මහලු වයසේ ඉන්න ඔයා සභාවට සම්පතක්

ඔයාටත් තරුණ කාලේ කළා වගේ දේවල් දැන් කරන්න බැරුව ඇති. ඔයා අවුරුදු ගාණක් පුරා විශ්වාසවන්තව සේවේ කළත් ඒ කාලේ කරපු සේවේ එක්ක දැන් ඔයා කරන සේවේ සසඳලා බලද්දී ඔයාට ලොකු දුකක් දැනෙනවා ඇති. එහෙමනම් ඒ දුකෙන් ගොඩ ඇවිත් දිගටම සතුටින් ඉන්න ඔයාට කරන්න පුළුවන් මොනවාද?

යෙහෝවා ඔයාගෙන් ඉල්ලන දේ

යෙහෝවා ඔයාගෙන් ඉල්ලන්නේ මොනවාද කියලා ද්විතීය කතාව 6:5 මෙහෙම කියනවා. ‘ඔයාගේ දෙවි වන යෙහෝවාට මුළු හදවතින්ම ආදරේ කරන්න. ඒ ආදරේ ඔයාගේ මුළු ජීවිතෙන්ම දකින්න තියෙන්න ඕනේ. ඔහුට තියෙන ආදරේ වෙනුවෙන් ඔයාගේ මුළු ශක්තියම වැය කරන්න.’

ඒ පදයේ කියන විදිහට යෙහෝවා ඔයාගෙන් බලාපොරොත්තු වෙන්නේ ඔහු වෙනුවෙන් දැන් ඔයාට දෙන්න පුළුවන් හොඳම දේ ඔයා දෙයි කියලයි. ඒක ඔයාට උදව් වෙනවා ඔයා දැන් කරන සේවේ අනිත් අය කරන සේවේ එක්කවත් ඔයා තරුණ කාලේ කරපු සේවේ එක්කවත් සන්සන්දනය කරන්නේ නැතුව ඉන්න.

මේ ගැන හිතන්න. තරුණ කාලේදී ඔයාට දෙන්න පුළුවන් හොඳම දේ ඔයා යෙහෝවාට දෙන්න ඇති. දැන් ඔයාට යෙහෝවා වෙනුවෙන් මොනවාද කරන්න පුළුවන්? දැන් ඔයාගේ තත්වය අනුව ඔයා ඔයාට දෙන්න පුළුවන් හොඳම දේ යෙහෝවාට දෙනවා ඇති. ඒ විදිහට හිතුවොත් ඔයාට තේරෙයි ඔයා එදා දුන්න දේම තමයි දැනුත් යෙහෝවාට දෙන්නේ කියලා. ඔයා එදා යෙහෝවාට දුන්නෙත් ඔයාගේ හොඳම දේ. අද දෙන්නෙත් ඔයාගේ හොඳම දේ.

ඔයාගේ අද්දැකීම්වලින් උදව් කරන්න

දැන් ඔයාට කරන්න බැරි දේවල් ගැන හිතනවා වෙනුවට මහලු කෙනෙක් විදිහට ඔයාට අනිත් අයට උදව් කරන්න කොච්චර අවස්ථා තියෙනවාද කියන එක ගැන හිතන්න. තරුණ කාලේදී ඔයාට කරන්න බැරි වුණ, ඒත් මහලු වයසේදී කරන්න පුළුවන් සමහර දේවල් තියෙනවා. උදාහරණෙකට ඔයාට මේ වගේ දේවල් කරන්න පුළුවන්.

ඔයා ලබපු අද්දැකීම් අනිත් අයත් එක්ක බෙදාගන්න. මේ බයිබල් පද ගැන හිතන්න.

දාවිත් රජ මෙහෙම කිව්වා. “දැන් මං මහලුයි. මගේ තරුණ කාලේ ඉඳන් මේ වෙන කල් කිසිම ධර්මිෂ්ඨ කෙනෙක්ව අත්හැරලා දානවාවත් ඔහුගේ දරුවන් කෑම හිඟා කනවාවත් මම දැකලා නැහැ.”—ගීතා. 37:25.

යොෂුවා මෙහෙම කිව්වා. “මං තව වැඩි කාලයක් ජීවත් වෙන එකක් නැහැ. ඔයාලාගේ දෙවි යෙහෝවා දුන්න එක පොරොන්දුවක්වත් ඔහු කඩ කළේ නැහැ කියලා ඔයාලා හොඳින්ම දන්නවා. ඔයාලා වෙනුවෙන් ඔහු ඒ හැම පොරොන්දුවක්ම ඒ විදිහටම ඉටු කළා.”—යොෂු. 23:14.

