එළිදරව් පොත කියවීමෙන් සන්තෝෂය අත් කරගන්න

“මේ අනාගතවාක්‍යයේ වචන [කියවන්නාද] ඒවා අසන්නෝද එහි ලියනලද කාරණා පවත්වන්නෝද ආශීර්වාදලද්දෝය [සන්තෝෂවත්ය, NW].”—එළිදරව් 1:3.

1. ප්‍රේරිත යොහන් එළිදරව්ව ලියද්දී ඔහු මුහුණ දෙමින් සිටියේ කිනම් තත්වයන්වලටද? මේ දර්ශන වාර්තා කිරීමේ අරමුණ වූයේ කුමක්ද?

“යොහන් නම් මම . . . දෙවි ගැන කතා කිරීම නිසාද යේසුස් ගැන සාක්ෂිදැරීම නිසාද පත්මොස් නම් දිවයිනෙහි සිටියෙමි.” (එළිදරව් 1:9, NW) ප්‍රේරිත යොහන් එළිදරව් පොත ලිව්වේ එවන් තත්වයන් යටතේය. අධිරාජ්‍යයාට නමස්කාර කිරීම තදින්ම ක්‍රියාත්මක කරමින් ක්‍රිස්තියානීන්ට හිංසා පීඩා කළ රෝම අධිරාජ්‍යයා වූ ඩොමීෂන්ගේ පාලන සමයේදී (පො.යු. 81-96) යොහන්ව පත්මොස් දිවයිනට පිටුවහල් කර තිබූ බව විශ්වාස කරනවා. පත්මොස් දූපතේ සිටි කාලයේදී තමාට ලැබුණු දර්ශනමාලාව යොහන් වාර්තා කළා. ඔහු ඒවා විස්තර කළේ, මුල් කාලයේ සිටි ක්‍රිස්තියානීන්ව බියගැන්වීමට නොව, නමුත් ඔවුන් මුහුණ දෙමින් සිටි හා ඉදිරියේදී මුහුණ දීමට තිබූ පීඩා සැලකිල්ලට ගෙන ඔවුන්ව ශක්තිමත් කරමින් හා සැනසිල්ල ලබා දෙමින් දිරිමත් කිරීමටයි.—ක්‍රියා 28:22; එළිදරව් 1:4; 2:3, 9, 10, 13.

2. යොහන් හා ඔහුගේ සෙසු ක්‍රිස්තියානීන් සිටි තත්වය ගැන අදදින ක්‍රිස්තියානීන් උනන්දු විය යුත්තේ ඇයි?

² මෙම බයිබල් පොත ලියනු ලැබූ තත්වයන් අදදින සිටින ක්‍රිස්තියානීන්ට සුවිශේෂ වැදගත්කමකින් යුක්තයි. යොහන් යෙහෝවාගේ සහ ඔහුගේ පුත් ක්‍රිස්තුස් යේසුස්ගේ සාක්ෂිකරුවෙක් වූ නිසා හිංසා පීඩාවලට මුහුණ දුන්නා. යහපත් පුරවැසියන් හැටියට ජීවත් වීමට වෑයම් කරමින් සිටියත් අධිරාජ්‍යයාට නමස්කාර කිරීම ඔවුන්ට කළ නොහැකි දෙයක් වූ නිසා යොහන් හා ඔහුගේ සෙසු ක්‍රිස්තියානීන් ජීවත් වෙමින් සිටියේ නොයෙකුත් විරුද්ධවාදිකම් මැදයි. (ලූක් 4:8) අදදින සමහර රටවල වෙසෙන ක්‍රිස්තියානීන් ඒ හා සමාන තත්වයන්වලට මුහුණ දෙනවා; මෙවන් රටවල “ආගමික වශයෙන් පිළිගත යුතු දෙය” කුමක්ද කියා විග්‍රහ කිරීමේ අයිතිය තිබෙන්නේ ආණ්ඩුවටයි. එළිදරව් පොතේ හැඳින්වීමෙහි සඳහන් මෙම වචන මොනතරම් සැනසිලිදායකද! “මේ අනාගතවාක්‍යයේ වචන [කියවන්නාද] ඒවා අසන්නෝද එහි ලියනලද කාරණා පවත්වන්නෝද ආශීර්වාදලද්දෝය [සන්තෝෂවත්ය, NW]. මක්නිසාද කාලය ළඟය.” (එළිදරව් 1:3) ඔව්, එළිදරව් පොතෙහි පවසන දේවලට සාවධානව සිටිමින් ඒවාට කීකරු වන අය සැබෑ සන්තෝෂය හා බොහෝ ආශීර්වාද අත් කරගන්න යනවා.

