යේසුස්ව නැවත නැඟිට්ටවයි

යෝසෙප් කියලා පොහොසත් කෙනෙක් පිලාත් ළඟට ගිහින් ඇහුවා යේසුස්ගේ ශරීරය වධකණුවෙන් අරන් තැන්පත් කරන්නද කියලා. පිලාත් ඒකට අවසර දුන්නාම යෝසෙප් යේසුස්ගේ ශරීරය ලිනන් රෙදිවලින් ඔතලා අලුත්ම සොහොන් ගේක තැන්පත් කළා. ඊටපස්සේ ඒකේ දොරකඩට ලොකු ගලක් තියලා වැහුවා. නායක පූජකයන් පිලාත් ළඟට ගිහින් මෙහෙම කිව්වා. ‘යේසුස්ගේ ගෝලයෝ ඇවිත් එයාගේ ශරීරය අරන් ගිහින් එයා මරණයෙන් නැඟිට්ටා කියලා කියයි.’ එතකොට පිලාත් කිව්වා ‘ගල මුද්‍රා කරලා එතන මුර කරන්න’ කියලා.

දවස් තුනකට පස්සේ කාන්තාවන් ටිකදෙනෙක් උදෙන්ම සොහොන් ගේ ළඟට ගියාම දොරකඩ ළඟ තිබුණු ගල අහකට පෙරළලා තිබුණා. දේවදූතයෙක් එයාලට මෙහෙම කිව්වා. ‘යේසුස්ව මරණයෙන් නැඟිට්ටවලා. ගෝලයන්ට කියන්න ගලීලයේදී ඔහුව හම්බ වෙන්න කියලා.’

මරියා මග්දලේනා ඉක්මනටම ගිහින් පේතෘස්ටයි යොහන්ටයි කිව්වා ‘කවුරු හරි යේසුස්ගේ ශරීරය අරන් ගිහින්’ කියලා. ඒ දෙන්නා දුවලා ගිහින් සොහොන් ගේ ඇතුළේ බැලුවාම එතන යේසුස්ගේ ශරීරය තිබුණේ නැහැ.

මරියා ආයෙත් සොහොන් ගේ ළඟට ගියාම එයා දැක්කා ඒක ඇතුළේ දේවදූතයන් දෙන්නෙක් ඉන්නවා. මරියා එයාලට මෙහෙම කිව්වා. ‘කවුරු හරි මගේ ස්වාමීන්ව අරන් ගිහිල්ලා. ඔහුව කොහෙට අරන් ගියාද මං දන්නෑ.’ මරියා තව කෙනෙක්ව දැක්කා. ඒ උයනේ සේවකයෙක් කියලා හිතාගෙන මරියා කිව්වා ‘ඔහුව තැන්පත් කළේ කොහෙද කියලා කියන්න’ කියලා. ඒ කෙනා “මරියා” කියලා කිව්වාම ඒ යේසුස් කියලා මරියා තේරුම්ගත්තා. යේසුස් එයාට මෙහෙම කිව්වා. ‘මගේ සහෝදරයන්ට කියන්න ඔයා මාව දැක්කා කියලා.’ මරියා ඉක්මනටම ගිහින් ගෝලයන්ට ඒ ගැන කිව්වා.

එදාම තවත් ගෝලයෝ දෙන්නෙක් යෙරුසලමේ ඉඳන් එම්මාවුස් ගමට යද්දී අමුත්තෙක් ඇවිත් ඇහුවා එයාලා කතා කරන්නේ මොනවා ගැනද කියලා. එයාලා මෙහෙම කිව්වා. ‘දවස් තුනකට කලින් නායක පූජකයෝ යේසුස්ව මැරුවා කියලා ඔයාට ආරංචි වුණේ නැද්ද? දැන් කාන්තාවන් ටිකදෙනෙක් කියනවා ඔහු ජීවත් වෙනවා කියලා.’ ඒ කෙනා මෙහෙම ඇහුවා. ‘ක්‍රිස්තුස් මිය ගිහින් ආයෙත් නැඟිටිනවා කියලා අනාගතවක්තෘවරුන් කියපු දේ ඔයාලා විශ්වාස කරන්නේ නැද්ද?’ පස්සේ ඒ කෙනා ශුද්ධ ලියවිල්ලෙන් හුඟක් දේවල් පැහැදිලි කළා. එම්මාවුස්වලට ආවාම ගෝලයෝ දෙන්නා ඒ කෙනාට කිව්වා කෑම කන්න එන්න කියලා. ඒ කෙනා කෑමට කලින් යාච්ඤා කරද්දී ගෝලයන්ට තේරුණා ඒ යේසුස් කියලා. එතකොටම යේසුස්ව පේන්නේ නැතුව ගියා.

වෙච්ච දේ ගැන ඒ දෙන්නා යෙරුසලමට ගිහින් නියෝජිතයන්ට කිව්වා. ඒ වෙලාවේ යේසුස් එයාලා ඉස්සරහට ආවාම ඒ යේසුස් කියලා එයාලා විශ්වාස කළේ නැහැ. ඒ නිසා යේසුස් මෙහෙම කිව්වා. ‘බලන්න මගේ අත් දිහා. මාව අල්ලලා බලන්න. ක්‍රිස්තුස් නැවත නැඟිටිනවා කියලා කලින්ම කියලා තිබුණා.’