“ත්‍යාගශීලී තැනැත්තාට ආශීර්වාද කරනු ලැබේ”
එදා ඉඳන්ම පූජාවලට, පරිත්‍යාගවලට හිමි වුණේ විශේෂ තැනක්. ඊශ්‍රායෙල්වරු සත්ව පූජා ඔප්පු කළා. යේසුස්ගේ අනුගාමිකයන් “දෙවිට කරන ප්‍රශංසාව” සලකන්නේ පූජාවක් හැටියට. පරිත්‍යාගයන් කරලා යෙහෝවා දෙවිගේ හිත සතුටු කරන්න පුළුවන් තවත් විදි තියෙනවා. (හෙබ්‍රෙ. 13:15, 16) එහෙම කරද්දී සතුටක් වගේම ආශීර්වාද අද්දකින්න පුළුවන් කියලා මේ උදාහරණවලින් පැහැදිලි වෙයි.
දෙවිට විශ්වාසවන්තව සේවය කරපු හන්නාට දරුවෝ හිටියේ නැහැ. දවසක් එයා යාච්ඤාවකින් දෙවිට පොරොන්දු වුණා එයාට පුතෙක් දුන්නොත් ඒ පුතාව ‘මුළු ජීවිත කාලය පුරාම දෙවිට සේවය කරන්න කැප කරනවා’ කියලා. (1 සාමු. 1:10, 11) කාලයක් යද්දී හන්නාට පුතෙක් ලැබුණා. එයාගේ නම සාමුවෙල්. කිරි බොන වයස පහු වුණාම හන්නා පොරොන්දු වුණ විදිහටම පුතාව ශුද්ධ කූඩාරමට අරන් ගියා. හන්නා කරපු පරිත්‍යාගය අගය කරපු දෙවි පස්සේ කාලෙක එයාට තව දරුවෝ 5දෙනෙක්ම ලබා දුන්නා. සාමුවෙල් අනාගතවක්තෘවරයෙක් වුණා. බයිබලේට ඇතුළත් පොත් ලියන්නත් දෙවි එයාව පාවිච්චි කළා.—1 සාමු. 2:21.
හන්නා, සාමුවෙල් වගේ අපිටත් අවස්ථාව තියෙනවා දෙවිට කරන සේවය වෙනුවෙන් අපේ ජීවිත සම්පූර්ණයෙන්ම කැප කරන්න. යේසුත් පොරොන්දු වුණා අපි අත්හරින ඕනම දේකට වඩා වැඩියෙන් අපිට ආශීර්වාද කරනවා කියලා.—මාක් 10:28-30.
දොර්කස් ‘බොහෝ යහපත් දේවල් කළ, නිතරම අනුන්ට නොයෙකුත් දේවල් තෑගි කළ තැනැත්තියක්.’ හදිස්සියේම එයා ලෙඩ වෙලා මැරුණාම සභාවේ අය කොච්චර දුක් වෙන්න ඇද්ද! එයාලා ළඟපාත ප්‍රදේශයක හිටපු පේතෘස්ට ඉක්මනින්ම එන්න කියලා පණිවිඩයක් යැව්වා. පේතෘස් ඇවිත් දොර්කස්ව නැවත නැඟිට්ටෙව්වාම එයාලට දැනුණ සතුට හිතාගන්න පුළුවන්ද? නියෝජිතයෙක් ඒ වගේ දෙයක් කරපු මුල්ම අවස්ථාව ඒකයි. (ක්‍රියා 9:36-41) දොර්කස් කරපු පරිත්‍යාගයන් දෙවිට අමතක වුණේ නැහැ. (හෙබ්‍රෙ. 6:10) එයාගේ ත්‍යාගශීලීකම ගැන දෙවි බයිබලේ වාර්තා කළේ අපිටත් එයාව ආදර්ශයට ගන්නයි.
පරිත්‍යාගයන් කරපු තවත් කෙනෙක් තමයි පාවුල්. එයා අනිත් අය ගැන හුඟක් සැලකිලිමත් වුණා. එයාලා වෙනුවෙන් කාලය දුන්නා. “ඔබ වෙනුවෙන් මා සතු සෑම දෙයක්ම, මගේ ජීවිතය පවා දීමට සතුටු වන්නෙමි” කියලා කියන්න එයාට පුළුවන් වුණේ ඒ නිසයි. (2 කොරි. 12:15) අනිත් අය වෙනුවෙන් තමන්ගේ මුළු ජීවිතේම කැප කරද්දී ඒකෙන් ලොකු සතුටක් ලැබෙනවා වගේම යෙහෝවා දෙවිගේ ආශීර්වාදය, අනුමැතිය ලැබෙනවා කියලා පාවුල් අද්දැක්කා.—ක්‍රියා 20:24, 35.
දේවරාජ්‍යයේ වැඩකටයුතු වෙනුවෙන්, සහෝදරයන් වෙනුවෙන් අපේ කාලය, ශ්‍රමය දෙද්දී දෙවි ඒ ගැන සතුටු වෙනවා කියලා අපිට කිසිම සැකයක් නැහැ. දේශනා කරන කාර්යයට තවත් පැතිවලින් අතහිත දෙන්න අපිට පුළුවන්ද? අපිට තියෙන වටිනා දේවල් කැමැත්තෙන්ම පරිත්‍යාග කරලා ඒ දේ කරන්න පුළුවන්. ලෝකේ අස්සක් මුල්ලක් නෑර ශුභාරංචිය දේශනා කරන්න හවුල් වෙන මිෂනාරිවරුන්ව, විශේෂ පූර්ණකාලීන සේවකයන්ව බලා කියා ගන්න අපි දෙන සම්මාදම් පාවිච්චි කරනවා. දිගටම අපේ පොත් පත්, වීඩියෝ පරිවර්තනය කරන්නත් ආපදාවලදී සහන සේවා ලබා දෙන්නත් නමස්කාර මධ්‍යස්ථාන ඉදි කරන්නත් පුළුවන් වෙන්නේ අපි දෙන සම්මාදම් නිසයි. “ත්‍යාගශීලී තැනැත්තාට ආශීර්වාද කරනු ලැබේ” කියන දෙවිගේ පොරොන්දුවේ ඉටු වීම පරිත්‍යාගයන් කරන අය අනිවාර්යයෙන්ම අද්දකිනවා. ඒ විතරක් නෙමෙයි තමන් සතු දේවල් යෙහෝවා දෙවිට දීලා ඔහුව ගෞරවයට පත් කරන්නත් එයාලට අවස්ථාව ලැබෙනවා.—හිතෝ. 3:9; 22:9, NWT.