ඔබ තුළ ආත්ම දමනය පැවත, එය උතුරා යාමට සලස්වන්න
“ඔබේ . . . ඇදහිල්ලට . . . ආත්ම දමනය . . . එකතු කරන්න.”—2 පේතෘස් 1:5-7, නව අනුවාදය.
1. ක්‍රිස්තියානියෙකුට සාක්ෂියක් දිය හැක්කේ කිනම් අසාමාන්‍ය අවස්ථාවක දී ද?
යේසුස් වහන්සේ මෙසේ පැවසූ සේක: “සාක්ෂියක් පිණිස නුඹලා මා නිසා ආණ්ඩුකාරයන්ද රජුන්ද ඉදිරියට ගෙනයනු ලබනවා ඇත.” (මතෙව් 10:18) ඔබ ව ආණ්ඩුකාරයෙක්, විනිශ්චයකරුවෙක් හෝ ජනාධිපතිවරයෙක් ඉදිරියට කැඳවනු ලැබුවා නම් ඔබ කුමක් ගැන කථා කරනු ඇත් ද? සමහරවිට පළමුවෙන් ඔබ එහි සිටීමට හේතුව, ඔබට එරෙහි ව තිබෙන චෝදනාව විය හැක. එසේ කිරීමට දෙවියන් වහන්සේගේ ආත්මය ඔබට උපකාර කරනවා ඇත. (ලූක් 12:11, 12) එහෙත් ආත්ම දමනය ගැන කථා කරනවා ඔබට සිතා ගත හැකි ද? එය අපගේ ක්‍රිස්තියානි පණිවුඩයේ වැදගත් කොටසක් වශයෙන් ඔබ සලකනවා ද?
2, 3. (අ) ෆීලික්ස්ට හා දෘසිල්ලාට සාක්ෂිදැරීමට පාවුල්ට කෙසේ හැකි වී ද? (ආ) එම අවස්ථාවේ දී පාවුල් විසින් ආත්ම දමනය ගැන කථා කිරීම යෝග්‍ය විෂයක් වූයේ මන්ද?
2 සැබෑ ජීවිත අත්දැකීමක් සලකා බලන්න. යෙහෝවඃ වහන්සේගේ සාක්ෂිකරුවන්ගෙන් කෙනෙකු ව අත් අඩංගුවට ගනු ලැබ පරීක්ෂණය සඳහා ගෙන එනු ලැබී ය. කථා කිරීමට ප්‍රස්තාවක් දෙනු ලැබූ විට, තමා ක්‍රිස්තියානියෙකු වශයෙන්, එනම් සාක්ෂිකරුවෙකු වශයෙන් තමාගේ විශ්වාසයන් ගැන පැහැදිලි කිරීමට ඔහුට වුවමනා විය. වාර්තාව පරීක්ෂා කිරීමට ඔබට හැකි අතර, “ධර්මිෂ්ඨකම සහ ආත්ම දමනය සහ පැමිණීමට තිබෙන විනිශ්චය ගැන” ඔහු ප්‍රසිද්ධ තර්කානුකූල සාක්ෂියක් දුන් බව ඔබ දැක ගන්නවා ඇත. අප මෙහි යොමු දක්වමින් සිටින්නේ, කායිසරයේ දී ප්‍රේරිත පාවුල් ලැබූ අත්දැකීමකට ය. මුලදී ප්‍රශ්න විචාරීමක් තිබිණි. “කීප දවසකට පසු පීලික්ස් යුදෙව් ස්ත්‍රියෙක්වූ තමාගේ භාර්ය්‍යාව වන දෘසිල්ලා සමග ඇවිත් පාවුල් ගෙන්වා, ක්‍රිස්තුස් යේසුස්වහන්සේ කෙරෙහි ඇත්තාවූ ඇදහිල්ල ගැන ඔහු කථාකරනවා ඇසුවේය.” (ක්‍රියා 24:24) ෆීලික්ස්, “සියලු ආකාරයේ කුරිරුකම්වල හා කාම තෘෂ්ණාවල යෙදුණු අතර, රජෙකුගේ බලය වහලෙකුගේ සියලු සහජ ගතිවලින් යුක්ත ව හැසිරෙ වූ බව” ඉතිහාසය වාර්තා කරයි. ඔහු දෘසිල්ලාට තම සැමියා ව (දේව නීතිය කඩ කරමින්) දික්කසාද කිරීමටත් තමාගේ තුන් වෙනි භාර්යාව බවට පත් වෙන්නට ඈ ව පෙලඹවීමටත් පෙර ඔහු දෙවතාවක් විවාහ වී සිටියේ ය. සමහර විට එම අලුත් ආගම, එනම් ක්‍රිස්තියානි ධර්මය ගැන ඇසීමට වුවමනා වූයේ ඇයට විය හැක.
