සිහි කිරීමේ ආරාධනා පත්‍ර බෙදා දීම ඇරඹෙන්නේ අප්‍රියෙල් 2වනදා සිටයි
1. සිහි කිරීමේ ආරාධනා පත්‍ර බෙදාහරින්නේ කවදා සිටද? එය වැදගත් ඇයි?
1 මෙම වසරේ වැදගත්ම රැස්වීම සඳහා ආරාධනා පත්‍ර බෙදාහරින්නේ අප්‍රියෙල් 2 සිට 17 දක්වායි. සෑම වසරකම කරන මෙම ආරාධනයට බොහෝදෙනෙක් හොඳ ප්‍රතිචාරයක් දක්වා තිබෙනවා. එක් කාන්තාවක් අපගේ ශාඛා කාර්යාලයේ සහෝදරයෙකුව අමතා මෙසේ පැවසුවා. “මම ගෙදර ආපු ගමන් දැක්කා ඔයාලගේ ආරාධනා පත්‍රයක් අපේ දොර යටින් දාලා තියෙනවා. මම ඒකට යන්න ආසයි. ඒක තියෙන්නේ කීයටද කියලා කියන්න පුළුවන්ද?” එවිට ඒ සහෝදරයා එම පත්‍රිකාවේ වේලාව සටහන් කර තිබෙන තැන ඇයට පැවසුවා. “මම වරද්දන්නේ නැතුව අද ඒකට යනවා” කියා ඇය ස්ථිරව කියා සිටියා.
2. මෙම පත්‍රිකාව ඉදිරිපත් කරන්න පුළුවන් කොහොමද?
2 ඉදිරිපත් කරන ආකාරය: මෙම ආරාධනා පත්‍රය බෙදාහැරීමට තිබෙන්නේ ඉතා කෙටි කාලයක් නිසා එය කෙටියෙන් හඳුන්වා දීම සුදුසුයි. ඔබට මෙසේ පැවසිය හැකියි. “ආයුබෝවන්, අපි ලෝකෙ පුරා හැම අවුරුද්දකම පවත්වන වැදගත් සැමරීමකට ඔයාලගේ මුළු පවුලටම ආරාධනා කරන්නයි ආවේ. ඒක තියෙන්නේ අප්‍රියෙල් 17වෙනි ඉරිදා. [ආරාධනා පත්‍රය අතට දෙන්න.] එදාට තමයි අපි යේසුස්ගේ මරණය සිහි කරන්නේ. යේසුස්ගේ ජීවිත පූජාවෙන් අපිට ලැබෙන ප්‍රයෝජන ගැන විස්තර කරන බයිබලය මත පදනම් කතාවක් එදාට දෙනවා. ඒක තියෙන තැන සහ වේලාව මෙතන තියෙනවා.”
3. හැකි තරම් පිරිසකට ආරාධනා කිරීමට කුමක් කළ හැකිද?
3 ඔබේ සභාවට විශාල ප්‍රදේශයක් පවරා තිබෙනවා නම් කිසිවෙක් නැති නිවෙස්වල ආරාධනා පත්‍රයක් තබා එන්න කියා වැඩිමහල්ලන් නිර්දේශ කිරීමට ඉඩ තිබෙනවා. නැවත බැලීම්වලට, බයිබල් පාඩම්වලට, රැකියා ස්ථානයේ අයට, පාසැල් මිතුරන්ට, නෑදෑයන්ට, අසල්වාසීන්ට සහ දන්නා හඳුනන වෙනත් අයට ආරාධනා කිරීමට අමතක කරන්න එපා. සතිඅන්තවල සේවයේ යන විට සුදුසු අවස්ථාවලදී ආරාධනා පත්‍රය සමඟ සඟරාද ඉදිරිපත් කළ හැකියි. මෙම විශේෂ සේවයේ වැඩියෙන් හවුල් වීම සඳහා අප්‍රියෙල් මාසයේදී ඔබට උපකාරික පුරෝගාමි සේවයේ හවුල් විය හැකිද කියා සිතා බලන්න.
4. උනන්දුව දක්වන අයට අප ආරාධනා කළ යුත්තේ ඇයි?
4 එම ආරාධනය පිළිගෙන පැමිණෙන අය එදාට මොන තරම් දේවල් ඉගෙනගනියිද! යේසුස්ගේ ජීවිත පූජාව මගින් දෙවි පෙන්වා තිබෙන ප්‍රේමය ගැන ඔවුන් ඉගෙනගනියි. (යොහ. 3:16) දේවරාජ්‍යය මගින් මිනිස් වර්ගයාට ආශීර්වාද ලැබෙන ආකාරයද ඔවුන් තේරුම්ගනියි. (යෙසා. 65:21-23) එමෙන්ම බයිබල් පාඩමක් පටන්ගැනීම සඳහා පරිවාරකයෙකු හමු වන ලෙසද ඔවුන්ට ආරාධනා කරයි. අවංක හදවත් ඇති බොහෝදෙනෙක් මෙම වැදගත්ම අවස්ථාව සැමරීමට අප හා එක් වීම අපේ බලාපොරොත්තුවයි!