3. යොහන්ට දුන් එළිදරව්වේ ප්‍රභවය කවුද?

³ එළිදරව්වේ සඳහන් තොරතුරුවල ප්‍රභවය කවුද? එමෙන්ම ඒවා දැනුම් දීම සඳහා යොදාගන්න මාධ්‍යය කුමක්ද? ආරම්භක වගන්තිය අපිට මෙසේ පිළිතුරු සපයනවා: ‘ඉක්මනින් වෙන්ට ඕනෑ දේවල්, එනම් දෙවි තමන්ගේ දාසයන්ට දක්වන පිණිස යේසුස් ක්‍රිස්තුස්ට දුන්නාවූ යේසුස් ක්‍රිස්තුස්ගේ එළිදරව් කිරීමය. ඔහු තමන් දූතයා කරණකොටගෙන තමන් මෙහෙකරුවූ යොහන්ට එය දන්වා එව්වේය.’ (එළිදරව් 1:1) සරලව කියනවා නම්, එළිදරව්වේ සැබෑ ප්‍රභවය යෙහෝවා දෙවියි; ඔහු එය යේසුස්ට දුන් අතර, යේසුස් එය දේවදූතයෙකු මගින් යොහන්ට දැන්නුවා. තවදුරටත් මේ ගැන පරීක්ෂා කරබැලීමේදී පෙනී යන්නේ, සභාවලට පණිවිඩ ලබා දීමට හා යොහන්ට දර්ශන ලබා දීමට යේසුස් ශුද්ධාත්මයද යොදාගත් බවයි.—එළිදරව් 2:7, 11, 17, 29; 3:6, 13, 22; 4:2; 17:3; 21:10; ක්‍රියා 2:33 සසඳන්න.

4. පොළොව මත සිටින තම සෙනඟට මඟ පෙන්වීම සඳහා යෙහෝවා අදදින යොදාගන්නා මාධ්‍යය කුමක්ද?

⁴ පොළොව මත සිටින තම සේවකයන්ට ඉගැන්වීම සඳහා යෙහෝවා “සභාවේ හිසව” සිටින ඔහුගේ පුත්‍රයාව තවමත් යොදාගන්නවා. (එපීස 5:23; යෙසායා 54:13; යොහන් 6:45) යෙහෝවා ඔහුගේ සෙනඟට ඉගැන්වීම සඳහා ඔහුගේ ආත්මයද යොදාගන්නවා. (යොහන් 15:26; 1 කොරින්ති 2:10) පළමු සියවසේ සභාවලට ආත්මික ආහාර සැපයීම සඳහා ‘තමාගේ මෙහෙකරුවා වූ යොහන්ව’ යොදාගත්තාක් මෙන්, අදදින ඔහුගේ ගෙවැසියන්ට හා ඔවුන් සමඟ ඇසුරු කරන අයට “නියම වේලාවට” ආත්මික ආහාර ලබා දීමට පොළොව මත සිටින ඔහුගේ ආලේප ලත් “සහෝදරයන්ගෙන්” සමන්විත “විශ්වාසවූ නුවණ ඇති [දාසයාව]” යේසු යොදාගන්නවා. (මතෙව් 24:45-47; 25:40) ආත්මික ආහාර ලෙස අපි ලබන ‘යහපත් දීමනාවල’ ප්‍රභවය හා ඔහු යොදාගනිමින් තිබෙන මාධ්‍යය හඳුනාගන්න අය සන්තෝෂවත්ය.—යාකොබ් 1:17.

ක්‍රිස්තුස්ගේ මඟ පෙන්වීම ලබන සභා

5. (අ) ක්‍රිස්තියානි සභා හා ඒවායේ සේවය කරන අවේක්ෂකයන්ව සමාන කර තිබෙන්නේ කුමකටද? (ආ) මිනිස් අසම්පූර්ණකම් තිබුණත්, අපේ සන්තෝෂයට දායක වන්නේ කුමක්ද?