තරුණ වයසේදී අනිත් අයව දිරිගන්වන්න සමහරවිට ඔයාත් ඒ වගේ දේවල් කියලා ඇති. දාවිත් සහ යොෂුවා කිව්වේ අවුරුදු ගාණක් තිස්සේ එයාලා අහපු දැකපු, පෞද්ගලිකව අද්දැකපු දේවල් ගැනයි. ඒ නිසා එයාලා කියපු දේ හදවතට තව වැඩියෙන් දැනෙනවා.

ඔයාත් අවුරුදු ගාණක් තිස්සේ යෙහෝවාට සේවේ කරන කෙනෙක් නම් යෙහෝවා ඔයා වෙනුවෙන්, අනිත් අය වෙනුවෙන් කරපු දේවල් ඔයා අහලා දැකලා ඇති. ඔයාට පුළුවන් ඒ දේවල් අනිත් අයට කියන්න. යෙහෝවා ඔහුගේ සෙනඟට උදව් කරපු විශේෂ විදිහක් ඔයාට මතකයිද? අනිත් අයත් එක්ක ඒ ගැන කතා කරන්න. එහෙම කරන එකෙන් ඔයාට ලොකු සතුටක් දැනෙයි. ඒ විතරක් නෙවෙයි ඔයා යෙහෝවාට සේවේ කරද්දී ලබපු අද්දැකීම් අහන එක අනිත් අයටත් ලොකු දිරිගැන්වීමක් වෙයි.—රෝම 1:11, 12.

අනිත් අයව දිරිගන්වන්න පුළුවන් තවත් විදිහක් තමයි පුළුවන් හැම වෙලාවකම නමස්කාර මධ්‍යස්ථානයට ගිහින් රැස්වීම්වලට සහභාගි වෙන එක. ඒකෙන් අනිත් අයට වගේම ඔයාටත් ලොකු දිරිගැන්වීමක් ලැබෙනවා. කලින් කතා කරපු සහෝදරි කොනි මෙහෙම කියනවා. “රැස්වීම්වලට යන එක අධෛර්යය නොවී ඉන්න මට ලොකු උදව්වක්. නමස්කාර මධ්‍යස්ථානයට ගියාම සභාවේ අයගේ ආදරේ මට දැනෙනවා. ඉතිං ඇයි මං අධෛර්යය වෙන්නේ? මගේ අගය පෙන්නන්න මං එයාලට පොඩි පොඩි තෑගිත් දෙනවා. එයාලා මාව දිරිගන්වනවා වගේ මාත් සභාවේ දේවලට හවුල් වෙලා මට පුළුවන් විදිවලින් එයාලව දිරිගන්වනවා.”

ඔයා යෙහෝවා වෙනුවෙන් කරන දේ ඔහුට රත්තරන් වගේ වටිනවා

මහලු වයස නිසා ගොඩක් දේවල් කරන්න බැරි වුණත් යෙහෝවා ආදරේ කරපු හුඟක් අය ගැන බයිබලේ තියෙනවා. සිමියොන් කියන්නේ ඒ වගේ කෙනෙක්. සිමියොන් කියන්නේ යේසුස් ඉපදුණ කාලේ හිටපු මහලු ඊශ්‍රායෙල්වරයෙක්. එයා දේවමාලිගාවට ගියාම දකින්න ඇති තරුණ අය දේවමාලිගාවේ දුවලා පැනලා ගොඩක් වැඩ කරනවා. සමහරවිට සිමියොන්ට හිතෙන්න ඇති ‘දැන් මට වැඩි දෙයක් කරගන්න බැරි නිසා යෙහෝවාට මගෙන් වැඩක් නෑ’ කියලා. හැබැයි යෙහෝවා එයා දිහා බැලුවේ එහෙම නෙවෙයි. යෙහෝවා එයාව දැක්කේ “දෙවියන් ගැන ලොකු ගරුබියක් තිබුණ, ධර්මිෂ්ඨ කෙනෙක්” විදිහට. ඒ නිසයි යෙහෝවා සිමියොන්ට පුංචි යේසුස්ව දකින්නත් එයා තමයි අනාගත මෙසියස් වෙන්නේ කියන අනාවැකිය කියන්නත් අවස්ථාව දුන්නේ. (ලූක් 2:25-35) යෙහෝවා බැලුවේ සිමියොන්ට තිබුණ දුර්වල ශරීරය දිහා නෙවෙයි, එයාට තිබුණ ශක්තිමත් විශ්වාසය දිහායි. ඒ නිසයි ‘දෙවියන්ගේ බලය එයා තුළ ක්‍රියාත්මක වුණේ.’

