බෝවස්ගේ සහ රූත්ගේ නොසිතූ ලෙස සිදු වූ විවාහය
බෙත්ලෙහෙම අසල පිහිටි කමතේ වසන්ත සමයේ වැඩ කරමින් සිටින ජනයාට මෙදින කාර්ය බහුල දවසකි. ඔවුහු වෙනදාටත් වඩා වැඩියෙන් වැඩ කරති. බදින ලද අලුත් ධාන්‍යවල සුවඳ කමත සිසාරා පැතිර යන්නේ කෑම කන වේලාව පැමිණ තිබෙන බව කුසගින්නේ සිටින වැඩකරුවන්ට දන්වමිනි. සෑම කෙනෙකුම තමන්ගේ මහන්සියේ පල සතුටින් භුක්ති විඳිනු ඇත.
ධනවත් ඉඩම් හිමියෙකු වන බෝවස් හොඳට කා බී, විශාල ධාන්‍ය ගොඩක් අයිනේ ටිකක් විවේක ගනියි. හෝරා කිහිපයකට පසු අස්වනු නෙළීමේ දවසේ නිමාව එළඹෙයි. වැඩ කළ හැම කෙනෙකුම දැන් සොයන්නේ නිදාගැනීමට පහසු තැනකි. කා බී තෘප්තියට පත්ව සිටින බෝවස් තමාව පොරවාගෙන කෙමෙන් කෙමෙන් නින්දට වැටෙයි.
රහස්‍ය හමුවීමක්
බෝවස් මැදියම් රාත්‍රියේදී අවදි වන්නේ සීතලෙන් ගැහෙමිනි. ඔහු පුදුම වෙයි. කවුරුන් හෝ ඔහුගේ පාදවලින් පොරවනය ඉවත් කර, ඒ අසල වැතිරී සිටියි. අඳුර නිසා ඒ කෙනාව හඳුනාගත නොහැකි වූ ඔහු මෙසේ අසයි. ‘ඔබ කවුද?’ ස්ත්‍රියක් ඊට මෙසේ උත්තර දෙනවා ඔහුට ඇසෙයි. ‘මම ඔබගේ මෙහෙකාරී වූ රූත්ය. එබැවින් ඔබගේ වස්ත්‍රය ඔබගේ මෙහෙකාරී පිට අතුරනු මැනවි. මක්නිසාද ඔබ ළඟ නෑයෙක්ය. [මා මුදවාගන්න තැනැත්තා ඔබය, NW].’—රූත් 3:1-9.
අඳුරේදී තනිව සිටින ඔවුහු දෙදෙනා කතා බහ කරති. සාමාන්‍යයෙන් ස්ත්‍රීන් කමතක මෙලෙස සිටිනවා දැකිය නොහැක. (රූත් 3:14) කෙසේවෙතත් බෝවස්ගේ ආරාධනය පරිදි රූත් ඔහුගේ පාද අසල සැතපෙයි. නමුත් ඇය හිරු උදාවීමට කලින් අවදි වී කමතෙන් පිට වී යන්නේ අන් අය සැක කරමින් කළ හැකි විවේචනවලට ඉඩ නොතබාය.
එය රහස්‍ය ආදර හැඟුම් පෑ හමුවීමක් වූවාද? මිථ්‍යා දෘෂ්ටික දේශයකින් පැමිණි දිළිඳු තරුණ වැන්දඹුවක් වන රූත් ඇයට වඩා වයසින් බොහෝ වැඩි මේ ධනවත් මිනිසාව කපටි ලෙස දැලේ දමාගත්තාද? එසේත් නැත්නම් බෝවස් එදා රාත්‍රියේ තනිව සිටි රූත්ගෙන් අයුතු ප්‍රයෝජන ගනිමින් සිටියාද? එම ප්‍රශ්නවලට පිළිතුර දෙවිගේ පක්ෂපාතකම හා ප්‍රේමය සමඟ බැඳී පවතින්නකි. ඇත්තෙන්ම මේ සිද්ධිය හා බැඳි සත්‍ය තොරතුරු ඉතාමත් සිත්ගන්නාසුලුයි.
