ආනන්දජනක සමුළු දිව්‍ය ඉගැන්වීම්වලට අනුග්‍රහ දක්වයි
අද දින, ක්ෂණික ව තොරතුරු සම්භාරයක් පැතිර යාමක් ලෝකය අද්දකිමින් සිටී. ප්‍රායෝගික වශයෙන් තමන්ට කල්පනා කළ හැකි ඕනෑ ම විෂයක් සම්බන්ධයෙන්, රූපවාහිනියෙන් හා ගුවන්විදුලියෙන් ද, පොත් පත්වල ස්වරූපයෙන් හෝ පරිගණක තුළින් ද, බොහෝ දුරට අසීමිත වූ දැනුම් සම්භාරයක බෙදා හැරීමක් සිදු වේ. එහෙත්, ජනයා තවමත් රෝගාතුර වී මිය යති. අපරාධ, සාගින්න හා දිළිඳුකම ලොව පුරා පවතින අතර, චිත්තවේගී කැළඹීම් මෙතෙක් නොවූ පරිමාණයකින් ජනයාට බලපා ඇත. කොතරම් දැනුමක් පැවතුණ ද, ඉන් කාරණා හරිගැස්වීමට අසමත් වී තිබේ. ඒ මන්ද? ඊට හේතුව මනුෂ්‍ය වර්ගයා දෙවියන් වහන්සේගේ ප්‍රඥාවට පිටු පා තිබීම ය.
එසේ නම්, යෙහෝවඃ වහන්සේගේ සාක්ෂිකරුවන්ගේ මෑතක පවත්වන ලද සමුළුවල තේමාව හැටියට “දිව්‍ය ඉගැන්වීම” තෝරා ගැනීම කොතරම් උචිත ද! ජීවිතය ගලවන සැබෑ වටිනාකමක් ඇත්තේ, දේව වචනය වන, බයිබලයෙන් සොයාගත හැකි ඉගැන්වීම්වලට පමණක් බව, එම වැඩසටහන, ඊට සහභාගි වූ අයට මතක් කර දුණි.
මෙහි පළමු සමුළුව, අමෙරිකා එක්සත් ජනපදයේ, නිව් යෝක් හි, යූනියන්ඩේල් නම් ස්ථානයේ ජූනි 3වන, බ්‍රහස්පතින්දා ආරම්භ විය. එතැන් පටන්, එම වැඩසටහන රටක් රටක් පාසා, විවිධ නගරවල ඉදිරිපත් කරන ලද අතර අප්‍රිකානු හා දකුණු අමෙරිකානු මහාද්වීපයන්හි ඉදිරිපත් කිරීමත් සමඟ නිමාවට පත් විය.
පළමු දිනයේ පස්වරුව
දිව්‍ය ඉගැන්වීමේ එක් අංගයක් අවධාරණය කළ තේමාවක් සෑම දවසකට ම යොදා තිබුණි. උදාහරණයක් හැටියට, පළමු දිනයේ වැඩසටහන පදනම් ව තිබුණේ “දෙවියන් වහන්සේගෙන් වූ ඉගැන්වීම දැන ගැනීම” යන මාතෘකාව මත ය. (යොහන් 7:17) එම දිනය ගෙවී යත් ම, මෙම අදහස හොඳින් කාවද්දවනු ලැබී ය.
ගීතිකාවකින් හා යාච්ඤාවකින් පසු, සමුළු සභාපති “දිව්‍ය ඉගැන්වීම අප ව එක්කරයි” නමැති කථාව සමඟින් වැඩසටහන ආරම්භ කළේ ය. යෙහෝවඃ වහන්සේගේ මාර්ග ඉගෙන ගැනීමෙන් හා උන් වහන්සේගේ මාවත්වල ගමන් කිරීමෙන් උන් වහන්සේගේ ජනයා එක්සත් ව සිටින බව ඔහු පෙන්වා දුන්නේ ය. (මීකා 4:1-5) දිව්‍ය ඉගැන්වීම ඔවුන්ගේ එක්සත්කම ශක්තිමත් කරයි. ඔවුන්ගේ එක්සත් සමාගමෙහි ප්‍රීති වන හැටියට සමුළුවට සහභාගි වූ අයට දිරිගන්වනු ලැබී ය.—ගීතාවලිය 133:1-3.
