හරි ආගම පිළිබඳ දැනුම පැමිණෙන්නේ වගකීමක්ද සමඟය
“දෙවියන්වහන්සේගේ වචනය අසා එය පවත්වන්නෝ සන්තෝෂවත්ය!”—ලූක් 11:28, NW.
1. හරි ආගම හඳුනාගත් විගසම, ඒ වටා තම ජීවිත ගොඩනඟන්නේ කෙබඳු ආකාර මිනිසුන්ද?
හරි ආගම හඳුනාගැනීම පමණක් ප්‍රමාණවත් නොවේ. අප හරි සහ සැබෑ දෙයට ප්‍රේම කරන අය නම්, අප එය සොයාගත් විගසම අපි අපගේ ජීවිත එය වටා ගොඩනගන්නෙමු. හරි ආගම හුදෙක් මානසික දර්ශනවාදයක් නොවේ; එය ජීවනයේ මාර්ගයකි.—ගීතාවලිය 119:105; යෙසායා 2:3; සසඳන්න ක්‍රියා 9:2.
2, 3. (අ) යේසුස්වහන්සේ, දේව කැමැත්ත කිරීමේ වැදගත්කම අවධාරණය කළේ කෙසේද? (ආ) හරි ආගම දන්නා සෑම කෙනෙකු වෙතම පැවරෙන වගකීම කුමක්ද?
2 දෙවියන්වහන්සේ විසින් ස්වකීය කැමැත්ත බවට පෙන්වා ඇති දෙය කිරීමේ වැදගත්කම යේසුස් ක්‍රිස්තුස්වහන්සේ අවධාරණය කළ සේක. කන්ද උඩ දේශනාව ලෙසට ප්‍රසිද්ධ වී ඇති එම දේශනය අවසන් කිරීමේදී, යේසුස්වහන්සේ දැන්වූයේ, තමන්ට ස්වාමීන් යයි අමතන සියලු දෙනා (එලෙස ක්‍රිස්තියානින් යයි කියා සිටින සියලු දෙනා) රාජ්‍යයට ඇතුල් නොවන බවය; නමුත් උන්වහන්සේගේ පියාණන්ගේ කැමැත්ත කරන අය පමණක් එසේ ඇතුල් වන බවයි. අනෙක් අය, ‘නොපනත්කමේ ක්‍රියා කරන්නන්’ වශයෙන් ප්‍රතික්ෂේප කරනු ලබන බව උන්වහන්සේ පැවසූ සේක. නොපනත්කම් කරන්නන් යයි හඳුන්වන්නේ මන්ද? මන්දයත් බයිබලය ප්‍රකාශ කරන පරිදි, දෙවියන්වහන්සේගේ කැමැත්ත කිරීමට අසමත්වීම පාපය වන අතර, සියලු පාප නොපනත්කමය. (මතෙව් 7:21-23; 1 යොහන් 3:4; සසඳන්න රෝම 10:2, 3.) පුද්ගලයෙකු හරි ආගම දැන සිටිනවා විය හැක, ඔහු එය උගන්වන අයට ප්‍රශංසා කරනවා විය හැක, එය පිළිපදින අයව ඔහු වර්ණනා කරනවා විය හැක, නමුත් එය තමාගේම ජීවිතයට අදාළ කර ගැනීමට ඔහුට වගකීමක්ද තිබේ. (යාකොබ් 4:17) ඔහු එම වගකීම භාර ගන්නේ නම්, ඔහුගේ ජීවිතය සඵල වන්නාවූ එකක් බවට ඔහුට දැනෙනු ඇති අතර, වෙනත් කිසිදු අන්දමකින් නොලැබෙන ප්‍රීතියක් ඔහු අද්දකිනවා ඇත.
3 සැබෑ ආගම හඳුනාගැනීමේ ලකුණු හයක් ගැන මීට පෙර ලිපියේ අපි සලකා බැලුවෙමු. මේ සෑම ලකුණක්ම, හරි ආගම හඳුනාගැනීමට අපට උපකාරවත් වෙනවා පමණක් නොව, නමුත් අපට පෞද්ගලික වශයෙන් අභියෝග සහ ප්‍රස්තා ඉදිරිපත් කරයි. ඒ කෙසේද?
ඔබ දෙවියන්වහන්සේගේ වචනයට ප්‍රතිචාර දක්වන්නේ කෙසේද?
4. (අ) අලුත් අය යෙහෝවඃවහන්සේගේ සාක්ෂිකරුවන් ඇසුරු කිරීමට පටන් ගනිත්ම, සාක්ෂිකරුවන් විසින් බයිබලය භාවිතා කිරීම සම්බන්ධව ඔවුන් සැණෙකින් නිරීක්ෂණය කරන්නේ කුමක්ද? (ආ) ආත්මිකව හොඳින් පෝෂණය කරනු ලැබීම යෙහෝවඃවහන්සේගේ සේවකයන්ට බලපාන්නේ කෙසේද?
