“අවේක්ෂකයෙක් . . . ආත්ම දමනයෙන් යුක්ත විය යුතු ය”
“අවේක්ෂකයෙක් . . . ආත්ම දමනයෙන් යුක්ත විය යුතු ය.”—තීතස් 1:7, 8, NW.
1, 2. ඔරේන්ජ් හි විලියම් සැපයුවේ මැඩපැවැත්වීම පිළිබඳ ව කිනම් ආදර්ශයක් ද, එමෙන් ම කුමන ප්‍රයෝජනවත් ප්‍රතිඵල සහිත ව ද?
චිත්තවේගයන් මැඩපැවැත්වීමෙන් යුතු ව හැසිර වීම සම්බන්ධයෙන් අතිශයින් කැපී පෙනෙන ආදර්ශයක් ඉතිහාසය සපයයි. දහසයවන ශතවර්ෂයේ මැද භාගයේ, ඔරේන්ජ් හි විලියම් නම් යෞවන ලන්දේසි කුමරු, ප්‍රංශයේ II වන හෙන්රි රජ සමඟ දඩයමේ යමින් සිටියේ ය. එම රජ, ප්‍රංශයේ හා නෙදර්ලන්තයේ—ඇත්ත වශයෙන් ම මුළු ක්‍රිස්තියානි ලෝකයේ—සියලු රෙපරමාදු භක්තිකයන් අතුගා දැමීමට, තමා හා ස්පාඤ්ඤයේ රජ අතර වූ සැලැස්ම විලියම් හට හෙළි කළේ ය. යෞවන විලියම් තමා මෙන් භක්තිමත් කතෝලිකයෙක් යයි සිතූ හෙන්රි රජ, කුමන්ත්‍රණයේ සියලු තොරතුරු හෙළි කළේ ය. විලියම්ගේ කිට්ටු මිත්‍රයින් බොහෝ දෙනෙක් රෙපරමාදු භක්තිකයින් ව සිටි නිසා, ඔහු ඇසූ දෙයින් මහත් සේ ත්‍රස්ත වුව ද, ඔහු තමාට දැනුණු දෙය හෙළි නොකොට; ඒ වෙනුවට, රජ තමාට දුන් සියලු විස්තර සම්බන්ධයෙන් මහත් උනන්දුවක් පෙන්වී ය.
2 විලියම්ට ක්‍රියා කරන්නට හැකියාව ලද විගස, ඔහු එම කුමන්ත්‍රණය නිෂ්ප්‍රභා කරන්නට සැලසුම් ක්‍රියාත්මක කළ අතර, මෙය අවසානයේ නෙදර්ලන්තය, ස්පාඤ්ඤයේ කතෝලික ආධිපත්‍යයෙන් නිදහස් කිරීමට මඟ පෑදී ය. විලියම් පළමුවරට කුමන්ත්‍රණය ගැන ඇසූ විට ඔහුට ආත්ම දමනය ක්‍රියාවෙහි යොදවන්නට හැකි වූ බැවින්, ඔහු “නිශ්ශබ්ද විලියම්” යයි ප්‍රසිද්ධියට පත් විය. ඔරෙන්ජ් හි විලියම් කොතරම් සාර්ථක වූයේදයත්, “ඔහු ලන්දේසි සමූහාණ්ඩුවේ ස්වෛරීත්වයේ හා උදාරත්වයේ සැබෑ නිර්මාතෘවරයා විය” යයි අපට කියනු ලැබේ.
3. ක්‍රිස්තියානි වැඩිමහල්ලන් ආත්ම දමනය ක්‍රියාවෙහි යොදවන විට ඉන් ප්‍රයෝජන ලබනුයේ කවරෙක් ද?
3 නිශ්ශබ්ද විලියම් තමා ව ම මැඩපවත්වා ගැනීම හේතුවෙන්, ඔහු තමාටත් තම ජනයාටත් මහත් යහපතක් සිදු කළේ ය. මීට සමාන ව ශුද්ධාත්මයේ ඵලයක් වන ආත්ම දමනය, ක්‍රිස්තියානි වැඩිමහල්ලන්, නැතහොත් අවේක්ෂකයින් විසින් විදහා දැක්විය යුතුයි. (ගලාති 5:22, 23) මෙම ගුණාංගය ක්‍රියාවට නැගීමෙන්, ඔවුහු තමන්ටත්, සභාවන්ටත් යහපතක් සිදු කරති. අනෙක් අතට, ආත්ම දමනය ක්‍රියාවට නැංවීමට තමන්ගේ පැත්තෙන් අසමත්වීම, ගණනය කළ නොහැකි හානියක් සිදු කළ හැකි ය.