පස්වරුවේ අපරභාගයේ, “දෙවියන් වහන්සේගේ මාර්ග ගැන අපට උගන්වන රැස්වීම්” නමැති කථා මාලාවක් තුළ නිති පතා පවත්වන සභා රැස්වීම් ගැන සාකච්ඡා කරනු ලැබී ය. අප එකට හමුවන විට, අප යෙහෝවඃ වහන්සේට ගෞරව කරන බවත් එසේ උන් වහන්සේගේ ආශීර්වාද ලබන බවත් සමුළුවට පැමිණ සිටි අයට පළමු කථිකයා මතක් කර දුන්නේ ය. ඊට පසු ව කථා කළ කථිකයා රැස්වීම්වලට සහභාගි වීමේ අවශ්‍යතාව අවධාරණය කළේ ය. එසේ කිරීමෙන්, අපි යෙහෝවඃ වහන්සේ ව ප්‍රසිද්ධියේ පසසමු, අපගේ ඇදහිල්ල නිරූපනය කරමු, එමෙන් ම අන්‍යයන්ගේ ඇදහිල්ල ශක්තිමත් කරන්නෙමු. අප රැස්වීම්වල ඉගෙන ගන්නා දේ ක්‍රියාවට නැගීමේ අවශ්‍යතාව කථා මාලාවේ තෙවන කථිකයා පෙන්වා දුණි. අප “වචනය අසන්නෝ පමණක් නොවී එය පිළිපදින්නෝ” විය යුතු ය.—යාකොබ් 1:22.
ඉන් පසු ව යෙහෝවඃ වහන්සේට ප්‍රශංසාවේ ගී ගායනා කිරීම පිළිබඳ කදිම සාකච්ඡාවකට සවන් දිය හැකි විය. හෘදයෙන් නැගෙන ගී ගැයීම අපගේ නමස්කාරයේ වැදගත් කොටසකි. මෙම කථාවෙන් පසු, “දිව්‍ය ඉගැන්වීම ජයනාද කරයි” යන මූලික ඇමතුම ඉදිරිපත් කරනු ලැබී ය. මොනතරම් යෝග්‍ය මාතෘකාවක් ද! “ඕනෑ ම කෙනෙකුට ලබාගත හැකි හොද ම ඉගැන්වීමේ ප්‍රභවය යෙහෝවඃ වහන්සේ වන සේක.” යයි එම කථිකයා පැවසී ය. ඉන් අනතුරුව, මනුෂ්‍ය මොළයේ ආශ්චර්යය පිළිබඳ කෙටි සාකච්ඡාවකින් පසු, ඔහු මෙසේ පැවසුවේ ය: “අපගේ සිතිමේ හැකියාවන් අප මූලික ව පාවිච්චි කළ යුත්තේ, දිව්‍ය ඉගැන්වීම් ලබා ගැනීමට ය. සැබෑ ප්‍රඥාව ලැබෙන්නේ එමගින් පමණකි.” මොනතරම් සැබෑ ද!
දෙවන දිනයේ පෙරවරුව
“අපගේ ගැලවුම්කරුවාණන් වන දෙවියන් වහන්සේගේ ඉගැන්වීම අලංකාර කරමින් සිටින්න” යන්න සමුළුවේ දෙවන දිනයේ තේමාව විය. (තීතස් 2:10) මෙම කරුණ හුවා දක්වනු ලැබුවේ “භූත ඉගැන්වීම්වලට එරෙහි ව දිව්‍ය ඉගැන්වීම” යන කථාව තුළ ය. එසේ ය, භූතයන්ටත් තමන්ගේ ඉගැන්වීම් ඇත. (1 තිමෝති 4:1) කථිකයා පැහැදිලි කළ ලෙසින්, බොරු ඉගැන්වීම් මෙන් ම යක්ෂයාගේ කපටි මාර්ග අනාවරණය කිරීම මගින් දිව්‍ය ඉගැන්වීම් සාතන්ගේ “ප්‍රඥාවට” එරෙහි ව ජයනාද දෙයි. මෙනිසා, හෘදය නිසියාකාර ව සැකසී ඇති 45,00,000ක් පමණ ක්‍රිස්තියානින් තවදුරටත් සාතන්ගේ අන්ධකාරයට වහල් ව නොසිටිති.—යොහන් 8:32.
එහෙත්, අප සාතන්ට එරෙහි ව ක්‍රියා කරමින් සිටිය යුතු ය. “ඔබ ලෝකයේ ස්වභාවයට එරෙහි ව සිටින්නෙහි ද?” යන කථාව මගින් මෙය අවධාරණය කරනු ලැබී ය. මෙම ලෝකයේ ස්වභාවය මාරාන්තික ය. එය දිරිගන්වන්නේ නීච සදාචාරයක් ය, ආධිපත්‍යය පිළිබඳ ව කැරලිකාර දෘෂ්ටියක් ය, එමෙන් ම ද්‍රව්‍යමය දේවල් සඳහා කෑදර ආශාවක් ය. ක්‍රිස්තියානියෙක් තමා ව නිතර පරීක්ෂාවට ලක් කළ යුතු ය. තමා නරඹන, සවන් දෙන හා කියවන දේවල් ගත් කල, ඔහු තුළ තවදුරටත් උසස් ප්‍රමිති තිබේ ද? දිරිගන්වන ලෙසින්, කථිකයා මෙසේ පැවසුවේ ය: “සහෝදර සහෝදරියෙනි, බාලයෙනි, මේ සම්බන්ධයෙන් ඔබ මේ වන විටත් යොදන අවංක වෑයම සඳහා අපි ඔබට ප්‍රශංසා කරන්නෙමු.”—1 යොහන් 2:15-17.
