යෙහෝවඃවහන්සේ ස්වකීය අරමුණ ඉටු කරන බවට උන්වහන්සේව දැඩිසේ විශ්වාස කරන්න
“ධර්මිෂ්ඨයෝ දේශය උරුමකර ගන්නෝය, එහි සදාකල් වාසයකරන්නෝය.”—ගීතාවලිය 37:29.
1. මිනිසුන් සහ මෙම පොළොව සඳහා යෙහෝවඃවහන්සේගේ අරමුණ කුමක්ද?
යෙහෝවඃවහන්සේ අපගේ පළමු දෙමාපියන් වූ ආදම් සහ ඒවව මැවූ අවස්ථාවේ, උන්වහන්සේ ඔවුන්ව සෑදුවේ පරිපූර්ණ ලෙසය. උන්වහන්සේ ඔවුන්ව මැව්වේ, උන්වහන්සේගේ ආඥාවලට කීකරු වූවා නම් ඔවුනට පොළොව මත සදාකල් ජීවත් විය හැකි වන පිණිසය. (උත්පත්ති 1:26, 27; 2:17) එපමණක්ද නොව, දෙවියන්වහන්සේ ඔවුන් පාරාදීසමය වටපිටාවක තැබූ සේක. (උත්පත්ති 2:8, 9) යෙහෝවඃවහන්සේ ඔවුන්ට මෙසේ පැවසූ සේක: “බෝවී වැඩිවෙමින් පොළොව පූර්ණකොට ඒක යටත්කරගනිව්.” (උත්පත්ති 1:28) මෙසේ, ඔවුන්ගේ ජනිතයන් අවසානයේදී පොළොව පුරා විසිර යනු ඇති අතර, මෙම ග්‍රහයා පරිපූර්ණ, සන්තෝෂවත් මිනිස් ජාතියකින් පිරි පාරාදීසයක් බවට පත් වනු ඇත. මිනිස් පවුලට මොනතරම් කදිම ආරම්භයක් තිබුණිද! “දෙවියන්වහන්සේ තමන් සෑදූ සියල්ලම දුටුසේක. බලව ඒ ඉතා යහපත්ව තිබුණේය.”—උත්පත්ති 1:31.
2. මිනිසාගේ කටයුතුවල තත්ත්වය නිසා මතුවෙන ප්‍රශ්න කවරේද?
2 එහෙත්, වසර දහස් ගණනක් පුරා පැවත ඇති මිනිස් කටයුතුවල තත්ත්වය දෙවියන්වහන්සේගේ මුල් අරමුණ සාදෘශ්‍ය නොකරයි. මිනිස් වර්ගයා පරිපූර්ණත්වයෙන් බොහෝසෙයින් ඈත්වී සිටින අතර, සන්තෝෂයෙන්ද බොහෝ ඈත්ව සිටිත්. ලෝක තත්ත්වයන් දුකට හේතුවක් වී තිබේ, තවද පුරෝකථනය වී ඇත්තාක් මෙන්, අපගේ කාලයේදී ඒවා විස්මයජනක අයුරින් තවත් දරුණු වී ඇත. (2 තිමෝති 3:1-5, 13) එසේනම්, මිනිසා සඳහා වූ දෙවියන්වහන්සේගේ අරමුණ නුදුරු අනාගතයේදී ඉටු වනු ඇති බවට අපට නිසැකවිය හැක්කේ කෙසේද? දිගටම පවතින පීඩාකාරී තත්ත්වයන් සමඟින් තවත් දීර්ඝ කාල පරිච්ඡේද ගතවී යාවිද?
වැරදුණේ කුමක්ද?
3. යෙහෝවඃවහන්සේ මිනිස් වර්ගයාගේ කැරැල්ල සැණෙකින් අවසන් නොකළේ මන්ද?
3 දෙවියන්වහන්සේගේ ආනුභාවයලත් වචනය පිළිබඳ ඒකාන්ත දැනුමලත් අය, යෙහෝවඃවහන්සේ විසින් පොළොව මත නරක තත්ත්වයන්ට ඉඩ හැර තිබීමට හේතුව දනිති. ඒවා ගැන උන්වහන්සේ කරන්නට යන දෙයද ඔවුහු දනිති. දෙවියන්වහන්සේ මිනිසුන්ට දී තිබූ තෝරාගැනීමේ නිදහස නමැති පුදුමාකාර ත්‍යාගය, අපගේ පළමු දෙමාපියන් වැරදි ලෙස යොදා ගත් බව, බයිබල් වාර්තාවෙන් ඔවුහු ඉගෙන සිටිති. (1 පේතෘස් 2:16 සසඳන්න.) දෙවියන්වහන්සේගෙන් ස්වාධීනවූ ක්‍රියා මාර්ගය ඔවුහු වැරදි ලෙස තෝරා ගත්හ. (උත්පත්ති 2 සහ 3 පරිච්ඡේද) ඔවුන්ගේ කැරැල්ලෙන් අතිශයින් ඉමහත් ප්‍රශ්න මතුවිය, ඒවා නම්: මිනිසුන් කෙරෙහි පාලනය කිරීමට විශ්වනීය පරමාධිපතියාණන්ට අයිතියක් තිබේද? ඔවුන් සඳහා උන්වහන්සේගේ පාලනය හොඳම එකද? දෙවියන්වහන්සේගේ අධීක්ෂණයෙන් බැහැරව මිනිස් පාලනයට සාර්ථක විය හැකිද? මෙම ප්‍රශ්නවලට පිළිතුරු සැපයීමේ ස්ථිරසාර මඟ නම්, මිනිස් පාලනයේ සියවස් ගණනාවක් පසුවී යාමට ඉඩ හැරීමයි. මිනිසුන්ට තම සැදුම්කරුවාණන්ගෙන් බැහැරව සාර්ථක ලෙස පාලනය කරන්ට හැකි වනවාද යන්න, ප්‍රතිඵලවලින් කිසිඳු සැකයකින් තොරව පෙන්වනවා ඇත.
