“දෙවිගේ වචනය උගන්වන්නෝ” දිස්ත්‍රික් සමුළුවේදී ඉගෙනගත් දේවල් ඔබ අදාළ කරගනිමින් සිටිනවාද?
1 දෙවිගේ වචනය උගන්වන්නන් ලෙස සේවය කිරීම සඳහා තමන්ට දී තිබෙන බලපැවරුම ඉටු කිරීම, යෙහෝවාට නමස්කාර කරන අයගෙන් බලාපොරොත්තු වන බව පසුගිය දිස්ත්‍රික් සමුළුවට ගිය සෑම කෙනෙක්ම පාහේ තේරුම්ගන්න ඇති. (මතෙ. 28:19, 20) සමුළුව අවසන් වී නිවෙස් බලා යන විට, ඔබ පෞද්ගලිකව හා ක්ෂේත්‍ර සේවයේදී අදාළ කරගන්නවා කියා අධිෂ්ඨාන කරගත් විශේෂ කරුණු මොනවාද?
2 දේවානුභාවයෙන් ලද ලියවිලි ඉගැන්වීම සඳහා ප්‍රයෝජනවත්ය: පළමුවන දවසේ තේමාව මගින් 2 තිමෝති 3:16 කැපීපෙනෙන්න සැලැස්වුවා. අප “දෙවිගේ වචනය උගන්වන්නන් වශයෙන් පූර්ණ ලෙස සූදානම්ව [සිටිය]” යුතු බව මූලික ඇමතුම මගින් අපට පෙන්වා දුන්නා. දෙවිගේ වචනය උතුම් කොට සලකමින් මිනිස් මතිමතාන්තර හා සම්ප්‍රදායන්ට වඩා එයට ගරු කළ යුතු බවත් ඉගැන්වීමේදී සැමවිටම එය යොදාගත යුතු බවත් එහිදී තවදුරටත් පැහැදිලි කළා. අපේ සේවය කරගෙන යෑම සඳහා ශුද්ධාත්මය ඉල්ලමින් අපි දිනපතාම යාච්ඤා කළ යුතුයි. එහි ප්‍රධානම ඵලය වන ප්‍රේමය වර්ධනය කරගැනීමට උපකාර කරන්න කියාත් යාච්ඤාවේදී සඳහන් කළ යුතුයි. දේවසේවකයන් වශයෙන් අපව පුහුණු කිරීම සඳහා යෙහෝවාගේ භූමික සංවිධානය මගින් පිළියෙළ කර තිබෙන රැස්වීම් සෑම එකකින්ම අප ප්‍රයෝජන ගත යුතුයි.
3 “අනුන්ට උගන්වන විට, අපිත් උගනිමු” නමැති තේමාව යටතේ සිකුරාදා ඉදිරිපත් කළ කතා මාලාවේදී අප ආදර්ශවත් විය යුතු පැති තුනක් පැහැදිලි කළා. (1) ක්‍රිස්තියානි සදාචාරය හා සම්බන්ධ සියලුම කාරණාවලදී දෙවිගේ නීතිවලට ඇලී සිටීම (2) යහපත් අධ්‍යයන පුරුදු දිගටම පවත්වාගෙන යෑම හා (3) සාතන් ඔහුගේ වාසියට හරවාගත හැකි වැරදි ආකල්ප හා තත්වයන් අපේ හදවත් හා මනස්වලින් ඉවත් කිරීම එම පැති තුනට අයත් වෙයි. ඊළඟට අපි ඉගෙනගත්තේ ලොව පුරා වසංගතයක් මෙන් පැතිරී යන කාමුක කෘතිවලින් අපේ පවුලේ අයව ආරක්ෂා කරගත හැකි ආකාරය ගැනයි. ලිංගික දර්ශනයක් දෙස බැලීමට මොහොතක්වත් ගත නොකිරීමෙන් දරුවන්ට ආදර්ශයක් තැබීමටත්, දරුවන් අන්තර් ජාලය පාවිච්චි කරන විට හා රූපවාහිනිය නරඹන විට ඒ ගැන විමසිලිමත් වීමටත් දෙමාපියන්ව දිරිගන්වනු ලැබුවා. සිකුරාදා වැඩසටහනෙහි ඉදිරිපත් කළ තොරතුරුවලින් ඔබ අදාළ කරගැනීමට පටන්ගෙන තිබෙන්නේ කුමන කරුණුද?