3 පාවුල්, “ධර්මිෂ්ඨකම සහ ආත්ම දමනය මෙන් ම පැමිණීමට තිබෙන විනිශ්චය ගැන” කථා කිරීමෙහි නියැලුණේ ය. (ක්‍රියා 24:25, NW) මෙය නිර්දෝෂී භාවය පිළිබඳ දෙවියන් වහන්සේගේ ප්‍රමිතිවල සහ ෆීලික්ස් සහ දෘසිල්ලා පංගුකාර වූ කෲරත්වයේ සහ අයුක්තියේ වෙනස පැහැදිලි කරනු ඇත. තමාගේ අතේ වූ නඩුව තුළ යුක්තිය ඉෂ්ට කිරීමට ෆීලික්ස් ව පෙලඹවීමට පාවුල් බලාපොරොත්තු වූවා විය හැකි ය. එහෙත්, “ආත්ම දමනය සහ පැමිණීමට තිබෙන විනිශ්චය” මතු කරන්නේ ඇයි? මෙම දුරාචාර යුවළ, “ක්‍රිස්තුස් යේසුස් වහන්සේ පිළිබඳ විශ්වාසයන්ට” ඇතුළත් වන්නේ මොනවා ද කියා විමසමින් සිටියෝ ය. එමනිසා, උන් වහන්සේ ව අනුගමනය කිරීමට, ආත්ම දමනය යන්නෙන් අදහස් කරන, යමෙකුගේ සිතුවිලි, කථාව සහ ක්‍රියාව මැඩපවත්වා ගැනීම අවශ්‍ය කරන්නේ ය යන්න දැනගැනීමට ඔවුන්ට අවශ්‍ය විය. සියලු මිනිසුන් තම සිතුවිලි, වචන සහ ක්‍රියාවන් සඳහා දෙවියන් වහන්සේට ගණන් දිය යුතු ය. මෙසේ, පාවුල්ගේ නඩුවේ දී ෆීලික්ස්ගෙන් පැමිණෙන කුමන විනිශ්චයකටත් වඩා වැදගත් වූයේ මෙම ආණ්ඩුකාරයාට සහ ඔහුගේ බිරිඳට දෙවියන් වහන්සේ ඉදිරියේ මුහුණු දීමට තිබූ විනිශ්චයයි. (ක්‍රියා 17:30, 31; රෝම 14:10-12) පාවුල්ගේ පණිවුඩය අසා “ෆීලික්ස්ට ඇති වූ භය” තේරුම් ගත හැකි ය.
එය වැදගත් ය, නමුත් පහසු නැත
4. ආත්ම දමනය, සැබෑ ක්‍රිස්තියානි ධර්මයේ වැදගත් කොටසක් වන්නේ මන්ද?
4 ප්‍රේරිත පාවුල් ආත්ම දමනය ක්‍රිස්තියානි ධර්මයේ අති වැදගත් කොටසක් වශයෙන් පිළිගත්තේ ය. යේසුස් වහන්සේගේ සමීප ආශ්‍රිතයෙකු වූ ප්‍රේරිත පේතෘස් මෙය සනාථ කළේ ය. ස්වර්ගයේ “දේව ස්වභාවයට පංගුකාරයන් බවට පත්වන” අයට ලිවීමේ දී, ඇදහිල්ල, ප්‍රේමය සහ ආත්ම දමනය වැනි අත්‍යවශ්‍ය ගුණාංග කිහිපයක් විදහා දක්වන මෙන් පේතෘස් උදක් ම ඉල්ලා සිටියේ ය. මෙබැවින්, ආත්ම දමනය මෙම සහතිකයට අයත් විණි: “මෙම දේවල් ඔබ තුළ පැවත උතුරා යයි නම්, අපගේ ස්වාමි වූ යේසුස් ක්‍රිස්තුස් වහන්සේ පිළිබඳ ඒකාන්ත දැනුම සම්බන්ධයෙන් අක්‍රියාශීලී වීමෙනුත්, ඵල රහිත වීමෙනුත් ඒවා ඔබ ව වළක්වනවා ඇත.”—2 පේතෘස් 1:1, 4-8, NW.
5. ආත්ම දමනය සම්බන්ධ ව අප විශේෂයෙන් සැලකිලිමත් විය යුත්තේ ඇයි?
5 කෙසේ වුවද, අප විසින් ආත්ම දමනය විදහා පෑ යුතු ය කියා පැවසීම, අපගේ එදිනෙදා ජීවිතයේ දී එය ඇත්තට ම ක්‍රියාවට නංවනවාට වඩා පහසු බව ඔබ දන්නෙහි ය. එක හේතුවක් නම්, සාපේක්ෂ වශයෙන් ආත්ම දමනය කලාතුරකින් දක්නට ලැබෙන දෙයකි. දෙවෙනි තිමෝති 3:1-5 හි පාවුල්, අපගේ දවස්වල, එනම් “අන්තිම දවස්වල” හාත්පස පැතිර පවත්නා ආකල්පයන් විස්තර කළේ ය. අපගේ කාල පරිච්ඡේදයට ආවේණික එක් ගති ලක්ෂණයක් නම්, බොහෝ දෙනෙක් “ආත්ම දමනයෙන් තොර වීම ය”. මෙය අප සියල්ලන් වටා සැබෑවක් වෙමින් පවතින බවට ඔප්පු වෙමින් තිබෙනවා අපි දකිමු, එසේ නොවේ ද?
6. අද දින ආත්ම දමනයේ ඌනතාවය විහිදී ඇත්තේ කෙසේ ද?
