සංචාරක අවේක්ෂකයන් විශ්වාස ගබඩාකාරයන් හැටියට සේවය කරන අන්දම

“දෙවියන්වහන්සේගේ අනේකාකාර කරුණාවේ යහපත් ගබඩාකාරයන් මෙන් එකිනෙකාට ලැබුණු දීමනාවේ හැටියට එයින් එකිනෙකාට සේවයකරන්න.”—1 පේතෘස් 4:10.

1, 2. (අ) ඔබ “ගබඩාකාරයා” යන වචනයෙහි තේරුම දක්වන්නේ කෙසේද? (ආ) දෙවියන්වහන්සේ යොදාගන්නාවූ ගබඩාකාරයන් අතර කවරහු සිටිද්ද?

යෙහෝවඃවහන්සේ සියලුම විශ්වාසවන්ත ක්‍රිස්තියානීන් ගබඩාකාරයන් හැටියට යොදාගන්නාසේක. ගබඩාකාරයෙකු යනු, බොහෝදුරට නිවසක් භාරව සිටින සේවකයෙකි. ඔහුගේ ස්වාමියාගේ ව්‍යාපාර කටයුතු හැසිරවීමෙහිත් ඔහු නිරත විය හැක. (ලූක් 16:1-3; ගලාති 4:1, 2) යේසුස්වහන්සේ, මිහිපිට වෙසෙන තම පක්ෂපාත ආලේප ලත් අයගෙන් සෑදුණු මණ්ඩලය හැඳින්වූයේ ‘විශ්වාස වූ ගබඩාකාරයා’ හැටියටය. උන්වහන්සේ, රාජ්‍ය-දේශනා කිරීමේ කටයුතු ඇතුළුව, “තමා සන්තක සියල්ල” මෙම ගබඩාකාරයාට භාර දී තිබෙනසේක.—ලූක් 12:42-44; මතෙව් 24:14, 45.

² හැම ක්‍රිස්තියානි භක්තිකයෙකුම විවිධ ආකාරවලින් ප්‍රකාශ වන දෙවියන්වහන්සේගේ ලබන්ට නොවටිනා තරම් වූ කරුණාවේ ගබඩාකාරයන් බව ප්‍රේරිත පේතෘස් පැවසීය. සෑම ක්‍රිස්තියානියෙකුටම විශ්වාසවන්ත ගබඩාකාරකමක් පැවැත්විය හැකි තත්වයක් තිබේ. (1 පේතෘස් 4:10) පත් කරන ලද ක්‍රිස්තියානි වැඩිමහල්ලන් ගබඩාකාරයන් වන අතර, ඔවුන් අතර සංචාරක අවේක්ෂකයෝ සිටිත්. (තීතස් 1:7) මෙම සංචාරක වැඩිමහල්ලන්ව සැලකිය යුත්තේ කෙසේද? ඔවුන්ට තිබිය යුත්තේ කුමන ගුණාංග හා පරමාර්ථද? එමෙන්ම වැඩිම යහපතක් සිදු කිරීමට ඔවුන්ට හැක්කේ කෙසේද?

ඔවුන් පිරිනමන සේවයට කෘතගුණ

3. සංචාරක අවේක්ෂකයන්ව “යහපත් ගබඩාකාරයන්” කියා ඇමතිය හැක්කේ මන්ද?

³ එක් ක්‍රිස්තියානි විවාහක යුවළක්, සංචාරක අවේක්ෂකයෙකුට හා ඔහුගේ භාර්යාවට මෙසේ ලීවේය: “අප වෙනුවෙන් ඔබ වැය කර තිබෙන ඉමහත් කාලය හා ප්‍රේමයට අපේ කෘතගුණ ප්‍රකාශ කිරීමට කැමැත්තෙමු. ඔබේ දිරිගැන්වීමෙන් හා උපදෙස්වලින් පවුලක් වශයෙන් අපි ඉමහත් ප්‍රයෝජනයක් ලබා ඇත්තෙමු. අප දිගටම ආත්මික වර්ධනයක් ලැබිය යුතු බව දන්නා මුත්, යෙහෝවඃවහන්සේගේ උපකාරයෙන් හා ඔබ වැනි සහෝදර සහෝදරියන්ගේ සහයෝගයෙන්, වර්ධනය වෙද්දී අද්දකිනු ලබන දුෂ්කරතා විඳීම වඩාත් පහසු කාර්යයක් වේ.” හොඳ ගබඩාකාරයෙකු පවුලක අවශ්‍යතා හොඳින් පිරිමසන්නාක් මෙන්, සංචාරක අවේක්ෂකයන් සෙසු ඇදහිලිවන්තයන් කෙරෙහි පෞද්ගලික උනන්දුවක් දක්වන නිසා, මෙවැනි ප්‍රකාශයන් නිතරම අසන්ට ලැබේ. සමහරු කැපීපෙනෙන කථිකයෝ වෙති. බොහෝදෙනෙකු දේශනා සේවයෙහි දස්කම් දක්වන අතර, වෙනත් අය උණුසුම්භාවය හා දයානුකම්පාව දැක්වීම සම්බන්ධයෙන් ප්‍රසිද්ධත්වයක් උසුලති. අනුන්ට සේවය කරද්දී, එවන් දීමනා වර්ධනය කොට යොදාගැනීමෙන්, සංචාරක අවේක්ෂකයන්ව නිසි ලෙස “යහපත් ගබඩාකාරයන්” හැටියට හැඳින්විය හැකිය.