ලෝකයේ ස්වභාවයට එරෙහි වීම දුෂ්කර කරවන්නා වූ සාධකයක් ඇත. එය කුමක් ද? අප සියල්ලන් ම අසම්පූර්ණ ය. යේසුස් වහන්සේ අපගේ පාප සඳහා මිය ගිය බව සැබෑවක් වුවත්, අප තවදුරටත් පාපයේ නැඹුරුවාවට එරෙහි ව සටන් කළ යුතු ය. “පහත වැටුණු මාංසය කෙරෙහි පාපයේ ග්‍රහණයට එරෙහි ව සටන් වැදීම” යන කථාව තුළ මෙය සැලකිල්ලට ගනු ලැබී ය. වෙනත් දෑ අතර එම කථිකයා කියා සිටියේ, පාපයට එරෙහි අපගේ අරගලය අප ජයග්‍රහණය කරන්නට නම් අප අලුත් පුද්ගලිකත්වය පැළඳගෙන අපගේ පාපතර නැඹුරුවාවන්ට අනුබල දෙන ඕනෑ ම දෙයකින් අප වැළකී සිටිය යුතු බව ය.
“සුවදායක ඉගැන්වීම ඔබගේ ජීවන මාර්ගය කර ගන්න” යන්න ඊළඟ කථාවේ තේමාව විය. ඇතැම් අය තමන්ගේ ශරීර සෞඛ්‍ය ගැන පමණට වඩා සැලකිලිමත් වෙති. කෙසේ වෙතත්, සත්‍ය වශයෙන් ම, ආත්මික සෞඛ්‍ය වඩාත් වැදගත් වේ. මේ සම්බන්ධ අපගේ වගකීම් බරපතළ ලෙස ගන්නා හැටියට කථිකයා අවධාරණය කළ අතර ක්‍රිස්තියානි කාන්තාවන් සඳහා ඔහු විශේෂාකාරයෙන් දිරිගන්වන යමක් පැවසුවේ ය. ඔහු කියා සිටියේ මෙයයි: “සේවයේ සිය ජ්වලිතය පිළිබඳවත්, තමන්ගේ පෞද්ගලික වගකීම්වලට සැලකිල්ල දැක්වීම පිළිබඳවත් හොඳ සමතුලිත තත්ත්වයක් පවත්වන්නා වූ වයස්ගත සහෝදරියන් හා යෞවන සහෝදරියන් යන දෙපිරිස ම අපි අතිශයින් අගය කරන්නෙමු.” එසේ ය, අප ව ලෝකයෙන් වෙන් කරන්නා වූ සුවදායක ඉගැන්වීම් සඳහා අපි සියල්ලෝ ම යෙහෝවඃ වහන්සේට කෘතඥ වන්නෙමු.
උදෑසන සැසිවාරය අවසන් වූයේ “දිව්‍ය ඉගැන්වීම ජීවිතයේ අරමුණ හෙළි කරයි” යන කථාවෙනි. එය ඉදිරිපත් කළ කථිකයා “ ‘ජීවිතයේ අරමුණ කුමක් ද?’ යන්න සෑම කෙනෙක් ම පාහේ, ඉක්මනින් ම හෝ පසු ව කල්පනා කරන දෙයකි.” යයි පැවසුවේ ය. එම පැනයට සැබෑ පිළිතුරක් දෙන්නේ බයිබලය පමණක් බව බලගතු තර්ක සමඟින්, ඔහු ඔප්පු කළේ ය. ඉන් අනතුරුව, දෙවියන් වහන්සේගේ පුදුම සහගත පොරොන්දු කාර්ය සාධක ආකාරයකට අපගේ ජීවිතයට අරමුණක් දෙන බව කථිකයා පෙන්වා දුන්නේ ය. බොහෝ දුරට, සබයේ වැඩි දෙනෙක් එවිට කල්පනා කරන්නට ඇත්තේ, ‘මගේ ප්‍රදේශයේ සිටින ජනයා සවන් දිය යුත්තේ මෙන්න මේ දෙයටයි’ යනුවෙනි. පාලක මණ්ඩලයේ කල්පනාවත් එය ම විය. මෙම කථාව අවසානයේ ජීවිතයේ අරමුණ කුමක් ද? නමැති නව විවරණිකාව මුදා හරිනු ලැබී ය. සෑම කෙනෙක් ම කොතරම් ප්‍රීතියට පත් වුණා ද! එදින දහවල් විවේකය නව විවරණිකාව සවිස්තර ව දැකබලා ගැනීමට ප්‍රස්තාවක් ලබා දුණි.
