අව්‍යාජ ලෝක ව්‍යාප්ත සහෝදරත්වයක් තුළ සන්තෝෂය

විලි ඩේවිස් විසින් පැවසූ පරිදි

වර්ෂ 1934දී, මහ පරිහානිය ලෝකය ග්‍රහණය කරගනිමින් සිටි අතර, එක්සත් ජනපදය මහත් ආර්ථික දුෂ්කරතාවකට මුහුණ පාමින් තිබුණා. ඔහයෝහි, ක්ලීව්ලන්ඩ්හි, පිහිටි ප්‍රොස්පෙක්ට් නම් සහනාධාර මධ්‍යස්ථානයෙන් පිටත, පොලිස් නිලධාරියෙක් සහ තද කොමියුනිස්ට්වාදියෙක් අතර ගැටුමක් සිදුවුණා. පොලිස් නිලධාරියා කොමියුනිස්ට්වාදියාට සහ අසල සිටින්නෙකුට වෙඩිතබා මරා දැමුවා, ඒ අසල සිටි තැනැත්තිය වූයේ මගේ ආච්චි වූ විනි විලියම්ස්.

මගේ ආච්චි කළු ජාතික තැනැත්තියක සහ පොලිස් නිලධාරියා සුදු ජාතිකයෙකු වූ නිසා, කොමියුනිස්ට්වාදීන් මෙම මරණ වාර්ගික සිද්ධියක් බවට පෙරළීමට උත්සාහ කළා. “ජාතිවාදී ක්ලීව්ලන්ඩ් පොලීසිය” සහ “මෙම මිනීමැරුම්වලට පළිගනිව්” යන තේමාවලින් යුත් ප්‍රවෘත්ති ලිපි ඔවුන් බෙදා හැරියා. කොමියුනිස්ට්වාදීන් මගේ ආච්චිගේ අවමංගල්‍ය කටයුතු සංවිධානය කර ඒ ගැන බලාගත්තා. අවමංගල්‍යයේ මිනිය උසුලා ගෙන ගිය අයගේ පින්තූරයක් මා ළඟ තිබෙනවා—ඔවුන් සියල්ලන්ම සුදු ජාතිකයන් මෙන්ම සියල්ලන්ම පක්ෂයේ සාමාජිකයන්. මේ සෑම කෙනෙක්ම තමාගේ අත මිට මොළවාගෙන ඉහළින් තබා ගෙන සිටී, පසුව කළු ජාතීන්ගේ බලයේ සංකේතය ලෙස මෙය ගන්නා ලදි.

මගේ ආච්චි මියගිය අවස්ථාවේදී, ඇගේ දියණිය මා ගැබ්ගෙන සිටි අතර, මාස හතරකට පසු මා උපත ලැබුවා. මා වැඩුණේ කථාකිරීමේ බාධාවක් සමඟයි. ගොත ගැසීමකින් තොරව කථා කිරීමට මට බැරිවුණා. එමනිසා කථාකිරීමේ ප්‍රතිකාරය මගේ මුල් පාසැල් අධ්‍යාපනයට ඇතුළත් වුණා.

මා වයස අවුරුදු පහක් වන විට, මගේ දෙමාපියෝ එකිනෙකාගෙන් වෙන් වුණා, මගේ අක්කා සහ මා හදාවඩා ගත්තේ මගේ අම්මා විසින්. මට වයස අවුරුදු දහයක් වන විට, මගේ පවුලේ වියදම්වලට උදව් කිරීම සඳහා පාසැල් වේලාවෙන් පසු සිල්ලර බඩු යම් යම් ස්ථානවලට රැගෙන ගියා. වසර දෙකකට පසු, මා පාසැල් යෑමට පෙර සහ ඉන්පසුවත් වැඩ කරන්නට පටන් ගත්තේ, පවුලේ ප්‍රධාන ආදායම් උපයන්නා බවට පත්වෙමින්. මගේ අම්මා රෝහල්ගත කර ඈට ශල්‍යකර්ම කිහිපයක්ම කිරීමට අවශ්‍ය වූයෙන්, මා පාසැල් යාම නවතා දමා පූර්ණ කාලීනව වැඩ කරන්නට පටන් ගත්තා.

