දෙවියන් වහන්සේගේ ඉවසීම කොතරම් කල් පවතිනු ඇත් ද?
මීට වසර 3000කට ඉහත දී, එක් ප්‍රඥාවන්ත මිනිසෙක් මෙසේ පැවසී ය: “මිනිසා මිනිසා කෙරෙහි බලය පා ඇත්තේ ඔහුගේ අනතුරට ය.” (දේශනාකාරයා 8:9 NW) ඔහු එම නිරීක්ෂණය කළ දා සිට, දේවල් දියුණු වී නොමැත. ඉතිහාසය පුරා පුද්ගලයන් හෝ කණ්ඩායම්, එකක් පාසා එකක් බලය අල්ලා ගෙන ඇත්තේ, මිනිසා කෙරෙහි බලපවත්වමින් ඔවුන්ගෙන් අනිසි ප්‍රයෝජන ලබා ගැනීමක නිරත වීමට ය. යෙහෝවඃ දෙවියන් වහන්සේ මෙය ඉවසීමෙන් විඳදරා ගෙන තිබෙන සේක.
ආණ්ඩු මිලියන ගණන් ජනයාව මරුමුවට පත් වීම සඳහා යුද්ධයට යවද් දී, බරපතළ ආර්ථිකමය අයුක්ති සහගත දේවල්වලට ඉඩ හැර ඇති අතරතුරේ දී, යෙහෝවඃ වහන්සේ ඉවසීම දක්වා ඇත. අද දින, මිනිසුන් ඕසෝන් තට්ටුව විනාශ කරද්දී, වායු ගෝලය සහ සාගරය දූෂණය කරද් දී තවමත් උන් වහන්සේ ඉවසීම දක්වමින් සිටින සේක. හොඳ ඵලදායී සරු බිම් විනාශ වන විට, වනාන්තර සහ වන සත්ත්ව ජීවිත නොහික්මුණු ලෙස විනාශ කරන විට එය දැකීම උන් වහන්සේට කොතරම් වේදනා ගෙන දෙන්නක් ද!
දෙවියන් වහන්සේ මේ තරම් ඉවසන්නේ මන්ද?
මෙම ප්‍රශ්නයට පිළිතුරු දීමට සරල උපහැරණයක් අපට උපකාරවත් විය හැක. යම් ව්‍යාපාරයක නියුක්ත සේවකයෙක් දිගින් දිගට ම ප්‍රමාද වී සේවයට පැමිණෙයි නම් ව්‍යාපාරය මත ඉන් ඇති වන බලපෑම ගැන සලකා බලන්න. ව්‍යාපාරයේ ස්වාමියා කළ යුත්තේ කුමක් ද? සරල යුක්තිය අනුව නම්, ඔහු සැනෙකින් තම සේවකයා ව සේවයෙන් පහ කළ යුතු බව ඉල්ලිය හැක. නමුත් මෙම බයිබල් හිතෝපදේශය ඔහුගේ සිහියට නැගෙනවා වන්නට පුළුවන: “කෝපයට පමා වන්නා ඉතා නුවණැති [විචාර බුද්ධිය NW] කෙනෙකි; වහා කිපෙන්නා සිය මෝඩකම විදහා පාන්නේ ය.” (හිතෝපදේශ 14:29 නව අනුවාදය) ක්‍රියා කිරීමට පෙර ඒ ගැන ප්‍රමාද වීමට විචාර බුද්ධිය ඔහු හට හේතු කරවයි. මේ වෙනුවට ආදේශ සේවකයෙකු ව පුහුණු කරවීම සඳහා කාලයකට ඉඩ හැරීමට ඔහු තීරණය කරනවා විය හැකි අතර, ව්‍යාපාරයට මීට වඩා පාඩුවක් සිදුවී යාම මින් වැළකී යයි.
