අදදින සර්ව ශුභවාදය සඳහා මුළාවෙන් තොර පදනමක්

වර්ෂ 1866දී උපත ලද, ඉතිහාසඥ සහ සමාජවිද්‍යාඥ එච්. ජී. වෙල්ස්, 20වන සියවසේ සිතුම් පැතුම් මතට ප්‍රබල බලපෑමක් එල්ල කළා. විද්‍යාවේ දියුණුව සමඟ මනුෂ්‍යවර්ගයා පරිපූර්ණත්වයට පැමිණෙන සහස්‍ර වර්ෂය සම්බන්ධ වෙනවා කියා තම ඉගැන්වීම් මගින් ඔහු පැහැදිලි කළා. තවදුරටත්, ඔහුගේ අරමුණ ඉටු කරගැනීමට ඔහු නොනවත්වා වැඩ කිරීමත් සමඟ වෙල්ස්ට තිබුණු “සීමා රහිත ශුභවාදය” කොලියර්ස් එන්සයික්ලොපීඩියා සිහිපත් කරනවා. නමුත් දෙවන ලෝක සංග්‍රාමය පුපුරායෑමත් සමඟම ඔහුගේ සර්ව ශුභවාදයද දෙදරා ගිය බව සටහන් කළ යුතුයි.

“විද්‍යාව නපුරටත් යහපතටත් ක්‍රියාත්මක වෙන්න පුළුවන්” බව වෙල්ස් තේරුම්ගනිද්දී, “ඔහුගේ විශ්වාසය නැති වී ඔහු සර්ව අශුභවාදයට පෙරළුණා” කියා චේම්බ’ස් බයෝග්‍රැෆිකල් ඩික්ෂනරි සඳහන් කරනවා. මෙය සිදු වුණේ ඇයි?

වෙල්ස්ගේ විශ්වාසය සහ සර්ව ශුභවාදය පදනම් වුණේ සම්පූර්ණයෙන්ම මිනිස් අත් කරගැනීම් මතයි. ඔහුගේ මනෝරාජ්‍යය ලබාගන්න මනුෂ්‍යවර්ගයා සුදුසු තත්වයක නොසිටි විට ඔහුට හැරෙන්න දිශාවක් නැතුව ගියා. අපේක්ෂා භංගත්වය වහාම සර්ව අශුභවාදයට පෙරළුණා.

එම හේතුව නිසාම, අදදින සිටින බොහෝදෙනෙක් එම අද්දැකීමම ලබමින් සිටිනවා. ඔවුන් යෞවනව සිටින විට සර්ව ශුභවාදයෙන් පිරී ඉතිරී සිටින අතර, වයසට යන විට, සර්ව අශුභවාදයේ අඳුරට ඇද වැටෙනවා. යෞවන අය පවා සාමාන්‍යයි කියන්නාවූ ඔවුන්ගේ ජීවිතය අහක දමා මත්ද්‍රව්‍ය අනිසි භාවිතය, ඕනෑම දෙයකට ඉඩ දීමේ ස්වභාවය සහ වෙනත් විනාශකාරි ජීවන රටාවන්වල යෙදී සිටිනවා. ඊට පිළිතුර? පහත සඳහන් බයිබල් කාලවල ආදර්ශ සලකා බලා, සර්ව ශුභවාදය සඳහා ඇති පදනම කුමක්ද කියා බලන්න—අතීතය, වර්තමානය සහ අනාගතය සඳහා.

ආබ්‍රහම්ගේ ශුභවාදය විපාක ලබයි

පොදු යුගයට පෙර 1943දී, ආබ්‍රහම් හාරාන්වලින් පිට වී යුප්‍රටීස් ගඟ හරහා ගොස්, පසුව කානාන් දේශයට ඇතුල් වුණා. ආබ්‍රහම්ව විස්තර කර ඇත්තේ, “අදහන්නාවූ සියල්ලන්ගේ පියා” හැටියට වන අතර, ඔහු මොනතරම් හොඳ ආදර්ශයක් තබා තිබෙනවාද!—රෝම 4:11.