රූත් කියන්නේ කවුද? ඇගේ චේතනාව කුමක්ද? මේ ධනවත් මිනිසා වන බෝවස් කවරෙක්ද?
“සුශිලවත් ස්ත්‍රියක්”
මේ සිද්ධියට වසර ගණනාවකට කලින් යුදා දේශයේ සාගතයක් ඇති විය. එවිට, හතරදෙනෙකුගෙන් යුත් ඊශ්‍රායෙල් ජාතික පවුලක් සරුසාර මෝවබ් දේශයේ පදිංචියට ගියේය. එම පවුලේ පියා එලීමෙලෙක්ය. මව නායොමිය. මාලොන් සහ කිලියොන් ඔවුන්ගේ පුතුන් දෙදෙනා විය. මෙම පුතුන් දෙදෙනා රූත් හා ඔර්පා නම් මෝවබ් ජාතික ස්ත්‍රීන් දෙදෙනාව විවාහ කරගත්තෝය. මෝවබ් දේශයෙහි පුරුෂයන් තිදෙනාගේ මියයෑමෙන් අනතුරුව, ඊශ්‍රායෙල් දේශයේ තත්වය හොඳ අතට හැරී තිබෙන බව මේ ස්ත්‍රීන් තිදෙනාට දැනගන්න ලැබිණ. මේ නිසා, සොවින් තැවුණු, දරුවන් මුනුපුරු මිනිපිරියන් නොමැතිව වැන්දඹුවක් බවට පත්ව සිටි නායොමි ආපසු ඇගේ මව් බිමට පැමිණීමට තීරණය කළාය.—රූත් 1:1-14.
ඔවුන් ඊශ්‍රායෙල් දේශය බලා පිටත්ව එන ගමනේදී නායොමි ඔර්පාට ඇගේ සෙනඟ වෙතට ආපසු යෑමට ඇයව කැමති කරවා ගත්තාය. ඉන් අනතුරුව නායොමි රූත්ට මෙසේ පැවසුවාය. ‘බලන්න, ඔබේ නෑනා ඇගේ සෙනඟද දෙවියන්ද වෙතට හැරී ගියාය. ඔබේ නෑනා පස්සේ හැරී යන්න.’ නමුත් රූත් පැවසුවේ මෙසේය. ‘ඔබව අත්හැර හැරී යන ලෙස මට පෙරැත්ත නොකරන්න. මක්නිසාද ඔබ යන තැනට මමත් යමි. . . . ඔබේ සෙනඟ මාගේ සෙනඟ වන්නේය. ඔබේ දෙවි මාගේ දෙවි වන්නේය. ඔබ නසින තැන මමත් නැසී, එතැනම තැන්පත් කරනු ලබන්නෙමි.’ (රූත් 1:15-17) මෙලෙස, අසරණ වූ මේ වැන්දඹුවන් දෙදෙනා යළිත් බෙත්ලෙහෙමට පැමිණියහ. බෙත්ලෙහෙමේ වාසය කරද්දී රූත් ඇගේ නැන්දම්මාට දක්වන ප්‍රේමය හා සැලකිල්ල අසල්වැසියන්ගේ සිත්වලට මොනතරම් තදින් කාවැදුණාද කියනවා නම්, ඔවුන් ඇයව සැලකුවේ ‘පුතුන් සත්දෙනෙකුට වඩා [නායොමිට] යහපත්’ තැනැත්තියක් ලෙසයි. වෙනත් අය ඇයව හැඳින්වූයේ “සුශිලවත් ස්ත්‍රියක්” ලෙසයි.—රූත් 3:11; 4:15.
බෙත්ලෙහෙමේ බාර්ලි අස්වැන්න නෙළීම පටන්ගත් විට රූත් නායොමිට මෙසේ පැවසුවාය. “මම කෙතට ගොස් මට කරුණාව පෙන්වන කෙනෙකු පස්සේ යමින් කරල් ඇහිඳගන එන්නෙමි.”—රූත් 2:2.