4, 5. (අ) මිනිසා දෙවියන්වහන්සේගේ පාලනය ප්‍රතික්ෂේප කිරීම නිසා ඇතිවී තිබෙන ප්‍රතිඵලය කුමක්ද? (ආ) කාලයාගේ ඇවෑමත් සමඟම කිසිඳු සැකයකින් තොරව නිරූපනය වී ඇත්තේ කුමක්ද?
4 ආදම් සහ ඒව දෙවියන්වහන්සේව අත්හැර දැමූ විට, තවදුරටත් උන්වහන්සේ ඔවුන්ව පරිපූර්ණත්වය තුළ පෝෂණය කළේ නැත. උන්වහන්සේගේ පිහිටෝපකාරයෙන් ඔවුහු පිරිහුණෝය. ප්‍රතිඵලය වූයේ අසම්පූර්ණකම, මහලු විය සහ අවසානයේදී මරණයයි. ප්‍රවේණි නියම තුළින්, අපගේ පළමු දෙමාපියෝ, අප ඇතුළු ඔවුන්ගෙන් පැවතෙන සියල්ලන්හට එම නිෂේධාත්මක ලක්ෂණ ලබා දුන්නෝය. (රෝම 5:12) එමෙන්ම වසර දහස් ගණනක මිනිස් පාලනයේ ප්‍රතිඵලය ගැන කුමක් කිව හැකිද? එය ව්‍යසනකාරී වී තිබේ, එය හරියට දේශනාකාරයා 8:9, [NW] සැබෑ ලෙස මෙසේ පැවසුවාක් මෙනි: “මිනිසා මිනිසා කෙරෙහි බලය පා තිබෙන්නේ ඔහුගේ අනතුරටය.”
5 මිනිසාට තම මැවුම්කරුවාණන්ගෙන් බැහැරව සාර්ථක ලෙස තම කටයුතු මෙහෙයවිය නොහැකි බව කාලයාගේ ඇවෑමෙන් පෙනීයන බවට කිසිඳු සැකයක් නැත. ආනුභාවලත් බයිබල් ලේඛක යෙරෙමියා මෙසේ ප්‍රකාශ කළේය: “අහෝ යෙහෝවඃවහන්ස, භූමික මිනිසාට තමාගේ මාර්ගය අයිති නැති බව හොඳින් දනිමි. ඇවිදින මිනිසාට තමාගේ පියවර මෙහෙයවීමටවත් අයිතියක් නැත.”—යෙරෙමියා 10:23, NW; ද්විතීය කථාව 32:4, 5; දේශනාකාරයා 7:29.
දෙවියන්වහන්සේගේ අරමුණ වෙනස් වී නැත
6, 7. (අ) ඉතිහාසයේ වසර දහස් ගණන යෙහෝවඃවහන්සේගේ අරමුණ වෙනස් කොට තිබේද? (ආ) යෙහෝවඃවහන්සේගේ අරමුණට ඇතුළත් වන්නේ කුමක්ද?
6 දුෂ්ටකමෙන් හා දුක්වේදනාවන්ගෙන් පිරී තිබෙන මිනිස් ඉතිහාසයේ ගතවූ මෙම වසර දහස් ගණන නිසා, දෙවියන්වහන්සේගේ අරමුණ වෙනස් කොට තිබේද? උන්වහන්සේගේ වචනය මෙසේ ප්‍රකාශ කරයි: “ස්වර්ගයන් මැවුවාවූ, පොළොව මවා සාදා එය පිහිටෙවුවාවූ, එය හිස්කමට නොමවා වාසය පිණිස එය සෑදුවාවූ දෙවියන්වහන්සේ වන ස්වාමීන්වහන්සේ [යෙහෝවඃවහන්සේ, NW] මෙසේ කියන සේක.” (යෙසායා 45:18) එහෙයින් දෙවියන්වහන්සේ පොළොව සෑදුවේ මිනිසුනට වාසය කිරීමටය, එමෙන්ම තවමත් උන්වහන්සේගේ අරමුණ එයමය.