ආත්ම දමනය—වැඩිමහල්ලන්ට අවශ්‍ය ම දෙයකි
4. වැඩිමහල්ලන් ආත්ම දමනය ක්‍රියාවෙහි යෙදවීමේ අවශ්‍යතාවය අවධාරණය කරන්නේ ප්‍රේරිත පාවුල්ගේ කුමන උපදේශය ද?
4 වැඩිමහල්ලෙක් ව සිටි පාවුල් ම, ආත්ම දමනයේ වැදගත්කම අගය කළේ ය. එපීසයේ සිට තමන් වෙත පැමිණි වැඩිමහල්ලන්ට උපදෙස් දීමේ දී, ඔහු ඔවුන්ට මෙසේ පැවසුවේ ය: “ඔබ ගැනත් මුළු රැළ ගැනත් අවධානය යොමු කරන්න.” තමන් ගැන අවධානය යොමු කිරීමේ දී, වෙනත් දෑ අතර, ආත්ම දමනය ක්‍රියාවට නැංවීමේ අවශ්‍යතාවය, තමන්ගේ හැසිරීම ගැන සුපරික්ෂාකාරී වීම ඇතුළත් වූයේ ය. තිමෝතිට ලිවීමේ දී, පාවුල් එම මූලික කරුණු ම යළි සඳහන් කළේ ය. ඔහු පැවසුවේ: “ඔබ ම ගැනත් ඔබේ ඉගැන්වීම ගැනත් නිරන්තර අවධානය යොමු කරන්න.” තමන් දේශනා කරන දෙය පැවැත්වීමට වඩා දේශනා කිරීම කෙරෙහි වැඩි සැලකිල්ලක් දැක්වීමට සමහරෙකුගේ පැත්තෙන් වූ මනුෂ්‍ය නැඹුරුවාව පාවුල් දැන සිටි බව මෙවන් උපදෙස්වලින් පෙනේ. එබැවින්, ඔහු පළමු ව අවධාරණය කළේ තමන් ගැන පරීක්ෂාකාරී වීමේ අවශ්‍යතාවයයි.—ක්‍රියා 20:28, NW; 1 තිමෝති 4:16, NW.
5. ක්‍රිස්තියානි වැඩිමහල්ලන් පත් කරනු ලබන්නේ කෙසේ ද, එමෙන් ම ඔවුන්ගේ සුදුසුකම් ශුද්ධ ලියවිල්ලේ වාර්තා කර ඇත්තේ කොතැන ද?
5 ගත වූ වසර ගණනාව පුරා, වැඩිමහල්ලන්ගේ ශුද්ධ ලියවිලිමය කාර්ය භාරය ක්‍රමයෙන් වඩාත් පැහැදිලි වී ඇත. අද දින, වැඩිමහල් භාවය, පත්කරනු ලබන තත්ත්වයක් බව අපට පෙනේ. වැඩිමහල්ලන් යෙහෝවඃ වහන්සේගේ සාක්ෂිකරුවන්ගේ පාලක මණ්ඩලයෙන් හෝ එහි ඍජු නියෝජිතයන් විසින් පත් කෙරේ. එම මණ්ඩලය, පිළිවෙළින්, “විශ්වාසවූ නුවණ ඇති දාසයා” නියෝජනය කරයි. (මතෙව් 24:45-47) ක්‍රිස්තියානි අවේක්ෂකයෙක් හෝ වැඩිමහල්ලෙක් වීම සඳහා අවශ්‍ය සුදුසුකම්, මූලික ව ප්‍රේරිත පාවුල් විසින් 1 තිමෝති 3:1-7 දක්වාත්, තීතස් 1:5-9 දක්වාත් ඉදිරිපත් කර ඇත.
6, 7. වැඩිමහල්ලන්ගේ කිනම් විශේෂ සුදුසුකම්වලට ආත්ම දමනය අවශ්‍ය කෙරේ ද?
