිය දිනා, අර්මගෙදොනයෙන් බේරී ජීවත්වන බව 1923 දී මතෙව් 25:31-46 හි යේසුස් වහන්සේගේ එළුවන් සහ බැටළුවන් පිළිබඳ උපමාවේ අධ්‍යයනයක් පෙන්නුම් කළේ ය. වර්ෂ 1935 දී වැඩිදුර අධ්‍යයනයක් පෙන්නුම් කළේ මෙම බැටළුවන් වැනි ජනයා, එළිදරව් 7:9-17 හි විස්තර කර ඇති ගණන් කළ නොහැකි සමූහයේ ජනයා සමඟ හඳුනා ගත යුතු බව ය. මහත් පීඩාවෙන් බේරී පොළොව මත සදාකාල ජීවිතයක් ලබා ගැනීමේ මතු බලාපොරොත්තු ඇති ව සිටින මොවුහු සියලු ජාතීන්ගෙන් එක් රැස් කිරීමට සිටින්නෝ ය. මෙම අවබෝධය, දේශනා සේවයට මහත් බලවේගයක් ලබා දුණි.—යොහන් 10:16.
වර්ෂ 1931 දී බයිබල් ශිෂ්‍යයෝ යෙහෝවඃ වහන්සේගේ සාක්ෂිකරුවෝ යන නාමය වැලඳ ගත්හ. ඉන් පෙර ඔවුන් හඳුන්වන ලද්දේ බයිබල් ශිෂ්‍යයින්, ජාත්‍යන්තර බයිබල් ශිෂ්‍යයින්, දහස් අවුරුදු උදාවේ ජනයා, මුරටැඹ ජනයා වශයෙනි. රසල්වාදීන්, රතෆඩ්වාදීන් ලෙස පවා නම් පටබැඳ තිබුණි. මෙම එක නාමයක්වත් ඔවුන් ව නිසි ලෙස හැඳින්වූයේ නැත. යේසුස් වහන්සේගේ පළමු සියවසේ ගෝලයින් හට දිව්‍ය සැපයුමෙන් ක්‍රිස්තියානි යන නාමය දී තිබූ අතර, ඇත්ත වශයෙන් ම එය යෙදිය හැකි වුවත්, එය බොරු ඉගැන්වීම් අනුගමනය කරන බොහෝ කණ්ඩායම් විසින් ද පාවිච්චි කරමින් තිබුණි. නමින් පමණක් ක්‍රිස්තියානින් ව සිටින්නන්ගෙන් තමන් වෙන් කර හඳුනා ගැනීමට නාමයක් තිබිය යුතු වූ අතර, එය මෙම දවසේ ක්‍රිස්තුස් වහන්සේගේ සැබෑ අනුගාමිකයින් පැහැදිලි ව හඳුන්වන එකක් විය යුතු විය.
ශුද්ධ ලියවිලි සලකා බැලීමකින් පැහැදිලි වූයේ, යෙහෝවඃ වහන්සේ ස්වකීය ජනයා වූ ඊශ්‍රායෙල් ස්වකීය සාක්ෂිකරුවන් ලෙස අමතා තිබූ විලසින් ම, උන් වහන්සේගේ නාමය සහ අරමුණ දැන්වීම සඳහා කැපවී සිටින, දේවල පිළිවෙළේ අවසානයෙහි උන් වහන්සේගේ ජනයා, නියම වශයෙන් යෙහෝවඃ වහන්සේගේ සාක්ෂිකරුවන් ලෙස ඇමතිය යුතු බව ය. මෙම නාමය, යෙහෝවඃ වහන්සේගේ සැබෑ ක්‍රිස්තියානි නමස්කාරකයින්, අනෙකුත් සියලු ම ක්‍රිස්තියානින් බවට අද කියාපාන්නවුන්ගෙන් නිසි ලෙස වෙන් කර හඳුන්වයි.—ගීතාවලිය 83:17; යෙසායා 43:10-12.
වර්ෂ 1942 දී, දෙවන ලෝක යුද්ධය පවතිද්දී, ජෝසෙෆ් එෆ්. රතෆඩ් මියගියෙන් නේතන් එච්. නෝර්, ඔහුට පසුව වොච්ටවර් සමිතියේ සභාපති වශයෙන් පත් විය. මෙම පිළිවෙළේ අවසානයට පෙර දේශනා සේවයේ මහත් ව්‍යාප්තියකට ඉඩ ලබාදෙන සාමයේ සහ නිදහසේ පසු-සංග්‍රාම කාලයක් ගැන අනාගත වාක්‍යයන් පැහැදිලි ව දක්වන බව දැන් පෙනිණ. වර්ෂ 1943 පෙබරවාරියේ දී ගිලියඩ් හි වොච්ටවර් බයිබල් පාසල, විදේශ රටවල මිෂනාරි සේවය සඳහා පූර්ණ-කාලීන දේව සේවකයින් පුහුණු කිරීම අරභයා ආරම්භ කරන ලදි. පසුව එම වර්ෂයේ දී විශේෂ සේවා පුහුණු වැඩ පිළිවෙළක්, යෙහෝවඃ වහන්සේගේ සාක්ෂිකරුවන්ගේ සතිපතා රැස්වීම් වැඩසටහනට එකතු කරන ලදි.