7 යෙහෝවඃවහන්සේ පොළොව වාසය පිණිස මැව්වා පමණක් නොව, නමුත් එය පරිපූර්ණ, සන්තෝෂවත් මිනිසුන් විසින් භුක්ති විඳීමට තිබෙන පාරාදීසයක් බවට පත් වනු ඇතැයිද අරමුණු කළ සේක. “ධර්මිෂ්ඨකම වාසයකරන” “අලුත් පොළොවක්,” හෙවත් නව මිනිස් සමාජයක් තිබෙනු ඇති බවට බයිබලය පුරෝකථනය කරන්නේ එමනිසාය. (2 පේතෘස් 3:13) ඇරත් එළිදරව් 21:4හි, දෙවියන්වහන්සේගේ වචනය අපට පවසන්නේ, උන්වහන්සේගේ නව ලෝකයෙහි, “උන්වහන්සේ [මිනිස් වර්ගයාගේ] ඇස්වලින් සියලු කඳුළු පිසදමනසේක; මරණය තවත් නොවන්නේය; වැලපීමත් හැඬීමත් වේදනාවත් තවත් නොවන්නේය.” පොළොව මතට පැමිණෙන එම නව ලෝකය සම්බන්ධව කථා කරද්දී එය ‘පාරාදීසයක්’ හැටියට පැවසීමට යේසුස්වහන්සේට හැකි වූයේ එවැනි හේතු නිසාය.
8. යෙහෝවඃවහන්සේ ස්වකීය අරමුණ ඉටු කරනු ඇති බවට අපට ස්ථිර විය හැක්කේ මන්ද?
8 යෙහෝවඃවහන්සේ වූකලි සියලු බලයෙන් පූර්ණ, සියලු ප්‍රඥාවෙන් යුත්, විශ්වයේ මැවුම්කරුවාණන් බැවින්, උන්වහන්සේගේ අරමුණ නිෂ්ප්‍රභ කිරීමට කිසිවෙකුට නොහැක. “සේනාවල ස්වාමීන්වහන්සේ [යෙහෝවඃවහන්සේ, NW] දිවුරා කථාකොට: මා යෝජනාකළ ලෙසම සිදුවන්නේය; මා අදහස්කළ ලෙසම ස්ථිරවන්නේය.” (යෙසායා 14:24) මෙසේ, දෙවියන්වහන්සේ මෙම පොළොව, පරිපූර්ණ මිනිසුන් වාසය කරන පාරාදීසයක් බවට පත්කිරීමට යන බව උන්වහන්සේ පවසන විට, සිදුවනු ඇත්තේ එයයි. යේසුස්වහන්සේ මෙසේ පැවසූ සේක: “මෘදු ගතිගුණැති අය සන්තෝෂවත්ය, මක්නිසාද ඔවුන් පොළොව උරුම කර ගන්නවා ඇත.” (මතෙව් 5:5, NW; සසඳන්න ගීතාවලිය 37:29.) එම පොරොන්දුවේ ඉටුවීම කෙරෙහි අපට මුළුමනින්ම රඳා පැවතිය හැකියි. ඇත්තෙන්ම, එය සඳහා අපට අපේ දිවි පරදුවට තබා පවා ක්‍රියා කළ හැකියි.
ඔවුහු යෙහෝවඃවහන්සේව දැඩිසේ විශ්වාස කළෝය
9. යෙහෝවඃවහන්සේ කෙරෙහි තමා දැඩිසේ විශ්වාසය තැබූ බවට පෙන්වමින් ආබ්‍රහම් කළ දෙය කුමක්ද?
9 දෙවියන්වහන්සේ ස්වකීය අරමුණ ඉටු කරන බවට දැඩිසේ ඒත්තු ගෙන සිටීම නිසා, ඉතිහාසය පුරා විසූ දේව භයැති ජනයා, පොළොව කෙරෙහි උන්වහන්සේගේ අරමුණ සම්බන්ධව තම ජීවිත පරදුවට තබා ක්‍රියා කළහ. ඔවුන්ගේ දැනුම සීමිත වූවා විය හැකි වුවත්, දෙවියන්වහන්සේ කෙරෙහි දැඩිසේ විශ්වාස කළ ඔවුහු, උන්වහන්සේගේ කැමැත්ත කිරීම මත තම ජීවිත ගොඩනැංවූහ. නිදසුනක් වශයෙන්, ආබ්‍රහම් ගැන සලකා බලන්න, ඔහු ජීවත් වූයේ, යේසුස්වහන්සේ පොළොව මත විසීමට, වසර 2,000කට, එනම් බයිබලය ලිවීමටත් බොහෝ කලකට පෙරය. යෙහෝවඃවහන්සේ ස්වකීය පොරොන්දු ඉටුකරනු ඇති බවට ඔහු උන්වහන්සේ කෙරෙහි දැඩිසේ විශ්වාස කළේය. පෙනෙන විදහට, ආබ්‍රහම් මැවුම්කරුවාණන් පිළිබඳව ඉගෙන ගත්තේ නෝවා විසින් උගන්වනු ලැබූ තම ඇදහිලිවන්ත මුතුන්මිත්තා වන ෂෙම්ගෙන් වන්නට පුළුවන. මේ නිසා, කල්දිවරුන්ගේ සරුසාර ඌර් දේශයෙන් පිටත්ව කානානිවරුන්ගේ නුහුරු නුපුරුදු අන්තරාදායක දේශය වෙත යන ලෙස දෙවියන්වහන්සේ ආබ්‍රහම්හට පැවසූ විට, තමාට යෙහෝවඃවහන්සේව දැඩිසේ විශ්වාස කළ හැකි බව දැන සිටි නිසා, එම ආදිපිතෘවරයා එහි ගියේය. (හෙබ්‍රෙව් 11:8) නියමිත කාලයේදී, යෙහෝවඃවහන්සේ ඔහුට මෙසේ පැවසූ සේක: “මම ඔබෙන් මහත් ජාතියක් සාදන්නෙමි.”—උත්පත්ති 12:2, NW.
