8වන පරිච්ඡේදය

යළි පිහිටුවීමේ බලය—යෙහෝවා ‘සියල්ල අලුත් කරමින් සිටී’

1, 2. අදදින මිනිස් පවුලට වේදනා ගෙන දෙන අහිමි වීම් මොනවාද? තවද මේවා අපට බලපාන්නේ කෙසේද?

කුඩා දරුවෙක් තමාගේ හුරුබුහුටි සෙල්ලම් බඩුවක් නැති කරගෙන නැත්නම් කඩාගෙන මහා හයියෙන් බෙරිහන් දෙනවා. ඒ හඬ ඇසෙන කාගෙත් හදවත උණු වී යයි! එහෙත්, ඔහුගේ අම්මා හෝ තාත්තා කැඩුණු ඒ සෙල්ලම් බඩුව යළිත් හදන විට ඔහුගේ මුහුණේ වැටෙන එළිය ඔබ කවදා හෝ දැක තිබෙනවාද? එය යළි හදා දීම හෝ එය යළි සොයා දීම පවා අම්මාට හෝ තාත්තාට නම් ඒ හැටි දෙයක් නෙවේ. එහෙත්, දරුවා එය දැක විස්මිත වී සතුටින් ඉපිල යයි. ‘ආයෙ නම් ඒකෙ ගන්ඩම දෙයක් නැහැ’ කියා සිතූ දෙය මුලින් තිබූ විදිහටම දැන් දරුවාගේ අතේ!

² තම දරුවන්ගේ ඇස් හමුවේ කිසිම බලාපොරොත්තුවක් නැතැයි පෙනෙන්ට තිබෙන දේවල් යළි පිහිටුවීමට ඉතා ශ්‍රේෂ්ඨතම දෙමාපියා වන යෙහෝවාට බලය තිබෙනවා. ඇත්තෙන්ම අප මෙහිදී කතා කරන්නේ නිකම්ම සෙල්ලම් බඩු ගැන නොවේ. ‘කටයුතු කිරීමට අසීරු මෙම අර්බුදකාරි කාලවල’ ඊටත් වඩා වටිනා දේවල් අපට අහිමි වෙනවා වෙන්න පුළුවන්. (2 තිමෝති 3:1-5, NW) මිනිසුන් විසින් ඉතා ලැදිව රැකගන්නා බවට පෙනෙන්ට තිබෙන දේවල්, එනම් නිවෙස්, දේපළ, රැකියාව සහ සෞඛ්‍යය පවා අවදානමකට ලක් වෙලා. පරිසර විනාශය හමුවේ ජීවීන් බොහොමයක් වඳ වී අභාවයට යමින් තිබෙන බව අප දකින විට කිසිවක් කර කියාගත නොහැකිව අපි ඔහේ බලා සිටිමු. කෙසේවුවද, අප ආදරය කරන කෙනෙකුගේ වියෝව තරම් මුහුණ පාන්නට සිදු වන දුෂ්කර දෙයක් තවත් නැහැ. මෙවන් මොහොතකදී අහිමි වීමේ හා අසරණබවේ හැඟීම්වලින් යටපත් වී අපි අන්දමන්දව බලා සිටිමු.—2 සාමුවෙල් 18:33.

3. ක්‍රියා 3:21හි සඳහන් කර තිබෙන සැනසිලිදායක අපේක්ෂාව කුමක්ද? තවද යෙහෝවා එය ඉෂ්ට කරනු ඇත්තේ කුමක් මාර්ගයෙන්ද?

³ එසේ නම්, යෙහෝවාගේ යළි පිහිටුවීමේ බලය ගැන ඉගෙනගැනීම කොතරම් සැනසිලිදායකද! දෙවිට තම භූමික දරුවන් සම්බන්ධයෙන් කළ හැකි දෙය සහ කරනු ඇති දෙය තුළ තිබෙන පුළුල් පරාසය දකින අපට දැනෙන්නේ මහා පුදුමාකාරබවක්. ඇත්තෙන්ම, යෙහෝවා ‘සියලු දේ නැවත පිහිටුවීමට’ අරමුණු කරන බව බයිබලය පෙන්වනවා. (ක්‍රියා 3:21, අකුරු ඇල කළේ අපය.) මෙය ඉටු කිරීම සඳහා, යෙහෝවා තම පුත්‍ර යේසුස් ක්‍රිස්තුස් විසින් පාලනය කරන මෙසියානු රාජ්‍යය යොදාගන්නවා ඇති. සාක්ෂිවලින් පෙනී යන්නේ මෙම රාජ්‍යය 1914දී ස්වර්ගයේ සිට පාලනය ආරම්භ කළ බවයි.a (මතෙව් 24:3-14) යළි පිහිටුවනු ලබන්නේ කුමක්ද? යෙහෝවා විසින් කර ඇති යළි පිහිටුවීමේ මහානුභාව සම්පන්න ක්‍රියා සමහරක් ගැන අපි සලකා බලමු. මේවායින් එකක් අපට දැනටමත් පෙනෙනවා. ඒ වගේම අපිට දැන් අද්දකින්ටත් පුළුවන්. අනෙක් ඒවා අනාගතයේදී මහා පරිමාණයෙන් සිදු වෙයි.

