ඔබ යාච්ඤා කරන විට දෙවියන් වහන්සේ සවන් දෙන සේක් ද?
ප්‍රධාන විධායක නිලධාරියෙක්, යම් කරුණක් වෙන අය හට පවරනවා ද නැතහොත් පුද්ගලික ව එය හසුරුවනවා ද යන්න තීරණය කරයි. මේ හා සමාන ව ම, විශ්වයේ පරමාධිපති පාලකයාණෝ, ඕනෑ ම කරුණක් සම්බන්ධයෙන් ස්වකීය පුද්ගලික සම්බන්ධ වීමේ සීමාව තීරණය කිරීමේ බලය සතු ව සිටින සේක. දෙවියන් වහන්සේ අපගේ යාච්ඤාවන්ට තමන් වහන්සේ ව ම පුද්ගලික ව සම්බන්ධ කර ගැනීමට තෝරා ගෙන සිටින බව ශුද්ධ ලියවිලි උගන්වන අතර, එබැවින් ඒවා උන් වහන්සේට යොමු කරන ලෙස අපට මඟ පෙන්වයි.—ගීතාවලිය 66:19; 69:13.
මෙම කරුණ සම්බන්ධයෙන් දෙවියන් වහන්සේගේ තෝරා ගැන්මෙන් හෙළි වන්නේ, ස්වකීය මිනිස් සේවකයන්ගේ යාච්ඤා පිළිබඳ ව උන් වහන්සේ දක්වන පුද්ගලික උනන්දුව ය. සෑම සිතිවිල්ලක් හා කනස්සල්ලක් සමඟින් ම ස්වකීය ජනයා තමන් වෙතට එළැඹීම අධෛර්යවත් කරනවා වෙනුවට, උන් වහන්සේ ඔවුන්ට අනුශාසනා කරනුයේ: “නොකඩව යාච්ඤාකරපල්ලා,” “යාච්ඤාවෙහි නොකඩව පැවතියල්ලා,” “නුඹේ බර . . . ස්වාමීන් [යෙහෝවඃ වහන්සේ NW ] පිට තබව,” “නුඹලාගේ හැම කරදර [දෙවියන් වහන්සේ] පිට තබාපල්ලා” කියා ය.—1 තෙසලෝනික 5:17; රෝම 12:12; ගීතාවලිය 55:22; 1 පේතෘස් 5:7.
ස්වකීය සේවකයන්ගේ යාච්ඤාවලට අවධානය යොමු කිරීමට දෙවියන් වහන්සේට වුවමනා නොවී නම්, උන් වහන්සේ තමන් වෙතට එවන් ප්‍රවේශ වීමක් කිසිසේත් සූදානම් කරන්නේවත් එය නිදහසේ භාවිතා කරන්නට දිරිගන්වන්නේවත් නැත. එසේ නම්, ස්වකීය ජනයා ව තමන් වහන්සේ වෙතට මෙතරම් එළැඹිය හැකි කරවා ගැනීමට දෙවියන් වහන්සේ විසින් තෝරා ගෙන තිබීම, උන් වහන්සේ ඇත්ත වශයෙන් ම සවන් දෙන බව නිසැක වීමට එක් හේතුවකි. එසේ ය, උන් වහන්සේ ස්වකීය සේවකයන්ගේ සෑම යාච්ඤාවකට ම සැලකිල්ල දක්වන සේක.
දෙවියන් වහන්සේ යාච්ඤාවලට සවන් දෙන්නේ ය යන කාරණය බයිබලයේ පැහැදිලි ව දක්වා තිබීම සුළු කොට සැලකිය යුතු නොවේ. නිදසුනක් වශයෙන්, ප්‍රේරිත යොහන් මෙසේ ලියයි: “උන්වහන්සේ ඉදිරියෙහි අපට තිබෙන නිසැකකම නම්, අප උන්වහන්සේගේ කැමැත්ත ලෙස යමක් ඉල්ලුවොත් උන්වහන්සේ අපේ ඉල්ලීම අසන බවය.” (1 යොහන් 5:14) යෙහෝවඃ දෙවියන් වහන්සේ “යාච්ඤා අසන තැනන්වහන්ස” යයි ගෙන හැර දැක්වූ දාවිත්, “උන්වහන්සේද මාගේ බස් අසන සේක” යයි නිසැක ව ම තහවුරු කර සිටියේ ය.—ගීතාවලිය 55:17; 65:2.