6 අවේක්ෂකයෙක් පුරුදු සම්බන්ධයෙන් පමණ දැන හැසිරෙන්නෙක් ව සිටිය යුතු බව පාවුල් 1 තිමෝති 3:2, 3 හි පවසයි. මෙයත්, වැඩිමහල්ලෙක් පිළිවෙළකින් යුක්ත වීමේ අවශ්‍යතාවය සඳහා ආත්ම දමනය ක්‍රියාවට නැංවීම අවශ්‍ය කරවයි. අවේක්ෂකයෙක් වීම සඳහා සුදුසුකම් ලබන මනුෂ්‍යයෙක් ගහගන්නෙක් නොවූ එසේ ම ඩබරකාරයෙක් නොවූ අයෙක් වෙයි. මෙම සුදුසුකම් වැඩිමහල්ලෙක් ආත්ම දමනයෙන් යුත් කෙනෙකු වීම ද අවශ්‍ය කරවයි. එපමණක් නොව, වැඩිමහල්ලෙක් බේබද්දෙක් නොවීම, මුද්‍රික පානයට වහල් වූවෙක් නොවීම සඳහා ඔහු ආත්ම දමනය ක්‍රියාවෙහි යෙදවිය යුතු ය.—1 තිමෝති 3:2, 3, NW හි පාද සටහන් ද බලන්න.
7 අවේක්ෂකයෙකුට ආත්ම දමනය තිබිය යුතු බව පාවුල් තීතස් 1:7 NW හි විශේෂයෙන් සඳහන් කළේ ය. කෙසේ වෙතත්, මෙම වගන්තිවල සඳහන් ව ඇති වෙනත් අවශ්‍යතා කොතරම් ප්‍රමාණයකට ආත්ම දමනයට සම්බන්ධ වන්නේ දැයි සැලකිල්ලට ගන්න. උදාහරණයක් වශයෙන්, අවේක්ෂකයෙක් චෝදනාවලින් නිදහස් වූ, එසේ ය, නිර්දෝෂ අයෙක් විය යුතු ය. නිසැක ව ම, වැඩිමහල්ලෙක් ආත්ම දමනය ක්‍රියාවෙහි යොදවන්නේ නැත්නම් ඔහුට එම අවශ්‍යතාවයන් සපුරා ගත නොහැකි ය.
අන්‍යයන් සමඟ කටයුතු කිරීමේ දී
8. උපදෙස් දීමෙහි ලා වැඩිමහල්ලන්ට අවශ්‍ය කරවන කිනම් ගුණාංග ආත්මදමනයේ අවශ්‍යතාව අවධාරණය කරයි ද?
8 තව ද, අවේක්ෂකයෙක් සෙසු ඇදහිලිවන්තයන් සමඟ කටයුතු කිරීමේ දී ඉවසිලිවන්ත එමෙන් ම බොහෝ ඉවසිලිවන්ත වූ අයෙක් ව සිටිය යුතු අතර මේ සඳහා ආත්ම දමනය අවශ්‍ය කෙරේ. උදාහරණයක් හැටියට, ගලාති 6:1 හි අපි මෙසේ කියවමු: “සහෝදරයෙනි, මනුෂ්‍යයෙක් යම් වරදකට අසුවුණත්, ආත්මිකවූ නුඹලා [මූලික ව වැඩිමහල්ලන්] මෘදුකමේ ආත්මයෙන් යුක්තව එබඳු කෙනෙකු හරවාගනිල්ලා. නුඹත් පරීක්ෂාවට නොපැමිණෙන පිණිස බලාගනින්න.” මෘදුකමේ ආත්මයක් විදහා පෙන්වීමට ආත්ම දමනය අවශ්‍ය කෙරේ. එම කාරණය සඳහා තමා ගැන ම ඇසක් තබා ගැනීම ද, ආත්ම දමනයට සම්බන්ධ වෙයි. මීට සමාන ව, පීඩාවකට පත් ව සිටින අයෙක් විසින් උපකාරය පිණිස වැඩිමහල්ලෙකු ව කැඳවනු ලබන විට, ආත්ම දමනය අතිශයින් වැදගත් වේ. ඒ තැනැත්තා ගැන වැඩිමහල්ලා කල්පනා කරන දෙය කුමක් හෝ වේවා, ඔහු කාරුණික, ඉවසිලිවන්ත, මෙන් ම තේරුම් ගන්නා සුලු කෙනෙකු විය යුතු ය. අවවාද දීමට ඉක්මන් වෙනවා වෙනුවට, වැඩිමහල්ලා සවන් දීමට සහ, එම තැනැත්තාට සැබවින් ම හිරිහැර කරනවා යයි පෙනෙන්ට ඇති දෙය ඔහුගෙන් ඇද ගැනීමට කැමති විය යුතු ය.
9. ශෝකයෙන් හෝ කලබලයෙන් යුත් සහෝදරයන් සමඟ ක්‍රියා කිරීමේ දී වැඩිමහල්ලන් සිතේ තබා ගත යුත්තේ කිනම් උපදේශය ද?