ඇගේ මාමණ්ඩිය වූ එලීමෙලෙක්ගේ ඥාතියෙකු වන බෝවස්ට අයිති කෙතට ඇය පැමිණෙන්නේ අහම්බෙනි. ඇය කරල් ඇහිලීමට සේවකයන්ගේ ප්‍රධානියාගෙන් අවසර ඉල්ලයි. ඇය කඩිසර ලෙස කරල් ඇහිදින ආකාරය කාගෙත් නෙත් ගැටෙන අතර, බෝවස්ගේ කෙතේ ඇය කරන වැඩ සඳහා ප්‍රධානියා ඇයට ප්‍රශංසා කරයි.—රූත් 1:22–2:7.
ආරක්ෂාව සලසන්නෙක් සහ උපකාර කරන්නෙක්
බෝවස් යෙහෝවාට නමස්කාර කරන භක්තිමත් පුද්ගලයෙකි. බෝවස් සෑම උදෑසනකම ඔහුගේ කෙතේ වැඩ කරන්නන්ට ශුභ පතන්නේ ‘යෙහෝවා ඔබ සමඟ සිටීවා’ යන වදන් සමඟිනි. ඔවුන්ද ඊට ප්‍රතිචාර දැක්වූයේ ‘යෙහෝවා ඔබට ආශීර්වාද කරත්වා’ කියමිනි. (රූත් 2:4) රූත් කඩිසරව කෙතේ වැඩ කරනවා දැකීමෙන් හා ඇය නායොමිට දැක්වූ පක්ෂපාතකම ගැන දැනගැනීමෙන් පසු බෝවස් රූත්ට කරල් ඇහිදීමේදී විශේෂ අනුග්‍රහයක් ලබා දෙයි. ඔහු ඇයට කෙටියෙන් මෙසේ පවසයි. ‘වෙන කෙතකට ඇහිඳින්ට නොයන්න. මෙතැනින් වෙන කෙත්වලට යන්න කිසි අවශ්‍යතාවක් නැත. මෙහි මාගේ තරුණියන් එක්කම සිටින්න. ඔබට අත නොගසන ලෙස මා තරුණ පුරුෂයන්ට අණ කර තිබේ. ඔබට පිපාස වූ කල භාජන ළඟට ගොස් තරුණයන් ඇද තිබෙන වතුරෙන් බොන්න.’—රූත් 2:8, 9.
රූත් වැඳ වැටී මෙසේ පවසයි. “විදේශී වූ මා සලකන ලෙස ඔබ ඉදිරියෙහි මට කරුණාව ලැබී තිබෙන්නේ මක්නිසාද?” බෝවස් ඊට උත්තර දෙමින් පවසන්නේ මෙසේයි. ‘ඔබේ පුරුෂයා නැසුණු පසු ඔබේ නැන්දාට ඔබ කළ සියල්ල ගැනද, ඔබේ පියා හා මවුද ජන්ම භූමියද අත්හැර මීට ප්‍රථම ඔබ නෑඳින්න සෙනඟක් වෙතට ආ බවටද සම්පූර්ණ වාර්තාවක් මට ලැබී තිබේ. යෙහෝවා ඔබේ ක්‍රියාවට විපාක දෙත්වා! ඔහුගෙන් ඔබට සම්පූර්ණ විපාකයක් ලැබේවා!’—රූත් 2:10-12.
බෝවස් වෑයම් කරන්නේ ඇගේ සෙනෙහස දිනාගැනීමට නොවේ. ඔහු කරන්නේ අවංක පැසසුමකි. රූත්ද ඇයව දිරිමත් කරමින් පැවසූ එම වදන්වලට නිහතමානිව ඔහුට ස්තුති කරයි. එවැන්නක් ලැබීමට තරම් තමන් වටින්නේ නැති බව සිතන ඇය පෙරටත් වඩා වැඩියෙන් වෙහෙස මහන්සි වී වැඩ කරයි. පසුව කෑම කන වේලාවේදී බෝවස් රූත්ට කතා කොට මෙසේ පවසයි. “මෙහාට ඇවිත් මේ රොටිවලින් අරන් ඔබේ කැබැල්ල කාඩි හොද්දේ පොවා කන්න.” ඇය ඇති තරම් කා ඉතිරි ආහාර නායොමිට දීම සඳහා ගෙදර රැගෙන යයි.—රූත් 2:14.
