දවි ප්‍රිය කරන සංගීතය

“විශිෂ්ටතම කලාවන් අතරින් පැරණිතම එක එයයි. ඒ වාගේම, එය තරම් මිනිස් ස්වභාවය හා බැඳුණු කලාවක් තවත් නැහැ” කියා සඳහන් කරමින් එක් තොරතුරු මූලාශ්‍රයක් සංගීතය හඳුන්වා දෙයි. ඔව්! ඇත්තෙන්ම මිනිසා හා සංගීතය අතර තිබෙන්නේ සදා නොමියෙන සබඳතාවක්යයි කිවහොත් කිසිවෙකු එයට විරුද්ධ නොවනු ඇත. භාෂාව හැසිරවීමට ඇති හැකියාව නිසා, සත්වයන්ට වඩා මිනිසා කැපීපෙනෙයි. එලෙසම සංගීතයද මිහිමත ජීවත් වන මිනිසාටම ආවේණික වූ උතුම් දායාදයකි. අපගේ හැඟීම් කෙරෙහි එය ඉමහත් බලපෑමක් කරයි. අපගේ සවනට වැකී හදවත ස්පර්ශ කිරීමට ගීතයකට හැකියාව ඇත. අපේ සිත මන්මත් කරවන එහි සුන්දරත්වය මැකී නොයන තරම්ය. එහෙත් මේ සියල්ලටම වඩා වැඩි යමක්ද සංගීතයෙන් ඉටු විය හැක. ඉන් දෙවිගේ සිත සතුටු කිරීමටත් හැකියි.

ඉශ්‍රායෙල්වරුන් සංගීතයට ප්‍රිය කළ බව බයිබලය පවසයි. “බයිබල් කාලවල සංගීතයට විශේෂ තැනක් හිමි වුණා” කියා උන්ගර්ගේ බයිබලය පිළිබඳ ශබ්දකෝෂය (ඉංග්‍රීසියෙන්) පැහැදිලි කරයි. සංගීත භාණ්ඩ වාදනය කිරීම හා ගීත ගැයීම තම නමස්කාරයේදී උපයෝගි කරගැනීම ඔවුන්ගේ දෛනික ජීවිතය හා තදින් බැඳී තිබිණ. ඔවුන්ගේ සංගීතයේදී, සංගීත භාණ්ඩවල නාදයටත් වඩා වැඩියෙන් අසන්ට ලැබුණේ මෙම නමස්කාර කරන්නන් හඬ නඟා ගී ගැයූ ආකාරයයි.

සිය පුත්‍ර සාලමොන් විසින් තැනීමට නියමිතව තිබූ දේවමාළිගාවේ ‘ගීතිකා මෙහෙයට’ ලෙවීවරුන් අතරින් කිහිපදෙනෙකුව දාවිත් කල් තියාම තෝරාගත්තේය. (1 ලේකම් 6:31, 32) යෙහෝවා ඉශ්‍රායෙලිතයන් සමඟ සිටි බවට විශේෂ සලකුණක් වූයේ ගිවිසුම් පෙට්ටියයි. එය යෙරුසලමට රැගෙන ආ සන්තෝෂවත් අවස්ථාවේදී ‘යෙහෝවාව වර්ණනා කිරීමටත් ඔහුට ස්තුති ප්‍රශංසා කිරීමටත්’ දාවිත් ලෙවීවරුන් කණ්ඩායමක් තෝරාගත්තේය. මොවුහු හඬ නඟා තම හදවතින්ම නික්මුණු ප්‍රශංසා ගී ගැයූ අතර, එම සංගීතය සඳහා ‘වීණාද, මහා වීණාද, අත්තල්ද, නළාද’ භාවිත කළහ. ‘යෙහෝවාගේ කරුණාව සදාකාලයටම පවතින’ හෙයින් ‘යෙහෝවාට මෙලෙස ස්තුති කිරීමේ’ වරප්‍රසාදය ලත් මෙම අයගේ නාම ලේඛනයක් සකස් කරන ලදි.—1 ලේකම් 16:4-6, 41; 25:1.