නිර්මල නමස්කාරය යළි පිහිටුවීම

4, 5. පොදු යුගයට පෙර 607දී දෙවිගේ ජනයාට සිදු වූයේ කුමක්ද? තවද යෙහෝවා ඔවුන්ට දුන් බලාපොරොත්තුව කුමක්ද?

⁴ යෙහෝවා දැනටමත් යළි පිහිටුවා ඇති දෙය නම් නිර්මල නමස්කාරයයි. මින් අදහස් කරන දෙය වටහාගැනීම පිණිස, යූදා රාජ්‍යයේ ඉතිහාසය ගැන අපි මඳකට පරීක්ෂා කර බලමු. අප එසේ කරන විට, යෙහෝවා සතු යළි පිහිටුවීමේ බලය ක්‍රියාත්මක වන අන්දම චමත්කාරජනක ලෙස ගැඹුරින් දැකගන්නට අපට හැකි වේවි.—රෝම 15:4.

⁵ පොදු යුගයට පෙර 607දී යෙරුසලම විනාශ වූ අවස්ථාවේ, විශ්වාසවන්ත යුදෙව්වන්ට හැඟුණු ආකාරය සිතා බලන්න. ඔවුන් සතු එම මාහැඟි නගරය විනාශ කරනු ලැබුවා. එහි පවුරු බිමට සමතලා වුණා. ඊටත් වඩා සිදු වූ දරුණුම දෙය තමයි, මුළු පොළොවේම තිබූ යෙහෝවාගේ නිර්මල නමස්කාරයේ එකම කේන්ද්‍රස්ථානය වූ සාලමොන් සෑදූ මහිමාන්විත මාළිගාව නටබුන් වීම. (ගීතාවලිය 79:1) විනාශයෙන් ගැළවුණු අයව බබිලෝනියේ වහල්භාවයට ගෙන යනු ලැබුවේ ඔවුන්ගේ මව් බිම රුදුරු සතුන්ගේ පාළු බිමක් බවට පත් කරවමින්. (යෙරෙමියා 9:11) මිනිස් දෘෂ්ටි කෝණයෙන් බැලූ විට, සියල්ල අවසන් වුණා වගේ. (ගීතාවලිය 137:1) එහෙත් මෙම විනාශය ගැන බොහෝ කලකට පෙර පුරෝකථනය කර තිබූ යෙහෝවා, යළි පිහිටුවීමේ කාලයක් ඉදිරියට තිබෙනු ඇති බවට බලාපොරොත්තුවක් දුන්නා.

6-8. (අ) හෙබ්‍රෙව් අනාගතවක්තෲන්ගේ ලියවිලිවල දක්නට ලැබෙන නැවත නැවත දිව යන තේමාව කුමක්ද? තවද මෙම අනාවැකි මුලින් ඉටු වූයේ කෙසේද? (ආ) නවීන කාලවලදී, දෙවිගේ ජනයා යළි පිහිටුවීමේ අනාවැකිවල ඉටුවීමක් අද්දැක තිබෙන්නේ කෙසේද?

⁶ ඇත්ත වශයෙන්ම, යළි පිහිටුවීම යන අදහස, හෙබ්‍රෙව් අනාගතවක්තෘවරුන්ගේ ලියවිලිවල නැවත නැවත දිව යන තේමාවක්.b සාරවත් වූද, වන සතුන්ගෙන් හා සතුරු ප්‍රහාරවලින් ආරක්ෂිත වූද යළි පිහිටුවන ලද දේශයක් දෙන බවත්, එම දේශයේ යළි ජනයා පදිංචි වනු ඇති බවත් යෙහෝවා අනාගතවක්තෘවරුන් මගින් පොරොන්දු වුණා. ඔහු ඔවුන්ගේ යළි පිහිටුවනු ලැබූ එම දේශය විස්තර කළේ වචනයේ පරිසමාප්තියෙන්ම පාරාදීසයක් ලෙසටයි! (යෙසායා 65:25; එසකියෙල් 34:25; 36:35) මේ සියල්ලටම වඩා, නිර්මල නමස්කාරය යළි පිහිටුවනවා ඇති. ඒ වගේම දේවමාළිගාව යළිත් ඉදි කරනවා ඇති. (මීකා 4:1-5) මෙම අනාවැකි වහල්භාවයේ සිටි යුදෙව්වන්හට බලාපොරොත්තුවක් දුන් අතර, බබිලෝනියේ වසර 70ක වහල්භාවය තුළ විඳදරාගැනීමට මහත් සේ උදව් වුණා.

