‘ඔබගේ දියුණු වීම පැහැදිලි ව පෙනීමට සලස්වන්න’
“දැන් මම වැඩි වයසට පැමිණ සිටින බැවින් බාලයාගේ දේවල් අත්හැර සිටිමි.”—1 කොරින්ති 13:11.
1. වැඩීම, මැවීමේ පුදුමවලට සාක්ෂියක් වනුයේ කෙසේ ද?
අන්වීක්ෂයකින් පමණක් දැකිය හැකි තරම් කුඩා බිජුවකින් නික්මෙන තල්මසෙක් අඩි සියයකට වඩා දිගැති එමෙන් ම ටොන් 80කට වඩා බරැති සත්ත්වයෙක් බවට වර්ධනය විය හැකි ය. ඒ හා සමාන ව, කුඩා ම වූ එක් ඇට වර්ගයකින් අඩි 300කට වඩා උසැති අතිවිශාල වූ සික්වොයර් ගසක් වැඩෙන්නට පුළුවන. සැබවින් ම, වැඩීම ජීවිතයේ පුදුමවලින් එකකි. ප්‍රේරිත පාවුල් එය ඉදිරිපත් කළ ආකාරයට, අපට සිටුවා වතුර වත් කළ හැකි වුවත්, ‘වර්ධනය දෙන්නේ දෙවියන් වහන්සේ ය.’—1 කොරින්ති 3:7.
2. බයිබලයේ පුරෝකථනය කරනු ලැබුවේ කුමන ආකාරයේ වර්ධනයක් ද?
2 කෙසේ වුවද, ඒ හා සමාන ව ම මවිතයට පත් කරවන තවත් ආකාරයක වැඩීමක් තිබේ. එය වනාහි අනාගතවක්තෘ යෙසායා විසින් පුරෝකථනය කරන ලද්දකි: “කුඩා තැනැත්තා දහසක්ද සුළු තැනැත්තා බලවත් ජාතියක්ද වන්නේය. ස්වාමිවූ [යෙහෝවඃ වූ NW] මම ඒකේ නියම කලට ඒක ඉක්මන් කරන්නෙමි.” (යෙසායා 60:22) මෙම අනාගත වාක්‍යය දෙවියන් වහන්සේගේ ජනයාගේ වර්ධනය හා සම්බන්ධ වන අතර එය අපගේ දවසේ ප්‍රබල ලෙස ඉටුවෙමින් තිබේ.
3. යෙහෝවඃ වහන්සේ ස්වකීය ජනයාගේ කටයුතු වේගවත් කරන බව 1991 සේවා වසර සඳහා වූ වාර්තාව පෙන්වූයේ කෙසේ ද?
3 යෙහෝවඃ වහන්සේගේ සාක්ෂිකරුවන්ගේ ලෝක ව්‍යාප්ත ක්‍රියාකාරකම් පිළිබඳ ව 1991 සේවා වසර සඳහා වූ වාර්තාවේ දක්වන්නේ රාජ්‍යය ප්‍රචාරකයන් සංඛ්‍යාව 42,78,820ක නව ඉහළ සංඛ්‍යාවක් කරා එළඹුණු බවත් එම වසර තුළ සමස්තයක් වශයෙන් 3,00,945 දෙනෙක් බව්තීස්ම කරන ලද බවත් ය. මෙතරම් නවකයන් සංඛ්‍යාවක් ඇදී ඒමත් සමඟ, ඊට අනුරූප වූ අලුත් චාරිකාවන් හා දිස්ත්‍රික්කයන් සංඛ්‍යාවක් සමඟින්, අලුත් සභාවන් 3,191ක් පිහිටුවන ලදි. එය දවසකට අලුත් සභාවන් අටකට වැඩි සංඛ්‍යාවක්, සෑම දවස් දෙකකට ම වරක් අලුත් චාරිකාවක් පිහිටුවනවා තරම් ය. කොතරම් විස්මිත වර්ධනයක් ද! යෙහෝවඃ වහන්සේ කටයුතු වේගවත් කරන බවත්, උන් වහන්සේගේ ජනයාගේ ප්‍රයත්නයන්ට උන් වහන්සේ ආශීර්වාද කොට තිබෙන බවත් පැහැදිලි ය.—ගීතාවලිය 127:1.
තමා ව ම පරීක්ෂා කර ගැනීමට කාලයකි
4. අප අනාගතය දෙස බලත් ම සලකා බැලිය යුත්තේ කිනම් ප්‍රශ්න ද?
