දිව්‍ය පරමාධිපත්‍යය සඳහා ක්‍රිස්තියානි සාක්ෂිකරුවෝ
“අන්ධකාරයෙන් තමන්ගේ විස්මපත් ආලෝකයට ඔබ කැඳවාගත් තැනැන්වහන්සේගේ උත්කෘෂ්ටතාවන් ඔබ දසදෙස ප්‍රකාශයට පත් කළ යුතුය.”—1 පේතෘස් 2:9, NW.
1. පූර්ව-ක්‍රිස්තියානි යුගවල යෙහෝවඃවහන්සේ ගැන කිනම් බලපෑමෙන් යුත් සාක්ෂියක් දෙන ලද්දේද?
පූර්ව ක්‍රිස්තියානි යුගවල, සාක්ෂිකරුවෝ දිගු පෙළක්, යෙහෝවඃවහන්සේ වනාහි එකම සැබෑ දෙවියන්වහන්සේ බවට නිර්භීතව සාක්ෂි දුන්හ. (හෙබ්‍රෙව් 11:4–12:1) ශක්තිමත් ඇදහිල්ලක් තිබූ ඔවුහු, යෙහෝවඃවහන්සේගේ නීතිවලට එඩිතරව කීකරු වී, නමස්කාරය සම්බන්ධ කාරණාවලදී තම ස්ථාවරය අත්හැරීම ප්‍රතික්ෂේප කළෝය. ඔවුහු යෙහෝවඃවහන්සේගේ විශ්වනීය පරමාධිපත්‍යයට ප්‍රබල සාක්ෂියක් දුන්හ.—ගීතාවලිය 18:21-23; 47:1, 2.
2. (අ) යෙහෝවඃවහන්සේගේ ශ්‍රේෂ්ඨතම සාක්ෂිකරු කවරෙක්ද? (ආ) ඉශ්‍රායෙල් ජනයාව යෙහෝවඃවහන්සේගේ සාක්ෂිකරුවා ලෙසට තැබුවේ කවුද? අප දන්නේ කෙසේද?
2 අවසාන හා ශ්‍රේෂ්ඨතම පූර්ව-ක්‍රිස්තියානි සාක්ෂිකරුවා වූයේ යොහන් බව්තීස්තය. (මතෙව් 11:11) තෝරාගනු ලැබූ තැනැත්තාගේ පැමිණීම නිවේදනය කිරීමට ඔහු වරප්‍රසාද ලැබූ අතර, ඔහු යේසුස්වහන්සේව පොරොන්දු වූ මෙසියස්වහන්සේ ලෙස හඳුන්වා දුන්නේය. (යොහන් 1:29-34) යේසුස්වහන්සේ වනාහි යෙහෝවඃවහන්සේගේ ශ්‍රේෂ්ඨතම සාක්ෂිකරුවාය, ‘විශ්වාස හා සැබෑ සාක්ෂිකරුවාය.’ (එළිදරව් 3:14) මාංසික ඉශ්‍රායෙල්වරුන් යේසුස්වහන්සේව ප්‍රතික්ෂේප කළ නිසා, යෙහෝවඃවහන්සේ ඔවුන්ව ප්‍රතික්ෂේප කර, උන්වහන්සේගේ සාක්ෂිකරුවන් වීම සඳහා නව ජාතියක් හෙවත් දෙවියන්වහන්සේගේ ආත්මික ඉශ්‍රායෙල් පත් කළසේක. (යෙසායා 42:8-12; යොහන් 1:11, 12; ගලාති 6:16) පේතෘස් ඉශ්‍රායෙල් පිළිබඳ අනාවැකියකින් උපුටා දක්වමින්, එය “දෙවියන්වහන්සේගේ ඉශ්‍රායෙල්ට” එනම් ක්‍රිස්තියානි සභාවට අදාළ වන බව පෙන්වූයේ මෙසේ පවසමිනි: “නුමුත් අන්ධකාරයෙන් තමන්ගේ විස්මපත් ආලෝකයට නුඹලා කැඳවාගත් තැනැන්වහන්සේගේ උත්කෘෂ්ටතාවන් දක්වන පිණිස නුඹලා වනාහි තෝරාගත් වංශයක්ද රාජකීය පූජකයෝද ශුද්ධවූ ජාතියක්ද දෙවියන්වහන්සේ සන්තක සෙනගක්ද වන්නහුය.”—1 පේතෘස් 2:9; නික්මයාම 19:5, 6; යෙසායා 43:12; 60:2.
3. දෙවියන්වහන්සේගේ ඉශ්‍රායෙල්ගේ සහ ‘මහත් සමූහයේ’ මූලික වගකීම කුමක්ද?