හවුල් සේවකයෙකු සම්බන්ධ අන්‍යෝන්‍ය අවබෝධයේ හැඟීමක් ද ඉවසා සිටීමට ඔහුට හේතු කරවිය හැකි ය. නොසැලකිලිමත් මෙම සේවකයා තම මාර්ග වෙනස් කරයි ද යන්න නිශ්චය කිරීමට ඔහුට අනතුරු ඇඟවීමක් දීම ගැන කුමක් කිව හැකි ද? පුරුද්දක් වශයෙන් ප්‍රමාද වී පැමිණීමට හේතු වී තිබෙන්නේ විසඳිය හැකි ගැටලුවක් නිසා ද නැතහොත් සුව කළ නොහැකි තරම් නරක ආකල්පයක් නිසා ද කියා දැන ගැනීමට ඔහු සමඟ කථා නොකරන්නේ මන්ද? ව්‍යාපාරයේ ස්වාමියා ඉවසා සිටීමට තීරණය කළ හැකි නමුත්, කෙසේ වෙතත්, ඔහුගේ ඉවසීම සීමා රහිත එකක් වන්නට යන්නේ නැත. හරි තත්ත්වයට සකස් වෙන්නට හෝ අවසානයේ දී රැකියාවෙන් ඉවත් වීමට හෝ සේවකයාට සිදු වෙයි. එය ව්‍යාපාරයට ම හා ව්‍යාපාරයේ නීති පිළිපදින සේවකයන්ට ද කෙරෙන සාධාරණ දෙයක් වනු ඇත.
මේ හා සමාන අයුරකින්, යම් ගැටලුවලට යුක්ති සහගත විසඳුමක් ගෙන එනු වස් කාලයකට ඉඩ හැරීම සඳහා, සිදු කරනු ලබන වැරදි හමුවේ යෙහෝවඃ දෙවියන් වහන්සේ ඉවසා ඇත. තවදුරටත්, වැරදි කරන්නන් හට තම මාර්ග වෙනස් කර ගෙන සදාකාලික ප්‍රයෝජන අත් කර ගැනීමට උන් වහන්සේගේ ඉවසීමෙන් ප්‍රස්තාවක් සැලසෙයි. මෙබැවින්, දෙවියන් වහන්සේගේ ඉවසීම සමඟ අසතුටට පත් නොවන ලෙස බයිබලය අපට දිරිගන්වයි. ඒ වෙනුවට එය පවසන්නේ: “අපගේ ස්වාමීන්වහන්සේගේ ඉවසිලිවන්තකම ගැළවීමයයි සලකාපල්ලා” කියා ය.—2 පේතෘස් 3:15.
දෙවියන් වහන්සේගේ ඉවසීම ගැන උදාහරණයක්
නෝවාගේ දවස්වල සිදු වූ මහත් ජලගැල්මට පෙර යෙහෝවඃ දෙවියන් වහන්සේ ඉවසූ සේක. එකල තිබූ ලෝකය සැහැසියාවෙන් පිරී තිබූ අතර, එය ඉතා දුෂ්ට ලෝකයක් විය. අපට මෙසේ කියවීමට තිබේ: “මනුෂ්‍යයාගේ දුෂ්ටකම පොළොවෙහි මහත් බවද . . . ස්වාමීන්වහන්සේ [යෙහෝවඃ වහන්සේ NW] දුටුසේක. ස්වාමීන්වහන්සේ [යෙහෝවඃ වහන්සේ NW] මා විසින් මවනලද මනුෂ්‍යයා භූමිය මතුපිටින් නැතිකර දමන්නෙමි . . . යි කීසේක.” (උත්පත්ති 6:5, 7) එසේ ය, එවකට තිබූ දුෂ්ටකමට අවසාන විසඳුමක් යෙහෝවඃ වහන්සේගේ මනසේ තිබුණු සේක: එනම්, දුෂ්ට ජනයා ව ඉවත් කිරීමයි. නමුත් උන් වහන්සේ විගස ම ක්‍රියා කළේ නැත. එසේ නොකළේ මන්ද?
මක්නිසාදයත් සෑම කෙනෙක් ම දුෂ්ටයෙකු වූවා නොවේ. නෝවා සහ ඔහුගේ පවුල දෙවියන් වහන්සේගේ ඇස් හමුවෙහි ධර්මිෂ්ටයන් වූහ. එම නිසා ඔවුන් කරණකොටගෙන, මෙම ධර්මිෂ්ඨ පුද්ගලයන් කිහිප දෙනාට තම ගැලවීම සඳහා සූදානම් වීමට යෙහෝවඃ වහන්සේ ඉවසිලිවන්ත ව ඉඩ දුන් සේක. තවදුරටත්, එම දුෂ්ට ජනයාට තම මාර්ග වෙනස් කර ගැනීමට ප්‍රස්තාවක් දෙනු පිණිස, නෝවා හට “ධර්මිෂ්ඨකමේ දේශනාකාරයෙකු” වීමට එම ඉවසා සිටීමෙන් ඉඩ සැලසිණි. බයිබලය මෙසේ පවසයි: “නෝවාගේ දවස්වලදී, නැව සාදන අතර, දෙවියන් වහන්සේ ඉවසිල්ලෙන් බලා සිටි කාලයෙහි . . . ඒ නැවට ස්වල්ප දෙනෙක් එනම් අටදෙනෙක් [ඇතුල් වී] වතුර කරණකොටගෙන ගැළවුණෝය.”—2 පේතෘස් 2:5; 1 පේතෘස් 3:20.
