මනස මුළුමනින් ම පරිවර්තනය කර හෘදයෙන් ආලෝකවත් වන්න
“එමනිසා, මම ස්වාමීන් වහන්සේ තුළ සාක්ෂි දරමින් මෙසේ කියමි, එනම්, ජාතීන් ද ගමන් කරන්නාක් මෙන් ඔබ තවදුරටත් ගමන් නොකළ යුතුයි.”—එපීස 4:17, NW.
1. අපගේ මනස් හා හෘදයන් අප සඳහා කරන්නේ කුමක් ද?
මනස හා හෘදය යනු මිනිසුන්ට අයත් බොහෝ විස්මයජනක අධ්‍යයන ඉන්ද්‍රියන් දෙකකි. ඒවායේ ක්‍රියාවන් අසංඛ්‍යාත වුවද, එක් එක් පුද්ගලයා හට ඒවා අද්විතීය වෙයි. අපගේ පුද්ගලිකත්වය, කථාව, හැසිරීම, ච්ත්ත වේගයන් සහ සාරධර්ම යන මේ සියල්ල ම, අපගේ මනස් හා හෘදයන් ක්‍රියා කරන ආකාරය මගින් ගැඹුරු බලපෑමකට හසුවෙයි.
2, 3. (අ) බයිබලය, “හෘදය” සහ “මනස” යන වදන් භාවිතා කරන්නේ කෙසේ ද? (ආ) අප හෘදය හා මනස යන දෙක ගැන සැලකිලිමත් විය යුත්තේ ඇයි?
2 බයිබලය තුළ, “හෘදය” යන්න චේතනාව, චිත්ත වේගයන් හා අභ්‍යන්තර හැඟීම්වලට ද, “මනස” යන්න බුද්ධිමය හා සිතීමේ ඉන්ද්‍රියන්ට ද යොමු දක්වයි. එහෙත්, ඒවා අන්‍යෝන්‍ය වශයෙන් වෙන් ව තිබෙනවා නොවේ. නිදසුනක් වශයෙන්, මෝසෙස් ඊශ්‍රායෙල්වරුන්ගෙන් මෙසේ උදක් ම ඉල්ලා සිටියේ ය: “එබැවින් යෙහෝවඃ වහන්සේ සැබෑ දෙවියන් වහන්සේ බව ඔබ ඔබේ හෘදයට සිහි කළ යුතුයි [පාද සටහන, “යළි ඔබේ මනසට නගා ගත යුතුයි”].” (ද්විතීය කථාව 4:39, NW) තමාට එරෙහි ව කුමන්ත්‍රණය කරමින් සිටි ලියන්නන් හට යේසුස් වහන්සේ මෙසේ පැවසූ සේක: “කුමක් නිසා නුඹලා නුඹලාගේ සිත්වලින් [හෘදයන් තුළ NW] නපුරු දේ සිතන්නහුද?”—මතෙව් 9:4; මාර්ක් 2:6, 7.
3 මින් අදහස් කරන්නේ, මනස හා හෘදය සමීප ව එකට බැඳී තිබෙන බව ය. ඒවා එකිනෙකට අන්‍යෝන්‍ය ලෙස ක්‍රියා කරන අතර, ඇතැම් විටෙක ක්‍රියා කිරීම සඳහා එක්සත් යුගළක් ලෙස එකිනෙකාගේ ශක්තිය වැඩි කර ගනී, එහෙත් බොහෝ විට එකිනෙකා ව පාලනය කිරීම සඳහා පොර බදයි. (මතෙව් 22:37; සසඳන්න රෝම 7:23.) මේ අනුව බලන විට, අප යෙහෝවඃ වහන්සේගේ අනුග්‍රහය දිනා ගැනීමට නම්, අප අපගේ මනස් හා හෘදයන්හි තත්ත්වයන් පිළිබඳ ව ස්ථිර ව සිටිය යුතුවා පමණක් නොව, නමුත් ඒවා එකට එකතු වී ක්‍රියා කිරීමට, ඒවා එක ම දිසාවකට ක්‍රියා කරවීමට අප ඒවා පුහුණු කළ යුතු ය. අප මනසින් පරිවර්තනය වී හෘදයෙන් ආලෝකවත් විය යුතු ය.—ගීතාවලිය 119:34; හිතෝපදේශ 3:1.
‘ජාතීන් ගමන් කරන ආකාරය’
4. සාතන් ජනයාගේ මනස් හා හෘදයන් බලපෑමට හසු කර ඇත්තේ කෙසේ ද? තව ද එහි ප්‍රතිඵලය කුමක් ද?