⁵ එළිදරව්වේ ආරම්භක පරිච්ඡේදවල ක්‍රිස්තියානි සභා පහන් රුක්වලට සමාන කර තිබෙනවා. එම සභාවල අවේක්ෂකයන්ව දූතයන්ට (පණිවිඩකරුවන්ට) හා තාරකාවලට සමාන කර තිබෙනවා. (එළිදරව් 1:20)a ක්‍රිස්තුස් තමා ගැනම කතා කරමින්, යොහන්ට මෙසේ ලියන්න කියා පැවසුවා: “තමන් දකුණතෙහි තාරකා සත දරන්නාවූද, රන් පහන් රුක් සත මැද සක්මන්කරන්නාවූද [තැනැත්තා] මේ කාරණා [කියන්නේය].” (එළිදරව් 2:1) ආසියානු සභා සතට යවන ලද පණිවිඩ සතෙන් පැහැදිලි වන්නේ, පළමු සියවසේ තිබූ සභාවල හා ඒවායේ සේවය කළ වැඩිමහල්ලන්ට යහපත් මෙන්ම දුර්වල ගතිලක්ෂණ තිබූ බවයි. අදදිනත් මෙය සැබෑවක්. එනිසා අපේ නායකයා වන ක්‍රිස්තුස් සභාවල් අධීක්ෂණය කරමින් සිටින බව කවදාවත් අමතක නොකරනවා නම් අපි වැඩි ප්‍රීතියක් අද්දකින්න යනවා. සිදු වන්නේ මොනවාද කියා ඔහු හරියටම දන්නවා. සංකේතාත්මක ලෙස අවේක්ෂකයන් සිටින්නේ ‘ඔහුගේ දකුණතෙහියි,’ එනම් ඔහුගේ පාලනය හා මඟ පෙන්වීම යටතෙයි; ඒ වගේම ඔවුන් සභාවල එඬේරකම් කරන ආකාරය ගැන ඔහුට ගණන් දිය යුතුයි.—ක්‍රියා 20:28; හෙබ්‍රෙව් 13:17.

6. ක්‍රිස්තුස්ට ගණන් දිය යුත්තේ අවේක්ෂකයන් පමණක් නොවන බව පැහැදිලි වන්නේ කුමකින්ද?

⁶ තමන්ගේ ක්‍රියා සඳහා ක්‍රිස්තුස්ට ගණන් දිය යුත්තේ අවේක්ෂකයන් පමණයි කියා අපි සිතනවා නම්, එය අපවම රවටාගැනීමක් වෙනවා. තමාගේ එක් පණිවිඩයක ක්‍රිස්තුස් මෙසේ පැවසුවා: “මා වනාහි අදහස්ද හෘදයන්ද විමසන තැනැත්තා බව සියලු සභාවෝ දැනගන්නාහුය. මම නුඹලා එක් එක්කෙනාට නුඹලාගේ ක්‍රියා හැටියට දෙන්නෙමි.” (එළිදරව් 2:23) මෙම ප්‍රකාශය අනතුරු ඇඟවීමක් මෙන්ම දිරිගැන්වීමක්ද වෙනවා; අපේ හදවත්වල මුල්බැසගෙන තිබෙන චේතනා ක්‍රිස්තුස් දන්න නිසා එය අනතුරු ඇඟවීමක් වන අතර, අපි දරන වෑයම් ක්‍රිස්තුස් දැන සිටින බවත් අපිට කළ හැකි දෙය කරනවා නම් ඔහු අපිට ආශීර්වාද කරන බවත් එයින් සහතික කරන නිසා එය දිරිගැන්වීමක්ද වෙනවා.—මාර්ක් 14:6-9; ලූක් 21:3, 4.

7. පිලදෙල්පියාවේ ක්‍රිස්තියානීන් ‘යේසුස්ගේ විඳදරාගැනීමේ වචනය’ රක්ෂා කළේ කෙසේද?

⁷ ලිදියාවේ පිලදෙල්පියා නගරයේ පිහිටි සභාවට යවන ලද ක්‍රිස්තුස්ගේ පණිවිඩයෙහි කිසිම හික්මවීමක් අඩංගු නොවුණත්, අපේ ඉමහත් උනන්දුවට ලක් විය යුතු පොරොන්දුවක් එහි ඇතුළත් වෙනවා. “මාගේ ඉවසීමේ [විඳදරාගැනීමේ, NW] වචනය නුඹ රක්ෂාකළ හෙයින් පොළොවේ වසන්නන් පරීක්ෂාකිරීමට මුළු ලෝකය පිටට පැමිණෙන්ට තිබෙන්නාවූ පරීක්ෂාවේ පැයෙන් මමත් නුඹ ආරක්ෂාකරන්නෙමි.” (එළිදරව් 3:10) ‘මාගේ විඳදරාගැනීමේ වචනය රක්ෂා කළා’ යනුවෙන් පරිවර්තනය කර තිබෙන ග්‍රීක් වාක්‍ය ඛණ්ඩයෙන් “විඳදරාගැනීම සම්බන්ධයෙන් මා පැවසූ දේවල් ක්‍රියාත්මක කළා” යන්නද අදහස් විය හැකියි. පිලදෙල්පියාවේ සිටි ක්‍රිස්තියානීන් ක්‍රිස්තුස්ගේ ආඥාවලට කීකරු වුණා පමණක් නොව, නමුත් ඇදහිලිවන්තව විඳදරාගන්න කියා ඔහු දුන් උපදේශයද අනුගමනය කළ බව 8වන වගන්තියේ සඳහන් දෙයින් ඇඟවෙනවා.—මතෙව් 10:22; ලූක් 21:19.

