ගිලියද් උපාධිලාභීන් “මහිමාන්විත දේවල්” ගැන කතා කිරීමට දිරිගැන්වේ
වර්ෂ 2003 සැප්තැම්බර් මස 13වනදා ගිලියද් මුරටැඹ බයිබල් පාසැලේ 115වන පන්තියේ උපාධි පිරිනැමීමේ වැඩසටහනට 6,635ක විශාල පිරිසක් රටවල් 52කින් පැමිණ සිටියහ.
රටවල් 17ක වැසියන්ට “දෙවිගේ මහිමාන්විත දේවල්” ගෙන යෑම සඳහා එම පන්තියේ ශිෂ්‍යයන් 48දෙනාටම දෙනු ලැබූ බයිබලය මත පදනම් දිරිගැන්වීමට ඔවුහු සවන් දුන්හ. (ක්‍රියා 2:11, NW) මෙම උපාධිලාභීන් දෙවිගේ වචනය උගන්වන්නන් හැටියට තම මිෂනාරි සේවය කරගෙන යනු ඇත්තේ එම රටවල් ගණනාව තුළය.
යෙහෝවාගේ සාක්ෂිකරුවන්ගේ පාලක මණ්ඩලයේ සාමාජිකයෙකු හා උපාධි පිරිනැමීමේ වැඩසටහනේ සභාපති වශයෙන් කටයුතු කළ ස්ටීවන් ලෙට්, ආරම්භක කතාව තුළින් ශිෂ්‍යයන්ට මෙම සිහිගැන්වීම දුන්නේය. “ඔබගේ පැවරුම ලැබුවායින් පසුව, ඔබ කොතැනට ගියත් මොන තත්වයන් යටතේ සේවය කරන්න සිදු වුවත් ඔබට විරුද්ධව සිටින අයට වඩා ඔබ සමඟ විශාල පිරිසක් සිටින බව මතක තියාගන්න.” සහෝදර ලෙට් ශිෂ්‍යයන්ට මතක් කර දුන්නේ “දෙවිගේ මහිමාන්විත දේවල්” ගැන ප්‍රකාශ කරද්දී යෙහෝවා දෙවිගේද අසංඛ්‍යාත දේවදූතයන්ගේද උපකාරය මත ඔවුන්ට රඳා සිටිය හැකි බවයි. ඔහුගේ අදහස් පදනම් වී තිබුණේ දෙවන රාජාවලියේ 6වන පරිච්ඡේදයේ වාර්තාව ඇසුරෙනි. (2 රාජාවලිය 6:15, 16) පළමු ශතවර්ෂයේ විසූ ක්‍රිස්තියානීන් දේශනා කිරීමේ හා ඉගැන්වීමේ වැඩකටයුතු කරගෙන යද්දී විරුද්ධවාදිකම් හා උදාසීනකම අද්දැක්ක අතර, අද දින සිටින ක්‍රිස්තියානි මිෂනාරිවරුද ඊට සමාන තත්වයන්ට මුහුණ දෙමින් සිටිති. කෙසේවෙතත් ස්වර්ගයෙන් හා යෙහෝවාගේ භූමික සංවිධානයෙන්ද ලැබෙන උපකාරය මත ඔවුන්ට රඳා සිටිය හැකිය.—ගීතාවලිය 34:7; මතෙව් 24:45.
“දෙවිගේ මහිමාන්විත දේවල්” ගැන කතා කරන්න
සභාපතිගේ ආරම්භක කතාවෙන් පසුව, එක්සත් ජනපදයේ ශාඛා කමිටුවේ සාමාජිකයෙකු වන හැරල්ඩ් කෝකර්න් “ප්‍රීතිමත් සාර්ථක සේවයකට මූලික දෙය වනුයේ යථාර්ථවාදී බලාපොරොත්තු ඇතුව සිටීම” යන තේමාව යටතේ කතා කළේය. හිතෝපදේශ 13:12 පෙන්වා දෙන පරිදි ඉටු නොවූ බලාපොරොත්තු කලකිරුණු ස්වභාවයකට මඟ පෑදිය හැකි බව සහෝදර කෝකර්න් පෙන්වා දුන්නේය. කෙසේවෙතත් බොහෝවිට කලකිරීම ඇතිවීමට හේතුව වන්නේ යථාර්ථවාදී නොවන බලාපොරොත්තු ඉටු නොවන විටදීය. උපාධිලාභීන් තමන් ගැනත් අන්‍යයන් ගැනත් සමබර මෙන්ම යථාර්ථවාදී ආකල්පයක් ඇතුව සිටිය යුතුය. “දෙවිගේ මහිමාන්විත දේවල්” ගැන අගය කිරීමට අන්‍යයන්ට උපකාර කරන අතරතුරේදී, තමන් අතින් යම් යම් වැරදි සිදු වනු ඇති බව පිළිගත යුතු අතර, මේ නිසා තමන් වුවමනාවට වඩා දුක්වීම සුදුසු නැත. ‘තමාව ඕනෑකමින් සොයන අයට විපාක දෙන’ යෙහෝවා මත රඳා සිටීමට සහෝදර කෝකර්න් නවක මිෂනාරිවරුන්ව දිරිගැන්නුවේය.—හෙබ්‍රෙව් 11:6.