10, 11. ආබ්‍රහම් තම ඒක-ජාතක පුත්‍රයාවූ ඊසාක්ව පූජා කිරීමට කැමැත්තෙන් සිටියේ මන්ද?
10 ආබ්‍රහම්ට දාව ඊසාක් ඉපදුණායින් පසු කුමක් වීද? ආබ්‍රහම්ගෙන් පැවතෙන්නන් මහත් ජාතියක් බවට වර්ධනය වනු ඇත්තේ ඊසාක් තුළින් බව යෙහෝවඃවහන්සේ ආබ්‍රහම්හට ඇඟවූ සේක. (උත්පත්ති 21:12) මෙසේ, යෙහෝවඃවහන්සේ ආබ්‍රහම්හට, ඔහුගේ ඇදහිල්ල පරීක්ෂා කිරීමක් වශයෙන් ඔහුගේ පුත්‍ර ඊසාක් පූජා කරන ලෙස පැවසූ විට, එය පරස්පර විරෝධි යමක් ලෙස දිස්වුණා විය හැක. (උත්පත්ති 22:2) එහෙත්, යෙහෝවඃවහන්සේ කෙරෙහි පූර්ණ දැඩි විශ්වාසයක් ඇතිව සිටි ආබ්‍රහම්, ඊට එකඟවී ඊසාක්ව මරණයට පත් කිරීමට ඇත්තටම තම පිහිය අතට ගනිමින් ඒ සඳහා පියවර ගත්තේය. එම අවසන් මොහොතේ, දෙවියන්වහන්සේ දේව දූතයෙකුව එවා ආබ්‍රහම්ව ඉන් වැළැක්වූ සේක.—උත්පත්ති 22:9-14.
11 ආබ්‍රහම් මෙතරම් කීකරු වූයේ මන්ද? හෙබ්‍රෙව් 11:17-19 මෙසේ හෙළිකරයි: “ආබ්‍රහම් පරීක්ෂාකරනු ලැබූ කල, ඇදහිල්ලෙන් ඊසාක් පූජාකළේය [පූජා කළා හා සමානය, NW]. එසේය, නුඹේ වංශය ප්‍රකාශවන්නේ ඊසාක්ගෙන්යයි යමෙකුට කියනලද්දේද, ඒ පොරොන්දු සන්තෝෂයෙන් පිළිගත් ඔහු තමාගේ ඒකජාතක පුත්‍රයාව පූජාකරමින් සිටියේය [පූජාකිරීමට පියවර ගත්තේය, NW]. මළවුන්ගෙන් පවා නැගිටුවන්ට පුළුවනැයි ඔහු කල්පනාකොට, උපහැරණ වශයෙන් මරණයෙන් ඔහු නැවත ලබාගත්තේය.” රෝම 4:19-21 ඒ හා සමානව ප්‍රකාශ කරන්නේ මෙසේයි: “[ආබ්‍රහම්] ඇදහිලි නැතිකම [මදිකම, NW] කරණකොටගෙන චංචල නොවී, දෙවියන්වහන්සේගේ පොරොන්දුව දෙස බලා, . . . [දෙවියන්වහන්සේ] පොරොන්දු වූ දේ ඉෂ්ට කරන්ට උන්වහන්සේට පුළුවන කියා නිසැකව විශ්වාස කෙළේය.”
12. ආබ්‍රහම් තම ඇදහිල්ල සඳහා විපාක ලැබුවේ කෙසේද?