සහෝදරත්වයකට හඳුන්වාදෙනු ලැබීම

වර්ෂ 1944දී, යෙහෝවඃවහන්සේගේ සාක්ෂිකරුවෙක්, “සත්‍යය ඔබ නිදහස් කෙරේ” යන පොත, මගේ ඥාති සහෝදරයෙකුගේ බිරිඳ සමඟ තබා ගිය අතර, ඈ සමඟ පටන් ගැනුණු බයිබල් පාඩමට මාද සහභාගි වුණා. එම වසරේදීම මා, ඊස්ට්සයිඩ් සභාවේ දිව්‍යාණ්ඩු පාසැලට යෑමට පටන් ගත්තා. එහි පාසැල් උපදේශක, ඇල්බට් ක්‍රැඩොක්ට, මට තිබූ කථා කිරීමේ ගැටලුවම තිබුණත්, එය පාලනය කර ගැනීමට ඔහු ඉගෙන ගෙන සිටියා. ඔහු මට කොතරම් දිරිගැන්වීමක් වුණාද!

අපේ අසල්වාසීන් බොහෝ දෙනෙක්, ඉතාලි, පෝලන්ත, හංගේරියානු සහ යුදෙව් ජාතිකයන් වූ අතර, සභාව සෑදී තිබුණේ මේ අයගෙන් සහ වෙනත් වාර්ගික කණ්ඩායම්වලින්. වෙනත් ආකාරයක සුදු ජාතිකයන්ගෙන් සමන්විත සභාව සමඟ පළමුවෙන් ඇසුරු කළ අප්‍රිකානු අමෙරිකානුවන් වූයේ මගේ ඥාතියාගේ බිරිඳ සහ මා වුවත්, එම සාක්ෂිකරුවන් අපට කිසිම විටෙක වාර්ගික අගතියක් පෙන්වූයේ නැහැ. ඇත්ත වශයෙන්ම, ඔවුන් ඔවුන්ගේ නිවෙස්වලට ආහාර වේල් සඳහා මට නිතරම ආරාධනා කළා.

වර්ෂ 1956දී, මා, දේව සේවකයන්ගේ මහත් අවශ්‍යතාවක් තිබූ එක්සත් ජනපදවල දකුණු ප්‍රදේශයේ පදිංචියට ආවා. ග්‍රීෂ්ම ඍතුවේ දිස්ත්‍රික් සමුළුවක් සඳහා මා උතුරු පෙදෙසට නැවත ආ විට, ක්ලීව්ලන්ඩ්හි බොහෝ සහෝදරයන් මා බැහැදකින්ට පැමිණ මගේ ක්‍රියාකාරකම් කෙරෙහි උණුසුම් උනන්දුවක් පළ කර සිටියා. ඔවුන්ගේ සැලකිල්ල මට අතිවැදගත් පාඩමක් ඉගැන්වූවා; එනම්, සෑමවිටම, “නුඹලා එක් එක්කෙනා තම තමාගේ කාරණා [ගැන පෞද්ගලික සැලකිල්ල දක්වනවා පමණක්, NW] නොව අනුන්ගේ කාරණාත් බලාපල්ලා [ගැන පෞද්ගලික සැලකිල්ල දක්වන්න, NW].”—පිලිප්පි 2:4.

පුළුල්කරන ලද පූර්ණ කාලීන දේව සේවය

වසර තුනක් මුළුල්ලේ පුරෝගාමියෙකු හැටියට පූර්ණ කාලීන සේවයේ නියැලීමෙන් පසු, 1959 නොවැම්බර් 1දා, නිව් යෝර්ක්හි පිහිටි යෙහෝවඃවහන්සේගේ සාක්ෂිකරුවන්ගේ ජගත් මූලස්ථානයේ, බෘක්ලින් බෙතෙල්හි සේවය සඳහා මාහට ආරාධනා කරනු ලැබුවා. මා පත්කරනු ලැබුවේ බඩු නැව්ගත කිරීමේ අංශයට. සුදු ජාතිකයන්ව සිටි, මගේ අංශ අවේක්ෂක ක්ල්වුස් ජෙන්සන් සහ මගේ කාමර සහායක විලියම් හැනන් මට ආත්මික පියවරුන් වුණා. මා බෙතෙල් කරා යන විට මේ දෙදෙනාම වසර 40කට ආසන්න කාලයක් එහි සේවය කර තිබුණා.

