මූලිකත්වය සම්බන්ධයෙන් දෙවියන්ගේ සැලැස්මට යටත් වෙමු

යෙහෝවා දෙවියන්ගේ කැමැත්ත කරන්න හොඳින් සංවිධානය වෙන්න නම් මුළු විශ්වයම පාලනය කරන්න අයිතිය තියෙන දෙවියන්ට අපි අනිවාර්යයෙන්ම යටත් වෙන්න ඕනේ. ක්‍රිස්තියානි සභාවේ නායකයා වන යේසුස්ට අපි යටත් වෙනවා. ජීවිතයේ වෙනත් කාරණාවලදීත් මූලිකත්වය සම්බන්ධයෙන් දෙවියන්ගේ සැලැස්මට අපි යටත් වෙනවා. මූලිකත්වය සම්බන්ධයෙන් දෙවියන් ඇති කරලා තියෙන සැලැස්මට යටත් වෙන එකෙන් හුඟක් ප්‍රයෝජන ලබන්න පුළුවන්.

² අධිකාරියට යටත් වෙන එක ගැන දෙවියන් මුල්ම වතාවට මිනිසුන්ට සඳහන් කළේ ඒදන් උයනේදියි. උත්පත්ති 1:28 සහ 2:16, 17 සඳහන් දෙයින් ඒ ගැන පැහැදිලි වෙනවා. දෙවියන් නිර්මාණය කළ සතුන් හිටියේ මිනිසුන්ට යටත්වයි. ආදම් සහ ඒව දෙවියන්ගේ කැමැත්ත ඉටු කරමින් දෙවියන්ට යටත් වෙන්න අවශ්‍ය වුණා. දෙවියන්ගේ අධිකාරියට යටත් වෙද්දී හැම දෙයක්ම පිළිවෙළට, සාමකාමීව කරන්න පුළුවන්. මූලිකත්වය සම්බන්ධයෙන් දෙවියන්ගේ සැලැස්ම ගැන පස්සේ කාලෙක පාවුල් මෙහෙම සඳහන් කළා. “සෑම පුරුෂයෙකුගේම හිස ක්‍රිස්තුස් බවත් ස්ත්‍රියකගේ හිස පුරුෂයා බවත් ක්‍රිස්තුස්ගේ හිස දෙවි බවත් ඔබ දැනගන්නවාට මම කැමැත්තෙමි.” (1 කොරි. 11:3) යෙහෝවා දෙවියන් හැර අනිත් හැම කෙනෙක්ම යම් මූලිකත්වයකට යටත් බව ඒකෙන් පැහැදිලියි.

³ මූලිකත්වය සම්බන්ධයෙන් දෙවියන්ගේ සැලැස්ම ගැන හුඟක් අය දන්නේ නැහැ. හුඟක් අය ඒකට කීකරු වෙන්නේ නැහැ. ඒ ඇයි? ඒදන් උයනේදී මුල්ම මිනිස් යුවළ හිතාමතාම දෙවියන්ගේ පාලනය ප්‍රතික්ෂේප කළා. (උත්. 3:4, 5) හැබැයි ඒකෙන් ඔවුන් බලාපොරොත්තු වුණු නිදහස ලැබුණේ නැහැ. ඒ වෙනුවට දුෂ්ටයා වන සාතන්ගේ පාලනයට යටත් වෙන්න ඔවුන්ට සිද්ධ වුණා. එදා ඉඳන් මුළු මිනිස් වර්ගයාම දෙවියන්ගෙන් ඈත් වුණා. (කොලො. 1:21) ප්‍රතිඵලයක් විදිහට මිනිස් වර්ගයා අතරින් වැඩිදෙනෙක් දුෂ්ටයාගේ බලපෑමට හසු වෙලා ඉන්නවා.—1 යොහ. 5:19.

⁴ බයිබල් ප්‍රතිපත්ති ජීවිතයට අදාළ කරගත්ත නිසා සාතන්ගේ බලපෑමෙන් නිදහස් වෙන්න අපිට පුළුවන් වෙලා තියෙනවා. දෙවියන්ට කැප වුණු අය හැටියට අපි කැමැත්තෙන්ම අපේ පාලකයා විදිහට දෙවියන්ව පිළිගන්නවා. දෙවියන් “සියලුදෙනා කෙරෙහි රජකම්” කරනවා කියලා දාවිත් කියපු දේට අපි එකඟයි. (1 ලේක. 29:11) ගීතාවලිය 100:3 මෙහෙම සඳහන් වෙනවා. “යෙහෝවා දෙවි සැබෑ දෙවි බව තේරුම්ගන්න. අපි අපවම නිර්මාණය කර නොගත්තෙමු. අපේ නිර්මාතෘ ඔහුය. අපි ඔහුගේ සෙනඟය. ඔහුගේ තණබිමේ සිටින බැටළුවෝය.” ඒ දේට අපි හැමෝම එකඟ නැද්ද! හැම දෙයක්ම නිර්මාණය කළේ යෙහෝවා දෙවියන් නිසා ඔහු වෙන කිසිම කෙනෙක්ට වඩා ශ්‍රේෂ්ඨයි කියලත් අපි කැමැත්තෙන්ම ඔහුට යටත් වෙන්න ඕනෙ කියලත් අපි පිළිගන්නවා. (එළි. 4:11) දෙවියන්ට යටත් වෙන එක සම්බන්ධයෙන් උතුම්ම ආදර්ශය තියලා තියෙන යේසුස් ක්‍රිස්තුස්ව තමයි අපි අනුකරණය කරන්නේ.

