ප්‍රශ්න පෙට්ටිය

◼ ප්‍රචාරිකාවක් දොරකඩ අසල සිට බයිබල් පාඩමක් කරද්දී ඇය සමඟ ප්‍රචාරකයෙක් සිටිනවා නම් ඇය හිස වසාගත යුතුද?

ප්‍රචාරිකාවක් බයිබල් පාඩමක් කරද්දී ප්‍රචාරකයෙක් ඇය සමඟ සිටිනවා නම් ඇය හිස වසාගත යුතුයි. (1 කොරි. 11:3-10) ‘“දෙවිගේ ප්‍රේමය”’ පොතේ 240වෙනි පිටුවේ 3වෙනි ඡේදයේ මෙසේ සඳහන් වෙනවා. “බව්තීස්ම වූ සහෝදරයෙකු සමඟ බයිබල් පාඩමකට යෑමට සහෝදරියකට අවස්ථාවක් උදා විය හැකියි. ඒ සෑම අවස්ථාවක්ම ක්‍රිස්තියානි සභාවේ සැලැස්ම යටතේ සිදු වන දේවල් නිසා සහෝදරිය ඇගේ හිස වසාගත යුතුයි. තමන් ඉටු කරන්නේ සාමාන්‍යයෙන් සහෝදරයෙකු විසින් ඉටු කළ යුතු වගකීමක් බව ඇය පිළිගන්නා බවට එය සංකේතයක්.” පාඩම පවත්වන්නේ දොරකඩ අසලදී නිවස තුළදී හෝ වෙනත් තැනකදී වුණත් මෙම මඟ පෙන්වීම පිළිපැදිය යුතුයි.

සහෝදරියක් ප්‍රචාරකයෙක් සමඟ දොරකඩ අසල සිට නැවත බැලීම් කරද්දී හිස වසාගැනීම අවශ්‍ය නැහැ. නැවත බැලීමකදී කරන්නේ බයිබල් පාඩමක් කරන විදිහ පෙන්වීම හෝ බයිබල් පාඩම සඳහා යොදාගන්නා ප්‍රකාශනයක තොරතුරු සාකච්ඡා කිරීම වැනි දෙයක් වුණත් හිස වසාගත යුතු නැහැ. සාමාන්‍යයෙන් දොරකඩ අසල සිට කරන සාකච්ඡාවක් බයිබල් පාඩමක් බවට පත් වෙන්නේ නැවත බැලීම් කිහිපයක් කළාට පසුවයි. ඒ නිසා කොයි අවස්ථාවේදීද හිස වසාගත යුත්තේ කියා සහෝදරිය තීරණය කළ යුතුයි.