දෙවියන්වහන්සේගේ මුල් සේවකයන් අතර වනිතාවන්ගේ ගෞරවාන්විත භූමිකාව

“ස්වාමිවූ දෙවියන්වහන්සේ කථාකොට: මනුෂ්‍යයා [දිගටම, NW] තනියම සිටීම හොඳනැත; [ඌනපූරණයක් වශයෙන්, NW] ඔහුට සුදුසු සහකාරියක් සාදාදෙන්නෙමියි කීසේක.”—උත්පත්ති 2:18.

1. පුරාණ කාලවලදී ස්ත්‍රීන්ට හිමි කොටස බයිබල් ශබ්දකෝෂයක කෙසේ විස්තර කර තිබේද?

“නූතන බටහිර සමාජයේ ස්ත්‍රීන් භුක්තිවිඳින්නාවූ නිදහස, පුරාණ මධ්‍යධරණියෙහිවත්, මෑත පෙරදිගෙහිවත් ඔවුන්ට නොපිරිනමන ලදි. හරියටම දාසයන් නිර්දාසයන්ටද, තරුණයන් මහල්ලන්ටද යටත්ව සිටියාක් මෙන්, සාමාන්‍යයෙන්ම දක්නට ලැබූ රටාව වූයේ ස්ත්‍රීන් පුරුෂයන්ට යටත්ව සිටීමය. ගැහැනු දරුවන්ට වඩා පිරිමි දරුවන්ට උසස් සැලකිල්ලක් දැක්වූ අතරම, ඇතැම් අවස්ථාවන්හිදී මියයෑමට ගැහැනු ළදරුවන්ව එළිමහනේ තබන ලදි.” පුරාණ කාලයේ ස්ත්‍රීන්ට මුහුණ දීමට සිදුවූ ජීවිතය එක් බයිබල් ශබ්දකෝෂයක විස්තර කර තිබුණේ එලෙසය.

2, 3. (අ) එක් වාර්තාවකට අනුව, අදදින බොහෝ ස්ත්‍රීන්ගේ තත්වය කවරේද? (ආ) ඉස්මතු වන්නේ කවර ප්‍රශ්නද?

² අදදින ලෝකයේ බොහෝ පෙදෙස්වල තත්වය බොහෝදුරට මීට වඩා හොඳ නැත. වර්ෂ 1994දී, එ.ජ. රජයේ දෙපාර්තමේන්තුවේ වාර්ෂික මානව අයිතිවාසිකම් වාර්තාව, පළමු වරට ස්ත්‍රීන්ට සැලකිල්ල දැක්වීම මත අවධානය යොමු කළේය. “දිනපතා අසාධාරණ ලෙස සැලකීම යථාර්ථයක් බව රටවල් 193ක දත්ත පෙන්නුම් කරයි,” කියා මෙම වාර්තාව පිළිබඳව නිව් යෝර්ක් ටයිම්ස් ශීර්ෂ පාඨයක ප්‍රකාශ විය.

³ ලොව පුරා යෙහෝවඃවහන්සේගේ සෙනඟගේ සභා සමඟ විවිධාකාර පසුබිම්වලින් පැමිණි ස්ත්‍රීන් රාශියක් ආශ්‍රය කරන නිසා, ප්‍රශ්න සමහරක් ඉස්මතු වේ: ඉහත විස්තර කරන ලද සැලකිල්ල දෙවියන්වහන්සේ ස්ත්‍රීන් සඳහා මුලදී අදහස් කළ දෙයට සමානද? බයිබල් කාලවලදී යෙහෝවඃවහන්සේගේ නමස්කාරකරන්නන් අතර ස්ත්‍රීන්ට සලකනු ලැබුවේ කෙසේද? එමෙන්ම අදදින ස්ත්‍රීන්ට කෙසේ සලකනු ලැබිය යුතුද?

“සහකාරියක්” හා “ඌනපූරණයක්”

4. පළමු මිනිසා ඒදන් උයනෙහි සෑහෙන කලක් තනිව සිටීමෙන් පසු යෙහෝවඃවහන්සේ කුමන නිරීක්ෂණයක් කළසේක්ද, තවද අනතුරුව දෙවියන්වහන්සේ කුමක් කළසේක්ද?

⁴ ආදම් යම් කලකට ඒදන් උයනෙහි තනිවම කාලය ගත කළායින් පසුව, යෙහෝවඃවහන්සේ මෙසේ නිරීක්ෂණය කළසේක: මනුෂ්‍යයා [දිගටම, NW] තනියම සිටීම හොඳනැත; [ඌනපූරණයක් වශයෙන්, NW] ඔහුට සුදුසු සහකාරියක් සාදාදෙන්නෙමි. (උත්පත්ති 2:18) ආදම් පරිපූර්ණ පුරුෂයෙකු වුවත්, මැවුම්කරුගේ අරමුණ ක්‍රියාත්මක කිරීම සඳහා වෙන යමක් අවශ්‍යව තිබිණ. එම අවශ්‍යතාව පිරිමැසීම සඳහා, යෙහෝවඃවහන්සේ පළමු ස්ත්‍රියව මවා පළමු විවාහය සිදු කළසේක.—උත්පත්ති 2:21-24.