⁵ පොළොවේදී මුහුණ දීපු දේවලින් යේසුස් ඉගෙනගත්ත දේ ගැන හෙබ්‍රෙව් 5:8 මෙහෙම සඳහන් වෙනවා. “ඔහු ඒ තැනැත්තාගේ පුත්‍රයා වුණත් විවිධාකාර දුක් පීඩා විඳ කීකරුකම ඉගෙනගත්තේය.” ඔව්, පීඩා පරීක්ෂාවලට මුහුණ දෙන්න වෙද්දීත් යේසුස් දිගටම දෙවියන්ට යටත්ව හිටියා. ඔහු තමන්ගේම කැමැත්තට අනුව කිසිම දෙයක් කිව්වේවත් කෙරුවේවත් නැහැ. තමන්ටම ගෞරවය ලබාගන්න ඔහු උත්සාහ කළෙත් නැහැ. (යොහ. 5:19, 30; 6:38; 7:16-18) දේශනා සේවයේ හවුල් වෙද්දී යම් පීඩාවලට මුහුණ දුන්නත් තම පියාණන්ගේ කැමැත්ත ඉටු කිරීමෙන් ඔහු ලොකු සතුටක් අද්දැක්කා. (යොහ. 15:20) දිගටම දෙවියන්ට යටත් වුණු ඔහු “කොතරම් යටහත්” වුණාද කියනවා නම් “වධකණුවක මරණය” විඳීමට පවා කැමති වුණා. මිනිසුන්ට සදාකාලික ගැලවීම ලබා දෙන්න මඟ විවර කරන්නත්, කලින් හිටිය තත්වයට වඩා උසස් තත්වයක් තමන්ට ලබාගන්නත්, ඒ වගේම පියාණන්ව ගෞරවයට පත් කරන්නත් යේසුස්ට පුළුවන් වුණේ ඔහු සම්පූර්ණයෙන්ම දෙවියන්ට යටත් වුණු නිසයි.—ෆිලි. 2:5-11; හෙබ්‍රෙ. 5:9.

මූලිකත්වයට යටත් වෙන්න ඕන පැති

⁶ අපි දෙවියන්ගේ කැමැත්ත කරමින් ඔහුට යටත් වෙනවා නම් පාලකයා විදිහට දෙවියන්ව පිළිගන්නේ නැති අය අද්දකින කාන්සාවන් සහ ගැටලු අද්දකින්න අපිට සිද්ධ වෙන්නේ නැහැ. යක්ෂයා හැම මොහොතකම බලාගෙන ඉන්නේ අපිව ගිල දාන්න. හැබැයි අපි දිගටම යක්ෂයාට විරුද්ධ වෙලා නිහතමානීව දෙවියන්ට යටත් වෙනවා නම් ඔහුට හසු නොවී ඉන්න අපිට පුළුවන්.—මතෙ. 6:10, 13; 1 පේතෘ. 5:6-9.

⁷ ක්‍රිස්තියානි සභාවේ නායකයා යේසුස් කියලත් ඔහු ‘විශ්වාසවන්ත නුවණ ඇති දාසයාට’ යම් බලතල දීලා තියෙනවා කියලත් අපි පිළිගන්නවා. ඒක අපේ සිතුවිලිවලටත් අපි අනිත් අයට සලකන විදිහටත් බලපානවා. සභාවේ මූලිකත්වය සම්බන්ධයෙන් දෙවියන්ගේ සැලැස්මට අපි යටත් වෙනවා නම් නමස්කාරයට සම්බන්ධ හැම කාරණාවකදීම අපි බයිබල් ප්‍රතිපත්ති අදාළ කරගන්නවා. දේශනා සේවය, රැස්වීම්වලට සහභාගි වීම, වැඩිමහල්ලන්ට සලකන විදිහ සහ සංවිධානයේ වැඩකටයුතුවලට සහයෝගය දීම ඒ අතරට අයිතියි.—මතෙ. 24:45-47; 28:19, 20; හෙබ්‍රෙ. 10:24, 25; 13:7, 17.

