බයිබල් ශිෂ්‍යයන් හඳුනන අය සමඟ පාඩම් පවත්වන්න පුළුවන්ද?
ඔබ දැනට බයිබල් පාඩමක් පවත්වනවා නම්, බයිබලය ඉගෙනගන්න කැමති මිත්‍රයන්, නෑදෑයන් හෝ හඳුනන අය ඉන්නවාද කියා ශිෂ්‍යයාගෙන් අසන්න. කිහිපදෙනෙකු ගැන ඔහු සඳහන් කරනවාට කිසිම සැකයක් නැහැ. ඒ අයගේ නම සහ ලිපිනය ඉල්ලාගෙන ඔවුන්ව ගොස් හමුවෙන්න. ඔබේ ශිෂ්‍යයා කැමති නම් ඔහුද ඔබ සමඟ පාඩම් කරන බව කියා, බයිබල් පාඩමක් පටන්ගැනීමට කැමතිදැයි ඒ අයගෙන් අසන්න. ඔබට මෙසේ කිව හැකියි. “[ශිෂ්‍යයාගේ නම] මා එක්ක බයිබලය පාඩම් කරනවා. එයා කිව්වා ඔයාත් එයා වගේ බයිබලය ඉගෙනගන්න කැමති වෙයි කියලා. ඇත්තටම ඔයා කැමතිද එහෙම දේකට?” බයිබලයේ ඉගැන්වීම් පොත යොදා ගනිමින් පාඩම කරන ආකාරය කෙටියෙන් පෙන්වන්න.
ඔබ සමඟ දැනටමත් පාඩම් කරන කෙනෙක් හොඳ ප්‍රගතියක් දක්වමින් සිටිනවා නම්, බයිබල් පාඩම් කරන සැලැස්ම ගැන ඔහුගේ හෝ ඇගේ මිතුරන්ට හෝ පවුලේ අයට මේ ගැන පවසන ලෙස දිරිගන්වන්න. ඔහුගේ පාඩමට හවුල් වන ලෙස ඒ අයට ආරාධනා කිරීමට ඔහුට පුළුවන්. නැත්නම්, පාඩමක් කරන ආකාරය ඔවුන්ට පෙන්වා දීමට ඔවුන්ව මුණගස්වන මෙන් ඔබේ ශිෂ්‍යයාගෙන් ඉල්ලා සිටින්න. ඔබ එසේ කිරීමෙන් ඔබේ ශිෂ්‍යයාත් බයිබලයේ දැනුම වෙනත් අය සමඟ බෙදාගැනීමට පටන් ගනීවි.
ඔබ නැවත බැලීම් කරන අය තවමත් පාඩමක් පටන් ගෙන නැතත්, ඔවුන්ද දන්නා හඳුනන අය ඔබට හමුවිය හැකියි. නැවත බැලීමකදී බයිබලයේ ඉගැන්වීම් පොතක් බෙදා දෙන විට, “ඔයා හඳුනන කවුරු හරි කෙනෙක් මේ පොත ලබා ගෙන කියවන්න කැමති වෙයිද?” කියා ඒ තැනැත්තාගෙන් අසන්න ඔබට පුළුවන්.
ඉතිරි වී තිබෙන්නේ ඉතා කෙටි කාලයයි. බොහෝදෙනෙක් තවමත් යෙහෝවා දෙවි ගැන ඉගෙනගෙන නැහැ. ඒ නිසා ශුභාරංචිය අසා ඊට කීකරු වීමට අපි මේ ක්‍රමයත් යොදාගෙන ජනයාට උදව් කරමු.