දෙවියන් වහන්සේ දැන් ඉවසා සිටීමට හේතුව
අද දිනත්, තත්ත්වය ඒ හා සමාන ය. ලෝකය සැහැසියාවෙන් යළි පිරී තිබේ. නෝවාගේ දවස්වල දී මෙන්, දෙවියන් වහන්සේ දැනටමත් මෙම ලෝකය විනිශ්චය කොට ඇත. බයිබලය මෙම ලෝකය ගැන පවසන්නේ මෙලෙසිනි, එය: “විනිශ්චයෙත් අභක්තිකයන්ගේ විනාශයෙත් දවස දක්වා . . . තබා තිබේ.” (2 පේතෘස් 3:7) එය සිදු වන විට, පරිසරය විනාශ කිරීම, බෙලහීනයන්ට පීඩා කිරීම, හෝ බලයේ ගිජු අනිසි භාවිතය තව දුරටත් නොතිබෙනු ඇත.
එසේ නම්, දෙවියන් වහන්සේ බොහෝ කලකට පෙර අභක්තික මිනිසුන් ව විනාශ කර නැත්තේ මන්ද? මන්දයත්, විසඳාලීමට ප්‍රශ්න ද, සකස් කිරීමට වැදගත් දේවල් ද තිබෙන නිසා ය. ඇත්ත වශයෙන් ම, බොහෝ දේවල් අඩංගු වී ඇති දුෂ්ටකම පිළිබඳ ගැටලුවට ස්ථීර සාර විසඳුමක් ගෙන ඒම කරා යෙහෝවඃ වහන්සේ ක්‍රියා කරමින් සිටින අතර, හරි හෘදයක් ඇති අය ව අසනීප හා මරණය නැමැති බැම්මෙන් මුදවා ගැනීම ඊට ඇතුළත් වෙයි.
පසුව සඳහන් වූ දෙය පෙරදැරි කර ගෙන, අපගේ පාප වෙනුවෙන් මිදීමේ මිලයක් ගෙවන්නා වූ ගැලවුම්කරුවෙකු සැපයීමට යෙහෝවඃ වහන්සේ අරමුණු කළ සේක. උන් වහන්සේ ගැන බයිබලය මෙසේ පවසයි: “දෙවියන්වහන්සේ ස්වකීය ඒකජාතක පුත්‍රයාණන් දෙන තරම් ලෝකයාට ප්‍රේමකළසේක. එසේ කළේ උන්වහන්සේ කෙරෙහි අදහාගන්න සෑමදෙනම විනාශ නොවී සදාකාල ජීවනය ලබන පිණිසය.” (යොහන් 3:16) මිනිස් වර්ගයා වෙනුවෙන් සිය ජීවිතය පූජා කරනු වස් පොළොවට පැමිණීමට යේසුස් වහන්සේට මාර්ගය පිළියෙල වීම සඳහා වසර දහස් ගණනක් ගත විණි. මෙම වසර දහස් ගණන අතරතුරේ දී, දෙවියන් වහන්සේ ප්‍රේමනීය ලෙස ඉවසා සිටි සේක. එවැනි සැපයුමක් වෙනුවෙන් ඉවසා සිටීම වටිනා දෙයක් නොවූයේ ද?
යේසුස් වහන්සේ මිනිස් වර්ගයා උදෙසා මිදීමේ මිලය සැපයුවේ වසර දෙදහකට පමණ පෙර ය. එසේ නම්, දෙවියන් වහන්සේ තවමත් ඉවසීම විදහාපාන්නේ මන්ද? ඒ සඳහා හේතු වන එක දෙයක් නම්, යේසුස් වහන්සේගේ මරණය, අධ්‍යාපනික ව්‍යාපෘතියක ආරම්භය සංඥා කිරීමයි. මිනිස් වර්ගයා හට මෙම ප්‍රේමනීය සැපයුම ගැන ඉගෙන ගැනීමට තිබූ අතර, එය පිළිගැනීමට හෝ එය ප්‍රතික්ෂේප කිරීමට ප්‍රස්තාවක් දෙනු ලැබිණි. එයට කාලයක් ගත වෙන නමුදු, එය හොඳින් ගත වී තිබෙනු ඇත. බයිබලය මෙසේ පවසයි: “ප්‍රමාදයයි සමහරුන් සලකන හැටියට ස්වාමීන්වහන්සේ [යෙහෝවඃ වහන්සේ NW] තමන්ගේ පොරොන්දුව ගැන ප්‍රමාද නොවනසේක; නුමුත් සියල්ලන්ම පසුතැවිලිවෙනවාට මිස කිසිවෙක් විනාශවෙනවාට උන්වහන්සේ නොකැමතිව, නුඹලා කෙරෙහි බොහෝ කල් ඉවසනසේක.”—2 පේතෘස් 3:9.