එක්දහස් නවසිය හැට ගණන්වල, මුල්භාගයේදී බෙතෙල් පවුලේ සිටියේ සමාජිකයන් 600ක් පමණ, මේ අයගෙන් 20ක් පමණ අප්‍රිකානු අමෙරිකානුවන්. එම වකවානුවේ පටන්, එක්සත් ජනපදය වාර්ගික අර්බුදවලින් කැකෑරෙමින් තිබූ අතර, වාර්ගික සබඳතා පිරිහී තිබුණා. එහෙත්, “දෙවියන්වහන්සේ තරාතිරම් නොබලන” බව බයිබලය අපට උගන්වනවා, අපත් එසේ තරාතිරම් නොබැලිය යුතුයි. (ක්‍රියා 10:34, 35) මෙම කාරණා සම්බන්ධව දෙවියන්වහන්සේ දැරූ දෘෂ්ටිය පිළිගැනීමට අප තුළ වූ අධිෂ්ඨානය, සෑම උදෑසනකම බෙතෙල් මේසයේ අපට තිබූ ආත්මික සාකච්ඡාවලින් ශක්තිමත් කරනු ලැබුවා.—ගීතාවලිය 19:7.

බෘක්ලින් බෙතෙල්හි සේවය කරන අතර, වර්ජිනියාවේ, රිච්මන්ඩ් සිට පැමිණ සිටි පුරෝගාමියකවූ ලොයිස් රෆින් මට මුණ ගැසුණු අතර, 1964දී අපි විවාහ වුණා. අපගේ අධිෂ්ඨානය වුනේ පූර්ණ කාලීන දේව සේවය තුළ රැඳී සිටීමයි, එබැවින් අපගේ විවාහ මංගල්‍ය උත්සවයෙන් පසුව, අප එක්සත් ජනපදවල දකුණු ප්‍රදේශයට යළිත් පැමිණියා. අප පළමුව විශේෂ පුරෝගාමීන් ලෙස සේවය කළා, පසුව 1965දී, චාරිකා වැඩවල නියැලීමට මාහට ආරාධනා ලැබුණා. ඊළඟ වසර දහය තුළ, කෙන්ටකි, ටෙක්සස්, ලූසියානා, ඇලබාමා, ජියෝජියා, උතුරු කැරොලිනා සහ මිසිසිපි යන ප්‍රාන්තවල සභා බැහැදකින්ට අපි ගියා.

අපගේ සහෝදරත්වයට පරීක්ෂණයක්

එම අවුරුදුවල විශාල වෙනස්කම් සිදුවුණා. අප දකුණු පෙදෙසේ පදිංචියට යෑමට පෙර, වර්ග වෙන් කොට දක්වනු ලැබුවා. කළු ජාතිකයන්හට, සුදු ජාතීන් සමඟ එකම පාසැලට යෑමට, එකම ආපනශාලාවල අනුභව කිරීමට, එකම හෝටල්වල නිදාගැනීමට, එකම සාප්පුවලට යෑමට, එකම ජල නලවලින් දිය බීමට පවා, නීතිය මගින් තහනම් කරනු ලැබුවා. එහෙත්, 1964දී එක්සත් ජනපද මන්ත්‍රී මණ්ඩලය, ගමනාගමනය ඇතුළු ප්‍රසිද්ධ ස්ථානවල වෙනස් ලෙස සැලකීම තහනම් කළ සිවිල් අයිතිවාසිකම් පිළිබඳ නියෝගයක් පැනවූවා. එබැවින්, වාර්ගික බෙදීම්වලට තවදුරටත් කිසිම නීතිමය පදනමක් තිබුණේ නැහැ.

