දේවසේවකයන් වීමට ඔබේ දරුවන්ව පුහුණු කරන්න
1. ගීතාවලිය 148:12, 13හි සඳහන් වන ආකාරයට දෙමාපියන් කළ යුත්තේ කුමක්ද?
1 යෙහෝවා දෙවිට ප්‍රශංසා කරන්න කියා දේවවචනයේ දරුවන්ට ආරාධනා කර තිබෙනවා. (ගීතා. 148:12, 13) ඒ සඳහා දෙමාපියන් තම දරුවන්ට දෙවි ගැනත් ඔහුගේ නීති ගැනත් උගන්වනවාට වඩා වැඩි දෙයක් කරනවා. එනම් දේවසේවකයන් වීමට ඔවුන්ව පුහුණු කරනවා. දෙමාපියෙනි, ඔබට එය ක්‍රමානුකූලව කරන්න පුළුවන් කොහොමද?
2. දෙමාපියන්ගේ ආදර්ශය දරුවන්ට බලපාන්නේ කොහොමද?
2 ඔබේ ආදර්ශය: ගිඩියොන් තම භටයන් 300දෙනාට පැවසුවේ “මා කරන දේ බලා ඔබත් ඒ විදිහටම කරන්න” කියායි. (විනි. 7:17) දරුවන්ද දෙමාපියන් කරන දේ බලා ඒ විදිහටම කරන්න උත්සාහ කරනවා. රාත්‍රි කාලයේ රැකියාවක නිරත වන එක් පියෙක් සිකුරාදා රාත්‍රියේ වැඩ කර සෙනසුරාදා උදෑසන නිවසට පැමිණ නිදාගන්නවා වෙනුවට කොතරම් මහන්සියක් දැනුණත් දරුවන් සමඟ සේවයේ හවුල් වෙනවා. ඒ ආකාරයට ඔහු වචනයක්වත් නොපවසා දේවසේවයට ජීවිතයේ මුල් තැන දිය යුතු බව තම දරුවන්ට උගන්වනවා. (මතෙ. 6:33) යාච්ඤා කිරීම, බයිබලය කියවීම, රැස්වීම්වලදී අදහස් දැක්වීම හා දේශනා සේවයේ හවුල් වීම වැනි නමස්කාරයේ විවිධ අංගවල ඔබ සතුටින් යෙදෙනවා ඔබේ දරුවන් දකිනවාද? දරුවන් වෙනුවෙන් පරිපූර්ණ ආදර්ශයක් තබන්න ඔබට බැරි බව ඇත්තයි. නමුත් දෙවිට සේවය කරන්න කියා ඔබ ඔබේ දරුවන්ට උගන්වද්දී ඔබත් එහි උද්‍යෝගයෙන් හවුල් වෙනවා ඔවුන් දකිනවා නම් ඔවුන්ද එලෙසම කරන්න උනන්දු වන බව මතක තබාගන්න.—ද්වි. 6:6, 7; රෝම 2:21, 22.
3. දරුවන්ගේ වයසට අනුව ලබා දිය හැකි මෙන්ම අත් කරගැනීමට උපකාර කළ හැකි ඉලක්ක මොනවාද?
3 වයසට ගැළපෙන ඉලක්ක දෙන්න: කතා කරන්න වගේම ඇවිදින්න, ඇඳුම් අඳින්න වැනි දේවල් තනියම කරන්න දෙමාපියන් තම දරුවන්ට කුඩා කල සිටම පුරුදු කරනවා. දරුවන් විවිධ වයස් මට්ටම්වලට පැමිණෙන විට ඔවුන්ගේ වයසට ගැළපෙන ඉලක්ක ලබා දෙනවා. දෙමාපියෙනි, ඔබත් ඔබේ දරුවන්ට ඔවුන්ගේ වයසට හා හැකියාවන්ට ගැළපෙන ආකාරයෙන් දෙවිට කරන සේවය තුළ ඉලක්ක ලබා දෙනවාද? (1 කොරි. 9:26) රැස්වීම්වලදී ඔවුන්ගේම වචනවලින් අදහස් දැක්වීමටත් සේවා පාසැලෙන් ලැබෙන පැවරුම් තනිවම සූදානම් කරගැනීමටත් ඔබ ඔවුන්ට උගන්වනවාද? (ගීතා. 35:18) දේවසේවයේ විවිධ අංගවල හවුල් වීමට ඔවුන්ව පුහුණු කරනවාද? බව්තීස්ම වීමට හා පූර්ණකාලීන සේවය තෝරාගැනීමට ඔබ ඔවුන්ට ඉලක්ක දෙනවාද? සතුටින් හා උද්‍යෝගයෙන් දෙවිට සේවය කරන අයව ඇසුරු කිරීමට ඔබ ඔබේ දරුවන්ට අවස්ථා උදා කර දෙනවාද?—හිතෝ. 13:20.
4. බාල වයසේ සිට පුහුණුව ලැබූ දරුවන් පසු කාලයේදී ප්‍රයෝජන ලබන්නේ කොහොමද?
4 “දෙවියනි, බාල වයසේ පටන් ඔබ මාගේ ගුරුවරයාය. ඔබ කර ඇති පුදුමාකාර දේවල් ගැන මම අද වන තුරුත් කතා කරමි” කියා ගීතිකාකරු පැවසුවා. (ගීතා. 71:17) දෙමාපියෙනි, ඔබේ දරුවන්ව බාල වයසේ පටන් දේවසේවකයන් වීමට පුහුණු කරන්න. ඔවුන් වැඩිහිටියන් වූ පසුත් එම පුහුණුව ඔවුන්ට ප්‍රයෝජනවත් වන බව නිසැකයි.—හිතෝ. 22:6.