4 මෙය දැකීම හද උණුසුම් කරවන දෙයක් වුවත්, මෙම ආශීර්වාදයත් සමඟ ම එක්තරා වගකීම් ද ගෙන එයි. මේ සියලු නවකයන්ගේ ආත්මික අවශ්‍යතා බලා ගැනීමට මේරූ හා කැමැත්තෙන් ඉදිරිපත් වන අය සිටිනු ඇත් ද? අප ඉදිරි අනාගතය දෙස බලන විට, වර්ධනය හා ව්‍යාප්තිය සඳහා සැලකිල්ල දැක්වීමට අවශ්‍ය වනු ඇති පුරෝගාමින්, උපස්ථායක සේවකයන්, වැඩිමහල්ලන්, හා සංචාරක අවේක්ෂකයන් සංඛ්‍යාවත්, එම කටයුත්තට සහයෝගය දැක්වීම සඳහා ලොවවටා ශාඛා කාර්යාලවලට හා බෙතෙල් නිවාසවලට අවශ්‍ය වන්නා වූ ස්වේච්ඡා සේවකයන් සංඛ්‍යාවත් ගැන සිතන විට, එය මහත් විස්මයට පත් කරවන්නකි. මෙම අතිවිශාල ජන සංඛ්‍යාව පැමිණෙනු ඇත්තේ කොතැන් සිට ද? එක්රැස් කරනු ලබන අස්වැන්න අති විශාල බවට කිසි ම සැකයක් නැත. එහෙත් එම අස්වැන්න නෙලීමට අවශ්‍ය කරන සියලු සේවකයන්ට සැලකිල්ලක් දැක්විය හැකි තත්ත්වයක අද දින සිටින්නේ කවරහු ද?—මතෙව් 9:37, 38.
5. වේගවත් වර්ධනය නිසා ඇතැම් ප්‍රදේශවල කිනම් තත්ත්වයන් පවතී ද?
5 උදාහරණයක් වශයෙන්, ලෝකයේ සමහරක් ප්‍රදේශවල, උපස්ථායක සේවකයන් එක්කෙනෙක් හෝ දෙදෙනෙක් සමඟ වැඩිමහල්ලන් එක් කෙනෙකුගෙන් සේවය ලබන, රාජ්‍යය ප්‍රචාරකයන් සියයක් පමණ සිටින සභාවන් තිබෙන බව වාර්තා වී ඇත. ඇතැම් අවස්ථාවල එක් වැඩිමහල්ලෙකුට සභාවන් දෙකක සේවය කිරීමට සිදුවේ. වෙනත් තැන්වල නිවාස බයිබල් පාඩම් පැවැත්වීමට සුදුසුකම් ලත් ක්‍රිස්තියානි දේව සේවකයන්ගේ අවශ්‍යතාව කොතරම් මහත් ද කියතොත් තමන් සමඟ පාඩම් කිරීමට යමෙක් එනතුරු බලා සිටින්නට නවකයන් හට සිදු වී තිබේ. වෙනත් ප්‍රදේශවල, කොතරම් වේගයෙන් නව සභාවන් පිහිටු වනු ලබන්නේදයත්, සභාවන් තුනකට, හතරකට, හෝ පහකට පවා එක් රාජ්‍යය ශාලාවක් හවුලේ බෙදා ගැනීමට සිදු වී ඇත. ඇතැම් විට ඔබ, ඔබගේ ම ප්‍රදේශයේ මෙවැනි වර්ධනයක් අත්දැක තිබෙන්නට පුළුවන.
6. අපගේ පැත්තෙන් ආත්ම පරීක්ෂණයක් කර බැලීම කාලෝචිත වනුයේ මන්ද?
6 ඉහත සඳහන් වූ දෙයින් අපට කුමක් පැවසෙයි ද? අවශ්‍යතාවයට අනුව ප්‍රතිචාරය දක්වනු සඳහා අප අපගේ කාලය හා වත්කම් වඩාත් ම හොඳින් පාවිච්චි කරනවා දැයි බැලීමට අප සියල්ලන් ම අපගේ තත්ත්වය පරීක්ෂා කර බැලිය යුතු ය. (එපීස 5:15-17) ප්‍රේරිත පාවුල් පළමු සියවසේ හෙබ්‍රෙව් ක්‍රිස්තියානින්ට මෙසේ ලිව්වේ ය: “මක්නිසාද [ඇත්ත වශයෙන් ම NW] කාලයේ ප්‍රකාරයට නුඹලා ගුරුවරයෝව සිටින්ට යුතුව තිබියදීත්, දෙවියන්වහන්සේගේ වාක්‍යවල මුල් ගුරුකම් නැවත යමෙකු විසින් නුඹලාට උගන්වන්ට ඕනෑව තිබේ; නුඹලා දැඩි ආහාර නොව කිරි ඕනෑකරන අයව සිටින්නෝය.” (හෙබ්‍රෙව් 5:12) එම වදන් අඟවන පරිදි, ක්‍රිස්තියානින් පුද්ගලික ව ද වර්ධනය විය යුතු ය. තව ද යමෙක් ක්‍රිස්තියානි මේරූ භාවය දක්වා වර්ධනය වෙනවා වෙනුවට ආත්මික ළදරු භාවය තුළ ගාටමින් සිටීමේ සැබෑ අන්තරායක් ද තිබෙන්නට පුළුවන. මීට එකඟ ව පාවුල් අපෙන් උදක් ම ඉල්ලා සිටින්නේ මෙසේ ය: “ඔබ ඇදහිල්ලේ පවතිනවා ද කියා ඔබ ම සෝදිසි කරමින් සිටින්න; ඔබ කුමන අයදැයි කියා ඔප්පු කරමින් සිටින්න.” (2 කොරින්ති 13:5, NW) ඔබ බව්තීස්මය ලැබූ කාලයේ පටන් ආත්මික ව වර්ධනය වෙමින් සිටිනවාදැයි බැලීමට ඔබ ඔබ ව ම පරීක්ෂා කර තිබේ ද? එසේත් නැතහොත් ඔබ එක තැන ම සිටගෙන සිටිනවා ද? එනමුත් යමෙකුට එය පැවසිය හැක්කේ කෙසේ ද?