6 “සංයමයකින් තොර ව හැඟීම් ප්‍රකාශ කිරීම” හෝ “තරහ පිට කිරීම” මූලික වශයෙන් සෞඛ්‍යට හිතකර බව බොහෝ දෙනා විශ්වාස කරති. මොනම අන්දමකින්වත් ආත්ම දමනය ගැන නොසලකනවා සේ පෙනී යන, තමන්ගේ ආවේගයන් ඉබේ ම වාගේ පිට කරන ජනමාධ්‍යවල බොහෝ විට පෙනී සිටින, අන්‍යයන් විසින් අනුකරණය කරනු ලබන සුප්‍රසිද්ධ පුද්ගලයන්ගෙන් ඔවුන්ගේ දෘෂ්ටියට පන්නරය ලැබේ. මෙය විස්තර කරනවා නම්: වෘත්තීය ක්‍රීඩාවලට කැමති බොහෝ දෙනෙක්, ප්‍රචණ්ඩකාරී වියරුව ඇතුළු දරුණු චිත්ත වේගයන් විදහා පෑමට පුරුදු වී සිටිති. ක්‍රීඩා තරඟවලදී පැන නැගි දරුණු සටන් හෝ කැරලි කෝලහල ගැන අඩු තරමින් පුවත් පතකින් වත් ඔබ දැක තිබෙනවා ඔබට මතක ද? එසේ නමුත්, අපගේ මූලික කරුණ, ආත්ම දමනයේ ඌනතාවය විදහා දක්වා ඇති උදාහරණයන් ගැන විචාර බැලීමට වැඩි කාලයක් යෙදවීම නොවේ. අප විසින් ආත්ම දමනය පෙන්විය යුතු පැති—එනම් අපගේ ආහාර පාන පරිභෝජනයේ දී, විරුද්ධ ලිංගයේ අය සමඟ අපගේ හැසිරීමේ දී, විනෝදාංශ කෙරෙහි අප වැය කරන කාලය සහ මුදල්—යන මෙවැනි දෑ ඔබට ලැයිස්තු ගත කළ හැකි ය. එහෙත් එවැනි බොහෝ පැති ගැන උඩින් පල්ලෙන් සලකා බලනවා වෙනුවට, අප විසින් ආත්ම දමනය විදහා පෑ යුතු මූලික පැත්තක් ගැන අපි පරීක්ෂා කර බලමු.
අපගේ චිත්ත වේගයන් සම්බන්ධ ව ආත්ම දමනය
7. ආත්ම දමනයේ කිනම් පැත්තට විශේෂ අවධානයක් දීම වටී ද?
7 අපගේ ක්‍රියා හික්මවා ගැනීමෙහි ලා හෝ මැඩපවත්වා ගැනීමෙහි ලා අපගෙන් බොහෝ දෙනෙක් සාධාරණ වශයෙන් සාර්ථක වී තිබේ. අපි සොරකම් නොකරමු; දුරාචාරයට ගොදුරු නොවෙමු; නැතහොත් මිනී නොමරමු; එවැනි වැරදි පිළිබඳ ව දෙවියන් වහන්සේගේ නීතිය අපි දනිමු. එසේ නමුත්, අපගේ චිත්ත වේගයන් පාලනය කර ගැනීමෙහි ලා අපි කොතරම් සාර්ථක වී සිටින්නෙමු ද? කල් ගත වන විට, චිත්ත වේගීය ආත්ම දමනය වර්ධනය කිරීමට අසමත් වන ඔවුහු, තමන්ගේ ක්‍රියා සම්බන්ධ ආත්ම දමනය අහිමි කර ගනිති. එමනිසා. අපි අපගේ චිත්ත වේගයන් ගැන අවධානය යොමු කරමු.
8. අපගේ චිත්ත වේගයන් සම්බන්ධයෙන් යෙහෝවඃ වහන්සේ අපගෙන් අපේක්ෂා කරන්නේ කුමක් ද?
8 අපට කිසි චිත්ත වේගයක් නැති වන ලෙස හෝ විදහා නොපාන ලෙස අප රොබෝවරුන් මෙන් ක්‍රියා කිරීම යෙහෝවඃ දෙවියන් වහන්සේ අපගෙන් අපේක්ෂා නොකරන සේක. ලාසරුස්ගේ සොහොන අසල දී, යේසුස් වහන්සේ “ආත්මයෙන් සුසුම් ලා කැළඹුණු” සේක. ඉන් පසු, “යේසුස් වහන්සේ කඳුළු සැලූ සේක.” (යොහන් 11:32-38, NW) තම ක්‍රියාවන් පරිපූර්ණ ලෙස පාලනය කර ගනිමින්, උන් වහන්සේ දේව මාලිගාවේ දී මිල මාරුකරන්නන් එළවා දැමූ විට, උන් වහන්සේ ඊට වඩා හාත්පසින් වෙනස් චිත්ත වේගයන් විදහා දැක්වූ සේක. (මතෙව් 21:12, 13; යොහන් 2:14-17) උන් වහන්සේගේ පක්ෂපාත ගෝලයෝ ද දැඩි චිත්ත වේගයන් විදහා පෑහ. (ලූක් 10:17; 24:41; යොහන් 16:20-22; ක්‍රියා 11:23; 12:12-14; 20:36-38; 3 යොහන් 4) එහෙත්, තම චිත්ත වේගයන් පාපයට හේතුවක් නොකරන අයුරින් ආත්ම දමනය පැවැත්වීම අවශ්‍ය බව ඔවුහු වටහා ගත්හ. එපීස 4:26 මෙය කදිමට පැහැදිලි කරයි: “කෝපවුණත් පව් නොකරල්ලා. ඉර බසින තුරු නුඹලාගේ කෝපය පවතින්ට ඉඩ නාරිල්ලා.”