දෙවන දින පස්වරුව
පස්වරුවේ පළමුවන කථාවේ සැනසිලිදායක තේමාව වූයේ “ඔබගේ සියලු කාන්සාවන් යෙහෝවඃ වහන්සේ මත තබන්න” යනුයි. කාරණා බොහොමයක් කාන්සාවට හේතු වුව ද, අපගේ සියලු කාන්සාවන් අප උන් වහන්සේ මත තැබිය යුතු බව දේව වචනය පවසයි. (1 පේතෘස් 5:6, 7) ඇතැම් ගැටලු දිගට ම පවතින බව සැබෑවකි, මේ සම්බන්ධයෙන් කථිකයා මෙසේ උදක් ම ඉල්ලා සිටියේ ය: ‘ඉවසන්න. යෙහෝවඃ වහන්සේ මත රැඳී සිටින්න. බයිබලය අනුගමනය කිරීම නිතර හොඳ ම ක්‍රමය බව ස්ථීර ව විශ්වාස කරන්න. අපගේ හෘදයන් යෙහෝවඃ වහන්සේ කෙරෙහි අප ස්ථීර ව තබාගෙන සිටින්නේ නම්, සියලු සිතුවිලි අභිබවා යන “දෙවියන්වහන්සේගේ සමාදානය” අප භුක්ති විඳින්නට පටන් ගන්නවා ඇත.’—පිලිප්පි 4:6, 7.
ඊළඟ කථා හතර පෙන්නුම් කළේ දිව්‍ය ඉගැන්වීම පවුල් ජීවිතයට අදාළ වන බව ය. “විවාහය කල්පවතින බැම්මක් කර ගැනීම” නමැති එහි පළමුවැන්න තුළින්, ලෝකයේ බොහෝ දෙනෙකු විසින් කල්පනා කෙරෙන ආකාරයකට, විවාහය, යෙහෝවඃ වහන්සේගේ ඇස් හමුවේ ඉවත් කළ හැකි යමක් නොවන බව සමුළුවට පැමිණි අයට සිහිපත් කරන ලදි. කෙසේ වෙතත්, විවාහය සාර්ථක කර ගැනීමට නම්, අප යෙහෝවඃ වහන්සේගේ මඟ පෙන්වීම අනුගමනය කළ යුතු ය. උන් වහන්සේ අප ව සෑදූ සේක. එබැවින්, ලැබිය හැකි හොඳ ම විවාහ උපදෙස් අඩංගු ව ඇත්තේ උන් වහන්සේගේ දේවානුභාවය ලත් වචනයෙහි ය.
“ඔබගේ පවුලේ ගැලවීම සඳහා දැඩි පරිශ්‍රමයක් දරන්න” නමැති කථාව මෙම අර්බුදකාරී කාලවල පවුලක් රැක බලා ගැනීමේ දී ඉදිරිපත් වන අභියෝග පිළිබඳ ව සාකච්ඡා කළේ ය. (2 තිමෝති 3:1) මව්පියෝ සිය දරුවන්ට ශාරීරික ස්වස්ථතාව, හොඳ සිරිත් විරිත්, වැඩ කළ යුතු ආකාරය මෙන් ම, අන්‍යයන් කෙරෙහි ගුණවත් හා සැලකිලිමත් විය යුතු ආකාරය උගන්වති. වඩාත් වැදගත් දෙය නම්, යෙහෝවඃ වහන්සේගේ කැප වූ සේවකයන් වීමට ඔවුන් සිය දරුවන්ට ඉගැන්වීම ය.—හිතෝපදේශ 22:6.
“දෙමාපියෙනි, ඔබගේ දරුවන්ට සුවිශේෂී අවධානයක් අවශ්‍ය ය” යන ඊළඟ සාකච්ඡාව තුළ, දරුවන්ගේ දුර්වලකම්වලට නෙත් වසා ගන්නේ නැති ව, දරුවන්ට ප්‍රශංසා කිරීමේ අවශ්‍යතාව කථිකයා සමුළුවට පැමිණි සිටි අයට සිහිගැන්වී ය. වංකකම, ද්‍රව්‍යවාදය හෝ ආත්මාර්ථකාමිත්වය කෙරෙහි නැඹුරුවීම පිළිබඳ ව මව්පියන් විශේෂාකාරයෙන් සාවධාන ව සිටිය යුතු ය.’