4. දැන් සලකනු ඇත්තේ කුමන ප්‍රශ්නයද?

⁴ ප්‍රේරිත පාවුල් මෙසේ ලීවේය: “මෙහිදී ගබඩාකාරයන්ගෙන් ඕනෑකරන්නේ එක එක මනුෂ්‍යයා විශ්වාසව සිටීමය.” (1 කොරින්ති 4:2) සතියක් පාසා සතියක් වෙනම සභාවක සෙසු ක්‍රිස්තියානීන්ට සේවය කිරීම, අද්විතීය මෙන්ම ප්‍රීතිදායක වරප්‍රසාදයකි. කෙසේවෙතත්, එය බැරෑරුම් වගකීමක්ද වේ. එසේනම්, තම ගබඩාකාරත්වය විශ්වාසවන්තව හා සාර්ථකව කරගෙන යෑමට සංචාරක අවේක්ෂකයන්ට හැක්කේ කෙසේද?

තම ගබඩාකාරත්වය සාර්ථකව කරගෙන යෑම

5, 6. සංචාරක අවේක්ෂකයෙකුගේ ජීවිතයේ යෙහෝවඃවහන්සේ කෙරෙහි යාච්ඤාපූර්වකව රඳා සිටීම එතරම් වැදගත් වන්නේ මන්ද?

⁵ සාර්ථක ගබඩාකාරයන් වීමට නම්, සංචාරක අවේක්ෂකයන් යෙහෝවඃවහන්සේ කෙරෙහි යාච්ඤාපූර්වකව රඳා සිටීම අත්‍යවශ්‍යය. කාර්ය බහුල වැඩසටහනක් හා බොහෝ වගකීම් තිබෙන නිසා, ඔවුන්ට ඇතැම් අවස්ථාවන්හිදී වෙහෙසට පත් වූ බවක් දැනිය හැක. (2 කොරින්ති 5:4, සසඳන්න.) එබැවින්, ඔවුන් ගීතිකාකාර දාවිත්ගේ ගීතයට එකඟව ක්‍රියා කළ යුතුය: “නුඹේ බර ස්වාමීන් පිට තබව, උන්වහන්සේ නුඹ උසුලනසේක. උන්වහන්සේ කිසිකලෙකත් ධර්මිෂ්ඨයා සෙලවෙන්ට නොදෙනසේක.” (ගීතාවලිය 55:22) දාවිත්ගේ මෙම වදන්ද සැනසිල්ල ගෙන දෙයි: “දවස්පතා අපේ බර උසුලන්නාවූ, අපේ ගැළවුම්කාරවූ දෙවිවූ ස්වාමීන්වහන්සේට ප්‍රශංසාවේවා.”—ගීතාවලිය 68:19.

⁶ තම ආත්මික වගකීම් ඉටු කිරීමට පාවුල් ශක්තිය ලබාගත්තේ කොතැනින්ද? ඔහු මෙසේ ලීවේය: “මා බලවත්කරන්නාවූ තැනන්වහන්සේ තුළ මට සියලුදේ කරන්ට පුළුවන.” (පිලිප්පි 4:13) ඔව්, පාවුල්ගේ ශක්තියේ උල්පත වූයේ යෙහෝවඃ දෙවියන්වහන්සේය. ඒ හා සමානව පේතෘස් මෙසේ අවවාද කළේය: “යමෙක් සේවයකෙරේ නම්, දෙවියන්වහන්සේ සපයාදෙන ශක්තියේ ප්‍රකාර සේවයකරාවා. දෙවියන්වහන්සේට යේසුස් ක්‍රිස්තුස්වහන්සේ කරණකොටගෙන සියලු කාරණාවලදී ගෞරව පැමිණෙන පිණිස එසේ කරන්ට ඕනෑය.” (1 පේතෘස් 4:11) අවුරුදු ගණනාවක් තිස්සේ සංචාරක අවේක්ෂකයෙකුව සිටි සහෝදරයෙක්, දෙවියන්වහන්සේ කෙරෙහි රඳා සිටීමේ අවශ්‍යතාව මෙසේ අවධාරණය කළේය: “ගැටලු සමඟ කටයුතු කරද්දී, හැම තිස්සේම යෙහෝවඃවහන්සේගේ පිහිට පතා, උන්වහන්සේගේ සංවිධානයෙන් උපකාර ලබාගන්න.”

7. සංචාරක අවේක්ෂකයෙකුගේ වැඩයෙහි සමබරතාව අදාළ වන්නේ කෙසේද?