වර්ෂ 1950 දී සමිතිය විසින්, මූලාරම්භක-භාෂා පිටපත්වලින් සාදන ලද නවීන-ඉංග්‍රීසි බයිබල් පරිවර්තනයක් වූ න වʼල්ඩ් ට්‍රාන්ස්ලේෂන් ඔෆ් ද හෝලි ස්ක්‍රිප්චර්ස් කොටස් මුදා හැරීම ආරම්භ කරන්නට විය. සමිතියේ මුද්‍රණාලයෙන් අඩු මිලකට නිෂ්පාදිත, ඒකාන්ත අනුවාදයක් දී ඇති, වටහාගැන්මට-පහසු මෙම බයිබලය දේශනා සේවය තුළ මහත් ආධාරකයක් වී ඇත. අද දක්වා මිලියන 40කට වැඩි පිටපත් සංඛ්‍යාවක් භාෂා 11කින් ප්‍රකාශ කර ඇත.
වර්ෂ 1985 අවසානයේ දී මිලියන තුනකට වැඩි යෙහෝවඃ වහන්සේගේ සාක්ෂිකරුවෝ මුහුදු දිවයින් සහ රටවල් 200කටත් වැඩි සංඛ්‍යාවක දේශනා සේවයෙහි සහභාගි වෙමින් සිටියහ. යේසුස් වහන්සේගේ මරණය සිහිකිරීම සඳහා 1985 දී ඔවුන්ගේ 49,716ක් වන සභාවන්හි පැවැත්වූ රැස්වීමට, එතෙක් පැමිණි ඉහළ ම සංඛ්‍යාව වන 77,92,109 දෙනෙක් පැමිණ සිටියහ.
උන් වහන්සේගේ සේවයෙහි ක්‍රියාකාරී ව ඔවුන්ගේ රැඳීසිටීමෙහි දී, ඔවුන්ගේ ලෝක ව්‍යාප්ත එක්සත් භාවයෙහි දී, යෙහෝවඃ වහන්සේගේ නාමය උත්කෘෂ්ටවත් කිරීම හා උන් වහන්සේගේ රාජ්‍යය දේශනා කිරීමෙහි දී, ඔවුන්ගේ සදාචාර ප්‍රමිතීන්හි දී, මුළු බයිබලය ම දෙවියන් වහන්සේගේ නොවරදින සුලු වචනය ලෙස ඔවුන්ගේ පිළිගැනීමෙහි දී, මිථ්‍යා විශ්වාසයන්ගෙන් හා භූත විද්‍යාවෙන් ඔවුන් නිදහස් ව සිටීමෙහි දී, දෙවියන් වහන්සේ සැබවින් ම යෙහෝවඃ වහන්සේගේ සාක්ෂිකරුවන් යොදාගනිමින් සිටින බව පෙනෙයි.
දෙවියන් වහන්සේගේ සත්‍ය නමස්කාරයේ මෙම නැවත පිහිටුවීම, ඔබට ප්‍රයෝජන විය හැක්කේ කෙසේදැයි ඊළඟ ඡේදයන් පෙන්වයි.
• කුමන බයිබල් ඉගැන්වීම්, පල්ලි නිකායන්ගෙන් බයිබල් ශිෂ්‍යයන් වෙන්කර හඳුන්වයි ද?
• වර්ෂ 1918 දක්වා බයිබල් ශිෂ්‍යයින් අත් දුටුවේ කුමන සංවිධාන වර්ධනයන් ද?
• ආලේපලත් බයිබල් ශිෂ්‍ය කණ්ඩායමෙන් මතෙව් 24:45-47 හි “විශ්වාසවූ නුවණ ඇති දාසයා” සෑදී ඇති බව කෙසේ කිව හැකි ද?
• දෙවියන් වහන්සේගේ අරමුණෙහි කුමන අවබෝධයක්, දේශනා සේවය ව්‍යාප්ත කිරීම සඳහා බලවේගයක් ලබා දුණි ද?
• යෙහෝවඃ වහන්සේගේ සාක්ෂිකරුවෝ යන නාමය කුමන අරමුණ ඉටු කරත් ද?
• දෙවියන් වහන්සේ සැබවින් ම යෙහෝවඃ වහන්සේගේ සාක්ෂිකරුවන් යොදාගන්නා බවට ඇති සාක්ෂි මොනවා ද?
[8වන පිටුවේ පින්තූර]
සී. ටී. රසල් 1879 දී
1879 ජූලි කලාපය
මුල් බයිබල් ශිෂ්‍ය කණ්ඩායමක්, පිට්ස්බර්ග්,පෙන්සිල්වේනියා පෙන්.
[9වන පිටුවේ පින්තූර]
මූලස්ථානය, 1889-1909, පිට්ස්බර්ග්, පෙන්සිල්වේනියාපෙන්.
ප්‍රධාන කාර්යාල, 1909-1918, බෘක්ලින්, න්‍යූ යෝ’ක්නි.යෝ.
මූලස්ථාන නිවාස, 1909-1926, බෘක්ලින්,න්‍යූ යෝ’ක් නි.යෝ.
[10වන පිටුවේ පින්තූර]
යෙහෝවඃ වහන්සේගේ සාක්ෂිකරුවන්ගේ ලෝක මූලස්ථානය, බෘක්ලින්, න්‍යූ යෝʼක්, ඇ. එ. ජ.
ඉහළ වම: කාර්යාල සංකීර්ණය
ඉහළ දකුණ: නිවාස ගොඩනැගිලි
පහළ වම: කර්මාන්ත ශාලා සංකීර්ණය
පහළ දකුණ: නැව්ගතකිරීමේ කේන්ද්‍රය
[11වන පිටුවේ පින්තූර]
ජේ. එෆ්. රතෆඩ් විසින් කළ ගුවන් විදුලි විකාශන
ස්වේච්ඡා සේවකයින් විසින් ක්‍රියාත්මක කළ වොච්ටවර් සමිතියේ පළමු රෝටරි මුද්‍රණාලය
දැන් භාෂා 11කින් ප්‍රකාශිත, න්‍යූ වʼල්ඩ් ට්‍රාන්ස්ලේෂන් බයිබලය