5. (අ) “සහකාරිය” ලෙස පරිවර්තනය කර තිබෙන හෙබ්‍රෙව් නාම පදය බොහෝදුරට බයිබල් ලේඛකයන් විසින් කෙසේ භාවිත කරනු ලැබේද? (ආ) යෙහෝවඃවහන්සේ පළමු ස්ත්‍රිය “ඌනපූරණයක්” බව පැවසීමෙන් කුමක් අඟවනු ලැබේද?

⁵ දෙවියන්වහන්සේ විසින් පවරන ලද ස්ත්‍රියගේ භූමිකාව අවමන්සහගත බව, “සහකාරිය” හා “ඌනපූරණය” යන වදන් මගින් අඟවනු ලැබීද? ඊට පටහැනිය. බයිබල් ලේඛකයෝ “සහකාරිය” ලෙස පරිවර්තනය කර තිබෙන හෙබ්‍රෙව් නාම පදය (ʽඊʹසෙර්) නිතරම දෙවියන්වහන්සේට අදාළ කරති. උදාහරණයක් හැටියට, යෙහෝවඃවහන්සේ “අපේ උපකාරයත් පලිහත්” බවට ඔප්පු කරනසේක. (ගීතාවලිය 33:20; නික්මයාම 18:4; ද්විතීය කථාව 33:7) හොෂෙයා 13:9හි, යෙහෝවඃවහන්සේ තමන් ඉශ්‍රායෙල්ගේ “ආධාරකාරයා” බවට පවා යොමු දක්වනසේක. “ඌනපූරණය” හැටියට පරිවර්තනය කොට ඇති හෙබ්‍රෙව් වචනය ගත් කල, එක් බයිබල් විශාරදයෙක් මෙසේ පැහැදිලි කරයි: “මෙහිදී පතන උපකාරය, තම දිනපතා වැඩවලට හෝ දරුවන් බෝ කිරීමට ලබන සහාය පමණක් නොව . . . නමුත් එය සහකාරිත්වය සපයන අන්‍යොන්‍ය රුකුල් දීමක් වේ.”

6. ස්ත්‍රියගේ මැවීමෙන් පසු කුමක් කියනු ලැබීද, තවද ඒ මන්ද?

⁶ මෙසේ යෙහෝවඃවහන්සේ විසින් ස්ත්‍රියව “සහකාරියක්” හා “ඌනපූරණයක්” ලෙස විස්තර කරනු ලැබීමෙහි කිසිදු අවමන්සහගත යමක් අන්තර්ගතව නොපවතී. ස්ත්‍රියට ඇයටම විශේෂ වූ මානසික, චිත්තවේගීය හා කායික සැකැස්මක් තිබිණ. ඈ පුරුෂයා සඳහා යෝග්‍ය ප්‍රතිරූපයක් නොහොත් තෘප්තිකර ඌනපූරණයක් වූවාය. එකිනෙකා වෙනස් වූ නමුත්, මැවුම්කරුගේ අරමුණට එකඟව, “පොළොව පූර්ණ” කිරීමට දෙදෙනාවම අවශ්‍ය විය. “දෙවියන්වහන්සේ තමන් සෑදූ සියල්ලම දුටුසේක, බලව ඒ ඉතා යහපත්ව තිබුණේය,” කියා කීමට හැකි වූයේ, පෙනෙන ප්‍රකාරයට, පුරුෂයා හා ස්ත්‍රිය යන දෙදෙනාගේම මැවීමෙන් පසුවය.—උත්පත්ති 1:28, 31.

7, 8. (අ) ඒදන්හි පාපයෙහි ඇරඹීමත් සමඟම, ස්ත්‍රියගේ භූමිකාවට කෙසේ බලපෑම් ලැබෙනු ඇද්ද? (ආ) යෙහෝවඃවහන්සේට නමස්කාරකරන්නන් අතර උත්පත්ති 3:16හි ඉටුවීම ගැන කුමන ප්‍රශ්න ඉස්මතු වේද?

⁷ පාපයෙහි පිවිසීමත් සමඟම, පුරුෂයා හා ස්ත්‍රිය සඳහා තත්වය වෙනස් විය. යෙහෝවඃවහන්සේ, පව්කාරයන් හැටියට ඔවුන් මත තීන්දුවක් නියම කළසේක. “නුඹේ ශෝකය හා ගැබ්ගැනීම බොහෝසෙයින් වැඩිකරන්නෙමි” කියා ඒවට පැවසූ යෙහෝවඃවහන්සේ, උන්වහන්සේම එය සිදු කරන්නාක් මෙන්, තමන් ඉඩහරින ඵලවිපාකය ගැන කතා කළසේක. උන්වහන්සේ මෙසේද පැවසූසේක: “නුඹ වේදනා සහිතව දරුවන් වදන්නීය; නුඹේ ආශාව නුඹේ පුරුෂයා කෙරෙහි වන්නේය; ඔහු නුඹ කෙරෙහි බලපවත්වන්නේය.” (උත්පත්ති 3:16) ඒ කාලය සිට, තම පුරුෂයන් විසින්, බොහෝ භාර්යාවන් කෙරෙහි, නිතර නිතර කර්කශ ලෙස බලපවත්වා තිබේ. සහකාරියන් හා ඌනපූරණ ලෙස අගය කොට සලකනවා වෙනුවට, ඔවුන්ව බොහෝ විට සේවිකාවන් නැතහොත් දාසියන් ලෙස සලකනු ලැබේ.