⁷ සාර්ථක සංචාරක අවේක්ෂකයෙකුට සමබරතාව අවශ්‍යය. වෙනත් ක්‍රිස්තියානීන්ට සමානව, “වඩාත් වැදගත් දේ ගැන සහතික” වීමට ඔහු වෙර දරයි. (පිලිප්පි 1:10, NW)a යම් කාරණයක් සම්බන්ධයෙන් සභාවක වැඩිමහල්ලන්ට ප්‍රශ්න තිබේ නම්, බැහැදකින චාරිකා අවේක්ෂකයා සමඟ එය සාකච්ඡා කිරීම නුවණට හුරුය. (හිතෝපදේශ 11:14; 15:22) ඔහු සභාවෙන් පිට වී ගියායින් පසුව වැඩිමහල්ලන් එම කාරණාව දිගටම හසුරුවද්දී, ඔහු කළ සමබර නිරීක්ෂණ හා දුන් සමබර ශුද්ධ ලියවිලිමය උපදෙස් බෙහෙවින් උපකාරවත් වන බවට සැකයක් නැත. ඊට සමාන දෙයක් ගැන කතා කරමින්, පාවුල් තිමෝතිට මෙසේ ලීවේය: “බොහෝ සාක්ෂිකාරයන් ඉදිරියෙහි නුඹ මාගෙන් ඇසූ දේම වෙන අයටත් උගන්වන්ට සමර්ථවූ විශ්වාසවූ මනුෂ්‍යයන්ට භාරදෙන්න.”—2 තිමෝති 2:2.

8. බයිබල් අධ්‍යයනය, පර්යේෂණ හා මෙනෙහි කිරීම අත්‍යවශ්‍ය වන්නේ මන්ද?

⁸ ස්ථිරසාර උපදෙස් දීමට නම්, ශුද්ධ ලියවිලි මත පදනම් අධ්‍යයනය, පර්යේෂණ හා මෙනෙහි කිරීම අත්‍යවශ්‍යය. (හිතෝපදේශ 15:28) එක් දිස්ත්‍රික් අවේක්ෂකයෙක් මෙසේ පැවසීය: “වැඩිමහල්ලන් සමඟ රැස්වෙද්දී, අපි යම් ප්‍රශ්නයකට උත්තරය දන්නේ නැහැ කියලා කීමට මැළි වෙන්න අවශ්‍ය නැහැ.” කාරණයක් සම්බන්ධයෙන් “ක්‍රිස්තුස්වහන්සේගේ සිත” ලබාගැනීමට වෑයමක් දැරීමෙන්, අනුන්ට දේවකැමැත්තට එකඟව කටයුතු කිරීම සඳහා උපකාර කරනු ඇති බයිබලය මත පදනම් උපදෙස් දීමට මඟ සලසයි. (1 කොරින්ති 2:16) ඇතැම්විට මඟ පෙන්වීම සඳහා සංචාරක අවේක්ෂකයෙකුට වොච් ටවර් සමිතිය වෙත ලිවීමට සිදු වේ. කුමක් වෙතත්, අනුන් තුළ ඇති කරන හැඟීම හෝ කථිකත්වයට වඩා යෙහෝවඃවහන්සේ කෙරෙහි ඇදහිල්ල හා සත්‍යය සඳහා ප්‍රේමය බෙහෙවින් වැදගත් වේ. පාවුල් කොරින්තියේ තම සේවය ආරම්භ කළේ, “චතුර කථිකත්වයක් හෝ ප්‍රඥාවක් හෝ [මවා, NW] පෙන්වමින්” නොව, “දුර්වලකමින් ද බියෙන් ද අධික තැතිගැනීමෙ[න්ද]” යුක්තවය. මින් ඔහු බල රහිත තත්වයකට පත් වූයේද? නැත; ඊට වෙනස්ව, “මිනිස් ප්‍රඥාව මත නොව දෙවියන් වහන්සේගේ බලය” කෙරෙහි ඇදහිල්ල තැබීමට එය කොරින්තිවරුන්ට උපකාරවත් විය.—1 කොරින්ති 2:1-5, නව අනුවාදය.

වෙනත් අත්‍යවශ්‍ය ගුණාංග

9. සංචාරක වැඩිමහල්ලන් අනුන්ගේ තත්වය වටහාගෙන කටයුතු කිරීම අවශ්‍ය වන්නේ මන්ද?

⁹ අනුන්ගේ තත්වය වටහාගෙන කටයුතු කිරීම සංචාරක අවේක්ෂකයන්ට හොඳ ප්‍රතිඵල ලබාගැනීමට උපකාරවත් වේ. ‘එකිනෙකා කෙරෙහි දයාව’ පෙන්වීමට නොහොත් “දයානුකම්පිත” වීමට පේතෘස් සියලු ක්‍රිස්තියානීන්ට උනන්දු කළේය. (1 පේතෘස් 3:8, NW, පාදසටහන) ‘සභාවේ සිටින සියලුමදෙනා කෙරෙහි උනන්දුවක් දැක්වීමට හා සැබෑ අවධානයක් යොමු කිරීමට’ අවශ්‍යතාවක් එක් චාරිකා අවේක්ෂකයෙකුට හැඟෙයි. ඒ හා සමාන අදහසක් දෙමින්, පාවුල් මෙසේ ලීවේය: “ප්‍රීතිවෙන්නන් සමඟ ප්‍රීතිවෙන්න; අඬන්නන් සමඟ අඬන්න.” (රෝම 12:15) එවැනි ආකල්පයක් තිබීම, සෙසු ඇදහිලිවන්තයන්ගේ ගැටලු හා තත්වයන් තේරුම්ගැනීම සඳහා අවංක වෑයමක් දැරීමට සංචාරක අවේක්ෂකයන්ව පොලඹවයි. එවිට, අදාළ කරනු ලබනවා නම්, ඉමහත් යහපතක් ඉටු කළ හැකි වර්ධනය ගෙන දෙන ශුද්ධ ලියවිලිමය උපදෙස් දීමට ඔවුන්ට හැකි වෙයි. අනුන්ගේ තත්වය වටහාගෙන මැනවින් කටයුතු කරන චාරිකා අවේක්ෂකයෙකුට, ඉතාලියේ ටියුරින් අසල පිහිටි සභාවකින් මෙම ලිපිය ලැබිණ: “උනන්දුවක් ඇති කිරීමට කැමති නම්, අනුන් ගැන උනන්දු වෙන්න; අනුන්ගේ සිත් දිනාගැනීමට කැමති නම්, ප්‍රසන්න ස්වරූපයකින් සිටින්න; ප්‍රේමය ලබන්ට කැමති නම්, ප්‍රේමනීය කෙනෙකු වන්න; උපකාරයක් ලබන්ට කැමති නම්, උපකාර දෙන්න සූදානමින් සිටින්න. මේ සියල්ල අප ඉගෙනගත්තේ ඔබෙන්ය!”