දවස අවසානයේදී රූත් බාර්ලි නැළි 20ක් පමණ එකතු කරගෙන තිබුණාය. ඇය ඒවාත් ඉතුරු ආහාරත් නායොමිට දීමට ගෙදර යයි. (රූත් 2:15-18) ඇය රැගෙන ආ දේවල් රාශිය දෙස බලා සතුටු වූ නායොමි මෙසේ අසයි. ‘ඔබ අද ඇහින්දේ කොහේද? . . . ඔබ ගැන සැලකූ අයට ආශීර්වාද වේවා!’ කරල් ඇහින්දේ බෝවස්ගේ කෙතේ බව දැනගත් නායොමි මෙසේ පවසයි. ‘ඔහු ජීවතුන්ටත් මළවුන්ටත් ඇති තමාගේ කරුණාව අත් නොහැරියේය. ඔහුට යෙහෝවාගෙන් ආශීර්වාද ලැබේවා! ඒ මනුෂ්‍යයා අපට ළඟ නෑයෙක්ය. අපේ ළඟම නෑයෙක්ය. [අපව මුදවාගන්න අයගෙන් කෙනෙකි, NW].’—රූත් 2:19, 20.
“නිවාසයක්” සෙවීම
තමාගේ ලේලිට “නිවාසයක්” නැත්නම් වාසස්ථානයක් සොයා දීමේ ආශාවෙන් පසු වූ නායොමි, දෙවිගේ නීතියට අනුව මුදවාගැනීම සම්බන්ධයෙන් ඉල්ලීමක් කිරීමට තිබෙන විධිවිධානයෙන් ප්‍රයෝජන ගැනීමට කටයුතු කරයි. (ලෙවී කථාව 25:25; ද්විතීය කථාව 25:5, 6) බෝවස්ගේ අවධානය ලබාගන්නා ආකාරය නායොමි දැන් ඉතා දක්ෂ ලෙස හා සැලසුම්සහගතව රූත්ට කියා දෙයි. ඇත්තෙන්ම එය ඉතා සිත්ගන්නකි. හොඳින් සූදානම් වී, කළ යුතු දෙය ගැන මැනවින් දැනුවත් වී සිටින රූත් කිසිවෙකුට නොපෙනී අන්ධකාරයේම බෝවස්ට අයිති කමතට යයි. ඔහු නිදා සිටිනවා ඇය දකියි. ඇය ඔහු පොරවාගෙන සිටි වැස්ම ඔහුගේ පාදයෙන් ඉවත් කර, ඔහු අවදි වන තුරු බලා සිටියි.—රූත් 3:1-7.
බෝවස් නින්දෙන් අවදි වන විට ‘තමාගේ වැස්ම තමාගේ මෙහෙකාරිය පිට අතුරන්න’ කියා රූත් කළ ඉල්ලීමෙහි වැදගත්කම තේරුම්ගැනීමට ඇය සංකේතයක් ලෙස කළ දෙය ඔහුට උපකාරවත් වූ බවට සැකයක් නැත. රූත් කළ එම ක්‍රියාව, මැදි විය ඉක්මවා සිටි එම යුදෙව්වාට රූත්ගේ මිය ගිය ස්වාමිපුරුෂයා වූ මාලොන්ගේ ළඟම නෑයෙකු වීමේ ප්‍රතිඵලයක් හැටියට මුදවාගන්නෙකු වශයෙන් තමා ඉටු කළ යුතු යුතුකම වටහාගැනීමට උපකාරවත් වෙයි.—රූත් 3:9.