ආණ්ඩුව පිළිබඳ ප්‍රශ්නය
වෙනත් වැදගත් කාරණයකට ද කාලය ගත වනු ඇත. මිනිස් වර්ගයාගේ ආණ්ඩු පිළිබඳ ගැටලුව විසඳීමට ද අවශ්‍යතාවයක් තිබිණි. ආරම්භයේ දී මිනිසා සිටියේ දිව්‍ය ආණ්ඩුව යටතේ ය. නමුත් ඒදන් උයනේ දී, අපගේ මුල් දෙමාපියෝ එය ප්‍රතික්ෂේප කළහ. දෙවියන් වහන්සේගෙන් ස්වාධීන ව සිටීමට තෝරා ගත් ඔවුනට තමන් ව ම පාලනය කර ගැනීමට උවමනා විණි. (උත්පත්ති 3:1-5) එහෙත්, ඇත්තට ම, මිනිසා ව මවනු ලැබුවේ තමා ව ම පාලනය කර ගැනීමට නොවේ. අනාගතවක්තෘ යෙරෙමියා මෙසේ ලීවේ ය: “අහෝ යෙහෝවඃ වහන්ස, භූමික මිනිසාට තමාගේ මාර්ගය අයිති නැති බව හොඳින් දනිමි. ගමනේ යෙදෙන මිනිසාට තමාගේ පියවර මෙහෙයවීමටවත් අයිතියක් නැත.”—යෙරෙමියා 10:23, NW; හිතෝපදේශ 20:24.
එහෙත්, ආණ්ඩුව සම්බන්ධ ව ප්‍රශ්නයක් මතු වූ හෙයින්, එය විසඳාලීමට යෙහෝවඃ වහන්සේ ඉවසිලිවන්ත ව කාලයට ඉඩ හැරිය සේක. ඇත්තෙන් ම, තමන්ට සැලසුම් කළ හැකි සෑම අයුරක ම ආණ්ඩු අත් හදා බැලීමට උන් වහන්සේ මිනිසාට වසර දහස් ගණනක් නොමසුරු ව ඉඩ හළ සේක. ඇති වී තිබෙන ප්‍රතිඵලය කුමක් ද? සාක්ෂිවලින් පැහැදිලි වී තිබෙන්නේ, පීඩාකාරි පාලනය, අසමානතාවය, හෝ අසන්තෝෂට තුඩු දෙන වෙනත් හේතු ඉවත් කිරීමට කිසිම මිනිස් ආණ්ඩුවකට නොහැකි වී තිබෙන බවයි.
ඇත්තෙන් ම, ඉතිහාසයේ සිදු වී ඇති දෑ සලකා බලන කල, සියලු මිනිස් ආණ්ඩු ඉවත් කර දමා, ඒ වෙනුවට දෙවියන් වහන්සේගේ ම පාලනයකින් එය අනුයුක්ත කිරීමක් ගැන උන් වහන්සේ දැනුම් දෙන විට උන් වහන්සේ අයුක්ති සහගත යයි යමෙකුට ඇත්තට ම කිව හැකි ද? සහතික ව ම නැත! බයිබලයේ සඳහන් මෙම අනාවැකියේ ඉටු වීම අපි ඒකාන්ත ලෙස සාදරයෙන් පිළි ගනිමු: “ඒ රජුන්ගේ දවස්වලදී ස්වර්ගයේ දෙවියන්වහන්සේ කිසිකලක නැති නොවන්නාවූ රාජ්‍යයක් පිහිටුවනසේක, ඒකේ ආණ්ඩුව අන් සෙනගකට අත්අරිනු නොලබන්නේය. ඒක ඒ සියලු රාජ්‍යවල් පොඩිකර නැති කරන්නේ ය, එයද සදාකලේටම පවතින්නේය.”—දානියෙල් 2:44, 45ආ.