“ළදරුවෙකුගේ ගති ලක්ෂණ”
7. ආත්මික දියුණුව පැහැදිලි ව පෙනීයාමට නම්, අප කුමක් කළ යුතු ද?
7 “මම ළදරුවෙකු ව සිටිය කල ළදරුවෙකු මෙන් කථා කෙළෙමි, ළදරුවෙකු මෙන් සිතුවෙමි, ළදරුවෙකු මෙන් තර්ක කෙළෙමි. දැන් මම මනුෂ්‍යයෙකු බවට පත් වී ඇති බැවින් ළදරුවෙකුගේ ගති ලක්ෂණ අත්හැර සිටිමි” යයි ප්‍රේරිත පාවුල් පැවසී ය. (1 කොරින්ති 13:11, NW) ආත්මික වර්ධනය සම්බන්ධයෙන් ගත් කල, අපි සියල්ලන් ම එක් කලෙක සිතිවිලි හා ක්‍රියාවන්ගෙන් ළදරුවන් මෙන් සිටියෙමු. කෙසේ වෙතත්, වැඩි දියුණුව පැහැදිලි ව පෙන්වනු පිණිස, පාවුල් පැවසූ පරිදි, “ළදරුවෙකුගේ ගති ලක්ෂණ” අප අත් හළ යුතු ය. මෙම ගති ලක්ෂණ සමහරක් මොනවා ද?
8. හෙබ්‍රෙව් 5:13, 14 හි පාවුල්ගේ වදන්වලට අනුව, ආත්මික ළදරුවෙකුගේ එක් ගති ලක්ෂණයක් කුමක් ද?
8 පළමු ව, හෙබ්‍රෙව් 5:13, 14 හි පාවුල්ගේ වදන් සැලකිල්ලට ගන්න: “කිරි බොන සෑමදෙනම ළදරුවන් බැවින් ඔව්හු ධර්මිෂ්ඨකමේ වචනය ගැන අසමර්ථව සිටිති. නුමුත් දැඩි ආහාර ඕනෑවන්නේ යහපත සහ අයහපත විමසාබලන්ට [හරි දේ සහ වැරදි දේ අතර වෙනස වටහා ගන්ට NW ] ව්‍යවහාරයෙන් පුරුදු පුහුණුවූ ඉන්ද්‍රියයන් ඇති, සම්පූර්ණ වූ තැනැත්තන්ටය.” ඔබ ‘ධර්මිෂ්ඨකමේ වචනය ගැන සමර්ථ ව’ සිටින්නෙහි ද? “හරි දේ සහ වැරදි දේ අතර වෙනස වටහා ගන්ට” දේව වචනය වන, බයිබලය, පාවිච්චි කිරීමට හැකියාව ඇති තරමින්, ඔබ එය හොඳින් දන්නෙහි ද? මේරූ අය නිති පතා “දැඩි ආහාර” ගන්නා බැවින්, ඔවුන්ට එසේ කිරීමට හැකියාවක් ඇතැයි පාවුල් පැවසී ය. මෙසේ, දැඩි ආත්මික ආහාර සඳහා යමෙකුගේ ආශාව නැතහොත් රුචිය, යමෙකු ආත්මික ව වර්ධනය වී සිටින්නේ ද නැතහොත් තවදුරටත් ආත්මික ළදරුවෙකු ව සිටින්නේ ද පිළිබඳ හොඳ දර්ශකයකි.
9. කෙනෙකුගේ ආත්මික රුචිය ඔහුගේ ආත්මික ප්‍රගතියේ දර්ශකයක් විය හැක්කේ කෙසේ ද?