ආබ්‍රහම් තම සහෝදරයාගේ අනාථ දරුවා වන ලොත් සහ ඔහුගේ පවුලේ අයවද කැටුව ගියා. පසුව, සාගතයක් දේශයට පහර දුන් විට, මෙම පවුල් දෙක මිසරයට ගොස්, නිසි කාලයේදී යළි පැමිණියා. මේ කාලයේදී, ආබ්‍රහම් සහ ලොත් යන දෙදෙනාම සෑහෙන ධන සම්භාරයකට මෙන්ම එළු බැටළු රැළවලටද උරුමකම් කිව්වා. ඔවුන්ගේ ගවයන්ගේ එඬේරුන් අතර හටගත් දබරයක් උත්සන්න වූ විට, ආබ්‍රහම් මූලිකත්වය ගෙන මෙසේ කිව්වා: “මා සහ නුඹ අතරෙහිද මාගේ එඬේරුන් සහ නුඹේ එඬේරුන් අතරෙහිද ඩබරයක් නොවේවා; මක්නිසාද අපි සහෝදරයෝය. මුළු දේශය නුඹ ඉදිරියෙහි තිබෙනවා නොවේද? මා කෙරෙන් වෙන්ව යනලෙස නුඹෙන් ඉල්ලමි. නුඹ වම් දෙසට යන්නෙහි නම්, මම දකුණු දෙසට යන්නෙමි; නුඹ දකුණු දෙසට යන්නෙහි නම්, මම වම් දෙසට යන්නෙමි.”—උත්පත්ති 13:8, 9.

වැඩිමලා හැටියට ආබ්‍රහම්ට තමන්ට රිසි සේ දේවල් මෙහෙයවන්න තිබුණා. එමෙන්ම ලොත් ඔහුගේ මාමාට ගෞරව කිරීමක් හැටියට, තේරීම ආබ්‍රහම්ට දෙන්න තිබුණා. ඒ වෙනුවට, “ලොත් ඇස් ඔසවා බලා යොර්දානේ මුළු සමභූමිය හැම තැනම ජල සම්පන්නව තිබෙන බව දුටුවේය. [යෙහෝවා] සොදොම සහ ගොමොරා විනාශකරන්ට පළමුවෙන් ඒක ශොවර් දෙසට [යෙහෝවාගේ] උයන මෙන්ද මිසර දේශය මෙන්ද වූයේය. එවිට ලොත් යොර්දානේ මුළු සමභූමිය [තෝරාගත්තේය].” එවැනි තේරීමක් ඇතුව, ලොත් සර්ව ශුභවාදී වීමට සෑම හේතුවක්ම තිබුණා. නමුත් ආබ්‍රහම් සම්බන්ධයෙන් කුමක්ද?—උත්පත්ති 13:10, 11.

ආබ්‍රහම් මෝඩ එඩිතරකමක් දක්වමින් ඔහුගේ පවුල අවදානමේ හෙළමින් සිටියාද? නැහැ. ආබ්‍රහම්ගේ ඒකාන්ත ආකල්පය සහ ත්‍යාගශීලී ආත්මය මහත් විපාක ලැබුවා. යෙහෝවා ආබ්‍රහම්ට මෙසේ කිව්වා: “නුඹේ ඇස් ඔසවා නුඹ සිටින ස්ථානයේ සිට උතුරද දකුණද නැගෙනහිරද බස්නාහිරද දෙස බලන්න. මක්නිසාද නුඹ දක්නාවූ මුළු දේශය නුඹටද නුඹේ වංශයටද සදාකාලයටම දෙන්නෙමි.”—උත්පත්ති 13:14, 15.

ආබ්‍රහම්ගේ සර්ව ශුභවාදය සඳහා මුළාවෙන් තොර පදනමක් තිබුණා. එය පදනම් වුණේ, “පොළොවේ සියලු පවුල් [ආබ්‍රහම්] කරණකොටගෙන ආශීර්වාද [ලබන]” පිණිස, ආබ්‍රහම් ලවා මහත් ජාතියක් සාදන්න යනවා කියන දෙවිගේ පොරොන්දුව මතයි. (උත්පත්ති 12:2-4, 7) “[දෙවිට] ප්‍රේමකරන්නන්ට, එනම් [ඔහුගේ] අභිප්‍රාය ලෙස කැඳවනු ලැබූවන්ට, සියලු දේම යහපත පිණිස එකට ක්‍රියාකරන” බව දැනගෙන, විශ්වාස කිරීමට අපටත් හේතුවක් තිබෙනවා.—රෝම 8:28.