10. නිහතමානී වීම ගැන චාරිකා හා දිස්ත්‍රික් අවේක්ෂකයන් පවසා තිබෙන දේ සඳහන් කරන්න; මේ සම්බන්ධයෙන් යේසුස්වහන්සේ තැබුවේ කුමන ආදර්ශයද?

¹⁰ සංචාරක අවේක්ෂකයන් ඉමහත් යහපතක් කිරීමට යනවා නම්, නිහතමානී මෙන්ම එළඹිය හැකි කෙනෙකු වීම උපකාරයකි. එක් චාරිකා අවේක්ෂකයෙක් මෙසේ නිරීක්ෂණය කළේය: “නිහතමානී ආකල්පයක් පවත්වාගැනීම හරිම වැදගත්.” අලුත් සංචාරක අවේක්ෂකයන්ට ඔහු මෙසේ අවවාද කරයි: “වත් පොහොසත්කමක් ඇති සහෝදරයන්ට ඔබ වෙනුවෙන් යමක් කරන්න පුළුවන් නිසා ඔවුන්ගේ බලපෑමට අනවශ්‍ය ලෙස හසු වන්න එපා; ඒ අයව පමණක් ඔබගේ මිතුරන් කරගන්නත් එපා; ඒත් හැම කෙනෙක් එක්කම පැති ගන්නේ නැතුව කටයුතු කරන්න බලන්න.” (2 ලේකම් 19:6, 7) ඇරත්, සැබවින්ම නිහතමානී වන සංචාරක අවේක්ෂකයෙකු සමිතියේ නියෝජිතයෙකු වශයෙන් තමාට හිමි වැදගත්කම ගැන ඕනෑවට වඩා සිතීමටත් පෙලඹෙන්නේ නැත. දිස්ත්‍රික් අවේක්ෂකයෙක් මෙම යෝග්‍ය අදහස දැක්වීය: “නිහතමානී වෙන්න; සහෝදරයන්ට සවන් දෙන්න කැමැත්තක් දක්වන්න. හැමවිටම එළඹිය හැකි කෙනෙකු වන්න.” මෙතෙක් ජීවත් වූ ශ්‍රේෂ්ඨතම මනුෂ්‍යයා වශයෙන්, අනුන්ට යම් අපහසුතාවක් දැනෙන්ට සැලැස්වීමට යේසුස් ක්‍රිස්තුස්වහන්සේට හැකිකම තිබුණ මුත්, උන්වහන්සේ කොතරම් නිහතමානීව හා එළඹිය හැකි ආකාරයකින් කටයුතු කළාද කිවහොත්, දරුවෝ පවා උන්වහන්සේ සමඟ පහසුවෙන් කල් ගෙව්වෝය. (මතෙව් 18:5; මාර්ක් 10:13-16) සභාවේ ඕනෑම කෙනෙකුට, ඇත්තෙන්ම සියලුදෙනාටම—එනම් දරුවන්ට, නහඹරයන්ට, මහලු අයට, තමුන් වෙතට බිය සැකයකින් තොරව එළඹීමට පුළුවන් බව හැඟීමට සංචාරක අවේක්ෂකයන්ට ඕනෑය.

11. අවශ්‍යතාව පැනනඟින විට, සමාව ඉල්ලීමේ බලපෑම කුමක් විය හැකිද?

