“දෙවිට ළං වෙන්න. එවිට ඔහු ඔබට ළං වන්නේය”
පෙර සහ පසු වෙනස් වීමට අවශ්‍ය ශක්තිය ඇය ලැබුවා
සැන්ඩ්‍රා මෙක්සිකානු කාන්තාවක්. ඇයව පවුලේ අය සැලකුවේ පවුලට අවනම්බු කරන තැනැත්තියක් ලෙසයි. ප්‍රතික්ෂේප කිරීම හා ආදරය නොලැබීම නිසා ඇගේ යෞවන කාලය ගෙවුණේ සිත්තැවුලෙන්. ඇය පවසන්නේ මෙහෙමයි. “මම යෞවන වියට පා තැබුවේ හිස් වූ හැඟීම් සමුදායක් පොදිබැඳගෙනයි. මං මෙලොවට බිහි වුණේ ඇයි කියන එක ගැනත් ජීවිතයේ අරමුණ මොකක්ද කියන එක ගැනත් මට කිසි පැහැදීමක් තිබුණේ නැහැ.”
සැන්ඩ්‍රා ද්විතීයික පාසැලේ අධ්‍යාපනය ලබමින් සිටි කාලයේදී ගෙදර තිබුණු තාත්තාගේ වයින් බිව්වා. කාලයාගේ ඇවෑමෙන් ඇයට අවශ්‍ය මත්පැන් ඇයම ලබාගත් අතර ඇය ඒවාට ඇබ්බැහි වුණා. “මට ජීවත් වෙන්න කිසිම වුවමනාවක් තිබුණේ නැහැ” කියා ඇය පැවසුවා. මෙම කලකිරුණු තත්වය නිසා ඇය මත්ද්‍රව්‍යවල පිහිට පැතුවා. “මගේ පර්ස් එකේ හැම විටම මත්පැන් බෝතලයක්, පෙති කිහිපයක් නැත්නම් මරිජුවානා ටිකක් තිබුණා. මට මේ හැම ප්‍රශ්නයක්ම අමතක කරන්න උපකාර කළේ මේවායි.”
සැන්ඩ්‍රා වෛද්‍ය විද්‍යාලයෙන් පිට වුණාට පස්සේ තව තවත් මත්පැන්වලට ඇබ්බැහි වුණා. ඇගේ ජීවිතය නැති කරගැනීමට තැත් කළද ඇය බේරුණා.
සැන්ඩ්‍රා ආත්මික හා චිත්තවේගීය උපකාරය පතා විවිධ ආගම්වලට යොමු වුවද ඒවායින් කිසි ප්‍රයෝජනයක් ලැබුණේ නැහැ. බලාපොරොත්තු සුන් වී හොඳටම කලකිරුණු අවස්ථාවක ඇය නැවත නැවතත් දෙවිට මෙහෙම යාච්ඤා කළා. “ඔබ කොහෙද? ඇයි මට උදව් කරන්නේ නැත්තේ?” වෙන කිසිමදාකට වඩා ජීවිතය වැඩක් නැහැයි කියලා හිතපු වෙලාවකදීයි ඇයට යෙහෝවාගේ සාක්ෂිකාරියක් කතා කළේ. ඉන්පසු ඇය සමඟ බයිබල් පාඩමක් පටන්ගැනුණා. “යෙහෝවා බිඳුණු සිත් ඇත්තන්ට ළංව සිටියි” යන වදන් කෙරෙහි ඇගේ සිත ඇදී ගියා.—ගීතාවලිය 34:18.