12 තම ඇදහිල්ල වෙනුවෙන් ආබ්‍රහම් විපාක ලැබුවේ ඊසාක්ව ගලවා ගනු ලැබීමෙන් සහ ඔහු තුළින් “මහත් ජාතියක්” බිහිවීම තුළින්ම පමණක් නොවේ, නමුත් තවත් ආකාරයක්ද තිබිණි. දෙවියන්වහන්සේ ආබ්‍රහම්ට මෙසේ පැවසූ සේක: “ඔබ මාගේ කටහඬට සවන් දී ඇති නිසා, ඔබගේ වංශය කරණකොටගෙන පොළොවේ සියලු ජාතිහු සහතිකවම තමන්ටම ආශීර්වාද කරගන්නවා ඇත.” (උත්පත්ති 22:18, NW) කෙසේද? දෙවියන්වහන්සේගේ ස්වර්ගික රාජ්‍යයේ රජ පැමිණෙනු ඇත්තේ ආබ්‍රහම්ගෙන් පැවතෙන්නන්ගේ එම පෙළපත තුළින්ය. එම රාජ්‍යය, සාතන් යටතේ ඇති මෙම නපුරු ලෝකය පැවැත්මෙන් බිඳ හෙළනු ලබනවා ඇත. (දානියෙල් 2:44, 45; රෝම 16:20; එළිදරව් 19:11-21) එවිට, රාජ්‍යය පාලනය යටතේ පිරිසිදු කරන ලද පොළොවක් තුළ, පාරාදීසය සමස්ත ලෝකය පුරා වර්ධනය වනු ඇති අතර, ‘සියලු ජාතින්ගෙන්’ පැමිණෙන, දේව කැමැත්ත කරන ජනයා පරිපූර්ණ සෞඛ්‍ය හා සදාකාල ජීවිතය භුක්ති විඳිනවා ඇත. (1 යොහන් 2:15-17) තවද එම රාජ්‍යය පිළිබඳව ආබ්‍රහම්ට තිබුණේ සීමිත දැනුමක් වුවද, ඔහු දෙවියන්වහන්සේ දැඩිසේ විශ්වාස කළ අතර, එහි ප්‍රතිෂ්ඨාපනය කෙරෙහි බලා සිටියේය.—හෙබ්‍රෙව් 11:10.
13, 14. යෝබ් දෙවියන්වහන්සේ කෙරෙහි දැඩිසේ විශ්වාසය තැබුවේ මන්ද?
13 වසර සිය ගණනකට පසුව, පො.යු.පෙ. 17 සහ 16 සියවස් අතරතුර, දැන් අරාබිය ලෙස හැඳින්වෙන ප්‍රදේශයේ යෝබ් ජීවත් විය. ඔහු ජීවත් වූයේද බයිබලය ලිවීම ආරම්භ කිරීමට පෙරය. යෝබ් වනාහි, “නිර්දෝෂවූ, අවංකවූ, දෙවියන්වහන්සේ කෙරෙහි භය ඇත්තාවූ, නපුරෙන් වැලකී සිටියාවූ කෙනෙකි.” (යෝබ් 1:1) සාතන් යෝබ්හට ඉතා අප්‍රසන්න, වේදනාකාරී රෝගයකින් පහරදුන් විට, එම ඇදහිලිවන්ත මිනිසා, තම බලවත් පීඩාව පුරා “වචන මාත්‍රයකින්වත් පව් කළේ නැත.” (යෝබ් 2:10, නව අනුවාදය) යෝබ් දෙවියන්වහන්සේව දැඩිසේ විශ්වාස කළේය. තමා මෙතරම් බොහෝසෙයින් දුක් විඳීමට හේතුව පිළිබඳ විස්තර ඔහු දැන නොසිටි අතරේදී, දෙවියන්වහන්සේ සහ උන්වහන්සේගේ පොරොන්දු මත ඔහු තම ජීවිතය පරදුවට තැබීය.
14 තමා මියගියද, නැවත නැගීටීමක් මගින් යම් දවසක තමාගේ ජීවිතය යළි ඇති කිරීමට දෙවියන්වහන්සේට හැකිබව යෝබ් දැන සිටියේය. ඔහු මෙම බලාපොරොත්තුව ගැන ඇඟවීමක් කළේ ඔහු යෙහෝවඃ දෙවියන්වහන්සේහට මෙසේ පැවසූ විටය: “අහෝ ඔබවහන්සේ මා ෂෙයෝලෙහි වසා තබා, . . . මට කාලයක් නියමකොට, මා සිහිකරනසේක් නම් කැමැත්තෙමි! මනුෂ්‍යයෙක් මැරුණාම ඔහු නැවත ජීවත්වේද? . . . ඔබ අඬගසනසේක, මමද උත්තර දෙන්නෙමි.” (යෝබ් 14:13-15) දැඩි දුක්වේදනාවකට ගොදුරු වී සිටියද, යෙහෝවඃවහන්සේගේ පරමාධිපත්‍යය කෙරෙහි තම ඇදහිල්ල යෝබ් විසින් නිරූපනය කරන ලද්දේ මෙම ප්‍රකාශයත් සමඟය: “මා අවසන් හුස්ම හෙලන තෙක්, මාගේ අඛණ්ඩතාවය මාගෙන් ඉවත් කර නොගනිමි.”—යෝබ් 27:5, NW.
15. දාවිත්, යෙහෝවඃවහන්සේගේ අරමුණ කෙරෙහි තම නිසැකකම පළකළේ කෙසේද?