¹¹ “බොහෝ වර අපි සියල්ලෝ පැකිලෙ[න]” බවත්, කිසිම සංචාරක අවේක්ෂකයෙකු දුර්වලකම් රහිත කෙනෙකු නොවන බවත් පිළිගත යුත්තකි. (යාකොබ් 3:2) ඔවුන්ගේ අතින් වැරදි සිදු වන විට, අවංකව සමාව ඉල්ලීම, වෙනත් වැඩිමහල්ලන්ට නිහතමානිකම දැක්වීම සම්බන්ධයෙන් ආදර්ශයක් වේ. හිතෝපදේශ 22:4ට අනුව, “යටත්කමේද ස්වාමීන්වහන්සේ කෙරෙහි භයවීමේද විපාකය නම් වස්තුවත් ගෞරවයත් ජීවිතයත්ය.” ඇත්තෙන්ම, “දෙවියන්වහන්සේ වෙත යටහත්ලෙස හැසිරීම” සෑම දේවසේවකයෙකුගේම යුතුකම නොවේද? (මීකා 6:8) අලුතෙන් සංචාරය කිරීමට පටන්ගත් වැඩිමහල්ලෙකුට කුමන අවවාදයක් දෙනවාද කියා විමසූ විට, එක් චාරිකා අවේක්ෂකයෙක් මෙම අදහස් පළ කළේය: “හැම සහෝදරයෙක්වම ගෞරවයෙන් හා වැදගත් විදිහට සලකන්න; ඔවුන් ඔබට වඩා හොඳයි කියන හැඟීම ඇති කරගන්න. ඔබට සහෝදරයන්ගෙන් බොහෝ දේ ඉගෙනගන්න පුළුවන්. නිහතමානීව සිටින්න. අස්වාභාවික විදිහට කටයුතු කරන්න එපා. පුහු මාන්නයෙන් කටයුතු නොකරන්න.”—පිලිප්පි 2:3.

12. ක්‍රිස්තියානි දේවසේවය සඳහා ජ්වලිතය එතරම් වැදගත් වන්නේ මන්ද?

¹² ක්‍රිස්තියානි දේවසේවයෙහි ජ්වලිත වීම, සංචාරක අවේක්ෂකයෙකු පවසන දෙයට පිටුබලයක් වේ. ඇත්තෙන්ම, ඔහුද ඔහුගේ භාර්යාවද ශුභාරංචිය ප්‍රකාශ කිරීමේ වැඩයෙහි ජ්වලිත ආදර්ශයක් තබන විට, වැඩිමහල්ලන්ට, ඔවුන්ගේ භාර්යාවන්ට හා සභාවේ සෙසු අයට තම සේවයෙහි ජ්වලිතයක් විදහාපෙන්වීමට දිරිගන්වනු ලැබේ. එක් චාරිකා අවේක්ෂකයෙක් මෙසේ උනන්දු කළේය: “සේවය සඳහා ජ්වලිත වන්න.” ඔහු මෙසේද පැවසුවේය: “සාමාන්‍යයෙන් මං දැක තිබෙන දෙයක් නම්, සභාව සේවයෙහි ජ්වලිත වෙන්න වෙන්න, ඔවුන් අද්දකින ගැටලු අඩුයි.” තවත් චාරිකා අවේක්ෂකයෙක් මෙසේ අදහස් දැක්වීය: “වැඩිමහල්ලන් සහෝදර සහෝදරියන් එක්ක ක්ෂේත්‍රයේ වැඩ කර, දේවසේවය භුක්තිවිඳීමට ඔවුන්ට උපකාර කරනවා නම්, එහි ප්‍රතිඵලයක් හැටියට මනසේ සාමයක් හා යෙහෝවඃවහන්සේට සේවය කිරීමෙන් ඉමහත් තෘප්තියක් අත් වන බව මං විශ්වාස කරනවා.” ප්‍රේරිත පාවුල්, ‘මහත් පොරඇල්ලීමක් ඇතුව දෙවියන්වහන්සේගේ ශුභාරංචිය තෙසලෝනිකවරුන්ට කියා දෙන්ට නිර්භීත වූයේය.’ ඔහුගේ බැහැදැකීම ගැන හා කළ දේශනා සේවය ගැන ඔවුන්ට හොඳ මතකයක් තිබීමත්, ඔහුව නැවත දකින්ට මහත් ආශාවක් දැක්වීමත් පුදුමයක්ද!—1 තෙසලෝනික 2:1, 2; 3:6.

13. ක්ෂේත්‍ර සේවයෙහි සෙසු ක්‍රිස්තියානීන් සමඟ වැඩ කරද්දී, සංචාරක අවේක්ෂකයෙකු සැලකිල්ලට ගන්නේ කුමක්ද?

¹³ ක්ෂේත්‍ර සේවයෙහි සෙසු ක්‍රිස්තියානීන් සමඟ වැඩ කරද්දී, සංචාරක අවේක්ෂකයෙක් ඔවුන්ගේ තත්වයන් හා සීමාවන් සැලකිල්ලට ගන්නේය. ඔහු දෙන යෝජනා උපකාරවත් විය හැකි වුවත්, අද්දැකීම් තිබෙන වැඩිමහල්ලෙකු සමඟ දේශනා කරද්දී, ඔවුන්ට චකිතයක් තිබිය හැකි බව ඔහු දන්නේය. එමනිසා, ඇතැම් අවස්ථාවන්හිදී උපදෙස් දීමට වඩා දිරිගැන්වීම ප්‍රයෝජනවත් විය හැක. ඔහු ප්‍රචාරකයන් හෝ පුරෝගාමීන් සමඟ බයිබල් පාඩමකට යද්දී, ඔහු පාඩම පවත්වනවා දකින්ට ඔවුන් වැඩි කැමැත්තක් දැක්විය හැක. ඔවුන්ගේ ඉගැන්වීමේ ශිල්ප ක්‍රම දියුණු කිරීමට යොදාගත හැකි ඇතැම් ක්‍රම මෙමගින් ඔවුන්ට ඉගෙනගත හැක.