සර්ව ශුභවාදී ඔත්තුකාරයන් දෙදෙනා

අවුරුදු 400කට වඩා වැඩි කාලයකට පසු, ඉශ්‍රායෙල් ජාතිය “කිරි සහ මීපැණි ගලායන්නාවූ [දේශයක්]” වූ කානාන් දේශයට ඇතුල් වෙන්න සූදානමින් සිටියා. (නික්මයාම 3:8; ද්විතීය කථාව 6:3) ‘දේශය සෝදිසි කරන පිණිසත් ඔවුන් විසින් යා යුතු මාර්ගයද පැමිණිය යුතු නුවරවල්ද ගැන හැරී ඇවිත් දන්වන පිණිසත්’ මෝසෙස් අධිපතීන් 12දෙනෙකුට බලපැවරුවා. (ද්විතීය කථාව 1:22; ගණන් කථාව 13:2) ඔත්තුකාරයන් 12දෙනාම දේශයේ සශ්‍රීකත්වය ගැන ඔවුන්ගේ විස්තර කිරීමේදී එකාවන්ව සිටියත්, දසදෙනෙක් ජනයාගේ හෘදවල භයක් පැලපදියම් කරමින් සර්ව අශුභවාදී වාර්තාවක් සැපයුවා.—ගණන් කථාව 13:31-33.

අනිත් අතට, යෝෂුවා සහ කාලෙබ්, ජනයාට සර්ව ශුභවාදී පණිවිඩයක් දුන් අතර, ඔවුන්ගේ බිය දුරු කිරීමට කළ හැකි සැමෙකක්ම කළා. ඔවුන්ගේ ආකල්පය සහ වාර්තාව, පොරොන්දු දේශයට ඔවුන්ව නැවත පැමිණවීම ක්‍රියාත්මක කිරීමට යෙහෝවාගේ වචනයට ඇති හැකියාව ගැන පූර්ණ විශ්වාසය පිළිබිඹු කළා.—නමුත් කිසි පලක් වුණේ නැහැ. ඒ වෙනුවට, “මුළු සභාව ගල්ගසා ඔවුන් මරන්ට” කිව්වා.—ගණන් කථාව 13:30; 14:6-10.

යෙහෝවා කෙරෙහි විශ්වාසය තබන්න කියා මෝසෙස් ඉතා ඕනෑකමින් ජනයාගෙන් ඉල්ලා සිටියත්, ඇහුම්කන් දීම ඔවුන් ප්‍රතික්ෂේප කළා. ඔවුන්ගේ සර්ව අශුභවාදී ආකල්පයේ ඔවුන් මුරණ්ඩු ලෙස ඇලී ගැලී සිටි නිසා, මුළු ජාතියටම අවුරුදු 40ක් කාන්තාරයේ ඔබ මොබ යන්න සිදු වුණා. ඔත්තුකාරයන් 12දෙනාගෙන්, සර්ව ශුභවාදයේ විපාක අද්දැක්කේ යෝෂුවා සහ කාලෙබ් විතරයි. මූලික ගැටලුව? ජනයා ඔවුන්ගේම ප්‍රඥාවට යොමුවීම හේතුවෙන් දැක්වූ ඇදහිල්ලේ ඌනතාවයි.—ගණන් කථාව 14:26-30; හෙබ්‍රෙව් 3:7-12.

යෝනාගේ දෙගිඩියාව

යෝනා ජීවත් වුණේ පො.යු.පෙ. නවවන ශතවර්ෂයෙයි. දෙවන යෙරොබොවම් රජ කාලයේ, ඉශ්‍රායෙල්හි දස-ගෝත්‍රීය රාජ්‍යය කෙරෙහි පත් කළ යෙහෝවාගේ විශ්වාසවන්ත ප්‍රොපේතවරයෙක් හැටියට බයිබලය ඔහුව සඳහන් කරනවා. නමුත්, නිනිවයට ගොස් එහි ජනයාට අනතුරු ඇඟවීමේ බලපැවරුම පිළිගැනීම ඔහු ප්‍රතික්ෂේප කළා. ඉතිහාසඥ ජොසීෆස් කියන විදිහට එහි යනවාට වඩා, ඉන් “ලිස්සා යෑම වඩා හොඳයයි සිතූ” යෝනා මේ අනුව, යොප්පාවට ගොස්, එහි සිට තර්ෂිෂ් වෙත—බොහෝවිට වර්තමානයේ ස්පාඤ්ඤය වෙත යන නැවකට නැඟුණා. (යෝනා 1:1-3) යෝනා තම පැවරුම කෙරෙහි එවන් සර්ව අශුභවාදී අදහසක් දැරුවේ ඇයි කියා යෝනා 4:2 විස්තර කරනවා.

යෝනා අවසානයේදී ඔහුගේ බලපැවරුම ඉටු කිරීමට එකඟ වුණත්, නිනිවයේ සෙනඟ පසුතැවිලි වූ විට, ඔහු කෝපාවිෂ්ට වුණා. යෝනාට සෙවණ ලබාගැනීමට සැපයූ ලබු වැල වියළා මරා දැමීමෙන් යෙහෝවා ඔහුට අනුකම්පාව පිළිබඳ මහඟු පාඩමක් ඉගැන්වූවා. (යෝනා 4:1-8) පැළය මැරීයෑම පිළිබඳ යෝනාගේ ශෝකය වඩා නිවැරදි ලෙස, “තමුන්ගේ දකුණතවත් වමතවත් නොදන්න” නිනිවයෙහි සිටින 1,20,000දෙනා වෙත යොමුවීමට අවශ්‍යව තිබුණා.—යෝනා 4:11.