බයිබලය හා සම්බන්ධ ගීතිකා ගැන සිතද්දී ක්ෂණිකව සිහි වන්නේ ගීතාවලිය පොතයි. පාඨකයෙකුට එහි නිතර නිතර කියවන්ට ලැබෙන විශේෂ වාක්‍ය ඛණ්ඩයක්ද ඇත. ඒ, “[යෙහෝවාගේ] කරුණාව සදාකල් පවත්නේය” යන වාක්‍ය ඛණ්ඩයයි. නිදසුනකට ගීතා 136වන ගීතිකාවෙහි පද 26ම අවසන් වන්නේ මේ ආකාරයටයි. “එය කෙටි නිසා එය අහපු ගමන්ම කටපාඩම් කරගෙන ගායනා කිරීම පහසු දෙයක් වුණා” යයි එක් බයිබල් විශාරදයෙක් පවසයි.

ගීතාවලිය පොතෙහි සඳහන් ඇතැම් ගීතිකාවලට කෙටි හැඳින්වීමක් සපයා ඇත. ඒවා කියවීමෙන් පැහැදිලි වන්නේ ඒ කාලයේ මේ ගීත ගැයීම සඳහා සංගීත භාණ්ඩ නොඅඩුව යොදාගත් බවය. ගීතාවලිය පොතේ 150වන ගීතිකාව කියවූ විට එකල භාවිත වූ සංගීත භාණ්ඩ සම්බන්ධයෙන් අපි තවදුරටත් දැනුවත් වන්නෙමු. එහි හොරණෑව, කුඩා වීණාව, මහා වීණාව, රබාන, නළාව හා අත්තල් ගැන සඳහන් වේ. එහෙත් වඩා උතුම් ප්‍රශංසාව නික්මෙන්නේ මිනිස් කටහඬින් බව එම ගීතිකාව හොඳින් මතක් කර දෙයි. ගීතා 150 හයවන පදය උනන්දු කරන්නේ “හුස්ම ඇති සියල්ලෝම [යෙහෝවාට] ප්‍රශංසාකෙරෙත්වා. [යෙහෝවාට] ප්‍රශංසාකරව්” කියාය.

ඉමහත් සතුටත්, දරාගත නොහැකි දුකත් සංගීතයෙන් ප්‍රකාශ කළ හැක. ශෝකජනක අවස්ථාවලදී ඉශ්‍රායෙලිතයන් කෙටි ශෝක පාඨ එකම තාලයට නැවත නැවත ගැයීමට පුරුදුව සිටියේය. නමුත් මෙලෙස එකම තාලයකට ගැයීම යම් විශේෂ අවස්ථාවලට පමණක් සීමා වුණු බව පැහැදිලි වේ. “එකම වාක්‍ය ඛණ්ඩය එකම තාලයට කියාගෙන කියාගෙන යන්ට තෝරාගත්තේ ශෝක පාඨ නොහොත් විලාප ගී ගැයීමෙහිදී පමණයි. නමුත් වෙනත් අවස්ථාවල කතාවක් දීමේදී හෝ සිත්ගන්නා ආකාරයෙන් ගායනා කිරීමේදී මෙය අදාළ නොවීය” කියා ශුද්ධ ලියවිලි පිළිබඳ තීක්ෂ්ණ බුද්ධිය (ඉංග්‍රීසියෙන්, it) නමැති පොත සඳහන් කරයි.a

යේසු මිය ගිය රාත්‍රියෙහි පවා ඔහු තම ගෝලයන් හා එක්ව යෙහෝවාට ප්‍රශංසා ගී ගැයුවේය. එදින ඔවුන් ගැයූ ගීතිකා ගීතාවලිය පොතෙහි ඇති හලෙල් ගීතිකා යනුවෙන් හඳුන්වන ගීතිකා කිහිපයෙන් සමහරක්යයි සිතීමට සාක්ෂි ඇත. (ගීතාවලිය 113-118) මෙහි අඩංගු අර්ථවත් අදහස් හඬ නඟා ගයද්දී, එය තුළින් තමන්ගේ ස්වාමියා අහිමි වූ විට හැඟෙන්ට යන ශෝකය විඳදරාගැනීමට යේසුගේ ගෝලයන් යම් දිරියක් ලැබූ බව නිසැකයි! නමුත් ඊටත් වඩා වැදගත් වූයේ, “[යෙහෝවාගේ] කරුණාව සදාකාලයට පවත්නේය” යන වාක්‍ය ඛණ්ඩය පස් වතාවක් ගයද්දී මුළු විශ්වයේ මහෝත්තමයාණන් වන යෙහෝවාට දිගටම ඇදහිලිවන්තව සේවය කිරීමට ඔවුන් තුළ තිබූ අධිෂ්ඨානය තව තවත් ශක්තිමත් වීමයි.—ගීතාවලිය 118:1-4, 29.