8. (අ) පිලදෙල්පියාවේ ක්‍රිස්තියානීන්ට යේසුස් දුන්නේ කිනම් පොරොන්දුවද? (ආ) අදදින ‘පරීක්ෂාවේ පැය’ බලපාන්නේ කාටද?

⁸ තමා ඔවුන්ව “පරීක්ෂාවේ පැයෙන්” ආරක්ෂා කරන බවත් යේසු පැවසුවා. එවකට සිටි ක්‍රිස්තියානීන් සම්බන්ධයෙන් එයින් අදහස් කළ දෙය අපි දන්නේ නැහැ. පොදු යුගයේ 96දී සිදු වූ ඩොමීෂන්ගේ මරණයෙන් පසු, හිංසා පීඩා කෙටි කලකට නතර වී තිබුණත්, (පො.යු. 98-117 දක්වා පැවති) ට්‍රාජන්ගේ පාලනය යටතේ තත්වය තවත් දරුණු අතට හරවමින් නව පීඩා රැල්ලක් හමා යන්න පටන්ගත්තා. නමුත් මහත් ‘පරීක්ෂාවේ පැය’ සිදු වන්නේ, දැන් අපි ජීවත් වෙන “අන්තිම කාලය” වන ‘ස්වාමීන්ගේ දවසේදීය.’ (එළිදරව් 1:10; දානියෙල් 12:4) ආත්මයෙන් අභිෂේක ලත් ක්‍රිස්තියානීන් පළමු ලෝක මහා යුද්ධය පැවති කාලයේදී හා එහි අවසානයත් සමඟම පරීක්ෂාවේ විශේෂ කාලයකට මුහුණ දුන්නා. නමුත්, ‘පරීක්ෂාවේ පැය’ තවමත් ක්‍රියාත්මක වෙනවා. මහත් පීඩාවෙන් බේරී ජීවත් වීමට බලාපොරොත්තු වන මහත් සමූහයට අයත් වන දශලක්ෂ ගණන්දෙනා ඇතුළුව ‘මුළු ලෝකයටම’ එය බලපානවා. (එළිදරව් 3:10; 7:9, 14) “අන්තිමය දක්වා ස්ථිරව [විඳදරාගෙන, NW] සිටින්නාම ගැළවෙන්නේය” යනුවෙන් ‘යේසුස් පැවසූ දෙය අපි රක්ෂා කරනවා’ නම් අපි සන්තෝෂවත් අය වෙන්න යනවා.—මතෙව් 24:13.

යෙහෝවාගේ පරමාධිපත්‍යයට සන්තෝෂයෙන් යටත් වීම

9, 10. (අ) යෙහෝවාගේ සිංහාසනය පිළිබඳ දර්ශනය අපිට බලපෑ යුත්තේ කිනම් ආකාරවලින්ද? (ආ)එළිදරව්ව කියවීම අපේ සන්තෝෂයට දායක වන්නේ කෙසේද?

⁹ හතරවන හා පස්වන පරිච්ඡේදවල විස්තර කරන යෙහෝවාගේ සිංහාසනය හා ඔහුගේ ස්වර්ගික මාළිගාව පිළිබඳ දර්ශනය අප තුළ ගරුබියක් ඇති කළ යුතුයි. බලසම්පන්න ස්වර්ගික මැවිලි යෙහෝවාගේ ධර්මිෂ්ඨ පරමාධිපත්‍යයට සතුටින් යටත් වෙමින් ඔවුන්ගේ හදවතින්ම කරන ප්‍රශංසාත්මක ප්‍රකාශයන් අපේ හදවතට තදින් කාවැදිය යුතුයි. (එළිදරව් 4:8-11) මේ වදන් පවසන අයගේ හඬට අපේ හඬත් එක් කළ යුතුයි: ‘සිංහාසනයෙහි සිටින තැනැත්තාටත් බැටළුපැටවාටත් ප්‍රශංසාවද ගෞරවයද මහිමයද පරාක්‍රමයද සදාකාලේටම වේවා.’—එළිදරව් 5:13.