14. ජ්වලිත සංචාරක අවේක්ෂකයන් අනුන් තුළ ජ්වලිතය පුබුදුවාලන බව පැවසිය හැක්කේ මන්ද?

¹⁴ ජ්වලිත සංචාරක අවේක්ෂකයෝ අන්‍යයන් තුළ ජ්වලිතය වර්ධනය කරති. එතරම් දියුණුවක් නොලබන බයිබල් පාඩමකට යෑම සඳහා උගන්ඩාවේ එක් චාරිකා අවේක්ෂකයෙක් සහෝදරයෙකු සමඟ පැයක් තිස්සේ ඝන වනාන්තරයක් මැදින් ගමන් කළේය. ඔවුන් ඇවිදිද්දී කොතරම් වැසි කඩා වැටුණාද කිවහොත්, එම නිවසට ළඟා වෙද්දී ඔවුහු හොඳටම තෙත්බරි වී සිටියෝය. තමන්ව බැහැදැකීමට පැමිණි අමුත්තා සංචාරක අවේක්ෂකයෙකු බව සයදෙනෙකුගෙන් යුත් පවුල දැනගත් විට, මෙය ඔවුන්ගේ සිත්ගත්තේය. ඔවුන්ගේ පල්ලියේ දේවගැතියන් රැළ කෙරෙහි එවැනි උනන්දුවක් කිසිදිනක නොපෙන්වන බව ඔවුහු දැන සිටියෝය. ඊළඟ ඉරු දින, ඔවුහු තම පළමු රැස්වීමට පැමිණි අතර, යෙහෝවඃවහන්සේගේ සාක්ෂිකරුවන් වීමට ආශාවක් පළ කළෝය.

15. මෙක්සිකෝවේ ජ්වලිත චාරිකා අවේක්ෂකයෙකු භුක්තිවින්දේ කුමන කදිම අද්දැකීමද?

¹⁵ මෙක්සිකෝවේ වහාකා ප්‍රාන්තයේ, චාරිකා අවේක්ෂකයෙක් ඇත්තටම තමාගෙන් අපේක්ෂා නොකළ යමක් කළේය. රාජ්‍ය ප්‍රචාරකයන් බවට පත් වී සිටි සිරකරුවන් සත්දෙනෙකුගෙන් සෑදුණු කණ්ඩායමක් බැහැදැකීමට ඔහු සිර කුටියක රාත්‍රි සතරක් ගත කිරීමට සැලසුම් කළේය. දවස් කිහිපයක් පුරා ඔහු මෙම සිරකරුවන් සමඟ කුටියෙන් කුටියට සාක්ෂිදරමින් බයිබල් පාඩම් පැවැත්වීය. දක්වනු ලැබූ උනන්දුව නිසා, මෙම පාඩම්වලින් සමහරක් රෑ බෝවන තුරු පවත්වන ලදි. මෙම ජ්වලිත චාරිකා අවේක්ෂකයා මෙසේ ලියයි: “බැහැදැකීමෙන් පසුව, එකිනෙකා අතර ඇති වූ දිරිගැන්වීම හේතුවෙන් සිරකරුවන්ටයි මටයි පූර්ණ ප්‍රීතියක් දැනිණ.”

16. සංචාරක අවේක්ෂකයන් හා ඔවුන්ගේ භාර්යාවන් දිරිගැන්වීම සපයන විට, එය එතරම් ප්‍රයෝජනදායක වන්නේ මන්ද?

¹⁶ සංචාරක අවේක්ෂකයෝ දිරිගන්වනසුලු අය වීමට වෙර දරති. පාවුල් මකිදෝනියේ සභාවන් බැහැදකිද්දී, ‘ඔවුන්ව බොහෝ සේ ධෛර්යවත් කළේය.’ (ක්‍රියා 20:1, 2; න.අ.) බාල මහලු දෙපාර්ශ්වයම ආත්මික ඉලක්කයන් කෙරෙහි යොමු කිරීමට දිරිගැන්වීමේ වදන් පැවසීම බෙහෙවින් උපකාරවත් විය හැක. වොච් ටවර් සමිතියේ විශාල ශාඛා කාර්යාලයක, අවිධිමත් ලෙස කළ සමීක්ෂණයකින් හෙළි වූයේ, ස්වේච්ඡා සේවකයන්ගෙන් සියයට 20කට ආසන්න ප්‍රමාණයකට පූර්ණ-කාලීන සේවය කිරීමට චාරිකා අවේක්ෂකයන් දිරිගන්වා තිබූ බවය. පූර්ණ-කාලීන රාජ්‍ය ප්‍රකාශකරන්නියක වශයෙන් තබන කදිම ආදර්ශය මගින්, සංචාරක අවේක්ෂකයෙකුගේ භාර්යාවත් ඉමහත් දිරිගැන්වීමේ උල්පතක් බවට ඔප්පු වන්නීය.

17. අනුන්ට උපකාර කිරීමට තමා සතු වරප්‍රසාදය ගැන මහලු චාරිකා අවේක්ෂකයෙකුට හැඟෙන්නේ කෙසේද?