4 යෙහෝවඃවහන්සේගේ සාක්ෂිකරුවන් අලුතෙන් උනන්දුව දක්වන අය සමඟ බයිබලය පාඩම් කිරීමට පටන් ගනිත්ම, මෙම අලුත් අයගෙන් බොහෝ දෙනෙක් තමන්ට උගන්වනු ලබන දේ බයිබලයෙන් කියා සැණෙකින් වටහා ගනිති. ඔවුන්ගේ ප්‍රශ්නවලට පිළිතුරු සැපයීමේදී, පල්ලි නියමයන්ට, මිනිස් සම්ප්‍රදායන්ට හෝ ප්‍රසිද්ධ පුද්ගලයන්ගේ මතිමතාන්තරවලට ඔවුන්ව යොමු දක්වනු නොලැබේ. අධිකාරිත්වය වන්නේ දෙවියන්වහන්සේගේම වචනයයි. ඔවුන් රාජ්‍යය ශාලාවට යන විට, එහිද ප්‍රධාන පාඨ ග්‍රන්ථය බයිබලය බව ඔවුහු නිරීක්ෂණය කරති. යෙහෝවඃවහන්සේගේ සාක්ෂිකරුවන් අතර තමන් දකින ප්‍රීතියට ප්‍රධාන සාධකයක් වනුයේ ඔවුන් දෙවියන්වහන්සේගේ වචනයෙන් ආත්මික වශයෙන් හොඳින් පෝෂණය වීම බව වටහා ගැනීමට අවංක ලෙස සත්‍යය සොයන අයට වැඩි කලක් ගත නොවේ.—යෙසායා 65:13, 14.
5. (අ) යෙහෝවඃවහන්සේගේ සාක්ෂිකරුවන් නිරීක්ෂණය කරන අයට ඉදිරිපත් වන අභියෝගය කුමක්ද? (ආ) සාක්ෂිකරුවන්ගේ ප්‍රීතියට හවුල් වීමට ඔවුන්ට හැක්කේ කෙසේද?
5 ඔබ මෙය පිළිගන්නේ නම්, ඔබ ඊට ප්‍රතික්‍රියා කරන්නේ කෙසේද? ඔබ එහි නියම අර්ථය වටහා ගන්නේ නම්, නිකම්ම පිටත සිට බලා සිටින්නෙකු වීමට ඔබට නොහැක, එසේ වීමට ඔබට වුවමනා නොවිය යුතුය. ‘වචනය අසන්නන් පමණක් වී’ නමුත් එය ‘පිළිපදින්නේ නැති’ අය ‘බොරු තර්කවලින් තමන්වම රවටා ගන්නා’ බව බයිබලය පෙන්වයි. (යාකොබ් 1:22, NW) ඔවුහු තමුන්වම රවටා ගනිති, මන්දයත්, ඔවුන් කියන දේ කුමක් හෝ වේවා, දෙවියන්වහන්සේගේ වචනයට කීකරුවීමට තමන් අපොහොසත් වීමෙන් පෙන්වන්නේ තමන් උන්වහන්සේට ඇත්තටම ප්‍රේම නොකරන බවය යන්න අවබෝධ කර ගැනීමට ඔවුන් අසමත්ය. ඇදහිල්ල තිබෙනවා යයි කියා සිටින මුත් එය ක්‍රියාවන්ගෙන් අනුබල නොලබයි නම්, එය මළ ඇදහිල්ලකි. (යාකොබ් 2:18-26; 1 යොහන් 5:3) මීට පටහැනිව, යෙහෝවඃවහන්සේ කෙරෙහි ඇති ප්‍රේමය මගින් “ක්‍රියා කරන්නෙක්” වීමට පෙලඹෙන කෙනෙක් “තමාගේ ක්‍රියාකිරීමෙහිදී ආශීර්වාද [සන්තෝෂ, NW] ලබන්නේය.” එසේය, යේසුස් ක්‍රිස්තුස්වහන්සේ පහදා දුන්නාක් මෙන්, “දෙවියන්වහන්සේගේ වචනය අසා එය පවත්වන්නෝ සන්තෝෂවත්ය!”—යාකොබ් 1:25; ලූක් 11:28, NW; යොහන් 13:17.
6. අපි සැබවින්ම දෙවියන්වහන්සේගේ වචනය අගය කරන්නෙමු නම්, එයට ඇලී සිටීම සඳහා අප විසින් පෞද්ගලිකව අත්කරගැනීමට වෙර දැරිය යුතු ප්‍රස්තා මොනවාද?