9 එසේ නම්, ඔබගේ ආත්මික රුචිය කොයි ආකාර ද? යෙහෝවඃ වහන්සේ නිති පතා සපයන බයිබලය මත පදනම් ප්‍රකාශන, ක්‍රිස්තියානි රැස්වීම් හා සමුළු මගින් සපයන මහත් ආත්මික ආහාර ඔබ සලකන්නේ කෙසේ ද? (යෙසායා 65:13) වාර්ෂික දිස්ත්‍රික්ක සමුළුවල දී අලුත් ප්‍රකාශන මුදා හරිනු ලබන විට ඔබ මහත් සේ ප්‍රීතිමත් වනු නිසැක ය. එහෙත් ඔබ ගෙදර ගිය විට ඒවායින් කරන්නේ කුමක් ද? මුරටැඹ හෝ පිබිදෙව්! සඟරාවේ අලුත් කලාපයක් ලැබුනු විට, ඔබ කරන්නේ කුමක් ද? ඔබ මෙම ප්‍රකාශන කියවීමට කාලය වැය කරනවා ද, නැතහොත් එහි මූලික කරුණු බැලීමට අතරින් පතර කියවා පසු ව ඔබගේ පොත් රාක්කයේ පොත් ගොඩට එකතු කරනවා ද? ක්‍රිස්තියානි රැස්වීම් ගැන ද ඒ හා සමාන ප්‍රශ්න නැගිය හැකි ය. ඔබ නිති පතා සියලු ම රැස්වීම්වලට පැමිණෙනවා ද? ඔබ ඒවාට සූදානම් වී, ඒවාට සහභාගි වෙනවා ද? සමහරෙකු දුර්වල ආත්මික පෝෂණ පුරුදුවලට වැටී, උඩින් පල්ලෙන් හා වේගයෙන් කියවීමට පුරුදු වී තිබෙන බවට පෙනී යයි. “ඔබගේ ව්‍යවස්ථාවට මම කොපමණ ප්‍රේමකරම්ද! දවස මුළුල්ලේම ඒක මාගේ භාවනාවය” යයි පැවසූ, ගීතිකාකරු පිළිබඳ ව මෙය කොතරම් වෙනස් වී ද! දාවිත් රජ, තවදුරටත් මෙසේ පැවසී ය: “මහත් සභාවේදී ඔබට ස්තුතිකරන්නෙමි [වර්ණනාකරන්නෙමි NW]. බොහෝ සෙනග අතරේ ඔබට ප්‍රශංසා කරන්නෙමි.” (ගීතාවලිය 35:18; 119:97) පැහැදිලි ව ම, අප ආත්මික සැපයුම් අගය කරන තරම අපගේ ආත්මික ප්‍රගතියේ දර්ශකයකි.
10. එපීස 4:14 හි සඳහන් කර ඇත්තේ ආත්මික ළදරුවෙකුගේ කිනම් ගති ලක්ෂණයක් ද?
10 පාවුල් මෙසේ අනතුරු ඇඟ වූ විට, ආත්මික ළදරුවෙකුගේ තවත් ගති ලක්ෂණයක් හුවා දැක්වී ය: “අපි තවත් මනුෂ්‍යයන්ගේ වංචාවෙන්ද ප්‍රයෝගයෙන් ද මුළා කරන සුලු උපායෙන් ද හටගන්නා, සියලු ආකාර ඉගැන්වීම් නමැති සුළඟින් ඔබමොබ විසි වෙන, තරඟවලින් ගසාගෙන යන බාලයෝ නොවෙමු.” (එපීස 4:14, නව අනුවාදය) මව්පියන් හොඳින් දන්නා පරිදි, දරුවෝ සෑම දෙයක් ගැන ම කුතුහලයක් දක්වති. මෙය ඔවුන්ට සමීක්ෂණය කිරීමටත්, ඉගෙන ගැනීමටත්, එසේ මේරූ තැනැත්තෙක් බවට ක්‍රමයෙන් වර්ධනය වීමටත් හැකියාව ලබා දෙන බැවින්, එක් ආකාරයකින් මෙය ඒකාන්ත ගති ලක්ෂණයකි. කෙසේ වෙතත්, ඔවුන් එකකින් තව එකකට පහසුවෙන් ම සිත ඇදී යාමේ අන්තරායක ද පවතී. මෙහි තිබෙන වඩාත් නපුරු දේ නම්, එතරම් අත්දැකීම් නොමැතිකම නිසා, මෙම කුතුහලය තමන්වත් අන්‍යයන්වත් අනතුරට පවා පත්කරමින්, බොහෝ විට ඔවුන් ව බරපතළ කරදරවලට මඟ පෙන්වීම ය. මෙය ආත්මික ළදරුවන් සම්බන්ධයෙන් ද සැබෑවක් වෙයි.
11. (අ) “සියලු ආකාර ඉගැන්වීම් නමැති සුළඟින්” යන වදන් පාවිච්චි කිරීමේ දී පාවුල්ගේ මනසේ තිබුණේ කුමක් ද? (ආ) අද දින අප මුහුණ දෙනුයේ කිනම් ආකාරයේ ‘සුළංවලට’ ද?