9. අපගේ චිත්ත වේගයන් පාලනය කර ගැනීම මෙතරම් වැදගත් වන්නේ ඇයි?
9 ක්‍රිස්තියානියෙකු ආත්ම දමනය විදහා පෙන්වනවා යන්න පෙනෙන්ට තිබුණත්, ඇත්ත වශයෙන් ම ඔහුගේ චිත්ත වේගයන් පාලනයකින් තොර වූ තත්ත්වයක තිබීමේ අන්තරායක් ඇත. දෙවියන් වහන්සේ ආබෙල්ගේ පූජාව අනුමත කළ අවස්ථාවේ දී දැක් වූ ප්‍රතිචාරය මතක් කරන්න: “කායින් අතිශයෙන් කෝපවිය, ඔහුගේ මුහුණද වෙනස්විය. ස්වාමීන්වහන්සේ [යෙහෝවඃ වහන්සේ NW ] කායින්ට කථාකොට: නුඹ කෝපව සිටින්නේ මන්ද? නුඹේ මුහුණ වෙනස්ව තිබෙන්නේ මක්නිසාද? නුඹ යහපත කෙරෙහිනම් පිළිගනු නොලබන්නෙහිද? යහපත නොකෙරෙහි නම් පාපය දොරකඩ ලැග සිටියි; ඒකේ ආශාව නුඹ කෙරෙහි වන්නේය.” (උත්පත්ති 4:5-7) කායින් තම චිත්ත වේගයන් පාලනය කිරීමට අසමත් වූයේ ය, එය ඔහු විසින් ආබෙල් ව මරා දැමීමට මඟ පෙන්වී ය. පාලනය නොකරන ලද චිත්ත වේගයන් පාලනය නොකරන ලද ක්‍රියාවකට මඟ පෙන්වූයේ ය.
10. හාමාන්ගේ උදාහරණයෙන් ඔබ ඉගෙන ගන්නේ කුමක් ද?
10 මොර්දෙකයි හා එස්තර්ගේ දවස්වලින් එන ආදර්ශයක් ගැන ද සලකා බලන්න. මෝර්දෙකයි තමා ඉදිරියේ වැඳ නොවැටීම ගැන හාමාන් නමැති නිලධාරියා කෝප වී සිටියේ ය. පසු ව තමාට අනුග්‍රහය ලැබේ යයි හාමාන් වැරදි සහගත ලෙස සිතී ය. “හාමාන් ද ඒ දවසේදී සන්තෝෂවී ප්‍රීතිමත් සිතකින් පිටතට ගියේය. එහෙත් හාමාන් තෙම රජවාසල උන් මොර්දෙකයි තමා ඉදිරියෙහි නැගිට්ටේවත් තමා සැලකුවේවත් නැති බව දැක ඔහු කෙරෙහි උදහසින් පිරුණේය. එසේවුවත් ඔහු කෝපය සංසිඳුවාගන [තමා ව දමනය කරගෙන NW ], ගෙට [ආවේ ය].” (එස්තර් 5:9, 10) ඔහුට ඉක්මනින් ම ප්‍රීතියේ චිත්ත වේගයන් හැඟුණි. එනමුත් තමා තද අමනාපයකින් සිටි පුද්ගලයා දුටු පමණින් ම උදහසින් වියරු වන්නට තරම් ඔහු ඉක්මන් වූයේ ය. හාමාන් “කෝපය සංසිඳුවාගෙන [තමා ව දමනය කරගෙන NW]” සිටියා කියා බයිබලය පවසන විට, ඔහු ආත්ම දමනය අතින් ආදර්ශවත් වූ බවක් අදහස් කරන බව ඔබ සිතනවා ද? එසේ සිතීම උගහට ය. හාමාන් සිය ක්‍රියාවන් මෙන් ම චිත්ත වේගයන් විදහා පෙන්වීම තාවකාලික ව දමනය කරගෙන සිටි නමුදු, ඔහු තම ඊර්ෂ්‍යා සහගත වියරුව පාලනය කිරීමට අසමත් වූයේ ය. ඔහුගේ චිත්ත වේගයන් ඔහු ව මඟ පෙන්වූයේ මිනිසෙකු මැරීමේ කුමන්ත්‍රණයකට ය.
11. පිලිප්පි සභාවේ, කුමන ගැටලුව පැවතියේ ද, තව ද එයට කුමක් තුඩු දුන්නා විය හැකි ද?