⁸ කෙසේවෙතත්, යෙහෝවඃවහන්සේට නමස්කාර කරන ස්ත්‍රීන් සඳහා, උත්පත්ති 3:16හි ඉටුවීම කුමක් අදහස් කළේද? ඉතා යටහත්, නිග්‍රහාත්මක තත්වයක් දක්වා ඔවුන්ව පහතට හෙළනු ලැබීද? කිසිසේත් නැත! එහෙත් අදදින ඇතැම් සමාජයන්වල පිළිගත නොහැකි යමක් සේ දිස්විය හැකි, ස්ත්‍රීන්ට බලපාන සිරිත් විරිත් හා ක්‍රියාකලාපයන් විස්තර කරන බයිබල් වාර්තා ගැන කුමක් කිව හැකිද?

බයිබලයේ සිරිත් විරිත් තේරුම්ගැනීම

9. බයිබල් කාලවලදී ස්ත්‍රීන් හා සම්බන්ධ සිරිත් විරිත් සලකා බැලීමේදී, අප කවර කාරණා තුන මනසෙහි තබාගත යුතුද?

⁹ බයිබල් කාලවලදී දෙවියන්වහන්සේගේ සෙනඟ අතර ස්ත්‍රීන්ට හොඳින් සලකනු ලැබීය. ඇත්තෙන්ම එදා ස්ත්‍රීන් හා සම්බන්ධ සිරිත් විරිත් සැලකිල්ලට භාජන කිරීමේදී, කාරණා කිහිපයක් මතකයේ තබාගැනීම වටී. පළමුව, දුෂ්ට පුරුෂයන් විසින් කරන ලද ආත්මාර්ථකාමී පීඩා නිසා වර්ධනය වූ අප්‍රසන්න සිදුවීම් ගැන බයිබලය විස්තර කරන විට, එලෙස ස්ත්‍රීන්ට සැලකීම දෙවියන්වහන්සේ අනුමත කළ බව ඉන් අදහස් නොකෙරේ. දෙවනුව, යෙහෝවඃවහන්සේ එක්තරා කලකට ස්වකීය සෙනඟ අතර පැවති යම් යම් සිරිත් විරිත්වලට ඉඩහැරියද, ස්ත්‍රීන්ට ආරක්ෂාව සැලසීම සඳහා උන්වහන්සේ ඒවා පාලනය කළසේක. තුන්වනුව, පුරාණ සිරිත් විරිත් නවීන ප්‍රමිති අනුව විනිශ්චය නොකිරීමට අප වගබලා ගත යුතුය. අදදින ජීවත් වන ජනයාට අප්‍රසන්න මෙන් දිස්විය හැකි ඇතැම් සිරිත් විරිත්, එදා විසූ ස්ත්‍රීන් විසින් අනිවාර්යයෙන්ම අවමන්සහගත යමක් සේ නොසලකන ලදි. අපි සමහරක් උදාහරණ සලකා බලමු.

10. යෙහෝවඃවහන්සේ බහු විවාහය නමැති සිරිත සැලකුවේ කෙසේද, තවද උන්වහන්සේ කිසිදාක ඒක විවාහය පිළිබඳ ස්වකීය ප්‍රමිතිය අත්නෑරිය බව කුමක් අඟවයිද?