11 කෙසේ වෙතත්, ආත්මික ළදරුවන් “සියලු ආකාර ඉගැන්වීම් නමැති සුළඟින්” ඔබ මොබ විසිවෙන බව පාවුල් පැවසූ විට, ඔහුගේ මනසේ තිබුණේ කුමක් ද? මෙහි “සුළඟින්” යන වදන ඇʹනී·මොස් යන ග්‍රීක් වදනෙන් පරිවර්තනය කරනු ලැබ ඇති අතර, මේ සම්බන්ධයෙන් ඉන්ටනැෂනල් ක්‍රිටිකල් කොමෙන්ට්‍රි නිරීක්ෂණය කරන්නේ, පෙනෙන හැටියට “වෙනස්වන්නේ ය යන අදහසට ගැලපෙන නිසා එය තෝරාගෙන” ඇති බව ය. මෙය “මනුෂ්‍යයන්ගේ වංචාවෙන්” යන පාවුල්ගේ ඊළඟ වදන්වලින් හොඳින් පැහැදිලි වේ. “වංචාවෙන්” යන වදන මුල් භාෂාවේ හැටියට “දාදුව” හෙවත් “දාදු සෙල්ලම” මූලික ව අදහස් කරයි, එනම් වාසියක් ගෙන දෙන සෙල්ලමක් මෙයට අයත් වේ. මෙහිලා මූලික කරුණ වනුයේ අප නිතර හානිදායක නොවන, ආශා උපදවන, ඇතැම් විට ප්‍රයෝජනවත් වීමට පවා ඉඩ ඇති විය හැකි නව අදහස් හා ලුහුබැඳීම්වලට මුහුණ දෙන බව ය. පාවුල්ගේ වදන් මූලික ව අදාළ වන්නේ, අපගේ ඇදහිල්ලට සම්බන්ධ කාරණාවලට ය—එනම්, පල්ලි අතර ලෝක ව්‍යාප්ත එක්සත් භාවයට පොලඹවන සංවිධානාත්මක වෑයම්, සමාජ හා දේශපාලන ප්‍රයත්න හා එවැනි දෑවලට ය. (1 යොහන් 4:1 සසඳන්න.) එහෙත් මෙහි ප්‍රතිපත්තිය ලෝකයේ නොකඩවා වෙනස් වන්නා වූ ආකර්ෂණයන් හා විලාසිතා—එනම් මෝස්තර, විනෝදාංශ, ආහාර, සෞඛ්‍ය හෝ ව්‍යායාම ක්‍රම, යනාදිය—සම්බන්ධයන් ද සැබෑ වේ. අත්දැකීම් හා හොඳ විනිශ්චයේ ඌනතාවයකින් පෙලෙන නිසා, ආත්මික ළදරුවා ව මෙවන් දේවල් මගින් පමණට වඩා වැඩියෙන් වෙනතකට යොමු වීම, එනයින් ආත්මික වර්ධනයක් ලැබීමෙන් හා තමාගේ වඩාත් වැදගත් ක්‍රිස්තියානි යුතුකම් ඉෂ්ට කිරීමෙන් පවා වළක්වනු ලැබිය හැකි ය.—මතෙව් 6:22-25.
12. වගකීම් සම්බන්ධයෙන් බාලයන් වැඩිහිටි අයගෙන් වෙනස් වන්නේ කෙසේ ද?
12 බාල දරුවන්ගේ තවත් ගති ලක්ෂණයක් නම්, උපකාරය හා අවධානය සඳහා නිතර ම අවශ්‍යතාවයකින් සිටීම ය. ඔවුන් වගකීම් ගැන දැනුම් තේරුම් ඇති ව සිටින්නේවත් හෝ ඒවාට සැලකිල්ල දක්වන්නේවත් නැත; ළමා විය යනු සියලු දේවල් හුදු විනෝදයක් හා සෙල්ලමක් ව පවතින කාල පරිච්ඡේදයකි. පාවුල් එය සඳහන් කළ ආකාරයට, ඔවුහු ‘බාලයෙකු මෙන් කථා කරති, බාලයෙකු මෙන් සිතති, බාලයෙකු මෙන් තර්ක කරති.’ අන් අය ඔවුනට සැලකිල්ල හා උපකාරය දක්වා වී යයි ඔවුහු දේවල් ගැන සැහැල්ලුවට සිතති. ආත්මික ළදරුවන් ගැන ද කිව හැක්කේ එය ම ය. නවකයෙක් සිය පළමු බයිබල් කථාව ඉදිරිපත් කරන විට, හෝ පළමු වතාවට ක්ෂේත්‍ර සේවයේ යන විට, උපකාර කිරීමට හැකි සැමෙකක් ම කිරීමට එම තැනැත්තාගේ ආත්මික දෙමාපියා ඉතා ප්‍රීතියෙන් සිටී. එහෙත් එම නවකයා එවන් උපකාරය කෙරෙහි දිගට ම රැඳී සිටිමින් තමා ම තම දේවල් ගැන සැලකිල්ල දැක්වීමේ වගකීම භාර ගැනීමට නොහැකි බව ඔප්පු කරන්නේ නම් කුමක් සිදු වෙයි ද? පැහැදිලි ව ම ඉන් අඟවන්නේ තමා සම්බන්ධයෙන් වෙහෙස මහන්සි වීමට අපොහොසත් වීමයි.