3 දෙවියන්වහන්සේගේ ඉශ්‍රායෙල්ගේ මූලිකම වගකීම වන්නේ, යෙහෝවඃවහන්සේගේ මහිමය උදෙසා ප්‍රසිද්ධ සාක්ෂියක් දීම බව පේතෘස්ගේ වචන පෙන්වයි. අපගේ දවසේදී, මෙම ආත්මික ජාතියට සාක්ෂිකරුවන්ගේ “මහත් සමූහයක්” එක්වී සිටින අතර, ඔවුහුද ප්‍රසිද්ධ ලෙස දෙවියන්වහන්සේව මහිමයට පත් කරති. සියල්ලන්ට ඇසෙන පිණිස ඔවුහු මහත් හඬින් මෙසේ මොරගසති: “සිංහාසනයෙහි වැඩහිඳින අපේ දෙවියන්වහන්සේටත් බැටළුපැටවාණන්ටත් ගැළවීම අයිතිය.” (එළිදරව් 7:9, 10; යෙසායා 60:8-10) දෙවියන්වහන්සේගේ ඉශ්‍රායෙල් සහ එහි සහයකයන් තම සාක්ෂිය සම්පූර්ණයෙන් ඉටු කරන්නේ කෙසේද? තම ඇදහිල්ල සහ කීකරුකම මගිනි.
බොරු සාක්ෂිකරුවෝ
4. යේසුස්වහන්සේගේ දවස්වල විසූ යුදෙව්වන් බොරු සාක්ෂිකරුවන් වූයේ මන්ද?
4 ඇදහිල්ල සහ කීකරුකම, දිව්‍ය ප්‍රතිපත්තිවලට අනුව ජීවත්වීමට ඇතුළත් වෙයි. යේසුස්වහන්සේ තම දවසේ විසූ යුදෙව් ආගමික නායකයන් ගැන පැවසූ දෙය තුළ මෙහි වැදගත්කම දක්නට ලැබේ. මොවුහු නීතියේ ගුරුවරුන් වශයෙන් ‘මෝසෙස්ගේ ආසනයෙහි හිඳ’ උන්නෝය. නොඇදහිලිකාරයන්ව ආගමට හැරවීම සඳහා ඔවුහු මිෂනාරිවරුන්ව පවා යැවුවෝය. එහෙත්, යේසුස්වහන්සේ ඔවුන්ට මෙසේ කීසේක: “නුඹලා එක්කෙනෙකු හරවාගන්න පිණිස මුහුදත් ගොඩත් හැමතැනම ඇවිදින්නහුය; හරවාගත්තාම, නුඹලාටත් වඩා දෙගුණයක් ඔහු නිරයේ පුත්‍රයෙකු කරන්නහුය.” මෙම ආගම්කරුවෝ බොරු සාක්ෂිකරුවෝ වූහ—උද්දච්ච, කුහක සහ අනාදර අය වූහ. (මතෙව් 23:1-12, 15) එක් අවස්ථාවක යේසුස්වහන්සේ ඇතැම් යුදෙව්වන්ට මෙසේ පැවසූසේක: “නුඹලා නුඹලාගේ පියවූ යක්ෂයාගෙන්ය, නුඹලා නුඹලාගේ පියාගේ තෘෂ්ණාවන් ඉෂ්ටකරන්ට කැමතිය.” දෙවියන්වහන්සේගේ තෝරාගත් ජාතියේ සාමාජිකයන්ට උන්වහන්සේ එවන් දෙයක් පවසන්නේ මන්ද? මන්දයත් ඔවුන් යෙහෝවඃවහන්සේගේ ශ්‍රේෂ්ඨතම සාක්ෂිකරුවාණන්ගේ වචනවලට අවනත නොවූ බැවිනි.—යොහන් 8:41, 44, 47.
5. ක්‍රිස්තියානි ලෝකය දෙවියන්වහන්සේ ගැන බොරු සාක්ෂියක් දී ඇති බව අප දන්නේ කෙසේද?
5 ඒ හා සමාන ආකාරයකින්, යේසුස්වහන්සේගේ කාලයේ පටන් ගතවූ සියවස් ගණනාව මුළුල්ලේ, ක්‍රිස්තියානි ලෝකයේ මිලියන සිය ගණනක්දෙනා තමන් උන්වහන්සේගේ ගෝලයන්යයි කියා සිට ඇත්තාහ. කෙසේවෙතත්, ඔවුන් දෙවියන්වහන්සේගේ කැමැත්ත කර නැති අතර, එනිසා යේසුස්වහන්සේ විසින් පිළිගනු ලබන්නේද නැත. (මතෙව් 7:21-23; 1 කොරින්ති 13:1-3) ක්‍රිස්තියානි ලෝකය මිෂනාරීන්ව පිටත් කර යවා ඇති අතර, ඔවුන්ගෙන් බොහෝදෙනෙකු අවංක අය බවට කිසිදු සැකයක් නැත. එහෙත්, පව්කාරයන්ව නිරාගින්නක දමා පුලුස්සන ත්‍රිත්ව දෙවිකෙනෙකුට නමස්කාර කිරීමට ඔවුන් ජනයාට ඉගැන්වූ අතර, ඔවුන් මගින් ආගමට හැරුණු වැඩිදෙනෙක් ක්‍රිස්තියානීන් වීම සම්බන්ධයෙන් සාක්ෂි නොපෙන්වති. නිදසුනක් වශයෙන්, අප්‍රිකානු රුවන්ඩා දේශය, රෝමානු කතෝලික මිෂනාරිවරුන් සඳහා සරුබිමක් වී තිබේ. එහෙත්, මෑතකදී එම රටේ පැවති වාර්ගික ගැටුම්වලදී රුවන්ඩා ජාතික කතෝලිකයෝ මුළු හදින්ම ඊට හවුල් වූහ. එම මිෂනාරි ක්ෂේත්‍රයේ ඵලවලින් පෙන්වන්නේ, එය ක්‍රිස්තියානි ලෝකයෙන් අව්‍යාජ ක්‍රිස්තියානි සාක්ෂියක් නොලැබූ බවය.—මතෙව් 7:15-20.