6 ඔබ විසින් දෙවියන්වහන්සේගේ කැමැත්ත පිළිබඳ දැනුම වර්ධනය කරගෙන, තවදුරටත් ඔබ ඉගෙන ගන්නා දේවල් අදාළ කරගනිත්ම ඔබගේ ප්‍රීතිය දෙගුණ තෙගුණ වනු ඇත. දෙවියන්වහන්සේගේ වචනය අධ්‍යයනය කිරීමට ඔබ කොපමණ ප්‍රයත්නයක් දරන්නෙහිද? අකුරු කියවීමට හෝ ලිවීමට නොදත් දසදහස් ගණනක් පුද්ගලයන් කියවීමට මහත් උත්සාහයක් ගෙන ඇති අතර, විශේෂයෙන්ම ඔවුන් මෙය කර ඇත්තේ ශුද්ධ ලියවිලි කියවීමටත් අනෙක් අයට ඒවා ඉගැන්වීමටත් පුළුවන්වන පිණිසය. තවත් අය බයිබලය සහ මුරටැඹ වැනි බයිබල් අධ්‍යයන ආධාරක කියවීම සඳහා යම් වේලාවක් ගත කිරීම සඳහා සෑම දවසකම වේලාසනින් අවදි වෙති. ඔබ පිළිවෙළින් බයිබල් කියවීම කරන විට හෝ වෙනත් අධ්‍යයන පොත්පත්වල සඳහන්ව ඇති ශුද්ධ ලියවිලි පෙරළා බලන විට, යෙහෝවඃවහන්සේගේ නීති හා ආඥා ගැන පරෙස්සමින් සලකා බලන්න, එමෙන්ම අපට මඟ පෙන්වීම සඳහා එහි ඇති බොහෝ ප්‍රතිපත්ති වටහා ගැනීමට උත්සාහ කරන්න. මේ එක් එක් කොටසකින් දෙවියන්වහන්සේ ගැන, උන්වහන්සේගේ අරමුණ ගැන සහ උන්වහන්සේ මිනිස්වර්ගයා සමඟ කටයුතු කර තිබෙන ආකාරය මත හෙළිවන දෙය ගැන මෙනෙහි කරන්න. මේවා මගින් ඔබගේ හෘදය සකස් කිරීමට කාලයට ඉඩ දෙන්න. ඔබගේම ජීවිතය තුළ වඩාත් පූර්ණ අන්දමින් බයිබල් උපදෙස් අදාළ කර ගත හැකි මාර්ග තිබේදැයි සලකා බලන්න.—ගීතාවලිය 1:1, 2; 19:7-11; 1 තෙසලෝනික 4:1.
ඔබ යෙහෝවඃවහන්සේට දක්වන භක්තිය සම්පූර්ණ එකක්ද?
7. (අ) දෙවියන්වහන්සේට නමස්කාර කිරීමට ජනයා දරන ප්‍රයත්නයට ත්‍රිත්ව මූලධර්මය බලපා තිබෙන්නේ කෙසේද? (ආ) පුද්ගලයෙකු යෙහෝවඃවහන්සේ පිළිබඳ සත්‍යය ඉගෙන ගන්නා විට කුමක් සිදු විය හැකිද?
7 දෙවියන්වහන්සේ ත්‍රිත්වයක් නොවන බව දැනගැනීම මිලියන සංඛ්‍යාත දෙනෙකුට සහනයක් වී තිබේ. “එය අභිරහසක්” යන පැහැදිලි කිරීම ඔවුන්ව කිසිවිටෙකත් සෑහීමකට පත් කළේ නැත. තේරුම් ගත නොහැකි දෙවිකෙනෙකුට ළංවීමට ඔවුන්ට හැකි වනුයේ කෙසේද? එම ඉගැන්වීමේ ප්‍රතිඵලයක් වශයෙන්, ඔවුහු (පල්ලියේ කිසිවිටකත් නමවත් අසා නොතිබුණු) පියාණන්ව නොසලකා හැරීමට නැඹුරුවූ අතර, දෙවියන්වහන්සේ ලෙස යේසුස්වහන්සේට නමස්කාර කළෝය, නැතහොත් ඔවුන්ගේ නමස්කාරය (“දේව මෑණියෝ” කියා ඔවුන්හට උගන්වනු ලැබූ) මරියා වෙතට යොමු කළෝය. එහෙත්, යෙහෝවඃවහන්සේගේ සාක්ෂිකරුවෙක් බයිබලය විවෘත කොට ඔවුන්ට දෙවියන්වහන්සේගේ නාමය යෙහෝවඃ බව පෙන්වූ විට ඔවුන්ගේ හදවත් ප්‍රීතියෙන් පිනා ගියේය. (ගීතාවලිය 83:17) එක් වෙනිසුවෙලානු ස්ත්‍රියකට මෙම දිව්‍ය නාමය පෙන්වූ විට ඇය කොතරම් ප්‍රීතියෙන් ඉපිල ගියේදයත්, එම අනර්ඝ බයිබල් සත්‍යතාව ඈට පෙන්වූ සාක්ෂිකාරියව ඈ වැළඳ ගත් අතර, නිවාස බයිබල් පාඩමකට එකඟ වූවාය. යේසුස්වහන්සේ සිය පියාණන් පිළිබඳව කථා කරද්දී “මාගේ දෙවියන්වහන්සේ සහ ඔබගේ දෙවියන්වහන්සේ” කිවූ බවත්, යේසුස්වහන්සේ සිය පියාණන්ව “එකම සැබෑ දෙවියන්වහන්සේ” කියා ඇමතූ බවත්, එවැනි අය දැනගන්නා විට, දෙවියන්වහන්සේ පිළිබඳව බයිබලය උගන්වන දෙය තේරුම්ගත නොහැකි යමක් නොවන බවත් ඔවුහු වටහා ගනිති. (යොහන් 17:3; 20:17) යෙහෝවඃවහන්සේගේ ගුණාංග දැනගැනීමට පැමිණෙනවාත් සමඟම, තමන් උන්වහන්සේ වෙතට ඇදීයන බවක් ඔවුන්ට දැනෙයි, ඔවුහු උන්වහන්සේට යාච්ඤා කිරීමට පටන් ගනිති, උන්වහන්සේව ප්‍රසන්න කිරීමට ඔවුන්ට වුවමනාය. ප්‍රතිඵලය කුමක්ද?