15 යෝබ්ගෙන් සියවස් හයකට පමණ පසු, එනම් යේසුස්වහන්සේ පොළොවට පැමිණීමට වසර දහසකට පමණ පෙර, දාවිත් නව ලෝකයක් කෙරෙහි තම නිසැකකම පළ කළේය. ඔහු ගීතාවලියේ මෙසේ පැවසීය: “ස්වාමීන් [යෙහෝවඃවහන්සේ, NW] කෙරෙහි බලා සිටින්නෝ දේශය [පොළොව, NW] උරුමකරගන්නෝය. මඳ කලකින් දුෂ්ටයා නැතිවන්නේය. . . . නුමුත් මොළොක් ගුණ ඇත්තෝ දේශය [පොළොව, NW] උරුමකරගන්නෝය. ඔව්හු මහත් සමාදානයෙන් ප්‍රීතිමත් වන්නෝය. ධර්මිෂ්ඨයෝ දේශය [පොළොව, NW] උරුමකරගන්නෝය, එහි සදාකල් වාසය කරන්නෝය.” තම නොසැලෙන බලාපොරොත්තුව හේතුකොටගෙන, දාවිත් මෙසේ උදක්ම ඉල්ලා සිටියේය: “ස්වාමීන් [යෙහෝවඃවහන්සේ, NW] කෙරෙහි විශ්වාසය තබව. . . . ස්වාමීන් [යෙහෝවඃවහන්සේ, NW] කෙරෙහි ප්‍රීතිමත්වෙව; උන්වහන්සේද තාගේ සිතෙහි ආශාවන් [හදවතේ ඉල්ලීම්, NW] ඉෂ්ටකරනසේක.”—ගීතාවලිය 37:3, 4, 9-11, 29.
16. ‘සාක්ෂිකරුවන්ගේ මහත් සේනාවකට’ තිබූ බලාපොරොත්තුව කුමක්ද?
16 ගෙවී ගොස් ඇති සියවස් ගණනාව පුරා, ඇදහිලිවන්ත පුරුෂයන්ට සහ ස්ත්‍රින්ට, පොළොව මත සදාකල් ජීවත්වීමේ එම බලාපොරොත්තුවම තිබී ඇත. ඇත්ත වශයෙන්ම, යෙහෝවඃවහන්සේගේ පොරොන්දු කෙරෙහි පදගතාර්ථයෙන්ම තම දිවි පරදුවට තබා ඇති ‘සාක්ෂිකරුවන්ගේ මහත් සේනාවක්’ ඔවුන්ගෙන් සෑදිණි. යෙහෝවඃවහන්සේගේ එම ඉපැරණි සාක්ෂිකරුවන්ගෙන් බොහොමයක්, තම ඇදහිල්ල නිසා, දරණු වධ වේදනාවලට ලක්වී, ඔවුන්ව මරාදමනු ලැබුවේ, “වඩා උතුම් නැවත නැගිටීමක් ලබන [අත්කරගන්නා, NW] පිණිසය.” ඒ කෙසේද? නව ලෝකය තුළදී, දෙවියන්වහන්සේ ඔවුන්හට වඩා හොඳ නැවත නැගිටීමක් හා සදාකාල ජීවනයේ අපේක්ෂාව සමඟින් විපාක දෙනවා ඇත.—යොහන් 5:28, 29; හෙබ්‍රෙව් 11:35; 12:1.
ක්‍රිස්තියානි සාක්ෂිකරුවෝ දෙවියන්වහන්සේ කෙරෙහි දැඩි විශ්වාසය තබති
17. පළමු සියවසේ ක්‍රිස්තියානි භක්තිකයන් යෙහෝවඃවහන්සේ කෙරෙහි දැඩිසේ විශ්වාසය තැබුවේ කෙතරම් ස්ථිරවද?
17 පොදු යුගයේ පළමු සියවසේදී, යෙහෝවඃවහන්සේ, අලුතෙන් පිහිටුවනු ලැබූ ක්‍රිස්තියානි සභාවට ස්වකීය රාජ්‍යය සහ පොළොව පුරා එහි පාලනය පිළිබඳව වඩාත් තොරතුරු සැපයූ සේක. නිදසුනක් වශයෙන්, යේසුස් ක්‍රිස්තුස්වහන්සේ සමඟ ස්වර්ග රාජ්‍යයේ හවුල්වීමට යන සංඛ්‍යාව 1,44,000ක් වනු ඇති බව ලිවීමට උන්වහන්සේ ස්වකීය ආත්මය මගින් ප්‍රේරිත යොහන්ට ආනුභාව දුන් සේක. මෙම අය, “මනුෂ්‍යයන් අතරෙන් මිලේටගන්නා” ලද, ඇදහිලිවන්ත දේව සේවකයන් වනු ඇත. (එළිදරව් 7:4; 14:1-4) මොවුහු, ක්‍රිස්තුස්වහන්සේ සමඟ ස්වර්ගයේ “රජවරු වශයෙන්” පොළොව කෙරෙහි පාලනය කරනවා ඇත. (එළිදරව් 20:4-6, NW) ස්වර්ගික රාජ්‍යය හා එහි භූමික පාලන පෙදෙස කෙරෙහි වූ ස්වකීය අරමුණ යෙහෝවඃවහන්සේ ඉටුකරනු ඇති බවට පළමු සියවසේ ක්‍රිස්තියානි භක්තිකයන් උන්වහන්සේ කෙරෙහි කොතරම් දැඩිසේ විශ්වාස කළාද කිවහොත්, තම ඇදහිල්ල වෙනුවෙන් තම ජීවිත දීමට ඔවුහු කැමැත්තෙන් සිටියෝය. ඔවුන්ගෙන් බොහෝ දෙනෙක් කළේද එයයි.
