එක්රැස්වීම් ශාලාව සහ රාජ්‍ය ශාලා නඩත්තුව —පරිශුද්ධ සේවයේ වැදගත් අංගයක්
1. එක්රැස්වීම් සහ රාජ්‍ය ශාලා ඉදි කිරීම කොතරම් සාර්ථක වී තිබෙනවාද? නමුත් තවත් කුමක් කිරීමට තිබේද?
1 මෑතකදී අපි අපේ එක්රැස්වීම් ශාලාව සාදා නිම කර කැප කළා. අපටම මෙවන් ශාලාවක් තිබීම මොන තරම් ප්‍රීතියක්ද! මෙහි අපේ චාරිකා එක්රැස්වීම් සහ දිස්ත්‍රික් සමුළු ඉතා සාර්ථකව පවත්වා තිබෙනවා. පසුගිය වසර පහ පුරා, ශ්‍රී ලංකාවේ රාජ්‍ය ශාලාවල් 33ක් ගොඩනඟා තිබෙන අතර, ශාලා අටක් අලුත්වැඩියා කර තිබෙනවා. ඒ සඳහා උපකාර කළ සියලුදෙනාවම අපි ඉතා අගය කරන අතර, ඔවුන්ට ස්තුතිවන්ත වෙමු! ඉතා විශාල වැඩ කොටසක් කර තිබුණත්, මෙම ශාලා නඩත්තු කිරීමට තවත් බොහෝ දේ කළ යුතුයි. යෙහෝවාට අප කරන පරිශුද්ධ සේවයේ මේ වැදගත් අංගයට සහයෝගය දැක්වීමට අප සියල්ලන්ට උපකාර කළ හැක්කේ කෙසේද?—එළි. 7:15.
2. ගොඩනැඟිලි නඩත්තු කිරීමේ කාර්යයට කෙළින්ම සහයෝගය දැක්වීමට අපට හැක්කේ කෙසේද?
2 කැමැත්තෙන්ම ඉදිරිපත් වන්න: ඔබ බව්තීස්ම ලත් ප්‍රචාරකයෙක් නම්, එක්රැස්වීම් ශාලාව නඩත්තු කිරීමට සහය වීමට කැමැත්තෙන්ම ඉදිරිපත් වන ලෙස අපි ඔබට ආරාධනා කරමු. ඒ සඳහා Application for Temporary Volunteer at the Assembly Hall (AH-1 7/05) යන පෝරමය පුරවා එවන්න. සෑම රාජ්‍ය ශාලාවක්ම නඩත්තු කිරීමේ වගකීම පැවරී ඇත්තේ එම ශාලාව පාවිච්චි කරන සභාවන්වලටයි. තවද එම ශාලා නඩත්තු කිරීමට සහය වීම සඳහා කණ්ඩායමේ සිටින ස්වේච්ඡා සේවකයන්ව යම් අවස්ථාවලදී යොමු කරනවා. සභාවන්ට උපකාර කිරීමට කැමති අයට තමන්ගේ ස්වේච්ඡා අයැදුම් පතේ (AH-1) මේ බව සඳහන් කළ හැකියි. (ගීතා. 110:3) සියලුම ස්වේච්ඡා සේවකයන් කැමැත්තෙන් සේවය කළ යුතු අතර, සහයෝගයෙන් ක්‍රියා කළ යුතුයි. (ගීතා. 133:1) ඔබට ගොඩනැඟිලි ඉදි කිරීම සඳහා දක්ෂතා නොතිබුණත්, මෙම නඩත්තු කිරීම්වලට සාර්ථකව සහය වීමට බොහෝ දේ කළ හැකියි. මේ සම්බන්ධයෙන් ඔබට යම් පුහුණුවක් ලබා දෙන අතර එම පුහුණුව නිසා අනාගතයේදී තවත් පුළුල් ලෙස ඔබව යොදාගැනීමට අවස්ථාවන් ඇති වේවි.
3. මෙම සැලැස්මට සහය වීමට අපට හැකි වෙනත් ක්‍රම මොනවාද?