දිව්‍ය ප්‍රතිපත්තිවලට අනුව ජීවත්වීම
6. හරි හැසිරීම, සාක්ෂියක් දීම සඳහා අතිවැදගත් කොටසක් වන්නේ කිනම් ආකාරවලින්ද?
6 ක්‍රිස්තියානියයි කියාගන්නා අයගේ වැරදි හැසිරීම “සත්‍යතාවේ මාර්ගයට” නින්දා ගෙන එයි. (2 පේතෘස් 2:2) අව්‍යාජ ක්‍රිස්තියානියෙක් දේවප්‍රතිපත්තිවලට අනුව ජීවත් වෙයි. ඔහු සොරකම් නොකරයි, බොරු නොකියයි, වංචා නොකරයි, දුරාචාරයේ නොයෙදෙයි. (රෝම 2:22) නිසැකවම ඔහු තමාගේ අසල්වැසියාව මරා දමන්නේ නැත. ක්‍රිස්තියානි ස්වාමිපුරුෂයෝ තමන්ගේ පවුල් ප්‍රේමයෙන් අවේක්ෂණය කරති. භාර්යාවෝ එම අවේක්ෂණයට ගෞරවයෙන් සහාය වෙති. දරුවන් ඔවුන්ගේ දෙමාපියන් විසින් පුහුණු කරනු ලබන අතර, මෙනයින් වගකීම් දැරිය හැකි ක්‍රිස්තියානි වැඩිහිටියන් බවට පත්වීමට සූදානම් කරනු ලැබේ. (එපීස 5:21–6:4) අප සියල්ලන්ම අසම්පූර්ණ බවත්, වැරදි කරන බවත් සැබෑය. එහෙත්, නියම ක්‍රිස්තියානියෙක් බයිබල් ප්‍රමිතිවලට ගෞරවය දක්වා, ඒවා අදාළ කරගැනීමට අව්‍යාජ ප්‍රයත්නයක් දරයි. අන්‍යයන්ට පැහැදිලිව පෙනීයන කදිම සාක්ෂියක් මෙමගින් දෙනු ලැබේ. ඇතැම් අවස්ථාවලදී, කලින් සත්‍යයට විරුද්ධව සිටි අය, ක්‍රිස්තියානියෙකුගේ හරි හැසිරීම දැක, දිනාගනු ලැබ ඇත.—1 පේතෘස් 2:12, 15; 3:1.
7. ක්‍රිස්තියානීන් එකිනෙකාට ප්‍රේම කිරීම කොතරම් වැදගත්ද?
7 යේසුස්වහන්සේ මෙසේ පැවසූ විට, ක්‍රිස්තියානි හැසිරීමේ අතිවැදගත් අංගයක් පෙන්වූසේක: “නුඹලා එකිනෙකාට ප්‍රේමකරනවා නම්, නුඹලා මාගේ ගෝලයෝ බව එයින් සියල්ලන් දැනගන්නවා ඇත.” (යොහන් 13:35) ‘අධර්මිෂ්ඨකමින්ද, දුෂ්ටකමින්ද, ලෝභකමින්ද, නපුරුකමින්ද පූර්ණව, ඊර්ෂ්‍යාවෙන්ද මිනීමැරීමෙන්ද ඩබරයෙන්ද වංචාවෙන්ද ක්‍රෝධයෙන්ද පිරී, කනට කොඳුරන්නන්ගෙන්, කේලාම් කියන්නන්ගෙන්, දෙවියන්වහන්සේට පිළිකුල්වූවන්ගෙන්, නින්දාකරන්නන්ගෙන්, උඩඟුවූවන්ගෙන්, පාරට්ටුකරගන්නන්ගෙන්, නපුරු දේවල් උපදවන්නන්ගෙන්, මවුපියන්ට අකීකරුවූවන්ගෙන්’ සාතන්ගේ මෙම ලෝකය ගහණය. (රෝම 1:29, 30) එවන් වාතාවරණයක, ප්‍රේමයෙන් ලාක්ෂණික වූ ලෝක ව්‍යාප්ත සංවිධානයක් දෙවියන්වහන්සේගේ ආත්මය ක්‍රියාත්මක වන බවට ප්‍රබල සාක්ෂියකි, බලපෑමෙන් යුක්ත සාක්ෂියකි. යෙහෝවඃවහන්සේගේ සාක්ෂිකරුවෝ එවන් සංවිධානයක් සාදති.—1 පේතෘස් 2:17.
සාක්ෂිකරුවෝ බයිබලයේ ශිෂ්‍යයෝය
8, 9. (අ) දෙවියන්වහන්සේගේ වචනය අධ්‍යයනය කිරීමෙන් හා ඒ මත මෙනෙහි කිරීමෙන් ගීතිකාකරු ශක්තිමත් වූයේ කෙසේද? (ආ) බයිබලය අධ්‍යයනය කිරීම හා මෙනෙහි කිරීම දිගටම සාක්ෂියක් දීම සඳහා අපව ශක්තිමත් කරන්නේ කෙසේද?