¹⁷ විශේෂයෙන්ම මහලු හා කලකිරුණු අයට දිරිගැන්වීම අවශ්‍යය. එක් මහලු චාරිකා අවේක්ෂකයෙක් මෙසේ ලියයි: “මගේ සේවයෙහි කියා නිම කළ නොහැකි ඇතුළාන්ත ප්‍රීතියක් ජනිත කරන අංගය නම්, දෙවියන්වහන්සේගේ රැළේ සිටින අක්‍රියාශීලී හා දුබල අයට උපකාර කිරීමේ වරප්‍රසාදයයි. ‘එවන් අය ස්ථිර වන හැටියට ඔවුන්ට යම් කිසි ආත්මික දීමනාවක් දෙන අතරතුර,’ මට ඉමහත් දිරිගැන්වීමක් හා ශක්තියක් ලැබේ; එමනිසා රෝම 1:11, 12හි වදන් මාහට විශේෂ අර්ථයකින් යුක්තය.”

ඔවුන්ගේ ප්‍රීතිමත් සේවයෙන් අත් වන විපාක

18. සංචාරක අවේක්ෂකයන්ට තිබෙන්නේ කුමන ශුද්ධ ලියවිලිමය පරමාර්ථද?

¹⁸ සංචාරක අවේක්ෂකයෝ සෙසු ඇදහිලිවන්තයන්ගේ ශුභසිද්ධිය තකා කටයුතු කරති. සභාවන් ශක්තිමත් කිරීමත් ඒවා ආත්මිකව ගොඩනැංවීමත් ඔවුන්ගේ කැමැත්ත වේ. (ක්‍රියා 15:41) “දිරිගැන්වීම දීමටත්, සහනය ලබා දීමටත්, සේවය සම්පූර්ණ කිරීමට හා සත්‍යයට අනුව ජීවත්වීමේ ආශාවට දිරි දීමටත්” එක් සංචාරක අවේක්ෂකයෙක් වෙහෙස මහන්සි වී වැඩ කරයි. (3 යොහන් 3) තවත් කෙනෙක් සෙසු ඇදහිලිවන්තයන්ව ඇදහිල්ලෙහි ශක්තිමත්ව තබාගැනීමට සොයයි. (කොලොස්සි 2:6, 7) සංචාරක අවේක්ෂකයෙකු “හවුල් වැඩකරන්නෙක්” මිස අනුන්ගේ ඇදහිල්ල කෙරෙහි බලපවත්වන්නෙකු නොවන බව මතක තබාගන්න. (පිලිප්පි 4:3; 2 කොරින්ති 1:24) ඔහුගේ බැහැදැකීම, දිරිගැන්වීම හා අමතර ක්‍රියාකාරකම්වලට අවස්ථාවක් වන අතර, සභා වැඩිමහල්ලන්ට, ලබා ඇති දියුණුව පුනරීක්ෂණය කිරීමට හා අනාගත ඉලක්කයන් සලකා බැලීමට ප්‍රස්තාවකි. ඔහුගේ වචනවලින් හා ආදර්ශයෙන්, සභා ප්‍රචාරකයන්ට, පුරෝගාමීන්ට, උපස්ථායක සේවකයන්ට හා වැඩිමහල්ලන්ට ඉදිරියෙහි තිබෙන කාර්යයන් සඳහා වර්ධනයක් ලැබීමත් පොලඹවනු ලැබීමත් අපේක්ෂා කළ හැක. (1 තෙසලෝනික 5:11, සසඳන්න.) එබැවින්, චාරිකා අවේක්ෂකගේ බැහැදැකීම්වලට හෘද-පූර්ණ සහයෝගය දක්වා, දිස්ත්‍රික් අවේක්ෂකයා පිරිනමන සේවයෙන් උපරිම ප්‍රයෝජන නෙළාගන්න.

19, 20. සංචාරක අවේක්ෂකයන් හා ඔවුන්ගේ භාර්යාවන් පිරිනමන සේවයට විපාක ලැබ තිබෙන්නේ කෙසේද?

¹⁹ සංචාරක අවේක්ෂකයන් හා ඔවුන්ගේ භාර්යාවන් තම විශ්වාසවන්ත සේවය වෙනුවෙන් විපුල විපාක ලබන අතර, ඔවුන් කරන යහපත සඳහා යෙහෝවඃවහන්සේ ආශීර්වාද කරන බවට ඔවුන්ට නිසැක විය හැක. (හිතෝපදේශ 19:17; එපීස 6:8) ගේඕර්ජ් හා මාග්ඩාලේනා, අවුරුදු ගණනාවක් සංචාරක සේවයෙහි නිරත වූ වයසක යුවළකි. ලක්සම්බර්ග්හි පැවැත්වූ සමුළුවකදී, අවුරුදු 20කට ඉහතදී මාග්ඩාලේනා සාක්ෂිදැරූ තැනැත්තියක් ඇය වෙත පැමිණියාය. මාග්ඩාලේනා තබා ගිය බයිබල් පොත් පත් මගින් සත්‍යය කෙරෙහි මෙම යුදෙව් කාන්තාවගේ උනන්දුව පුබුදුවාලනු ලැබූ අතර, කල්යත්ම ඈ බව්තීස්ම වූවාය. ගේඕර්ජ් වෙත ආත්මික සහෝදරියක් පැමිණියාය; අවුරුදු 40කට පමණ පෙර ඔහු ඇගේ නිවසට පැමිණි අවස්ථාව ඇයට මතක් විය. ඔහු ශුභාරංචිය උනන්දුව ගෙන දෙන ආකාරයකින් ඉදිරිපත් කළ නිසා, ඇයද ඇගේ පුරුෂයාද සත්‍යය පිළිගත්තෝය. ගේඕර්ජ් හා මාග්ඩාලේනා අද්දුටු ඉමහත් ප්‍රීතිය ගැන අමුතුවෙන් කියන්ට දෙයක් නැත.