11 ඒ හා සමාන ව, චිත්ත වේගයන්ගේ පාලනයේ ඌණතාවය, අද දින ක්‍රිස්තියානින් හට මහත් සේ හානි කළ හැක. ‘අපෝ, එය සභාවේ ගැටලුවක් වෙන එකක් නැහැ’ යයි සමහරෙකුට හැඟෙනවා විය හැක. එහෙත් එය ගැටලුවක් වී තිබේ. පිලිප්පියේ විසූ ආලේප ලත් ක්‍රිස්තියානින් දෙදෙනෙකුට බැරෑරුම් මත භේදයක් තිබූ අතර, එය කුමක් ද කියා බයිබලය විස්තර නොකරයි. මෙය සිදු වුණා යයි සිතන්න: එවෝදියා සමහරක් සහෝදර සහෝදරියන් ව ආහාරයකට හෝ සුහද හමුවකට ආරාධනා කළා ය. සින්තිකීට ආරාධනා කරනු ලැබුවේ නැති අතර, ඒ ගැන ඈ සිත රිදවා ගත්තා ය. සමහරවිට, පසු අවස්ථාවක එවැනි ම දෙයකට එවොදියාට ආරාධනා නොකිරීමෙන් ඈ ඊට ප්‍රතිචාර දැක්වූවා ය. ඉන් පසු දෙදෙනා ම කළේ එකිනෙකාගේ වැරදි ගැන සොයා බැලීමයි; කලක් ගත වන විට, ඔවුන් එකිනෙකා සමඟ කථා කළේ නැති තරම් ය. ඒ හා සමාන සිද්ධියක, මූලික ගැටලුව වනු ඇත්තේ ආහාරයකට ආරාධනා නොකිරීම ද? නැත. එය ගිනි පුපුරක් පමණි. මෙම ආලේප ලත් සහෝදරියන් දෙදෙනා තමන්ගේ චිත්ත වේගයන් පාලනය කිරීමට අසමත් වූ විට, එම ගිනිපුපුර ලැව් ගින්නක් බවට පත් විය. එම ගැටලුව පැසවමිත් තිබූ අතර, ප්‍රේරිතයෙකු ඊට මැදහත් වන්නට සිදු වන තෙක් එය වර්ධනය වූයේ ය.—පිලිප්පි 4:2, 3.
ඔබගේ චිත්ත වේගයන් සහ ඔබගේ සහෝදරයන්
12. දේශනාකාරයා 7:9 හි සඳහන් අවවාදය දෙවියන් වහන්සේ අපට දෙන්නේ ඇයි?
12 යම් පුද්ගලයෙකුට මදි පුංචිකමක් සිදු වන විට, සිත රිදෙන විට හෝ අගතිය සහිත ව සලකනු ලබන විට එම තැනැත්තාට තම චිත්ත වේගයන් පාලනය කර ගැනීම පහසු දෙයක් නොවේ. යෙහෝවඃ වහන්සේ එය දන්නා සේක, මන්දයත් උන් වහන්සේ මිනිසාගේ ආරම්භයේ පටන් මිනිස් සබඳතා ගැන නිරීක්ෂණය කර තිබෙන හෙයිනි. දෙවියන් වහන්සේ අපට මෙසේ උපදෙස් දෙන සේක: “කෝප [අමනාප NW ] වීමට ඉක්මන් නොවන්න. මන්ද, කෝපය සිතේ තබාගැනීම අනුවණකමකි.” (දේශනාකාරයා 7:9, නව අනුවාදය) දෙවියන් වහන්සේ පළමු ව අවධානය යොමු කරන්නේ ක්‍රියාවලට නොව චිත්ත වේගයන්ට බව සැලකිල්ලට ගන්න. (හිතෝපදේශ 14:17; 16:32; යාකොබ් 1:19) ඔබගෙන් ම මෙසේ අසන්න, ‘මම මගේ චිත්ත වේගයන් පාලනය කර ගැනීම ගැන මීට වඩා අවධානයක් දිය යුතු ද?’
13, 14. (අ) ලෝකය තුළ, චිත්ත වේගයන් පාලනය කර ගැනීමට අසමත්වීමෙන් පොදුවේ වර්ධනය වන්නේ කුමක් ද? (ආ) ක්‍රිස්තියානින් විසින් අමනාපය රඳවා තබා ගැනීමට කිනම් දේවල් මඟ පෙන්වයි ද?
13 තම චිත්ත වේගයන් පාලනය කර ගැනීමට අසමත් වන ලෝකයේ සිටින බොහෝ දෙනා, තමන්ට ම හෝ තමන්ගේ නෑයෙකුට එරෙහි ව කරන ලද සැබෑ හෝ සිතා ගත් වැරදි නිසා බද්ධ වෛර—එනම් තද පරුෂ, ප්‍රචණ්ඩකාරී, ආරවුල් පටන් ගනිති. වරෙක, චිත්ත වේගයන් පාලනය කර ගැනීමට බැරි වන විට, ඒවායේ හානිකර බලපෑම දිගු කලක් මුළුල්ලේ පවත්වා ගැනීමට ඒවාට හැකි වෙයි. (සසඳන්න උත්පත්ති 34:1-7, 25-27; 49:5-7; 2 සාමුවෙල් 2:17-23; 3:23-30; හිතෝපදේශ 26:24-26.) ජාතිය හෝ සංස්කෘතික පසුබිම කුමක් වුවත්, සහතික ව ම ක්‍රිස්තියානින්, එවැනි සතුරුවාදිකම් සහ අමනාප වැරදි ලෙසත්, නරක ලෙසත්, එමෙන් ම වැළකිය යුතු දේවල් ලෙසත් දැකිය යුතු ය. (ලෙවී කථාව 19:17) අමනාපවලින් වැළකී සිටීම, චිත්ත වේගයන් සම්බන්ධ ඔබගේ ආත්ම දමනයේ කොටසක් වශයෙන් ඔබ දකින්නෙහි ද?