4 සාතන් වනාහි රැවටීමේ හා දේවල් අනිසි ලෙස මෙහෙය වීමේ රුසියෙකි. ජනයා ව පාලනයට හසු කර ගැනීමට නම්, තමන් විසින් ඔවුන්ගේ මනස් හා හෘදයන් ඉලක්ක කර ගත යුතු බව ඔහු දනී. එය අත්කර ගැනීම සඳහා මිනිස් ඉතිහාසයේ ආරම්භයේ පටන් ම, නානාප්‍රකාර උපායන් ඔහු විසින් යොදා ගනිමින් තිබේ. මෙහි ප්‍රතිඵලයක් වශයෙන්, “මුළු ලෝකය ම නපුරාගේ බලයේ රැඳී තිබේ.” (1 යොහන් 5:19, NW) ඇත්ත වශයෙන් ම, සාතන් ජනයාගේ මනස් හා හෘදයන් මොනතරම් සාර්ථක ලෙස බලපෑමට හසු කර ගෙන තිබෙනවා ද කියතොත්, ඔවුන් ව බයිබලයේ විස්තර කෙරෙන්නේ, “වංකවූ හිතුවක්කාරවූ පරම්පරාවක්” හැටියට ය. (පිලිප්පි 2:15) ප්‍රේරිත පාවුල්, එම වංක වූ හිතුවක්කාර වූ පරම්පරාවේ මනසේ හා හෘදයේ තත්ත්වය පැහැදිලි ව විස්තර කරන අතර, ඔහුගේ වචන අද දින සිටින අප සෑම දෙනාට ම අනතුරු ඇඟවීමක් ලෙස ක්‍රියා කරයි. උදාහරණයක් වශයෙන්, කරුණාකර, එපීස 4:17-19 දක්වා කියවා, රෝම 1:21-24 හි සඳහන් පාවුල්ගේ වදන් සමඟ එය සසඳා බලන්න.
5. පාවුල් එපීසවරුනට දැඩි උපදෙස් ලීවේ මන්ද?
5 සදාචාර පරිහානිය සහ මිථ්‍යා පිළිම වන්දනාව සම්බන්ධ ව අපකීර්තියට පත් ව තිබූ එපීස නගරය ගැන අප සිහි කරන විට, එහි සිටි ක්‍රිස්තියානින් හට එවැනි තද බල වචනවලින් පාවුල් විසින් ලිවීමට හේතුව අපට අගය කළ හැක. ග්‍රීකවරුන්ට සුප්‍රසිද්ධ චින්තකයන් හා දාර්ශනිකයන් සිටිය ද, ග්‍රීක අධ්‍යාපනය මගින් එහි බොහෝ ජනයා හට නපුර උදෙසා වැඩි අවකාශයක් ලබා දුන් බවත්, ඔවුන්ගේ සංස්කෘතියෙන් ඔවුන් ව තම අවකල් ක්‍රියාවන් සඳහා තවත් නිපුණ වීමට අවකාශ දුන් බවත් පෙනෙන්ට තිබේ. එවැනි වාතාවරණයක ජීවත් වන තම සෙසු ක්‍රිස්තියානින් ගැන පාවුල් ගැඹුරු සැලකිල්ලක් දැක්වී ය. ඔවුන්ගෙන් බොහෝ දෙනෙක්, මීට කලින් අන්‍ය ජාතීන්ගේ ජනයා බවත්, “මේ ලෝකයේ දේවල පිළිවෙළ අනුව ගමන් කළ” බවත් ඔහු දැන සිටියේ ය. එහෙත් ඔවුන් දැන් සත්‍යය පිළිගෙන තිබිණ. ඔවුන්ගේ මනස් මුළුමනින් ම පරිවර්තනය වී තිබිණි, ඔවුන්ගේ හෘදයන් ආලෝකවත් වී තිබිණි. මේ සියල්ලට ම වඩා, ඔවුන් විසින් ‘කැඳවනු ලැබූ කැඳවීමට ඔබින ලෙස ගමන් කිරීම’ පාවුල්ට වුවමනා කළ යමක් විය.—එපීස 2:2; 4:1.
6. අප පාවුල්ගේ වදන් ගැන උනන්දු විය යුත්තේ ඇයි?
6 අද දින තත්ත්වය ඊට සමාන ය. අප ද අද දින ජීවත් වන්නේ, සාරධර්ම විකෘති වූ, සදාචාර අතින් අභාවයට ගිය, බොරු ආගමික සිරිත්වලින් ගහණ වූ ලෝකයක ය. අප අතරින් බොහෝ දෙනෙක් වරක් මේ ලෝකයේ දේවල පිළිවෙළට අනුව ජීවත් වූහ. අප අතර වූ අනෙක් අයට සෑම දිනක ම ලෝකයේ අය සමඟ ළඟින් කටයුතු කිරීමට සිදු වෙයි. ඇතමෙක් ජීවත් වන්නේ, ලෞකික ස්වභාවය පැතිර පවත්නා නිවෙස් තුළ ය. එමනිසා, අප පාවුල්ගේ වචනවල අර්ථය වටහා ගෙන ඔහුගේ උපදෙස්වලින් ප්‍රයෝජන ගැනීම අනිවාර්යයෙන් ම කළ යුත්තකි.
