යෙහෝවඃවහන්සේට සේවය කිරීමට ඈ පමණට වඩා මහලු නොවූවාය
වයස්ගත බොහෝ දෙනෙකුට හැඟෙන්නේ තමන්ට ජීවත් වන්නට ඇති ඉතිරි කාලය තුළ සන්තෝෂය සඳහා එතරම් බලාපොරොත්තු තැබිය නොහැකි බවයි. වයස්ගත වෙමින් සිටි ප්‍රසිද්ධ නිළියක් මෙය පවා පැවසුවාය: “මම මගේ ජීවිතය අවුල්සහගතව ගත කර තිබෙන අතර දැන් එය වෙනස් කිරීමට ප්‍රමාද වැඩියි . . . මා තනිව ඇවිදින විට, මගේ ජීවිතය දෙස ආපසු හැරී බලනවා, එය ගත කළ ආකාරය ගැන මා සතුටු වෙන්නේ නැහැ . . . සෑම කරුණක් සම්බන්ධයෙන්ම මට අසහනයක් දැනෙන අතර මනස තැන්පත් කර ගත නොහැකි තත්ත්වයක මම පසුවෙනවා.”
දැනට වසර 2,000කට පමණ පෙර ජීවත්වූ, වයස්ගත කාන්තාවකට එවන් කිසිඳු ගැටලුවක් තිබුණේ නැත. ඇය 84 හැවිරිදි වැන්දඹුවක්ව සිටියමුත්, ඇය ක්‍රියාශීලීව, සන්තෝෂවත්ව සිටි අතර දෙවියන්වහන්සේගෙන් පුදුමසහගත ලෙස අනුග්‍රහය ලැබුවාය. ඇයගේ නාමය ආනා වූ අතර ප්‍රීතිය සඳහා ඇයට සුවිශේෂී හේතුවක් තිබුණි. එය කුමක්වීද?
‘කෙදිනකවත් දේවමාළිගාවෙන් අහක්ව නොගියාය’
ශුභාරංචි ලේඛක ලූක් අපට ආනාව හඳුන්වා දෙයි. “තවද ආෂෙර්ගේ ගෝත්‍රයේ ඵානුයෙල්ගේ දූවූ, . . . ආනා නම් අනාගතවක්ත්‍රියක්” ඉශ්‍රායෙලයේ “සිටියාය” කියා ඔහු පවසයි. අනාගතවක්ත්‍රියක් හැටියට, ඇයට සුවිශේෂිත ආකාරයකින් දෙවියන්වහන්සේගේ ශුද්ධාත්මයේ, නැතහොත් ක්‍රියාකාරික බලයේ දීමනාව තිබුණි. එමෙන්ම ආනාට සනිටුහන් කළ යුතු එක් අවස්ථාවක අනාවැකි පැවසීමේ මාහැඟි ප්‍රස්තාවක්ද ලැබුණි.
ලූක් මෙසේ සඳහන් කරයි: “ඉතා වයස්ගතවූ . . . ඈ කන්‍යාවස්ථාවෙහි සිට සත් අවුරුද්දක් ස්වාමිපුරුෂයෙකු සමඟ වාසයකළාය. අවුරුදු අසූහතරක්ම ඈ වැන්දඹුවක්ව සිටියාය.” (ලූක් 2:36, 37) මේ අනුව, ආනා ඉතා යෞවනව සිටියදී වැන්දඹුවක් වූවා යයි සිතිය හැක. මරණයෙන් ප්‍රේමනීය පුරුෂයෙක් අහිමි කර ගැනීම කොතරම් සංවේගය ඇති කරන යමක්දැයි ඕනෑම වයසක සිටින වැන්දඹු ක්‍රිස්තියානි කාන්තාවක් දනී. අපගේ දවසේ සිටින බොහෝ දේව භයැති කාන්තාවන් මෙන්, ආනා දෙවියන්වහන්සේට කරන ඇගේ සේවය නැවැත්වීමට මෙම කනගාටුදායක අද්දැකීමට ඉඩ හැරියේ නැත.
ආනා යෙරුසලමේ පිහිටා තිබූ “දේවමාළිගාවෙන් අහක්ව නොගොස්” සිටියේ යයි ලූක් අපට පවසයි. (ලූක් 2:37) දෙවියන්වහන්සේගේ ගෘහයේ සේවයෙන් විපාක වන්නාවූ ආශීර්වාදලත් තත්ත්වය ඇය බෙහෙවින් අගය කළාය. ඇයගේ ක්‍රියාවන් අනාවරණය කළේ, ඉශ්‍රායෙලයේ ගීතිකාකාර රජ වන දාවිත් මෙන්, ඇයටත්, යෙහෝවඃවහන්සේගෙන් එක් දෙයක් පමණක් අයැදින්නට තිබූ බවයි. එමෙන්ම ඒ කුමක් වීද? දාවිත් ගායනා කළේ මෙසේය: “ස්වාමීන්ගෙන් [යෙහෝවඃවහන්සේගෙන්, NW] එක දෙයක් ඉල්ලීමි. ඒක සොයන්නෙමි; එනම් ස්වාමීන්ගේ [යෙහෝවඃවහන්සේගේ, NW] අලංකාරය දකින පිණිසත් උන්වහන්සේගේ මාළිගාවේදී භාවනාකරන පිණිසත් මාගේ ජීවිතයේ සියලු දවස්වලදී ස්වාමීන්ගේ [යෙහෝවඃවහන්සේගේ, NW] ගෘහයෙහි වාසය කිරීමය.” (ගීතාවලිය 27:4) මේ සම්බන්ධයෙන්ද, ආනා, යෙහෝවඃවහන්සේගේ නමස්කාර ස්ථානයේ නිරතුරුව සිටීමෙන් සතුටක් ලබන්නාවූ අද දවසේ සිටින ක්‍රිස්තියානි කාන්තාවන් හා සමාන වන්නීය.