යෝනාගේ අද්දැකීමෙන් අපට කුමක් ඉගෙනගත හැකිද? පරිශුද්ධ සේවය, කිසිම සර්ව අශුභවාදයකට ඉඩ දෙන්නේ නැහැ. අප යෙහෝවාගේ මඟ පෙන්වීම වටහාගන්නවා නම්, එමෙන්ම පූර්ණ විශ්වාසයෙන් එය අනුගමනය කරනවා නම්, අප සාර්ථකත්වය භුක්ති විඳින්න යනවා.—හිතෝපදේශ 3:5, 6.

විපත්ති මධ්‍යයෙහි සර්ව ශුභවාදය

“නපුරකරන්නන් නිසා කල නොකිරෙව” කියා දාවිත් රජ ප්‍රකාශ කළා. “අධර්මිෂ්ඨකම් කරන්නන්ට ඊර්ෂ්‍යා නොකරව.” (ගීතාවලිය 37:1) අදදින, අසාධාරණය සහ වංකකම අප වටේටම තිබෙන නිසා, එය ඇත්තෙන්ම ප්‍රඥාවන්ත උපදේශයක්.—දේශනාකාරයා 8:11.

අප අධර්මිෂ්ඨයන්ට ඊර්ෂ්‍යා නොකළත්, දුෂ්ට මනුෂ්‍යයන්ගේ අතින් අහිංසක අය දුක් විඳිනවා අප දකිද්දී හෝ අප සම්බන්ධයෙන් අසාධාරණ ලෙස ක්‍රියා කරද්දී, කාංසාවට පත්වීම දුෂ්කර දෙයක් නොවෙයි. එවන් අද්දැකීම්, බලාපොරොත්තු අඩු කර දැමීම හෝ සර්ව අශුභවාදී ආකල්පයක් වර්ධනය කරගැනීම සඳහා අපට හේතු වෙනවා වෙන්නත් ඉඩ තිබෙනවා. අපට ඒ ආකාරයට හැඟෙන විට අප කළ යුත්තේ කුමක්ද? මුලින්ම, තමාට කිසිදා ප්‍රතිඵල ලැබෙන්නේ නැහැ කියා දුෂ්ටයාට සන්සුන්ව සිතන්න හැකියාවක් නැති බව අප මනසේ තබාගත යුතුයි. ගීතාවලිය 37හි දෙවන පදය දිගින් දිගටම මෙසේ පවසනවා: “[දුෂ්ටයන්] තෘණ මෙන් වහාම කපනු ලබන්නෝය, නිල් පලා මෙන් වියළෙන්නෝය.”

ඊට අමතරව, අපට හරි දේ දිගටම කරමින්, සර්ව ශුභවාදීව, යෙහෝවා කෙරෙහි බලා සිටිය හැකියි. ‘නපුරෙන් ඉවත්ව යහපත්කම් කරමින් සදාකල් පැවතුව’ යයි ගීතිකාකරු දිගටම පවසනවා. මන්ද, ‘යෙහෝවා යුක්තියට ප්‍රිය වන්නේය.’—ගීතාවලිය 37:27, 28.

සැබෑ ශුභවාදය පවතී!

එසේනම් අපේ අනාගතය සම්බන්ධයෙන් කුමක්ද? “ඉක්මනින් වෙන්ට ඕනෑ දේවල්” සම්බන්ධයෙන් බයිබලයේ එළිදරව් පොත අපට පවසනවා. ඒවා අතර, යුද්ධය විස්තර කරන්නාවූ, ගිනි රතු පැහැති අසුපදවන්නෙක්, ‘පොළොවෙන් සමාදානය දුරු කිරීම’ අරඹනවා.—එළිදරව් 1:1; 6:4.