18. අදදින යෙහෝවඃවහන්සේගේ සාක්ෂිකරුවන් බොහෝ කලකට පෙර විසූ තම සහායකයන්ව අනුකරණය කරන්නේ කෙසේද?
18 සියවස් ගණනාවකට පෙර තමන්ට පෙර ජීවත්වූ තම සහායකයන් කළාක් මෙන්, අදදින, යෙහෝවඃවහන්සේගේ සාක්ෂිකරුවන් මිලියන පහකට ආසන්න සංඛ්‍යාවක් දෙවියන්වහන්සේ කෙරෙහි එම දැඩි විශ්වාසයම තබති. මෙම වත්මන් සාක්ෂිකරුවන්ද, දෙවියන්වහන්සේගේ පොරොන්දු සම්බන්ධව තම ජීවිත පරදුවට තබා ඇත. ඔවුන් තම ජීවිත දෙවියන්වහන්සේට කැප කොට තිබෙන අතර, තම ඇදහිල්ල සවිමත් කිරීම සඳහා සම්පූර්ණ බයිබලය ඔවුනට තිබේ. (2 තිමෝති 3:14-16) යෙහෝවඃවහන්සේගේ මෙම නූතන සාක්ෂිකරුවෝ, “මනුෂ්‍යයන්ට වඩා පාලකයාණන් වශයෙන් දෙවියන්වහන්සේට” තමන් කීකරු වන බව ප්‍රකාශ කළාවූ, යේසුස්වහන්සේගේ පළමු සියවසේ අනුගාමිකයන්ව අනුකරණය කරති. (ක්‍රියා 5:29, NW) මෙම සියවසේදී, මෙම ක්‍රිස්තියානි සාක්ෂිකරුවන්ගෙන් බොහෝ දෙනෙකුට කුරිරු ලෙස පීඩාකරනු ලැබ තිබේ. ඇතැමුන් තම ඇදහිල්ල නිසා මරණයට පවා ගොදුරු වී තිබේ. තවත් අය, අසනීප, හදිසි අනතුරු හෝ මහලු විය නිසා මිය ගොස් සිටිති. කෙසේවුවද, නැවත නැගිටීමක් කරණකොටගෙන දෙවියන්වහන්සේ ඔවුන්ව ස්වකීය නව ලෝකයේ නැවත ජීවිතයට ගෙනෙනු ඇති බවට දැනගෙන සිටි නිසා, ඔවුන්, අතීත කාලවල විසූ ඇදහිලිවන්ත සාක්ෂිකරුවන් මෙන්, දෙවියන්වහන්සේව දැඩිසේ විශ්වාස කොට ඇත.—යොහන් 5:28, 29; ක්‍රියා 24:15; එළිදරව් 20:12, 13.
19, 20. අප, අපගේ කාලය සඳහා වූ බයිබල් අනාවැකි සම්බන්ධව හඳුනාගන්නා දෑ කිමෙක්ද?
19 තමන්ව සියලු ජාතීන්ගෙන් සමස්ත ලෝක සහෝදරත්වයක් තුළට ගෙනෙනු ලැබ තිබීම, මීට බොහෝ කලකට පෙර බයිබල් අනාවැකිවල පුරෝකථනය කර තිබූ බව, යෙහෝවඃවහන්සේගේ සාක්ෂිකරුවන් විසින් ඒත්තුගෙන තිබේ. (යෙසායා 2:2-4; එළිදරව් 7:4, 9-17) තවද, තවමත් පැමිණීමට සිටින වෙනත් අවංක හදවත් ඇති අයව ස්වකීය අනුමැතියට හා රැකවරණය තුළට එක්රැස් කිරීම සඳහා යෙහෝවඃවහන්සේ ඔවුන් ලවා සමස්ත ලෝක දේශනා සේවයක් කරමින් සිටින සේක. (හිතෝපදේශ 18:10; මතෙව් 24:14; රෝම 10:13) යෙහෝවඃවහන්සේ ඉතා නොබෝ කලකින් තම නව ලෝකය දියත් කරනු ඇති බව දන්නා මේ සියල්ලෝ උන්වහන්සේ කෙරෙහි තම දැඩි විශ්වාසය තබති.—සසඳන්න 1 කොරින්ති 15:58; හෙබ්‍රෙව් 6:10.