13. සෑම කෙනෙක් ම තමාගේ බර ඉසිලීමට ඉගෙන ගත යුත්තේ මන්ද?
13 අප “එකිනෙකාගේ බර උසුලා” ගත යුතු වුවත්, තවදුරටත් “එකිනෙකා තම තමාගේ බර” ඉසිලිය යුතු බවට වූ පාවුල්ගේ අවවාදය, මේ සම්බන්ධයෙන් මතකයට නගන්න. (ගලාති 6:2, 5) ඇත්ත වශයෙන් ම, කෙනෙකු තමාගේ ක්‍රිස්තියානි වගකීම් ඉසිලීමට ඉගෙන ගැනීමට යම් කාලයක් ගත විය හැකි අතර, ඇතැම් ක්ෂේත්‍රයන්හි පරිත්‍යාගයන් කිරීම මින් අදහස් කළ හැකි ය. කෙසේ වුවත්, සරල ව කියතොත්, විනෝදාස්වාදයේ හෝ වේවා, ගමන් බිමන්වල හෝ වේවා, සුඛෝපභෝගි භාණ්ඩ ලබා ගැනීමේ හෝ වේවා, නැතහොත් ලෞකික රැකියාව නුවමනා අයුරින් ලුහුබැඳීම් හෝ වේවා ජීවිතයේ විනෝදයන් හා ක්‍රිඩාවන්හි පමණ ඉක්මවා නියැලීමට තමාට ඉඩ හරිමින්, යමෙක් හරියට ඉවුර අද්දර සිට ගෙන සිටින්නෙකු මෙන්, ගෝලයන් සෑදීමේ කටයුත්තට තමාගේ සහභාගිත්වය වැඩිකර ගැනීමට හෝ ආත්මික දියුණුව හා වගකීම් අත්කර ගැනීමට වෙර දැරීමට, කිසි ආශාවක් නොමැති ව සිටීම බරපතළ වැරැද්දක් වනු ඇත. “නුඹලාම [බොරු තර්කවලින් තමන් ව ම NW] රවටා ගනිමින් වචනය අසන්නෝ පමණක් නොවී එය පිළිපදින්නෝ වෙයල්ලා” යයි ශ්‍රාවක යාකොබ් උදක් ම ඉල්ලා සිටියේ ය.—යාකොබ් 1:22; 1 කොරින්ති 16:13.
14. ආත්මික ළදරුවෙකුගේ ගති ලක්ෂණ දිගට ම විදහා පෙන්වීමේ දී අප තෘප්තියට පත් නොවිය යුත්තේ මන්ද?
14 එසේ ය, දරුවෙකු ව වැඩිහිටියෙකුගෙන් වෙන්කොට දක්වන, පැහැදිලි ව තේරුම් ගත හැකි ගති ලක්ෂණ බොහොමයක් ඇත. කෙසේ වෙතත්, මෙහි වැදගත් දෙය නම්, පාවුල් සඳහන් කළ ආකාරයට, අප වැඩෙනවාත් සමඟ ම ළදරුවෙකුගේ ගති ලක්ෂණ ක්‍රමයෙන් අත්හැරීමයි. (1 කොරින්ති 13:11; 14:20) එසේ නොවේ නම්, අප ආත්මික අර්ථයකින් මන්ද බුද්ධික බවට පත්වන්නට පුළුවන. එහෙත් කෙනෙකුට ප්‍රගතියක් ලබා ගත හැක්කේ කෙසේ ද? මේරූ භාවය කරා ආත්මික වර්ධනයක් පවත්වා ගැනීමට කුමක් අයත් වේ ද?
දියුණු වීම පැහැදිලි ව දිස්වෙන අයුරු
15. වැඩීමේ ක්‍රියාවලියේ මූලික පියවරවල් මොනවා ද?