සමුළුවට සහභාගි වූ යෞවනයන් විශේෂාකාර ලෙස “යෞවනයෙනි—ඔබ අවනත වන්නේ කාගේ ඉගැන්වීම්වලට ද?” යන කථාවට සැලකිල්ලෙන් සවන් දුන්නෝ ය. යෞවන ක්‍රිස්තියානින් සඳහා අද දවසේ කාරණා දුෂ්කර ය. ලෝකය සමඟ ගමන් කිරීම පහසු ය, එහෙත් මෙය මඟ පෙන්වන්නේ මරණයටයි. දිව්‍ය ඉගැන්වීම්වලට එකඟ ව සිටීමට තෝරා ගැනීම සඳහා යෞවනයෙකුට ධෛර්යයක් ඕනෑ කළත්, එය දැන් මහත් ආශීර්වාදයන් ද අනාගතයේ දී සදාකාල ජීවිතය ද ලබා දෙනු ඇත.—1 තිමෝති 4:8.
දෙවන දිනය අවසන් වුණේ සිය මැවුම්කරුවාණන් දැන් සිහි කරන යෞවනයෝ නමැති හෘදය උණුසුම් කරවන නාට්‍යයෙන් ය. එය හඳුන්වා දෙමින්, එහි අධ්‍යක්ෂක දෙවියන් වහන්සේගේ සංවිධානයේ සිටින යෞවනයන් ව, “යෙහෝවඃ දෙවියන් වහන්සේට සහ උන් වහන්සේගේ පත්කළ ස්වර්ගීය රජාණන් වන ක්‍රිස්තුස් යේසුස් වහන්සේට භක්තිමත් සේවයෙහි පක්ෂපාතීව යෙදී සිටින දිව්‍යාණ්ඩු සේනාවක්” හැටියට හැඳින්වී ය. ඔහු වැඩිදුරටත් කථා කරමින් කියා සිටියේ, “අපගේ යෞවන ජනයා ඇත්තෙන් ම යහපත් යම් කිසිවක් අත්කර ගනිමින් සිටිති!” යනුවෙනි. එම නාටකය පැහැදිලි ව පෙන්නුම් කළේ, මව්පියෙක් දරුවෙකු ව හොඳින් පුහුණු කරනවා නම්, ඔහු වයසින් වර්ධනය වී, තනි ව යෙහෝවඃ වහන්සේට සේවය කරන විට එය දරුවාට යහපත් ප්‍රතිඵල ගෙන දෙන බව ය.
තෙවන දිනයේ පෙරවරුව
තෙවන දිනයේ මාතෘකාව වූයේ “සියලු ජාතීන්ගේ ජනයාට දිගට ම උගන්වන්න” යනු ය. (මතෙව් 28:19, 20) සමුළුවට පැමිණ සිටි අය නිසැක ව ම දේශනා සේවය සම්බන්ධයෙන් කාලෝචිත උපදෙස් බලාපොරොත්තු වූ අතර ඔවුන්ගේ බලාපොරොත්තුව කඩ කරනු ලැබුවේ නැත. “දේශනා කිරීමේ හා ඉගැන්වීමේ. අපගේ බල පැවරුම ප්‍රීතියෙන් ඉටු කිරීම” නමැති කථා මාලාව සාක්ෂි දැරීමේ වැඩයෙහි දිගට ම යෙදී සිටින්නට වූ ඔවුන්ගේ අධිෂ්ඨානය ශක්තිමත් කළේ ය. පළමුවන කථාව මුල් බැහැ දැකීම් ගැනත්, දෙවැන්න නැවත බැලීම් ගැනත්, තෙවැන්න බයිබල් පාඩම් ගැනත් සාකච්ඡා කළේ ය. තම පවුල් සහ මිත්‍රයන් සමඟ සමුළුවට සහභාගි වනු වස් ලොව වටා සිටින මිෂනාරිවරුන්ට ආරාධනා කොට තිබිණි. ඔවුන්ගේ පැවරුම්වල ඔවුන් ලබන සාර්ථකත්වයන් පිළිබඳ ව යම් තීක්ෂ්ණ දෘෂ්ටියක් හෙළීමට ලැබුණ ප්‍රස්තාව ප්‍රීතියක් විය. “ශුභාරංචිය සමඟින් සෑම කෙනෙකු වෙත එළඹීම” නමැති ඊළඟ කථාව අනියම් සාක්ෂි දැරීමෙන් ඇති වන ප්‍රබල බලපෑම සලකා බැලී ය.