8 කදිම සාක්ෂියක් දීමෙහිලා සාර්ථක වීමට නම්, ක්‍රිස්තියානියෙක් යෙහෝවඃවහන්සේගේ ධර්මිෂ්ඨ ප්‍රතිපත්ති දැනගෙන ඒවාට ප්‍රේම කළ යුතු අතර, ලෝකයේ දූෂිතභාවයට සැබවින්ම වෛර කළ යුතුය. (ගීතාවලිය 97:10) මෙම ලෝකය තමන්ගේම සිතිවිලි කාවැද්දීමෙහිලා ඉතාමත් ඒත්තුගන්වන අන්දමින් ක්‍රියා කරන අතර, එහි ස්වභාවයට එරෙහි වීම දුෂ්කර විය හැක. (එපීස 2:1-3; 1 යොහන් 2:15, 16) නිසි මානසික ආකල්පයක් පවත්වාගැනීමට අපට උපකාර කළ හැක්කේ කුමකටද? නිතිපතා අර්ථාන්විතව බයිබලය අධ්‍යයනය කිරීමය. ගීතාවලිය 119හි ලේඛකයා යෙහෝවඃවහන්සේගේ නීතිය සඳහා වූ සිය ප්‍රේමය ගැන නැවත නැවත වතා බොහොමයක් ලියුවේය. එය කියවූ ඔහු, නිරතුරුවම “දවස මුළුල්ලේම” ඒ මත මෙනෙහි කළේය. (ගීතාවලිය 119:92, 93, 97-105) ප්‍රතිඵලයක් වශයෙන්, මෙසේ ලිවීමට ඔහුට හැකි විණ: “බොරුවට වෛරකොට පිළිකුල් කරමි; නුමුත් ඔබගේ ව්‍යවස්ථාවට ප්‍රේමකරමි.” එපමණක්ද නොව, ඔහුගේ ගැඹුරු ප්‍රේමය, ක්‍රියා කිරීමට ඔහුව පෙලඹවූයේය. ඔහු මෙසේ කියයි: “ඔබගේ ධර්මිෂ්ඨ විනිශ්චයන් නිසා දවසට සත් වරක් ඔබට ප්‍රශංසා කරමි.”—ගීතාවලිය 119:163, 164.
9 මේ හා සමාන ආකාරයෙන්, අප නිතිපතා දෙවියන්වහන්සේගේ වචනය අධ්‍යයනය කර, ඒ මත මෙනෙහි කරත්ම, එය අපගේ හෘදයන් ස්පර්ශ කොට, ‘උන්වහන්සේට ප්‍රශංසා කර’—යෙහෝවඃවහන්සේ ගැන සාක්ෂි දැරීමට—එනම් “දවසට සත් වරක් පවා” බොහෝවිට එසේ කිරීමට අපව පොලඹවයි. (රෝම 10:10) මීට අනුකූලව, පළමු ගීතිකාවේ ලේඛකයා පවසන්නේ, යෙහෝවඃවහන්සේගේ වචන මත නිතිපතා මෙනෙහි කරන්නා, “දිය ඇළවල් ළඟ හිඳුවූ, නියම කලට ඵල දෙන, නොමැලවෙන කොළ ඇති ගසක් හා සමාන වන්නේය; ඔහු කරන සියල්ල සඵලවෙයි” කියාය. (ගීතාවලිය 1:3) ප්‍රේරිත පාවුල්ද මෙසේ ලියූ විට, දෙවියන්වහන්සේගේ වචනයේ බලය පෙන්වූයේය: “දෙවියන්වහන්සේගේ මනුෂ්‍යයා සම්පූර්ණව, සියලු යහපත් ක්‍රියාවලට සූදානම්ව සිටින පිණිස දේවානුභාවයෙන් දුන් මුළු ලියවිල්ල ඉගැන්වීමටත් තරවටුවටත් හික්මවීමටත් ධර්මිෂ්ඨකම ගැන ගුරුකම් දීමටත් ප්‍රයෝජනවත්ව තිබේ.”—2 තිමෝති 3:16.
10. මෙම අන්තිම දවස්වලදී යෙහෝවඃවහන්සේගේ ජනයා සම්බන්ධයෙන් පැහැදිලිව පෙනීයන්නේ කුමක්ද?
10 මෙම 20වන සියවසේ සැබෑ නමස්කාරකයන්ගේ ඉතා ශීඝ්‍රයෙන් වැඩිවෙන ගණනින්, යෙහෝවඃවහන්සේගේ ආශීර්වාද අඟවයි. කිසිම සැකයක් නොමැතිව, කණ්ඩායමක් වශයෙන්, දිව්‍ය පරමාධිපත්‍යය සඳහා සිටින නවීන-දින සාක්ෂිකරුවෝ, තම හෘදයන්හි යෙහෝවඃවහන්සේගේ නීතිය සඳහා ප්‍රේමයක් වගා කොට ඇත්තාහ. ගීතිකාකරු මෙන්, උන්වහන්සේගේ නීතියට කීකරුවීමට පෙලඹී සිටින ඔවුහු, යෙහෝවඃවහන්සේගේ මහිමය ගැන ‘දිවා රෑ’ විශ්වාසවන්තව සාක්ෂිදරති.—එළිදරව් 7:15.