15 හොඳයි, ස්වභාවික ලෝකයේ වැඩීම සිදුවනුයේ කෙසේ ද? “සෑම පුද්ගලයෙක් ම තනි සෛලයක් ලෙස ජීවිතය ආරම්භ කරයි” යනුවෙන් ද වර්ල්ඩ් බුක් එන්සයික්ලෝපීඩියා පැහැදිලි කරයි. “එම සෛලය ද්‍රව්‍යයන් ලබාගෙන වර්ධනය වීම සඳහා ඊට අවශ්‍ය කරන ගොඩනැගිලි ගල් බවට ඒවා පරිවර්තනය කරයි. මෙසේ, එම තනි සෛලය වර්ධනය වන්නේ අභ්‍යන්තරය තුළින් ම ය. වෙනත් සෛල සකස් කිරීම සඳහා මෙම සෛලයට ගණනින් වැඩි වී බෙදී යා හැකි ය. වර්ධනය යනු ගොඩනැගීමේ, ගණනින් වැඩි වීමේ, හා බෙදී යාමේ ක්‍රියාවලිය ය.” මෙහිලා සටහන් කර ගත යුතු කරුණ වනුයේ, වර්ධනය සිදු වන්නේ අභ්‍යන්තරය තුළින් ම වීමයි. නිසි පෝෂණය ලබා, අවශෝෂණය කර, එය උපයෝගි කර ගනු ලැබූ විට, ඉන් ප්‍රතිඵල වන්නේ වර්ධනයයි. මෙය අලුත උපන් බිළිඳෙකු සම්බන්ධයෙන් පැහැදිලි ව දැකිය හැකි ය. අප දන්නා පරිදි, අලුත උපන් බිළිඳෙක් වර්ධනයට අවශ්‍ය කරන ද්‍රව්‍යයන් වන, මේද හා ප්‍රෝටීන්වලින් වැඩි, විශේෂ ආකාරයකට සකසන ලද ආහාරයක් වන, කිරිවල අඛණ්ඩ සැපයුමක් ලබා ගනී. මෙහි ප්‍රතිඵලය? පළමු වසර තුළ බර හා උස අතින් ළදරුවෙක් ලබන්නා වූ වර්ධනය ගත් කල, තමාගේ ජීවිතයේ ඉතිරි කාල පරිච්ඡේදයේ වෙනත් ඕනෑ ම වසරක සාමාන්‍ය වර්ධනයට කොහෙත් ම සම කළ නොහැක.
16. අලුත් බයිබල් ශිෂ්‍යයන් බොහෝ දෙනෙකු තුළ දක්නට ලැබෙන්නේ කුමන ආකාරයේ වැඩීමක් ද, එමෙන් ම ඊට හැකියාවක් ලැබෙන්නේ කෙසේ ද?
16 අපගේ ආත්මික වර්ධනයේ මුල සිට ම මේරූ භාවය දක්වා අදාළ කර ගත හැකි බොහෝ දෑ, වැඩීම පිළිබඳ මෙම ස්වභාවික ක්‍රියාවලියෙන් අපට ඉගෙන ගත හැකි ය. සියල්ලට ම පෙර, ස්ථිර පෝෂණ වැඩසටහනක් අත්‍යවශ්‍ය ය. ඔබ මුලින් ම බයිබලය ඉගෙන ගැනීමට පටන් ගත් කාලය ගැන කල්පනා කර බලන්න. ඔබ වෙනත් බොහෝ දෙනෙක් හා සමාන ව සිටින්නේ නම්, සමහරවිට ඔබ දේව වචනය ගැන ඇත්ත වශයෙන් ම කිසිවක් දැන නොසිටින්නට ඇත. එහෙත් සතියෙන් සතිය ඔබ ඔබගේ පාඩමට සූදානම් වී ඔබගේ බයිබල් පාඩම කළ අතර, සාපේක්ෂිත ව කෙටි කාලයක් තුළ, ඔබ ශුද්ධ ලියවිල්ලේ සියලු මූලික ඉගැන්වීම් අවබෝධ කර ගත්තෙහි ය. මෙය අතිවිශාල වර්ධනයක් බව ඔබ පිළිගත යුතු අතර, මේ සියල්ල සිදුවූයේ, නිති පතා දේව වචනයෙන් පෝෂණය වීමේ ප්‍රතිඵලයක් වශයෙනි!
17. නිති පතා ආත්මික පෝෂණ වැඩසටහනක් අනිවාර්යයෙන් ම තිබිය යුත්තේ මන්ද?
17 එහෙත්, දැන් තත්ත්වය ගැන කුමක් කිව හැකි ද? ඔබ තවමත් නිති පතා පෝෂණ වැඩසටහනක් අනුව කටයුතු කරමින් සිටිනවා ද? තමා බව්තීස්මය ලබා සිටින නිසා, පෝෂ්‍යදායී ආත්මික ආහාර ලබා ගැනීමට නිති පතා හා ක්‍රමික අධ්‍යයනය කිරීමක් තවදුරටත් අවශ්‍ය නැතැයි යමෙක් කිසිවිටෙක කල්පනා නොකළ යුතු ය. තිමෝති මේරූ ක්‍රිස්තියානි අවේක්ෂකයෙක් වුවත්, පාවුල් ඔහුගෙන් උදක් ම ඉල්ලා සිටියේ, “නුඹේ දියුණුවීම සියල්ලන්ට පෙනෙන පිණිස ඒ දේවල් කඩිසරලෙස භාවිතාකරමින් එහිම යෙදී සිටපන්න” කියා ය. (1 තිමෝති 4:15) අප එකිනෙකා තව තවත් කොතරම් වැඩියෙන් එසේ කළ යුතු ද! ඔබට ඔබගේ ආත්මික දියුණු වීම පැහැදිලි ව විදහා පෙන්වීමට උනන්දුවක් තිබේ නම්, එවන් වෑයම් දැරීම අනිවාර්ය ය.