මහලු වයස නිසා ඔයාට කලින් තරම් දේවල් කරගන්න බැරි වුණත් ඔයා විශ්වාසවන්තව කරන සේවේ යෙහෝවා ගොඩක් අගය කරනවා. “මොකද දෙවියන් බලාපොරොත්තු වෙන්නේ කෙනෙක් තමන්ට පුළුවන් දේ දෙන එක මිසක් තමන්ට නැති දේ දෙන එක නෙමෙයි.”—2 කොරි. 8:12.

ඒක මතකයේ තියාගෙන ඔයාට කරන්න පුළුවන් දේ ගැන හිතන්න. උදාහරණෙකට පොඩි වෙලාවකට හරි සේවේ කරන්න පුළුවන් මොන වගේ විදිවලින්ද කියලා හිතන්න. එහෙම නැත්නම් සහෝදරයෙක්ට හරි සහෝදරියකට හරි කෝල් එකක් දීලා නැත්නම් කාඩ් එකක් යවලා දිරිගන්වන්න ඔයාට පුළුවන්ද? ඔයා ආදරේ පෙන්නන්න කරන පුංචි දේකට වුණත් පුළුවන් ඔයාගේ සහෝදර සහෝදරියන්ට ලොකු දිරිගැන්වීමක් වෙන්න. විශේෂයෙන්ම ඔයා වගේ කාලයක් තිස්සේ යෙහෝවාට සේවේ කරන කෙනෙක් ඒ වගේ දෙයක් කරද්දී එයාලට ඒක ගොඩක් දැනෙනවා.

කලින් තරම් හයිය හක්තිය නැති වුණත් ඔයාට පුළුවන් උපරිමයෙන් දේශනා සේවේ හවුල් වෙලා සතුට අද්දකින්න. “එයාගේ ජීවිතේ බේරුණා” කියන කොටුවේ තියෙන නැඟෙනහිර අප්‍රිකාවේ අද්දැකීම ඒකට හොඳ උදාහරණයක්.

ඔයා අවුරුදු ගාණක් විශ්වාසවන්තව කරපු සේවේ, දැනටත් කරන සේවේ නිසා හුඟක් අය දිරිගැන්වෙනවා කියන දේ කවදාවත් අමතක කරන්න එපා. මෙච්චර කල් ඔයා විඳදරාගෙන සේවේ කරන එක හොඳ ආදර්ශයක්. ඒ නිසා යෙහෝවා ‘ඔයා කරපු සේවයවත් දෙවියන්ගේ නමට ඔයා පෙන්නපු ආදරේවත් කවදාවත් අමතක කරන්නේ නැහැ. එහෙම කරන්න ඔහු අධර්මිෂ්ඨ කෙනෙක් නෙමෙයි. ඔයා ශුද්ධ අය වෙනුවෙන් සේවය කළෙත් දිගටම එයාලා වෙනුවෙන් සේවය කරන්නෙත් දෙවියන්ගේ නමට තියෙන ආදරේ නිසයි.’—හෙබ්‍රෙ. 6:10.

පුළුවන් තරම් විදිවලින් උදව් කරන්න

කරපු සමීක්ෂණවලින් ඔප්පු වෙලා තියෙනවා අනිත් අයට නිතරම උදව් පදව් කරන මහලු අයගේ ශරීර සෞඛ්‍යය හොඳ තත්වේ තියෙනවා කියලා. ඒ වගේම එයාලට පැහැදිලිව හිතන්න පුළුවන් කියලත් එයාලාගේ ආයු කාලේ වැඩියි කියලත් ඔප්පු වෙලා තියෙනවා.

ඇත්ත, අනිත් අය වෙනුවෙන් දේවල් කළා කියලා මහලු වයසේදී අද්දකින්න වෙන හැම අමාරුකමක්ම නැති වෙන්නේ නැහැ. ඒක කරන්න පුළුවන් දේවරාජ්‍යයට විතරයි. මොකද මහලු වයසට සහ මරණයට හේතු වෙලා තියෙන පව්කාරකම සම්පූර්ණයෙන්ම නැති කරලා දාන්නේ දේවරාජ්‍යයෙන්.—රෝම 5:12.

අනිත් අයට යෙහෝවාව අඳුරගන්න උදව් කරන එක ඇතුළු ඔයා යෙහෝවා වෙනුවෙන් කරන සේවේ ඔයාට උදව් වෙනවා ඔයාගේ බලාපොරොත්තුව ශක්තිමත්ව තියාගන්න. ඒ විතරක් නෙවෙයි ඒක ඔයාගේ ශරීර සෞඛ්‍යයටත් හොඳයි. මහලු සහෝදර සහෝදරියනි, ඔයාලා යෙහෝවා වෙනුවෙන් කරන සේවේ ඔහු ගොඩක් අගය කරනවා කියලා මතක තියාගන්න. ඔයා සභාවේ අයටත් වටිනා සම්පතක්.