පළමුවන ලෝක සංග්‍රාමය පැවති අවදියේදී, එය අවසාන මහා යුද්ධය වෙන්න යන බවට බ්‍රිතාන්‍යයෙහි ජනප්‍රිය—සර්ව ශුභවාදී—මතයක් පැවතුණා. වර්ෂ 1916දී බ්‍රිතාන්‍ය රාජ්‍යතාන්ත්‍රික ඩේවිඩ් ලොයිඩ් ජෝර්ජ් වඩා යථාර්ථවාදීව සිටියා. ඔහු මෙසේ පැවසුවා: “මේ යුද්ධය ඊළඟ යුද්ධය වගේ, යුද්ධය අවසන් කරන යුද්ධයක්.” (ඇල අකුරු අපගේය.) ඔහු නිවැරදි වුණා. දෙවන ලෝක සංග්‍රාමය මහා ව්‍යසනය පිළිබඳ වඩා දරුණු ක්‍රම නිපදවීම වැඩි කළා විතරයි. අවුරුදු 50කට පසුව, තවමත් යුද්ධයට අවසානයක් පෙනෙන තෙක් මානයකවත් නැහැ.

එම එළිදරව් පොතේම සාගත, වසංගත සහ මරණය සංකේතවත් කරන වෙනත් අශ්වාරෝහකයන් පිළිබඳව අප කියවනවා. (එළිදරව් 6:5-8) ඒවා කාලවල ලකුණ පිළිබඳ තවත් අංගයන් වෙයි.—මතෙව් 24:3-8.

සර්ව අශුභවාදය සඳහා මේවා හේතූන්ද? කොහෙත්ම නැහැ; මන්ද, “සුදු අශ්වයෙක් සිටිනවා දුටිමි, ඌ පිට හුන් තැනැත්තාට දුන්නක් තිබුණේය; ඔටුන්නක්ද ඔහුට දෙනලද්දේය. ඔහු ජයගනිමින්ද ජයගන්න පිණිසද පිටත්ව ආවේය” කියාත් දර්ශනය විස්තර කරනවා. (එළිදරව් 6:2) මෙහිදී අප දකින්නේ ස්වර්ගීය රජෙක් හැටියට යේසුස් ක්‍රිස්තුස් සියලුම දුෂ්ටකම් ඉවත් කර, ලෝක ව්‍යාප්තව සාමය සහ එකඟත්වය පිහිටුවීම සඳහා ගමන් කිරීමයි.a

තනතුරට නියම රජු හැටියට, පොළොව මත සිටියදී යේසුස් ක්‍රිස්තුස් එම රාජ්‍යය සඳහා යාච්ඤා කරන්න තම ගෝලයන්ට ඉගැන්වූවා. සමහරවිට “පරමණ්ඩලයේ” හෝ ස්වාමීන්ගේ යාච්ඤාව කියන්න ඔබටත් උගන්වා තිබෙනවා විය හැකියි. දෙවිගේ රාජ්‍යය පැමිණීමටත්, ඔහුගේ කැමැත්ත ස්වර්ගයේ මෙන් මෙලොවේදීත් ඉෂ්ට වීමටත් අප එම යාච්ඤාවෙන් ඉල්ලා සිටිනවා.—මතෙව් 6:9-13.

වර්තමාන දේවල පිළිවෙළ එළලන්න උත්සාහ කරනවා වෙනුවට, යෙහෝවා තම මෙසියානු රජු වන යේසුස් ක්‍රිස්තුස් තුළින් ක්‍රියා කර එය සම්පූර්ණයෙන්ම ඉවත් කරන්න යනවා. එම හිඩස වැසීමට කරන්න යන දේ ගැන යෙහෝවා මෙසේ පවසනවා: “මම අලුත් අහසක්ද අලුත් පොළොවක්ද මවමි. පළමු දේ මතක් කරනු ලබන්නේවත් සිහිවෙන්නේවත් නැත.” ස්වර්ගීය රාජ්‍ය ආණ්ඩුව යටතේ, ජීවිතය සහ වැඩ නිබඳ ප්‍රීතියක් වෙන්න යන්නාවූ සාමකාමී, ප්‍රීතිමත් නිවසක් බවට මේ පොළොව පත් වෙන්න යනවා. “මා විසින් මවන දෙය ගැන සදාකාලේටම සතුටුව ප්‍රීතිවෙන්න” කියා යෙහෝවා කියනවා. “මාගේ තෝරාගත් අය තමුන්ගේ අත් වැඩ බොහෝ කල් භුක්ති විඳින්නෝය.” (යෙසායා 65:17-22) අනාගතය සඳහා ඔබේ අපේක්ෂාව එම නොවරදින පොරොන්දුව මත පදනම් කරගත්තොත්, සර්ව ශුභවාදී වීමට ඔබට සෑම හේතුවක්ම තිබෙන්න යනවා—දැනුත් සදාකාලයටත්!

[පාදසටහන]

[4වන පිටුවේ පින්තූරය]

එච්. ජී. වෙල්ස්

[හිමිකම් විස්තර]

Corbis-Bettmann