එමනිසා, නිසැක ව ම යාච්ඤාව නමැති ක්‍රියාව තුළ ම ප්‍රයෝජන තිබුණ ද, ධර්මිෂ්ඨ පුද්ගලයෙක් යාච්ඤා කරන විට ඊට වැඩියමක් සම්බන්ධ වන බව ශුද්ධ ලියවිලි පෙන්වයි. කෙනෙක් ඊට සවන් දෙමින් සිටියි. එම සවන් දෙන තැනැත්තාණෝ දෙවියන් වහන්සේ ය.—යාකොබ් 5:16-18.
අසනු ලැබූ යාච්ඤා
ඇත්ත වශයෙන් ම, දෙවියන් වහන්සේ විසින් යාච්ඤාවන් අසා පිළිතුරු දෙනු ලැබූ අය පිළිබඳ වාර්තාවන්ගෙන් බයිබලය පිරී ඇත. යාච්ඤාවේ ප්‍රයෝජනය, යමෙකුගේ සිතිවිලි තෝරා බේරා ප්‍රකාශ කිරීමේ ප්‍රතිකාරමය බලපෑම ඉක්මවා යන බව ඔවුන්ගේ අත්දැකීම් පැහැදිලි ව ම සනාථ කරයි. ඒවා ඔහුගේ යාච්ඤාවන්ට එකඟ ව ඔහු දක්වන පුද්ගලික වෑයම් ඉක්මවා යයි.
නිදසුනක් වශයෙන්, ඉශ්‍රායෙලයේ රජකම බලෙන් පැහැර ගැනීමට වූ අබ්සලොම්ගේ කුමන්ත්‍රණයට මුහුණ දුන් විට, දාවිත් රජ මෙසේ යාච්ඤා කළේ ය: “අහෝ, ස්වාමීන්වහන්ස [යෙහෝවඃ වහන්ස NW ], අහිතොපෙල්ගේ [අබ්සලොම්ගේ උපදේශකයාගේ] මන්ත්‍රණය මෝඩකමට හැරවුව මැනව.” මෙය සුළුපටු ඉල්ලීමක් නොවී ය, මන්දයත් “අහිතොපෙල් දුන් මන්ත්‍රණය මනුෂ්‍යයෙකු විසින් දෙවියන්වහන්සේගේ මුඛයෙන් විචාරීමක්මෙන් විය. අහිතොපෙල්ගේ සියලු මන්ත්‍රණ එයාකාරව තිබුණේය.” ඉන් අනතුරුව, අබ්සලොම් දාවිත් රජ පරාජය කිරීමට අහිතොපෙල්ගේ යෝජිත ක්‍රමෝපායන් ප්‍රතික්ෂේප කළේ ය. ඒ ඇයි? “ස්වාමීන්වහන්සේ [යෙහෝවඃ වහන්සේ NW ] අබ්සලොම් පිටට නාස්තිය පමුණුවන පිණිස අහිතොපෙල්ගේ හොඳ මන්ත්‍රණය නිෂ්ඵල කරන්ට නියමකර තිබුණේය.” පැහැදිලි ව ම, දාවිත්ගේ යාච්ඤා අසනු ලැබී ය.—2 සාමුවෙල් 15:31; 16:23; 17:14.
මීට සමාන ව, හෙසකියා මරණාසන්න රෝගයෙන් ගැලවීම සඳහා දෙවියන් වහන්සේට ආයාචනා කිරීමෙන් පසු, ඔහු සුව විය. මෙය සිදු වූයේ හුදු යාච්ඤා කිරීමේ විපාකයක් වශයෙන් හෙසකියා ලැබූ මනෝවිද්‍යාත්මක ප්‍රයෝජනයක් නිසා ද? ඇත්ත වශයෙන් ම, නැත! අනාගතවක්තෘ යෙසායා විසින් ප්‍රකාශ කරන ලද පරිදි, හෙසකියාට වූ යෙහෝවඃ වහන්සේගේ පණිවුඩය වූයේ: “මම නුඹේ යාච්ඤාව ඇසීමි, නුඹේ කඳුළු දුටිමි. බලව, මම නුඹ සුවපත්කරන්නෙමි” යන්න ය.—2 රාජාවලිය 20:1-6.