9 විශේෂයෙන්, ශෝකයෙන් හෝ කලබලයෙන් යුත් අය සමඟ ක්‍රියා කිරීමේ දී, යාකොබ් 1:19 හි ඇති මෙම උපදේශය උචිත ය. “මාගේ ප්‍රේමවන්ත සහෝදරයෙනි, නුඹලා මේක දන්නහුය. නුමුත් එක එක මනුෂ්‍යයා ඇසීමට ඉක්මන්වේවා, කථාකිරීමටත් උදහස්වීමටත් ප්‍රමාද වේවා.” එසේ ය, විශේෂයෙන් කෝප වූ, චිත්තවේගයෙන් දැවෙන ප්‍රතික්‍රියාවලට මුහුණ දෙන විට, ඒ අයුරින් ම ප්‍රතිචාර නොදැක්වීමට වැඩිමහල්ලෙක් ප්‍රවේසම් විය යුතුයි. චිත්තවේගයෙන් උණුසුම් වූ වචනවලට චිත්තවේගයෙන් උණුසුම් වූ වචනවලින් පිළිතුරු නොදීමට, “නපුරට නපුර නොකිරීමට” ආත්ම දමනය අවශ්‍ය වේ. (රෝම 12:17) එම අයුරින් ප්‍රතිචාරය දැක්වීම, නරක කාරණා තවත් දරුණු කරවනු ඇත. මෙසේ යළිත් දේව වචනය “මෘදු උත්තරයකින් කෝපය පහවෙයි” යනුවෙන් වැඩිමහල්ලන්ට සිහි ගන්වමින්, ඔවුන්ට කදිම අවවාදයක් ඉදිරිපත් කරයි.—හිතෝපදේශ 15:1.
වැඩිමහල්ලන්ගේ රැස්වීම්වල දී හා විනිශ්චයමය විභාග කිරීම්වල දී ආත්ම දමනය
10, 11. ආත්ම දමනයේ අවශ්‍යතාවය පෙන්වමින්, වැඩිමහල්ලන්ගේ රැස්වීම්වල දී සිදු වී ඇත්තේ කුමක් ද?
10 ක්‍රිස්තියානි අවේක්ෂකයන් ආත්ම දමනය ක්‍රියාවෙහි යෙදවීමට ප්‍රවේසම් විය යුතු තවත් ක්ෂේත්‍රයක් වනුයේ වැඩිමහල්ලන්ගේ රැස්වීම් තුළ දී ය. සත්‍යයට හා යුක්තියට පක්ෂ ව සන්සුන් ව කථා කිරීමට ඇතැම් අවස්ථාවල මහත් ආත්ම දමනයක් අවශ්‍ය කෙරේ. යම් සාකච්ඡාවක් තුළ බලය පවත්වන්නා ව සිටීමට වෑයම් කිරීමෙන් වැළකීමට ද ආත්ම දමනය අවශ්‍ය කෙරේ. මෙවන් නැඹුරුවාවක් වැඩිමහල්ලෙකුට ඇත්තේ නම්, ඔහුට උපදෙස් දීම වෙනත් වැඩිමහල්ලෙකුගේ පැත්තෙන් කාරුණික ක්‍රියාවක් වනු ඇත.—3 යොහන් 9 සසඳන්න.
11 තව ද, වැඩිමහල්ලන්ගේ රැස්වීම්වලදී, පමණ ඉක්මවා උනන්දුව දක්වන වැඩිමහල්ලෙක් චිත්ත වේගී ව කැළඹී, උස් හඬින් කථා කරන්නට පෙලඹිය හැකි ය. ඒ අයුරින් ක්‍රියා කිරීම කොතරම් මහත් සේ ආත්ම දමනයේ ඌනතාවය හෙළි කරයි ද! එය සැබවින් ම ද්විත්වාකාර ආත්ම පරාජයක් වෙයි. එක් අතකින්, යම් තැනැත්තෙක් ආත්ම දමනය නැති කර ගන්නා පමණට ම හෙතෙම චිත්තවේගී හැඟීම්වලට තර්කය යටපත් කිරීමට සැලැස්වීමෙන් තමාගේ ම තත්ත්වය ඔහු දුර්වල කර ගනී. අනෙක් අතට, යම් පුද්ගලයෙක් චිත්තවේගී ව කැළඹෙන තරමට, ඔහු සිය සහකාර වැඩිමහල්ලන් කලබල කරන්නට හෝ ඔවුන්ට විරුද්ධ ව කටයුතු කරන්නට පටන් ගනී. එපමණක් නොව, වැඩිමහල්ලන් ප්‍රවේසම් නොවුවහොත්, හැඟීම්වල තියුණු වෙනස්කම් මගින් ඔවුන් තුළ භේද ඇති කළ හැකි ය. මෙය තමන්ගේත්, සභාවේත් හානියට හේතු වනු ඇත.—ක්‍රියා 15:36-40 සසඳන්න.