⁷ අන්තිමේදී, යළි පිහිටුවිය යුතු කාලය එළඹුණා. බබිලෝනියෙන් නිදහස් වූ යුදෙව්වෝ, යෙරුසලමට නැවත ඇවිත් එහි යෙහෝවාගේ මාළිගාව ඉදි කළා. (එස්රා 1:1, 2) ඔවුන් නිර්මල නමස්කාරයට ඇලී සිටිය තාක් කල්, යෙහෝවා ඔවුන්ගේ දේශය සාරවත් මෙන්ම සමෘද්ධිමත් කළේ ඔවුන්ට ආශීර්වාද කරමිනුයි. එපමණක්ද නොවේ, සතුරන්ගෙන්ද, දශක ගණනාවක් මුළුල්ලේ දේශය අත් පත් කරගෙන සිටි වන සතුන්ගෙන්ද ඔවුන්ව ආරක්ෂා කළා. යෙහෝවාගේ යළි පිහිටුවීමේ බලය ගැන ඔවුන් කොතරම් ප්‍රීතිමත් වන්නට ඇද්ද! නමුත් මෙම සිදුවීම්, යළි පිහිටුවීම පිළිබඳ අනාවැකිවල සීමිත වූ පළමු ඉටුවීමක් පමණයි. මහත් ඉටුවීමක් සිදුවීමට නියමිතව තිබුණේ බොහෝ කලක් මුළුල්ලේ පොරොන්දු වූ දාවිත් රජුගේ උරුමක්කාරයා සිංහාසනාරූඪ කරනු ලබන අපගේ කාලයේදී හෙවත් ‘කාලවල අවසානයේදීයි.’—යෙසායා 2:2-4, NW; 9:6, 7.

⁸ වර්ෂ 1914දී යේසුස් ස්වර්ගික රාජ්‍යයේ සිංහාසනාරූඪ කරනු ලැබුවායින් ටික කලකට පසුව, පොළොවේ විසූ දෙවිගේ විශ්වාසවන්ත ජනයාගේ ආත්මික අවශ්‍යතා ගැන ඔහු අවධානය යොමු කළා. පර්සියානු අධිරාජ්‍යයා වන කෝරෙෂ් පො.යු.පෙ. 537දී යුදෙව්වන්ගේ ඉතිරි කොටසක් නිදහස් කළාක් මෙන්, යේසුස් සිය ආත්මික යුදෙව්වන්ගේ ඉතිරි කොටසක්ව, එනම්, තමන්ගේ අඩිපාරේ යන අනුගාමිකයන්ව නවීන දින බබිලෝනිය හෙවත් බොරු ආගමික ලෝක අධිරාජ්‍යයේ බලපෑම්වලින් මුදවාගත්තා. (රෝම 2:29; එළිදරව් 18:1-5) වර්ෂ 1919 පටන්, අව්‍යාජ ක්‍රිස්තියානීන්ගේ ජීවිතවල නිර්මල නමස්කාරයට ලැබිය යුතු නිසි තැන යළිත් හිමි වී තිබෙනවා. (මලාකී 3:1-5) එතැන් පටන්, යෙහෝවාගේ ජනයා ආත්මික මාළිගාවේ හෙවත් නිර්මල නමස්කාරය උදෙසා වූ දෙවිගේ විධිවිධානය තුළ ඔහුට නමස්කාර කර තිබෙනවා. මෙය අදදින අපට වැදගත් වන්නේ ඇයි?

ආත්මික යළි පිහිටුවීම—එය වැදගත් වීමට හේතු

9. ප්‍රේරිතයන්ගේ යුගයට පසුව, ක්‍රිස්තියානි ලෝකයේ පල්ලි දෙවිගේ නමස්කාරයට කළේ කුමක්ද? නමුත් යෙහෝවා අපගේ දවසේදී කර තිබෙන්නේ කුමක්ද?

⁹ මෙම කාරණය ඓතිහාසික පැත්තෙන් සලකා බැලිය යුතු වේ. පළමු සියවසේ විසූ ක්‍රිස්තියානීන් ආත්මික ආශීර්වාද බොහොමයක් භුක්ති වින්දා. නමුත් යේසුස් සහ ප්‍රේරිතයන් සැබෑ නමස්කාරය දූෂිත වී නැති වී යන වග පුරෝකථනය කළා. (මතෙව් 13:24-30; ක්‍රියා 20:29, 30) ප්‍රේරිතයන්ගේ යුගයට පසුව, ක්‍රිස්තියානි ලෝකය ඉස්මතු වුණා. ඇගේ පූජකයන් මිථ්‍යා ඉගැන්වීම් සහ පුරුදු ඈඳාගත්තා. දෙවිව කොහෙත්ම එළඹිය නොහැකි කෙනෙක් ලෙස විස්තර කළ ඔවුන්, ජනයාගේ මනසේ දෙවි ගැන ඇන්දේ ඔහු කොහෙත්ම තේරුම්ගත නොහැකි ත්‍රිත්වයක් යන චිත්‍රයයි. තවද පූජකයන්ට මිනිසුන් පාපොච්චාරණය කළ යුතු බවත් යෙහෝවා වෙනුවට මරියා සහ විවිධ “සාන්තුවරයන්ට” යාච්ඤා කළ හැකි බවත් ඔවුන් ඉගැන්වූවා. දශක ගණනාවක් පුරා එවන් “දූෂණයකින්” හෙවත් මුල් පිරිසිදු ධර්මය විකෘති වීමකින් පසුව, යෙහෝවා කර තිබෙන්නේ කුමක්ද? අදදින ආගමික බොරුවලින් සහ අනේක විධ අභක්තික අදේවවාදී සිරිත් විරිත්වලින් ජරාවට ගොස් ඇති නවීන ලෝකය තුළ නිර්මල නමස්කාරය යළි පිහිටුවන්ට යෙහෝවා පෙරමුණ ගෙන තිබෙනවා! මෙම යළි පිහිටුවීම නවීන කාලවල සිදු වූ අතිවැදගත්ම සිද්ධිය බව අප විසින් කීම අතිශයෝක්තියක් නොවේ.