නිෂ්ඵල වූ හා අඳුරු වූ මනස්
7. “ඔවුන්ගේ මනස්වල නිෂ්ඵලත්වය” යන ප්‍රකාශනයෙන් පාවුල් අදහස් කළේ කුමක් ද?
7 “ජාතීන් ද ගමන් කරන්නාක් මෙන් ඔබ තවදුරටත් ගමන් නොකළ යුතු” ලෙස පාවුල් ක්‍රිස්තියානින් හට දෙන අනුශාසනයට ප්‍රබල අනුබලයක් දීම පිණිස, පළමු කොට “ඔවුන්ගේ මනස්වල නිෂ්ඵලත්වය” ගැන සඳහන් කළේ ය. (එපීස 4:17, NW) ඉන් අදහස් කරන්නේ කුමක් ද? දි ඇංකර් බයිබල් අනුවාදයට අනුව, “නිෂ්ඵලත්වය” ලෙස පරිවර්තනය කොට ඇති වචනය, “හිස් බව, අලස බව, ශුන්‍ය බව, මෝඩකම, අරමුණක් නැති බව සහ කලකිරීම අඟවයි.” මෙසේ, පාවුල් ගෙන හැර දක්වමින් සිටියේ, ග්‍රීක හා රෝම ලෝකයේ කීර්තිය හා යසස සිත් ගන්නා සුලු දෙයක් ලෙස පෙනී යා හැකි නමුත්, ඒවා ලුහුබැඳයාම ඇත්තෙන් ම හිස්, මෝඩ සහ අරමුණකින් තොර බව ය. කීර්තිය හා යසස කෙරෙහි තම හෘදයන් යොමා ගෙන සිටි අය අවසානයේ දී ලබා ගන්නේ, වෙන කිසිවක් නොව, නමුත් කලකිරීම හා අපේක්ෂා භංගත්වයයි. එම මූල ධර්මය අද දින ලෝකයේ ද සැබෑවක් වෙයි.
8. ලෝකය දරන ප්‍රයත්නයන් නිෂ්ප්‍රයෝජන වන්නේ කිනම් ආකාරවලින් ද?
8 ජීවිතයේ මූලාරම්භය හා අරමුණ සහ මිනිස් වර්ගයාගේ ඉරණම වැනි ගැඹුරු ප්‍රශ්නවලට පිළිතුරු පතා ජනයාගේ නෙත් සිත් යොමා තිබෙන බුද්ධිමත්හු හා සම්භාවනීය පුද්ගලයෝ ලෝකයේ සිටිති. එහෙත් ඔවුන්ට ඉදිරිපත් කිරීමට තිබෙන තීක්ෂ්ණ බුද්ධිය හා මඟ පෙන්වීම කුමක් ද? අදේව වාදය, අඥේය වාදය, පරිණාම වාදය, සහ අතීතයේ තිබූ සිරිත් විරිත් හා මිථ්‍යාවන්ට වඩා වැඩියෙන් ඥානයක් ලබා නොදෙන්නා වූ වෙනත් වියවුල් සහගත සහ ගැටෙන සුලු අදහස් හා න්‍යායන් සමූහයක් ය. එමෙන් ම ලෞකික ලුහුබැඳයාම් බොහොමයක් යම් දුරකට තෘප්තිය හා සෑහීම ගෙන දෙන බව පෙනෙන්ට තිබේ. විද්‍යාව, කලාව, සංගීතය, ක්‍රීඩා, දේශපාලනය යනාදියේ සාර්ථකත්වයන් හා ඉටු කර ගැනීම් ගැන මිනිස්සු කථා කරති. වේගයෙන් පහව යන මොහොතේ ගෞරවයෙන් ඔවුහු උදම් අනති. එසේ වුවද, ඓතිහාසික වෘතාන්ත හා මිනිසුන් විසින් අතීතයේ කරන ලද මහත් ඉටු කර ගැනීම්වල කරුණු අඩංගු වන අද දින තිබෙන වාර්තා පොත් පිරී තිබෙන්නේ අද දින අමතක ව ගොස් ඇති වීරයන්ගෙන් ය. මේ සියල්ල ම වෙන කිසිවක් නොව, නමුත් හිස් බව, අලස බව, ශුන්‍ය බව, මෝඩකම අරමුණකින් තොර බව සහ කලකිරීම ය.
9. බොහෝ දෙනා හැරෙන්නේ කිනම් නිෂ්ප්‍රයෝජන ලුහුබැඳීම්වලට ද?