4 යෙහෝවා සපයන ආලෝකය ඉමහත් සේ අගය කිරීමටත්, දෙවිගේ විශ්වාසවන්ත ආලේප ලත් පන්තියට සමීපව සිටීමටත්, දෙවිගේ සෙනඟ අතර තිබෙන සාමය තවත් වර්ධනය කිරීම සඳහා හවුල් වීමටත් අප ගෙන තිබෙන අධිෂ්ඨානය සිකුරාදා ඉදිරිපත් කළ අවසාන කතාවෙන් තවත් ශක්තිමත් වුණා. යෙසායාගේ අනාවැකිය—සියලු මනුෂ්‍යවර්ගයා සඳහා පහන II නමැති අලුත් පොත ඔබ කියවා අවසන්ද?
5 අනුන්ට ඉගැන්වීම සඳහා යෝග්‍ය ලෙස සුදුස්සන් වෙමු: දෙවන දවසේ තේමාව පදනම් වූයේ 2 තිමෝති 2:2 මතයි. සෙනසුරාදා උදෑසන ඉදිරිපත් කළ කතා මාලාවට ඔබ සවන් දෙද්දී, (1) සුදුස්සන්ව සෙවීම, (2) ඔවුන්ගේ උනන්දුව වැඩි කිරීම හා (3) ක්‍රිස්තුස් අණ කළ සියල්ල පැවැත්වීමට ඔවුන්ට ඉගැන්වීම යන කාරණා තුන සිදු කරන ආකාරය ගැන දුන් යෝජනා ඔබ සැලකිල්ලට ගත්තාද? ඔබ ඉගෙනගත් දේවල් අදාළ කරගනිමින් අඩුම තරමින් එක ශුද්ධ ලියවිලි පාඨයක්වත් ගෙවැසියන්ට පෙන්වා, නැවත බැලීමක් සඳහා පදනම දමාගැනීමට ඔබ කටයුතු කරමින් සිටිනවාද?
6 උතුම් ගුරුවරයා වන යේසුස් ක්‍රිස්තුස්ව අනුකරණය කිරීමේ තිබෙන වැදගත්කම පස්වරු වැඩසටහනේදී අවධාරණය කළා. ඔහු මෙන් වීමට ඔබ උත්සාහ කරමින් සිටින්නේ කිනම් ආකාරවලින්ද? එදින දෙවන කතා මාලාවෙන් ඔබ ඉගෙනගත්තේ මොනවාද? “දිව්‍යාණ්ඩු අධ්‍යාපනයෙන් වැඩිමනත් ප්‍රයෝජන [නෙළාගැනීමට]” හැකි ක්‍රම ගැන ඔබට හැඟෙන්නේ කෙසේද? පෞද්ගලික අධ්‍යයනයේදී හා සභා රැස්වීම්වලදී ඔබේ අවධානය යොමු කිරීමේ හැකියාව දියුණු කරගැනීම සඳහා ඔබ අදාළ කරගෙන තිබෙන යෝජනා මොනවාද?