3 ඔබට මේ සඳහා ස්වේච්ඡාවෙන් ඉදිරිපත් වීමට නොහැකි නම්, කුමක් කළ හැකිද? එසේ වුණත් ඔබට මෙම කාර්යයට සහය දිය හැකියි. ඒ, වෙනත් අයව මේ සඳහා දිරිගැන්වීමෙන්. මේ කාර්යය සඳහා සභාවෙන් පිටත ගොස් ඇති අයගේ සභා වගකීම් ඉසිලීමට ඔබට හැකියි. නඩත්තු කටයුතු සඳහා ඇතැම් අය සභාවෙන් පිටව සිටින විට, සභාවේ කටයුතු හොඳින් කරගැනීමට වැඩිමහල්ලන්ට කලින්ම සැලසුම් යෙදිය හැකියි. නඩත්තු කටයුතු සඳහා මුදලින් සම්මාදම් කිරීමටද අපට පුළුවන්. එක්රැස්වීම් ශාලාව නඩත්තු කෙරෙන්නේ චාරිකා එක්රැස්වීම් සහ විශේෂ එක් දින රැස්වීම්වලදී ලැබෙන සම්මාදම් මගින්. මෙම එක්රැස්වීම්වලදී ඔබ කරන සම්මාදම් නඩත්තු කටයුතු සඳහා බොහෝ උපකාරී වෙනවා. සභාවේ සම්මාදම් පෙට්ටියට දමන මුදල් අපගේ රාජ්‍ය ශාලාව නඩත්තු කිරීමට වැය වෙනවා. එසේනම්, රාජ්‍ය කටයුතු වර්ධනය කිරීම සඳහා අප එකට එකතු වී වැඩ කරන විට යෙහෝවා ඒ ගැන සතුටු වෙනවාට කිසිම සැකයක් නැහැ.—හෙබ්‍රෙ. 13:16.
4. නඩත්තු කටයුතුවල සහභාගි වන අයව අගය කිරීමට අපට හැක්කේ කෙසේද?
4 අගය කරන්න: අපේ නමස්කාර ස්ථාන නඩත්තු කිරීමට බොහෝ කාලයක් වැය වන අතර ඒ සඳහා වෙහෙස මහන්සි විය යුතුයි. ඒ නිසා මේවායේ නඩත්තු කටයුතු කිරීමට අපගෙන් සමහරදෙනෙක් යම් අවස්ථාවලදී සභාවෙන් පිටතට ගොස් තිබෙනවා ඇති. එසේනම්, “කළ යුතු මේ කාර්යය සඳහා” ආත්ම පරිත්‍යාගයෙන් ක්‍රියා කරන සහෝදර සහෝදරියන්ට ප්‍රශංසා කිරීමෙනුත් දිරිගැන්වීමෙනුත් ඔවුන්ව අගය කරමු. —ක්‍රියා 6:3; රෝම 14:19.
5. ස්වේච්ඡා සේවකයන්ට සමබරතාව පෙන්විය හැක්කේ කෙසේද?
5 සමබර වෙන්න: දෙවිගේ රාජ්‍යය ගැන දේශනා කිරීම අපේ මූලික වගකීමයි. (මාක් 13:10) මෙය මතකයේ තබාගෙන ස්වේච්ඡා සේවකයන් තමන්ගේ වගකීම ඉටු කළ යුත්තේ සමබරවයි. මව් සභාවෙන් පිට වී සිටීමට සිදු වේ නම්, තමන්ට පැවරී ඇති සභා පැවරුම් සුදුසුකම් ඇති වෙනත් අය විසින් ඉටු කරන බවට ඔවුන් වගබලා ගත යුතුයි.
6. සභාවේ සියලුදෙනා සැබෑ නමස්කාරය වැඩිදියුණු කිරීමට සහයෝගයෙන් ක්‍රියා කරන විට කුමක් ඉෂ්ට වේද?
6 සභාවේ සියලු සාමාජිකයන් එකට එක්සත්ව “ශරීරය ප්‍රේමයෙන් යුක්තව ගොඩනැඟෙන පිණිස මුළු ශරීරයම එහි වර්ධනය උදෙසා ක්‍රියා” කරන බව පාවුල් විස්තර කළා. (එෆී. 4:16) අප යෙහෝවාටත් සැබෑ නමස්කාරයටත් ප්‍රේම කරන නිසා සහයෝගයෙන් ක්‍රියා කරමින් ශුභාරංචිය දේශනා කිරීමටත් එක්රැස්වීම් සහ රාජ්‍ය ශාලා නඩත්තුවටත් හොඳින් සහය දීමට හැකියි.