8. (අ) යෙහෝවඃවහන්සේට ඇති ප්‍රේමය නිසාත්, උන්වහන්සේගේ කැමැත්ත කිරීමට ඇති ආශාව නිසාත්, මිලියන ගණනක් පුද්ගලයන් කර තිබෙන්නේ කුමක්ද? (ආ) ක්‍රිස්තියානි බව්තීස්මය අතිශයින් වැදගත් වන්නේ මන්ද?
8 පසුගිය වසර දහය පුරා, මහාද්වීප හයක සහ දූපත් රාශියක පුද්ගලයෝ 25,28,524දෙනෙක් තම ජීවිත යෙහෝවඃවහන්සේට කැපකොට, තම කැපවීම වතුර බව්තීස්මය මගින් සංකේතවත්කොට ඇත්තාහ. ඔබ ඔවුන්ගෙන් කෙනෙකු වූවාද, නැතහොත් ඔබ දැන් බව්තීස්ම වීමට සූදානම් වෙමින් සිටින්නෙහිද? බව්තීස්මය වනාහි සෑම සැබෑ කිතුනු බැතියෙකුගේම ජීවිතයේ වැදගත් සිහිකටයුතු සිද්ධියකි. සියලු ජාතීන්ගෙන් ගෝලයන් සාදන ලෙසත් ඔවුන්ව බව්තීස්ම කරන ලෙසත් යේසුස්වහන්සේ සිය අනුගාමිකයන්ට පැවරූ සේක. (මතෙව් 28:19, 20) යේසුස්වහන්සේගේම බව්තීස්මයට පසු වහාම යෙහෝවඃවහන්සේම ස්වර්ගයේ සිට මෙසේ පැවසීම සනිටුහන් කිරීම වටී: “නුඹ මාගේ ප්‍රේමවන්ත පුත්‍රයාය; නුඹ කෙරෙහි ඉතා ප්‍රසන්නව සිටිමි [මම ඔබව අනුමත කළෙමි, NW].”—ලූක් 3:21, 22.
9. යෙහෝවඃවහන්සේ සමඟ අනුමැතිය ලත් සබඳතාවක් පවත්වා ගැනීම සඳහා, අපගේ පැත්තෙන් අවශ්‍ය වන්නේ කුමක්ද?
9 යෙහෝවඃවහන්සේ සමඟ අනුමැතිය ලත් සබඳතාවක් වනාහි ඉතාමත් උනන්දුවෙන් රැකබලා ගත යුතු යමකි. ඔබ කැපවීම හා බව්තීස්මය මගින් එවැනි සබඳතාවකට ඇතුළත් වී සිටී නම්, එය පලුදු කරනු ඇති ඕනෑම දෙයකින් වැළකී සිටින්න. ජීවිතයේ කනස්සලුභාවයන් හා ද්‍රව්‍යමය දේවලට ඇති ලොල්බවට එය දෙවෙනි ස්ථානයට තල්ලු කර දැමීමට කිසිවිටෙකත් ඉඩ නොදෙන්න. (1 තිමෝති 6:8-12) හිතෝපදේශ 3:6හි සඳහන් උපදෙසට අනුකූලව සැබවින්ම ජීවත්වන්න: “නුඹේ සියලු මාර්ගවලදී උන්වහන්සේ [යෙහෝවඃවහන්සේ] සලකාපන්න, එවිට උන්වහන්සේ නුඹේ මාවත් සමතලාකරනවා ඇත.”
ක්‍රිස්තුස්වහන්සේගේ ප්‍රේමය ඔබට කොතරම් ගැඹුරින් බලපායිද?
10. අප යෙහෝවඃවහන්සේට කරන නමස්කාරය, යේසුස්වහන්සේව නොසලකා හැරීමට හේතු නොවන්නේ මන්ද?
10 ඇත්ත වශයෙන්ම, එකම සැබෑ දෙවියන්වහන්සේ වශයෙන් යෙහෝවඃවහන්සේව නිසි ලෙස අගය කිරීම, පුද්ගලයෙකුහට යේසුස් ක්‍රිස්තුස්වහන්සේව නොසලකා හැරීමට හේතු කරවන්නේ නැත. ඊට පටහැනිව, එළිදරව් 19:10හි [NW] පවසන්නේ, “යේසුස්වහන්සේට සාක්ෂිදැරීම වනාහි අනාවැකි කීමට ආනුභාවය දෙන හේතු සාධකය වෙයි” යනුවෙනි. යෙහෝවඃවහන්සේගේ අරමුණ තුළ යේසුස් ක්‍රිස්තුස්වහන්සේගේ කාර්යභාරය සම්බන්ධ තොරතුරු උත්පත්ති සිට එළිදරව් දක්වා ආනුභාව ලත් අනාවැකිවල සැපයේ. පුද්ගලයෙකු මෙම තොරතුරු ගැන දැනුවත් කරනු ලබන විට, ක්‍රිස්තියානි ලෝකයේ බොරු ඉගැන්වීම්වල ප්‍රතිඵලයක් වශයෙන් ඇති වී තිබෙන වියවුල්කම් හා වැරදි මතයන්ගෙන් නිදහස්වූ චිත්තාකර්ෂණීය පින්තූරයක් ඔහුගේ මනසේ මැවී යයි.
11. දෙවියන්වහන්සේගේ පුත්‍රයා පිළිබඳව බයිබලය සැබවින්ම උගන්වන දේ ඉගෙන ගැනීම එක් පෝලන්ත ස්ත්‍රියකට බලපෑවේ කෙසේද?