12. ආත්ම දමනය ක්‍රියාවෙහි යෙදවීමට වැඩිමහල්ලන් ප්‍රවේසම් විය යුත්තේ කිනම් තත්ත්වයන් සමඟ කටයුතු කරන විට ද?
12 තරාතිරම් බැලීම හෝ සිය බලය අනිසි ලෙස පාවිච්චි කිරීම වැළැක්වීමට ද වැඩිමහල්ලන්ට ආත්ම දමනය මහත් සේ අවශ්‍ය වේ. පරීක්ෂාවන්ට හසුවීම, අසම්පූර්ණ මනුෂ්‍ය සැලකීම් මගින්, යමෙක් කියන හෝ කරන දෙය කෙරෙහි බලපෑම් ඇති කිරීමට ඉඩ හැරීම ඉතා පහසු ය! නොයෙක් විට, වැඩිමහල්ලන් තමන්ගේ ම දරුවන්ගෙන් කෙනෙක්, එසේත් නැතහොත් වෙනත් යම් ඥාතියෙක් වැරදි හැසිරීමෙහි යෙදී ඇති බව සොයා ගනු ලැබූ විට තීරණාත්මක ලෙස ක්‍රියා කරන්නට අසමත් වී තිබේ. එවන් තත්ත්වයන් යටතේ, ලේ ඥාති සම්බන්ධකම් නිසා යුක්ති සහගත ක්‍රියා කලාපය වළක්වාලීමට ඉඩ නොහැරීම සඳහා ආත්ම දමනය අවශ්‍ය කෙරේ.—ද්විතීය කථාව 10:17.
13. විනිශ්චයමය විභාග කිරීම්වල දී විශේෂයෙන් වැඩිමහල්ලන් හට ආත්ම දමනය අවශ්‍ය වනුයේ මන්ද?
13 ආත්ම දමනය වැදගත් වන තවත් අවස්ථාවක් වනුයේ විනිශ්චයමය විභාග කිරීමක් පැවැත්වෙන විට දී ය. චිත්ත වේග මගින් තමන් අනිසි ලෙස බලපෑම් නොලබනු පිණිස වැඩිමහල්ලන් මහත් ආත්ම දමනයක් ක්‍රියාවෙහි යෙදවිය යුතු ය. ඔවුන් කඳුළු නිසා ඉතා පහසුවෙන් නැමෙන සුලු අය නොවිය යුතු ය. ඒත් සමඟ ම, ධර්මභේදීන් සමඟ ක්‍රියා කිරීමේ දී මෙන්, චෝදනා එල්ල කර තමන්ට නින්දා වන සේ කථා කරන විට, සිය ශාන්ත භාවය නැති කර නොගැනීමට වැඩිමහල්ලෙක් ප්‍රවේසම් විය යුතු ය. මෙහි දී පාවුල්ගේ වදන් ඉතා යෝග්‍යය: “ස්වාමීන්වහන්සේගේ දාසයා ඩබර නොකර, සියල්ලන් කෙරෙහි ගුණවන්ත” විය යුතු ය. පීඩනය යටතේ මෘදු භාවය ක්‍රියාවට නැංවීම සඳහා ආත්ම දමනය අවශ්‍ය වේ. “ස්වාමීන්වහන්සේගේ දාසයා . . . [නපුරේදී NW] ඉවසිලිවන්තවූ කෙනෙක්ව සිට, විරුද්ධව සිටින්නන් . . . මෘදුකමින් . . . තරවටුකරන්ට ඕනෑ” බව පාවුල් තවදුරටත් පෙන්වයි. විරුද්ධවාදිකම් සමඟ ක්‍රියා කිරීමේ දී මෘදුකම විදහා පෙන්වමින්, තමා ඉවසිලිවන්ත ව සිටීම සඳහා මහත් ආත්ම දමනයක් අවශ්‍ය කෙරේ.—2 තිමෝති 2:24, 25.
විරුද්ධ ලිංගයේ අය සමඟ ආත්ම-දමනය
14. විරුද්ධ ලිංගයේ අය සමඟ වූ සිය කටයුතුවල දී, වැඩිමහල්ලන් අවනත විය යුතු කදිම උපදේශය කුමක් ද?