9 එවන් ප්‍රයත්නයන්ගේ නිෂ්ඵල භාවය තේරුම් ගනිමින්, බොහෝ දෙනා ද්‍රව්‍යවාදි ලුහුබැඳීම්වලට—එනම් මුදල් ගොඩගසා ගැනීම් සහ මුදලින් ගත හැකි දේවල් ලබා ගැනීමට—හැරී යන අතර, මෙම ලුහුබැඳීම් තම ජීවිතවල ඉලක්කය කර ගනිති. ඔවුන්ගේ නිසැක වූ වටහා ගැනීම නම්, සන්තෝෂය පැමිණෙන්නේ ධනයෙන්, දේපළවලින් හා සැප සෙල්ලම සෙවීමෙන් බව ය. ඔවුන් තම මනස් ඒවා කෙරෙහි තබනවා පමණක් නොව, නමුත් ඔවුහු සෑම දෙයක් ම—එනම් සෞඛ්‍ය, පවුල සහ හෘදය සාක්ෂිය පවා පරිත්‍යාග කිරීමට කැමති වෙති. ප්‍රතිඵලය කුමක් ද? තෘප්තියට පත් වෙනවා වෙනුවට, ඔවුහු ‘බොහෝ වේදනාවලින් තමන්ට ම ඇණගෙන සිටිති.’ (1 තිමෝති 6:10) ජාතීන් හැසිරෙන්නාක් මෙන්, ඒ ආකාර චින්තන රටාවක නිෂ්ඵලකම හා සම්බන්ධ ගමන් කිරීම නවතා දමන ලෙස පාවුල් තම සෙසු ක්‍රිස්තියානින්ගෙන් උදක් ම ඉල්ලා සිටීම ගැන පුදුම වන්නට දෙයක් නැත.
10. ලෝකයේ සිටින ජනයා “මනසින් අඳුරේ” සිටින්නේ කෙසේ ද?
10 දෙන්නට හැකි හෝ අනුකරණය කරනු ලැබිය හැකි වටිනා කිසිවක් දීම ලෝකයට නැතැයි පෙන්වීම සඳහා, පාවුල්, “ඔවුහු මනසින් අඳුරේ සිටිති” යයි ඊළඟට පැවසී ය. (එපීස 4:18, NW) ඇත්තෙන් ම, ප්‍රයත්නයන්හි සෑම ක්ෂේත්‍රයක ම පාහේ බුද්ධිමත් හා දැනුම ඇති මිනිසුන් ලෝකයට සිටියි. එහෙත්, ඔවුන් මනසින් අඳුරේ සිටින බව පාවුල් පැවසුවේ ය. මන්ද? පාවුල් කථා කරන්නේ, ඔවුන්ගේ මානසික දක්ෂතා හෝ හැකියාවන් ගැන නොවේ. “මනස” යන පදය, මිනිසාගේ වටහා ගැනීමේ මධ්‍යස්ථානය, අවබෝධයේ ආසනය, අභ්‍යන්තර මිනිසා ලෙස ද යොමු දැක්විය හැක. ඔවුන් සිටින්නේ අඳුරේ ය, මන්දයත් ඔවුන්ගේ ප්‍රයත්නයන් තුළ මඟ පෙන්වන්නා වූ ආලෝකයක් හෝ මෙහෙය වනු ලබන සුලු හැඟීමක් හෝ ඔවුනට නැති බැවිනි. හරි වැරැද්ද පිළිබඳ ඔවුන්ගේ සිහි විකල් හැඟීමෙන්, මෙය දැකිය හැක. අද දින, විනිශ්චයකින් තොර ව, ඕනෑ ම දෙයක් හරි ය යන මානසික ආකල්පය ඥානය යයි මිනිසුන් සිතන්නට පුළුවන, නමුත්, පාවුල් පවසන පරිදි, එය ඇත්තෙන් ම අඳුරු මානසිකත්වයකි. ආත්මික වශයෙන්, ඔවුහු, සම්පූර්ණ අඳුරේ අතපත ගාමින් සිටිති.—යෝබ් 12:25; 17:12; යෙසායා 5:20; 59:6-10; 60:2; සසඳන්න එපීස 1:17, 18.
11. ලෝකයේ මානසික අන්ධකාරයට මූලික හේතුකාරකය කුමක් ද?
11 මිනිසුන් බොහෝ දේවල දී, බුද්ධිමත්, අති දක්ෂ පවා විය හැකි ව සිටියත් තවමත් ආත්මික අන්ධකාරයේ සිටිය හැක්කේ මන්ද? පාවුල්, 2 කොරින්ති 4:4 හි අපට පිළිතුර දෙයි: “නොඇදහිලිකාරවූ ඔවුන් තුළ දෙවියන්වහන්සේගේ ස්වරූපයවූ ක්‍රිස්තුස්වහන්සේගේ තේජසේ ශුභාරංචි ආලෝකය නොබැබළෙන පිණිස, මේ ලෝකයේ [මේ දේවල පිළිවෙළේ NW] දෙවියා ඔවුන්ගේ සිත් [මනස් NW] අන්ධකළේය.” තේජාන්විත ශුභාරංචිය වැළඳගන්නා වූ අය මනසින් මුළුමනින් ම පරිවර්තනය වී හෘදයෙන් ආලෝකවත් වී සිටීම මොනතරම් අනගි ආශීර්වාදයක් ද!