²⁰ එපීසයෙහි පාවුල්ගේ ඵලදායී සේවය ඔහුට ප්‍රීතියක් ගෙන දුන් අතර, “ගැනීමට වඩා දීම ආශීර්වාදය[ක්]” නොහොත් සන්තෝෂයක් බවට යේසුස්වහන්සේ පැවසූ වදන් උපුටා දැක්වීමට ඔහුව පොලඹවන්ට ඇත. (ක්‍රියා 20:35) සංචාරක සේවයට නිරන්තරයෙන්ම දීම ඇතුළත් නිසා, එහි නිරත වී සිටින අය විශේෂයෙන්ම තමන් දැරූ ශ්‍රමයේ හොඳ ප්‍රතිඵල දැනගන්නා විට, සන්තෝෂය අද්දකිති. අධෛර්යයට පත් වූ වැඩිමහල්ලෙකුට උපකාර කළ චාරිකා අවේක්ෂකයෙකුට මෙම ලිපිය ලැබිණ: “මගේ ආත්මික ජීවිතයේ ඔබ හිතනවාටත් වඩා, ඔබ මට ‘ශක්තිය ගෙන දෙන ඉමහත් උපකාරයක්’ වී තිබේ. . . . ‘පාද ඉවතයන්ට ළං’ වූ නවීන දින ආසාප් කෙනෙකුට ඔබ මොනතරම් උපකාරයක් වී තිබෙනවාද කියා ඔබ කිසිදාක දැන නොගන්නෙහිය.”—කොලොස්සි 4:11; ගීතාවලිය 73:2.

21. පළමුවන කොරින්ති 15:58 සංචාරක අවේක්ෂකයන්ගේ කාරණා කටයුතුවලට අදාළ වන බව ඔබ පවසනු ඇත්තේ මන්ද?

²¹ චාරිකා සේවයෙහි අවුරුදු ගණනාවක්ම ගත කළ මහලු ක්‍රිස්තියානියෙකු 1 කොරින්ති 15:58 ගැන සිතාබැලීමට කැමතිය; එහි පාවුල් මෙසේ උනන්දු කළේය: “ස්වාමීන්වහන්සේ කෙරෙහි නුඹලාගේ මෙහෙය නිෂ්ඵල නොවන බව නුඹලා දන්නා බැවින් ස්ථිරවව්, නිශ්චලවව්, නිතරම ස්වාමීන්වහන්සේගේ මෙහෙයෙහි වඩ වඩා පවතිව්.” ස්වාමීන්වහන්සේගේ මෙහෙයෙහි බොහෝ දේ කිරීමට සංචාරක අවේක්ෂකයන්ට තිබෙන බවට සැකයක් නැත. එසේනම්, යෙහෝවඃවහන්සේගේ ලබන්ට නොවටිනා තරම් වූ කරුණාවේ විශ්වාසවන්ත ගබඩාකරුවන් වශයෙන් ඔවුන් එතරම් ප්‍රීතියෙන් කරන සේවය ගැන අපි මොනතරම් කෘතගුණ වන්නෙමුද!

[පාදසටහන]

ඔබ ප්‍රතිචාරය දක්වන්නේ කෙසේද?

◻ සංචාරක අවේක්ෂකයන්ව “යහපත් ගබඩාකාරයන්” හැටියට සැලකිය හැක්කේ මන්ද?

◻ ඉමහත් යහපතක් සිදු කිරීම සඳහා චාරිකා හා දිස්ත්‍රික් අවේක්ෂකයන්ට උපකාර කරන සාධක සමහරක් මොනවාද?

◻ සංචාරක සේවයෙහි නිරත වී සිටින අය සඳහා නිහතමානීකම හා ජ්වලිතය එතරම් වැදගත් වන්නේ මන්ද?

◻ සංචාරක අවේක්ෂකයන්ට ඇත්තේ කිනම් කදිම පරමාර්ථද?

[16වන පිටුවේ පින්තූරය]

සෙසු ඇදහිලිවන්තයන්ව දිරිගැන්වීමට සංචාරක අවේක්ෂකයෝ වෙර දරති

[17වන පිටුවේ පින්තූරය]

සංචාරක අවේක්ෂකයන් හා ඔවුන්ගේ භාර්යාවන් සමඟ ආශ්‍රය කිරීමෙන් බාල මහලු දෙපාර්ශ්වයටම ප්‍රයෝජන අත් විය හැක

[18වන පිටුවේ පින්තූරය]

සංචාරක අවේක්ෂකයාගේ ජ්වලිත සේවය අනුන් තුළ ජ්වලිතය පුබුදුවාලයි