තමන් අපේක්ෂා කළාට වඩා ප්‍රමාද ව තම යාච්ඤාවට පිළිතුරු ලැබූ දානියෙල්ට, යෙහෝවඃ වහන්සේගේ දේව දූතයා විසින් සහතික කරනු ලැබුවේ: “නුඹේ වචන අසනු ලැබීය” යනුවෙනි. හන්නා, යේසුස් වහන්සේගේ ගෝලයන්, මෙන් ම හමුදා නිලධාරියෙක් වන කොර්නේලියස් යනාදී, වෙනත් අයගේ යාච්ඤාවලට පිළිතුරු ලැබුණේ, මිනිස් හැකියාවන්ට පමණක් ප්‍රශංසාව දිය නොහැකි මාර්ගවලිනි. එබැවින්, දිව්‍ය කැමැත්තට එකඟ යාච්ඤා දෙවියන් වහන්සේ විසින් පිළිගෙන, අසා, පිළිතුරු දෙනු ලබන බව බයිබලය පැහැදිලි ව උගන්වයි.—දානියෙල් 10:2-14; 1 සාමුවෙල් 1:1-20; ක්‍රියා 4:24-31; 10:1-7.
එහෙත් දෙවියන් වහන්සේ අද දින ස්වකීය ඇදහිලිවන්ත සේවකයන්ගේ යාච්ඤාවන්ට පිළිතුරු දෙන්නේ කෙසේ ද?
යාච්ඤාවන්ට පිළිතුරු
ඉහත සඳහන් කරන ලද යාච්ඤාවන්ට චමත්කාරජනක, ආශ්චර්යවත් ආකාරයන්ගෙන් පිළිතුරු දෙනු ලැබී ය. එනමුත්, බයිබල් කාලවල දී පවා, යාච්ඤාවන්ට නිතර ම ලැබුණු පිළිතුරු එතරම් පහසුවෙන් තේරුම් ගත නොහැකි ව තිබූ බව කරුණාකර මතක තබා ගන්න. මෙයට හේතුව ඒවා ධර්මිෂ්ඨ ක්‍රියාමාර්ගයක් වෙත ඇලී සිටීමේ හැකියාව සලසමින්, සදාචාර බලය හා ඥානාලෝකය දීම සමඟ සම්බන්ධ ව පැවති නිසා ය. විශේෂයෙන් ම ක්‍රිස්තියානින්ට, යාච්ඤාවන්ට ලැබුණු පිළිතුරු සම්බන්ධ වූයේ මූලික ව ම ආත්මික කාරණා සඳහා මිස, දැකිය හැකි හෝ බලගතු ක්‍රියා සඳහා නොවේ.—කොලොස්සි 1:9.
එමනිසා, ඔබගේ යාච්ඤා සඳහා ඔබ බලාපොරොත්තු වන, හෝ වඩාත් ආශා කරන අයුරින් නිතර පිළිතුරු දෙනු නොලැබීම ගැන අපේක්ෂා භංගත්වයට පත් නොවන්න. නිදසුනක් වශයෙන්, පීඩාවක් ඉවත් කරනවා වෙනුවට, එය විඳදරා ගැනීමට “සාමාන්‍ය ප්‍රමාණය ඉක්ම වූ බලයක්” ඔබට දීමට දෙවියන් වහන්සේ තෝරනවා විය හැකි ය. (2 කොරින්ති 4:7, NW ; 2 තිමෝති 4:17) එවන් බලයක අගය සුළුකොට සැලකීමවත් යෙහෝවඃ වහන්සේ සැබවින් ම අපගේ යාච්ඤාවට කිසිසේත් පිළිතුරු නොදුන් බව නිගමනය කිරීමවත් අප කිසිදා නොකළ යුතු ය.