එම රාජ්‍යයේ ස්වර්ගික රජු නම් නැවත නැගිටවනු ලැබූ යේසුස් වහන්සේ ය. උන් වහන්සේ ව එම තනතුර සඳහා සූදානම් කිරීමට—එමෙන් ම, උන් වහන්සේ සමඟ හවුල් පාලකයන් වීම සඳහා මිනිසුන් ව තෝරා ගැනිමට—කාලය ගත වනු ඇත. මේ සියලු කාලයන් අතරතුරේ දී, දෙවියන් වහන්සේ ඉවසීම දක්වා ඇත.
දෙවියන් වහන්සේගේ ඉවසීමෙන් දැන් ප්‍රයෝජන ගන්න
අද දින, දේශ 212කට වඩා නොඅඩු සංඛ්‍යාවක, මිලියන ගණනක් පුද්ගලයෝ දෙවියන් වහන්සේගේ ඉවසීමෙන් ප්‍රයෝජන ලබති. දෙවියන් වහන්සේට කීකරු වෙමින්, උන් වහන්සේගේ ස්වර්ගික ආණ්ඩුවට සේවය කිරීමේ ආශාවෙන් ඔවුහු එක්සත් ව සිටිත්. ඔවුන් තම රාජ්‍යය ශාලාවන්හි එක් රැස්වෙන විට, තම ජීවිතවලට බයිබල් ප්‍රතිපත්ති අදාළ කර ගැනීම කොතරම් උචිත දැයි ඔවුහු දැන ගැනීමට පැමිණෙති. දෙවියන් වහන්සේ මිනිස් ආණ්ඩු ක්‍රියාත්මක වීමට ඉඩ හරින තාක් කල්, ඔවුන් ඒවාට යටත් වුවද, මේ ලෝකයේ බේදකාරී දේශපාලනයට ඔවුන් හවුල් වන්නේ නැත.—මතෙව් 22:21; රෝම 13:1-5.
මෙතරම් සංඛ්‍යාවක් අතර පවතින එවන් සහයෝගිතාවයකින් යුක්ති සහගත ව ම තහවුරුවනුයේ, යෙහෝවඃ වහන්සේට ප්‍රේම කිරීමට ඉගෙන ගෙන, උන් වහන්සේට සේවය කිරීමට උවමනා වන්නා වූ නිදහස් කැමැත්ත ඇති ජනයා අතර සමගියක් ඇති කිරීමට හැකි තැනන් වහන්සේ යෙහෝවඃ වහන්සේ වන බවයි. යේසුස් වහන්සේ ම ආරම්භ කළ කාර්යය, එනම් දෙවියන් වහන්සේගේ රාජ්‍යයේ ශුභාරංචිය දේශනා කිරීම, ඔවුන් විසින් නොකඩවා කර ගෙන යන අතරතුර දී ඔවුන් ඔබට ද හමු වී තිබෙනවාට සැකයක් නැත. මෙම කාර්යයේ උච්ච අවස්ථාව ගැන යේසුස් වහන්සේ පුරෝකථනය කළේ, “රාජ්‍යයේ මේ ශුභාරංචිය සියලු ජාතීන්ට සාක්ෂියක් පිණිස ලොව මුළුල්ලේ ප්‍රකාශකරනු ලබන්නේය; එවිට අන්තිමය පැමිණෙන්නේය” යනුවෙන් උන් වහන්සේ වදාළ විට දී ය.—මතෙව් 24:14.
වැඩි කලක් නොවේ!
දෘශ්‍යමාන සාක්ෂිවලින් සනාථ වෙන්නේ, පොළොවේ එදිනෙදා පාලනය සම්බන්ධව දෙවියන් වහන්සේගේ ධර්මිෂ්ඨ ආණ්ඩුව යටත් කර ගැනීමට යොදා ඇති විධිවිධානයන් සම්පූර්ණ වීමට ආසන්න බවයි. මෙම සියවස තුළ අප දැක ඇති මිනිස් ආණ්ඩුවල අසමත්කමේ භයානක ප්‍රතිඵල ගැන විස්තර කළායින් පසුව, යේසුස් වහන්සේ මෙසේ පැවසූ සේක: “එලෙසම මේ දේ සිදුවෙනවා නුඹලා දකින කල, දෙවියන්වහන්සේගේ රාජ්‍යය ළඟ බවත් දැනගනිල්ලා.”—ලූක් 21:10, 11, 31.