යෙහෝවඃ වහන්සේගේ සාක්ෂිකරුවන්ගේ විශාල රැස්වීම්වල දී නිතර ප්‍රධාන සිද්ධියක් වන, බව්තීස්ම කථාවෙන් උදෑසන සැසිවාරය නිමාවට පත් විය. සමුළුවක් සමුළුවක් පාසා, අලුත කැප වූ අයගේ විශාල කණ්ඩායම්, රැස් වූ පිරිස ඉදිරියේ සිටගෙන, තමන්ට යොමු කරන ලද ප්‍රශ්න දෙකට නිසැකකමින් යුක්ත ව එසේ ය කියා පිළිතුරු දුන්හ. ඉන් අනතුරුව ඔවුහු සියල්ලන් ඉදිරියේ බව්තීස්මය ලැබූහ. දිව්‍ය ඉගැන්වීමේ ශ්‍රේෂ්ඨ බලපෑම පිළිබඳ කොතරම් බලගතු සාක්ෂියක් ද!
තෙවන දිනයේ පස්වරුව
පස්වරු වැඩසටහන ගැඹුරු ශුද්ධ ලියවිලිමය සාකච්ඡාවකින් ආරම්භ විය. මතෙව් 24වන හා ලූක් 21වන පරිච්ඡේදවල වදන් යෙහෝවඃ වහන්සේගේ සාක්ෂිකරුවෝ හොඳින් දනිති. මෙම බයිබල් පරිච්ඡේද ගැන අලුත් යමක් කීමට නැතැයි යමෙක් කල්පනා කළා ද? එසේ නම් ඔවුන් කොතරම් වැරදි සහගත වී ද! “ඔබගේ පැමිණ සිටීමේ ලකුණ කුමක් වනු ඇත් ද?” හා “අපට කිව මැන, මේ දේවල් සිදුවන්නේ කවදා ද?” යන කථා, මෙම පරිච්ඡේද දෙකේ ඇතැම් කොටස් පිළිබඳ ව සිත් ඇදගන්නා සාකච්ඡාවක් තුළට සමුළුවට පැමිණ සිටි අය ව රැගෙන ගිය අතර ඇතැම් වගන්ති සම්බන්ධයෙන් අලුත් ම තොරතුරු ද ඉදිරිපත් කළේ ය. ඉදිරිපත් කරන ලද කරුණු තමන් තේරුම් ගත්තේ දැයි බැලීමට, සැසිවාරයෙන් පසු, සමුළුවට පැමිණ සිටි අය තමන්ගේ සටහන් සසඳා බලත් ම, ප්‍රාණවත් සාකච්ඡා ඇති විය. මෙම තොරතුරු මුරටැඹ සඟරාවේ ප්‍රකාශයට පත් වන විට, නිසැක ව ම, ප්‍රශ්න බොහොමයකට පිළිතුරු දෙනු ලබනවා ඇත.
“ඔබගේ බයිබල් ප්‍රශ්නවලට විස්තරාත්මක පිළිතුරු” යන කථාව තුළත් බයිබලය අධ්‍යයනය හා සම්බන්ධ තේමාව දිගට ම සාකච්ඡා විය. අනතුරුව වැඩසටහන වෙනත් මගකට යොමු විය. වොච්ටවර් බයිබල් ස්කූල් ඔෆ් ගිලියඩ් හි 50වන සංවත්සරය 1993 වසර විය. එම කාල පරිච්ඡේදය තුළ ඉටු කරන ලද දේවල් “පනස් වසරක ගිලියඩ් මිෂනාරි පුහුණුව සහ ක්‍රියාකාරකම්” නම් කථාව තුළ සමුළුවට පැමිණ සිටි අයට පෙන්වා දෙනු ලැබී ය. “සමස්ත ලෝක ක්ෂේත්‍රයේ එවැන්ජලිස්ත ඉටු කිරීම්” නම් කථාව තුළ යම් මිෂනාරිවරයෙක් එතැන සිටියේ නම්, සබය සමඟ තමන්ගේ අද්දැකීම් සමහරක් බෙදා ගැනීමට ඔවුන්ට ආරාධනා කරනු ලැබී ය. මිෂනාරිවරුන්ගේ විස්තර ඇසීම ආනන්දජනක යමක් විය!
