පාරාදීස පොළොවක් අත ළඟයි!

ලෝකෙටම එක ආණ්ඩුවක්

ළඟදීම දෙවියන්ගේ රාජ්‍යයෙන් මේ පොළොව පාලනය කරන්න පටන්ගන්නවා. ඒ කාලෙදි පොළොවේ හැමෝම සාමයෙන්, සමඟියෙන් ජීවත් වෙනවා. ඒ වගේම එයාලා කරන වැඩවලින් එයාලට ලොකු සතුටක් ලැබෙනවා. ඒ රාජ්‍යයේ රජ විදිහට දෙවියන් පත් කරලා තියෙන්නේ යේසුස් ක්‍රිස්තුස්ව. යේසුස් අද ඉන්න පාලකයන්ට වඩා ගොඩක් වෙනස්. ඔහු හැම දෙයක්ම කරන්නේ ආදරෙන් පෙලඹිලයි. ඒ වගේම ඔහු හරිම කරුණාවන්ත, සාධාරණ රජ කෙනෙක්.​—යෙසායා 11:4.

ලෝකයම සමඟියෙන්

ඒ කාලෙදි රට, ජාතිය, සංස්කෘතිය වගේ දේවල් නිසා මිනිස්සු අතර බෙදීම් තියෙන්නේ නැහැ. හැමෝම එක පවුලක් වගේ ජීවත් වෙනවා. (එළිදරව් 7:9, 10) එයාලා දෙවියන්ටත් ගොඩක් ආදරෙයි. ඒ වගේම දෙවියන් මුලදී බලාපොරොත්තු වුණ විදිහට මේ පොළොව ලස්සන තැනක් කරන්න එයාලා හැමෝම එකතු වෙලා වැඩ කරනවා.​—ගීතාවලිය 115:16.

සුරක්ෂිත පරිසරයක්

දෙවියන්ගේ රාජ්‍යයෙන් මේ පොළොව පාලනය කරද්දී කිසිම ස්වාභාවික විපතක් සිද්ධ වෙන්නේ නැහැ. මොකද පොළොවේ නිර්මාතෘ විදිහට දෙවියන්ට හැම දේම පාලනය කරන්න බලය තියෙනවා. (ගීතාවලිය 24:1, 2) යේසුස් මේ පොළොවේ හිටපු කාලෙදි දරුණු කුණාටුවක් නවත්වලා ස්වාභාවික විපත් නතර කරන්න දෙවියන් ඔහුට බලය දීලා තියෙනවා කියලා පෙන්නුවා. (මාක් 4:39, 41) ඒ නිසා යේසුස් මේ පොළොව පාලනය කරන කාලෙදි ස්වාභාවික විපත් ඇති වෙයි කියලා බය වෙන්න අපිට කිසිම හේතුවක් නැහැ. ඒ කාලෙදි කවුරුත් පරිසරයට, සතුන්ට කිසිම හානියක් කරන්නේ නැහැ.​—හොෂෙයා 2:18.

නිරෝගී ජීවිතයක් සහ ඇති තරම් කෑම

හැමෝටම හොඳ සෞඛ්‍යයක් තියෙන්න යනවා. කවුරුත් අසනීප වෙන්නේ නැහැ. වයසට යන්නේ නැහැ. මැරෙන්නේ නැහැ. (යෙසායා 35:5, 6) මුළු පොළොවම ඒදන් උයන වගේ ලස්සන, පිරිසිදු, සශ්‍රීක තැනක් වෙනවා. (උත්පත්ති 2:9) ඒ නිසා අතීතයේදී දෙවියන්ගේ සෙනඟ වුණ ඊශ්‍රායෙල්වරුන්ට වගේ පාරාදීසේදී කාටවත් “කෑමෙන් කිසි හිඟයක්” වෙන්නේ නැහැ.​—ලෙවී කතාව 26:4, 5.

පොළොව පුරා සාමය සහ සුරක්ෂිතභාවය

දෙවියන්ගේ රාජ්‍යය පොළොව පාලනය කරද්දී මුළු ලෝකේ පුරාම සාමය තියෙන්න යනවා. කවුරුත් කාටවත් අසාධාරණ විදිහට සලකන්නේ නැහැ. යුද්ධ කරන අයවත් බලය වැරදි විදිහට පාවිච්චි කරන අයවත් ඉන්න යන්නේ නැහැ. ඒ වගේම හැමෝටම සතුටින් ජීවත් වෙන්න ඕන කරන හැම දෙයක්ම ඒ කාලෙදි තියෙනවා. ඒ ගැන බයිබලේ මේ වගේ පොරොන්දුවක් දීලා තියෙනවා. “ඔවුහු එක් එක් කෙනා තම තමාගේ මිදිවැල යටද අත්තික්කා ගස යටද සුව සේ කල් ගෙවනු ඇත. කිසිවෙක් ඔවුන්ව බියගන්වන්නේ නැත.”​—මීකා 4:3, 4.