වැඩසටහනේ ඊළඟ කොටස මෙහෙයවනු ලැබූයේ පාලක මණ්ඩලයේ සාමාජිකයෙක් වන ඩැනියල් සිඩ්ලික් විසිනි. “ක්‍රිස්තියානි බලාපොරොත්තුව යනු කුමක්ද?” යන්න ඔහුගේ තේමාව විය. “බලාපොරොත්තුව කියන්නේ ක්‍රිස්තියානීන්ට තිබිය යුතු හොඳ ගුණාංගයක්. එය කෙනෙකුව දෙවි සමඟ හොඳ සම්බන්ධයකට මඟ පාදන යහපත්කම පිළිබඳ ප්‍රමිතියකි. ක්‍රිස්තියානි නොවන කෙනෙකුට අප මෙන් බලාපොරොත්තුවක් ඇතුව සිටීමට නොහැකියි.” ක්‍රිස්තියානියෙකුට ජීවිතයේ පැනනඟින දුෂ්කරතා හමුවේ දිගටම ශුභවාදීව කටයුතු කිරීම සඳහා උපකාරවත් වන බලාපොරොත්තුවේ විවිධ පැති ගැන සහෝදර සිඩ්ලික් තවදුරටත් මෙසේ විස්තර කළේය. “අපට බලාපොරොත්තුවක් තියෙන නිසා උද්‍යෝගයෙන් හා බාධක ජයගත හැකිය යන හැඟීමෙන් යුතුව ජීවිතයට මුහුණ දීමට අපට හැකි වෙයි.” ක්‍රිස්තියානියෙකුට තිබෙන බලාපොරොත්තුව නිසා යෙහෝවා අරමුණක් ඇති දෙවි කෙනෙකු ලෙස දැකීමටත් ඔහුට සේවය කිරීමෙන් ප්‍රීතියක් අද්දැකීමටත් හැකි වේ.—රෝම 12:12.
“දිගටම ආත්මයෙන් ගමන් කරන්න” කියා ගිලියද් පාසැලේ රෙජිස්ට්‍රාර් වොලස් ලිවරන්ස් ශිෂ්‍යයන්ට දිරිගැන්නුවේය. (ගලාති 5:16, NW) යෙරෙමියාගේ ලේඛකයා වූ බාරුක් ආත්මයෙන් ගමන් කිරීම නතර කිරීමට ගිය ආකාරය ඔහු පෙන්වා දුන්නේය. එක් අවස්ථාවකදී බාරුක් තමා ගත කරමින් සිටි ජීවිතය ගැන වෙහෙසට පත් වී තමාටම මහත් දේවල් සොයන්න පටන්ගත්තේය. (යෙරෙමියා 45:3, 5) සමහරු යේසුස් අනුව යෑම නතර කරමින් ගැලවීම සඳහා අත්‍යවශ්‍ය වන ආත්මික සත්‍යතා ප්‍රතික්ෂේප කළ ආකාරය ඉන් පසු සහෝදර ලිවරන්ස් පෙන්වා දුන්නේය. ඊට හේතුව, ඔහු උගන්වමින් සිටි දේ ඔවුන් වටහාගැනීමට අසමත් වීම හා ඔවුන්ගේ මාංසික ආශාවන් ඒ අවස්ථාවේදී ඉටු නොවීම නිසා ඔවුහු කලකිරීමට පත්වීමය. (යොහන් 6:26, 27, 51, 66) මිනිසුන්ගේ අවධානය මැවුම්කරු වෙතටත් ඔහුගේ අරමුණු වෙතටත් යොමු කිරීමේ කටයුත්තේ නියැලෙන මිෂනාරිවරුන්ට මෙම වාර්තාවලින් ඉගෙනගත හැක්කේ කුමක්ද? තනතුරක් ලබාගැනීමට, මනුෂ්‍යයන්ගෙන් ගෞරවය ලබාගැනීමට හෝ දිව්‍යාණ්ඩුමය පැවරුමක් තමන්ගේ පෞද්ගලික ලාභ ප්‍රයෝජන සඳහා භාවිත කිරීමේ ආශාවන්ගෙන් වැළකීමට ශිෂ්‍යයන්ට දිරිගන්වනු ලැබීය.