“යෙහෝවඃ වහන්සේගේ සාක්ෂිකරුවන් අවදියෙන් සිටීමට හේතුව” නමැති ඊළඟ කථාව, තවත් ඉතිහාස පාඩමක් විය. ක්‍රිස්තියානින් පො.යු. පළමුවන සියවසේ පටන් මේ දක්වා අවදියෙන් සිටි බව එය පෙන්වී ය. එය තවත් පුදුමයකට මග පෑදුවේ ය. “මුළු ලොව පුරා රාජ්‍යය ප්‍රකාශකයෝ ක්‍රියාශීලී ව සිටිති” නමැති ඊළඟ කථාවේ මුල් කොටස තුළ, කථිකයා විශාල වෙළුමක් (තම භාෂාවෙන් එවිටමත් ලබාගත හැකි ව තිබුණු විට) ඔසවා, “ජෙහෝවා’ස් විට්නසස්—ප්‍රොක්ලෙමර්ස් ඔෆ් ගෝඩ්ස් කිඩම් නමැති මෙම නව පොතේ මුදාහැරීම අද දින මෙහි නිවේදනය කිරීමට ඉමහත් සතුටක්” යයි පැවසුවේ ය. යෙහෝවඃ වහන්සේගේ සාක්ෂිකරුවන්ගේ නවීන ඉතිහාසය පිළිබඳ විස්තරාත්මක වාර්තාවක් එම පොතේ අඩංගු කර ඇත. ස්වකීය සේවකයන් කෙරෙහි ක්‍රියාත්මක වෙමින් තිබෙන යෙහෝවඃ වහන්සේගේ ආත්මය පිළිබඳ බලගතු සාක්ෂි ඉදිරිපත් කරමින්, විඳදරා ගැනීම, අධිෂ්ඨානය හා සාර්ථකත්වය පිළිබඳ සිත් ගන්නා කථාවක් එහි පැවසේ.
හතරවන දින පෙරවරුව
ඉතාමත් ම ඉක්මනින් සමුළුවේ අවසාන දිනය උදා විය. දිනයේ මාතෘකාව වූ, “දිව්‍ය ඉගැන්වීමෙන් අප ම ප්‍රයෝජන ගැනීම” වැඩසටහනට කදිම උච්චාවස්ථාවක් සඳහා අඩිතාලම තැබී ය. එම උදෑසන සමුළුවට පැමිණ සිටි අයගේ අවධානය බලගතු කථා තුනකින් යුත් කථා මාලාවකට බැඳ තබනු ලැබී ය. “අතීතය සහ වර්තමානය සඳහා යෙරෙමියාගේ දේවානුභාවය ලත් අනතුරු ඇඟවීමේ පණිවුඩය” යන මාතෘකාව දැරූ එම කථා මාලාව තුළ යෙරෙමියා 23වන, 24වන හා යෙරෙ 25වන පරිච්ඡේදයේ පදයක් පදයක් පාසා සාකච්ඡාවක් අඩංගු විය. මෙම පරිච්ඡේදවල අඩංගු ව තිබෙන්නේ කොතරම් බලගතු පණිවුඩයක් ද! යෙරෙමියාගේ දවසේ විසූ නොඇදහිලිකාර ඊශ්‍රායෙල්වරු ඔහුගේ ඍජු, දේවානුභාවය ලත් අනතුරු ඇඟවීම් අසා වෙව්ලන්නට ඇත. එම අනතුරු ඇඟවීම් ඉෂ්ට වූ විට, මුළු ලෝකය ම වෙව්ලන්නට ඇත. අද දින දේවල් වෙනස් ස්වරූපයක් ගනී ද? කිසිසේත් නැත. යෙහෝවඃ වහන්සේගේ සාක්ෂිකරුවෝ දෙවියන් වහන්සේගේ විනිශ්චයේ පණිවුඩ ධෛර්යයෙන් යුක්ත ව දේශනා කරති. අවසානයේ, මෙම මුළු දේවල පිළිවෙළ ම යෙහෝවඃ වහන්සේගේ විනිශ්චයේ ක්‍රියාවන්ට මුහුණ දිය යුතු ය. සාතන්ගේ ලෝකයට පූර්ණ විනාශයක් මින් අදහස් කෙරේ.
ඉරිදා පෙරවරුව අවසන් වුණේ, මුලා නොවන්න, දෙවියන් වහන්සේට සරදම් නොකරන්න යන දෙවන නාට්‍යයෙනි. නීච කරවන වීඩියෝ පටි හා සංගීතයෙන් ද සෙසු ක්‍රිස්තියානින් අතර විරෝධතා වැපිරීමට ඇති නැඹුරුවාවෙන් ද, බලපෑම් ලැබීමෙන්, දිව්‍ය ඉගැන්වීම අප ව ආරක්ෂා කළ හැකි අයුරු, සිතට කා වදින ආකාරයකට එය අපට පෙන්වී ය. නාට්‍යය අවසානයේ දී, එහි සභාපති එම නාට්‍යයේ එක් චරිතයක් විසින් පවසන ලද චින්තනය පොලඹවන මෙම වදන් උපුටා දැක්වී ය: “අපි මේ ලොකයේ බලපෑම්වලට ගොදුරු නොවන තත්ත්වයක නොසිටිමු. අපි එදිරිව නොසිටියහොත් අපගේ කල්පනාවන් සූක්ෂ්ම ලෙස දූෂණය කරන්න ලෝකයට පුළුවන්. අපි ඇදහිලිවන්තව සිටින්ට යනවා ද නැද්ද යන්න රඳා පවතින්නේ අප වපුරමින් සිටින දේ මතයි.” කොතරම් සැබෑ ද!