අන් කිසිවෙකුගේවත් නොව, දෙවියන් වහන්සේගේ පුත්‍රයාණන් වන, යේසුස් ක්‍රිස්තුස් වහන්සේ සම්බන්ධ කාරණය සලකා බලන්න. පෙනෙනාකාරයට දේව අපහාසිකයෙකු ලෙස මිය යාම ගැන සංවේගයට පත් යේසුස් වහන්සේ යාච්ඤා කළේ මෙසේ ය: “පියාණෙනි, ඔබ කැමතිසේක් නම්, මේ කුසලාන මාගෙන් පහකළ මැනව.” මෙම යාච්ඤාව අනුග්‍රහාත්මක ලෙස අසනු ලැබී ද? එසේ ය, හෙබ්‍රෙව් 5:7 හි තහවුරු කරන පරිදි, වධ කණුවක් මත මැරෙන්නට තිබූ අවශ්‍යතාවයෙන් යෙහෝවඃ වහන්සේ ස්වකීය පුත්‍රයාණන් ව නිදහස් නොකළ සේක. ඒ වෙනුවට, “ස්වර්ගයෙන් දේවදූතයෙක් උන්වහන්සේට පෙනී, උන්වහන්සේ ශක්තිමත්කළේය.”—ලූක් 22:42, 43.
චමත්කාරජනක, ආශ්චර්යවත් පිළිතුරක් ද? අපගෙන් ඕනෑ ම කෙනෙකුට නම්, එය එසේ වනු ඇත! එහෙත් එවන් බලයේ උල්පත වන, යෙහෝවඃ දෙවියන් වහන්සේට, එය ආශ්චර්යක් වූයේ නැත. තව ද යේසුස් වහන්සේ ස්වර්ගයේ වූ පෙර ජීවිතයෙන්, දේව දූතයන් මිනිසුන්ට ප්‍රකාශ වූ අතීත අවස්ථාවන් ගැන හොඳින් දැන සිටි සේක. එබැවින් දේව දූතයෙකුගේ ප්‍රකාශ වීම, අප කෙරෙහි ඇති කරවිය හැකි චමත්කාරජනක බලපෑම උන් වහන්සේ කෙරෙහි ඇති කළේ නැත. එහෙත්, යේසුස් වහන්සේ සිය පූර්ව මිනිස් පැවැත්මේ සිට පෙනෙන හැටියට පුද්ගලික ව දැන සිටි මෙම දේව දූතයා, තමන් ඉදිරියේ ඇති බලවත් පරීක්ෂණය සඳහා ශක්තිමත්වීමට උන් වහන්සේට උපකාර කළේ ය.
අද දින ස්වකීය ඇදහිලිවන්ත සේවකයන්ගේ යාච්ඤාවන්ට පිළිතුරු දීමේ දී, යෙහෝවඃ වහන්සේ නිතර විඳදරා ගැනීමට අවශ්‍ය ශක්තිය දෙන සේක. මෙම අනුබලය, අප පුද්ගලික ව ඇසුරු කරන සෙසු නමස්කාරකයන්ගෙන් ලැබෙන දිරිගැන්වීමක ආකාරයෙන් පැමිණිය හැකි ය. අපගේ සෙසු සේවකයන් අපට තිබෙන බලවත් පරීක්ෂාවන් හා සමාන ඒවා අත්දැක නොමැති බැවින්, ඔවුන් අප ව ශක්තිමත් කිරීමට සුදුසු තත්ත්වයක නොසිටී යයි සමහරවිට නිගමනය කරමින්, එම දිරිගැන්වීම ප්‍රතික්ෂේප කරන්නට අපගෙන් යමෙකුට ඕනෑ වේ ද? තමන්ට දර්ශනය වූ දේව දූතයා සම්බන්ධයෙන් එවන් අදහසක් දරන්නට යේසුස් වහන්සේ හට ඉඩ තිබුණි. එසේ නොව, සිය යාච්ඤාවට යෙහෝවඃ වහන්සේගේ පිළිතුර ලෙස උන් වහන්සේ එම දිරිගැන්වීම පිළිගත් අතර, එමගින් ඇදහිලිවන්ත ව සිය පියාණන්ගේ කැමැත්ත ඉෂ්ට කිරීමට හැකියාව ඇතුව සිටි සේක. අපගේ යාච්ඤාවන්ට පිළිතුරු වශයෙන් දෙවියන් වහන්සේ දෙන්නා වූ ශක්තිය කරුණාභරිත ව පිළිගැනීමට අපට ද වුවමනා වනු ඇත. තව ද, ඉවසිලිවන්ත ව විඳදරා ගැනීමේ එවන් කාල පරිච්ඡේදයන්ගෙන් පසු, බොහෝ විට කිව නොහැකි තරම් ආශීර්වාදයන් ලැබෙන බව ද මතක තබා ගන්න.—දේශනාකාරයා 11:6; යාකොබ් 5:11.