යෙහෝවඃවහන්සේගේ බලවත් ක්‍රියා
11, 12. යේසුස්වහන්සේ සහ උන්වහන්සේගේ අනුගාමිකයන් විසින් සිදු කරන ලද ප්‍රාතිහාර්යය මගින් ඉටු කරන ලද්දේ කුමක්ද?
11 පළමු සියවසේදී, ප්‍රාතිහාර්යය සිදු කිරීම සඳහා ශුද්ධාත්මය විශ්වාසවන්ත ක්‍රිස්තියානීන්ව බලවත් කළ අතර, ඔවුන්ගේ සාක්ෂිය සැබෑ බවට එය ප්‍රබල සහතිකයක් දුන්නේය. යොහන් බව්තීස්ත සිරගෙයි සිටි විට, යේසුස්වහන්සේගෙන් මෙසේ ඇසීමට ඔහු තම ගෝලයන් පිටත් කර හැරියේය: “එන්නාවූ තැනැත්තේ ඔබද? නොහොත් අපි වෙන කෙනෙකු බලා සිටිමු[ද]?” ඔව් හෝ නැත කියා යේසුස්වහන්සේ පිළිතුරු නුදුන්සේක. ඒ වෙනුවට උන්වහන්සේ මෙසේ පැවසූසේක: “නුඹලා අසන දකින දේ නුඹලා ගොස් යොහන්ට දන්වාපල්ලා. අන්ධයෝ පෙනීම ලබති, කොරු ඇවිදිති, කුෂ්ඨ රෝගීහු පවිත්‍ර කරනු ලබති, බිහිරන්ට ඇසෙයි, මළාහු නැගුටුවනු ලබති, දිළිඳුන්ට ශුභාරංචිය ප්‍රකාශකරනු ලැබේ. මා ගැන පැකිලීමේ හේතුවක් යමෙකුට නොවන්නේද ඔහු ආශීර්වාදලද්දෙ[කි].” (මතෙව් 11:3-6) යේසුස්වහන්සේ වනාහි ඇත්තෙන්ම ‘එන්නාවූ තැනැත්තා’ බව යොහන්ට ඒත්තුගැන්වීමට මෙම බලවත් ක්‍රියා හේතුවිය.—ක්‍රියා 2:22.
12 මේ හා සමාන ආකාරයෙන්, යේසුස්වහන්සේගේ අනුගාමිකයන්ගෙන් සමහරදෙනෙක්, අසනීපවූවන්ව සුව කළ අතර, මළවුන්ව පවා නැඟිට්ටෙවුවෝය. (ක්‍රියා 5:15, 16; 20:9-12) මෙම ප්‍රාතිහාර්යයන් ඔවුන් වෙනුවෙන් දෙවියන්වහන්සේගෙන්ම පැමිණි සාක්ෂි මෙන් විය. (හෙබ්‍රෙව් 2:4) තවද එවන් ක්‍රියා යෙහෝවඃවහන්සේගේ සර්වබලධාරි බලය නිරූපනය කළේය. නිදසුනක් වශයෙන්, “ලෝකයේ අධිපතියා” වන සාතන්ට, මරණය ගෙන ඒමට හැකි බව සත්‍යයකි. (යොහන් 14:30; හෙබ්‍රෙව් 2:14) එහෙත් පේතෘස් ඇදහිලිවන්ත ස්ත්‍රියක වූ දොර්කස්ව මළවුන්ගෙන් නැවතනැඟිටෙවූ විට, ඔහුට එය කළ හැකිව තිබුණේ යෙහෝවඃවහන්සේගේ බලයෙන් පමණි, මන්දයත් නැවත ජීවිතය දිය හැක්කේ උන්වහන්සේට පමණි.—ගීතාවලිය 16:10; 36:9; ක්‍රියා 2:25-27; 9:36-43.
13. (අ) බයිබල් ප්‍රාතිහාර්යයන් තවමත් යෙහෝවඃවහන්සේගේ බලයට සාක්ෂි දරන්නේ කිනම් ආකාරයෙන්ද? (ආ) යෙහෝවඃවහන්සේගේ දේවත්වය ඔප්පු කිරීම තුළ, අනාවැකිවල ඉටුවීම ප්‍රධාන කාර්යභාරයක් ඉටු කරන්නේ කෙසේද?
13 අදදින, එම ප්‍රාතිහාර්යයමය ක්‍රියා තවදුරටත් සිදුනොවේ. එහෙත්, ඒවායේ අරමුණ ඉටුවී තිබේ. (1 කොරින්ති 13:8) කෙසේවෙතත්, ඒවා අප සඳහා තවමත් බයිබලයේ වාර්තා කර ඇති අතර, ඇසින් දුටු බොහෝදෙනෙකු විසින් සනාථ කොට තිබේ. අදදින ක්‍රිස්තියානීන් මෙම ඓතිහාසික වාර්තාවලට අවධානය යොමු කරන විට, එම ක්‍රියා තවමත් යෙහෝවඃවහන්සේගේ බලය ගැන ප්‍රබල සාක්ෂියක් දරයි. (1 කොරින්ති 15:3-6) මීට අමතරව, අතීතයේ යෙසායාගේ දවසේදී, යෙහෝවඃවහන්සේ වනාහි සැබෑ දෙවියන්වහන්සේ බවට කැපීපෙනෙන සහතිකයක් ලෙස උන්වහන්සේ නිවැරදි අනාවැකිවලට යොමුදැක්වූසේක. (යෙසායා 46:8-11) දිව්‍යමය ලෙස ආනුභාවය ලැබූ අනාවැකි බොහොමයක් අදදින ඉටුවෙමින් තිබේ—මේවායෙන් ගණනාවක් ඉටුවෙමින් තිබෙන්නේ, ක්‍රිස්තියානි සභාව තුළය. (යෙසායා 60:8-10; දානියෙල් 12:6-12; මලාකි 3:17, 18; මතෙව් 24:9; එළිදරව් 11:1-13) මෙම අනාවැකිවල ඉෂ්ටවීම, අප “අන්තිම දවස්වල” ජීවත්වන බවට හුවාදක්වනවාක් මෙන්ම, යෙහෝවඃවහන්සේ එකම සැබෑ දෙවියන්වහන්සේ බවට නිදොස් කරයි.—2 තිමෝති 3:1.