අවසාන දින පස්වරුව
කථිකයා “අපගේ අර්බුදකාරී කාලවල් සඳහා උපකාරවත් වන ඉගැන්වීම්” නමැති ප්‍රසිද්ධ අනුශාසනාව ඉදිරිපත් කිරීම සඳහා වේදිකාවට ගිය විට සමුළුව වේගයෙන් නිමාවක් කරා ඇදී යමින් තිබුණි. පැහැදිලි හා තර්කානුකූල ආකාරයකට, අද දින අපට බලපාන මූලික ගැටලු ඔහු හඳුන්වා දුන් අතර වඩා හොඳ ජීවිතයක් භුක්ති විඳින්නට දිව්‍ය ඉගැන්වීම් අපට උපකාර කළ හැකි ආකාරයන් සමහරක් ද ඔහු පෙන්වා දුන්නේ ය. අප දැන් ශුද්ධ ලියවිල්ල මත පදනම් ඉගැන්වීම් අනුගමනය කරමින් සිටින්නේ නම්, යෙහෝවඃ වහන්සේගේ නව ලෝකයේ අපට සදාකාලයට ම එය අනුගමනය කළ හැකි බව ඔහු පැවසුවේ ය.
සතියේ මුරටැඹ පාඩමේ සාරාංශයකින් පසු, අවසාන කථාව සඳහා කාලය පැමිණියේ ය. දින හතරේ වැඩසටහනේ මූලික කරුණු කෙටියෙන් ගෙනහැර දැක් වූ කථිකයා, අලුත් ප්‍රකාශන ගැන ද සමුළුවට පැමිණ සිටි අයට මතක් කර දුන්නේ ය. වීඩියෝ කැසට් මාලාවේ දෙවැන්න, එනම්, ද බයිබල්—ඒ බුක් ඔෆ් ෆැක්ට් ඇන්ඩ් ප්‍රොෆසි ඉක්මනින් නිකුත් වන බව ද ඔහු නිවේදනය කළේ ය. ඇත්ත වශයෙන් ම, ද බයිබල්—මෑන්කයින්ඩ්’ස් ඕල්ඩස්ට් මොඩන් බුක් නම් එම වීඩියෝ කැසට් පටය දැන් ඉංග්‍රීසි බසින් ලබා ගත හැකි ය. බොස්නියා හා හෙර්සගොවීනා වැනි, බලවත් අර්බුද ඇති තැන්වලින් ලැබුණු හැඟීම් දනවන වාර්තා කියවනු ලැබී ය. අවසන් කරමින්, කථිකයා දේශනාකාරයා 12:13 හි ඇති මතු සඳහන් වදන් කියෙව්වේ ය: “සියල්ල අසනලදී, මුළු කාරණයේ තීන්දුව නම් මේය: දෙවියන්වහන්සේට භයව උන්වහන්සේගේ ආඥා පවත්වාපන්න; මේ වනාහි සියලු මනුෂ්‍යයන්ගේ යුතුකමය.”
කොතරම් කදිම සිහිගැන්වීමක් ද! සියලු මිනිස් වර්ගයා අපගේ ශ්‍රේෂ්ඨ උපදේශකයාණන් වන, යෙහෝවඃ වහන්සේ ව ප්‍රශංසා කරන්නා වූ ද, උන් වහන්සේගේ දිව්‍ය ඉගැන්වීම්වලට අවනත වන්නා වූ ද දිනය පැමිණෙන තෙක් අපි බලා ජීවත් වෙමු.
[24, 25වන පිටුවේ පින්තූර]
මොස්කව් හා කියේව් නගරවල පවත්වන ලද “දිව්‍ය ඉගැන්වීම” සමුළුවල විපාකය මහත් ප්‍රීතියක් ය
[26, 27වන පිටුවේ පින්තූර]
1. බව්තීස්මය ලැබීමෙන්, බොහෝ දෙනෙක් දෙවියන් වහන්සේට වූ තමන්ගේ කැපවීම සංකේතවත් කළහ
2. සමුළුවට පැමිණි අවුරුදු 100ක් වයසැති කෙනෙක් නව ප්‍රකාශනයක් ලැබීමෙන් මහත් සතුටට පත් විය
3, 4. චින්තනය පොලඹවන නාට්‍යයන් මහත් සේ අගය කරනු ලැබී ය
5. සමුළුවල සම්මුඛ සාකච්ඡාවට කැඳවන ලද මිෂනාරිවරු දිව්‍ය ඉගැන්වීමේ ප්‍රයෝජන ගෙනහැර දැක්වූහ