එමනිසා, ප්‍රශ්නය වූයේ, සියල්ලන්ම කළු ජාතිකයන්ව සිටි සහ සියල්ලන්ම සුදු ජාතිකයන්ව සිටි සභාවල අපගේ සහෝදර සහෝදරියන් එකට එකතුවී එකිනෙකාට ප්‍රේමය හා ස්නේහය දක්වාවිද නැත්නම්, අවට ප්‍රජාවගෙන් සහ මීට පෙර ගැඹුරින් කාවැදී තිබූ හැඟීම් නිසා ඇතිවන පීඩන හේතුකොටගෙන එකට එකතු වීමෙන් වළකීවිද යන්නයි. “සහෝදර ස්නේහයෙන් එකිනෙකාට ස්නේහය වෙයල්ලා; ගෞරවයෙන් තම තමාට වඩා අනික් අය උතුම් කොට සලකාපල්ලා” යන ශුද්ධ ලියවිලිමය නියෝගයට අවනත වීම අභියෝගයක් වුණා.—රෝම 12:10.

ඕනෑම කෙනෙකුගේ මතකයට අනුව, විශේෂයෙන්ම දකුණු පෙදෙස හාත්පස පැතිර තිබූ දෘෂ්ටිය නම්, කළු ජාතිකයන් පහත් අය යන්නයි. පල්ලි ඇතුළුව, විශේෂයෙන්ම සමාජයේ සෑම ක්ෂේත්‍රයකම පාහේ මිනිසුන්ගේ මනස්වල මෙම දෘෂ්ටිය ගැඹුරට කා වැදී තිබුණා. එමනිසා, ඇතැම් සුදු ජාතිකයන්ට කළු ජාතිකයන් තමන් හා එක සමාන අයයයි සැලකීම එතරම් පහසු වුණේ නැහැ. ඇත්තෙන්ම, කළු සහ සුදු ජාතික යන දෙවර්ගයෙන්ම සමන්විත අපගේ සහෝදරත්වයට එය පරීක්ෂණාත්මක කාලයක් වුණා.

සමස්තයක් වශයෙන් ගත් කල, අපගේ සභාවන්හි වාර්ගික සංකලනයට පුදුමාකාර ප්‍රතිචාරයක් තිබූ බව සන්තෝෂයට කරුණක් වූවා. සියවස් ගණනාවක් පුරා ඉතා සැලකිල්ලෙන් පැළපදියම් කර තිබූ වාර්ගික උතුම්කම පිළිබඳ දෘෂ්ටීන් සැණෙකින් ඉවත් කරනු ලැබුවේ නැහැ. එහෙත්, සභාවන්හි වාර්ගික සංකලනයක් ඇතිවූ අවදියේ, අපගේ සහෝදරයන් ඉතා මැනවින් එය පිළිගත් අතර, ඔවුන්ගෙන් වැඩි දෙනෙක් එකට හමුවීමට ලැබීම ගැන සතුටු වුණා.

අපගේ සභාවන්හි වාර්ගික සංකලනය සමඟ සාක්ෂිකරුවන් නොවන අය පවා සහයෝගයෙන් ක්‍රියා කිරීම උනන්දුව ගෙන දෙන කරුණක්. නිදසුනක් වශයෙන්, කළු ජාතිකයන් රැස්වීම්වලට එනවාට විරුද්ධත්වයක් තිබේ දැයි ඇලබාමාහි, ලනෙට්හි රාජ්‍යය ශාලාව යාබද අසල්වැසියන්ගෙන්, අසනු ලැබුවා. සුදු ජාතික වයසක කාන්තාවක්, කළු ජාතික සහෝදරයෙකුගේ අතට අතදී මෙසේ පැවසුවා: “කරුණාකර අප වෙසෙන පැත්තට ඇවිත් ඔබට කැමති විදිහට ඔබගේ දෙවියන්වහන්සේට නමස්කාර කරන්න.”