අඥාන අසංවේදී හෘදයන්
12. ලෝකය, “දෙවියන් වහන්සේට අයිති ජීවිතයෙන් වෙන් ව” සිටින්නේ කිනම් අයුරින් ද?
12 අප මනසින් පරිවර්තනය වී හෘදයෙන් ආලෝකවත් විය යුතු හේතුව දැක ගැනීමට තවදුරටත් අපට උපකාර කිරීමට, මේ ලෝකයේ ගමන් මඟ, “දෙවියන් වහන්සේට අයිති ජීවිතයෙන් වෙන් ව තිබේ ය” යන කාරණයට පාවුල් අපගේ අවධානය යොමු කළේ ය. (එපීස 4:18, NW) ජනයා තවදුරටත් දෙවියන් වහන්සේ ව විශ්වාස නොකරනවා හෝ ඔවුන් මුළුමනින් ම දෙවියන් ගැන කිසි හැඟීමක් නැති තත්ත්වයක් බවට පත් වී තිබෙනවා නොවේ. එක් පුවත් පත් තීරු වාර්තාකරුවෙක් එය මේ ආකාරයට පළ කර සිටියේ ය: “දෙවියන් ගැන කිසි හැඟීමක් නැති තත්ත්වයක් වෙනුවට අපි නව ලෝකයක් අලුතෙන් නිපදවමු: ඒ දෙවියන් ගැන අඩු හැඟීමක්. දෙවියන් වහන්සේ ව අඩුවෙන් සලකන අයට තමන් දේවත්වයක් ගැන විශ්වාසය තබන නිසා ප්‍රශංසාව වුවමනා වන අතරතුර ම, උන් වහන්සේ ව පෙට්ටියක් තුළ තබා ගෙන, ඉරිදා උදෑසන පමණක් ඉන් එළියට ඒමට උන් වහන්සේට ඉඩ හරින්නේ, සතියේ අනෙකුත් දිනවල තමන්ගේ දේශපාලනික ලෞකික දෘෂ්ටීන් හෝ තමන්ගේ පුද්ගලික ජීවිතවලට බලපෑම් කිරීමට උන් වහන්සේ හට කිසිවිටෙකත් ඉඩ නොහරිමින් ය. [ඔවුහු] දළ වශයෙන් දෙවියන් වහන්සේ ව අදහති, නමුත් නවීන සමාජය ගැන උන් වහන්සේට බොහෝ දේ පැවසීමට ඇතැයි නොසිතති.” පාවුල් රෝමවරුනට ලියූ තම ලිපිය තුළ එය මෙසේ ගෙනහැර දැක්වී ය. “ඔවුන් දෙවියන් වහන්සේ ව දැනගත්තා වුවද, දෙවියන් වහන්සේ වශයෙන් උන් වහන්සේට ඔවුන් ගෞරව කළේවත් ස්තුති කළේවත් නැත.” (රෝම 1:21, NW) දෙවියන් වහන්සේ ගැන කිසිදු ආකාරයක හැඟීමක් නොමැති ව ජීවිත ගත කරන මිනිසුන් ව අපි සෑම දවසක ම දකින්නෙමු, ඔවුන් උන් වහන්සේට ගෞරව කරන්නේවත් ස්තුති කරන්නේවත් නැති බවට සහතික ය.
13. “දෙවියන් වහන්සේට අයත් ජීවිතය” යනු කුමක් ද?
13 “දෙවියන් වහන්සේට අයත් ජීවිතය” යන ප්‍රකාශනය අති විශේෂ එකකි. එය සාර්ධර්ම පිළිබඳ ජනයාගේ හැඟීම මානසික හා ආත්මික අන්ධකාරය මගින් අවුල්කර ඇති ආකාරය තවදුරටත් නිරූපනය කරයි. “ජීවිතය” යනුවෙන් මෙහි පරිවර්තනය කොට ඇති ග්‍රීක් වචනය, ජීවන මාර්ගය හෝ ජීවන රටාව අදහස් කරන බයිʹඔස් (“ජීව විද්‍යාව [බයොලජි],” “ජීවිත කථාව [බයොග්‍රෆි],” යන වදන් පැමිණෙන) යන වචනය නොවේ. ඒ වෙනුවට, එය නම් සො·ඊʹ (“සත්වෝද්‍යානය,” “සත්ත්ව විද්‍යාව” යන වචන පැමිණෙන) නම් වචනය වෙයි. වයින්ස් එක්ස්පොසිටරි ඩික්ෂනරි ඔෆ් ඕල්ඩ් ඇන්ඩ් න ටෙස්ටමන්ට් වර්ඩ්ස්ට අනුව, එය අදහස් කරන්නේ, “ප්‍රතිපත්තියක් හැටියට ජීවිතය ය, ජීවිතය පරිපූර්ණ අර්ථයකින් ගත් කල ය, ජීවිතය දෙවියන් වහන්සේට තිබෙනවාක් මෙන් ය. . . . මිනිසා වැටීයාමේ විපාක තුළ ඔහු මෙම ජීවිතයෙන් ඈත් වී ගොස් තිබේ.” මෙසේ, පාවුල් අපට පවසමින් සිටියේ, මානසික හා ආත්මික අන්ධකාරය, මේ ලෝකයේ මිනිසුන් ව මාංසය තුළ දූෂණය කරා මෙහෙයවා තිබෙනවා පමණක් නොව, නමුත් දෙවියන් වහන්සේ දානය කරන සදාකාල ජීවනය පිළිබඳ බලාපොරොත්තුවෙන් ද ඔවුන් ව වෙන්කරවා තිබෙන බවයි. (ගලාති 6:8) ඒ මන්ද? පාවුල් අපට හේතු පෙන්වා දෙයි.
