අනාගතය ගැන යොහන් දැක්ක දර්ශන

නියෝජිත යොහන්ව පැට්මොස් දූපතේ හිර කරලයි තිබුණේ. අනාගතය ගැන එකකට එකක් සම්බන්ධ දර්ශන 16ක් යේසුස් එයාට පෙන්නුවා. යෙහෝවාගේ නමට ඇති වෙලා තියෙන කැළැල නැති වෙන විදිහ, දෙවියන්ගේ රාජ්‍යය පොළොව පාලනය කරන විදිහ, ඔහුගේ අරමුණ ස්වර්ගයෙත් පොළොවෙත් ඉටු වෙන විදිහ යොහන් ඒ දර්ශනවලින් දැක්කා.

එක දර්ශනයකදී යොහන් දැක්කා යෙහෝවා අකුණු සැරවලින් වට වුණ, ගිගිරුම් හඬවල් ආපු සිංහාසනයක ඉඳගෙන ඉන්නවා. ඒ වටේට වැඩිමහල්ලන් 24දෙනෙක් සුදු ඇඳුම් ඇඳගෙන, රත්තරන් ඔටුනු දාගෙන ඉඳගෙන හිටියා. එයාලා දෙවියන් ඉස්සරහා වැඳ වැටිලා නමස්කාර කළා. ඔහුට නමස්කාර කරන හැම ජාතියකටම අයිති, හැම භාෂාවක්ම කතා කරන මහත් සමූහයක් ඉන්න දර්ශනයකුත් යොහන් දැක්කා. ඒ දර්ශනයේ බැටළු පැටියා වුණු යේසුස් එයාලව රැකබලා ගෙන ජීවන වතුර තියෙන උල්පත්වලට එයාලව අරගෙන ගියා. තවත් දර්ශනයකදී යොහන් දැක්කා යේසුස් ස්වර්ගයේ රජ විදිහට වැඩිමහල්ලන් 24දෙනාත් එක්ක පාලනය කරනවා. යේසුස් සාතනුයි භූතයනුයි එක්ක සටන් කරලා එයාලව පොළොවට දාන දර්ශනයකුත් යොහන් දැක්කා.

ඊටපස්සේ යොහන් දැක්කේ බැටළු පැටියායි, 1,44,000දෙනායි සියොන් කන්දේ හිටගෙන ඉන්න දර්ශනයක්. දේවදූතයෙක් පොළොව පුරාම ගිහින් දෙවියන්ට ගරුබිය පෙන්නලා ඔහුට ගෞරවය දෙන්න කියලා කියනවාත් යොහන් දැක්කා.

තවත් දර්ශනයකදී යොහන් දැක්කා අර්මගෙදොන් යුද්ධයේදී යේසුස් ඔහුගේ හමුදාවත් එක්ක ඇවිත් සාතන්ගේ හැම දුෂ්ට දෙයක්ම විනාශ කරනවා. අන්තිම දර්ශනයෙන් එයා දැක්කේ ස්වර්ගයෙත් පොළොවෙත් හැමෝම සාමයෙන් සමාදානයෙන් දෙවියන්ට සේවය කරන විදිහ. සාතනුත් එයාගේ පැත්තේ ඉන්න අයත් විනාශ වෙලා. ස්වර්ගයෙත් පොළොවෙත් ඉන්න හැමෝම හැමදාටම යෙහෝවාගේ නමට ප්‍රශංසා කරලා ඔහුට විතරක් නමස්කාර කරනවා.