දෙවියන් වහන්සේ සවන් දෙන බවට නිසැක වන්න
ඔබට ක්ෂණික ව පිළිතුරු නොලැබුණ ද, යාච්ඤාවෙහි බලපෑමෙන් යුක්ත භාවය කෙරෙහි ඔබගේ නිසැකකම නැති කර නොගන්න. පීඩාවලින් හෝ දෙවියන් වහන්සේට වූ යමෙකුගේ සේවයේ වැඩිමනත් වගකීම් යනාදියෙන් පුද්ගලික සහනය උදෙසා කෙරෙන යාච්ඤා වැනි, ඇතැම් යාච්ඤාවන්ට පිළිතුරු සඳහා, දෙවියන් වහන්සේ සුදුසු හා වඩාත් හොඳ යයි දන්නා අවස්ථාව එන තෙක් බලා සිටින්නට සිදුවෙනවා විය හැකි ය. (ලූක් 18:7, 8; 1 පේතෘස් 5:6) පුද්ගලික ව ඔබගේ ගැඹුරු සැලකිල්ලට භාජනය වී තිබෙන කරුණක් සම්බන්ධයෙන් යාච්ඤා කරමින් සිටින්නේ නම්, ඔබගේ ආශාව තියුණු එකක් බවත්, ඔබගේ චේතනාව නිර්මල හා අව්‍යාජ බවත් නොකඩවා කන්නලව් කිරීම මගින් දෙවියන් වහන්සේට පෙන්වන්න. දේව දූතයෙක් සමඟ දීර්ඝ පොරබැදීමකින් පසු: “ඔබ මට ආශීර්වාදකළොත් මිස නැත්නම් යන්ට නොහරිමි” යයි යාකොබ් පැවසූ විට, ඔහු මෙම ස්වභාවය විදහා පෙන්වී ය. (උත්පත්ති 32:24-32) අපත් නොනවත්වා ඉල්ලා සිටින්නේ නම්, අපට සුදුසු කාලයේ දී ආශීර්වාදයක් ලැබෙනු ඇති බවට, ඒ හා සමාන නිසැකකමක් අප තුළ තිබිය යුතු ය.—ලූක් 11:9.
අන්තිම වශයෙන් කල්පනාවට ගත යුතු දෙයක් මෙන්න. විශ්වයේ පරමාධිපතියාණන් විසින් අසනු ලැබීම අනර්ඝ වරප්‍රසාදයකි. මේ අනුව කල්පනා කරන කල, යෙහෝවඃ වහන්සේ, ස්වකීය වචනය තුළින් උන් වහන්සේගේ අවශ්‍යතා ගැන අපට කථා කිරීමේ දී අපි සැලකිල්ලෙන් සවන් දෙන්නෙමු ද? අපගේ යාච්ඤාවන් අපගේ මැවුම්කරුවාණන් වෙත වඩාත් කුළුපග අයුරින් ළං කරවනවාත් සමඟ ම, උන් වහන්සේට අප හට පැවසීමට ඇති සෑම දෙයකට ම දැඩි අවධානයක් යොමු කිරීමට අපට වුවමනා වනු ඇත. w92 4/15
දෙවියන් වහන්සේ යාච්ඤාවලට සවන් දෙන සේක. අපි උන් වහන්සේගේ වචනය තුළින් උන් වහන්සේට සවන් දෙන්නෙමු ද?