ආනා රෑ දාවල් යෙහෝවඃවහන්සේට පරිශුද්ධ සේවය පිරිනැමුවාය. වැළපීම හා අවංකව බලා සිටීම හඟවමින්, ඇය මෙය කළේ ‘නිරාහාරයෙන් ඉඳ යාච්ඤාකරමින්ය.’ (ලූක් 2:37) ආනා නිරාහාරව සිටීම හා යෙහෝවඃ දෙවියන්වහන්සේට යාච්ඤා කිරීම සඳහා බෙහෙවින් හේතු වන්නට ඇත්තේ, විදේශ බලවේගයන්ට සියවස් ගණනාවක් පුරා යුදෙව්වන්ගේ යටත්වීමත්, දේවමාළිගාවට හා එහි පූජක තන්ත්‍රය දක්වා පවා විහිදී ගොස් තිබූ පිරිහෙමින් පැවති ආගමික තත්ත්වයනුත් යන කරුණුය. එහෙත් සන්තෝෂ වන්නටත් ඇයට හේතු තිබුණි, එනම්, විශේෂාකාරයෙන් පො.යු.පෙ. 2වෙනි වසරේ යම් සිදුවීම්වලින් පිරි දිනයක සුවිශේෂිත යමක් සිදු වූ නිසාය.
අනපේක්ෂිත ආශීර්වාදයක්
මෙම අතිවැදගත් දිනයේ, බිළිඳු යේසුස්වහන්සේව, සිය මව වන, මරියා හා සිය සුරැකි පියා වන යෝසෙප් විසින් යෙරුසලමේ දේවමාළිගාවට ගෙනෙනු ලැබීය. මහලු සිමියොන් එම බිළිදාව දැක, එම අවස්ථාවේ අනාවැකිමය වදන් පළ කළේය. (ලූක් 2:25-35) ආනා සුපුරුදු ලෙසින් දේවමාළිගාවේ සිටියාය. “ඈද ඒ පැයෙහිම” එතැනට පැමිණියා යයි ලූක් වාර්තා කරයි. (ලූක් 2:38) වයසට යෑමක් සමඟ අඳුරු වෙමින් තිබූ සිය නෙත් අනාගත මෙසියස්වහන්සේව දකිත්ම, ආනා කොතරම් බලවත් ප්‍රීතියට පත්වන්නට ඇද්ද!
දින හතළිහකට පෙර, දේවදූතයා මෙම වදන්වලින් බෙත්ලෙහෙම් අසල සිටි එඬේරුන්ව කම්පනයට පත්කර තිබුණි: “බලව, මුළු සෙනඟට මහත් ප්‍රීති උපදවන යහපත් ආරංචි නුඹලාට ගෙනෙමි. මක්නිසාද ස්වාමිවූ ක්‍රිස්තුස් නම් ගැළවුම්කාරයෙක් නුඹලාට දාවිත්ගේ නුවර අද උපන්සේක.” ස්වර්ගීය සේනා සමූහයක් යෙහෝවඃවහන්සේට ප්‍රශංසා කරමින්, මෙසේද පැවසූහ: “ඉතා උසස්තැන්හි දෙවියන්වහන්සේට මහිමයද පොළොවෙහි උන්වහන්සේට ප්‍රියවූ මනුෂ්‍යයන් අතරෙහි සමාදානයද” වේවා. (ලූක් 2:8-14) එසේම, මෙසියස්වහන්සේ වනු ඇති තැනැත්තා ගැන සාක්ෂි දැරීමට ආනාව පොලඹවනු ලැබුවාය!
බිළිඳු යේසුස්වහන්සේව හොඳින් දැකබලා ගැනීමෙන් පසු, ආනා “දෙවියන්වහන්සේට ස්තුතිකොට, යෙරුසලමේ මිදීම ගැන බලා සිටි සියලුදෙනාට උන්වහන්සේ ගැන කථා කළාය.” (ලූක් 2:38) වයෝවෘද්ධ සිමියොන් මෙන්, බිළිඳු යේසුස්වහන්සේව දේවමාළිගාවෙහි දැකීමට වරම් ලද ඇයත්, නිසැකවම පොරොන්දු වූ ගැළවුම්කරුවාණන් සඳහා දැඩි ආශාවකින්ද, යාච්ඤා කරමින්ද, එමෙන්ම බලාපොරොත්තුවෙන්ද සිටියාය. යේසුස්වහන්සේ ඒ තැනැන්වහන්සේව සිටි බවට වූ ශුභාරංචිය තමාටම සීමා කර ගත නොහැකි තරම්, ඉතා යහපත් යමක්ව තිබුණි.