11 දෙවියන්වහන්සේගේ පුත්‍රයා ගැන සත්‍යය අවබෝධ කර ගැනීම පුද්ගලයෙකු තුළ ගැඹුරු බලපෑමක් ඇති කළ හැකිය. පෝලන්තයේ විසූ ඩානුටා නමැති එක් ස්ත්‍රියක සම්බන්ධයෙන් තත්ත්වය එසේ විය. ඈ යෙහෝවඃවහන්සේගේ සාක්ෂිකරුවන් සමඟ වසර අටක් පුරා සම්බන්ධ වී සිටියාය. ඔවුන් ඉගැන්වූ දෙය සතුටින් භුක්තිවින්දාය. නමුත් සැබෑ නමස්කාරය තම ජීවන මාර්ගය කර ගනිමින් සිටියේ නැත. අනතුරුව ඈ, ක්‍රිස්තුස්වහන්සේගේ ජීවිතය ඉතාමත් පහසුවෙන් තේරුම් ගත හැකි අයුරින් ඉදිරිපත් කොට ඇති ද ග්‍රේටස්ට් මෑන් හූ එවර් ලිව්ඩ් පොතේ පිටපතක් ලබාගත්තාය.a සවස අපර භාගයේදී, ඈ පොත විවෘත කළේ එහි එක් පරිච්ඡේදයක් පමණක් කියවීමේ අදහසිනි. කෙසේවෙතත්, ඇය පොත පසෙකින් තැබුවේ පාන්දර යාමයේ එය සම්පූර්ණයෙන්ම කියවා අවසන් කිරීමෙන් පසුවය. ඇගේ නෙත්වලින් කඳුළු කඩා හැලෙන්නට විය. “යෙහෝවඃවහන්ස, මට සමාවුව මැනව,” ඈ ආයාචනා කළාය. ඈ කියවා තිබූ දෙයෙහි ප්‍රතිඵලයක් වශයෙන්, යෙහෝවඃවහන්සේ සහ උන්වහන්සේගේ පුත්‍රයාණන් විසින් පෙන්වා තිබූ ප්‍රේමය ඈ වෙන කවරදාටත් වඩා බොහෝසෙයින් පැහැදිලිව දුටුවාය. තමා කිසිම කෘතඥතාවකින් තොරව වසර අටක් මුළුල්ලේ දෙවියන්වහන්සේ ඉතා ඉවසිලිවන්තව තමාහට විදහාපාමින් සිටි උපකාරයෙන් ඉවතට හැරෙමින් සිටි බව අවබෝධ කර ගත්තාය. යේසුස් ක්‍රිස්තුස්වහන්සේ කෙරෙහි ඇදහිල්ල තැබීමේ පදනම මත ඈ 1993දී තම ජීවිතය යෙහෝවඃවහන්සේට කැපකොට බව්තීස්මයෙන් එය සංකේතවත් කළාය.
12. යේසුස් ක්‍රිස්තුස්වහන්සේ පිළිබඳ ඒකාන්ත දැනුම අපගේ ජීවිතවලට බලපාන්නේ කෙසේද?
12 “අපගේ ස්වාමිවූ යේසුස් ක්‍රිස්තුස්වහන්සේ පිළිබඳ ඒකාන්ත දැනුම,” ක්‍රියාකාරි ඵලදායී කිතු බැතියෙකු වීම සමඟ සම්බන්ධව තිබේ. (2 පේතෘස් 1:8, NW) ඔබ අන්‍යයන් සමඟ රාජ්‍යය පණිවුඩය බෙදාගනිමින්, එවැනි ක්‍රියාකාරකම්වල පංගුකාරයෙක් වනු ඇත්තේ කොතරම් ප්‍රමාණයකටද? පුද්ගලයන්ට කළ හැකි තරම බොහෝ තත්ත්වයන් මගින් බලපෑමට ලක් වෙයි. (මතෙව් 13:18-23) ඇතැම් තත්ත්වයන් වෙනස් කිරීමට අපට නොහැක; තවත් එලෙස අපට වෙනස් කළ හැක. අපට සිදු කළ හැකි වෙනස්කම් හඳුනාගෙන ඒවා වෙනස් වීමට අපව පොලඹවනු ඇත්තේ කුමක්ද? ප්‍රේරිත පාවුල් ලීවේ, “ක්‍රිස්තුස්වහන්සේගේ ප්‍රේමය අපව පොලඹවයි” කියාය; වෙනත් වචනවලින් කියතොත්, අප වෙනුවෙන් තම ජීවිතය පූජාකිරීමෙහිලා උන්වහන්සේ දැක්වූ ප්‍රේමය කොතරම් කැපී පෙනෙන්නේද යත්, ඒ සඳහා වූ අපගේ අගය කිරීම වර්ධනය වී, අපගේ හදවත් ගැඹුරින් පෙලඹෙනු ඇත. ප්‍රතිඵලයක් වශයෙන්, අප වටහාගන්නේ, අප ආත්මාර්ථකාමි ඉලක්කයන් හඹා යමින් සිටීම සහ අපවම මහත්සේ පිනවා ගැනීමට ජීවත්වීම බොහෝසෙයින් නොහොබිනා දෙයක් බවය. ඒ වෙනුවට, ක්‍රිස්තුස්වහන්සේ සිය ගෝලයන්ට කරන ලෙසට ඉගැන්වූ කාර්යය කිරීම සඳහා ඊට ප්‍රථම ස්ථානය දීම පිණිස අපි අපගේ ජීවිතයේ කාරණා කටයුතු සකස් කර ගන්නෙමු.—2 කොරින්ති 5:14, 15, NW.