¹⁰ බහු විවාහය:a යෙහෝවඃවහන්සේගේ මුල් අරමුණට අනුව, භාර්යාවකට, ඇගේ ස්වාමිපුරුෂයාව වෙන ස්ත්‍රියක සමඟ හවුලේ භුක්තිවිඳීමට ඉඩ කඩ නොතිබෙනු ඇත. දෙවියන්වහන්සේ ආදම් සඳහා මැව්වේ එක් භාර්යාවක පමණි. (උත්පත්ති 2:21, 22) ඒදන්හි කැරලි ගැසීමෙන් පසු, බහු විවාහය නමැති සිරිත පළමුව කායින්ගේ පෙළපතෙහි ඉස්මතු විය. කල්යත්ම එය සිරිතක් බවට පත්වූ අතර, යෙහෝවඃවහන්සේට නමස්කාර කරන ඇතමුන් විසින්ද යෙදෙන ලදි. (උත්පත්ති 4:19; 16:1-3; 29:21-28) යෙහෝවඃවහන්සේ බහු විවාහයට ඉඩ දුන්නද, එමෙන්ම එය ඉශ්‍රායෙල් ජනගහනයේ වැඩිවර්ධනයටත් දායක වුවද, භාර්යාවන්ට හා දරුවන්ට ආරක්ෂාවක් ලැබිය හැකි පරිදි, එම සිරිත පාලනය කිරීමෙන්, උන්වහන්සේ ස්ත්‍රීන් සඳහා සැලකිල්ල දැක්වූසේක. (නික්මයාම 21:10, 11; ද්විතීය කථාව 21:15-17) එපමණක්ද නොව, යෙහෝවඃවහන්සේ කිසිදාක ඒක විවාහය පිළිබඳ ස්වකීය මුල් ප්‍රමිතිය අත් නොහැරියසේක. ‘සඵලවෙමින් පොළොව පූර්ණ’ කිරීමට වූ ආඥාව ලැබූ නෝවාටද, සිය පුත්‍රයන්ටද සිටියේ එක් භාර්යාවක බැගිනි. (උත්පත්ති 7:7; 9:1; 2 පේතෘස් 2:5) දෙවියන්වහන්සේ ඉශ්‍රායෙල් සමඟ ස්වකීය සබඳතාව සංකේතාත්මකව දැක්වීමේදී, උන්වහන්සේ තමන්ව දැක්වූයේ එක භාර්යාවක සිටින ස්වාමිපුරුෂයෙකු වශයෙනි. (යෙසායා 54:1, 5) එපමණක්ද නොව, ඒක විවාහය වූ දෙවියන්වහන්සේගේ මුල් ප්‍රමිතිය යළිත් යේසුස් ක්‍රිස්තුස්වහන්සේ විසින් ස්ථාපිත කරනු ලැබූ අතර, මුල් ක්‍රිස්තියානි සභාව මගින් අනුගමනය කරන ලදි.—මතෙව් 19:4-8; 1 තිමෝති 3:2, 12.

11. බයිබල් කාලවලදී, අඹුවැද්දක් ගෙවන ලද්දේ මන්ද, තවද මෙය කාන්තාවන්හට අවමන්සහගත යමක්වීද?

¹¹ අඹුවැද්දක් ගෙවීම: ඒන්ෂන්ට් ඉස්රේල්—ඉට්ස් ලයිෆ් ඇන්ඩ් ඉන්ස්ටිටියූෂන්ස් මෙසේ ප්‍රකාශ කරයි: “ස්ත්‍රියගේ පවුලට යම් මුදලක් හෝ ඊට සම යමක් ගෙවීමට වූ බැඳීම, ඉශ්‍රායෙල් විවාහය බාහිර ලෙස මිලයට ගැනීමක් සේ පෙන්නුම් කිරීමට සලස්වන බව අමුතුවෙන් කිව යුතු නොවේ. එහෙත් [අඹුවැද්ද] සඳහා ගෙවන මුදලක් සේ නොව නමුත්, පවුලට වන්දියක් සේ දෙන යමක් වන බව පෙනේ.” (ඇල අකුරු අපේය.) ඒ නිසා අඹුවැද්දක් ගෙවීම, ස්ත්‍රියගේ පවුලට වන්දියක් වූයේ මන්දයත්, ඉන් ඇයව අහිමි වීම හේතුවෙන් නැතිවන සේවය හා ඇයව නඩත්තු කිරීම සඳහා ඇගේ පවුලට දැරීමට සිදුවූ ශ්‍රමය හා වියදම සඳහා එය වන්දියක් වූ බැවිනි. එසේනම්, ස්ත්‍රියව අවමන් කරනවා වෙනුවට, මෙය ඇගේ පවුලට ඇගේ අගය යළි තහවුරු කළේය.—උත්පත්ති 34:11, 12; නික්මයාම 22:16; මුරටැඹ 1989 මැයි 1, 15-18 පිටු බලන්න.

12. (අ) ඇතැම් අවස්ථාවලදී විවාහක පුරුෂයන්ට හා ස්ත්‍රීන්ට ශුද්ධ ලියවිල්ලෙහි යොමු දක්වා තිබුණේ කෙසේද, තවද මෙවන් යෙදුම් ස්ත්‍රීන්ව නින්දාවට ලක් කළාද? (ආ) යෙහෝවඃවහන්සේ ඒදන්හි භාවිත කළ යෙදුම් සම්බන්ධයෙන් කුමක් සිත්ගනීද? (පාදසටහන බලන්න.)