¹⁰ මෙයින් ප්‍රායෝගිකව අපට අදහස් කරන්නේ සෑම අවස්ථාවකදීම යෙහෝවාගේ කැමැත්ත කිරීමට අප සතුටින් යටත් විය යුතු බවයි. ප්‍රේරිත පාවුල් මෙසේ ලිව්වා: “නුඹලා වචනයෙන් හෝ ක්‍රියාවෙන් හෝ මොකක්කරතත්, සියල්ලම ස්වාමීවූ [යේසුස්ගේ] නාමයෙන් කරමින්, [ඔහු] කරණකොටගෙන පියවූ [දෙවිට] ස්තුතිකරන්න.” (කොලොස්සි 3:17) අපේ මනස්වල හා හදවත්වල ඇතුළාන්ත හැඟීම්වලින් යෙහෝවාගේ පරමාධිපත්‍යය පිළිගෙන, අපේ ජීවිතයේ හැම අංගයකදීම ඔහුගේ කැමැත්ත සැලකිල්ලට ගන්නවා නම්, එළිදරව්ව කියවීමෙන් අපි සැබවින්ම සතුටක් ලබන්න යනවා.

11, 12. (අ) සාතන්ගේ භූමික පිළිවෙළ සොලවා විනාශ කරන්න යන්නේ කෙසේද? (ආ) එළිදරව් 7වන පරිච්ඡේදයෙහි සඳහන් ආකාරයට ඒ කාලයේදී ‘මුහුණ දෙන්න පුළුවන්’ කාටද?

¹¹ පෞද්ගලිකව මෙන්ම සාමූහික වශයෙන් සන්තෝෂය භුක්ති විඳීම සඳහා තිබෙන පදනම, යෙහෝවාගේ පරමාධිපත්‍යයට සතුටින් යටත් වීමයි. ඉතා ඉක්මනින් සංකේතාත්මක මහා භූමිකම්පාවක් මගින් සාතන්ගේ ලෝක ක්‍රමය හා එහි හැම පදනමක්ම සෙලවී විනාශ වෙන්න යනවා. දෙවිට හිමි විය යුතු පරමාධිපත්‍යය නියෝජනය කරන ක්‍රිස්තුස්ගේ ස්වර්ගික රාජ්‍යයේ පාලනයට යටත් වීම ප්‍රතික්ෂේප කරන මිනිසුන්ට ආරක්ෂා වීමට කිසිම ස්ථානයක් තිබෙන්න යන්නේ නැහැ. අනාවැකියේ මෙසේ සඳහන් වෙනවා: “පොළොවේ රජවරුද උත්තමයෝද සේනාපතියෝද ධනවන්තයෝද බලවන්තයෝද සියලු දාසයෝද නිර්දාසයෝද කඳුවල ගුහාවලත් පර්වතවලත් සැඟවුණෝය; ඔව්හු කඳුවලටත් පර්වතවලටත් කථාකොට: අප පිට වැටී, සිංහාසනයෙහි වැඩඉන්න [තැනැත්තාගේ] මුහුණ ඉදිරියෙනුත් [බැටළු පැටවාගේ] උදහසිනුත් අප සඟවාගන්න. මක්නිසාද [ඔහුගේ] උදහසේ මහත් දවස පැමුණුණ බැවින් සිටින්ට [මුහුණ දෙන්න, NW] පුළුවන් කාටදැයි කීවෝය.”—එළිදරව් 6:12, 15-17.

¹² එම ප්‍රශ්නය සම්බන්ධයෙන් ප්‍රේරිත යොහන් ඊළඟ පරිච්ඡේදයේ ‘මහත් පීඩාව මැදින් එන’ ‘සිංහාසනය ඉදිරියෙහිත් බැටළුපැටවා ඉදිරියෙහිත්’ සිටින මහත් සමූහයට අයත් වන අය ගැන විස්තර කරනවා. (එළිදරව් 7:9, 14, 15) ඔවුන් දෙවිගේ සිංහාසනය ඉදිරියෙහි සිටීමෙන් පෙනෙන්නේ, ඔවුන් එම සිංහාසනය, නැත්නම් එම පාලනයේ වලංගුතාව පිළිගෙන යෙහෝවාගේ පරමාධිපත්‍යයට සම්පූර්ණයෙන්ම යටත් වන බවයි. මේ නිසා ඔවුන් අනුමැතිය ලත් තත්වයකයි සිටින්නේ.