ලෝකයෙන් වෙන්ව සිටීම—කොතරම් දුරටද?
13. තමන්වම ලෝකයේ පංගුකාරයන් කරගෙන තිබෙන ආගමක පංගුකාරයන් වීමට අපට වුවමනා නොවිය යුත්තේ මන්ද?
13 තමන්ට ලෝකයේ පංගුකාරයන් වීමට වුවමනා වීම නිසාවෙන්, ක්‍රිස්තියානි ලෝකය සහ අනෙකුත් ආගම් මගින් ඇති කර තිබෙන වාර්තාව දැකගැනීම අසීරු දෙයක් නොවේ. පල්ලිවල අරමුදල්, විප්ලවකාරි කටයුතුවලට වැය කිරීම සඳහා යොදවා තිබේ. පූජකයෝ ගරිල්ලා සටන්කරුවෝ බවට පත්වී සිටිති. ලොව පුරා විවිධ ප්‍රදේශවල එකිනෙකාට එරෙහිව සටන් කරමින් සිටින ආගමික කණ්ඩායම් ගැන වාර්තා, දිනෙන් දින පුවත්පත්වල විශේෂයෙන් වාර්තා වේ. ඔවුන්ගේ අත්වල ලේ තැවරී තිබේ. (යෙසායා 1:15) තවද ලොවවටා පූජක පක්ෂය දේශපාලන සිද්ධීන්වලින් අයුතු ප්‍රයෝජන ගැනීමට දිගටම උත්සාහ කරයි. සැබෑ නමස්කාරකයන්ට මේ සමඟ කිසිදු සම්බන්ධයක් නැත.—යාකොබ් 4:1-4.
14. (අ) අප ලෝකයෙන් වෙන්ව සිටීමට යන්නේ නම්, අප පෞද්ගලිකව වැලකී සිටිය යුත්තේ කුමකින්ද? (ආ) ලෞකික ආකල්ප හා සිරිත් විරිත්වල මලපත්වලට හසුවීමෙන් වැලකීමට අපට උපකාර කිරීමට කුමකට හැකිද?
14 එහෙත් ලෝකයෙන් වෙන්ව සිටීමට ඊට වඩා වැඩි යමක් ඇතුළත්ය. මුදලට සහ මුදලින් මිලදී ගත හැකි දෙයට ප්‍රේම කිරීම, පෞද්ගලික ප්‍රසිද්ධිය සඳහා ඇති ආශාව, වින්දනය පසුපස නිරතුරුවම හඹා යෑම, මේ ලෝකයේ ලක්ෂණ වන අතර, අනුන් කෙරෙහි අව්‍යාජ සැලකිල්ලක් නැතිකම, බොරු කීම හා සරදම් විලාසයෙන් කෙරෙන කථාව, අධිකාරිත්වයට එරෙහිව කැරලි ගැසීම සහ ආත්ම දමනය ක්‍රියාවට නැංවීමට අසමත්වීම වැනි දෑද මේවා අතර වෙයි. (2 තිමෝති 3:2-5; 1 යොහන් 2:15, 16) අපගේම අසම්පූර්ණකම නිසා, ඇතැම් අවස්ථාවල අප එම ගතිලක්ෂණවලින් සමහරක් පිළිබිඹු කරනවා විය හැක. එවැනි මලපත් මඟ හැරීමට අප ගන්නා දැඩි පරිශ්‍රමයේදී අපට උපකාරවත් විය හැක්කේ කුමක්ද? මේ සියලු දේ පිටුපස සිටින්නේ කවුදැයි අප අපටම මතක් කර ගත යුතුය. “මුළු ලෝකයම නපුරාගේ බලයේ රැඳී තිබේ.” (1 යොහන් 5:19, NW) එක්තරා ක්‍රියා මාර්ගයක් කොතරම් සිත් ගන්නාසුලු යයි පෙනෙන්නට තිබුණද, මිනිසුන් කොතරම් ප්‍රමාණයක් ඒ අන්දමට ජීවත් වුවද, යෙහෝවඃවහන්සේගේ ප්‍රධාන සතුරා වන සාතන් නම් යක්ෂයා ඒ පිටුපස සිටිනවා අප දකින විට, එය ඇත්තටම කොතරම් අශෝභනද කියා අපි වටහා ගන්නෙමු.—ගීතාවලිය 97:10.
ඔබගේ ප්‍රේමය කොතරම් දුරට විහිදේද?
15. ඔබ නිරීක්ෂණය කළ පරාර්ථකාමී ප්‍රේමය හරි ආගම හඳුනාගැනීමට ඔබට උපකාර කළේ කෙසේද?