¹² ස්වාමිපුරුෂයන් “අයිතිකරුවන්” ලෙස: පොදු යුගයට පෙර 1918දී පමණ, ආබ්‍රහම්ගේ හා සාරාගේ ජීවිතයේ එක්තරා සිද්ධියක් අඟවන්නේ, ඒ කාලය වන විට, විවාහක පුරුෂයෙකු “අයිතිකරුවෙකු” (හෙබ්‍රෙව්, බේʹʽආල්) ලෙසත්, විවාහක ස්ත්‍රියක ‘අයිති කර තිබූ තැනැත්තිය’ (හෙබ්‍රෙව්, බෙʽඋ·ලාහ්ʹ) ලෙසත් සැලකීම පෙනෙන ප්‍රකාරයට සිරිත වී තිබූ බවය. (උත්පත්ති 20:3) මින් පසු ඇතැම් අවස්ථාවලදී මෙම යෙදුම් ශුද්ධ ලියවිලිවල භාවිත කර තිබෙන අතර, ඒවා පූර්ව-ක්‍රිස්තියානීන්හට අවමන්සහගත යමක් වූ බවට කිසිදු ඇඟවීමක් නැත.b (ද්විතීය කථාව 22:22) කෙසේවෙතත් ස්ත්‍රීන්ව දේපොළ මෙන් නොසැලකිය යුතුව තිබිණ. දේපොළ හෝ ධනය මිල දී ගැනීමටත්, විකිණීමටත්, උරුමයක් හැටියට පවා ලබාගැනීමට හැකියාව තිබිණ, නමුත් භාර්යාවක සම්බන්ධයෙන් මෙය සැබෑවක් නොවීය. බයිබල් හිතෝපදේශයක් මෙසේ පවසයි: “ගෙයක් හා සම්පත් පියවරුන්ගෙන් ලැබෙන උරුමයක්ය; නුමුත් නුවණින් හැසිරෙන භාර්යාවක් ලැබෙන්නේ ස්වාමීන්වහන්සේගෙන්ය.”—හිතෝපදේශ 19:14; ද්විතීය කථාව 21:14.

ගරු බුහුමන් භූමිකාවක්

13. දේවභයැති පුරුෂයන් යෙහෝවඃවහන්සේගේ ආදර්ශය අනුගමනය කොට උන්වහන්සේගේ ව්‍යවස්ථාවට කීකරු වූ විට, එහි ප්‍රතිඵලයක් වශයෙන් ස්ත්‍රීන්ට කුමක් සිදුවීද?

¹³ පූර්ව ක්‍රිස්තියානි කාලවලදී දෙවියන්වහන්සේගේ සේවකයන් අතර ස්ත්‍රීන්ගේ භූමිකාව කුමක් වීද? ඔවුන් දෙස බැලුවේ හා ඔවුන්ට සැලකුවේ කෙසේද? සරලව කිවහොත්, දේවභයැති පුරුෂයන් යෙහෝවඃවහන්සේගේම ආදර්ශය අනුගමනය කරමින් උන්වහන්සේගේ ව්‍යවස්ථාවට කීකරු වූ විට, සිය ගෞරවය පවත්වා ගත් ස්ත්‍රීහු, බොහෝ අයිතිවාසිකම් හා වරප්‍රසාද භුක්තිවිඳින්නෝය.

14, 15. ඉශ්‍රායෙල්හි ස්ත්‍රීන්ට ගෞරව දැක්වූ බවට තිබෙන ඇඟවීම් කවරේද, තවද යෙහෝවඃවහන්සේ ස්වකීය පුරුෂ නමස්කාරකරන්නන්ගෙන්, ඔවුන්ට ගෞරව කිරීම යුක්තිසහගත ලෙස අපේක්ෂා කළ හැකි වූයේ මන්ද?

¹⁴ ස්ත්‍රීන්ට ගෞරව කළ යුතුව තිබිණ. මව් පිය දෙදෙනාටම ගෞරව කළ යුතු බව ඉශ්‍රායෙල්වරුන්ට දුන් දෙවියන්වහන්සේගේ ව්‍යවස්ථාව ආඥා කළේය. (නික්මයාම 20:12; 21:15, 17) “නුඹලා එකිනෙකා තමතමාගේ මවුටද පියාටද භයවිය යුතුය,” කියා ලෙවී කථාව 19:3 පවසයි. එක් අවස්ථාවකදී බැත්-ෂෙබා සිය පුත්‍ර සාලමොන් ළඟට පැමිණි කල, ගෞරවය දැක්වීමේ සංඥාවක් ලෙස, “රජ ඈ ඉදිරියෙහි නැගිට, ඈට [වැන්දේය].” (1 රාජාවලිය 2:19) එන්සයික්ලොපීඩියා ජුඩෙයිකා මෙසේ නිරීක්ෂණය කරයි: “දෙවියන්වහන්සේ ඉශ්‍රායෙල්වරුන්ට දැක්වූ ප්‍රේමය පුරුෂයෙකු භාර්යාවකට දක්වන ප්‍රේමයට අනාවැකිමය ලෙස සැසඳිය හැකි වූයේ, ස්ත්‍රීන්ට ගෞරව කළාවූ සමාජයක පමණි.”

¹⁵ යෙහෝවඃවහන්සේ ස්ත්‍රීන්ට ගෞරව කරන බැවින්, උන්වහන්සේ පුරුෂයන්ගෙන් එසේ කරන මෙන් අපේක්ෂා කරනසේක. ශුද්ධ ලියවිලි තුළ, යෙහෝවඃවහන්සේ උපහැරණාත්මකව ස්ත්‍රීන්ගේ අද්දැකීම් උපයෝගි කොට තම හැඟීම් ස්ත්‍රීන්ගේ හැඟීම්වලට සමාන කරද්දී, මෙම කාරණය දක්නට ලැබේ. (යෙසායා 42:14; 49:15; 66:13) යෙහෝවඃවහන්සේට හැඟෙන ආකාරය තේරුම්ගැනීමට මෙය පාඨකයන්හට උපකාර කරයි. යෙහෝවඃවහන්සේ තමන්ටම අදාළ කරන්නාවූ “දයාව” නැතහොත් “අනුකම්පාව” යන හෙබ්‍රෙව් යෙදුම, “ගර්භාශය” යන වචනයට සමීපව දිව යන අතර, එය “මවක වැනි හැඟීම” හැටියට විස්තර කළ හැක.—නික්මයාම 33:19; යෙසායා 54:7.

