රාජ්‍ය ප්‍රකාශකයන්ගේ වාර්තාව
“ශුභාරංචිය ප්‍රකාශකරන්නෙකුගේ [එවැන්ජලිස්තවරයෙකුගේ, NW] වැඩේ කරපන්න”
එවැන්ජලිස්තවරයෙකු වීමෙන් අදහස් කරන්නේ කුමක්ද? මෙය එව්·ඇන්·ජෙ·ලි·ස්ටීස්ʹ යන ග්‍රීක් වදනේ පරිවර්තනයක් වන අතර, එය “ශුභාරංචිය” යන අර්ථය දෙන එව්·ඇන්·ජෙʹලි·යොන් යන වදනට ඉතා සමීප ලෙස සම්බන්ධ වී තිබේ. එබැවින් එවැන්ජලිස්තවරයෙක්, ශුභාරංචිය ප්‍රකාශකරන්නෙක් හෝ දූතයෙක් වෙයි.
සැබෑ ක්‍රිස්තියානීන් දේවරාජ්‍යය පිළිබඳ ශුභාරංචිය ප්‍රකාශ කරන බැවින් ඔවුහු සියලුදෙනාම එවැන්ජලිස්තවරු වෙත්. “ශුභාරංචිය ප්‍රකාශකරන්නෙකුගේ [එවැන්ජලිස්තවරයෙකුගේ, NW] වැඩේ කර[න්න]” කියා ප්‍රේරිත පාවුල් තිමෝතිට අවවාද කළේ යෝග්‍ය ලෙසින්ය. තිමෝතිට මෙම වැඩය බරපතළ ලෙස සැලකීමට යුතුව තිබිණ. ‘සියලු කාරණාවලදී සිහි ඇතුව සිටීමටත්, ඔහුගේ සේවය සම්පූර්ණ කිරීමටත්’ පාවුල් ඔහුගෙන් උදක්ම ඉල්ලා සිටියේය.—2 තිමෝති 4:5.
එවැන්ජලිස්තවරුන් හැටියට අපිත් අපගේ සේවය බරපතළ දෙයක් ලෙස සලකන අතර, ‘සිහි ඇතුව සිටිමු,’ එසේ නැතහොත් හැකි සෑම අවස්ථාවකදීම ශුභාරංචිය බෙදාගැනීමට අපි සාවධානව සිටිමු. මෙලෙස බොහෝදෙනෙකුට යෙහෝවඃවහන්සේගේ සාක්ෂිකරුවන්ව අවිධිමත් ආකාරයකින් මුණගැසීමෙන් පසුව, යෙහෝවඃවහන්සේ සහ උන්වහන්සේගේ පොරොන්දු පිළිබඳව දැනුම ලැබී තිබේ. බාර්බේඩස්හි ජීවත් වූ සීමෝර් නම් පුරුෂයාට සිදු වුණේ මේ දෙයයි.
සීමෝර් පොදු පාසැලක ගුරුවරයෙක් විය. අර්ධ-කාලීන ගුරුවරයෙක් ලෙස එම පාසැලේම ඉගැන්වූ චාර්ල්ස්, යෙහෝවඃවහන්සේගේ සාක්ෂිකරුවෙක් හා සාවධාන එවැන්ජලිස්තවරයෙක් විය. ඔහු පූර්ණ-කාලීන දේවසේවකයෙක් නොහොත් පුරෝගාමියෙක් වූ අතර, අන්‍යයන් සමඟ ශුභාරංචිය බෙදාගැනීම සඳහා හැකි සෑම ප්‍රස්තාවක්ම යොදාගත්තේය. සීමෝර්ට පළමු වතාවට රාජ්‍ය පණිවිඩය අසන්ට ලැබුණේ චාර්ල්ස්ගේ අවිධිමත් සාක්ෂිදැරීම තුළිනි.