“අන් අය අතරේ ඔබ ප්‍රසිද්ධ වන්නට යන්නේ දීමට ලැදි කෙනෙක් ලෙසද නැත්නම් ගැනීමට ලැදි කෙනෙක් ලෙසද?” යනු ගිලියද් උපදේශකයෙකු වූ මාක් නූමෙයර් මතු කළ ප්‍රශ්නය විය. ඔහු ඉදිරිපත් කළ අදහස් පදනම් වී තිබුණේ විනිශ්චයකාරයන් 5:2 මතය. එහිදී බාරාක්ගේ හමුදාවේ පරාර්ථකාමී ලෙස සේවය කිරීමට ස්වේච්ඡාවෙන් ඉදිරිපත් වීම ගැන ඊශ්‍රායෙලිතයන්ට ප්‍රශංසා කරනු ලැබීය. ආත්මික යුද්ධයේ වැඩි වැඩියෙන් හවුල් වීම සඳහා උතුම් බාරාක් වන යේසුස් ක්‍රිස්තුස් දුන් ආරාධනයට ප්‍රතිචාරය දැක්වීමෙන් පෙන්වූ කදිම ස්වභාවය සඳහා ගිලියද් ශිෂ්‍යයන්ට ප්‍රශංසා කරනු ලැබීය. තමන්ව එම වැඩයට බඳවාගත් තැනැත්තාගේ අනුමැතිය ලබාගැනීමට ක්‍රිස්තුස්ගේ භටයින් උනන්දු විය යුතුය. “අපවම සතුටු කිරීම කෙරෙහි අපේ අවධානය යොමු කිරීමට පටන්ගන්න විට, සතුරාට විරුද්ධව අපේ සටන නතර වෙනවා. . . . මිෂනාරි සේවය යනු ඔබ සම්බන්ධ දෙයක් නොවේ. එය යෙහෝවා, ඔහුගේ පරමාධිපත්‍යය සහ ඔහුගේ කැමැත්ත ඉටුවීම හා සම්බන්ධ දෙයකි. අප මිෂනාරිවරුන් ලෙස සේවය කරන්නේ යෙහෝවා අපව සතුටු කරනවා දැකීමට නොව, නමුත් අප ඔහුට ප්‍රේම කරන නිසයි.”—2 තිමෝති 2:4.
“සත්‍යතාවෙන් ඔවුන්ව විශුද්ධි කරන්න” යන ඊළඟ කොටස මෙහෙයවනු ලැබුවේ සහෝදර ලෝරන්ස් බොවන්. (යොහන් 17:17, NW) එකසිය පහළොස්වෙනි පන්තියේ ශිෂ්‍යයන් විශේෂ කර්තව්‍යයක් සඳහා වෙන් කරනු ලැබූ දෙවිගේ සේවකයන් බව ඔහු සඳහන් කළේය. පාසැලට සහභාගි වූ කාලය තුළදීද ඔවුහු ක්ෂේත්‍ර සේවයේ හවුල් වෙමින් සත්‍යයට ප්‍රේම කරන අවංක හදවත් ඇති අයව සෙවූහ. යේසුස් හා ඔහුගේ මුල් ගෝලයන් මෙන්, ශිෂ්‍යයන් කතා කළේ තමන්ගේම ‘පෙලඹීමකින්’ නොවේ. (යොහන් 12:49, 50, NW) දේවානුභාවය ලත් ජීවනදායක සත්‍ය වචනය ඔවුන් ඉදිරිපත් කළේ ඉතා ජ්වලිතයෙන්ය. ඔවුන්ට හමු වූ අය මත බයිබලය ඇති කළ ප්‍රබල බලපෑම ශිෂ්‍යයන්ගේ අද්දැකීම්වලින් හා ඔවුන් නිරූපණය කර පෙන්වූ සමහර සිද්ධීන්වලින් ඔප්පු විය.