යේසුස්වහන්සේ වැඩුණු පසු ජීවත්ව සිටින්නට ආනා අපේක්ෂා නොකරන්නට ඇතිමුත්, ඇය කළේ කුමක්ද? පැමිණෙන්නාවූ මෙම මෙසියස්වහන්සේ තුළින් ක්‍රියාත්මක වන්නට නියමිත ගැළවීම ගැන ඇය ප්‍රීතියෙන් අන් අයට සාක්ෂි දැරුවාය.
ආනාගේ කදිම ආදර්ශය
ලෝකයේ ආගමික අය කීදෙනෙක් තමන්ට වයස අවුරුදු 84ක්ව තිබියදී, එවන් සාක්ෂි දැරීමක් හෝ රෑ දාවල් දෙකේ දිගටම නමස්කාරයේ යෙදී සිටීමක් කරනු ඇද්ද? බොහෝ විට, ඔවුන් විශ්‍රාම වසර ගණනාවකට පෙර වැටුපක් ඉල්ලා සිටින්නට ඇත. ආනා හා සිමියොන් ඊට වෙනස් වූහ. ඔවුහු යෙහෝවඃවහන්සේගේ වයස්ගත සේවකයන් සඳහා කදිම ආදර්ශයක් තැබූහ. ඇත්ත වශයෙන්ම, ඔවුන් යෙහෝවඃවහන්සේගේ නමස්කාර ගෘහයට ප්‍රේම කළ අතර උන්වහන්සේට ප්‍රශංසා කළේ තමන්ගේ මුළු හෘදයෙන්මය.
ආනා තුළ දේව භක්තිය දරන වැන්දඹුවක් පිළිබඳ ඉතා කදිම ආදර්ශයක් අපට තිබේ. ඇත්ත වශයෙන්ම, මෙම යටහත් පහත් වයස්ගත කාන්තාව පිළිබඳ ලූක්ගේ විස්තරය, 1 තිමෝති 5:3-16හි ගෙනහැර දක්වා ඇති ගෞරවනීය වැන්දඹුවකගේ සුදුසුකම් සමඟ හොඳින් සැසඳේ. එහි ප්‍රේරිත පාවුල් පවසන්නේ එවන් වැන්දඹුවක් “රෑ දාවල් කන්නලව්වලද යාච්ඤාවලද” පවතින බවත්, “එකම පුරුෂයෙකුට භාර්යාවව” සිටින බවත්, ‘යහපත් ක්‍රියා ගැන ප්‍රසිද්ධව’ සිටින බවත්ය. ආනා එයාකාර කාන්තාවක් වූවාය.
අදදින, ලොව වටා ඇති යෙහෝවඃවහන්සේගේ සාක්ෂිකරුවන්ගේ සභාවන් දහස් සංඛ්‍යාව තුළ රෑ දාවල් දෙවියන්වහන්සේට පරිශුද්ධ සේවය පිරිනමන්නාවූ විශ්වාසනීය වයස්ගත වැන්දඹුවන් අපට හමුවේ. මෙම නවීන-දින “ආනාවරියන්” අප අතර සිටීම අපි කොතරම් අගය කරමුද!
වයස්ගත කාලයක පවා, පුරුෂයන්ටත් කාන්තාවන්ටත් දෙවියන්වහන්සේට කැපවීමක් කර එය වතුර බව්තීස්මයෙන් සංකේතවත් කළ හැකිය. යෙහෝවඃවහන්සේට සේවය කරන්නටත්, දැන් ස්වර්ගයේ පිහිටුවා ඇත්තාවූද, කීකරු මිනිස් වර්ගයාට ඉක්මනින්ම මහත් ආශීර්වාදයන් ගෙනෙන්නාවූද මෙසියානු රාජ්‍යය ගැන සාක්ෂි දරන්නටත් වයස්ගත අය සිටින්නේ කිසිවිටෙක පමණ ඉක්මවූ මහලු තත්ත්වයක නොවේය. සියවස් ගණනාවකට පෙර ආනා පවා සුවිශේෂිත ආකාරයකට ආශීර්වාද ලැබුවාක්මෙන්, දැන් දෙවියන්වහන්සේට පරිශුද්ධ සේවය පිරිනමන්නාවූ වයස්ගත අය තමන්ට මෙතෙක් වගුරුවා ඇති යෙහෝවඃවහන්සේගේ ආශීර්වාදයන් ගැන සාක්ෂි දරන්නට පුළුවන. යෙහෝවඃවහන්සේට සේවය කරන්නටත් උන්වහන්සේගේ ශුද්ධ නාමය ප්‍රශංසා කරන්නටත් ඇය එතරම්ම මහලුව නොසිටියාය—ඔවුන් ගැනත් කිව හැක්කේ ඒ දෙයමයි.