දෘෂ්ටි විශේෂඥයෙක් බීජයක් වපුරයි
යුක්‍රේනයේ ලවොෆ් නගරයේ සිට ඊශ්‍රායලයේ හායිෆා දක්වා යෑමට නම් රටවල් කිහිපයක්ම පසු කරගෙන කිලෝමීටර් 2,000ක පමණ දුරක් ගමන් කිරීමට සිදු වෙනවා. එහෙමනම් හායිෆාහි යෙහෝවාගේ සාක්ෂිකරුවන්ගේ රුසියානු භාෂා සභාවක් පිහිටුවීමට ලවොෆ්හි වෙසෙන දෘෂ්ටි විශේෂඥයෙක් සම්බන්ධ වූයේ කෙසේද? මෙම කතාව බයිබලයෙහි දේශනාකාරයා 11:6හි සඳහන් වදන්වල සත්‍යතාව තහවුරු කරන ආකාරය සැලකිල්ලට ගන්න. එහි පවසා ඇත්තේ, “උදයේ නුඹේ බීජ වපුරන්න, සවසත් නුඹේ අත නවත්වා නොගන්න. මක්නිසාද සඵලවෙන්නේ ඒවාද නොහොත් මේවාද නොහොත් දෙවගේම ඒකාකාර හොඳ වේද කියා නුඹ නොදන්නෙහිය” කියායි.
අපේ කතාව පටන්ගන්නේ 1990න්. ඒ කාලයේදී යුදෙව් ජාතික තරුණියක් වන එලා පදිංචි වී සිටියේ ලවොෆ්හියි. කොහොමවුණත්, ඇය තම පවුලේ අය සමඟ ඊශ්‍රායලයට පදිංචිය මාරු කරන්න තීරණය කර තිබුණා. ඔවුන් යුක්‍රේනයෙන් පිට වී යෑමට ටික කලකට පෙර එලා යෙහෝවාගේ සාක්ෂිකරුවෙක් වන දෘෂ්ටි විශේෂඥයෙක්ව මුණගැසීමට ගියා. ඒ කාලයේදී යුක්‍රේනයේ යෙහෝවාගේ සාක්ෂිකරුවන්ගේ වැඩ නීතියෙන් තහනම් කර තිබුණත්, දෘෂ්ටි විශේෂඥයා එලාට බයිබල් සත්‍යයන් ගැන කතා කිරීමට පසුබට වුණේ නැහැ. දෙවිට පෞද්ගලික නමක් තිබෙන බව ඔහු පැවසූ විට එලා පුදුමයට පත් වූ අතර එය ඇය තුළ ලොකු කුතුහලයක් ඇති කළා. මෙය බයිබලය ගැන දීර්ඝ සාකච්ඡාවකට මඟ පෑදුවා.
එලා එම සාකච්ඡාවෙන් කොතරම් ආස්වාදයක් ලැබුවාද කිව්වොත් ඊළඟ සතියේදී නැවත වරක් සාකච්ඡා කරන්න ඇය කැමති වූවා. ඒ දෙවෙනි සාකච්ඡාවෙන් පසුව ඇය තවත් සාකච්ඡාවකට එකඟ වුණා. මේ ආකාරයට බයිබල් සත්‍යය ඉගෙනගැනීමට එලාට තිබුණ උනන්දුව එන්න එන්නම වැඩි වුණා. නමුත් ඇයට පවුලේ අය සමඟ ඊශ්‍රායලයට යන්න ටික කාලයයි ඉතිරි වී තිබුණේ. තව ඉගෙනගන්න බොහෝ දේවලුත් තිබුණා. ඇය කොහොමද ඒ තරම් කෙටි කාලයකින් ඒ සෑම දෙයක්ම ඉගෙනගන්නේ? එලා ඉතුරු වී තිබුණ කාලයෙන් උපරිම ප්‍රයෝජන ගනිමින් ඊශ්‍රායලය බලා පිටත් වන දවස දක්වාම දිනපතා ඇයත් සමඟ බයිබල් පාඩමක් කරන්න කියා ඉල්ලා සිටියා. ඊශ්‍රායලයට ගිය ගමන්ම එලා තම පාඩම ආරම්භ කළේ නැතත්, ඇගේ හදවතේ වැපිරූ සත්‍යයේ බීජය මුල් ඇද තිබුණා. එම අවුරුද්දේ අවසානය වන විට ඇය නැවතත් ඉතා උද්‍යෝගයෙන් බයිබලය පාඩම් කිරීමට පටන්ගත්තා.