13. (අ) පොළොවේ වසන්නන්ගෙන් බහුතරයක් නමස්කාර කරන්නේ කුමකටද? ඔවුන්ගේ නළලේ හා අතේ ලකුණෙන් සංකේතවත් කරන්නේ කුමක්ද? (ආ) විඳදරාගැනීම අවශ්‍ය වන්නේ ඇයි?

¹³ අනිත් අතට, 13වන පරිච්ඡේදය පොළොවේ වෙසෙන සෙසු ජනයාව විස්තර කරන්නේ, වන මෘගයෙකු මගින් සංකේතවත් කරන සාතන්ගේ දේශපාලනික ක්‍රමයට නමස්කාර කරන්නන් ලෙසයි. තමන්ගේ අදහස්වලින් හා ක්‍රියාවලින් එම ක්‍රමයට සහයෝගය දක්වන බව පෙන්වමින් මොවුන් ඔවුන්ගේ “නළලේ” හෝ ‘අතේ’ ලකුණක් ලබාගනියි. (එළිදරව් 13:1-8, 16, 17) අනතුරුව 14වන පරිච්ඡේදයේ තවදුරටත් මෙසේ පවසනවා: “යමෙක් මෘගයාටත් උගේ රූපයටත් නමස්කාරකර, ඔහුගේ නළලේවත් අතේවත් ලකුණක් ලබන්නේද, ඔහුත් [දෙවිගේ] කෝපය නැමති කුසලානට අමිශ්‍රව වත්කරනලද [ඔහුගේ] උදහස නැමති මුද්‍රිකපානය බොන්නේය; . . . මෙහි [දෙවිගේ] ආඥාද [යේසුස්] කෙරෙහි ඇදහිල්ලද රක්ෂාකරන්නාවූ ශුද්ධවන්තයන්ගේ ඉවසීම ඇත්තේය.” (එළිදරව් 14:9, 10, 12) කාලය ගතවීමත් සමඟ මෙම ප්‍රශ්නය පැනනඟයි: ඔබ සහයෝගය දක්වන්නේ කාටද? යෙහෝවාට හා ඔහුගේ පරමාධිපත්‍යයටද නැත්නම් වන මෘගයාගෙන් සංකේතවත් කරන අභක්තික දේශපාලනික ක්‍රමයටද? වන මෘගයාගේ ලකුණ ලබාගැනීම ප්‍රතික්ෂේප කරන්නාවූද, යෙහෝවාගේ පරමාධිපත්‍යයට යටත් වීමේදී ඇදහිලිවන්තව විඳදරාගන්නාවූද අය සන්තෝෂවත්ය.

14, 15. ආර්මගෙදොන් ගැන කරන විස්තරය අතරමැද ඉදිරිපත් කරන්නේ කුමන පණිවිඩයද? එයින් අපිට අදහස් කරන්නේ කුමක්ද?

¹⁴ වාදයට ලක් වූ පරමාධිපත්‍යය පිළිබඳ විෂය සම්බන්ධයෙන් යෙහෝවා සමඟ සටනට පිවිසෙමින් “මුළු ලෝකයේ” පාලකයන් ගැටුමකට අර අදියි. “සර්වපරාක්‍රමවූ [දෙවිගේ] මහත් දවසේ යුද්ධය” වන අර්මගෙදොන් අවසන් සටනයි. (එළිදරව් 16:14, 16) යෙහෝවා සමඟ යුද්ධ කිරීමට පොළොවේ පාලකයන්ව එක්රැස් කිරීම ගැන කරන විස්තරය අතරතුර කුතුහලය දනවනසුලු අමතර ප්‍රකාශයක් ලෙස යේසුස්ම දර්ශනයට පිවිසෙමින් මෙසේ පවසයි: ‘බලව, මම සොරෙකු මෙන් එමි. නග්නව ඇවිද තමාගේ ලජ්ජාව මනුෂ්‍යයන්ට නොපෙනෙන පිණිස අවදිව සිට තමාගේ වස්ත්‍ර ආරක්ෂා කරගන්නා [සන්තෝෂවත් කෙනෙකි, NW].’ (එළිදරව් 16:14, 15) මෙයින් වක්‍රව යොමු දක්වන්නේ දේවමාළිගාව මුර කළ ලෙවීවරුන්ට විය හැකියි; ඔවුන් මුර කරමින් තමන්ගේ රාජකාරිය ඉටු කරන අතරේ නිදාගෙන සිට අසු වුණොත්, ඔවුන්ගේ ඇඳුම් ගළවා ඔවුන්ව ප්‍රසිද්ධියේ අවමානයට පත් කළා.