14 විරුද්ධ ලිංගයේ අය සමඟ තමන්ට කටයුතු කරන්නට සිදුවන විට, වැඩිමහල්ලන් ආත්ම දමනය ක්‍රියාවෙහි යෙදවීමට තියුණු ලෙස අවධානයෙන් සිටිය යුතු ය. වැඩිමහල්ලෙක් තනි ව සහෝදරියක ව එඬේර බැහැදැකීමකට යාම ඥානවන්ත දෙයක් නොවේ. එම වැඩිමහල්ලා තවත් වැඩිමහල්ලෙකු හෝ උපස්ථායක සේවකයෙකු කැටුව යා යුතු ය. සුදුසු ලෙස මෙම ගැටලුව අගයෙන් යුක්ත ව තේරුම් ගනිමින්, පාවුල් වැඩිමහල්ලෙක් වූ තිමෝතිට අවවාද කළේ: “වැඩිමහල් ස්ත්‍රීන්ට මවුවරුන්ට මෙන්ද, යෞවනියන්ට සියලු ආකාර පිරිසිදුකමින් සහෝදරියන්ට මෙන්ද අවවාදකරපන්න.” (1 තිමෝති 5:1, 2) පියෙක් බඳු හැඟීමක් විදහා පාමින් සමහරක් වැඩිමහල්ලන් සිය අත් සහෝදරියක් මත තබනු දක්නට ලැබී ඇත. එහෙත් එය තමන් ව ම රවටා ගැනීමක් විය හැකි ය, මන්දයත් එවන් හැසිරීමකට පෙලඹ වීම, නිර්මල ක්‍රිස්තියානි සහෝදර ස්නේහයකට වඩා ආලවන්ත හැඟීම්වලින් නික්මුණු ආශාවන් නිසා විය හැකි බැවිනි.—1 කොරින්ති 7:1 සසඳන්න.
15. වැඩිමහල්ලෙක් ආත්ම දමනය ක්‍රියාවෙහි යොදවන්නේ නැති විට, යෙහෝවඃ වහන්සේගේ නාමය කෙරෙහි ඉන් විපාක විය හැකි අවමානය එක්තරා සිද්ධියක් කැපී පෙනෙන්නට සලස්වන්නේ කෙසේ ද?
15 සභාවේ සහෝදරියන් සමඟ වූ සිය කටයුතුවල දී ඇතැම් වැඩිමහල්ලන් ආත්ම දමනයෙන් ක්‍රියා නොකිරීම නිසා සත්‍යයට කොතරම් හානිකර විපාක වී ඇත් ද! සිය ස්වාමිපුරුෂයා සාක්ෂිකරුවෙක් නොවූ ක්‍රිස්තියානි සහෝදරියක් සමඟ කාමමිථ්‍යාචාරයේ යෙදීම නිසා, වසර කිහිපයකට පෙර, වැඩිමහල්ලෙක් ව නෙරපනු ලැබී ය. කලින් වැඩිමහල්ලෙක් ව සිටි එම තැනැත්තා ව නෙරපීම නිවේදනය කරනු ලැබූ රාත්‍රියේ ම, දුකට හා වේදනාවට පත් එම ස්වාමිපුරුෂයා රයිෆලයක් සහිත ව රාජ්‍යය ශාලාවට කඩාවැදී වැරදිකරුවන් දෙදෙනාට වෙඩි තැබී ය. ඔවුන්ගෙන් කිසිවෙක් ඉන් මරණයට පත් නොවූ අතර වහා ඔහු අතින් අවිය පැහැර ගනු ලැබුව ද, ඊළඟ දිනයේ ප්‍රධාන පුවත්පතක මුල් පිටුවේ ‘පල්ලියක වෙඩි තැබීමක්’ යන සිරස්තලය යටතේ එම පුවත ප්‍රසිද්ධ විණි. එම වැඩිමහල්ලාගේ ආත්ම දමනයේ ඌනතාවය, එම සභාව කෙරෙහිත්, යෙහෝවඃ වහන්සේගේ නාමය කෙරෙහිත් ගෙනාවේ මොනතරම් මහත් නින්දාවක් ද!
වෙනත් ක්ෂේත්‍රයන්හි ආත්ම දමනය
16. ප්‍රසිද්ධ කථා දෙන විට ආත්ම දමනය ක්‍රියාවට නැංවීමට වැඩිමහල්ලන් පරීක්ෂාකාරී විය යුත්තේ මන්ද?