ඉතා ඉක්මනින්, දෙවියන් වහන්සේ දුෂ්ටයන් ව පොළෝ තලයෙන් ඉවත් කරන සේක. ගීතිකාකරුගේ මෙම වදන්වලට පදගතාර්ථ ඉටු වීමක් තිබෙනු ඇත: “මක්නිසාද නපුරු ක්‍රියා කරන්නෝ සිඳිනු ලබන්නෝය. . . . මද කලකින් දුෂ්ටයා නැතිවන්නේය. එසේය, නුඹ ඔහුගේ ස්ථානය පරීක්ෂාකර බලන්නෙහිය, ඔහු සම්බනොවන්නේය.” (ගීතාවලිය 37:9, 10) දුෂ්ටකමින් තොර ලෝකයක් ගැන ඔබට සිතා ගත හැකි ද? එකල දේවල් පාලනය කරන්නේ කවුද? බයිබලය මෙසේ කියයි: “බලව, ධර්මිෂ්ඨකමින් රජෙක් [ස්වර්ගයේ අභිෂේක ලත් ක්‍රිස්තුස් යේසුස් වහන්සේ] රජකම් කරන්නේය, අධිපතීහුද [පොළොව මත උන් වහන්සේ විසින් පත් කරන ලද නියෝජිතයන්] දැහැමින් [යුක්තියෙන් NW] අධිපතිකම් කරන්නෝය, ධර්මිෂ්ඨකමේ ක්‍රියාව සමාදානයද ධර්මිෂ්ඨකමේ ඵල සදාකාලයටම නිශ්චලය හා සුරක්ෂිත භාවයද වන්නේය. මාගේ සෙනග සමාදාන නිවාසයකද සුරක්ෂිත වාසස්ථානවලද නිවාඩු ස්ථානවලද වසන්නෝය.”—යෙසායා 32:1, 17, 18.
මේ අයුරින්, මිනිසාගේ වැරදි ක්‍රියාවන්හි නරක බලපෑම් ඉවත් කර දමන දෙවියන් වහන්සේගේ ස්වර්ගික ආණ්ඩුව, උන් වහන්සේ කෙරෙහි බලාපොරොත්තුවෙන් සිටින අය ව එක්සත් මිනිස් සමාජයකට සංවිධානය කරයි. මෙම සමගිය ගැන විස්තර කරමින් බයිබලය පවසන්නේ මෙසේ ය: “වෘකයා බැටළුපැටවා සමග [කලකට NW] වාසයකරන්නේය, දිවියාද එළුපැටවා සමග ලගින්නේය; වස්සාද තරුණ සිංහයාද තර සතාද එක්ව සිටින්නෝය; කුඩා දරුවෙක් උන් ගෙනයන්නේය. . . . මාගේ ශුද්ධ කන්දේ සීමා තුළෙහි කිසි අනතුරුකිරීමක්වත් විනාශකිරීමක්වත් නොවන්නේය. මක්නිසාද ජලයෙන් මුහුද වැසී තිබෙන්නාක්මෙන්, ස්වාමීන්වහන්සේ [යෙහෝවඃ වහන්සේ NW] ගැන දැනගැන්මෙන් පොළොව පිරීයන්නේය.”—යෙසායා 11:6-9.
දෙවියන් වහන්සේගේ ඉවසීමෙන් මොනතරම් අති විශිෂ්ට ප්‍රතිඵල ඇති වී තිබේ ද! එබැවින්, දෙවියන් වහන්සේ පමණට වඩා දිගු කලක් ඉවසා සිටියේ යයි චෝදනා කරමින් මැසිවිලි කියනවාට වඩා, උන් වහන්සේගේ රාජ්‍යයට ඔබ ව ම යටත් කර ගනු වස්, උන් වහන්සේගේ ඉවසීමෙන් ප්‍රයෝජන නොගන්නේ මන්ද? උන් වහන්සේගේ ප්‍රමිතීන් මොනවාදැයි බයිබලයෙන් ඉගෙන ගෙන, සැක දුරු කොට ඒවායේ සැබෑ බව සහතික කර ගන්න. එක්සත් ව උන් වහන්සේට යටත් ව සිටින අනෙක් අය ව ඇසුරු කරන්න. එවිට, දෙවියන් වහන්සේගේ ඉවසීමෙන් ඔබට සදාකාලික ප්‍රයෝජන ලැබෙනු ඇත. w91 10/1