ඉතියෝපියාවේ ඇදහිලිවන්ත සහෝදරයෝ

වර්ෂ 1974දී, නිව් යෝර්ක් නගරයේ වොච්ටවර් බයිබල් ස්කූල් ඔෆ් ගිලියඩ්හි, මාස පහමාරක මිෂනාරි පුහුණුව සඳහා අපට ආරාධනා ලැබීම අපගේ සතුටට හේතු වුණා. ඉන්පසුව අප අප්‍රිකානු රටක් වන ඉතියෝපියාවට පැවරීමක් ලැබුවා. එහි අධිරාජ්‍යයාව සිටි හයිලි සලාසි එම තනතුරෙන් පහ කොට නිවාස අඩස්සියේ තබනු ලැබ සිටියා. අපගේ දේශනා වැඩකටයුතු තහනම් කොට තිබූ බැවින්, අපගේ ක්‍රිස්තියානි සහෝදරත්වයේ උණුසුම් සමීපතාව අප අගය කළා.

සැබෑ නමස්කාරයට ලැදිව සිටීම නිසා පසුව සිරගත කරනු ලැබූ බොහෝ දෙනෙකු සමඟ අප ජීවත් වුණා, සේවය කළා. අපගේ හිතවත් සමහර මිත්‍රයන් ඝාතනය කරනු ලැබුවා. ආඩෙරා ටෙෂොමෙ වනාහි ඉතියෝපියාවේ අගනුවර වන අඩිස් අබාබාහි සභාවක මා සමඟ සේවය කළ වැඩිමහල්ලෙක්.a වසර තුනක් සිරගතව සිටීමෙන් පසුව, ඔහුව ඝාතනය කරනු ලැබුවා. ඔහුගේ භාර්යාව මේ ගැන අතිශයින් ශෝකවීම අමුතුවෙන් කිව යුතු නොවේ. වසර ගණනාවකට පසුව, ඈ ප්‍රීතිය විදහාපාමින් පුරෝගාමියක ලෙස සේවය කරනවා දැකීම කොතරම් සතුටක් වුණාද!

තවත් ඇදහිලිවන්ත සහෝදරයෙකු වූ වෝර්කූ ආබෙබෙ, අට වතාවක්ම මරණයට නියම වුණා.* එහෙත් ඔහු කිසිවිටෙකත් තර්ජනවලට භය වුණේ නැහැ! මා අවසාන වතාවට ඔහු දුටු අවස්ථාවේ, සිරමැදිරි ආරක්ෂක නිලධාරීන් විසින් රයිෆල් තුවක්කු බඳෙන් ඔහුගේ කන්වලට තදින් පහර දී තිබීම හේතුවෙන් ඒවා විකෘති වී තිබූ ආකාරය ඔහු මට පෙන්වූවා. ඔහුගේ උදේ කෑමට, දවල් කෑමට හා රාත්‍රි කෑමට එම රයිෆල් තුවක්කු බඳ පහරවල් ලැබුණා යයි ඔහු මට පැවසුවේ විහිළුවෙන් වගේ. ඔහු දැනට මියගොස් සිටියත්, සහෝදරයන් තවමත් ඔහුව ආදරයෙන් සිහිකරනවා.

හයිලූ යෙමේරු වනාහි මා ඉතා ආදරයෙන් සිහිකරන තවත් සහෝදරයෙක්.* ඔහු තමාගේ භාර්යාවට පෙන්වූ ප්‍රේමය ආදර්ශවත් එකක්. ඈ අත්අඩංගුවට ගනු ලැබුවා, නමුත් ඈ ගැබ්ගෙන සිටි නිසාත්, දරු ප්‍රසූතිය ළංව තිබූ නිසාත්, ඇගේ ස්ථානය තමාට ගැනීමට හැකිදැයි හයිලූ බන්ධනාගාර අධිකාරීන්ගෙන් විමසුවා. පසුව, ඔහු තම ඇදහිල්ල පාවා නොදෙන බව පැහැදිලි වූ විට, ඔහුව ඝාතනය කරනු ලැබුවා.—යොහන් 15:12, 13; එපීස 5:28.