16 වැඩිමහල්ලෙක් ප්‍රසිද්ධ කථාවක් දෙන විට ද ආත්ම දමනය අතිශයින් අවශ්‍ය වේ. ප්‍රසිද්ධ කථිකයෙක් විශ්වාසයේ හා තැන්පත් භාවයේ ආදර්ශයක් විය යුතු ය. සමහරෙක් හුදු සිනහවක් ඉපදවීමේ බලාපොරොත්තුවෙන් කවට ප්‍රකාශයන් බොහොමයකින් සවන් දී සිටින්නන් පිනවීමට වෑයම් කරති. මෙය තමන්ට සවන් දී සිටින්නන් සතුටු කිරීමේ පරීක්ෂාවට නැඹුරු වීම එළි කරනවා විය හැකි ය. ඇත්ත වශයෙන් ම, පරීක්ෂාවට හසු වූ මේ සියලු නැඹුරු වීම් ආත්ම දමනයේ ඌනතාවයකි. කථාවක් ඉදිරිපත් කරන විට කාලය ඉක්මවා යාම, ආත්ම දමනයේ ඌනතාවය මෙන් ම ප්‍රමාණවත් සූදානමක් නැතිකම ද පිළිබිඹු කරන බව පවා කිව හැක.
17, 18. වැඩිමහල්ලෙක් විසින් තමන්ගේ විවිධ වගකීම් සමබර කිරීමෙහි ලා ආත්ම දමනය ඉටුකරන්නා වූ කාර්ය භාරය කුමක් ද?
17 වෙහෙස වී ක්‍රියා කරන සෑම වැඩිමහල්ලෙක් ම සිය කාලය හා ශක්තිය මත කරන විවිධ අවශ්‍යතා සමබර ව පවත්වා ගැනීමට වූ අභියෝගයට මුහුණ දිය යුතු ය. එක් අන්තයකින් තවත් අන්තයකට නොයෑමට ආත්ම දමනය අවශ්‍ය වේ. ඇතැම් වැඩිමහල්ලන් සභාවේ අවශ්‍යතාවයන් ගැන එතරම් ම සැලකිලිමත්වීම නිසා, ඔවුන් තම පවුල් නොසලකා හැර තිබේ. මෙසේ, එක්තරා සහෝදරියක්, වැඩිමහල්ලෙකුගේ භාර්යාවට ඔහු තමාට කළ කදිම එඬේර බැහැදැකීම ගැන පැවසූ විට, “ඔහු එඬේර බැහැදැකීමක් මටත් කළා නම් මා කැමැතියි!” යයි එම වැඩිමහල්ලාගේ භාර්යාව හැඟීමෙන් යුක්ත ව පැවසුවා ය.—1 තිමෝති 3:2, 4, 5.
18 තම පුද්ගලික පාඩම සඳහා වැය කරන කාලය ක්ෂේත්‍ර සේවාව නැතහොත් එඬේර බැහැදැකීම් වෙනුවෙන් වැය කරන කාලයත් සමඟ සමබර කිරීම සඳහා ද වැඩිමහල්ලෙකුට ආත්ම දමනය අවශ්‍ය වේ. මනුෂ්‍ය හෘදයේ රැවටිලිකාර ස්වභාවය හේතුවෙන්, වැඩිමහල්ලෙක් තමා වැඩි වින්දනයක් ලබන දෙය සඳහා යුතු ප්‍රමාණයට වඩා වැඩි කාලයක් වැය කිරීමට ඉතා පහසු ය. ඔහු පොත්වලට ආශා කරන්නේ නම්, ඔහු කළ යුතු ප්‍රමාණයට වඩා පුද්ගලික පාඩම කෙරෙහි වැඩි කාලයක් ගත කරනවා විය හැකි ය. ඔහුට ගෙයින් ගෙට සේවය වඩා අපහසු යයි දැනෙන්නේ නම්, එඬේර බැහැදැකීම් හේතුවක් ලෙස දක්වමින් එය අතපසු කිරීම සඳහා ඔහු නිදහසට කරුණු ඉදිරිපත් කරනවා වන්නට පුළුවන.
19. ආත්ම දමනයේ අවශ්‍යතාවය අවධාරණය කරන්නා වූ කිනම් බැඳීම් වැඩිමහල්ලන්ට තිබේ ද?