18. කෙනෙකුගේ ආත්මික දියුණු වීම පැහැදිලි ව පෙනී යන්නේ කෙසේ ද?
18 කෙනෙකුගේ දියුණු වීම පැහැදිලි ව විදහා පෙන්වීම යනුවෙන් අදහස් කරන්නේ, තමා දන්නා දේ පිටට පෙන්වීමට විශේෂ උත්සාහයක් දැරීම හෝ අන්‍යයන්ගේ සිත් තමා වෙතට ඇද ගැනීමට වෑයම් කිරීම නොවේ. “නුඹලා ලෝකයේ ආලෝකයය. කන්දක් මුදුනෙහි තිබෙන නුවරක් සඟවන්ට නොහැකිය” කියා ද, “සිතේ පූර්ණකමෙන් මුඛය කථාකරයි” කියා ද යේසුස් වහන්සේ වදාළ සේක. (මතෙව් 5:14; 12:34) අපගේ හෘදයන් හා මනස් දේව වචනයේ යහපත් දේවලින් පිරී තිබෙන විට, අප කරන කියන දේවලින් එය විදහා දැක්වෙන්නේ අපටත් හොරාම ය.
19. අපගේ ආත්මික ප්‍රගතිය සම්බන්ධයෙන් අප කුමක් කිරීමට අධිෂ්ඨාන කරගෙන සිටිය යුතු ද, එමෙන් ම කුමන ප්‍රතිඵලයක් දෙස බලා ගෙන ද?
19 එබැවින්, ප්‍රශ්නය මෙයයි: ඔබගේ අභ්‍යන්තර, ආත්මික වැඩීම උත්තේජනය කළ හැකි පෝෂ්‍ය ද්‍රව්‍ය ලබා ගැනීමට ඔබ නිති පතා ම බයිබලය පාඩම් කොට ක්‍රිස්තියානි රැස්වීම්වලට පැමිණෙන්නෙහි ද? ආත්මික වර්ධනය ගැන සැලකීමේ දී, අක්‍රියාශීලී නිරීක්ෂකයෙක් ව සිටීමෙන් සෑහීමට පත් නොවන්න. යෙහෝවඃ වහන්සේ සපයන බහුල වූ ආත්මික ආහාරවලින් ඔබ පූර්ණ ප්‍රයෝජන ගන්නා බව සහතික කිරීමට නිශ්චිත පියවර ගන්න. ඔබ වනාහි ‘යෙහෝවඃ වහන්සේගේ ව්‍යවස්ථාවෙහි ප්‍රීතිවන්නා වූ ද, උන් වහන්සේගේ ව්‍යවස්ථාව රෑ දාවල් හීන් හඬින් කියවන්නාවූ ද’ කෙනෙක් නම්, “ඔහු දිය ඇළවල් ළඟ හිඳුවූ, නියම කලට ඵල දෙන, නොමැලවෙන කොළ ඇති ගසක් හා සමාන වන්නේය; ඔහු කරන සියල්ල සඵලවෙයි” යයි ඔබ සම්බන්ධයෙන් තවදුරටත් කිව හැකි ය. (ගීතාවලිය 1:2, 3) එහෙත්, ඔබ දිගට ම ආත්මික වර්ධනයක් ලබනු ඇති බව සහතික වීමට කුමක් කළ හැකි ද? අපි මෙය ඊළඟ ලිපියේ සාකච්ඡා කරමු. w92 8/1
බයිබලය මත පදනම් ප්‍රකාශන කියවීමට ඔබ කාලය ගන්නෙහි ද?
ඔබට පිළිතුරු දිය හැකි ද?
◻ අපගේ ආත්මික දියුණු වීම පරීක්ෂා කර බැලීම කාලෝචිත වනුයේ මන්ද?
◻ ආත්මික වර්ධනය ආත්මික රුචියට සම්බන්ධ වන්නේ කෙසේ ද?
◻ “සියලු ආකාර ඉගැන්වීම් නමැති සුළඟින්” යන්නෙන් අදහස් වනුයේ කුමක් ද?
◻ එකිනෙකා තම තමාගේ බර ඉසිලිය යුත්තේ මන්ද?
◻ ආත්මික දියුණු වීම අත්කර ගනු ලබන්නේ කෙසේ ද?