වැඩි කලක් යන්ට මත්තෙන්, සීමෝර්ද හැකි සෑමදෙනෙකු සමඟම බයිබල් සත්‍යයන් බෙදාගැනීමට අධිෂ්ඨාන කරගත්තේය. එමනිසා, ඔහු තම රැකියා ස්ථානයේ සිටි මනුෂ්‍යයන් සමඟ, විශේෂයෙන්ම තම ශිෂ්‍යයන් සමඟ අවිධිමත් සංවාදයන් ආරම්භ කිරීමට පටන්ගත්තේය. ඇතැම් රටවල පොදු පාසැල්වල ආගම ඉගැන්වීමට ඉඩ කඩ නොලැබෙතත්, ආගමික සහ සදාචාර සාරධර්ම ඉගැන්වීමට මෙම පුරුෂයාට පවරා තිබිණ. එහෙත් මේ සම්බන්ධයෙන් සීමෝර්ට තිබුණා වූ පෙර ආකල්ප, දැන් අලුතින් ලබාගත් බයිබල් දැනුම සමඟ වෙනස් වී තිබිණ. නව ලොවක් සම්බන්ධයෙන් වූ දෙවියන්වහන්සේගේ පොරොන්දුව ගැන සහ සදාකාල ජීවනය පිළිබඳ අපේක්ෂාව ගැන, ඔහු විවේක කාලවලදී තම ශිෂ්‍යයන් සමඟ කතා කළේය.
එම දරුවන් එයට ප්‍රතිචාරය දැක්වූයේ කෙසේද? යෙහෝවඃවහන්සේගේ රාජ්‍යය සම්බන්ධ ශුභාරංචියට බොහෝදෙනෙක් අව්‍යාජ උනන්දුවක් විදහාපෙන්වූහ. කල් යත්ම, සීමෝර් ඔහුගේ ශිෂ්‍යයන් 13දෙනෙකු සමඟ බයිබල් පාඩම් පැවැත්වීමට පටන්ගත්තේය. ඔවුන්ගේ උනන්දුව කොතරම්ද කිවහොත්, බයිබලය සතියකට දෙවතාවක් අධ්‍යයනය කිරීමට ඔවුහු සැලසුම් කළෝය. අවසානයේදී, ඔවුන්ගෙන් බොහෝදෙනෙක් යෙහෝවඃවහන්සේගේ සාක්ෂිකාරයන්ගේ ප්‍රාදේශීය රාජ්‍ය ශාලාවල පවත්වනු ලබන ක්‍රිස්තියානි රැස්වීම්වලට සහභාගි වීමට පටන්ගත්තෝය. මේ දක්වා ඔවුන්ගෙන් නවදෙනෙක් යෙහෝවඃවහන්සේගේ කැපවූ බව්තීස්ම ලත් සාක්ෂිකරුවන් බවට පත් වී සිටිති. සීමෝර් සම්බන්ධයෙන් පවසනවා නම්, ඔහු දැන් බාර්බේඩස්හි යෙහෝවඃවහන්සේගේ සාක්ෂිකරුවන්ගේ එක් සභාවක ස්ථාවර පුරෝගාමියෙකු ලෙසත්, වැඩිමහල්ලෙකු ලෙසත් සේවය කරමින් තම දේවසේවය සම්පූර්ණ කරයි.
මෙය, ලොව වටා සිටින යෙහෝවඃවහන්සේගේ සාක්ෂිකරුවන් අවිධිමත් සාක්ෂිදැරීමේ නිරතවීමෙන්, ‘එවැන්ජලිස්තවරුන්ගේ වැඩය කරන’ ආකාරය පිළිබඳව එක් නිදසුනක් පමණි. කොලොස්සි 4:5, 6හි සඳහන් මෙම බයිබල් උපදෙස ඔවුහු අනුගමනය කරති: “නුඹලා ප්‍රස්තාව අල්ලාගනිමින්, පිටත සිටින්නන් කෙරෙහි ප්‍රඥාවෙන් ක්‍රියාකරපල්ලා. නුඹලා එකිනෙකාට උත්තරදිය යුතු කෙසේදැයි දැනගන්නා පිණිස, නුඹලාගේ කථාව නිතරම ලුණෙන් රසවත්ව, අනුග්‍රහයෙන් යුක්තව තිබේවා.”