15 ඔබ යෙහෝවඃවහන්සේගේ සාක්ෂිකරුවන් සමඟ ඇසුරු කිරීමට පටන් ගත් පළමු අවස්ථාවේදී, ඔවුන් අතර විදහාපානු ලැබූ ප්‍රේමය ඔබගේ සිත් ගත් බවට කිසිදු සැකයක් නැත, මන්දයත් එය ලෝකයේ ස්වභාවයට වඩා වෙනස්ය. වෙනත් සියලු ආකාර නමස්කාර ක්‍රමවලින් යෙහෝවඃවහන්සේගේ නිර්මල නමස්කාරය වෙන් කර තබන්නේ පරාර්ථකාමී ප්‍රේමය මත කෙරෙන අවධාරණයෙන්ය. යෙහෝවඃවහන්සේගේ සාක්ෂිකරුවන් ඇත්ත වශයෙන්ම හරි ආගම පිළිපදින බවට ඔබට ඒත්තු ගියේ සමහරවිට මෙමගින් වන්නට පුළුවන. යේසුස් ක්‍රිස්තුස්වහන්සේම මෙසේ පැවසූ සේක: “නුඹලා එකිනෙකාට ප්‍රේමකරනවා නම්, නුඹලා මාගේ ගෝලයෝ බව එයින් සියල්ලන් දැනගන්නවා ඇත.”—යොහන් 13:35.
16. අපගේ ප්‍රේමය පුළුල් කර ගැනීමට පුද්ගලයන් වශයෙන් අපට කිනම් ප්‍රස්තා තිබිය හැකිද?
16 ඔබත් ක්‍රිස්තුස්වහන්සේගේ ගෝලයෙකු බව එම ගුණාංගය හඳුන්වා දෙන්නේද? ඔබගේ ප්‍රේමය පෙන්වීමෙහිලා ඔබට එය පුළුල් කර ගත හැකි මාර්ග තිබේද? අප සියල්ලන්ටම එසේ කළ හැකි බවට කිසිදු සැකයක් නැත. රාජ්‍යය ශාලාවේදී අන්‍යයන් වෙත මිතුරුකමක් පෙන්වනවාට වඩා බොහෝ දේ ඊට අඩංගුය. අප ප්‍රේමය විදහන්නේ අපට ප්‍රේම කරන අයටම නම්, අප ලෝකයෙන් ඇත්තටම වෙනස් වනු ඇත්ද? “සියලු දේවලට වඩා එකිනෙකා කෙරෙහි බලවත් ප්‍රේමයක් ඇතිව සිටපල්ලා” යයි බයිබලය උදක්ම ඉල්ලා සිටී. (1 පේතෘස් 4:8) අපට වඩාත් ප්‍රේමයක් පෙන්විය හැක්කේ කා කෙරෙහිද? ඒ, අපට වඩා වෙනස් පසුබිමක් ඇති, යම් යම් දේවල් කරන විධියෙන් අපව කුපිත කරන සහෝදරයෙකු හෝ සහෝදරියකද? ඒ, අසනීපක් හෝ මහලු විය නිසා නිතිපතා රැස්වීම්වලට පැමිණීමට නොහැකි වී සිටින යම් කෙනෙක්ද? ඒ අපගේ විවාහ කලත්‍රයාද? නොඑසේනම් සමහරවිට ඒ අපගේ වයස්ගත වෙමින් සිටින දෙමාපියන්ද? ප්‍රේමය ඇතුලු ආත්මයේ ඵල හොඳින් විදහාපාමින් සිටියා වූ ඇතැම් අයට හැඟී ගිය දෙයක් නම්, දැඩිසේ ආබාධිත තත්ත්වයට පත්වූ තම පවුලේ සාමාජිකයෙකුව මුළුමනින්ම පාහේ සාත්තු කිරීමට වූ ඉතා අසීරු තත්ත්වයන්ට මුහුණ දීමට තමන්ට සිදුවූ විට ඔවුන්ට මෙම දේවල් සියල්ල යළිත් ඉගෙන ගැනීමට අවශ්‍ය වූ බවය. ඇත්ත වශයෙන්ම, මෙම තත්ත්වයන්ට මුහුණ දීමට සිදුවූ විට පවා, අපගේ ප්‍රේමය අපගේම නිවසේ අයට දක්වන ප්‍රේමයට අමතරව වඩා ඔබ්බට විහිදී යා යුතුය.
රාජ්‍යය සාක්ෂිදැරීම—ඔබට කොතරම් වැදගත්ද?
17. අප යෙහෝවඃවහන්සේගේ සාක්ෂිකරුවන්ගේ බැහැදැකීම්වලින් පෞද්ගලිකව ප්‍රයෝජන ලබා ඇත් නම්, අප දැන් කුමක් කිරීමට පෙලඹිය යුතුද?
17 අපගේ සෙසු මිනිසුන්ට ප්‍රේමය පෙන්වන වැදගත් මාර්ගයක් නම් ඔවුන්ට දෙවියන්වහන්සේගේ රාජ්‍යය පිළිබඳ ශුභාරංචිය සාක්ෂි දැරීමයි. යේසුස්වහන්සේ පුරෝකථනය කළ එම කාර්යය කරමින් සිටින්නේ එක් ජන කණ්ඩායමක් පමණි. (මාර්ක් 13:10) ඔවුහු වනාහි යෙහෝවඃවහන්සේගේ සාක්ෂිකරුවෝය. අපි එමගින් පෞද්ගලිකව ප්‍රයෝජන ලබා ඇත්තෙමු. අන්‍යයන්ට උපකාර කිරීම දැන් අපගේ වරප්‍රසාදයයි. අපි කාරණා සම්බන්ධව දෙවියන්වහන්සේගේ දෘෂ්ටියට පංගුකාරයන් වන්නෙමු නම්, මෙම වැඩය අපගේ ජීවිතවල ප්‍රමුඛ ස්ථානයක් ගන්නවා ඇත.