රූත් රාත්‍රියේ පැමිණීම බෝවස් අපේක්ෂා කළ දෙයක් නොවීය. එහෙත් ඔහු රූත්ගේ පැමිණීමට දැක්වූ ප්‍රතිචාරයෙන් ඇඟවෙන්නේ මුදවාගැනීම සම්බන්ධයෙන් ඇය කළ ඉල්ලීම මුළුමනින්ම ඔහු අපේක්ෂා නොකළ දෙයක් නොවූ බවයි. බෝවස් රූත්ගේ ඉල්ලීම ඉටු කිරීමට කැමැත්තෙන්ම ඉදිරිපත් වූයේය.
රූත් වචන පිට කළ ආකාරයෙන් ඇය යම් ප්‍රමාණයක බියකින් පසු වන බව අඟවන්නට ඇති බව, බෝවස් ඇගේ බිය සැක දුරු කරමින් කියූ මෙම වදන්වලින් පැහැදිලි වේ. ‘දැන් මාගේ දියණියෙනි, භය නොවන්න. ඔබ කියන සියල්ලම ඔබට ඉෂ්ට කරන්නෙමි. මක්නිසාද මාගේ නුවර සියලු මනුෂ්‍යයෝ ඔබ සුශිලවත් ස්ත්‍රියක් බව දනිති.’—රූත් 3:11.
බෝවස් රූත් කළ දේවල් ඉතාමත් යහපත් දේවල් ලෙස සැලකූ බව ඔහු පැවසූ මෙම වදන්වලින් පැහැදිලි වේ. ‘මාගේ දියණියෙනි, යෙහෝවාගෙන් ඔබට ආශීර්වාද ලැබේවා! . . . ඔබේ පටන්ගැනීමට වඩා අන්තිමේදී ඔබ වැඩි කරුණාවක් [ප්‍රේමණීය කරුණාව, NW] පෙන්වුවෙහිය.’ (රූත් 3:10) රූත් පටන්ගැනීමේදී ප්‍රේමණීය කරුණාව නොහොත් පක්ෂපාත ප්‍රේමය පෙන්වූයේ නායොමිටය. අන්තිමේදී මෙම ගුණාංගය රූත් පෙන්වූයේ, බෝවස් තමාට වඩා බොහෝ සෙයින් වැඩිමහල් වුවත් තමන්ව මුදවාගැනීමේ අවශ්‍යතාව ඔහුට වටහාගැනීමට උපකාර කිරීමෙනි. තමන්ගේ මිය ගිය ස්වාමිපුරුෂයා වූ මාලොන් හා නායොමි වෙනුවෙන් දරුවන් ඇති දැඩි කිරීමට ඇය කැමැත්තෙන්ම ඉදිරිපත් වූවාය.
මුදවාගන්නෙක් වගකීමෙන් නිදහස් වේ
බෝවස් පසුදා උදෑසන කිට්ටුම ඥාතියෙකුට හඬ ගසයි. ඔහුව හඳුන්වා තිබෙන්නේ “අහවලා” [NW] කියාය. මොහු බෝවස්ට වඩා නායොමිට කිට්ටු ඥාතියෙකි. නගරයේ සිටින ජනයා හා වැඩිමහල්ලන් ඉදිරිපිට බෝවස් මෙසේ පවසයි. ‘නායොමි ඇගේ ස්වාමිපුරුෂයා වූ එලීමෙලෙක්ට තිබුණු බිම් කොටස විකුණයි. ඒක මිල දී ගන්න කියා ඔබට දන්වන්න මම සිතුවෙමි.’ බෝවස් තවදුරටත් මෙසේද පවසයි. ‘ඔබ ඒක මුදවාගන්නවාද? එහෙම නැත්නම් මම ඒක මුදවාගන්නෙමි.’ [NW] ඒ අවස්ථාවේදී අහවලා යෝජනා කරන්නේ තමන් එය මුදවාගැනීමට කැමති බවයි.—රූත් 4:1-4.