20 කැපී පෙනෙන වසරක් වූ 1914 සිට, දැන් වසර 80කට ආසන්න කාලයක් පුරා සාතන්ගේ ලෝකය එහි අවසාන දවස්වල තිබෙන බව බයිබල් අනාවැකිවලින් ඇඟවෙයි. (රෝම 16:20; 2 කොරින්ති 4:4; 2 තිමෝති 3:1-5) මෙනිසා යෙහෝවඃවහන්සේගේ සාක්ෂිකරුවෝ ධෛර්යය හා අධිෂ්ඨානය ගෙන සිටිති, මක්නිසාද ඉතා ඉක්මනින් දෙවියන්වහන්සේ ස්වකීය රාජ්‍යය මගින් පොළොවේ කටයුතු මුළුමනින්ම පාලනය කිරීම පවරා ගැනීමට යන බව ඔවුන් දන්නා බැවිනි. මෙම වත්මන් නපුරු ලෝකය නිමාවකට ගෙන ඒමෙන් සහ ස්වකීය ධර්මිෂ්ඨ නව ලෝකය දියත් කිරීමෙන්, දෙවියන්වහන්සේ මෙතරම් සියවස් ගණනාවක් පුරා පොළොව මත පැවති නරක තත්ත්වය තුරන්කර දමනවා ඇත.—හිතෝපදේශ 2:21, 22.
21. වර්තමාන කරදර කුමක් වුවත්, අපට ප්‍රීතිමත් විය හැක්කේ මන්ද?
21 අනතුරුව, අතීතයේ අප ලබා ඇති ඕනෑම හානි සඳහා වූ වන්දිවලටත් වඩා වැඩියෙන් දෙවියන්වහන්සේ අපහට මහත් ආශීර්වාද වගුරුවමින්, සදාකාලයටම අප ගැන ස්වකීය ඉමහත් සැලකිල්ල පෙන්වනවා ඇත. නව ලෝකයේදී අපට මොනතරම් හොඳ දේවල් සිදුවෙනවාද කිවහොත් මීට කලින් අපට තිබූ අපගේ කරදර ගැටලු අපගේ මතකයෙන් අතුරුදහන්වී යනවා ඇත. එවිට, යෙහෝවඃවහන්සේ ‘ස්වකීය හස්තය විදහා ජීවමාන සියල්ලන්ගේ ආශාව තෘප්තිමත් කරන’ බව දැනගැනීම මොනතරම් සැනසිලිදායකද!—ගීතාවලිය 145:16; යෙසායා 65:17, 18.
22. අප අපගේ දැඩි විශ්වාසය යෙහෝවඃවහන්සේ කෙරෙහි තැබිය යුත්තේ මන්ද?
22 නව ලෝකයේදී, ඇදහිලිවන්ත මිනිස් වර්ගයා රෝම 8:20, 21හි ඉටුවීම දකිනවා ඇත: “ඒ මැවිල්ලම ජරාවේ වහල්කමින් නිදහස්වී, දෙවියන්වහන්සේගේ දරුවන්ගේ මහිමයේ නිදහස්කමට පැමිණෙන්නේය.” යේසුස්වහන්සේ සිය අනුගාමිකයන්හට ඉගැන්වූ මෙම යාච්ඤාවේ ඉටුවීම ඔවුන් දකිනවා ඇත: “ඔබගේ රාජ්‍යය ඒවා. ඔබගේ කැමැත්ත ස්වර්යෙහි මෙන් පොළොවෙහිද [සිදු] කරනු ලැබේවා.” (මතෙව් 6:10) එබැවින් ඔබගේ දැඩි විශ්වාසය යෙහෝවඃවහන්සේ කෙරෙහි තබන්න, මන්දයත් උන්වහන්සේගේ නොවරදිනසුලු පොරොන්දුව මෙයයි: “ධර්මිෂ්ඨයෝ දේශය උරුමකර ගන්නෝය, එහි සදාකල් වාසයකරන්නෝය.”—ගීතාවලිය 37:29.
ඔබ පිළිතුරු දෙනු ඇත්තේ කෙසේද?
◻ මිනිසුන් සහ මෙම පොළොව සඳහා යෙහෝවඃවහන්සේගේ අරමුණ කුමක්ද?
◻ දෙවියන්වහන්සේ, මෙම පොළොව මත නරක තත්ත්වයන්ට ඉඩ හැර තිබෙන්නේ මන්ද?
◻ පුරාණයේ විසූ ඇදහිලිවන්ත ජනයා යෙහෝවඃවහන්සේ කෙරෙහි සිය දැඩි විශ්වාසය පෙන්වූයේ කෙසේද?
◻ අදදින දේව සේවකයන් යෙහෝවඃවහන්සේ කෙරෙහි දැඩි විශ්වාසය තබන්නේ මන්ද?
[16වන පිටුවේ පින්තූරය]
දෙවියන්වහන්සේ මිනිසුන් මැව්වේ පාරාදීස පොළොවක සන්තෝෂයෙන් යුතුව සදාකල් ජීවත්වීමටය
[18වන පිටුවේ පින්තූරය]
මළවුන් නැවත නැගිටවීමට යෙහෝවඃවහන්සේ සතු හැකියාව කෙරෙහි ආබ්‍රහම් සිය දැඩි විශ්වාසය තැබුවේය