16. දේවභක්තික කාන්තාවන්ගෙන් ලද අවවාද අගය කොට සලකනු ලැබූ බව කුමන ආදර්ශ පෙන්නුම් කරයිද?

¹⁶ දේවභක්තික ස්ත්‍රීන්ගෙන් ලද අවවාද අගය කරන ලදි. දේවභයැති ආබ්‍රහම් තම දේවභක්තික භාර්යාව වූ, සාරාගේ අවවාදයට අවනත වීමට අපොහොසත් වූ අවස්ථාවක, යෙහෝවඃවහන්සේ ඔහුට “ඇගේ හඬට කන් දීපන්න” යයි කීසේක. (උත්පත්ති 21:10-12) ඒසව්ගේ හිත්තීය භාර්යාවෝ, “ඊසාක්ටද රෙබෙකාටද ශෝක හේතුවක් වූහ.” කල් යත්ම, රෙබෙකා ඔවුන්ගේ පුත්‍ර යාකොබ් හිත්තීය කෙනෙකු විවාහ කළා නම්, ඇය අද්දකින්නාවූ ශෝකය පළ කළාය. ඊසාක්ගේ ප්‍රතික්‍රියාව කුමක්වීද? වාර්තාවෙහි මෙසේ පැවසේ: “ඊසාක් යාකොබ් කැඳවා ඔහුට ආශීර්වාද කොට අණකරමින්: නුඹ කානාන්හි දූවරුන්ගෙන් භාර්යාවකු පාවානොගනින්න.” එසේය, රෙබෙකා විධිමත් ලෙස යම් අවවාදයක් නොදී තිබුණත්, ඇගේ ස්වාමිපුරුෂයා ඇගේ හැඟීම් සැලකිල්ලට භාජන කොට තීරණයක් ගත්තේය. (උත්පත්ති 26:34, 35; 27:46; 28:1) පසු කාලයකදී, දාවිත් රජ අබීගායිල්ගේ ආයාචනයට කන්දුන් බැවින් හෙතෙම ලේ වරදින් බේරුණේය.—1 සාමුවෙල් 25:32-35.

17. ස්ත්‍රීන්ට පවුල තුළ යම් දුරකට අධිකාරයක් තිබුණු බව කුමක් පෙන්නුම් කරයිද?

¹⁷ පවුල තුළ යම් දුරක අධිකාරයක් ස්ත්‍රීන්ට තිබිණ. දරුවන්ගෙන් මෙසේ උදක්ම ඉල්ලා සිට තිබිණ: “මාගේ පුත්‍රය, නුඹේ පියාගේ ගුරුකම අසාපන්න, නුඹේ මවුගේ උපදෙස්ද අත් නොහරින්න.” (හිතෝපදේශ 1:8) කඩිසර විවාහක ස්ත්‍රියක ගෘහයක් බලා කියා ගත්තා පමණක් නොව, නමුත් දේපොළ ගනු දෙනු, ඵලදායක වතුවගාවක්, කුඩා ව්‍යාපාරයක් ගෙනයෑම, එමෙන්ම ඥානවන්ත අදහස් ඉදිරිපත් කිරීම සම්බන්ධයෙන් ප්‍රසිද්ධ වූ බව, හිතෝපදේශ 31වන පරිච්ඡේදයේ ‘ගුණවන්ත ස්ත්‍රී’ පිළිබඳ විස්තරයෙහි හෙළි වේ. වඩාත් වැදගත් දේ වූයේ, එම ප්‍රශංසාකටයුතු ස්ත්‍රියගේ යෙහෝවඃවහන්සේට වූ ගෞරවාන්විත භයයි. එවන් භාර්යාවකගේ “අගය රතුකැටවලට වඩා වැඩි” වීම පුදුමයක්ද! ආභරණ සඳහාත් අලංකාරයට පැළඳීම සඳහාත් අනර්ඝ රතු කැට [කොරල්] බෙහෙවින් අගය කරන ලදි.—හිතෝපදේශ 31:10-31.

දෙවියන්වහන්සේගේ විශේෂ අනුග්‍රහය ලැබූ ස්ත්‍රීහු

18. බයිබල් කාලවලදී ඇතැම් ස්ත්‍රීන් කෙරෙහි විශේෂ අනුග්‍රහය පිරිනමන ලද්දේ කුමන මාර්ගවලින්ද?