14. යෙහෝවඃවහන්සේ වනාහි පරමාධිපති ස්වාමියාණන් බවට යෙහෝවඃවහන්සේගේ සාක්ෂිකරුවන්ගේ නවීන දින ඉතිහාසය ප්‍රබල සාක්ෂියක් වන්නේ කිනම් ආකාරවලින්ද?
14 අන්තිම වශයෙන්, යෙහෝවඃවහන්සේ ස්වකීය ජනයා සඳහා මහත් දේවල්, පුදුමාකාර දේවල් කරනසේක. බයිබල් සත්‍යතාව මත වැඩිවන ආලෝකය, යෙහෝවඃවහන්සේගේ ආත්මය මගින් මෙහෙයවනු ලැබේ. (ගීතාවලිය 86:10; එළිදරව් 4:5, 6) ලොව පුරා නන්දෙසින් වාර්තා වී ඇති කැපීපෙනෙන වැඩිවීම්වලින් සාක්ෂි දරන්නේ, යෙහෝවඃවහන්සේ එය ‘තමන්වහන්සේගේ නියමිත කාලයේදී වේගවත් කරන’ බවය. (යෙසායා 60:22) මෙම අන්තිම දවස්වල රටින් රටට මතුවන උග්‍ර පීඩා ඇතිවන විට, යෙහෝවඃවහන්සේගේ ජනයාට ධෛර්යයසම්පන්නව විඳදරාගැනීමට හැකිවී තිබෙන්නේ, ශුද්ධාත්මයේ ශක්තිදායක අනුබලය නිසාය. (ගීතාවලිය 18:1, 2, 17, 18; 2 කොරින්ති 1:8-10) එසේය, යෙහෝවඃවහන්සේගේ සාක්ෂිකරුවන්ගේ නවීන ඉතිහාසයම, යෙහෝවඃවහන්සේ වනාහි පරමාධිපති ස්වාමියාණන් බවට ඉතා ප්‍රබල සාක්ෂියකි.—සෙකරියා 4:6.
ශුභාරංචිය දේශනා කළ යුතුය
15. ක්‍රිස්තියානි සභාව දීමට තිබුණේ කිනම් පුළුල් සාක්ෂියක්ද?
15 යෙහෝවඃවහන්සේ ඉශ්‍රායෙල් ජනයාව ජාතීන් උදෙසා සිය සාක්ෂිකරුවා ලෙස පත් කළසේක. (යෙසායා 43:10) කෙසේවුවද, ඉශ්‍රායෙල් නොවන අය වෙතට ගොස් දේශනා කිරීම සඳහා ඉශ්‍රායෙලිතයන් ස්වල්පදෙනෙකුට පමණක් දිව්‍යමය ලෙස අණ කරනු ලැබූ අතර, මෙය සාමාන්‍යයෙන් කරන ලද්දේ, යෙහෝවඃවහන්සේගේ විනිශ්චයන් ප්‍රකාශ කිරීම සඳහාය. (යෙරෙමියා 1:5; යෝනා 1:1, 2) කෙසේවෙතත්, යෙහෝවඃවහන්සේ යම් දිනක ජාතීන් වෙතට ස්වකීය අවධානය පුළුල් ආකාරයෙන් යොමු කරනු ඇති බව හෙබ්‍රෙව් ශුද්ධ ලියවිලිමය අනාවැකි අඟවන අතර, දෙවියන්වහන්සේගේ ආත්මික ඉශ්‍රායෙල් තුළින් උන්වහන්සේ මෙය කර තිබේ. (යෙසායා 2:2-4; 62:2) ස්වර්ගාරෝහණයට පෙර, යේසුස්වහන්සේ සිය අනුගාමිකයන්ට මෙසේ අණ කළසේක: “නුඹලා ගොස්, සියලු ජාතීන් ගෝලයන් කරපල්ලා.” (මතෙව් 28:19) “ඉශ්‍රායෙල් වංශයේ නැතිවුණු බැටළුවන්” ගැන උන්වහන්සේ සිය අවධානය යොමු කොට තිබුණද, උන්වහන්සේගේ අනුගාමිකයන්ව, ‘සියලු ජාතීන්ට,’ “පොළොවේ සීමාව දක්වාද” යවන ලදි. (මතෙව් 15:24; ක්‍රියා 1:8) සියලු මිනිස්වර්ගයා විසින් ක්‍රිස්තියානි සාක්ෂිය ඇසිය යුතුව තිබිණ.