¹⁵ මෙයින් ලබා දෙන පණිවිඩය පැහැදිලියි: අපි අර්මගෙදොනෙන් බේරී ජීවත් වන්න කැමති නම්, අපි ආත්මිකව අවදිව සිටිමින්, අපව යෙහෝවාගේ ඇදහිලිවන්ත සාක්ෂිකරුවන් හැටියට හඳුන්වා දෙන සංකේතමය වස්ත්‍රය දිගටම පැළඳ සිටිය යුතුයි. ආත්මිකව උදාසීන තත්වයකට පත් නොවී, අත් නෑර දිගටම ස්ථාපිත කර තිබෙන දෙවිගේ රාජ්‍යය පිළිබඳ “සදාකාල ශුභාරංචි” පතුරුවාහැරීමෙහි ජ්වලිතව හවුල් වෙනවා නම් අපි සන්තෝෂය භුක්ති විඳින්න යනවා.—එළිදරව් 14:6.

‘මේ වචන රක්ෂා කරන්නෝ සන්තෝෂවත්ය’

16. එළිදරව්වේ අවසන් පරිච්ඡේද සන්තෝෂ වීම සඳහා විශේෂ හේතුවක් සපයන්නේ ඇයි?

¹⁶ එළිදරව් පොත කියවීමෙන් සතුටක් ලබන අය අපේ තේජවත් බලාපොරොත්තුව ගැන විස්තර කරන එහි අවසන් පරිච්ඡේද කියවද්දී උතුරා යන ප්‍රීතියක් අද්දැකිය හැකියි. අපේ තේජවත් බලාපොරොත්තුව වන්නේ, අලුත් අහස සහ අලුත් පොළොවයි; එනම් පවිත්‍ර කරන ලද මිනිස් සමාජයක් පාලනය කරන ධර්මිෂ්ඨ ස්වර්ගික ආණ්ඩුවක්. මේ සියල්ලම සිදු වන්නේ ‘සර්වපරාක්‍රම වූ යෙහෝවා දෙවිට’ ප්‍රශංසාව සඳහායි. (එළිදරව් 21:22) මවිතකර දර්ශන මාලාව නිම වෙද්දී, දේවදූතයා යොහන්ට මෙසේ පැවසුවා: ‘මේ වචන විශ්වාසය, සැබෑය. ටික කලකින් සිදු වන්ට ඕනෑ දේ තමන්ගේ මෙහෙකරුවන්ට පෙන්වන පිණිස අනාගතවක්තෘවරුන්ගේ [ආනුභාව ලත් ප්‍රකාශවල, NW] දෙවි වූ යෙහෝවා තමන් දූතයා එව්වේය. මෙන්න, ඉක්මනින් එමි. මේ පොතේ අනාගතවාක්‍යයේ වචන රක්ෂාකරන්නා [සන්තෝෂවත්, NW] කෙනෙකි.’ (එළිදරව් 22:6, 7)

17. (අ) එළිදරව් 22:6හි දෙනු ලබන්නේ කුමන සහතිකයද? (ආ) අපි සුපරීක්ෂාකාරි විය යුත්තේ කුමකින් වැළකී සිටීමටද?

¹⁷ මීට සමාන වචන “හකුලන ලද ලියවිල්ල, [NW]” ආරම්භයේදී සඳහන් වන බව එළිදරව්ව කියවීමෙන් සතුටක් ලබන අයට මතක් වෙයි. (එළිදරව් 1:1, 3) බයිබලයේ මෙම අවසාන පොතෙහි පුරෝකථනය කර තිබෙන සෑම ‘දෙයක්ම’ ‘ටික කලකින් සිදු වන්න’ යන බව එම වදන් මගින් අපිට සහතික කරනවා. අපි ජීවත් වෙන්නේ අන්තිම කාලයේ මොනතරම් අවසාන කෙළවරකද කියනවා නම්, එළිදරව්වෙහි පුරෝකථනය කර තිබෙන සිද්ධීන් වැඩි කල් නොගොස් විගස අනුපිළිවෙළකින් සිදු වන බවට කිසිම සැකයක් නැහැ. සාතන්ගේ පිළිවෙළේ ස්ථාවරබවක් පෙනෙන්න තිබුණත්, අපිව නිදිබර තත්වයකට ඇද දැමීමට එයට ඉඩ නොහැරිය යුතුයි. එළිදරව්ව කියවන සුපරීක්ෂාකාරි පාඨකයාට ආසියාවේ සභා සතට යවන ලද පණිවිඩවල අඩංගු අනතුරු ඇඟවීම් මතකයට නැඟෙන අතර, ද්‍රව්‍යවාදය, රූප නමස්කාරය, දුරාචාරය, ඇල්මැරුණුගතිය හා ඇදහිල්ල අත්හරින්නාවූ නිකායවාදය යනාදි උගුල්වලින් ඔහු ආරක්ෂා වෙන්න යනවා.