¹⁸ බයිබල් කාලවලදී යෙහෝවඃවහන්සේ ස්ත්‍රීන් සමහරදෙනෙකු කෙරෙහි පිරිනැමූ විශේෂ අනුග්‍රහය, උන්වහන්සේ ඔවුන් කෙරෙහි දැක්වූ ගෞරවය පිළිබිඹු කළේය. හාගර්, සාරා හා මානෝවාගේ භාර්යාව බැහැදැකීමට දේවදූතයන් පැමිණි අතර, ඔවුන්ට දිව්‍යමය මඟ පෙන්වීම දැනුම් දෙන ලදි. (උත්පත්ති 16:7-12; 18:9-15; විනිශ්චයකාරයන් 13:2-5) කූඩාරමේ ‘මෙහෙ කිරීමට ස්ත්‍රීන්’ සිටි අතර, සාලමොන්ගේ රජ වාසලේ ගායිකාවෝද සිටියෝය.—නික්මයාම 38:8; 1 සාමුවෙල් 2:22; දේශනාකාරයා 2:8.

19. යම් අවස්ථාවලදී, යෙහෝවඃවහන්සේ ස්ත්‍රීන්ව යෙදුවේ උන්වහන්සේව කෙසේ නියෝජනය කිරීමටද?

¹⁹ ඉශ්‍රායෙල් ඉතිහාසයේ කිහිප වතාවක්ම, යෙහෝවඃවහන්සේ තමන්ව නියෝජනය කිරීමට හෝ උන්වහන්සේ වෙනුවෙන් කතා කිරීමට ස්ත්‍රීන්ව උපයෝගි කරගත්සේක. අනාගතවක්ත්‍රී දෙබොරා සම්බන්ධයෙන්, අපට මෙසේ කියවීමට තිබේ: “ඉශ්‍රායෙල් පුත්‍රයෝ විනිශ්චය පිණිස ඈ ළඟට ආවෝය.” (විනිශ්චයකාරයන් 4:5) ඉශ්‍රායෙල්, කානානිය රජ වූ යාබින් පරාජය කළායින් පසු, දෙබොරාට සැබවින්ම විශේෂ වරප්‍රසාදයක් තිබිණ. අන්තිමේදී යෙහෝවඃවහන්සේගේ ආනුභාවයෙන් ලද වාර්තාවෙහි කොටසක් බවට පත්වූ ජයග්‍රාහී ගීතිකාවේ, යටත් පිරිසෙයින් කොටසක කර්තෘ ඇය වූ බවට පැවසිය හැක.c (විනිශ්චයකාරයන්, 5වන පරිච්ඡේදය) සියවස් ගණනාවකට පසුව, යොෂියා රජ, යෙහෝවඃවහන්සේගෙන් අදහස් විමසීම සඳහා, උත්තම පූජක ඇතුළත්ව, දූත පිරිසක් අනාගතවක්ත්‍රී හුල්දා වෙත යැව්වේය. හුල්දාට මෙසේ අධිකාරයක් ඇතුව පිළිතුරු දීමට හැකි විය: “ඉශ්‍රායෙල්හි දෙවිවූ ස්වාමීන්වහන්සේ මෙසේ කියනසේක.” (2 රාජාවලිය 22:11-15) එම අවස්ථාවේදී, රජ අනාගතවක්ත්‍රියක වෙත යන මෙන්, දූත පිරිසට ආඥා කළේය, නමුත් මෙය කරනු ලැබුවේ යෙහෝවඃවහන්සේගෙන් මඟ පෙන්වීම ලැබීමටය.—මලාකී 2:7 සසඳන්න.

20. ස්ත්‍රීන්ගේ හැඟීම් හා ශුභසිද්ධිය ගැන යෙහෝවඃවහන්සේ සැලකිල්ල දැක්වූ බව කවර උදාහරණවලින් අඟවනු ලැබේද?