16. පළමු සියවසේ ක්‍රිස්තියානි සභාව ඉටු කළ බල පැවරුම කුමක්ද, තවද කිනම් තරමකටද?
16 තමා මෙය මැනවින් තේරුම්ගත් බව පාවුල් පෙන්වීය. පොදු යුගයේ 61වන වර්ෂය වන විට, ශුභාරංචිය ‘මුළු ලෝකයේ ඵල දරමින් වර්ධනය වෙමින්’ තිබිණියයි පැවසීමට ඔහුට හැකිවිය. ශුභාරංචිය හුදෙක් එක් ජාතියකට හෝ ‘දේවදූත නමස්කාරයේ’ යෙදී සිටියාක් වැනි, එක් නිකායකට සීමා නොවීය. ඒ වෙනුවට, එය විවෘත ලෙස “අහසින් යට මුළු මැවිල්ලෙහි ප්‍රකාශවුණේය.” (කොලොස්සි 1:6, 23; 2:13, 14, 16-18) මෙසේ, පළමු සියවසේ දෙවියන්වහන්සේගේ ඉශ්‍රායෙල්, ‘අන්ධකාරයෙන් තමන්ගේ විස්මපත් ආලෝකයට කැඳවාගත් තැනැන්වහන්සේගේ උත්කෘෂ්ටතාවන් ප්‍රකාශයට පත් කිරීමට’ තමන්ට පවරා තිබූ අණ ඉෂ්ට කළහ.
17. මතෙව් 24:14 විශාල ආකාරයකින් දිගටම ඉටු කරනු ලැබීමට තිබෙන්නේ කෙසේද?
17 කෙසේවෙතත්, පළමු සියවසේ කරන ලද එම දේශනා වැඩය, අන්තිම දවස්වල ඉෂ්ට කරන්ට යන දෙයෙහි හුදෙක් කලින් රස බැලීමක් විය. විශේෂයෙන් අපගේ කාලය දෙසට අවධානය යොමු කරමින්, යේසුස්වහන්සේ මෙසේ පැවසූසේක; “රාජ්‍යයේ මේ ශුභාරංචිය සියලු ජාතීන්ට සාක්ෂියක් පිණිස ලොව මුළුල්ලේ ප්‍රකාශකරනු ලබන්නේය; එවිට අන්තිමය පැමිණෙන්නේය.” (මතෙව් 24:14; මාර්ක් 13:10) මෙම අනාවැකිය ඉටුවී තිබේද? ඇත්තවශයෙන්ම, එය එසේ වී තිබේ. වර්ෂ 1919 සිට, කුඩා ආරම්භයකින් පටන්ගෙන, ශුභාරංචිය දේශනා කිරීම රටවල් 230කට වඩා දැන් විහිදී ඇත. ශීත උත්තරධෘවයේද, උෂ්ණ කලාපීය රටවලද මෙම සාක්ෂිය ඇසේ. විශාල මහාද්වීප ආවරණය කරනු ලබන අතර, වැසියන්ට සාක්ෂියක් ලැබීම පිණිස ඈත එපිට දූපත් සොයනු ලබමින් තිබේ. බොස්නියාවේ සහ හර්ට්සගොවිනාවේ යුද්ධ වැනි, මහත් අර්බුදකාරි තත්වයන් මැද පවා, ශුභාරංචිය දිගටම දේශනා කරනු ලැබේ. පළමු සියවසේදී මෙන්, ‘මුළු ලෝකයේ’ සාක්ෂිය ඵල දරමින් තිබේ. “අහසින් යට මුළු මැවිල්ලෙහි” ශුභාරංචිය ප්‍රසිද්ධියේ ප්‍රකාශ කරනු ලැබේ. ප්‍රතිඵලය? පළමුව, “සියලු ගෝත්‍රවලින්ද භාෂාවන්ගෙන්ද සෙනගගෙන්ද ජාතීන්ගෙන්ද” දෙවියන්වහන්සේගේ ඉශ්‍රායෙල්ගේ ඉතිරි අය එකතු කරනු ලැබීමයි. දෙවනුව, “මහත් සමූහ[යේ]” මිලියන ගණනක්දෙනාව “සියලු ජාතීන්ගෙනුත් ගෝත්‍රවලිනුත් සෙනගගෙනුත් භාෂාවන්ගෙනුත්” ගෙන ඒම ආරම්භ කරන ලදි. (එළිදරව් 5:9; 7:9) මතෙව් 24:14 මහා පරිමාණයෙන් දිගටම ඉෂ්ට වෙයි.
18. ලොව පුරා ශුභාරංචිය දේශනා කරනු ලැබීම මගින් ඉටු කරනු ලබන ඇතැම් දේවල් මොනවාද?