10, 11. (අ) ආත්මික පාරාදීසයට ඇතුළත් වන්නේ කිනම් අංග දෙකද? තවද ඔබට මෙය බලපාන්නේ කෙසේද? (ආ) යෙහෝවා ආත්මික පාරාදීසයට එකතු කර තිබෙන්නේ කිනම් ආකාරයේ අයවද? තවද ඔවුන් වරප්‍රසාද ලබන්නේ කුමක් දැකීමටද?

¹⁰ මේ අනුව සැබෑ ක්‍රිස්තියානීන් සිටින්නේ ආත්මික පාරාදීසයකයි. මෙම පාරාදීසයට ඇතුළත් වන්නේ කුමක්ද? මූලික වශයෙන් එහි අංග දෙකක් තිබෙනවා. පළමු එක තමයි, සැබෑ දෙවි වූ යෙහෝවාට කරන නිර්මල නමස්කාරය. බොරුවලින් සහ විකෘති අදහස්වලින් තොර වූ නමස්කාර ක්‍රමයක් දීමෙන් යෙහෝවා අපට ආශීර්වාද කර තිබෙනවා. තවත් දී තිබෙන ආශීර්වාදයක් තමයි, ආත්මික ආහාර. අපගේ ස්වර්ගික පියාණන් ගැන ඉගෙනගැනීමටත්, ඔහුව සතුටු කිරීමටත්, ඔහු වෙතට ළඟාවීමටත් මේ නිසා අපට හැකි වී තිබෙනවා. (යොහන් 4:24) ආත්මික පාරාදීසයේ දෙවැනි අංගයට ඇතුළත් වන්නේ ජනයායි. යෙසායා පුරෝකථනය කළාක් මෙන්, “කාලවල අවසානයේදී” යෙහෝවා සිය නමස්කාරකයන්ට උගන්වා තිබෙන්නේ සාමයේ මාවත්වල ගමන් කිරීමටයි. ඔහු අප අතුරින් යුද්ධ සදහටම තුරන් කරලා. අපට අසම්පූර්ණකම් තිබුණත්, “අලුත් පෞද්ගලිකත්වයක්” [NW] පැළඳගැනීමට ඔහු අපට උදව් කරනවා. සිය ශුද්ධාත්මය සමඟින් අපගේ උත්සාහයන්ට ඔහු ආශීර්වාද කරන අතර, එම ශුද්ධාත්මය අප තුළ අලංකාර ඵල නිපදවනවා. (එපීස 4:22-24; ගලාති 5:22, 23) දෙවිගේ ආත්මයට අනුකූලව ක්‍රියා කරන ඔබ සැබවින්ම ආත්මික පාරාදීසයේ පංගුකරුවෙක්.

¹¹ යෙහෝවා මෙම ආත්මික පාරාදීසය තුළට එකතු කර තිබෙන්නේ ඔහු ප්‍රේම කරන විශේෂ පිරිසක්වයි. ඒ තමයි, ඔහුට ප්‍රේම කරන, සාමයට ලැදි, ඒ වගේම “තමන්ගේ ආත්මික අවශ්‍යතා ගැන සැලකිලිමත්” අය. (මතෙව් 5:3, NW) වඩාත් චමත්කාරජනක යළි පිහිටුවීමක්, එනම් මිනිස් සංහතියේ සහ මුළු පොළොවේ යළි පිහිටුවීමක් දැකගැනීමේ වරප්‍රසාදය ලබන්නේ එවැනි අයයි.

‘බලව! මම සියල්ල අලුත් කරමි’

12, 13. (අ) යළි පිහිටුවීමේ අනාවැකිවලට තවත් ඉටුවීමක් තිබිය යුත්තේ ඇයි? (ආ) ඒදන්හිදී ප්‍රකාශ කළ පරිදි, පොළොව සඳහා යෙහෝවාගේ අරමුණ කුමක්ද? මෙය අනාගතය උදෙසා බලාපොරොත්තුවක් ලබා දෙන්නේ මන්ද?

¹² යළි පිහිටුවීම හා සම්බන්ධ අනාවැකි බොහොමයකින් ආත්මික යළි පිහිටුවීමකට වඩා වැඩි යමක් අදහස් වෙනවා. උදාහරණයක් වශයෙන්, අසනීප වූ අය, කොර, අන්ධ සහ බිහිරි අය සුවය ලබන කාලයක් මෙන්ම මරණය පවා සදහටම ගිල දමන කාලයක් ගැන යෙසායා ලිව්වා. (යෙසායා 25:8; 35:1-7) එවන් පොරොන්දු ඉපැරණි ඉශ්‍රායෙලය තුළ පදගතාර්ථයෙන් ඉෂ්ට වුණේ නැහැ. ඇරත් මෙම පොරොන්දුවල ආත්මික ඉෂ්ට වීම වත්මන් කාලයේ අප දැක තිබුණත්, අනාගතයේදී මෙම ඉටුවීම පදගතාර්ථයෙන්ම පූර්ණ පරිමාණයෙන් ඉටු වේවි කියා විශ්වාස කිරීමට අපට තිබෙන හේතු එමටයි. අප එය දන්නේ කොහොමද?