²⁰ යෙහෝවඃවහන්සේ ස්වකීය ස්ත්‍රී නමස්කාරකරන්නන් උදෙසා ක්‍රියා කර තිබෙන අවස්ථාවලින්, උන්වහන්සේ ස්ත්‍රීන්ගේ ශුභසිද්ධිය සඳහා දැක්වූ සැලකිල්ල පැහැදිලි වේ. ආබ්‍රහම්ගේ රූමත් භාර්යාව වූ, සාරාව, දූෂ්‍ය කිරීමෙන් වැළැක්වීම සඳහා උන්වහන්සේ දෙවරක් මැදහත් වූසේක. (උත්පත්ති 12:14-20; 20:1-7) යාකොබ් අඩුවෙන් ප්‍රේම කළ භාර්යාව වූ ලෙයා පුත්‍රයෙකු වැදීමට හැකිවන පරිද්දෙන්, ‘ගර්භිණීවන්ට සැලැස්වීමෙන්’ දෙවියන්වහන්සේ ඇයට අනුග්‍රහය දැක්වූසේක. (උත්පත්ති 29:31, 32) දේවභයැති වින්නඹුවෝ දෙදෙනෙක් තම ජීවිත පරදුවට තබමින්, මිසරයෙහි හෙබ්‍රෙව් පිරිමි දරුවන්ව සහමුලින්ම ඝාතනය කිරීමෙන් ආරක්ෂා කළ විට, යෙහෝවඃවහන්සේ අගයෙන් යුක්තව “ඔවුන්ට වංශයක් සාදා දුන්සේක.” (නික්මයාම 1:17, 20, 21) එමෙන්ම උන්වහන්සේ හන්නාගේ ඉතා ලැදි යාච්ඤාවට පිළිතුරු දුන්සේක. (1 සාමුවෙල් 1:10, 20) ඇරත් අනාගතවක්තෘවරයෙකුගේ වැන්දඹුව ණයහිමියෙකුට මුහුණ දුන් විට, ඔහු ණය බේරා දැමීමට ඇගේ දරුවන් ගෙනයෑමට සූදානම් වූ අවස්ථාවේදී, යෙහෝවඃවහන්සේ ඇයව අත්නෑරියසේක. යෙහෝවඃවහන්සේ ප්‍රේමනීය ලෙස අනාගතවක්තෘ එලිෂාට ඇය ළඟ තිබූ තෙල් ප්‍රමාණය වැඩි කිරීමට සැලැස්වූ අතර, මෙනිසා ඇයට සිය ණය ගෙවා දැමීමට හැකි විය. මෙසේ ඇගේ පවුලත්, ගෞරවයත් රැකගැනීමට ඇයට හැකි විය.—නික්මයාම 22:22, 23; 2 රාජාවලිය 4:1-7.

21. හෙබ්‍රෙව් ලියවිලි ස්ත්‍රීන් පිළිබඳව ඉදිරිපත් කරන්නේ කවර සමබර පින්තූරයද?

²¹ එනිසා, ස්ත්‍රීන් ගැන නින්දාසහගත දෘෂ්ටියක් දැරීමට දිරිගන්වනවා වෙනුවට, දෙවියන්වහන්සේගේ සෙනඟ අතර ඔවුන්ට හිමි කොටස පිළිබඳව, හෙබ්‍රෙව් ලියවිලි සමබර පින්තූරයක් අපට දක්වයි. උත්පත්ති 3:16හි ඉටුවීමෙන් යෙහෝවඃවහන්සේ උන්වහන්සේට නමස්කාර කළ කාන්තාවන්ව ආරක්ෂා නොකළ මුත්, යෙහෝවඃවහන්සේගේ ආදර්ශය අනුගමනය කොට උන්වහන්සේගේ ව්‍යවස්ථාවට අවනත වූ දේවභක්තික පුරුෂයන් විසින් ස්ත්‍රීන්ට ගරු බුහුමන් සහිතව සැලකිල්ල දක්වන ලදි.

22. යේසුස්වහන්සේ මිහිපිට පැමිණි කාලය එළඹුණු විට, ස්ත්‍රියගේ භූමිකාව කෙසේ වෙනස් වී තිබිණද, තවද කුමන ප්‍රශ්න අසනු ලැබේද?

²² හෙබ්‍රෙව් ලියවිලි අවසන් කිරීමෙන් පසුව පැමිණි සියවස් තුළදී ස්ත්‍රීන්ගේ භූමිකාව යුදෙව්වන් අතර වෙනස් විය. යේසුස්වහන්සේ මිහිපිට පැමිණි කල, රබ්බිවරුන්ගේ සම්ප්‍රදායන් මගින් ස්ත්‍රීන්හට සිය ආගමික වරප්‍රසාද හා සාමාජීය ජීවිත තුළ සෑහෙන තහංචි පනවන ලදි. යේසුස්වහන්සේ ස්ත්‍රීන් සමඟ කටයුතු කළ අන්දමට මෙම සම්ප්‍රදායන් යම් බලපෑමක් කළාද? අදදින ක්‍රිස්තියානි ස්ත්‍රීන්ට කෙසේ සැලකිය යුතු වේද? මෙම ප්‍රශ්න ඊළඟ ලිපියෙහි සලකා බලනු ලැබේ.

[පාදසටහන්වල]

ඔබ කෙසේ පිළිතුරු දෙන්නෙහිද?

◻ “සහකාරිය” හා “ඌනපූරණය” යන වදන් දෙවියන්වහන්සේ විසින් පවරන ලද ස්ත්‍රියගේ භූමිකාව ගැන කුමක් අඟවයිද?

◻ බයිබල් කාලවලදී ස්ත්‍රීන්ට බලපෑ සිරිත් විරිත් සලකා බලද්දී, අප මනසෙහි කුමක් තබාගත යුතුද?

◻ මුල් කාලවලදී දෙවියන්වහන්සේගේ සෙනඟ අතර ස්ත්‍රීන්ට ගෞරවාන්විත භූමිකාවක් තිබූ බව කුමක් පෙන්නුම් කරයිද?

◻ පූර්ව ක්‍රිස්තියානි කාලවලදී යෙහෝවඃවහන්සේ ස්ත්‍රීන් කෙරෙහි විශේෂ අනුග්‍රහයක් පිරිනැමුවේ කවර ආකාරවලින්ද?