18 යේසුස්වහන්සේගේ රාජකීය පැමිණ සිටීම ආරම්භ වී ඇති බව ඔප්පු කිරීමට ලෝක ව්‍යාප්තව ශුභාරංචිය දේශනා කිරීම ආධාරයක්ය. (මතෙව් 24:3) තවදුරටත්, එය වනාහි ‘පොළොවේ අස්වැන්න’ නෙළනු ලබමින් තිබෙන ප්‍රධාන මාධ්‍යය වන අතර, මිනිස්වර්ගයාගේ එකම සැබෑ බලාපොරොත්තුව වන යෙහෝවඃවහන්සේගේ රාජ්‍යයට එය ජනයාව යොමු කරවයි. (එළිදරව් 14:15, 16) ශුභාරංචිය දේශනා කිරීමෙහි හවුල්වන්නේ අව්‍යාජ ක්‍රිස්තියානීන් පමණක් වන බැවින්, සැබෑ ක්‍රිස්තියානීන්ගෙන් බොරු ක්‍රිස්තියානීන් වෙන් කොට හඳුනාගැනීම සඳහා මෙම වැදගත් වැඩය උපකාරවත් වෙයි. (මලාකි 3:18) මේ ආකාරයෙන්, එය දේශනා කරන අයගේ මෙන්ම, ඊට ප්‍රතිචාර දක්වන අයගේ ගැළවීම සඳහා ක්‍රියා කරයි. (1 තිමෝති 4:16) වඩාත් වැදගත් ලෙස, ශුභාරංචිය දේශනා කිරීම, එය කරන ලෙසට අණ කළ, එය කරන අයට අනුබල දෙන, එය ඵලදායී බවට පත් කරන, යෙහෝවඃ දෙවියන්වහන්සේහට ප්‍රශංසාව සහ ගෞරවය ගෙන එයි.—2 කොරින්ති 4:7.
19. නව සේවා වසරට ඇතුල් වෙනවාත් සමගම, කිනම් අධිෂ්ඨානයක් තබාගන්නා ලෙස සියලු ක්‍රිස්තියානීන්ට දිරිගන්වනු ලැබේද?
19 “ශුභාරංචිය දේශනා නොකළොත් මට දුක්වේ” යයි පැවසීමට පාවුල් පෙලඹීම ගැන පුදුම වීමට දෙයක් නැත. (1 කොරින්ති 9:16) අදදින ක්‍රිස්තියානීන්ට හැඟෙන්නෙත් එයාකාරයටය. ‘දෙවියන්වහන්සේගේ හවුල් වැඩකරුවන් වීමට’ ලැබීම, මෙම දැඩි අන්ධකාර ලෝකයේ සත්‍යයතාවේ ආලෝකය බැබළවීමට ලැබීම උදාර වරප්‍රසාදයක් මෙන්ම මහත් වගකීමක්ද වෙයි. (1 කොරින්ති 3:9; යෙසායා 60:2, 3) වර්ෂ 1919දී කුඩා ආරම්භයක් තිබූ මෙම වැඩය දැන් පුදුම එලවන මට්ටමකට ඉහළ නැඟ තිබේ. මිලියන පහක් පමණ ක්‍රිස්තියානීහු, අන්‍යයන්ට ගැළවීමේ පණිවුඩය ගෙනයෑම සඳහා වසරකට පැය බිලියන එකකටත් වඩා ගත කරත්ම, ඔවුහු දිව්‍ය පරමාධිපත්‍යය උදෙසා සාක්ෂිදරමින් සිටිති. යෙහෝවඃවහන්සේගේ නාමය විශුද්ධ කරන මෙම කර්තව්‍යයේ හවුල්වීමට ලැබීම මොනතරම් ප්‍රීතියක්ද! අප 1996 සේවා වර්ෂයට ඇතුල් වෙනවාත් සමඟම, වේගය බාල නොකිරීමට අපි අධිෂ්ඨාන කරගනිමු. ඒ වෙනුවට, “වචනය දේශනා කරපන්න; . . . වැඩේ යෙදී සිටපන්න” යනුවෙන් පාවුල් තිමෝතිට ලියූ වචනවලට අපි වෙන කවරදාටත් වඩා අවනත වෙමු. (2 තිමෝති 4:2) අප එසේ කරත්ම, යෙහෝවඃවහන්සේ අපගේ ප්‍රයත්නවලට ආශීර්වාද කරන බවට අපි මුළු හදින්ම යාච්ඤා කරමු.
ඔබට මතකද?
◻ ඉශ්‍රායෙල් වෙනුවට, ජාතීන් කෙරෙහි යෙහෝවඃවහන්සේගේ “සාක්ෂිකරුවා” ලෙසට පත්වූයේ කවුද?
◻ ක්‍රිස්තියානි හැසිරීම සාක්ෂියක් දීමට දායක වන්නේ කෙසේද?
◻ බයිබලය අධ්‍යයනය කිරීම සහ ඒ මත මෙනෙහි කිරීම ක්‍රිස්තියානි සාක්ෂිකරුවා සඳහා අත්‍යවශ්‍ය වන්නේ මන්ද?
◻ යෙහෝවඃවහන්සේ වනාහි සැබෑ දෙවියන්වහන්සේ බවට යෙහෝවඃවහන්සේගේ සාක්ෂිකරුවන්ගේ නවීන දින ඉතිහාසය සාක්ෂිදරන්නේ කිනම් මාර්ගයෙන්ද?
◻ ශුභාරංචිය දේශනා කිරීම මගින් ඉටු කරනු ලබන්නේ කුමක්ද?
[15වන පිටුවේ පින්තූර]
කිසිම අවහිරයකින් තොරව, “අහසින් යට මුළු මැවිල්ලෙහි” ශුභාරංචිය දැන් ප්‍රකාශ කරනු ලබමින් තිබේ