උපදෙස් හා අද්දැකීම් තුළින් දිරිගැන්වීම සැපයේ
එක්සත් ජනපදයේ ශාඛා කාර්යාලයේ සේවා අංශයේ සාමාජිකයන් වන ඇන්තනී පෙරස් සහ ඇන්තනී ග්‍රිෆින්, ලෝකයේ විවිධ පැතිවලින් පැමිණි ශාඛා කමිටු සාමාජිකයන් සමඟ සම්මුඛ සාකච්ඡා පැවැත්වූහ. නවක මිෂනාරිවරුන්ට මුහුණ දීමට සිදු වන අභියෝග සහ පෞද්ගලික අද්දැකීම් මත පදනම් ප්‍රායෝගික උපදෙස් මොවුහු සාකච්ඡා කළහ. ශිෂ්‍යයන්ට පුරුදු නැති වෙනස් සංස්කෘතීන්, ආගමික සහ දේශපාලනමය වාතාවරණ හෝ වසර පුරාම පවතින නිවර්තනීය දේශගුණයක් මෙම අභියෝගවලට ඇතුළත්. තමන්ගේ අලුත් පරිසරයට ඔබින සේ කටයුතු කිරීමට නවක මිෂනාරිවරුන්ට උපකාරවත් වන්නේ කුමක්ද? යෙහෝවාට ප්‍රේමය, ජනයා සඳහා ප්‍රේමය, අත්හැරිය දේවල් දෙස ආපසු හැරී නොබැලීම හා හදිසි තීරණ නොගැනීමය. එක් ශාඛා කමිටු සාමාජිකයෙක් මෙලෙස කීවේය. “අපට පැවරුම ලැබී තිබෙන ප්‍රදේශයේ සිටින මිනිස්සු ශතවර්ෂ ගණනාවක් පුරා එහි ජීවත් වෙලා තියෙනවා. අපටත් එහි ජීවත් වී එම තත්වයන්ට සකස් විය හැකි බව නිසැකයි. දුෂ්කරතා පැනනැඟුණු සෑම අවස්ථාවක්ම, ඒවා අපගේ පෞද්ගලිකත්වය සකස් කිරීමට ලැබුණ ප්‍රස්තා හැටියට සැලකුවා. යාච්ඤාව හා යෙහෝවාගේ ආත්මය මත රඳා සිටීමට ඔබට හැකි අතර, ‘මම ඔබ සමඟ සිටිමි’ යන යේසුස්ගේ වදන්වල සත්‍යතාව ඔබ අනිවාර්යයෙන්ම අද්දකිවී.”—මතෙව් 28:20, NW.
“දෙවිගේ මහිමාන්විත දේවල් ගැන දිගටම කතා කරන්න” යන තේමාවෙන් යුත් කතාවත් සමඟ වැඩසටහන උච්ච අවස්ථාවකට ගෙන ආවේ පාලක මණ්ඩලයේ සාමාජිකයෙකු වන සැම්‍යුවල් හර්ඩ්. ක්‍රිස්තු වර්ෂ 33 පෙන්තකොස්ත දවසේදී ශුද්ධාත්මය වැගිරවීමෙන් අනතුරුව “දෙවිගේ මහිමාන්විත දේවල්” ගැන කතා කිරීමට යේසුස්ගේ ගෝලයන් ශක්තිය ලැබීය. දෙවිගේ රාජ්‍යය ගැන ඊට සමාන ජ්වලිතයක් ඇතුව අද දිනත් කතා කිරීමට නවක මිෂනාරිවරුන්ට උපකාර ලබාගත හැක්කේ කුමකින්ද? එම ශුද්ධාත්මයෙන්මය. උපාධි ලැබීමට සිටි එම ශිෂ්‍යයන්ට “ශුද්ධාත්මයෙන් පිරී ඉතිරී යන්න” කියා සහෝදර හර්ඩ් උනන්දු කළේය. තමන්ගේ නව පැවරුම් ගැන ප්‍රීතියෙන් කුල්මත් වී කටයුතු කිරීමට පටන්ගැනීමටත්, ඔවුන්ට ලබා දී තිබෙන පුහුණුව අමතක නොකිරීමටත් ඔහු ඔවුන්ට පැවසුවේය. (රෝම 12:11, NW) “බයිබලය දෙවිගෙන් ලද මහිමාන්විත දෙයක්, එහි වටිනාකම කිසිවිටකත් අවතක්සේරු කරන්න එපා. එහි තිබෙන පණිවිඩය ජීවමානයි. එය ඕනෑම කාරණයක සැබෑ තත්වය පෙන්වා දෙයි. ඔබගේ ජීවිතයේ කාරණා හරිගස්වාගැනීමට එය පාවිච්චි කරන්න. ඔබ කල්පනා කරන ආකාරය වෙනස් කිරීමට එයට ඉඩ දෙන්න. ශුද්ධ ලියවිලි අධ්‍යයනය කිරීමෙන්, කියවීමෙන් සහ මෙනෙහි කිරීමෙන් ඔබේ සිතුවිලි ආරක්ෂා කරගන්න. . . . ‘දෙවිගේ මහිමාන්විත දේවල්’ ගැන දිගටම කතා කිරීම සඳහා ඔබ ගිලියද් පාසැලෙන් ලැබූ පුහුණුව භාවිත කිරීමට ඉලක්ක කරගන්න. එසේ කිරීමට අධිෂ්ඨාන කරගන්න” යයි සහෝදර හර්ඩ් පැවසුවේය.