“සිතේ පූර්ණකමෙන් මුඛය කථාකරයි” කියා යේසුස් පවසා තිබිණ. (මතෙව් 12:34) ඊට එකඟව එපීසයේ සහ කොලොස්සියෙහි විසූ මුල් ක්‍රිස්තියානීහු දෙවිට ‘ගීතිකාද කවිද’ (වචනානුසාරයෙන් ගත් කල “ස්තුති ගීතිකා”) ගැයූහ. ඔවුන් ‘ආත්මික ගීතිකා’ සිතින් නිහඬව ගැයූ බවද සඳහන් වේ. (එපීස 5:19; කොලොස්සි 3:16) නමුත් යෙහෝවාට ප්‍රශංසා කිරීමේදී ඔවුන් හඬ නඟා කතා කිරීමට හෝ ගී ගැයීමට මැළි නොවූ බවත් පැහැදිලියි.

දෙවි සෑම ආකාරයේ සංගීතයක්ම අනුමත නොකරයි

බයිබලයේ සඳහන් සමහර ආකාරයේ සංගීතයන් දෙවි අනුමත කරන්නේ නැහැ. සීනයි කන්ද මුදුනේදී මෝසෙස් දස පනත ඇතුළුව මුළු ව්‍යවස්ථාව ලැබුවායින් පසු සිදු වූ දෙය සිහියට නඟන්න. මෝසෙස් කන්දෙන් පහළට එන විට ඔහුට ඈතදීම සංගීතයක් ඇසුණේය. එය කුමනාකාරයේ ගීතයක්ද කියා ඔහු කල්පනා කෙරුවේය. ඒ ‘ජයග්‍රාහී ගීතයක් නම් නොවේ.’ එය ‘පරාජය වූ සෙනඟක් ගායනා කරන ගීතයකුත්’ නොවේ. එසේ නම් එය කුමක්ද? එය ‘වෙන ආකාරයේ සංගීතයක්.’ ඇත්තෙන්ම ඒ සංගීතය දෙවි ද්වේෂ කරන්නාවූ රූප වන්දනාව හා බැඳී තිබිණ. මෙහි ප්‍රතිඵලයක් හැටියට එම සංගීතයට හවුල් වූ 3,000දෙනෙක් මිය ගියහ.—නික්මයාම 32:18, NW, 25-28.

මිනිසාට ඔහු කැමති ඕනෑම ආකාරයේ සංගීතයක් නිර්මාණය කරන්නත්, ගයන්නත්, භුක්ති විඳින්නත් හැකියාව ඇත්තේය. එහෙත් ඒ සෑම එකකින්ම දෙවිව සතුටු කළ නොහැක. මීට හේතුව පාවුල් මෙලෙස පැහැදිලි කරයි: “මක්නිසාද සියල්ලෝම පව්කොට [දෙවිගේ] මහිමයෙන් හීනව සිටිති.” (රෝම 3:23) සශ්‍රීකත්වය පිළිබඳ මිථ්‍යා දෘෂ්ටික වත්පිළිවෙත්, ආත්මයේ අමරණීයත්වය පිළිබඳ ඉගැන්වීම, මරියාව “දේවමෑණියන්” ලෙස සලකමින් ඇයට කරන නමස්කාරය බටහිර ශාස්ත්‍රීය සංගීතයේ සුලභ දෙයකි. එහෙත් මේ ඉගැන්වීම් හා ක්‍රියාකාරකම් දෙවිගේ ආනුභාවය ලත් වචනය වන බයිබලයෙහි සඳහන් දෙයට පටහැනි හෙයින් සැබෑ දෙවිට අගෞරවයක් ගෙන දෙයි.—ද්විතීය කථාව 18:10-12; එසකියෙල් 18:4, NW; ලූක් 1:35, 38.