¹³ ඒදන් උයනේදී, යෙහෝවා පොළොව සඳහා තම අරමුණ පැහැදිලි කළා. එය නම්, සන්තෝෂවත්, සෞඛ්‍ය සම්පන්න එක්සත් පවුලක් වශයෙන් මිනිස් සංහතිය පොළොවේ ජීවත් වීමයි. පුරුෂයා සහ ස්ත්‍රිය විසින් පොළොව සහ එහි සියලු ජීවීන්ව බලාගැනීමත් මුළු පොළොව පාරාදීසයක් බවට පරිවර්තනය කිරීමත් දේවඅරමුණ වුණා. (උත්පත්ති 1:28) අද තිබෙන තත්වය ගැන බලද්දී එය නම් සිතන්නටවත් බැරි දෙයක්. ඒ මොනවා වුණත් යෙහෝවාගේ අරමුණ නම් කිසි ලෙසකින්වත් පෙරළා දමන්ට බැරි බව අපට සහතිකයි. (යෙසායා 55:10, 11) යෙහෝවා විසින් පත් කරන ලද මෙසියානු රජ හැටියට යේසුස් සමස්ත ලෝක පාරාදීසය ගෙනෙනවා සිකුරුයි.—ලූක් 23:43.

14, 15. (අ) යෙහෝවා ‘සියල්ල අලුත් කරන්නේ’ කෙසේද? (ආ) පාරාදීසයේ ජීවිතය කෙබඳු වේවිද? වඩාත් ඔබගේ සිත් ඇදගන්නේ කිනම් අංගයද?

¹⁴ මුළු පොළොව පාරාදීසයකට පෙරළීම ගැන සිතා බලන්න. යෙහෝවා එම කාලය ගැන පවසන්නේ මෙයයි. ‘බලව! මම සියල්ල අලුත් කරමි.’ (එළිදරව් 21:5) මින් අදහස් කරන දෙය කුමක්ද කියා සලකා බලමු. දැන් පවතින මේ දුෂ්ට පැරණි ක්‍රමයට එරෙහිව යෙහෝවා සිය විනාශකාරි බලය විදහා අවසන් වූ විගසම, “අලුත් අහසක්ද අලුත් පොළොවක්ද” ඉතිරිව පවතිනවා ඇති. මින් අදහස් කරන්නේ යෙහෝවාට ප්‍රේම කරන සහ ඔහුගේ කැමැත්ත කරන අයගෙන් සමන්විත නව භූමික සමාජයක් කෙරෙහි නව ආණ්ඩුවක් ස්වර්ගයෙහි සිට පාලනය කරනු ඇති බවයි. (2 පේතෘස් 3:13) සාතන්ව ඔහුගේ භූතයන්ද සමඟ අක්‍රියාශීලී තත්වයකට පත් කරනු ලබනවා ඇති. (එළිදරව් 20:3) වසර දහස් ගණනකට පසු පළමු වතාවට, මිනිස් සංහතිය එම දුෂ්ට, ද්වේෂසහගත නිෂේධාත්මක බලපෑමෙන් මුදනු ලබයි. එවිට, කියා නිම කළ නොහැකි තරම් වූ සහනදායක හැඟීමක් දැනෙනු ඇති බවට කිසිදු සැකයක් නැහැ.

¹⁵ අන්තිමේදී දෙවි මුලදී අපෙන් බලාපොරොත්තු වූ පරිද්දෙන්ම මෙම අලංකාර පෘථිවිය රැකබලා ගැනීමට අපට හැකි වේවි. මෙම පෘථිවියට ස්වාභාවිකවම යළි ප්‍රකෘතිමත් වීමේ බලයක් තිබෙනවා. පරිසර දූෂණයට මුල් වන හේතුසාධක මුලිනුපුටා දැම්මොත් දූෂිත වූ විල් සහ ගංගාවලට පුළුවන් ස්වයංක්‍රීයව පවිත්‍ර වීමට. යුද්ධ නැවතුණොත් යුද්ධ නිසා වැනසී ගිය භූමිවලට යළිත් සශ්‍රීක තත්වයට පත් වෙන්ට හැකියි. පෘථිවියේ භෞතික නීතිවලට එකඟව ක්‍රියා කරමින්, එය උයනක් බඳු පාරාදීසයක් බවට, එනම් විවිධත්වයෙන් නිමක් නැති සමස්ත ලෝක උද්‍යානයක් බවට පත් කිරීමට ලැබීම කොතරම් සතුටක්ද! කිසිම වග විභාගයකින් තොරව සත්ව සහ ශාක ප්‍රභේද වනසා දමනවා වෙනුවට, මිනිසා පෘථිවිය මත මැවිලි සමඟ සාමයෙන් සිටීවි. ළමුන්ට පවා වන සතුන්ට භයවීමට කිසිදු හේතුවක් නැතිව යාවි.—යෙසායා 9:6, 7; 11:1-9.