තමන්ටම කියලා ගෙයක් සහ සතුටින් කරන්න වැඩ

හැම පවුලකටම තමන්ටම කියලා ගෙයක් තියෙන්න යනවා. ඒ වගේම අපි කරන හැම වැඩකින්ම ලොකු සතුටක් අද්දකින්න පුළුවන් වෙනවා. ඒ කාලේ ජීවත් වෙන අයගේ ‘වෙහෙස මහන්සිය කිසිවිටෙක අපතේ යන්නේ නැහැ’ කියලා බයිබලේ කියනවා.​—යෙසායා 65:21-23.

හොඳම අධ්‍යාපනය

“යෙහෝවා දෙවි වන මා පිළිබඳ දැනුමෙන් පොළොව පිරී තිබෙන්නේය” කියලා දෙවියන් පොරොන්දු වෙනවා. (යෙසායා 11:9) යෙහෝවා දෙවියන්ගේ ලස්සන නිර්මාණ දිහා බලලා ඔහුගේ ප්‍රඥාව ගැන තවත් ඉගෙනගන්න ඒ කාලෙදි මිනිසුන්ට අවස්ථාව ලැබෙනවා. කවුරුත් එයාලට තියෙන දැනුම පාවිච්චි කරලා අවි ආයුධ වගේ දේවල් හදන්නෙවත් අනිත් අයට හානියක් කරන්නෙවත් නැහැ. (යෙසායා 2:4) ඒ වෙනුවට අනිත් අයත් එක්ක සාමෙන් ඉන්නේ කොහොමද කියලත් මේ පොළොව ආදරෙන් රැකබලා ගන්නේ කොහොමද කියලත් එයාලා කැමැත්තෙන්ම ඉගෙනගන්නවා.​—ගීතාවලිය 37:11.

හැමදාටම ජීවත් වෙන්න අවස්ථාව

දෙවියන් මේ පොළොව මෙච්චර ලස්සනට නිර්මාණය කළේ මිනිස්සු ඒකෙ හැමදාම සතුටින් ජීවත් වෙනවා දකින්න ආස නිසයි. (ගීතාවලිය 37:29; යෙසායා 45:18) ඒ දේ ඉටු කරන්න ‘මරණය සදහටම ගිල දමනවා’ කියලා දෙවියන් පොරොන්දු වෙලා තියෙනවා. (යෙසායා 25:8) ඒ වගේම “මරණයද තවත් නොවන්නේය. වැලපීමද හැඬීමද වේදනාවද තවත් නොවන්නේය” කියලා බයිබලේ කියනවා. (එළිදරව් 21:4) ඒ කාලෙදි මේ දුෂ්ට සමාජයේ විනාශයෙන් ගැලවෙන අයටත් දෙවියන් ආපහු ජීවිතය දෙන මැරුණු බිලියන ගාණකටත් මේ පොළොවේ හැමදාටම ජීවත් වෙන්න අවස්ථාව ලැබෙනවා.​—යොහන් 5:28, 29; ක්‍රියා 24:15.

අද ඉන්න මිලියන ගාණක් අය ඉස්සරහට එන්න යන පාරාදීසේ ජීවත් වෙන්න දැන් ඉඳලම ලෑස්ති වෙනවා. එයාලා අතින් දුර්වලකම් වුණත් දෙවියන් කැමති විදිහට ජීවිතේ ගත කරන්න එයාලා පුළුවන් උපරිමෙන් මහන්සි වෙනවා. ඒක කරන්න එයාලට උදව් වෙන්නේ යෙහෝවා දෙවියන් ගැනත් යේසුස් ගැනත් දිගටම ඉගෙනගන්න එකයි.​—යොහන් 17:3.

ළඟ ළඟ එන විනාශයෙන් බේරිලා හැමදාටම ඒ ලස්සන පාරාදීසයේ සතුටින් ජීවත් වෙන්න කරන්න ඕනෙ මොනවාද කියලා ඔයා දැනගන්න කැමතිද? එහෙනම් ‘හැමදාටම සතුටින් ජීවත් වෙන්න!’ පොතෙන් යෙහෝවා දෙවිගේ සාක්ෂිකරුවෙක් එක්ක නොමිලේ පවත්වන බයිබල් පාඩමක් පටන්ගන්න.