සංගීතය නැණවත්ව තේරීම

ඕනෑම ආකාරයේ ගීතයක් තෝරාගෙන සවන් දීමට අද කෙනෙකුට ප්‍රස්තාව තිබේ. තවද සංයුක්ත තැටියක (CD) කවරය පවා නිර්මාණය කර තිබෙන්නේ ඕනෑම ආකාරයක සංගීතයක් කෙරෙහි පාරිභෝගිකයාගේ සිත ඇදීයන ආකාරයකිනි. එනමුත් දෙවිව සතුටු කරන්න උත්සාහ කරන්නෙකු එවැනි දේවලින් මුළා නොවිය යුතුයි. සවන් දෙන්නාවූ සංගීතය ගැන ඔහු විමසිලිමත් විය යුතුය. එවැන්නෙකු ගීතයක් අසන්ට පෙර, එය බොරු ආගමකට හෝ භූතවාදයට හෝ සම්බන්ධ නැති බවත්, එයින් දුරාචාරමය හැඟීම් උපදවන්නේ නැති බවත් සහතික කරගනියි.

ඇල්බර්ට් පියානෝව වාදනය කිරීමට මහත් ආශාවක් දක්වයි. නමුත් ඔහු අප්‍රිකාවේ ක්‍රිස්තියානි මිෂනාරිවරයෙකු ලෙස සේවය කරද්දී ඔහුට එය කිරීමට වැඩි ප්‍රස්තාවක් නොලැබිණ. එහෙයින් සංගීතය සඳහා ඔහු තුළ තිබූ එම ආශාව සන්සිඳුවාගැනීම සඳහා ඔහු තමා සතුව තිබූ සංගීත තැටි කිහිපයකට නැවත නැවත සවන් දීම පුරුද්දක් කරගත්තේය. අද ඇල්බර්ට් තම මව් බිමෙහි වාසය කරන අතර, සංචාරක අවේක්ෂකයෙක් ලෙස සේවය කරයි. දැන් ඔහුට සංගීතයට සවන් දීමටවත් කාලය නැති තරම්. “මම වැඩියෙන්ම කැමති බේතෝවන්ගේ වාදනවලටයි” කියා ඔහු පවසයි. “පුළුවන් තරම් එයා රචනා කළ සංගීතය අඩංගු තැටි එකතු කරගන්න අවුරුදු ගණනාවක් තිස්සේ මම උත්සාහ කරල තියෙනවා.” මෙම සංගීතයට සවන් දීමෙන් ඔහු ලබා ඇත්තේ මහත් ආස්වාදයකි. එහෙත් සංගීතයට දක්වන රුචිකත්වය පුද්ගලයාගෙන් පුද්ගලයාට වෙනස් වෙයි. තෝරාගන්නා සංගීතය කුමක් වුවත් ක්‍රිස්තියානියෙක් නිතරම පාවුල්ගේ උපදෙස් සිහියේ තබාගත යුතුයි: “නුඹලා කතත් බොතත් වෙන යමක් කරතත් සියල්ල [දෙවිගේ] ගෞරවය පිණිස කරන්න.”—1 කොරින්ති 10:31.