14 එවෝදියා සහ සින්තිකී සම්බන්ධ සිද්ධියේ දී මෙන්, චිත්ත වේගයන් පාලනය කර ගැනීමට අසමත්වීම දැන් ගැටලු ඇති වීමට තුඩු දිය හැකි ය. තමාට විවාහ මංගල්‍යයකට ආරාධනා කළේ නැති නිසා, එය තමාට කළ මදි පුංචිකමක් යයි සහෝදරියකට හැඟී යන්නට පුළුවන. නැතහොත් එසේ සිදු වූයේ තමාගේ දරුවාට හෝ තම ලේ නෑයෙකුට ආරාධනා නොකළ නිසා වන්නට පුළුවන. එසේ නැතහොත්, සමහරවිට සහෝදරයෙක්, තවත් සහෝදරයෙකුගෙන් පාවිච්චි කරන ලද වාහනයක් මිලට ගත්තා විය හැක, වැඩි කල් යන්නට පෙර, එය අබලන් විණි. හේතුව කුමක් හෝ වේවා, මේ නිසා සිත් රිදවීමක් සිදු විණි. චිත්ත වේගයන් පාලනය නොවිණි, තව ද මීට සම්බන්ධ උදවිය තම සිත් අවුල් කර ගත්හ. ඊළඟට කුමක් විය හැකි ද?
15. (අ) ක්‍රිස්තියානින් අතර අමනාපකම් තිබීමෙන්, කිනම් දුක්දායක විපාක ප්‍රතිඵල වී තිබේ ද? (ආ) අමනාපකම් රඳවා තබා ගැනීමට ඇති නැඹුරුවාව සම්බන්ධයෙන් කිනම් බයිබල් උපදෙස් සම්බන්ධ වේ ද?
15 සිත කලබල කර ගත් පුද්ගලයා තමාගේ චිත්ත වේගයන් පාලනය කර නොගෙන තම සහෝදරයා සමඟ සමාදානය ඇති කරන්නට යන්නේ නැත්නම්, අමනාපයක් වර්ධනය වන්නට පුළුවන. තමා “අකමැති” යම් ක්‍රිස්තියානියෙක් හෝ පවුලක් එක්තරා සභා පොත් පාඩමකට සහභාගි වන හෙයින් තමා ව ඊට ඇතුළත් නොකරන මෙන් සාක්ෂිකරුවෙකු විසින් ඉල්ලා සිටිනු ලැබූ අවස්ථා තිබී ඇත. මොනතරම් කනගාටුදායක ද! ක්‍රිස්තියානින් එකිනෙකා ව ලෞකික උසාවිවලට ගෙන යාම පරාජයක් වනු ඇතැයි බයිබලය කියයි, නමුත් අපට හෝ අපගේ යම් නෑදෑයෙකුට අතීතයේ කරන ලද යම් මදි පුංචිකමක් හෝ අවනම්බුවක් නිසා අප සහෝදරයෙකුගෙන් වැළකී සිටීම ඒ හා සමාන පරාජයක් වන්නේ නැද්ද? අපගේ සහෝදර සහෝදරියන් සමඟ සාමයට වඩා අප අපගේ ලේ නෑකම් ඉහළින් තබන බව අපගේ චිත්ත වේගයන්ගෙන් හෙළි වේ ද? අප අපගේ සහෝදරිය වෙනුවෙන් මිය යාමට කැමැත්තෙන් සිටින්නෙමු යයි කියන නමුත්, අප විසින් දැන් ඇය සමඟ කථා නොකරන තරම් අපගේ චිත්ත වේගයන් අප ව පොලඹවයි ද? (යොහන් 15:13 සසඳන්න.) දෙවියන් වහන්සේ පැහැදිලි ව ම අපට මෙසේ පවසන සේක: “කාටවත් නපුරට නපුර නොකරල්ලා. . . . පුළුවන් නම්, නුඹලාගෙන් විය හැකි ප්‍රමාණයට, සියලු මනුෂ්‍යයන් සමග සමාදානයෙන් සිටපල්ලා. ප්‍රේමවන්තයෙනි, පළි නොගෙන, උදහසට ඉඩහැරපල්ලා.”—රෝම 12:17-19; 1 කොරින්ති 6:7.
16. චිත්ත වේගයන් හා කටයුතු කිරීම සම්බන්ධයෙන් ආබ්‍රහම් තැබූ යහපත් ආදර්ශය කුමක් ද?
16 සතුරුවාදිකම පැසවන්නට ඉඩ හරිනවා වෙනුවට, අපගේ චිත්ත වේගයන් පාලනය කර ගැනීමට පියවරක් නම්, සමාදානය ඇති කිරීම හෝ චෝදනාවට මූලික හේතුව සමතයකට පත් කර ගැනීම ය. ආබ්‍රහම්ගේ විශාල බැටළු රැළට ලොත්ගේ බැටළු රැළ සමඟ විසීමට දේශයේ ඉඩ මදි වූ විට, එම හේතුවෙන් ඔවුන්ගේ බැටළුවන් බලා ගන්නෝ දබර කරන්නට පටන් ගත් බව මතකයට නඟන්න. ආබ්‍රහම් තම චිත්ත වේගයන්ගෙන් යටපත්වීමට තමාට ම ඉඩ හැරියේ ද? නැත්නම් ඔහු ආත්ම දමනය විදහා දැක්වූවා ද? මෙම ව්‍යාපාර ගැටලුවට ඔහු යෝජනා කළ සාමදායී විසඳුම ප්‍රශංසා කටයුතු ය; දෙදෙනාට ම වෙනස් ප්‍රදේශයක් තිබේවා. තව ද ඔහු ලොත්ට පළමු තෝරා ගැනීම කිරීමට ඉඩ දුන්නේ ය. ආබ්‍රහම්ට ලොත් ගැන කිසිදු තික්තකමක්, තරහවක් හෝ අමනාපයක් නොතිබූ බව ඔප්පු කරමින්, ඔහු පසු ව ලොත් වෙනුවෙන් යුධ පිටියට ද ගියේ ය.—උත්පත්ති 13:5-12; 14:13-16.