16. පාරාදීසයේදී, එක් එක් ඇදහිලිවන්ත පුද්ගලයන් කෙරෙහි යළි පිහිටුවීම කෙසේ බලපානවා ඇද්ද?

¹⁶ තවත් වැදගත් දෙයක් තමයි, අප පෞද්ගලික ආකාරයකින් යළි පිහිටුවීමක් හෙවත් ශාරීරික ප්‍රකෘතිමත් තත්වයක් අද්දැකීම. අර්මගෙදොන්වලින් පසුව, බේරී ජීවත් වන්නන් පොළොව පුරා ආශ්චර්යවත් සුව කිරීමක් දකීවි. යේසුස් පොළොවේ සිටින විට කළාක් මෙන්, අන්ධ අයට පෙනීම ලබා දීමටත්, බිහිරි අයට ඇසීම ලබා දීමටත්, කොර සහ ආබාධිත අයට ශාරීරික සුවය ලබා දීමටත් දෙවි විසින් තමාට දානය කරන ලද බලය යේසුස් යොදාගන්නවා ඇති. (මතෙව් 15:30) වියපත් වූ අයට ඔවුන්ගේ තුරුණු ශක්තිය හා ශරීර සනීපය යළි ලැබීමෙන් ඔවුන් මහත් සතුටක් භුක්ති විඳීවි. (යෝබ් 33:25) රැළි වැටුණු හම යථා තත්වයට පත් වෙනවා. හැකිළුණු අත් පා කෙළින් වී, මාංස පේශි නව ශක්තියකින් හසුරුවනවා ඇති. මේවා අද්දකිද්දී ඇදහිලිවන්ත මිනිස් සංහතියේ සියල්ලන්ටම දැනෙන්නේ පාපයේ සහ අසම්පූර්ණකමේ බලපෑම් කෙමෙන් කෙමෙන් වියැකී ගොස් එය තමන්ගෙන් නිශ්චිතවම තුරන් වන බවයි. යෙහෝවා දෙවිගේ මෙම පුදුමාකාර යළි පිහිටුවීමේ බලය ගැන අප මොනතරම් ඔහුට ස්තුතිවන්ත විය යුතුද! දැන් අපි මෙම යළි පිහිටුවීමේ චමත්කාරජනක කාලය හා බැඳි හද උණුසුම් කරවන සුවිශේෂී අංගයක් කෙරෙහි අපගේ අවධානය යොමු කරමු.

මළවුන්ට යළිත් ජීවිත දානය

17, 18. (අ) යේසුස් සද්දුසිවරුන්ට තරවටු කළේ ඇයි? (ආ) එලියා විසින් යෙහෝවාගෙන් ආශ්චර්යයක් කරන ලෙස ඉල්ලා සිටීමට තුඩු දුන්නේ කවර තත්වයන්ද?

¹⁷ පොදු යුගයේ පළමු සියවසේදී, සද්දුසිවරුන් යනුවෙන් හැඳින්වූ ඇතැම් ආගමික නායකයන් නැවත නැඟිටීම කෙරෙහි විශ්වාසය තැබුවේ නැහැ. යේසුස් ඔවුන්ට තරවටු කරමින් ‘නුඹලා ශුද්ධ ලියවිලිවත් දෙවිගේ බලයවත් නොදැන වරද්දාගන්නෙහුය’ යයි කියා සිටියා. (මතෙව් 22:29) ඔව්, ශුද්ධ ලියවිල්ලේ හෙළි කරන්නේ යෙහෝවාට එවන් යළි පිහිටුවීමේ බලයක් තිබෙන බවයි. ඒ කෙසේද?

¹⁸ එලියාගේ දවස්වල සිදු වූ දේ සිතෙන් මවාගන්න. වැන්දඹුවක් මිය ගොස් සිටි තම එකම දරුවාගේ අප්‍රාණික සිරුර තමාගේ අත්වල දරා සිටියා. යම් කලකට මෙම වැන්දඹුව ආගන්තුක සත්කාර කළ අමුත්තා වූ අනාගතවක්තෘ එලියා මේ දැක සලිත වූවා විය යුතුයි. මීට කලින් ඔහු මෙම දරුවාව හාමතෙන් මුදවාගෙන තිබුණා. එමනිසා, එලියා මේ කුඩා දරුවා කෙරෙහි මහත් බැඳීමකින් සිටින්නට ඇති. මවගේ හදවත සංතාපයෙන් පැලී ගොස්. මේ දරුවා ඇගේ මිය ගිය සැමියාගේ එකම ජීවමාන සිහිවටනය වී සිටියා. තමා වියපත් වූ පසු තම පුතා තමාව රැකබලා ගනියි කියා ඇය මහත් බලාපොරොත්තුවක් තබාගෙන සිටින්ට ඇති. ඉමහත් සංවේගයකින් පෙළුණු මෙම වැන්දඹුව, අතීතයේ තමා අතින් සිදු වූ වැරැද්දකට දඬුවම් විඳිමින් සිටිනවා කියා භය වුණා. මෙසේ මෙම විපත්තිය නිසා ඇගේ තත්වය තවත් දරුණු අතට පෙරළේවිය යන කාරණය දරාගන්ට එලියාට බැරි වුණා. මවගේ ඇකයෙන් දරුවාගේ මළ සිරුර අතට ගත් හේ උඩු මහලට ගෙන ගොස් මෙම දරුවාගේ ප්‍රාණය හෙවත් ජීවිතය යළි ලබා දෙන ලෙස යෙහෝවා දෙවිගෙන් අයැද සිටියා.—1 රාජාවලිය 17:8-21.