ඒ අතරතුර ගල්ෆ් යුද්ධය ආරම්භ වූ අතර ඉරාකය ඊශ්‍රායලයට මිසයිල ප්‍රහාරයක් එල්ල කළා. සෑම කෙනෙක්ම කතා කරන්න ගත්තේ යුද්ධය ගැනයි. එක දවසක් එලා සුපිරි වෙළඳ සැලකින් බඩු අරං ඉන්දැද්දී, රුසියානු භාෂාව කතා කරන පවුලක් ඇගේ නෙත ගැටුණා. ඔවුන් කතා කරමින් සිටියේ යුද්ධය ගැනයි. ඒ වන විටත් එලා බයිබලය පාඩම් කරමිනුයි සිටියේ. හැබැයි ඇය ඔවුන් වෙතට ගොස් සාමකාමී ලොවක් සම්බන්ධයෙන් බයිබලයේ දී ඇති පොරොන්දුව ගැන සාක්ෂි දැරුවා. එහි ප්‍රතිඵලයක් වශයෙන් ඒ පවුලේ ආච්චි ගාලීනා, අම්මා නටාෂා, පුතා සාෂා (ඒරියල්) හා දුව ඊලානා යන සියලුදෙනාම එලාගේ බයිබල් පාඩමට සහභාගි වෙන්න පටන්ගත්තා.
සාෂාට සෑහෙන විරුද්ධවාදිකම්වලට මුහුණ දෙන්න සිදු වුණත් පවුලේ සාමාජිකයන් අතරින් ඔහු තමයි මුලින්ම බව්තීස්ම වුණේ. පාසැලේදී බොහෝ සම්මාන ලබා තිබුණත් ඔහුව පාසැලෙන් අස් කිරීමට තීරණයක් ගෙන තිබුණා. ඒ ඇයි? පාසැලේදී අනිවාර්යය කර තිබූ හමුදා පුහුණුව ලබා දෙන පංතිවලට සහභාගි නොවීමට තම ක්‍රිස්තියානි හෘදය සාක්ෂියට එකඟව සාෂා ගෙන තිබූ තීරණය නිසයි. (යෙසායා 2:2-4) සාෂාගේ ස්ථාවරය පිළිබඳව යෙරුසලමෙහි ඊශ්‍රායල් මහාධිකරණයේ පවා නඩු විභාගයක් පැවැත්වුවා. සාෂාට තම අධ්‍යාපන කටයුතු දිගටම කරගෙන යෑම සඳහා ඔහුව නැවත පාසැලට භාරගන්න කියා එම මහාධිකරණය විසින් තීන්දු කළා. ඇත්තෙන්ම එය සතුටට කරුණක්. එම නඩු විභාගය පිළිබඳව රට පුරාම ප්‍රචාරය වූ නිසා ඊශ්‍රායලයේ බොහෝදෙනෙකුට යෙහෝවාගේ සාක්ෂිකරුවන්ගේ විශ්වාසයන් ගැන දැනගන්න ලැබුණා.a
සාෂා පාසැල් අධ්‍යාපනය නිම කළාට පසුව යෙහෝවාගේ සාක්ෂිකරුවන්ගේ පූර්ණ කාලීන සේවකයෙක් වීමට තීරණය කළා. ඔහු අද සභා වැඩිමහල්ලෙක් වශයෙන්ද විශේෂ පුරෝගාමියෙක් වශයෙන්ද සේවය කරනවා. සාෂාගේ නංගි ඊලානාද ඔහුගේ ආදර්ශය අනුගමනය කරමින් පූර්ණ කාලීන සේවයට පා තැබුවා. ඔවුන් දෙදෙනාගේ මව හා ආච්චි දැන් බව්තීස්ම ලත් සාක්ෂිකරුවන්. දෘෂ්ටි විශේෂඥයා වැපිරූ බීජ දිගටම ඵල දරමින් තිබුණා!