17. පාවුල් සහ බාර්නබස් එක් අවස්ථාවක දී අසමත් වූයේ කෙසේ ද, නමුත් ඉන් පසු ව සිදු වුණේ කුමක් ද?
17 පාවුල් සහ බාර්නබස් සම්බන්ධ සිද්ධියකින් ද ආත්ම දමනය පිළිබඳ පාඩමක් අපට උගත හැකි ය. වසර ගණනාවක් එක් ව වැඩ කිරීමෙන් පසු ව, මාර්ක් ව ගමනකට කැඳවා ගෙන යනවා ද නැද්ද යන්න සම්බන්ධ ව ඔවුහු එකඟත්වයක නොසිටියහ. “ඒ ගැන සැර විවාදයක් හටගත් බැවින් ඔව්හු එකිනෙකාගෙන් වෙන්ව ගියෝය, බාර්ණබස් මාර්ක් කැඳවාගෙන, කුප්‍රසට නැවෙන් ගියේය.” (ක්‍රියා 15:39) මෙම මේරූ පුරුෂයන් එම අවස්ථාවේ දී තම චිත්ත වේගයන් පාලනය කර ගැනීමට අසමත්වීම අප හට අනතුරු ඇඟවීමක් කළ යුතු ය. එය ඔවුන්ට සිදුවිය හැකි වූවා නම්, එය අපටත් විය හැකි ය. එනමුත්, ඔවුහු තමන් අතර භේදයක් වර්ධනය වන්නට හෝ බද්ධ වෛරයක් දළු ලන්නට ඊට ඉඩ නුදුන්හ. මීට සම්බන්ධ සහෝදරයන් තමන්ගේ චිත්ත වේගයන් යළිත් පාලනය කර ගත් බවත්, පසු ව සමාදානයෙන් එකට වැඩ කළ බවත් වාර්තාව ඔප්පු කරයි.—කොලොස්සි 4:10; 2 තිමෝති 4:11.
18. හැඟීම් රිදවනු ලැබේ නම්, මේරූ ක්‍රිස්තියානියෙකුට කුමක් කළ හැකි ද?
18 දෙවියන් වහන්සේගේ ජනයා අතර, සිත් රිදවීම්, අමනාප පවා තිබෙන්නට හැකි බවට අපට අපේක්ෂා කළ හැකි ය. ඒවා හෙබ්‍රෙව්වරුන්ගේ කාලවලත්, ප්‍රේරිතයන්ගේ දවස්වලත් තිබුණි. ඒවා අපගේ කාලයේ දී යෙහෝවඃ වහන්සේගේ සේවකයන් අතරත් සිදුවිණි, මක්නිසාදයත් අප සියල්ලන් ම අසම්පූර්ණ බැවිනි. (යාකොබ් 3:2) සහෝදරයන් අතර ඇති වන එවැනි ගැටලු ඉක්මනින් ම විසඳා ගන්නා ලෙස යේසුස් වහන්සේ සිය අනුගාමිකයන්ගෙන් උදක් ම ඉල්ලා සිටි සේක. (මතෙව් 5:23-25) එහෙත්, අපගේ ආත්ම දමනය දියුණු කර ගැනීම මගින් ඒවා මුල් අවස්ථාවේ දී ම වළක්වා ගැනීම ඊටත් වඩා හොඳ ය. ඔබගේ සහෝදරයෙකු හෝ සහෝදරියක විසින් සාපේක්ෂ වශයෙන් කුඩා දෙයක් කීමෙන් හෝ කිරීමෙන් ඔබට මදි පුංචිකමක් සිදු වුණා නැත්නම් අමනාපයක් ඇති වුණා කියා හැඟෙනවා නම්, ඔබගේ චිත්ත වේගයන් නිකම් පාලනය කර ගෙන එය අමතක කර නොදමන්නේ ඇයි? යමෙක් තමා කළ වරද පිළිගන්නා තෙක් ඔබට සෑහීමකට පත් වෙන්නට බැරුවාක් මෙන්, එම තැනැත්තා සමඟ පොරට යාම ඇත්තට ම අනිවාර්යයෙන් ම අවශ්‍ය ද? ඔබ ඔබගේ චිත්ත වේගයන් කොතරම් පාලනය කර ගන්නවා ද?
එය කළ හැක!
19. අපගේ චිත්ත වේගයන් පාලනය කිරීම සම්බන්ධ ව අපගේ සාකච්ඡාව කේන්ද්‍ර ගත කොට තිබීම සුදුසු වන්නේ මන්ද?