ආදම්ගෙන් උරුම කරගෙන තිබෙන පාපය හා අසම්පූර්ණකම නිසා අපි පහසුවෙන් පාපයට හසු වනවා කියා යෙහෝවා දෙවි දන්න බව තේරුම්ගන්න සැන්ඩ්‍රා සමඟ පාඩම් කළ සහෝදරිය ඇයට උපකාර කළා. අපිට කවදාවත් සීයට සීයක් ධර්මිෂ්ඨ ප්‍රමිති රැකගන්න බැරි බව දෙවි තේරුම්ගන්නවා කියා සැන්ඩ්‍රාට වැටහුණා. (ගීතාවලිය 51:5; රෝම 3:23; 5:12, 18) යෙහෝවා දෙවි අපේ දුර්වලකම් විතරක් සෝදිසි කරන දෙවි කෙනෙක්වත් අපේ පුළුවන්කමට වඩා අපෙන් බලාපොරොත්තු වෙන දෙවි කෙනෙක්වත් නොවන බව දැනගැනීමෙන් සැන්ඩ්‍රා ප්‍රීති වුණා. ගීතිකාකරු පැවසුවේ “යෙහෝවා, ඔබ අයුතුකම් ගණනට ගන්නේ නම්, ස්වාමිනි, කාට සිටින්ට හැක්කේද?” කියායි.—ගීතාවලිය 130:3.
සැන්ඩ්‍රාගේ හදවත කෘතඥපූර්වක හැඟීමකින් පිරී ගියේ ඇය බයිබලයේ සඳහන් වැදගත් ඉගැන්වීමක් වන යේසුස්ගේ ජීවිත පූජාව ගැන ඉගෙනගැනීමෙන් අනතුරුවයි. මෙම මිදීමේ මිලය මාර්ගයෙන් අසම්පූර්ණ වුවත් කීකරු මනුෂ්‍යයාට දෙවි ඉදිරියේ නිවැරදි ස්ථාවරයක් පවත්වාගැනීමට යෙහෝවා කාරුණිකව ඉඩ දී තිබෙනවා. (1 යොහන් 2:2; 4:9, 10) ඒ නිසා “අපේ වැරදිවලට සමාව” ලබාගැනීමට මෙන්ම අපි වටින්නේ නැහැයි කියන හැඟීමෙන් මිදෙන්නත් ඇත්තෙන්ම අපිට පුළුවන්.—එෆීස 1:7, NW.
ප්‍රේරිත පාවුල්ගේ ආදර්ශයෙන් සැන්ඩ්‍රා වටිනා පාඩම් ඉගෙනගත්තා. ඔහුගේ අතීත වැරදි ක්‍රියාවලට දෙවි කරුණාවන්තව සමාව ලබා දුන්නා පමණක් නොවෙයි නැවතත් මතු වෙන්නාවූ දුර්වලකම් සමඟ සාර්ථකව කටයුතු කිරීමට අවශ්‍ය ශක්තියත් ලබා දුන්නා. (රෝම 7:15-25; 1 කොරින්ති 15:9, 10) පාවුල් ඔහුගේ ජීවන රටාව වෙනස් කරගත්තා. දෙවි විසින් අනුමත කර තිබෙන මාවතේ ගමන් කිරීම සඳහා ඔහු ‘තමාගේ ශරීරයට දැඩි ලෙස පහර දෙමින්, දාසයෙකුව ඇදගෙන යන්නාක් මෙන් එය ඇදගෙන’ ගියා. (1 කොරින්ති 9:27, NW) ඔහුගේ පව්කාර ආශාවන්ට ඔහුව දාසයෙකු ලෙස පාලනය කිරීමට ඔහු ඉඩහැරියේ නැහැ.