19 රහසිගත භාවය පවත්වා ගැනීමට වූ බැඳීම සම්බන්ධයෙන් ද වැඩිමහල්ලෙක් ආත්ම දමනය පැවැත්වීමට අවදි ව සිටීම අවශ්‍ය කරවයි. මෙහි දී මෙම උපදේශය උචිත ය: “අනිකෙකුගේ රහසිගත කථාව ප්‍රකාශ නොකරන්න.” (හිතෝපදේශ 25:9, NW) මෙය වැඩිමහල්ලන් අතර පුළුල් ව උල්ලංඝනය කරනු ලබන අවශ්‍යතාවයන්ගෙන් එකක් බව අත් දැකීම් අඟවයි. වැඩිමහල්ලෙකුට හොඳ අදහස් හුවමාරුවක් ඇති ඥානවන්ත හා ප්‍රේමනීය භාර්යාවක් සිටී නම්, රහසිගත ස්වභාවයේ කාරණා සාකච්ඡා කිරීමට හෝ නිකම් සඳහන් කිරීමට ඔහුගේ පැත්තෙන් ප්‍රවණතාවයක් තිබිය හැකි ය. එහෙත් මෙය නුසුදුසු මෙන් ම බොහෝ අඥාන ක්‍රියාවකි. පළමු කොට, එය විශ්වාසය පාවාදීමකි. ආත්මික සහෝදර සහෝදරයින් වැඩිමහල්ලන් වෙතට පැමිණ තම රහසිගත කාරණා ඔවුනට පවසන්නේ, එම කාරණා අතිශයින් රහසිගත ව තබා ගනිවී යන විශ්වාසයක් ඇති ව ය. රහසිගත කාරණා කෙනෙකුගේ භාර්යාවට ප්‍රකාශ කිරීම වැරදි සහගත ය, අඥාන ය, එමෙන් ම ඇය කෙරෙහි නුවමනා බරක් ද තබන බැවින්, එය ප්‍රේමනීය ක්‍රියාවක් ද නොවේ.—හිතෝපදේශ 10:19; 11:13.
20. වැඩිමහල්ලන් ආත්ම දමනය ක්‍රියාවට නැංවීම එතරම් වැදගත් වනුයේ මක්නිසා ද?
20 ආත්ම දමනය ඉතා වැදගත් බවට කිසි ප්‍රශ්නයක් නැත, එසේ ය, විශේෂයෙන් වැඩිමහල්ලන්ට එය ඉතා වැදගත් වේ! යෙහෝවඃ වහන්සේගේ ජනයා අතර පෙරමුණ ගැනීමට ඔවුන්ට වරප්‍රසාදය පිරිනමා තිබීම හේතුවෙන් ඔවුහු වැඩි ගණන්දීමකට යටත් ව සිටිති. ඔවුන්ට බොහෝ දේ පවරා ඇති බැවින්, ඔවුන්ගෙන් බොහෝ දේ ඉල්ලා සිටිනු ලැබේ. (ලූක් 12:48; 16:10; යාකොබ් 3:1 සසඳන්න.) අන්‍යයන්ට කදිම ආදර්ශයක් තැබීම වැඩිමහල්ලන්ගේ වරප්‍රසාදයක් මෙන් ම යුතුකමක් වෙයි. ඊටත් වඩා, පත් කරන ලද වැඩිමහල්ලෝ බොහෝ විට ආත්ම දමනය පවත්වනවා ද නැද්ද යන්න මත, අන්‍යයන්ට වැඩි යහපතක් හෝ වැඩි හානියක් කළ හැකි තත්ත්වයක සිටිත්. “අවේක්ෂකයෙක් . . . ආත්ම දමනයෙන් යුක්ත විය යුතුය” යයි පාවුල් පැවසීම පුදුමයක් නොවේ. w91 11/15
ඔබට මතක ද?
◻ වැඩිමහල්ලන් ආත්ම දමනය ක්‍රියාවට නැංවිය යුතු බව පෙන්වන්නේ ඔවුන් පිළිබඳ කිනම් ශුද්ධ ලියවිලිමය අවශ්‍යතාවයන් ද?
◻ සෙසු ඇදහිලිවන්තයන් සමඟ ක්‍රියා කිරීමේ දී වැඩිමහල්ලන් හට ආත්ම දමනය අවශ්‍ය වනුයේ මන්ද?
◻ වැඩිමහල්ලන්ගේ රැස්වීම්වල දී ආත්ම දමනය ක්‍රියාවෙහි යෙදවිය යුත්තේ කෙසේ ද?
◻ වැඩිමහල්ලන් විසින් රහසිගත භාවය පැවැත්වීමට වූ අවශ්‍යතාවය නිසා ඉදිරිපත් වන අභියෝගය කුමක් ද?
[20වන පිටුවේ පින්තූරය]
වැඩිමහල්ලන්ගේ රැස්වීම්වල දී ආත්ම දමනය විදහා පෙන්වීම අත්‍යවශ්‍ය ය
[23වන පිටුවේ පින්තූරය]
ක්‍රිස්තියානි වැඩිමහල්ලන් ආත්ම දමනය ක්‍රියාවට නගමින් රහසිගත භාවය පවත්වා ගත යුතු ය