⁸ අපි දෙවියන්ට යටත් වෙද්දී සභාවේ සාමය සහ සුරක්ෂිතභාවය රැකගන්නත්, හැම වැඩකටයුත්තක්ම පිළිවෙළකට කරන්නත් පුළුවන් වෙනවා. යෙහෝවා දෙවියන්ට යටත් වෙලා කටයුතු කරන අය දෙවියන්ගේ ගතිගුණ විදහාපෙන්වනවා. (1 කොරි. 14:33, 40) දෙවියන්ගේ සෙනඟ සහ දුෂ්ට මිනිසුන් අතර තියෙන වෙනස ගැන කල්පනා කරපු දාවිත් හද පිරි සතුටින් මෙහෙම කියලා තියෙනවා. “ඇත්තටම සන්තෝෂවත් සෙනඟ වන්නේ යෙහෝවා දෙවිව තමන්ගේ දෙවි ලෙස පිළිගෙන සිටින සෙනඟය.” (ගීතා. 144:15) දෙවියන්ගේ සංවිධානය තුළ අපි අද්දැකලා තියෙන දේවල් ගැන කල්පනා කරද්දී දාවිත් කියපු ඒ දේ මොන තරම් ඇත්තක්ද කියලා තේරුම්ගන්න පුළුවන්.

⁹ පවුලේ මූලිකත්වය සම්බන්ධයෙන් දෙවියන් ඇති කරපු සැලැස්මට අනුව “ස්ත්‍රියකගේ හිස පුරුෂයායි.” හැම පුරුෂයෙක්ම ක්‍රිස්තුස්ට යටත්. ක්‍රිස්තුස් දෙවියන්ට යටත්. (1 කොරි. 11:3) භාර්යාවන් ස්වාමිපුරුෂයන්ටත් දරුවන් දෙමාපියන්ටත් යටත් වෙන්න ඕනේ. (එෆී. 5:22-24; 6:1) පවුලේ හැමෝම මූලිකත්වය පිළිබඳ සැලැස්මට යටත් වෙද්දී පවුලේ සාමයට ඒක දායක වෙනවා.

¹⁰ ස්වාමිපුරුෂයන් මූලිකත්වය ගද්දී ක්‍රිස්තුස්ව ආදර්ශයට ගන්න ඕනේ. (එෆී. 5:25-29) ඔහු නිසි විදිහට මූලිකත්වය අරන් වැඩ කරද්දී භාර්යාවත් දරුවනුත් කැමැත්තෙන්ම ඒ මූලිකත්වයට යටත් වෙන්න පෙලඹෙනවා. භාර්යාවක් ස්වාමිපුරුෂයාට සහකාරියක් වෙන්න ඕනේ. (උත්. 2:18) ඉවසීමෙන් කටයුතු කරමින් පුරුෂයාට ගෞරවයෙන් සලකද්දී පුරුෂයාත් ඇයට ආදරෙන් සලකන්න පෙලඹෙනවා. ඒ වගේම දෙවියන්ව ගෞරවයට පත් කරන්නත් ඇයට පුළුවන් වෙනවා. (1 පේතෘ. 3:1-4) ස්වාමිපුරුෂයා සහ භාර්යාව මූලිකත්වය සම්බන්ධයෙන් දෙවියන්ගේ සැලැස්මට අනුව කටයුතු කරද්දී දෙවියන්ට යටත් වෙලා කටයුතු කිරීම සම්බන්ධයෙන් දරුවන්ට කදිම ආදර්ශයක් තියන්න ඔවුන්ට පුළුවන්.

¹¹ අපි ඇත්තටම දෙවියන්ට යටත් වෙනවා නම් දෙවියන් “යම් බලතල ලබා දී” තියෙන “උසස් බලධාරීන්ට” යටත් වෙන්නත් අපි පෙලඹෙනවා. (රෝම 13:1-7) දෙවියන්ට කීකරු වන ක්‍රිස්තියානීන් විදිහට අපි බදු ගෙවමින් “සීසර්ට අයිති දේ සීසර්ට” දෙන අතරේ ‘දෙවිට අයිති දේ දෙවිට දෙන්නත්’ වගබලා ගන්නවා. (මතෙ. 22:21) ඒ වගේම අපි සේවයේ යන අතරතුරේදී නිවැසියන් හෝ නිවෙස් පිළිබඳ තොරතුරු සටහන් කරගද්දී ඒකට අදාළව රටේ පවතින දත්ත රැකීම පිළිබඳ නීති ගැන සැලකිලිමත් වෙනවා. යෙහෝවා දෙවියන්ගේ ධර්මිෂ්ඨ ප්‍රමිති කඩ වෙන්නේ නැති හැම අවස්ථාවකදීම අපි රජයේ උසස් නිලධාරීන්ට කීකරු වෙනවා නම් ඒක ශුභාරංචිය දේශනා කරන කාර්යය හොඳින් කරගෙන යන්න උදව් වෙනවා.—මාක් 13:10; ක්‍රියා 5:29.

¹² මූලිකත්වය සම්බන්ධයෙන් දෙවියන්ගේ සැලැස්මට යටත් වෙන එක අපේ ජීවිතයේ හැම කාරණාවකටම බලපානවා. මිනිසුන් හැමෝම යෙහෝවා දෙවියන්ට යටත් වෙලා කටයුතු කරන කාලය මොන තරම් සුන්දර වෙයිද කියලා අපිට හිතාගන්න පුළුවන්. (1 කොරි. 15:27, 28) තමන්ගේ පාලකයා විදිහට යෙහෝවා දෙවියන්ව පිළි අරන් දිගටම ඔහුට යටත් වෙන අයට ඒ කාලයේදී මොන තරම් ආශීර්වාද ලැබෙයිද!