14. ලෝකය, දෙවියන් වහන්සේට අයත් ජීවිතයෙන් ඈත් ව සිටීමේ එක් හේතුවක් කුමක් ද?
14 සියල්ලට ම පළමුවෙන්, “ඔවුන් තුළ තිබෙන නොසැලකිලිමත්කම නිසා” යයි ඔහු පැවසුවේ ය. (එපීස 4:18, NW) “ඔවුන් තුළ තිබෙන” යන වාක්‍ය ඛණ්ඩයෙන් අවධාරණය කරන්නේ, සැලකිල්ල නොදක්වන්නේ, ප්‍රස්තාවේ ඌනතාවය නිසා නොව, නමුත් දෙවියන් වහන්සේ ගැන දැනුම හිතාමතා ප්‍රතික්ෂේප කිරීම නිසා බව ය. මෙම වාක්‍ය ඛණ්ඩයේ වෙනත් අනුවාදයන් නම්: “දෙවියන් වහන්සේ ව දැනගැනීමට ඔවුන් තුළ තිබෙන සහජ ප්‍රතික්ෂේප කිරීම” (දි ඇංකර් බයිබල්); “ඔවුන්ගේ හදවත් එයට වසා දමා ඇති හෙයින් දැනුම නැති ව සිටීම” (ජෙරුසලෙම් බයිබල්). ඔවුන් දෙවියන් වහන්සේ පිළිබඳ ඒකාන්ත දැනුම ප්‍රතික්ෂේප කරන නිසා, නැතහොත් හිතුකැමැත්තෙන් එය නිග්‍රහ කොට එපා කරන නිසා, ස්වකීය පුත්‍රයාණන් කෙරෙහි ඇදහිල්ල පවත්වන අය වෙත යෙහෝවඃ වහන්සේ විසින් දානය කරන ආකාරයේ ජීවිතය ලබා ගැනීමේ පදනමක් ඔවුනට නැත. යේසුස් වහන්සේ මෙසේ පැවසූ සේක: “සදාකාල ජීවනය නම් මේය—එකම සැබෑවූ දෙවියන්වහන්සේ වන ඔබ සහ ඔබ විසින් එවනලද තැනැත්තා වන යේසුස් ක්‍රිස්තුස් ඔවුන් විසින් ඇඳිනගැනීමය [දැනුම ලැබීම ය NW].”—යොහන් 17:3; 1 තිමෝති 6:19.
15. මේ ලෝකය, දෙවියන් වහන්සේට අයත් ජීවිතයෙන් ඈත් ව සිටීමට දායක වන්නේ කුමක් ද?
15 පාවුල් පවසන පරිදි, දෙවියන් වහන්සේට අයත් ජීවිතයෙන් පොදුවේ ලෝකයා ඈත් වී සිටින තවත් හේතුවක් නම්, “ඔවුන්ගේ හෘදයන්හි අසංවේදිතාවය” ය. (එපීස 4:18) “අසංවේදිතාවය” යනුවෙන් මෙහි දී මූලික වශයෙන් අදහස් කරන්නේ, හරියට කරගැට බඳු කදරවලින් වසා තිබෙනවාක් මෙන් දැඩි බවක් ය. කදර වර්ධනය වන ආකාරය අපි කවුරුත් පාහේ දනිමු. සම පළමුවෙන් මෘදු සහ සංවේදී විය හැකි නමුත්, එය යම් පීඩනයකට හෝ ඝර්ෂණයකට යටත් වුවහොත් එය කදර බවට පත් වෙයි. තවදුරටත් එයට වේදනාවක් දැනෙන්නේ නැත. ඒ හා සමාන ව, දෙවියන් වහන්සේ කෙරෙහි ඉබේ ම අසංවේදී බවක් ඇති නොවන පරිද්දෙන්, මිනිසුන් ඉපදී ඇත්තේ දැඩි හෝ රළු හෘදයකින් යුතු ව නොවේ. එහෙත් එය ආරක්ෂා කර නොගතහොත්, අප මේ ලෝකයේ ජීවත්වන නිසාත්, එහි ස්වභාවයට නිරාවරණය වී සිටින නිසාත්, හෘදය රළු, ගොරෝසු හෝ දැඩි බවට පත් වන්නට වැඩි කල් ගත වන්නේ නැත. පාවුල් මෙසේ අනතුරු ඇඟවූයේ එමනිසා ය: “ප්‍රවේසම් වන්න, . . . මන්දයත් පාපයේ රැවටිලිකාර බලය මගින් ඔබගෙන් ඕනෑ ම කෙනෙකු ව දැඩි බවට පත්වීමේ බියක් ඇත.” (හෙබ්‍රෙව් 3:7-13, NW; ගීතාවලිය 95:8-10) එමනිසා, අප මනස පරිවර්තනය කර ගෙන හෘදයෙන් ආලෝකවත් වී සිටීම මොනතරම් හදිසි දෙයක් ද!