19 අප මූලික වශයෙන් සලකා බලා ඇත්තේ ආත්ම දමනයේ එක් පැත්තක් පමණි, එනම් අපගේ චිත්ත වේගයන් පාලනය කර ගැනීම ගැනයි. ඇරත් එය මූලික ක්ෂේත්‍රයක් වෙයි, මක්නිසාදයත්, අපගේ චිත්ත වේගයන් පාලනය කර ගැනීමට අසමත්වීම, අපගේ දිව, අපගේ ලිංගික ආවේගයන්, අපගේ ආහාර ගැනීමේ පුරුදු සහ අප විසින් ආත්ම දමනය විදහා පෑ යුතු ජීවිතයේ වෙනත් බොහෝ පැති පාලනය කර ගැනීමට අසමත්වීමට එය තුඩු දෙයි. (1 කොරින්ති 7:8, 9; යාකොබ් 3:5-10) එනමුත්, ධෛර්යවත් වන්න, මක්නිසා ද, ඔබට ආත්ම දමනය පවත්වා ගැනීමෙහි ලා දියුණු විය හැක.
20. දියුණු වීම කළ හැකි බවට අපට ස්ථිර විය හැක්කේ කෙසේ ද?
20 යෙහෝවඃ වහන්සේ අපට උපකාර කිරීමට කැමැත්තෙන් සිටින සේක. අපට ස්ථිර විය හැක්කේ කෙසේ ද? හොඳයි, ආත්ම දමනය යනු උන් වහන්සේගේ ආත්මයේ ඵලවලින් එකකි. (ගලාති 5:22, 23) මේ අනුව, ශුද්ධාත්මයේ ඵල විදහා පෑම සඳහා, යෙහෝවඃ වහන්සේ වෙතින් එය ලබා ගැනීමට අපට සුදුසුකම් ඇති කර ගැනීම සඳහා වැඩ කරන්නේ කොතරම් ප්‍රමාණයකට ද, ඒ ප්‍රමාණයට ම වඩාත් ආත්ම දමනයෙන් යුක්ත වීමට අපට අපේක්ෂා කළ හැකි ය. යේසුස් වහන්සේගේ සහතිකය කිසිදාක අමතක නොකරන්න: “ස්වර්ගීය පියාණන්වහන්සේ තමන්වහන්සේගෙන් ඉල්ලන්නන්ට ශුද්ධාත්මය [දෙන] සේක”!—ලූක් 11:13; 1 යොහන් 5:14, 15.
21. ආත්ම දමනය හා ඔබගේ චිත්ත වේගයන් සම්බන්ධයෙන් අනාගතයේ දී කුමක් කරන්නට ඔබ අධිෂ්ඨාන කරගෙන තිබේ ද?
21 තම චිත්ත වේගයන් නිදහසේ පළවීමට ඉඩහැරියා වූ පුද්ගලයන් සමඟ හැදී වැඩුණු අයට, වඩාත් පහසුවෙන් කලබල වන ස්වභාවයකින් යුත් අයට, නැතහොත් ආත්ම දමනය විදහා පෙන්වීමට කිසිදාක වෙර නොදැරූ අයට මෙසේ කිරීම වඩාත් දුෂ්කර කාර්යයක් විය හැක. එවැනි ක්‍රිස්තියානිවරයෙකු සම්බන්ධයෙන් ගත් කල, ආත්ම දමනය පැවත, එය ඔහු තුළ උතුරා යාමට සැලැස්වීම සැබෑ අභියෝගයක් විය හැකි ය. එහෙත් එය කළ හැකි යමකි. (1 කොරින්ති 9:24-27) අප මෙම වත්මන් දේවළ පිළිවෙළේ අවසානයට වඩ වඩාත් ළං වෙනවාත් සමඟ ම, අධික වෙහෙසීම් හා පීඩනයන් එන්ට එන්ට ම වැඩි වනු ඇත. අපට ආත්ම දමනය අඩුවෙන් නොව, තව තවත් වැඩියෙන් අවශ්‍ය වනු ඇත! ඔබගේ ආත්ම දමනය සම්බන්ධයෙන් ඔබ ව පරීක්ෂා කර බලන්න. ඔබ විසින් දියුණු වීමට අවශ්‍ය පැත්තක් ඔබට පෙනේ නම්, ඒ ගැන ක්‍රියා කරන්න. (ගීතාවලිය 139:23, 24) දෙවියන් වහන්සේගේ ආත්මය තව තවත් උන් වහන්සේගෙන් ඉල්ලන්න. උන් වහන්සේ ඔබට ඇහුම්කන් දෙනවා ඇත, උපකාර කරනවා ඇත, එවිට ඔබගේ ආත්ම දමනය ඔබ තුළ පැවත, උතුරා යනවා ඇත.—2 පේතෘස් 1:5-8.
මෙනෙහි කිරීම සඳහා කරුණු
◻ ඔබගේ චිත්ත වේගයන් පාලනය කර ගැනීම මෙතරම් වැදගත් වන්නේ මන්ද?
◻ හාමාන්ගේ සහ එවෝදියා හා සින්තිකීගේ උදාහරණවලින් ඔබ ඉගෙන ගෙන තිබෙන්නේ කුමක් ද?
◻ අමනාප වීමට හේතුවක් තිබේ නම්, අවංක ලෙස ම ඔබ කිරීමට උත්සාහ කරන්නේ කුමක් ද?
◻ යම් අමනාපයක් රඳවා තබා ගැනීමෙන් වැළකීම සඳහා ආත්ම දමනය ඔබට කෙසේ උපකාර කරයි ද?
[18වන පිටුවේ පින්තූරය]
ෆීලික්ස් හා දෘසිල්ලා ඉදිරියෙහි, සිටින විට, පාවුල් ධර්මිෂ්ඨකම හා ආත්ම දමනය ගැන කථා කළේ ය