දේවශාපයක්ද?

ස්වාභාවික විපත් ඇති වන්නේ දේවශාපයක් නිසයි යන අදහස අලුත් එකක් නොවෙයි. වර්ෂ 1755දී පෘතුගාලයේ ලිස්බන් නුවරට බලපෑ භූමිකම්පාව සහ ඒ නිසා ඇති වූ ගිනි ගැනීම් මෙන්ම සුනාමි තත්වය නිසා 60,000ක් පමණ මිය ගිය විට ‘ලිස්බන්වල මේ තරම් දුෂ්ට මිනිසුන් ඉන්නවාද’ කියා ප්‍රසිද්ධ දාර්ශනිකයෙක් ඇසුවා. එවැනි සිද්ධීන් නිසා මිනිසුන්ට දඬුවම් කරන්න දෙවි ස්වාභාවික විපත් යොදාගන්නවාද යන ප්‍රශ්නය ගැන බොහෝදෙනා කල්පනා කරනවා. බොහෝ රටවල සිටින අය එවැනි විපත් හඳුන්වන්නේ දේවශාපයන් ලෙසයි.

දෙවි ස්වාභාවික විපත් යොදාගෙන මිනිසුන්ට දඬුවම් කරනවාද? මෑතකදී සිදු වූ ස්වාභාවික විපත් දෙවිගෙන් ලැබුණු දඬුවම්ද? එවැනි ප්‍රශ්න ගැන සලකා බැලීම වැදගත්.

ස්වාභාවික විපත් දෙවිගේ දඬුවමක් ලෙස විශ්වාස කරන අය ඊට සාක්ෂි ලෙස බයිබලයේ සඳහන් සිද්ධීන්ද සඳහන් කරනවා. (උත්පත්ති 7:17-22; 18:20; 19:24, 25; ගණන් කතාව 16:31-35) නමුත් බයිබලයේ සඳහන් එම සිද්ධීන් සහ වර්තමානයේ සිදු වන ස්වාභාවික විපත් අතර කැපීපෙනෙන වෙනස්කම් තුනක් තිබෙනවා. 1. බයිබලයේ සඳහන් විනාශයන් ඇති වීමට පෙර ඒ ගැන අනතුරු ඇඟෙව්වා. 2. බයිබලයේ සඳහන් සිදුවීම්වලදී විනාශ වුණේ නරක මිනිසුන් පමණයි. 3. අහිංසක මිනිසුන්ට ඉන් බේරීමට යම් ක්‍රම දෙවි සලසා දුන්නා.—උත්පත්ති 7:1, 23; 19:15-17; ගණන් කතාව 16:23-27.

විශාල දේපළ හානි හා ජීවිත හානි සිදු කරමින් එක පිට එක සිදු වන ස්වාභාවික විපත් නිසා මිනිසුන්ගේ ජීවිතවල විශාල වෙනස්කම් සිදු වෙනවා. නමුත් එම ව්‍යසන සිදු කරන්නේ දෙවි බව පැවසීමට කිසිම සාක්ෂියක් නැහැ. එසේනම් වර්තමානයේ මෙතරම් ස්වාභාවික විපත් සිදු වෙන්නේ ඇයි? එවැනි තත්වයකට අපට මුහුණ දෙන්න පුළුවන් කොහොමද? ස්වාභාවික විපත් ඇති නොවන කාලයක් පැමිණේවිද? ඒ ප්‍රශ්නවලට පිළිතුරු ඊළඟ ලිපිවල සාකච්ඡා කරනවා.