“සදාචාරය පිළිබඳ සියලු හැඟීම් නැති ව ගොස්”
16. ලෝකය මනසින් අඳුරේ සිටීමේ හා දෙවියන් වහන්සේට අයත් ජීවිතයෙන් ඈත් ව සිටීමේ ඵල විපාකය කුමක් ද?
16 එවැනි අන්ධකාරයක හා ඈත් වී යාමක ඵල විපාක පාවුල් තවදුරටත් පවසන වචනවල කැටිවී ඇත: “සදාචාරය පිළිබඳ සියලු හැඟීම් නැති ව ගොස් සිටින ඔවුහු, සියලු ආකාර ගිජුකමේ අපවිත්‍රකම්වල නියැලෙන පිණිස තමන් ව ම අසංවර හැසිරීමට භාර කළෝ ය.” (එපීස 4:19, NW) “සදාචාරය පිළිබඳ සියලු හැඟීම් නැති ව ගොස්” යන ප්‍රකාශනය පදගතාර්ථයෙන් අදහස් කරන්නේ, “වේදනාව, එනම් සදාචාරමය වේදනාව දැනීම නැවතී තිබේ” යන්න ය. රළු ගොරෝසු හෘදයක් පත් වන්නේ එලෙස ය. වරෙක හෘදය සාක්ෂියේ බලවත් වේදනා දැනීම හා දෙවියන් වහන්සේ ඉදිරියේ ගණන් දිය යුතුය යන හැඟීම නැති වී ගිය විට, තවදුරටත් සංයමයක් නොපවතී. මෙසේ, “ඔවුහු . . . තමන් ව ම” අසංවර හැසිරීමට හා අපවිත්‍රකමට “භාර කළෝ ය” යයි පාවුල් පැවසී ය. එය හිතාමතා සිය කැමැත්තෙන් ම ගන්නා පියවරකි. බයිබලයේ භාවිතා වී ඇති අයුරින්, “අසංවර හැසිරීමට” නීතිය හා අධිකාරිත්වය ගැන මුරණ්ඩු, ලජ්ජා රහිත, අවමන් සහගත හැසිරීමක් අඟවයි. ඒ හා සමාන ව, ‘සියලු ආකාර අපවිත්‍රකමට,’ ලිංගික අපචාරයන් පමණක් නොව, නමුත්, පාවුල්ගේ පාඨකයන් හොඳින් දැන සිටියා වූ, එපීසයේ අර්තමිස්ගේ මාලිගාවේ සිදු කරන ලද සශ්‍රීකත්වය පිළිබඳ චාරිත්‍ර වාරිත්‍ර වැනි ආගමේ නාමයෙන් කෙරෙන දූෂිත දේවල් ද ඇතුළත් වන්නේ ය.—ක්‍රියා 19:27, 35.
17. සදාචාරය පිළිබඳ සියලු හැඟීම් නැති ව ගොස් සිටින ජනයා ‘ගිජුකමෙන්’ පව් කරන බව පාවුල් පැවසුවේ මන්ද?
17 අසංවර හැසිරීම හා සෑම ආකාරයක අපවිත්‍රකම තුළ සංයමයකින් තොර ව ඇලී ගැලී සිටිනවා මදිවාට, එවන් පුද්ගලයන් ‘ගිජුකමෙන්’ ක්‍රියා කරන බව පාවුල් තවත් කියා සිටී. යම් පමණක සදාචාර හැඟීමක් ඇති ව සිටින මිනිස්සු, පාපයක් කළ විට, ඔවුනට අඩු තරමින් ඉන් වේදනාවක් දැනී, එය නැවත නොකිරීමට බොහෝ යත්න දරති. එහෙත් “සදාචාරය පිළිබඳ සියලු හැඟීම් නැති ව ගොස්” සිටින අය පව් කරන්නේ “ගිජුකමින්” යුතු ව ය (“තවත් බොහෝ ඉල්ලති” දි ඇන්කර් බයිබල්). එක් ගුවන් විදුලි විචාරකයෙක් වරක් එය මේ ආකාරයට ගෙන හැර දැක්වී ය: “ඔබ අද රාත්‍රියේ ඝෝෂා පවත්වමින් විනෝද වන්නට යනවා නම්, හෙට රාත්‍රියේ දී වඩාත් පුළුල් ආකාරයෙන් එසේ කිරීමට ඔබට ඕනෑ ය.” ඔවුන් පහළට රූටා යන දුරාචාරමය සර්පිලාකාර දඟරයක් තුළට මහත් ආශාවෙන් ඇතුල් වී, අන්තිමේ දී, අධම අශික්ෂිත දුරාචාරයේ ගැඹුරු ම තැනට ගොස් ගිලෙති—දැන් ඔවුන්ට ඒ ගැන කිසි ම ගණනක්වත් නැත. “ජාතීන්ගේ කැමැත්ත” සම්බන්ධයෙන් මොනතරම් නිවැරදි විචිත්‍රණයක් ද!—1 පේතෘස් 4:3, 4.