ලොව වටා සිටින හිතවතුන්ගේ සුභ පැතුම් කියවීමෙන් හා උපාධි පිරිනැමීමෙන් පසුව, ලැබූ පුහුණුව අගය කරමින් එම පංතියේ ශිෂ්‍යයන් ලිවූ ලිපියක් එක් ශිෂ්‍යයෙක් කියෙව්වේය. ඉන් අනතුරුව සහෝදර ලෙට් 2 ලේකම් 32:7 සහ ද්විතීය කථාව 20:1, 4ට යොමු දක්වමින් මෙම ප්‍රීතිමත් අවස්ථාව උචිත ආකාරයෙන් අවසන් කළේය. වැඩසටහනේ ආරම්භයේදී දුන් කතාවට මෙම වදන් සම්බන්ධ කරමින් ඔහු මෙලෙස කීවේය. “ඉතිං ආදරණීය උපාධි ලාභියෙනි, ඔබේ නව පැවරුම තුළ ආත්මික සටනක ඔබ යෙදෙද්දී යෙහෝවා දෙවි ඔබ සමඟ නිතර සිටින බව මතක තබාගන්න. ඔබට විරුද්ධව සිටින්නන්ට වඩා ඔබ සමඟ සිටින්නන් වැඩි බව කවමදාකවත් අමතක කරන්න එපා.”
[25වන පිටුවේ කොටුව]
පංතියේ දත්ත
නියෝජිත රටවල් සංඛ්‍යාව: 7
පැවරුම් ලැබූ රටවල් සංඛ්‍යාව: 17
ශිෂ්‍ය සංඛ්‍යාව: 48
වයස් සාමාන්‍යය: 33.7
සත්‍යය තුළ සිටි වසර ගණනේ සාමාන්‍යය: 17.8
පූර්ණ කාලීන සේවයේ යෙදී ඇති වසර ගණනේ සාමාන්‍යය: 13.5
[26වන පිටුවේ පින්තූරය]
ගිලියද් මුරටැඹ බයිබල් පාසැලේ උපාධි ලැබූ 115වන පංතිය
පහත සඳහන් ලැයිස්තුවේ පේළි, ඉදිරියේ සිට පසුපසට අංකනය කර ඇති අතර, එක් එක් පේළියේ වමේ සිට දකුණට නම් ලැයිස්තුගත කර තිබේ.
(1) බ්‍රවුන්, ටී.; ගෝල, සී.; හොෆ්මන්, ඒ.; බෲසීසි, ජේ.; ට්‍රාහන්, එස්. (2) ස්මාට්, එන්.; කෑෂ්මන්, එෆ්.; ගාසියා, කේ.; ලෝහන්, එම්.; සීෆට්, එස්.; ග්‍රේ, කේ. (3) බෙකට්, එම්.; නිකල්ස්, එස්.; ස්මිත්, කේ.; ගූල්‍යාරා, ඒ.; රැපනේකර්, ඒ. (4) ග්‍රේ, එස්.; වාසෙක්, කේ.; ෆ්ලෙමිං, එම්.; බෙතෙල්, එල්.; හර්මන්සන්, ටී.; හර්මන්සන්, පී. (5) රැපනේකර්, ජී.; ලෝහන්, ඩී.; ඩිකී, එස්.; කිම්, සී.; ට්‍රාහන්, ඒ.; වොෂිංටන්, ඒ.; ස්මාට්, එස්. (6) ගෝල, එල්.; බර්ග්හොෆර්, ටී.;ගූල්‍යාරා, ඩී.; නිකල්ස්, ආර්.; වොෂිංටන්, එස්.; කිම්, ජේ. (7) බෙකට්, එම්.; ඩිකී, ජේ.; ස්මිත්, ආර්.; ගාසියා, ආර්.; හොෆ්මන්, ඒ.; සීෆට්, ආර්.; බ්‍රවුන්, එච්. (8) ෆ්ලෙමිං, එස්.; බෲසීසි, පී.; බර්ග්හොෆර්, ඩබ්.;බෙතෙල්, ටී.; කෑෂ්මන්, ජේ.; වාසෙක්, කේ.