18. අප විසින් ජෙහෝවාස් විට්නසස්—ප්‍රොක්ලේමර්ස් ඔෆ් ගෝඩ්ස් කිංඩම් පොත කියවීම, රාජ්‍යය සාක්ෂිදැරීමට අපට තිබෙන හවුල්කාරත්වයට කෙසේ බලපෑ හැකිද?
18 මෙම අන්තිම දවස්වලදී, රාජ්‍යය පණිවුඩය පොළොවේ ඈත සීමාවන් කරා රැගෙන ගොස් තිබෙන ආකාරය පිළිබඳ මනබන්ධනීය වාර්තාව ජෙහෝවාස් විට්නසස්—ප්‍රොක්ලේමර්ස් ඔෆ් ගෝඩ්ස් කිංඩම් නමැති පොතේ වාර්තා කොට තිබේ. ඔබට ඉංග්‍රීසි කියවිය හැකි නම්, එය කියවීම අතපසු නොකරන්න. ඇරත් ඔබ එය කියවන විට, විවිධ පුද්ගලයන් රාජ්‍යය සම්බන්ධව සාක්ෂියක් දීමෙහිලා මීට හවුල් වී ඇති සියලු ආකාරයන් ගැන විශේෂ උනන්දුවක් දක්වන්න. ඇතැම් අයගේ ආදර්ශ ඔබට අනුකරණය කළ හැකිද? අප සියලු දෙනාටම විවෘත වී ඇති ප්‍රස්තා බොහොමයක් තිබේ. ඒවා හොඳින් යොදා ගැනීමට යෙහෝවඃවහන්සේට ඇති අපගේ ප්‍රේමය අපව පොලඹවාවා.
19. හරි ආගම දැනගැනීමත් සමඟ පැමිණෙන වගකීම අප භාරගන්නා විට, අප ප්‍රයෝජන ලබන්නේ කෙසේද?
19 මෙසේ අප යෙහෝවඃවහන්සේගේ කැමැත්ත කිරීමට අපවම යොදා ගන්නා විට, ජීවිතයේ අරමුණ කුමක්ද යන ප්‍රශ්නයට පිළිතුර අපට සම්බවෙනවා ඇත. (එළිදරව් 4:11) හිස්බවේ හැඟීමක් ඇතුව අප තවත් අඳුරේ අතපත ගාමින් නොසිටිනවා ඇත. යෙහෝවඃ දෙවියන්වහන්සේට සේවය කිරීමෙහිලා මුළු හදින් කැපකරමින් ඔබවම යොදා ගැනීම තරම් මහත් සෑහීමක් ලබා දෙන වෙනත් කිසිදු වෘත්තියක් නැත. ඇරත් ඒ තුළින් කොතරම් උදාර අනාගතයක් තිබේද! දෙවියන්වහන්සේ මිනිස්වර්ගයාව මැවූ ප්‍රේමනීය අරමුණට අනුකූලව අපගේ හැකියාවන් මුළුමනින්ම යොදාගැනීමට අපට හැකි වන්නාවූ උන්වහන්සේගේ නව ලෝකයේ තෘප්තිමත් සදාකාලික ජීවිතයකි එය.
[පාදසටහන්වල]
a වොච්ටවර් බයිබල් ඇන්ඩ් ට්‍රැක්ට් සොසයටි ඔෆ් නිව් යෝර්ක්, ඉන්ක්. මගින් ප්‍රකාශිතය.
ඔබ පිළිතුරු දෙනු ඇත්තේ කෙසේද?
◻ බයිබලය දෙවියන්වහන්සේගේ වචනය ලෙස පිළිගෙන, සැබෑ දෙවියන්වහන්සේ වශයෙන් යෙහෝවඃවහන්සේට ගෞරව කිරීම ආගමකට අතිශයින් වැදගත් වන්නේ මන්ද?
◻ මිදුම්කරුවාණන් වශයෙන් යේසුස්වහන්සේගේ කාර්ය භාරය සම්බන්ධව සැබෑ ආගම උගන්වන්නේ කුමක්ද?
◻ ක්‍රිස්තියානින් ලෝකයෙන් වෙන්ව සිට පරාර්ථකාමී ප්‍රේමය ක්‍රියාවට නැංවිය යුත්තේ මන්ද?
◻ හරි ආගම තුළ රාජ්‍යය සාක්ෂිදැරීමට තිබෙන කාර්ය භාරය කුමක්ද?
[16වන පිටුවේ පින්තූර]
බව්තීස්මය වනාහි සැබෑ නමස්කාරය පිළිබඳ වගකීම භාර ගැනීමෙහිලා අතිවැදගත් පියවරකි. සෑම මසකම ලොව වටා 25,000ක් පමණ එම වැදගත් පියවර ගනිති
රුසියාව
සෙනෙගාල්
පැපුවා නිව් ගිනියා
අ.එ.ජ.
[17වන පිටුවේ පින්තූර]
බයිබල් සත්‍යයන් අන්‍යයන් සමඟ බෙදාගැනීම සැබෑ නමස්කාරයේ කොටසකි
අ.එ.ජ.
බ්‍රසීලය
අ.එ.ජ.
හොං කොං