18. සාරයක් වශයෙන් ගත් කල, ලෝකයේ මානසික හා ආත්මික තත්ත්වය ගැන පාවුල් ඉදිරිපත් කරන්නේ, කුමනාකාරයේ චිත්‍රයක් ද?
18 එපීස 4:17-19 පද තුනක් පමණක් තුළ, පාවුල් මෙසේ ලෝකයාගේ සැබෑ සදාචාරමය හා ආත්මික තත්ත්වය අනාවරණය කරයි. ලෞකික චින්තකයන් විසින් වැඩි දියුණු කොට තිබෙන අදහස් හා න්‍යායන් ද ධනයේ හා සැප සෙල්ලමේ ඉවක් බවක් නැති ලුහු බැඳීම ද මුළුමනින් ම නිෂ්ප්‍රයෝජන බව ඔහු පෙන්වා දෙයි. මානසික හා ආත්මික අන්ධකාරය හේතුවෙන් මේ ලෝකය දුරාචාරමය මඩවගුරක තවත් පහළට රූටා යමින් සිටින බව ඔහු පැහැදිලි කරයි. අවසන් වශයෙන්, තමන් විසින් ම ඇති කරගත් නොසැලකිල්ල හා අසංවේදිතාවය නිසා, මේ ලෝකය, බලාපොරොත්තු විරහිත ව දෙවියන් වහන්සේට අයත් ජීවනයෙන් වෙන් ව තිබේ. ජාතීන් ගමන් කරන්නාක් මෙන් තවත් ගමන් නොකිරීමට අපට හොඳ හේතු තිබෙන බවට ස්ථිර ය!
19. කුමන අත්‍යවශ්‍ය ප්‍රශ්න තවදුරටත් සලකා බැලිය යුතු ද?
19 මේ ලෝකය යෙහෝවඃ දෙවියන් වහන්සේගෙන් වෙන් ව සිටීමට හේතු කරවා ඇත්තේ මනසින් හා හෘදයෙන් අඳුරු ව තිබීම වන බැවින්, අපගේ මනස් හා හෘදයන්ගෙන් සියලු අන්ධකාරයන් මුලිනුපුටා දැමීමට අපට හැක්කේ කෙසේ ද? එසේ ය, අප ආලෝකයේ දරුවන් මෙන් ගමන් කරමින්, දෙවියන් වහන්සේගේ අනුමැතිය තබා ගැනීමට හැකි වන පිණිස අප කුමක් කළ යුතු ද? මෙය ඊළඟ ලිපිය තුළ සලකා බැලෙනු ඇත.
ඔබට පැහැදිලි කළ හැකි ද?
◻ එපීස 4:17-19 දක්වා තිබෙන දැඩි උපදෙස් දීමට පාවුල් ව පෙලඹ වූයේ කුමක් ද?
◻ ලෝකයේ මාර්ග නිෂ්ප්‍රයෝජන ව තිබෙන්නෙත් අන්ධකාරයේ තිබෙන්නෙත් මන්ද?
◻ “දෙවියන් වහන්සේට අයති ජීවිතයෙන් වෙන් ව තිබේ ය” යන ප්‍රකාශනයෙන් අදහස් කරන්නේ කුමක් ද?
◻ අඳුරු වී ඇති මනසක හා අසංවේදී හෘදයක ඵල විපාක මොනවා ද?
[9වන පිටුවේ පින්තූර]
එපීස නගරය එහි සදාචාර පිරිහීම හා පිළිම වන්දනාව සම්බන්ධයෙන් දැඩි අපකීර්තියට ලක් විණි
1. එපීසයේ රෝම මල්ලවයෙක්
2. අර්තමිස්ගේ මාලිගාවේ නටඹුන්
3. එපීසයේ රංග භූමිය
4. එපීසයේ අර්තමිස්, සශ්‍රීකත්වයේ දේවතාවි
[10වන පිටුවේ පින්තූරය]
ලෝකයේ සම්භාවනීය පුද්ගලයන්ට දෙන්නට තිබෙන තීක්ෂ්ණ බුද්ධිය කුමක් ද?
නීරෝ
[හිමිකම් විස්තර]
Musei Capitolini, Roma