7 ඉදිරියේදී මුදාහැරීමට නියමිත දිව්‍යාණ්ඩු සේවා පාසැල් අධ්‍යාපනයෙන් ප්‍රයෝජන ලබමු නමැති ප්‍රකාශනය, දෙවිගේ වචනය උගන්වන්නන් හා කථිකයන් වශයෙන් අපේ හැකියාවන් දියුණු කරගැනීමට උපකාරවත් වනවාට නිසැකයි. බයිබල් කාලවල සිටි දෙවිගේ විශ්වාසවන්ත සේවකයන් තුළ තිබූ කථික ගුණාංගවලට එම පොතෙහි විශේෂ අවධානයක් දෙයි. මෙම අලුත් පොතේ තිබෙන සෑම පාඩමකම තිබෙන කොටුවල කෙටියෙන් අප කළ යුතු දේවල් හා ඒවා කිරීමේ වැදගත්කම ගැනත් එය කරන ආකාරය ගැනත් පෙන්වා දී තිබෙනවා. ප්‍රායෝගික අභ්‍යාසද මෙහි ඇතුළත් වෙයි. සහෝදරියන්ට කතා ඉදිරිපත් කිරීමේදී තෝරාගැනීමට පසුබිම් 29ක් මෙහි තිබෙනවා. කතාවේදී නිවේදනය කළ පරිදි පසු කාලයේදී පාසැල පවත්වන ආකාරයෙහි යම් වෙනස්කම් කරනු ලබයි. සෑම සතියකම පවත්වන දිව්‍යාණ්ඩු සේවා පාසැලෙන් පූර්ණ ප්‍රයෝජන අත් කරගැනීම සඳහා අධ්‍යයනය කිරීමේ හා සූදානම් වීමේ පුරුද්ද ඔබ වර්ධනය කරගෙන තිබෙනවාද?
8 කාලය ප්‍රකාරයට ගුරුවරු වෙමු: ඉරිදා දවසේ තේමාව හෙබ්‍රෙව් 5:12 මත පදනම් වූ අතර, දවස පුරා ඒ ගැන සිතීමට එදින වැඩසටහන සබයට උපකාරවත් වුණා. “යෙහෝවාගේ දවස සඳහා අපව සූදානම් කරවන මලාකීගේ අනාවැකිය” යන තේමාවෙන් යුතුව ඉදිරිපත් කළ උදෑසන කතා මාලාවෙන් අප සතු හොඳම දෙය දෙවිට දීමටත්, සෑම ආකාරයකම ද්‍රෝහිකම් හෙළා දැකීමටත් අපව දිරිමත් කළා. අප එය කළොත් බිය උපදවන යෙහෝවාගේ මහත් දවසින් බේරී ජීවත් වීමට අපට පුළුවන්. උඩඟුකම, කීර්තිය හා තනතුරු ලබාගැනීමේ ආශාව, ඊර්ෂ්‍යාව හා පක්ෂපාතකම සම්බන්ධයෙන් කෝරා හා ඔහුගේ ආශ්‍රිතයන් තුළ තිබූ වැරදි ආකල්පය යෙහෝවාට විරුද්ධව කැරලිගැසීමට මඟ පෑදූ ආකාරය ගැන ප්‍රබල පණිවිඩයක් “යෙහෝවාගේ අධිකාරයට ගෞරව කරමු” නමැති නාට්‍යය මගින් ඉදිරිපත් කළා. අදදින පවුල හා සභාව තුළ දිව්‍ය අධිකාරයට යටතේ වීමේ ඇති අවශ්‍යතාව නාට්‍යයෙන් පසු ඉදිරිපත් කළ කතාවෙන් අවධාරණය කළා. “සියලු ජාතීන්ට සත්‍යය උගන්වන්නේ කවුද?” නමැති තේමාවෙන් යුත් ප්‍රසිද්ධ කථාවේදී, බයිබලයේ සඳහන් සත්‍යය උගන්වනවා කියා නමට පවසන ක්‍රිස්තියානි ආගම්වලට වඩා වෙනස්ව, සත්‍යය උගන්වන්නේ යෙහෝවාගේ සාක්ෂිකරුවන් බවට සාක්ෂි සපයනු ලැබුවා.
9 වඩාත් හොඳින් දෙවිගේ වචනය උගන්වන්නන් වීම සඳහා යෙහෝවා අපව පුහුණු කරමින් සිටින බව පැහැදිලියි. ‘අපවද අපගේ වචන අසන්නන්වද ගළවාගැනීම සඳහා අප ගැනත් අපගේ ඉගැන්වීම ගැනත් සැමවිටම අවධානයෙන් සිටිමින්’ අප ඉගෙනගත් දේවල් අදාළ කරගනිමු.—1 තිමෝ. 4:16.