19, 20. (අ) යළි ජීවත් කරවීමට යෙහෝවා සතු බලය ගැන තමන්ට ඇදහිල්ල තිබෙන බව ආබ්‍රහම් පෙන්වූයේ කෙසේද? තවද මෙම ඇදහිල්ලට පදනම වී තිබුණේ කුමක්ද? (ආ) යෙහෝවා එලියාගේ ඇදහිල්ලට විපාක දුන්නේ කෙසේද?

¹⁹ නැවත නැඟිටීම විශ්වාස කළ පළමු තැනැත්තා එලියා නොවේ. ශතවර්ෂ ගණනාවකට පෙර, එවන් යළි ජීවිත දානය කිරීමේ බලයක් යෙහෝවාට තිබෙන බව ආබ්‍රහම් විශ්වාස කළා. ඒ හොඳ හේතු ඇතුවයි. ආබ්‍රහම්ට වයස අවුරුදු 100ක් සහ සාරාට වයස අවුරුදු 90ක් වන විට, යෙහෝවා ඔවුන්ගේ අප්‍රාණික වී තිබූ ප්‍රජනන හැකියාවන් ප්‍රකෘතිමත් කළ අතර, පුත්‍රයෙකු බිහි කිරීමට සාරාට ආශ්චර්යවත් ලෙස හැකියාව ලබා දුන්නා. (උත්පත්ති 17:17; 21:2, 3) පසුව, පිරිමි ළමයා වැඩිහිටිභාවයට පත් වූ විට, යෙහෝවා ආබ්‍රහම්ගෙන් ඉල්ලා සිටියේ තම පුත්‍රයාව පූජා කරන ලෙසයි. ආබ්‍රහම් ඇදහිල්ල පෙන්වූයේ තම ආදරණීය ඊසාක්ට යළි ජීවිතය ලබා දෙන්නට යෙහෝවාට හැකි බව දැනගෙනයි. (හෙබ්‍රෙව් 11:17-19) ආබ්‍රහම් සිය පුත්‍රයාව පූජා කිරීම සඳහා එම කන්ද නැඟීමට පෙර තමාද ඊසාක්ද නැවත එක්ව එන බව තම සේවකයන්ට සහතික ලෙස කියා සිටියේ ඔහුගේ බලගතු ඇදහිල්ල නිසා විය යුතුයි.—උත්පත්ති 22:5.

²⁰ යෙහෝවා ඊසාක්ගේ මරණය වැළැක්වුවා. එනිසා, ඔහුව නැවත නැඟිටවීමට අවශ්‍යතාවක් තිබුණේ නැහැ. කෙසේ වෙතත්, එලියා සම්බන්ධ සිද්ධියේදී වැන්දඹුවගේ පුත්‍රයා ඒ වන විටත් මිය ගොස් සිටියා. නමුත් එතරම් දිගු කලකට නම් නොවේ. ළමයාව නැවත නැඟිටුවීමෙන් යෙහෝවා අනාගතවක්තෘවරයාගේ ඇදහිල්ලට විපාක ලබා දුන්නා! පසුව එලියා පිරිමි ළමයාව ඔහුගේ මවට භාර දුන්නේ මෙම අමතක නොවනසුලු වචන සමඟිනුයි. “මෙන්න, නුඹේ පුතා ජීවත්ව සිටී.”—1 රාජාවලිය 17:22-24.

21, 22. (අ) ශුද්ධ ලියවිලිවල වාර්තා වී ඇති නැවත නැඟිටුවීම්වල අරමුණ කුමක් වීද? (ආ) පාරාදීසයේදී, නැවත නැඟිටුවීම කොතරම් පුළුල් පරිමාණයකින් සිදු වෙයිද? තවද එය සිදු කරනු ඇත්තේ කවුද?

²¹ මෙසේ, බයිබලය තුළ පළමු වතාවට මිනිස් ජීවිතයකට යළි ජීවිතය දීමට යෙහෝවා සිය බලය යොදාගන්නා ආකාරය අපට දකින්න ලැබෙනවා. පසුව, යෙහෝවා මළවුන්ව යළි ජීවිතයට ගෙන ඒම සඳහා එලිෂාට, යේසුස්ට, පාවුල්ට සහ පේතෘස්ට බලය දුන්නා. ඇත්ත වශයෙන්ම, නැවත නැඟිටවනු ලැබූ අය අවසානයේදී යළිත් මිය ගියා. ඒ කෙසේවෙතත්, ඉදිරියේ සිදුවීමට තිබෙන දේවල් පිළිබඳ පුදුමාකාර පෙර දැක්මක් එම බයිබල් වාර්තාවලින් අපට ලබා දෙනවා.