සැන්ඩ්‍රාට ඇගේ දුර්වලකම් පීඩාවක් වූ නමුත් ඇය ඒවාට විරුද්ධව සටන් කළා. මෙම දුර්වලකම්වලින් ගොඩ ඒමටත් දෙවිගේ කරුණාව ලබාගැනීමටත් උපකාර ඉල්ලා ඇය ඉතා ඕනෑකමින් යෙහෝවාට යාච්ඤා කළා. (ගීතාවලිය 55:22; යාකොබ් 4:8) දෙවි ඇය ගැන සැලකිල්ලක් දක්වන බව තේරුම්ගත් නිසා සැන්ඩ්‍රාට ඇගේ ජීවිතය වෙනස් කරගැනීමට හැකි වුණා. “මම දැන් අන් අයට බයිබලයේ සඳහන් තොරතුරු පූර්ණ කාලීනව කියා දීමෙන් ප්‍රීතිය භුක්ති විඳිනවා” යැයි සැන්ඩ්‍රා පැවසුවා. ඒ විතරක් නොවෙයි ඇගේ අක්කාට හා නංගීට යෙහෝවා ගැන දැනගැනීමට උපකාර කිරීමේ ප්‍රස්තාවද සැන්ඩ්‍රාට ලැබුණා. ‘යහපත්කම් කිරීමට’ වෙර දරමින් සිටින සැන්ඩ්‍රා යෙහෝවාගේ සාක්ෂිකරුවන්ගේ සමුළුවලදී ඇගේ වෛද්‍යමය දක්ෂතා භාවිත කිරීමට ස්වේච්ඡාවෙන් ඉදිරිපත් වෙයි.—ගලාති 6:10.
සැන්ඩ්‍රා ඇබ්බැහි වී සිටි නරක පුරුදුවලට මොකද වුණේ? ඇය ලොකු විශ්වාසයකින් පවසන්නේ “දැන් මගේ මනස නිරවුල්. මම මත්ද්‍රව්‍ය, දුම්පානය හා මත්පැන් ගැනීම සම්පූර්ණයෙන්ම නවත්තලායි තියෙන්නේ. මට දැන් ඒවා අවශ්‍ය නැහැ. මම හොයපු දේ මට ලැබුණා.”
[9වන පිටුවේ වාක්‍ය කණ්ඩය]
“මම හොයපු දේ මට ලැබුණා”
[9වන පිටුවේ කොටුව]
උපකාරවත් වන බයිබල් ප්‍රතිපත්ති
ශරීරය දූෂ්‍ය වන ඇබ්බැහි වීම්වලින් වැළකී සිටීමට බොහෝ අයට උපකාරවත් වූ බයිබල් ප්‍රතිපත්ති කිහිපයක්.
“මාංසය සහ ආත්මය දූෂ්‍ය කරවන සෑම දෙයකින්ම අපි අපව පවිත්‍ර කරගනිමු. එමගින්, දේවභය ඇතිව ශුද්ධකම සම්පූර්ණ කරමු.” (2 කොරින්ති 7:1, NW) දෙවි සියලුම දූෂ්‍ය කරවන පුරුදුවලින් වැළකී පවිත්‍රව සිටින අයට ආශීර්වාද කරනවා.
“යෙහෝවා කෙරෙහි භයවීම නම් නපුරට ද්වේෂ කිරීමය.” (හිතෝපදේශ 8:13) යෙහෝවා දෙවි කෙරෙහි ඇති ගෞරවනීය බිය කෙනෙකුට මත්ද්‍රව්‍ය ඇතුළු නරක පුරුදුවලින් ඉවත් වීමට උපකාරවත් වේ. යෙහෝවා දෙවිව සතුටු කිරීමට අමතරව තමන්ව වෙනස් කරගන්නා පුද්ගලයා භයානක ලෙඩ රෝගවලින්ද ආරක්ෂා වෙයි.
‘පාලකයන් හැටියට ආණ්ඩුවලට සහ බලධාරීන්ට යටත්ව සිටින්න, කීකරුව සිටින්න.’ (තීතස් 3:1, NW) බොහෝ ප්‍රදේශවල සමහර මත්ද්‍රව්‍ය ළඟ තබාගැනීම හා භාවිත කිරීම නීති විරෝධියි. සැබෑ ක්‍රිස්තියානීන් නීති විරෝධි මත්ද්‍රව්‍ය ළඟ තබාගන්නේවත් ඒවා භාවිත කරන්නේවත් නැහැ.