හැමදාම ජීවත් වෙන්න පුළුවන්ද?

1. අපේ ජීවිතය මේ තරම් කෙටියි කියලා අපිට හිතෙන්නේ ඇයි?

සමහර කැස්බෑවන් අවුරුදු 150ක් ජීවත් වෙනවා. සමහර ගස් අවුරුදු 3,000ක් පවතිනවා. ඒත් ඒ දේවලට වඩා වටින අපේ ජීවිතය හරිම කෙටියි. සංගීතය, ක්‍රීඩා, කෑම, සංචාරය කිරීම, අධ්‍යාපනය, එකිනෙකාව ආශ්‍රය කිරීම වගේ දේවලින් ලොකු සතුටක් ලබන ගමන් හැමදාම ජීවත් වෙන්නත් අපි ආසයි. ඒ ආසාව ඇතුව තමයි යෙහෝවා දෙවි අපිව නිර්මාණය කරලා තියෙන්නේ.—දේශනාකාරයා 3:11 කියවන්න.

2. අපිට හැමදාම ජීවත් වෙන්න පුළුවන්ද?

ජීවිතයේ උල්පත වන යෙහෝවා දෙවිට අවසානයක් නැහැ. අපිට හැමදාම ජීවත් වීමේ අවස්ථාව දෙන්න පුළුවන් දෙවිට විතරයි. (ගීතාවලිය 36:9; හබක්කුක් 1:12) දෙවිට කීකරු වෙන අයට ඒ අවස්ථාව දෙන්න දෙවිම පොරොන්දු වෙලා තියෙනවා. දුකට හේතු වෙන හැම දෙයක්ම එදාට දෙවි අයින් කරනවා.—යෝබ් 33:24, 25; යෙසායා 25:8; 33:24 කියවන්න.

දෙවිට ඒ දේවල් කරන්න බලය තියෙනවා කියලා යේසුස් පොළොවේ ඉද්දී කරපු දේවලින් ඔප්පු වුණා. අසනීපවලින් දුක් වින්ද හුඟක් අයව සුව කළ යේසුස් මැරුණු අයටත් නැවත ජීවිතය දුන්නා.—ලූක් 7:11-15, 18, 19, 22 කියවන්න.

3. අපිට හැමදාම ජීවත් වෙන්න පුළුවන් වෙන්නේ කවදාද?

අපි ප්‍රශ්න ගැටලු නිසා දුක් විඳිනවා වෙනුවට පාරාදීස පොළොවක හැමදාමත් සතුටින් ජීවත් වෙනවාටයි යෙහෝවා දෙවි කැමති. (ගීතාවලිය 37:9, 29; යෙසායා 65:21,22) ඒ නිසා දෙවි ළඟදීම මේ පොළොව පාරාදීසයක් කරනවා. මැරුණු අයටත් ඒ කාලෙදී ආයෙත් ජීවිතය ලැබෙනවා. ඒ කාලෙදී තමයි දෙවිට කීකරු වෙන අයට හැමදාමත් ජීවත් වෙන්න පුළුවන් වෙන්නේ.—ලූක් 23:42, 43; යොහන් 5:28, 29 කියවන්න.

4. සදාකාල ජීවිතය ලබාගන්න අපි මොනවද කරන්න ඕනේ?

අපි දෙවිව හොඳින් දැන හඳුනාගන්න ඕනේ. ඒ දේ කරන්න අපිට බයිබලය උදව් වෙනවා. අපේ ජීවිතය රඳා පවතින්නේ කෑම වේලක් මත නෙවෙයි, දෙවි පවසන දේවල් මත කියලා බයිබලයේ සඳහන් වෙනවා. (මතෙව් 4:4) කෑම කන එක ලේසි දෙයක් වුණත් ඒවා හදන්න මහන්සි වෙන්න ඕනේ. ඒ වගේ තමයි දෙවි කියලා තියෙන දේවල් තේරුම් අරගෙන ඒවා ජීවිතයට අදාළ කරගන්නත් අපි මහන්සි වෙන්න ඕනේ. සදාකාල ජීවිතය තරම් වටිනා වෙන කිසිම දෙයක් නැති නිසා ඒ මහන්සිය කවදාවත් අපතේ යන්නේ නැහැ.—ලූක් 13:23, 24; යොහන් 6:27; 17:3 කියවන්න.