ඒ අතරතුර එලා දිගටම ආත්මික ප්‍රගතියක් ලබමින් සිටි අතර වැඩි කල් නොගොස් ඇය ගෙයින් ගෙට දේශනා සේවයටද හවුල් වුණා. සාක්ෂි දැරූ මුල්ම නිවසේදී ඇයට ෆයිනාව මුණගැසුණා. යුක්‍රේනයේ සිට ඊශ්‍රායලයට අලුතින් පදිංචියට පැමිණ සිටි ෆයිනා ඒ වන විට මානසිකව බිඳ වැටුණු තත්වයකයි සිටියේ. එලා තම නිවසට පැමිණීමට මොහොතකට කලින්, “අනේ දෙවියනේ මං ඔයාව අඳුරන්නේ නම් නැහැ, ඒත් ඔයා ඇත්තටම ඉන්නවා නම් මට උදව් කරන්න” කියා ඉතා දුකින් ෆයිනා දෙවිට යාච්ඤා කර තිබුණා. එය එලාට දැනගන්න ලැබුණේ පසු කාලයකදීයි. කොහොම වුණත්, ඒ මුල් දිනයේදී එලා ෆයිනා සමඟ ඉතා ඵලදායී සාකච්ඡාවක් ආරම්භ කළා. ෆයිනා එලාගෙන් ප්‍රශ්න ගණනාවක්ම ඇසූ අතර එලා දුන් පිළිතුරුවලට ඇය ඉතා උනන්දුවෙන් සවන් දුන්නා. යෙහෝවාගේ සාක්ෂිකරුවන් බයිබලය තුළින් සත්‍යය උගන්වන බව ඇය ඉක්මනින්ම පිළිගත්තා. සභාව සමඟ ඇගේ ඇසුර හා දේශනා සේවය තවත් පුළුල් කිරීමට ඇයට වුවමනා වූ නිසා ඒ සඳහා වැඩි කාලයක් යෙදවීමට හැකි වන ආකාරයකට ඇය විශ්ව විද්‍යාලයේ හදාරමින් සිටි පාඨමාලාව සකස් කරගත්තා. ෆයිනා 1994 මැයි මාසයේදී බව්තීස්ම වුණා. ඇය දැන් පරිගණක ක්ෂේත්‍රයට සම්බන්ධ අර්ධ කාලීන රැකියාවක් කරමින් සිටින අතර පුරෝගාමියෙක් වශයෙන්ද සේවය කරයි.
එලා, 1994 නොවැම්බර් මාසයේ එක් දිනක දේශනා සේවයේ යද්දී, එක පාරටම ඇඟ පණ නැතුව යනවා වගේ ඇයට දැනුණා. රෝහලකට ගොස් වෛද්‍ය පරීක්ෂණ කිහිපයක් කළාට පසුව හෙළි වුණේ ඇගේ බඩවැලේ ගෙඩියක් ඇති බවයි. සවස් වෙද්දී එලාගේ රතු රුධිරාණු මට්ටම 7.2 දක්වා පහළ බැස තිබුණා. එලාගේ සභාවේ රෝහල් සබඳතා කමිටුවේ (රෝ.ස.ක.) සභාපති වශයෙන් කටයුතු කරමින් සිටි වැඩිමහල්ලෙක් වෛද්‍යවරුන්ට රුධිරය නොමැතිව කරන ප්‍රතිකාර ක්‍රම ගැන තොරතුරු රැසක් ඉදිරිපත් කළා.b රුධිරය නොමැතිව සාර්ථක ලෙස සැත්කමක් කෙරුණු අතර එලා සම්පූර්ණ සුවයක් ලැබුවා.—ක්‍රියා 15:28, 29.