ඔබේ කැපවීම සහ ඔබ සවන් දෙන සංගීතය

අන් කිසිවකට වඩා සූසී ඇලුම් කළේ සංගීතයටයි. “මම පියානෝව ගහන්න ඉගෙනගන්න කොට මගේ වයස අවුරුදු 6යි. වයලීනය වාදනය කරන්න පුළුවන් වුණේ අවුරුදු 10දියි. අන්තිමට මම වාදනය කරන්න ඉගෙනගත්තේ වීණාවයි. එතකොට මගේ වයස අවුරුදු 12යි” කියා පවසමින් ඇය ඇගේ ජීවිතය හා සංගීතය අතර තිබෙන බැඳීම විස්තර කරයි. තවදුරටත් වීණා වාදනය දියුණු කරගැනීමේ අරමුණෙන් ඇය එංගලන්තයේ ලන්ඩන් නුවර පිහිටි රෝයල් කොලේජ් ඔෆ් ම්‍යුසික් නමැති ප්‍රසිද්ධ සංගීත විද්‍යාලයේ ඉගෙනුම ලැබුවාය. ඇය වසර සතරක් සුප්‍රසිද්ධ ස්පාඤ්ඤ ජාතික වීණා වාදකයෙකු යටතේ එය ඉගෙනගත්තාය. ඉන්පසුව ඇය තව වසරක් පැරීසියෙහි සංගීතය උගන්වන ප්‍රසිද්ධ විදුහලක උසස් අධ්‍යාපනය ලබා සංගීත වාදනය හා සම්බන්ධ උපාධියක්ද ලැබුවාය. එපමණක් නොව වීණාව හා පියානෝව වාදනය කිරීම හා එය ඉගැන්වීම සම්බන්ධයෙන් ඇය ඩිප්ලෝමා සහතික කිහිපයක්ද ලැබුවාය.

පසු කාලයකදී සූසී ලන්ඩන්හි පිහිටි යෙහෝවාගේ සාක්ෂිකරුවන්ගේ රැස්වීම්වලට යන්න පටන්ගත්තාය. එහිදී ඇය කෙරෙහි සැබෑ උනන්දුවක් දැක්වූ හා ප්‍රේමය පෙන්වූ අය ඇයට මුණගැසුණාය. කාලය ගෙවෙද්දී ඇය යෙහෝවාට වඩ වඩා ප්‍රේම කිරීමට පටන්ගත්තාය. ඒත් එක්කම වර්ධනය වුණු ඇගේ උද්‍යෝගය නිසා යෙහෝවාට සේවය කරන්ට හැකි මං සෙවීමට ඇය පෙලඹිණ. ඇය මෙලෙස ආත්මිකව දියුණු වීමේ ප්‍රතිඵලයක් ලෙස ඇය කැප වී බව්තීස්ම වූවාය. “සංගීතය වෘත්තියක් ලෙස කරද්දී එයට හුඟක් ඇප කැප වෙලා වැඩ කරන්න ඕනේ. ඒ නිසා කැප වූ ජීවිතයක් ගත කරනවයි කියන එක මට අමුතු දෙයක් නෙවෙයි” කියා සූසී පවසන්නීය. ඉන්පසු, යේසුගේ අණට කීකරුව ක්‍රිස්තියානි සේවයෙහි හවුල් වී ශුභ ආරංචිය දේශනා කිරීම හේතුවෙන්, සංගීත සන්දර්ශනවලට සහභාගි වීම සඳහා වැඩි කාලයක් මිඩංගු කිරීමට ඇයට නොහැකි විය.—මතෙව් 24:14; මාර්ක් 13:10.

කලින් මෙන් ඇයට සංගීත සන්දර්ශනවලට සහභාගි වීමට නොහැකි වීම ගැන ඇය දුක් වෙනවාද? “සමහර වෙලාවට මට දුකක් දැනෙනවා. මට පුහුණු වෙන්න තව කාලය තිබුණ නං කොච්චර හොඳද කියලත් මට හිතෙනවා” කියා ඇය අවංකවම පවසන්නීය. “ඒත් මම මගේ සංගීත වාදනය සම්පූර්ණයෙන්ම අත්හැරල නෑ. මට වෙලාව තියෙනකොට මම මගේ සංගීත භාණ්ඩ අරං කොහොමහරි වාදනය කරනවා. සංගීතය කියන්නේ යෙහෝවාගෙන් ලැබුණු තෑග්ගක්. දැන් මම යෙහෝවාට මගේ ජීවිතයේ පළමු තැන දීලා තියෙන නිසා, මගේ සංගීතයෙන් කලින් ලැබුවාට වඩා වින්දනයක් දැන් මම ලබනවා.”—මතෙව් 6:33.