දැන් බෝවස් පවසන්න යන දෙය ඇසීමෙන් අහවලා පුදුමයට පත් වනු ඇත. බෝවස් සියලුම සාක්ෂිකරුවන් ඉදිරියෙහි මෙසේ පවසයි. “නායොමි අතින් ඒ බිම මිලේට ගන්නා දවසේදී, මැරුණු අයගේ නම උරුමය කෙරෙහි පවතින පිණිස මැරුණු අයගේ භාර්යාව වූ රූත්ගෙනුත් [ඔබ] ඒක මිලේට ගන්ට ඕනෑය.” දැන්, තමන් සතු උරුමයට අලාභයක් වෙයිදෝ කියන බිය නිසා ඒ කිට්ටුම ඥාතියා මුදවාගැනීමේ ඔහුගේ අයිතිය අත්හරිමින් මෙසේ පවසයි. “මට එය මුදවාගත නොහැක.”—රූත් 4:5, 6, NW.
චාරිත්‍රයට අනුව මුදවාගැනීම ප්‍රතික්ෂේප කරන තැනැත්තා ඔහුගේ පාවහන් ගලවා මුදවාගන්න අනිත් තැනැත්තාට දිය යුතු විය. මේ නිසා ‘ඔබ ඒක මිලේට ගන්න’ කියා මුදවාගන්නා බෝවස්ට පවසන අවස්ථාවේදී ඔහු තමාගේ පාවහන් ගලවා දමයි. ඉන් අනතුරුව බෝවස් වැඩිමහල්ලන්ට හා එතැන සිටින සියලුදෙනාටම මෙසේ පවසයි. “එලීමෙලෙක්ට තිබුණ සියල්ලත් කිලියොන්ට සහ මාලොන්ට තිබුණු සියල්ලත් මා විසින් නායොමි අතින් මිල දී ගත් බවට නුඹලා අද සාක්ෂිකාරයෝය. . . . මැරුණු අයගේ උරුමය කෙරෙහි ඔහුගේ නාමය ගෙන යන පිණිස මාලොන්ගේ භාර්යාව වූ මෝවබිය රූත් මාගේ භාර්යාව කොට මිල දී ගතිමි. ඊට නුඹලා අද සාක්ෂිකාරයෝය.”—රූත් 4:7-10.
නගරයේ දොරටුවේ සිටි සියලුදෙනාම බෝවස්ට මෙසේ පවසති. ‘යෙහෝවා ඔබේ ගෙට එන මේ ස්ත්‍රිය ඊශ්‍රායෙල් වංශය ගොඩනැඟු රාඛෙල්ද ලෙයාද යන ස්ත්‍රීන් දෙදෙනා මෙන් කරත්වා! ඔබ එප්‍රාතාහි සම්පත් උපදවාගන්න. බෙත්ලෙහෙමෙහි කීර්තිමත් වෙන්න.’—රූත් 4:11, 12.
සෙනඟගේ ආශීර්වාද මැද බෝවස් රූත්ව ඔහුගේ භාර්යාව ලෙස සිය නිවසට කැඳවාගෙන යයි. ඇය ඔහුට දාව පුත්‍රයෙකු බිහි කරයි. ඒ පුත්‍රයාගේ නම ඕබෙද්ය. මෙසේ රූත් සහ බෝවස් දාවිත් රජුගේ මුතුන්මිත්තන් බවට පත් වූහ. එහි ප්‍රතිඵලයක් හැටියට යේසුස් ක්‍රිස්තුස්ගේද මුතුන්මිත්තන් වූහ.—රූත් 4:13-17; මතෙව් 1:5, 6, 16.
“සම්පූර්ණ විපාකයක්”
බෝවස් ඔහුගේ සේවකයන්ට කාරුණික ලෙස ශුභ පැතීමේ සිට එලීමෙලෙක්ගේ පෙළපත අඛණ්ඩව ඉදිරියට ගෙන යෑමේ වගකීම පිළිගැනීම දක්වා කළ දේවල් ඇතුළුව මේ වාර්තාව පුරා අඩංගු දේවලින් පැහැදිලි වන්නේ බෝවස් සුවිශේෂි මිනිසෙකු වූ බවයි. ඔහු දේවල් කිරීමට විගස ඉදිරිපත් වූ කෙනෙකි. අධිකාරියක්ද තිබූ පුද්ගලයෙකි. ඒ අතරම ඔහු තමාව දමනය කරගත හැකි, ඇදහිලිවන්ත මෙන්ම අඛණ්ඩතාව රක්ෂා කළ මිනිසෙකුද විය. එමෙන්ම බෝවස් ත්‍යාගශීලී, කරුණාවන්ත මෙන්ම සදාචාරය අතින් නිර්මල කෙනෙකි. යෙහෝවාගේ ආඥාවලට සම්පූර්ණයෙන් කීකරු කෙනෙකි.