18, 19. (අ) යේසුස් ඉදිරියේදී එන්න අවශ්‍ය වන්නේ ඇයි? යොහන් ප්‍රකාශ කළ කුමන බලාපොරොත්තුවටද අප පංගුකාරයන් වන්නේ? (ආ) යෙහෝවා ඉදිරියේදී ‘එන්නේ’ කුමකටද?

¹⁸ එළිදරව් පොතෙහි යේසුස් මෙම ප්‍රකාශය කිහිප වතාවක් නිවේදනය කරනවා: ‘මම ඉක්මනින් එමි.’ (එළිදරව් 2:16; 3:11; 22:7, 20) මහා බබිලෝනියට, සාතන්ගේ දේශපාලනික ක්‍රමයට හා දැන් මෙසියානු රාජ්‍යය මගින් ප්‍රකාශිත යෙහෝවාගේ පරමාධිපත්‍යයට යටත් වීම ප්‍රතික්ෂේප කරන්නාවූ සියලුම මනුෂ්‍යයන්ට එරෙහිව ඔහු විනිශ්චය ක්‍රියාත්මක කරන්න එන්න නියමිතයි. ප්‍රේරිත යොහන් මෙසේ හඬ නඟා ප්‍රකාශ කළ වදන්වලට අපේ හඬත් එක් කරමු: ‘ආමෙන්, ස්වාමි වූ යේසුස් එන්න.’—එළිදරව් 22:20ආ.

¹⁹ යෙහෝවා මෙසේ ප්‍රකාශ කරයි: “මෙන්න, ඉක්මනින් එමි; එකිනෙකාට තම තමාගේ ක්‍රියාවේ හැටියට දෙන පිණිස මා සමඟ විපාක තිබේ.” (එළිදරව් 22:12) පොරොන්දු කරන ලද ‘අලුත් අහසෙහි’ හෝ ‘අලුත් පොළොවෙහි’ නිමක් නැති ජීවිතයක උතුම් විපාකය දෙස බලා සිටින අතරේ, අපි අවංක හදවත් ඇති මිනිසුන්ට මෙම ඇරයුම කිරීමෙහි ජ්වලිතව හවුල් වෙමු: ‘එන්න, පිපාසය ඇති කවුරු නමුත් එන්න. කැමති කෙනෙක් ජීවන-වතුර නොමිලයේ ගන්න.’ (එළිදරව් 22:17) ඔවුන්ද දේවානුභාවයෙන් ලියවුණු හැඟීම් දනවනසුලු එළිදරව් පොත කියවීමෙන් සතුටක් භුක්ති විඳීවා!

[පාදසටහන]

සලකා බැලීමට කරුණු

◻ එළිදරව්ව සැපයීම සඳහා යෙහෝවා යොදාගත් මාධ්‍යය කුමක්ද? අපට මෙයින් ඉගෙනගත හැක්කේ කුමක්ද?

◻ ආසියාවේ සභා සතට යවන ලද පණිවිඩ කියවීමට අපි සතුටු විය යුත්තේ ඇයි?

◻ ‘පරීක්ෂාවේ පැය’ අතරතුර අපිට ආරක්ෂාකාරිව සිටිය හැක්කේ කෙසේද?

◻ එළිදරව්වේ අඩංගු හකුළන ලද ලියවිල්ලේ වදන් අපි පැවැත්වුවොත් අපි භුක්ති විඳින්න යන්නේ කුමන ආකාරයේ සන්තෝෂයක්ද?

[15වන පිටුවේ පින්තූරය]

ශුභාරංචිවල ප්‍රභවය හඳුනාගන්න අය සන්තෝෂවත්ය

[18වන පිටුවේ පින්තූරය]

අවදිව සිටින තැනැත්තා සන්තෝෂවත්ය