දෙවිට ප්‍රශංසාව ගෙන දෙන සංගීතය

නිතිපතා තම රාජ්‍ය ශාලාවලදී සංගීතය වාදනය කිරීමෙන් හා ගීතිකා ගැයීමෙන් යෙහෝවාට ප්‍රශංසා කරන ලක්ෂ හැටක පමණ සංඛ්‍යාවක් ලොව වටා රටවල් 234ක විසිර සිටිති. සාමාන්‍යයෙන් ඔවුහු තමන්ගේ රැස්වීම්වල ආරම්භයේදී හා අවසානයේදී ප්‍රශංසා ගී ගයති. යෙහෝවා දෙවිට ප්‍රශංසා ගී ගැයීම සඳහා රචනා කළ මෙම සංගීතය සැබවින්ම සිත්ගන්නාසුලුය. මෙම ප්‍රශංසා ගී ගයන කණ්ඩායමට ඉහත සඳහන් කළ ඇල්බර්ට් සහ සූසී යන දෙදෙනාද අයත් වේ.

රැස්වීම්වලට පැමිණ සිටින සැමෝම හඬ නඟා තම හද පත්ලෙන්ම යෙහෝවාට ගී ගයති. යෙහෝවා සැලකිලිමත් දෙවි කෙනෙකු නිසා එසේ ගැයීමට ඔවුන් තුළ පෙලඹීමක් ඇති වෙයි (ගීතිකා අංක 44). යෙහෝවාට ප්‍රශංසා ගීතයක්ද වෙනම රචනා කර ඇත (ගීතිකා අංක 190). ක්‍රිස්තියානි ජීවිතයක් ගත කිරීම නිසා, ක්‍රිස්තියානි ගුණාංග වර්ධනය කරගැනීම නිසා හා ක්‍රිස්තියානි සහෝදරත්වය නිසා ඔවුන් අද්දකින ඉමහත් ප්‍රීතිය සඳහා අගයක් මෙම ගීතවලින් පළ කෙරේ. ක්‍රිස්තියානීන් හැටියට එක් එක්කෙනාට පැවරී ඇති වගකීම්ද මෙම ගීතිකාවලින් සිහියට නංවයි. මෙම ප්‍රශංසා ගී රචනා කිරීමට ආසියාවේ, උතුරු සහ දකුණු අමෙරිකාවේ, ඕස්ට්‍රේලියාවේ මෙන්ම යුරෝපයේ සාක්ෂිකරුවන් කිහිපදෙනෙකු දායක විය. ඔවුන්ගේ විවිධාකාර පසුබිම්වලට ආවේණික වූ සංගීත රුචිකත්වයන්, මෙම ගීත නිර්මාණය හා බැඳී පවතින බව මේ ගීත ගයන අයට පැහැදිලිවම දැකගත හැක. මේ හේතුවෙන් මෙම ගීතවලට වඩාත් අලංකාරවත්බවක් මුසු වී ඇත.b

‘යෙහෝවාට අලුත් ගීතිකාවක් ගීතිකා කරව්; පොළොවේ සියල්ලෙනි, යෙහෝවාට ගීතිකා කරව්. යෙහෝවාට ගීතිකා කරමින් ඔහුගේ නාමයට ප්‍රශංසා කරව්; ඔහු දෙන ගැළවීම දිනෙන් දින ප්‍රකාශ කරව්. ඔහුගේ මහිමය ජාතීන් අතරේද ඔහුගේ ආශ්චර්ය ක්‍රියා සියලු මනුෂ්‍යවර්ගයන් අතරේද ප්‍රකාශ කරව්.’ (ගීතාවලිය 96:1-3) ඔබේ නිවස අවට සිටින යෙහෝවාගේ සාක්ෂිකරුවෝ මෙම වදන්වලට අනුකූලව ක්‍රියා කරති. එපමණක් නොව ඔවුන් හා එක්ව ප්‍රශංසා ගී ගැයීමට ඔවුහු ඔබටත් ආරාධනා කරති. යෙහෝවාව සතුටු කරන ආකාරය ඉගෙනගත හැකි ඔවුන්ගේ රාජ්‍ය ශාලාවලට ඔබට යා හැකි අතර, එතැනදී ඔවුන් ඔබව සාදරයෙන් පිළිගනීවි. එවිට ඔබටත් දෙවිගේ සිත සතුටු කරවන ආකාරයෙන් යෙහෝවාට ප්‍රශංසා ගී ගයන්න පුළුවන්.

[පාදසටහන්වල]

[28වන පිටුවේ පින්තූරය]

යෙහෝවාට ප්‍රශංසා ගී ගයමින්