²² “නැවත නැඟිටීමද ජීවනයද” වශයෙන් යේසුස් පාරාදීසයේදී තමාගේ කාර්යභාරය ඉටු කරනවා ඇති. (යොහන් 11:25) අසංඛ්‍යාත මිලියන ගණනක් නැවත නැඟිටුවමින් පොළොව මත පාරාදීසයේ සදාකල් ජීවත් වන්නට ඔහු ඔවුන්හට ප්‍රස්තාව උදා කරාවි. (යොහන් 5:28, 29) මරණයෙන් බොහෝ කලක් වෙන්ව සිටි මිතුරන් හා නෑදෑයන් නැවත එක් වන විට ඔවුන්ට ඇති වන ඉමහත් ප්‍රීතිය ගැන සිතා බලන්න! මුළු මිනිස් සංහතිය යෙහෝවාගේ යළි පිහිටුවීමේ බලය සඳහා ඔහුට ප්‍රශංසා කරනු ඇති.

23. යෙහෝවා සිය බලය ඉහළම අන්දමින් නිරූපණය කළ අවස්ථාව කුමක්ද? තවද මෙම නැවත නැඟිටුවීම අනාගතය උදෙසා අපගේ බලාපොරොත්තුවට සහතිකයක් වන්නේ කෙසේද?

²³ එවන් බලාපොරොත්තු පිළිබඳව ගලක කෙටූ අකුරු මෙන් යෙහෝවා අපට සහතිකයක් දී තිබෙනවා. සිය බලය ශ්‍රේෂ්ඨතම අන්දමින් නිරූපණය කරමින් යෙහෝවා සිය පුත් යේසුස්ව බලවත් ආත්ම මැවිල්ලක් ලෙස නැවත නැඟිට්ටෙව්වේ තමන්ට පමණක් ඔහුව දෙවැනියා කරමිනුයි. යේසුස්ව නැවත නැඟිටුවනු ලැබූ බවට ඇසින් දුටු සාක්ෂිකරුවන් සිය ගණනක් සිටියා. (1 කොරින්ති 15:5, 6) ආගමික විශ්වාසයන් ගැන සැක කරන කෙනෙකුට පවා එය විශ්වාස කිරීමට ඇති තරම් සාක්ෂි තිබුණා. ඔව්, ජීවිතය යළි ලබා දීමට යෙහෝවාට බලය තිබෙනවා.

24. යෙහෝවා මළවුන්ව නැවත නැඟිටුවන බවට අපට සහතික විය හැක්කේ මන්ද? අප සියල්ලන්ටම ආශාවෙන් බලා සිටිය හැක්කේ කිනම් බලාපොරොත්තුව දෙසද?

²⁴ මළවුන්ට යළි ජීවිතය දීමට යෙහෝවාට බලය තිබෙනවා පමණක් නොව එසේ කිරීමට ඔහුට ආශාවක්ද තිබෙනවා. යෙහෝවා මළවුන්ව යළි ජීවිතයට ගෙන ඒම සඳහා ඇත්තටම ආශා වන බව ලිවීමට විශ්වාසවන්ත මිනිසෙකු වූ යෝබ් දේවානුභාවයෙන් පෙලඹුණා. (යෝබ් 14:15) තම යළි පිහිටුවීමේ බලය එවන් ප්‍රේමනීය ආකාරයකින් යොදාගැනීමට ආශාවෙන් සිටින අපේ දෙවිට ළංවීමට ඔබ පෙලඹෙන්නේ නැද්ද? එහෙත්, නැවත නැඟිටුවීම යනු ඉදිරියට යෙහෝවා කරන්නට යන යළි පිහිටුවීමේ වැඩ අතරින් එකක් පමණක් බව මතක තබාගන්න. ඔබ ඔහුට වෙන කවරදාටත් වඩා ළං වත්ම, යෙහෝවා ‘සියල්ල අලුත් කරනවා’ දැකීමට ඔබට එහි සිටිය හැකියි. සෑම විටම එම අතිඅනර්ඝ බලාපොරොත්තුව ඔබේම එකක් වේවා!—එළිදරව් 21:5.

[පාදසටහන්වල]

මෙනෙහි කිරීම සඳහා ප්‍රශ්න

2 රාජාවලිය 5:1-15 බයිබල් කාලවල විසූ එක්තරා මිනිසෙක් යටහත් පහත්කම වගා කළා. ඒ හේතුවෙන් ඔහු යෙහෝවාගේ යළි පිහිටුවීමේ බලයෙන් ප්‍රයෝජන ලැබුවේ කෙසේද?

යෝබ් 14:12-15 යෝබ්ට තිබුණේ කිනම් නිසැකකමක්ද? මෙම පාඨ, අනාගතය පිළිබඳ අපගේම බලාපොරොත්තුවට බලපෑ හැක්කේ කෙසේද?

ගීතාවලිය 126:1-6 අදදින ක්‍රිස්තියානීන්ට නිර්මල නමස්කාරය යළි පිහිටුවීම ගැනත් එහි හවුල් වීම ගැනත් කෙසේ හැඟිය හැකිද?

රෝම 4:16-25 යෙහෝවාගේ යළි පිහිටුවීමේ බලය කෙරෙහි ඇදහිල්ල තැබීම වැදගත් වන්නේ මන්ද?

[85වන පිටුවේ පින්තූරය]

“මෙන්න, නුඹේ පුතා ජීවත්ව සිටී”