ඉතියෝපියාවේ පිරිහෙමින් තිබූ දේශපාලන තත්ත්වය නිසා, අප 1976දී කෙන්යාවේ පදිංචියට පැමිණියා. වසර හතක් පුරා අප, කෙන්යාව, ඉතියෝපියාව, සුඩානය, සේෂෙල්ස් දූපත්, උගන්ඩාව සහ ටැන්සානියාව ඇතුළු නැගෙනහිර අප්‍රිකාවේ බොහෝ රටවල සහෝදරයන් බැහැදකිමින් සංචාරක සේවය තුළ වැඩ කළා. බුරුන්ඩි හා රුවන්ඩා යන රටවල අපගේ වැඩකටයුතු නීත්‍යානුකූලව ලියාපදිංචි කිරීමේ කටයුතු සම්බන්ධයෙන් එම නිලධාරීන් සමඟ සාකච්ඡා කිරීම සඳහා යවනු ලැබූ නියෝජිත පිරිසේ සාමාජිකයෙකු වශයෙන් මා වතා කිහිපයක්ම එම රටවලටද ගමන් කළා.

ඉතියෝපියාවේ අපගේ වැඩකටයුතුවලට පනවා තිබූ තහනම ඉවත් කිරීමෙන් පසු, පළමු දිස්ත්‍රික් සමුළුවට සහභාගි වීම සඳහා 1992 ජනවාරි මාසයේදී නැවතත් ඉතියෝපියාවට පැමිණීමට ලැබීම අපට සතුටක් වුණා. සහෝදරයන් මීට පෙර කුඩා කණ්ඩායම් වශයෙන් පමණක් රැස්වීම් පවත්වා තිබූ බැවින්, මෙහි පැමිණි සිටි 7,000කට වැඩි දෙනෙකුගෙන් බොහොමයක් එකිකෙනාව අඳුනාගෙන සිටියේ නැහැ. සමුළුවේ සෑම දවසකම, බොහෝ දෙනෙක් අපගේ ප්‍රේමනීය සහෝදරත්වය භුක්ති විඳීම පිණිස වැඩසටහන ආරම්භ කිරීමට පැය දෙකකට කලින් පැමිණ සිටි අතර, සවස් යාමයේ බොහෝ වේලාවක් රැඳී සිටියා.

ගෝත්‍රිකවාදය පරාජය කෙරේ

සියවස් ගණනාවක් පුරා අප්‍රිකාවේ ගෝත්‍රිකවාදය දසත විහිදී තිබේ. නිදසුනක් වශයෙන්, බුරුන්ඩි සහ රුවන්ඩාවේ ප්‍රධාන වාර්ගික කණ්ඩායම් වන හූටූ සහ ටූට්සි යන ගෝත්‍ර දිගු කලක් මුළුල්ලේ සිට ඇත්තේ එකිනෙකාට දැඩි වෛරයකින්. මෙම රටවල් 1962දී බෙල්ජියමෙන් නිදහස ලැබුවායින් පසු, මෙම වාර්ගික කණ්ඩායම් දෙකේ සාමාජිකයෝ දහස් ගණනින් එකිනෙකාව මරා ගෙන තිබෙනවා. එබැවින්, මෙම වාර්ගික කණ්ඩායම් දෙකේ සාමාජිකයන් වන දැනට යෙහෝවඃවහන්සේගේ සාක්ෂිකරුවන් බවට පත් වී සිටින අය සාමයෙන් වැඩකරනවා දැකීම කොතරම් ප්‍රීතියක්ද! එකිනෙකා කෙරෙහි ඔවුන් දක්වන අව්‍යාජ ප්‍රේමය, බයිබල් සත්‍යයන්ට සවන්දීමට වෙනත් බොහෝ දෙනෙකුව දිරිගන්වා තිබෙනවා.

මේ හා සමානව, කෙන්යාවේ වෙසෙන වාර්ගික කණ්ඩායම්වලට බොහෝ විට එකඟ නොවීම් තිබෙනවා. එහෙත් කෙන්යාවේ යෙහෝවඃවහන්සේගේ ජනයා අතර පවතින ක්‍රිස්තියානි සහෝදරත්වය තුළ මොනතරම් වෙනසක් තිබේද! විවිධ වාර්ගික කණ්ඩායම්වලට අයත් අය රාජ්‍යය ශාලාවල එක්සත්කමින් නමස්කාරයේ යෙදෙනවා ඔබට දකින්නට පිළිවන්. මේ අයගෙන් බොහෝ දෙනෙක් තමන්ගේ ගෝත්‍රික වෛරයන් ඉවත දමා, වෙනත් වාර්ගික කණ්ඩායම්වල තම සහෝදර සහෝදරියන් කෙරෙහි අව්‍යාජ ප්‍රේමයක් දක්වනවා දැකීම මට ඉමහත් සතුටක් වී තිබෙනවා.