රූත් යෙහෝවාට දැක්වූ ප්‍රේමය හා නායොමිට පෙන්වූ පක්ෂපාත ප්‍රේමය සම්බන්ධයෙන්ද ඇගේ කඩිසරකම මෙන්ම නිහතමානිකම සම්බන්ධයෙන්ද කැපීපෙනෙන තැනැත්තියෙකි. මිනිසුන් ඇයව “සුශිලවත් ස්ත්‍රියක්” ලෙස සැලකීම ගැන පුදුම විය යුතු නැත. ඇය “අලසකමේ කෑම” අනුභව කළේ නැත. ඇය වෙහෙස මහන්සි වී වැඩ කළ නිසා ඇගේ දිලිඳු නැන්දම්මාටද දීමට යමක් ඇයට තිබිණ. (හිතෝපදේශ 31:27, 31) නායොමි වෙනුවෙන් වගකීම් ඉටු කිරීමට ඉදිරිපත් වීමෙන්, රූත් දීමෙන් ලබන සතුට ලැබූ බවට සැකයක් නැත.—ක්‍රියා 20:35; 1 තිමෝති 5:4, 8.
රූත් නමැති පොතෙහි අපට මොනතරම් කදිම ආදර්ශ සොයාගත හැකිද! යෙහෝවා නායොමිව මතකයේ තබාගනිමින් සැලකිල්ල දක්වයි. යේසුස් ක්‍රිස්තුස්ගේ මිත්තනියක් වීමෙන් රූත් “සම්පූර්ණ විපාකයක්” ලබයි. “සුශිලවත් ස්ත්‍රියක්” විවාහ කරගැනීමෙන් බෝවස් ආශීර්වාද ලබයි. මෙවැනි අය ඇදහිල්ල සම්බන්ධයෙන් අපට කදිම ආදර්ශ සපයති.
[26වන පිටුවේ කොටුව]
බලාපොරොත්තුවේ අරුණලු
ඔබ ජීවිතයේ සතුට ලබන්නේ නැති බව ඔබට හැඟී යන අවස්ථාවලදී රූත්ගේ කතන්දරය කියවීමෙන් බලාපොරොත්තු නොනිවී තබාගත හැකි බවට ඔබට නිසැකකමක් ලැබෙන ඇත. මෙහි කැපීපෙනෙන තවත් දෙයක් වන්නේ මෙම පොත විනිශ්චයකාරයන්ගේ පොතට වැදගත් අවසානයක් සැපයීමයි. යෙහෝවා ඔහුගේ සෙනඟට රජෙකුව ලබා දීම සඳහා මෝවබ් නම් විදේශීය රටකින් පැමිණි නිහතමානි වැන්දඹුවක්ව යොදාගත් ආකාරය රූත්ගේ පොත අපට කියා දෙයි. විනිශ්චයකාරයන්ගේ පොතෙහි පසුබිම සමඟ බලන කල රූත්ගේ ඇදහිල්ල එම යුගයේ දීප්තිමත් පහනක් මෙන් විය.
මුහුණ දීමට සිදු විය හැකි තත්වයන් මොනතරම් දරුණු වුවත්, දෙවි සැමවිටම ඔහුගේ සෙනඟ කෙරෙහි සැලකිල්ල දක්වන බවටත් සිය අරමුණු ඉටු කරන බවටත් නිසැකකමක් රූත්ගේ පොත කියවීමෙන් ඔබට ඇති කරගත හැක.