මේ සිද්ධිය එලාගේ නාරිවේදී වෛද්‍යවරයා වන කාල් මත ප්‍රබල බලපෑමක් ඇති කළා. කාල් ජර්මනියේ උපත ලැබූ යුදෙව් ජාතිකයෙක් වන අතර ඔහුගේ දෙමව්පියන් නාට්සි සමූලඝාතනයෙන් බේරී ජීවත් වුණ අයයි. ගාල් කඳවුරුවල සිටින කාලයේදී ඔහුගේ දෙමව්පියන් යෙහෝවාගේ සාක්ෂිකරුවන් සමඟ ඇසුරු කර තිබුණ බව ඔහුට මතක් වුණා. කාල් යෙහෝවාගේ සාක්ෂිකරුවන් ගැන තවදුරටත් ඉගෙනගැනීමට උනන්දුවක් දැක්වූ අතර ඔහු ඔවුන්ගෙන් ප්‍රශ්න ගණනාවක්ම අසන්න පටන්ගත්තා. ඔහුට සෑහෙන වැඩ තිබුණත් කාල් නිතිපතා බයිබල් පාඩමක් කිරීමට කාලය මිඩංගු කළා. අවුරුද්දක් ඇතුළත ඔහු සතිපතා පවත්වන ක්‍රිස්තියානි රැස්වීම්වලට සහභාගි වෙන්න පටන්ගත්තා.
එම දෘෂ්ටි විශේෂඥයා වැපිරූ බීජයට සිදු වුණේ කුමක්ද? අප සාෂා සහ ඔහුගේ පවුලේ සාමාජිකයන්ගේ කතාව දැනටමත් අසා තිබෙනවා. හැබැයි එලාගේ තත්වය කුමක්ද? ඇය දැන් විශේෂ පුරෝගාමියෙක් වශයෙන් සේවය කරනවා. ඇගේ දුව අයිනා මෑතකදී සාර්ථකව පාසැල් අධ්‍යාපනය නිම කර ඇති අතර ඇයද පුරෝගාමි සේවය තෝරාගෙන තිබෙනවා. ෆයිනාව ඔබට මතකද? ඇයත් දැන් විශේෂ පුරෝගාමියෙක්! එලාගේ නාරිවේදී වෛද්‍යවරයා දැන් බව්තීස්ම ලත් සාක්ෂිකාරයෙක් වන අතර ඔහු සභාවේ උපස්ථායක සේවකයෙක් වශයෙන්ද සේවය කරනවා. ඔහු තමා වෙතට එන රෝගීන් ඇතුළුව වෙනත් අයටද බයිබලයේ සුවය ගෙන දෙන වදන් කියා දෙනවා.
හායිෆාහි හෙබ්‍රෙව් භාෂා සභාවේ කොටසක්ව සිටි රුසියානු භාෂා කුඩා කණ්ඩායම, දැන් ජ්වලිතව සේවය කරන ප්‍රචාරකයන් 120දෙනෙක් සිටින රුසියානු භාෂා සභාවක් බවට පත් වී තිබෙනවා! ලවොෆ්හි දෘෂ්ටි විශේෂඥයෙක් බීජයක් වැපිරීමට දැරූ උත්සාහය මොනතරම් ඵලදායි එකක් වී ඇද්ද!
[පාදසටහන්වල]
a වැඩිමනත් තොරතුරු සඳහා 1994 නොවැම්බර් 8 පිබිදෙව්! කලාපයේ (ඉංග්‍රීසියෙන්) 12-15 දක්වා පිටු බලන්න.
b රෝ.ස.ක. යෙහෝවාගේ සාක්ෂිකරුවන්ව ලෝක ව්‍යාප්තව නියෝජනය කරමින්, රෝගියා හා රෝහල් කාර්ය මණ්ඩලය අතර අදහස් හුවමාරුව දියුණු කිරීමට වෙර දරයි. එම කමිටුව, වෛද්‍ය විද්‍යාවේ නවීනතම සොයාගැනීම් මත පදනම් වූ විකල්ප ප්‍රතිකාර ක්‍රම ගැනද තොරතුරු සපයයි.
[29වන පිටුවේ සිතියම]
(මුද්‍රිත පිටපත බලන්න)
යුක්‍රේනය
ඊශ්‍රායලය
[හිමිකම් විස්තර]
Mountain High Maps® Copyright © 1997 Digital Wisdom, Inc.
[30වන පිටුවේ පින්තූර]
එලා තම දුව අයිනා සමඟ
[31වන පිටුවේ පින්තූරය]
හායිෆාහි ප්‍රීතියෙන් සේවය කරන රුසියානු භාෂාව කතා කරන සාක්ෂිකරුවන්. වමේ සිට දකුණට: සාෂා, ඊලානා, නටාෂා, ගාලීනා, ෆයිනා, එලා, අයිනා සහ කාල්