අපගේ සහෝදරත්වය උදෙසා සතුටු වීම

පසුගිය වසර 50 මුළුල්ලේ දෙවියන්වහන්සේගේ සංවිධානය සමඟ ඇසුරු කිරීම දෙස මා ආපසු හැරී බලන විට, යෙහෝවඃවහන්සේ සහ උන්වහන්සේගේ පුත්‍ර යේසුස් ක්‍රිස්තුස්වහන්සේ කෙරෙහි කෘතඥතාවෙන් මගේ හදවත පිරී යනවා. උන්වහන්සේලා පොළොව මතට ගෙනැවිත් තිබෙන දේ නිරීක්ෂණය කිරීම හරිම පුදුමාකාරයි! නැත, දෙවියන්වහන්සේගේ ජනයා අතර තත්ත්වය සෑමවිටම පරිපූර්ණ වී නැත, අදදිනත් තත්ත්වය එසේ නොවේ. එහෙත්, සාතන්ගේ ලෝකය විසින් වසර සිය ගණනක් මුළුල්ලේ උගන්වා ඇති වාර්ගික ඉගැන්වීම් එක රැයකින් මකා දැමිය හැකි යයි අපේක්ෂා කරන්නට බැහැ. ඇයි කිව්වොත්, අප සියල්ලන්ම තවමත් අසම්පූර්ණයි.—ගීතාවලිය 51:5.

මා, යෙහෝවඃවහන්සේගේ සංවිධානය ලෝකය සමඟ සසඳා බලන විට, අපගේ ලෝක ව්‍යාප්ත අව්‍යාජ සහෝදරත්වය කෙරෙහි අගයෙන් යුතුව මගේ හදවත පිරීඉතිරී යනවා. සත්‍යය තුළ මා පෝෂණය කළ, ක්ලීව්ලන්ඩ්හි ඒ සියලු සුදු ජාතික සහෝදරයන් මට තවමත් මතක් වන්නේ සෙනෙහසේ හැඟීම්වලිනි. එමෙන්ම එක්සත් ජනපදවල දකුණු පෙදෙසේ සුදු ජාතික හා කළු ජාතික සහෝදරයන්, තමන්ගේ අගතිසහගත හැඟීම් වෙනුවට හෘදයාංගම සහෝදර ස්නේහය විදහාපාන විට, මගේ හදවත සතුටින් පිනා යයි. ඊළඟට, අප්‍රිකාවට ගොස්, යෙහෝවඃවහන්සේගේ වචනය වාර්ගික වෛරයන් මකා දමන ආකාරය දැකීම, අපගේ ලෝක ව්‍යාප්ත සහෝදරත්වය කෙරෙහි වඩාත් හොඳින් අගය කිරීමට මාහට හේතුවක් වී තිබෙනවා.

ඇත්ත වශයෙන්ම, ඉපැරණි දාවිත් රජ මෙසේ කියන විට ඔහු අදහස මැනවින් ගෙනහැර දැක්වූවා: “බලව, සහෝදරයන් එකඟව වාසය කිරීම කොපමණ යහපත්ද, කොපමණ ප්‍රසන්නද!”—ගීතාවලිය 133:1.

[පාදසටහන්වල]

[23වන පිටුවේ පින්තූරය]

මගේ ආච්චිගේ අවමංගල්‍යය

[24වන පිටුවේ පින්තූරය]

ටූට්සි සහ හූටූ සාක්ෂිකරුවෝ සාමයෙන් එකට වැඩ කරති

[25වන පිටුවේ පින්තූරය]

මගේ භාර්යාව, ලොයිස් සමඟ